1-2. (a) Hana wa lö ahöli dödöda na alua khöda waʼabasaki? (b) Hadia nitutunöda ba artikel daʼa?

 YAʼITA ono mbanua Yehowa, lö ahöli dödöda na alua khöda waʼabasaki. No aboto ba dödöda niwaʼö Zura Niʼamoniʼö me imane, ”Lö tola löʼö oya tatörö wamakao weʼamöi ba Wamatörö Lowalangi.” (Hal. 14:22) Taʼila göi wa ha ba gulidanö si bohou dania aheta ösa gabula dödö salua khöda iadaʼa, ba ginötö ”lö hadöi saʼae faʼamate, faʼabu dödö, fege-ege, mazui fökhö”.—Fam. 21:4.

² Lö ilumöʼö ita Yehowa moroi ba waʼabasaki. Hizaʼi, itolo ita enaʼö anau gölöda ba wanaögö yaʼia. Nehegö hadia niwaʼö zinenge sotöi Faulo ba niha Keriso si so ba Roma. Me no aefa itutunö waʼabasaki salua khönia hegöi khö ndra talifusöda ba daʼö, imane, ”Börö wanolo moroi khö Keriso sangomasiʼö yaʼita, andrö wa möna ita ba wanaögö fefu hadia ia.” (Rom. 8:35-37) Daʼö zangoromaʼö wa tola mofozu ndraʼugö ibeʼe Yehowa hewaʼae na ötaögö waʼabasaki. Ba artikel daʼa, tatutunö dania hewisa Yehowa wanolo Yosefo me alua khönia waʼabasaki, ba hewisa göi wanolonia yaʼugö.

3. Hewisa wa tebulö waʼauri Yosefo ba zi lö arara?

³ Yosefo andrö ono niʼomasiʼö khö Yakobo, ba laʼila daʼö ira  gaʼania. (1 Mo. 37:3, 4) Lua-luania, afökhö dödöra khö Yosefo. Samuza inötö, lafamawa Yosefo ba niha Midiano. Laʼohe ia ba Miserai, faʼaröunia ngaotu kilometer moroi ba nahia si toröi yaʼia. Ba daʼö, lafamawa zui ia khö Wotifa, kafalo zanaro khö Waraʼo. Tebulö waʼauri Yosefo ba zi lö arara. Mege, ono niʼomasiʼö ia khö namania. Iadaʼa, tobali ia sawuyu niha Miserai!—1 Mo. 39:1.

4. Hadia manö waʼabasaki salua khöda?

⁴ Iwaʼö Sura Niʼamoniʼö wa ”tola alua zi lö sökhi ba niha fefu”. (Sango. 9:11, Alkitab Versi Mudah Dibaca) So ginötönia alua khöda waʼabasaki ”si toʼölö alua ba niha”. (1 Ko. 10:13) Mazui, alua khöda waʼabasaki börö me tobali ita nifahaʼö Yesu. Duma-dumania, te laʼoʼaya ita, lasaisi, mazui lafakao ita börö wamatida. (2 Ti. 3:12) Hizaʼi, gofu hadia ia waʼabasaki salua khöu, tola mofozu ndraʼugö ibeʼe Yehowa. Nehegö atö hewisa wanolonia Yosefo.

5. Hadia gangetula nihalö Wotifa sanandrösa ba waʼamofozu Yosefo? (1 Mo. 39:2-6)

⁵ Baso 1 Moze 39:2-6. Inehegö Fotifa wa Yosefo andrö ono matua sowölö-ölö ba satua-tua. Aboto ba dödönia wa ’mofozu fefu nifalua Yosefo ibeʼe Yehowa’. b Ba gafuriata, ihalö Yosefo andrö Fotifa tobali sohalöwö khönia. Ifaduhusi tödö Yosefo ba wondrorogö omo awö gokhötania. Buania, itugu kayo Wotifa.

6. Hadia nirasoi Yosefo sagötö mangai halöwö ia ba nomo Wotifa?

⁶ Khalaigö hadia nirasoi Yosefo sagötö mangai halöwö ia ba nomo Wotifa. Hadia zindruhunia zomasi ia? Hadia omasi ia na iʼameʼegö tödö ba ibeʼe gazinia Fotifa? Tola manö abölö omasi ia na aheta ia ba daʼö ba mangawuli ia khö namania. Hewaʼae na no tobali ia niha nifaduhusi tödö ba nomo Wotifa, hizaʼi lö tebulö wa yaʼia andrö samösa sawuyu ba nomo zokhö yaʼia si tenga samosumange Yehowa. Lö ibeʼe ba dödö Wotifa andrö Yehowa ba wangefaʼö Yosefo. Ba lö ara aefa daʼö, itugu lö sökhi zalua khö Yosefo.

7. Hewisa wa itugu lö sökhi zalua khö Yosefo? (1 Moze 39:14, 15)

⁷ Simane nitutunö ba 1 Moze faza 39, adöni  dödö woʼomo Wotifa khö Yosefo ba mato hauga kali irayu-rayu. Hizaʼi, itimbagö daʼö Yosefo. Ba gafuriata, mofönu sibai woʼomo Wotifa andrö irege ifobahulu wa edöna ihoröni ia Yosefo. (Baso 1 Moze 39:14, 15.) Me irongo daʼö Fotifa, ibeʼe ba gurunga Yosefo ba lataha ia ba daʼö ba zi hauga fakhe faʼara. (1 Mo. 39:19, 20) Hewisa gurunga si toröi Yosefo? Ngawua wehede Heberaiʼo niʼogunaʼö Yosefo me itötöi ’gurunga’ tola mufoʼeluaha ia tobali nahia wangiröʼö idanö si so ba narö danö mazui tögi. Daʼa zangoromaʼö wa ogömi-gömi sibai gurunga andrö ba lö faʼabölö khö Yosefo weʼaso ba daʼö. (1 Mo. 40:15; nisura ba gahe zura.) Iwaʼö göi Sura Niʼamoniʼö wa no fakhamö laböbö gahenia faoma rate ba laböbö mbaginia faoma siʼöli. (Si. 105:17, 18) Sindruhu-ndruhu wa itugu lö sökhi zalua khö Yosefo. Mege, yaʼia andrö niha nifaduhusi tödö zokhö yaʼia. Iadaʼa, tobali ia niha gurunga.

8. Hewaʼae na itugu lö sökhi zalua khöda, hadia zi faduhu dödöda?

⁸ Hadia no irai alua khöu waʼabasaki ba itugu lö sökhi manö zalua hewaʼae na lö tebulö ölau mangandrö soroi ba dödö? Tola manö alua daʼö börö me auri ita ba gulidanö nifatörö Zatana. (1 Yo. 5:19) Hizaʼi, tola öfaduhusi tödö daʼa: Hewaʼae na lö ilumöʼö ndraʼugö Yehowa moroi ba waʼabasaki, aboto ba dödönia zalua khöu ba iʼameʼegö tödö ndraