1, 2. a) ¿Tlenon kuajli tikmatstokej akin tiktekichiuiliaj Jehová? b) ¿Tlenon tikitaskej ipan yejuin tlamachtijli?

 AKIN tiktekichiuiliaj Jehová kuajli tikmatstokej ika tikixnamikiskej tlen ouijtika. Tikmatstokej tlen Biblia kijtoua, ika “para se kalakis kampa Dios tlamandaroua noneki kijyouis miyek tlajtlamach” (Hech. 14:22). Niman noijki kuajli tikmatstokej ika san ipan yenkuik tlaltikpaktli xok tikpiyaskej tlauejli pampa ompa “xok onyas mikilistli, nion chokistli, nion ajmantli, nion kokolistli” (Apoc. 21:4).

² Maski Jehová kitekauilia matikpiyakan tlauejli, techpaleuiya matitlaxikokan. Matikitakan tlen Pablo okimijli tokniuan akin chantiyaj Roma. Kachtopa okiteneuj seki tlen yejua kixnamiktoya niman seki tlen kixnamiktoyaj tokniuan. Sakin ijkin okimijli: “Ipan nochi in, tikmatstokej ika titetlanij nochipa itechkopa Cristo yejuan otechtlajsojtlak” (Rom. 8:35-37). Yejuin kijtosneki ika Jehová uelis techpaleuis ijkuak tikixnamiktokej se tlauejli. Ipan yejuin tlamachtijli, tikitaskej kenon Jehová okipaleui José ijkuak okixnamik tlen ouijtika niman noijki tikitaskej kenon Jehová techpaleuiya aman.

3. ¿Kenon san totoka onopatlak inemilis José?

³ Nochimej kimatiyaj ika Jacob melak kitlasojtlaya ikoneuj José (Gén. 37:3, 4). Ika yejon, ikniuan José akin más iuejueyimej  katkaj opeujkej kinexikolitaj José. Niman ijkuak sekimej tlasemankej madianitas ompa ika opanokej, yejuamej okiminemakiltijkej imikniuj José. Yejon tlakamej uejka oyajkej, oyajkej Egipto. Niman ompa oksejpa okinemakakej José, aman okinemakiltijkej Potifar, se tlakatl akin ueyixtoya. Inemilis José san totoka onopatlak. Ijkuak nemiya ichan, itaj melak kitlasojtlaya; niman aman nemiya Egipto, ken se tlakeuajli (Gén. 39:1).

4. Ijkon ken José, ¿tlenon ueliskia tikixnamikiskej?

⁴ Biblia kijtoua: “Nochimej ajsi tonajli ijkuak kiseliaj tlen kuajli noso xkuajli” (Ecl. 9:11). Kemantika, tlauejli tlen tikpiyaj san noijki tlen oksekimej tlaltikpakchanejkej kipiyaj (1 Cor. 10:13). Noso kemantika techpijpinaujtiaj, techixnamikij noso techtlaueltokaj san pampa tiinomachtijkauan Cristo (2 Tim. 3:12). Maski san tlenon tikixnamiktoskej, Jehová uelis techpaleuis. Matikitakan kenon okipaleui José.

5. ¿Tlenon okitak Potifar itech José? (Génesis 39:2-6).

⁵ (Xpoua Génesis 39:2-6). Potifar okitak ika José melak tekitki katka niman kuajli kichiuaya itekiyo. Niman okasikamat tleka ijkon kichiuaya. Okitak ika Jehová “nemiya iuan José, niman kiteochiuaya, niman nochi on tlen kichiuaya kisaya kuajli”. b Sakin, Potifar okichiuj ika José matlayekana ichan niman Jehová okiteochiuj Potifar.

6. ¿Kanaj kenon nomachiliaya José?

⁶ Matikonnemilikan kenon nomachiliaya José. ¿Tlenon yemelak kinekiya? ¿Kinekiya makita Potifar kenon melak chikauak tekitiya? Ka. Kanaj José xok kinekiya tekitis ken tlakeuajli pampa yejua kinekiya nokuepas ichan konitas itaj. Niman maski yokitlalijkaj matlayekana ichan Potifar, ok kitekichiuilijtoya se tlakatl akin kinueyichiuaya okseki tajtsitsintin. San ika, Jehová okitekauili ika José ok makitekichiuilijto Potifar. Niman José nion xkinemiliaya ika ok kixnamikiskia tlen melak xkuajli.

7. ¿Tleka uelis tikijtoskej ika José ipan onochiuj tlen más ouijtika? (Génesis 39:14, 15).

⁷ Génesis capítulo 39 kijtoua ika isiuauj  Potifar okuelitak José, niman miyekpa okijli iuan manoteka. San ika, José xkeman okinek. Yejon siuatl melak okualan niman okijto ika José kinekiya kinajnauiltis (xpoua Génesis 39:14, 15). Ijkuak Potifar okimat, otlanauati makitsakuakan José, niman ouejkauj tsauktoya seki xiuitl (Gén. 39:19, 20). ¿Kenon katka kampa José tsauktoya? Tlajtojli cárcel tlen José okitekitilti ika hebreo uelis kijtosnekis “tlakoyonki”. Kuakon, uelis tikijtoskej ika kampa José tsauktoya tlayouatok katka, niman yejon kichiuaya melak manajmana (Gén. 40:15). Noijki, Biblia kijtoua ika José okikxisalojkej niman okikechsalojkej seki tonaltin (Sal. 105:17, 18). Aman ipan nochiujtoya tlen más ouijtika: xok katka se tlakeuajli akin tlayekanaya, aman tsauktoya.

8. ¿Tlenon uelis kuajli tikmatstoskej maski tikixnamikiskej tlen más ouijtika?

⁸ ¿Yotikixnamijkaj itlaj tlen xkuajli niman otikitakej ika xnoyektlaliaya maski miyekpa tiknotsayaj Jehová? Yejon ueliskia panos. Tinemij kampa Satanás tlayekana, niman Jehová kitekauilia topan manochiua tlen xkuajli (1 Juan 5:19). San ika, uelis kuajli tikmatstoskej ika toTajtsin kita nochi tlen topan nochiua niman kinektika techpaleuis (Mat. 10:29-31; 1 Ped. 5:6, 7). Noijki yotechijli: “Xkaman nimitskauas nion nimitstlalkauis” (Heb. 13:5). Jehová uelis techpaleuis matitlaxikokan maski tlen tikixnamikij ueliskia nesis ika xuelis noyektlalis. Yejon tlen ipan onochiuj José.

9. ¿Kenon ones ika Jehová nemiya iuan José ijkuak tsauktoya? (Génesis 39:21-23).

⁹ (Xpoua Génesis 39:21-23). Maski José kixnamiktoya tlen melak ouijtika, Jehová okipaleui. ¿Kenon okipaleui? Ijkuak José tekitiya itech Potifar, Jehová okichiuj ika Potifar matlaneltoka itech José. Niman ijkuak José okitsajkej, Jehová okichiuj ika akin tlayekanaya ipan cárcel makitlali José para makinyekana sekimej akin tsauktoyaj. Niman Biblia kijtoua: “On carcejtlajpixki xok itlaj ika nokuaxotlaltiaya de on tlen onkatka imak José”. Yejon okipaleui José pampa aman xok san tlanemilijtoskia ika tsauktoya, aman ueliskia tlanemilis itech itlaj tlen tepaleui. Melak temojkatlachialti ika José okitlalijkej makinyekana akin tsauktoyaj maski okijtouilijkaj ika kinekiya kinajnauiltis isiuauj se tlakatl akin ueyixtoya. José okimakakej yejuin tekitl pampa ken kijtoua Génesis 39:23, Jehová “nemiya iuan José niman okichiu para nochi ma kisa kuajli”.

10. ¿Kanaj tleka José kimachiliaya ika Jehová xkipaleuijtoya?

¹⁰ Oksejpa matitlanemilikan itech José. Yejua okitsakuatoj maski xokichiujka itlaj tlen xkuajli, san ika ¿kimachiliaya José ika nochi tlen kichiuaya kuajli onkisaya maski ijkon ipan panotoya?, ¿tlenon yemelak kinekiya José?, ¿kinekiya ika akin tlayekanaya ipan cárcel makita ika kuajli tekitiya? Ka. Yejua más kinekiya makikixtikan kampa tsauktoya. Yejua ika, okijli se akin iuan tsauktoya niman akin ikisaskia matlajtoti iuan faraón niman ijkon makikixtikan kampa tsauktoya (Gén. 40:14). San ika, pampa yejon tlakatl xnimantsin otlajto iuan faraón itech José, José ok onen ome xiuitl ipan cárcel (Gén. 40:23; 41:1, 14). San ika, Jehová kipaleuijtoya José, ika yejon, nochi tlen kichiuaya kuajli onkisaya. ¿Tleka ijkon tikijtouaj?

11. ¿Tlenon ouel okichiuj José pampa Jehová okipaleui, niman kenon yejon otepaleui manochiua tlen Jehová kinekiya itech Mesías?

¹¹ Ijkuak José tsauktoya, Jehová okichiuj ika tekiuaj de Egipto itlaj makitemiki. Faraón  melak kinekiya kimatis tlenon kijtosnekiya tlen okitemik. Kuakon, ijkuak faraón okimat ika José ueliya kiteijliaya tlenon kijtosneki tlen yakaj kitemiki, otlanauati makanatij. Pampa Jehová okipaleui José, yejua ouel okijli faraón tlenon kijtosnekiya tlen okitemik, niman noijki okijli tlenon nonekiya kichiuas ijkuak nochiuaskia tlen okitemik. Faraón melak okimojkatlachialti tlen okijli José. Niman ijkuak okimat ika Jehová kipaleuijtoya, okitekitlali para makisentlali tlakuajli ompa Egipto (Gén. 41:38, 41-44). Seki xiuitl sakin, melak otlatlasojtik Egipto niman noijki Canaán, kampa chantiyaj ichanejkauan José. Pampa José tlayekanaya Egipto, aman ueliskia kinmakixtis ichanejkauan, akin nochiuaskiaj iuejkachanejkauan Mesías.

12. ¿Kenon Jehová okipaleui José?

¹² Matiknemilikan kenon miyekpa onopatlak inemilis José. ¿Akinon okichiuj ika Potifar makitlali José para matlayekana ichan maski san se tlakeuajli katka? ¿Akinon okichiuj ika akin tlayekanaya ipan cárcel makitlali José para makinyekana akin tsauktoyaj? ¿Akinon okichiuj ika faraón itlaj makitemiki, niman akinon okipaleui José makimati tlen kijtosnekiya tlen okitemik faraón? ¿Akinon okichiuj ika faraón makitekitlali José niman ijkon makisentlali tlakuajli Egipto? (Gén. 45:5). Kuajli nesi ika Jehová yejua akin okipaleui José. Maski ikniuan José kinekiyaj kimiktiskej, Jehová okitekitilti José para manochiua tlen yejua kinekiya.

13. ¿Nochipa itlaj kichiua Jehová para kiyektlalis tlen tikixnamiktokej?

¹³ ¿Tlenon techmachtia tlen ipan onochiuj José? ¿Nochipa itlaj kichiua Jehová para kiyektlalis tlen tikixnamiktokej? ¿Jehová kiyekana nochi tlen panoua ipan tonemilis niman ijkon kichiua makisa itlaj tlen kuajli itech tlen xkuajli tikixnamikij? Ka, Biblia xijkon temachtia (Ecl. 8:9; 9:11). San ika, tlen ipan onochiuj José techmachtia ika ijkuak tikixnamikij tlen ouijtika, Jehová kita tlen topan nochiua niman techkaki ijkuak tiktlajtlaniliaj matechpaleui (Sal. 34:15; 55:22; Is. 59:1). Niman xsan yejon, Jehová noijki techpaleuiya matitlaxikokan ijkuak tikixnamikij tlen ouijtika. ¿Kenon?

14. ¿Kenon techpaleuiya Jehová ijkuak tikixnamikij tlen ouijtika?

 ¹⁴ Miyekpa, Jehová techyolseuiya niman techyolchikaua ijkuak más noneki (2 Cor. 1:3, 4). Tokniuj Eziz, akin ualeua Turkmenistán, okitak kenon Jehová okiyolseui. Yejua tsauktoya ipan cárcel ome xiuitl pampa iteixpantijkauj Jehová. Yejua kijtoua: “Ika kualkan, ijkuak nechuikaskiaj ixpan juez, se tokniuj onechititi Isaías 30:15, kampa kijtoua: ‘Nenkojtitoskej tla xnemomojtiaj niman tla nenkiteititiaj ika nentlaneltokaj’. Yejon tlajtoltin melak onechpaleui maniyolseujto niman nochipa manitlaneltoka itech Jehová. Ijkuak nitsauktoya, nitlanemiliaya ipan yejuin tlaxelojli, niman yejon onechpaleui manitlaxiko”. ¿Tikilnamiki kemanon otikitak kenon Jehová omitspaleui niman omitsyolchikauj ijkuak tiknekiya más mamitspaleuikan?

15, 16. ¿Tlenon techmachtia tlen ipan onochiuj Tori?

¹⁵ Kemantika, ueli tikitaj kenon Jehová yotechpaleui hasta ijkuak yopanok tlen tikixnamikij. Ijkon okitak se tokniuj akin itoka Tori. Ikoneuj, Mason, kipiaya cáncer, niman ijkon ouejkauj chikuasen xiuitl. Sakin, Mason onomikili. Tori melak onoyolkoko, yejua kijtoua: “Niknemilia ika se nantli xuelis kixnamikis okse tlen más ouijtika”. Niman noijki kijtoua: “Nikmatstika ika nochimej tajtin kijtoskiaj ika más titlajyouis ijkuak tikitas kenon kualo se mokoneuj xijkon ken tla tejuamej tikualoskiaj”.

¹⁶ Melak ouijtika tlen okixnamik Tori, san ika, sakin yejua opeuj tlanemilia itech kenon Jehová yokipaleuijka. Yejua kijtoua: “Ijkuak nitlanemilia itech tlen onikixnamik, ueli nikita kenon Jehová onechpaleui manitlaxiko ijkuak Mason kualouaya. Nikilnamiki ika maski nokoneuj xkojtik katka niman xueliya  teseliaya, tokniuan techonitayaj, maski uejkauiyaj ome hora para ajsiskej hospital. Nochipa yakaj nemiya hospital para techpaleuis. Niman noijki tokniuan otechpaleuijkej ika intomintsin. Niman hasta ijkuak melak ouijtika tipanotoyaj, xkeman itlaj otechpolo”. Jehová okipaleui Tori niman Mason para matlaxikokan (xkita recuadro “ Jehová otechmakak tlen techpolouaya”).

17, 18. ¿Tlenon techpaleuis matikitakan kenon Jehová techpaleuiya ijkuak tikixnamikij tlen ouijtika, niman tlenon uelis techpaleuis matiktlasojkamachilikan? (Salmo 40:5).

¹⁷ (Xpoua Salmo 40:5). Matontlanemilikan itech se tlakatl akin kineki ajsis ikuatipan se tepetl. Ijkuak tepetlejkotias, uelis noseuijtias niman ijkon kitas kenon melak tlakualtsinkan kampa nemi. Noijki ijkon, kemantika noneki toteltiskej niman tiknemiliskej kenon Jehová techpaleuijtika matikxikokan se tlauejli. Ijkuak itlayoua, uelis totlajtoltiskej: “¿Kenon onechteochiuj Jehová yejuin tonajli? Maski ok nikixnamiktika tlen ouijtika, ¿tlenon kichiujtika Jehová para nechpaleuis manitlaxiko?”. Matokojtilikan mojmostla matikitakan kenon Jehová otechteochiuj ipan yejon tonajli.

¹⁸ Ijkuak itlaj tikixnamiktokej, tiktlajtlaniliaj Jehová makikixti noso makiyektlali tlen tikixnamiktokej. Niman xtlaj tlenon tla ijkon tikchiuaj, pampa Jehová techasikamati (Filip. 4:6). San ika, maka matikilkauakan kenon techteochiujtika Jehová. Matikilnamikikan ika Jehová kijtoua ika techkojtilis niman techpaleuis matitlaxikokan. Kuakon, nochipa matiktlasojkamachilikan Jehová pampa yejua techpaleuiya. Tla ijkon tikchiuaj, tikitaskej ika maski tikixnamiktokej tlen ouijtika Jehová techpaleuiya, ijkon ken okipaleui José (Gén. 41:51, 52).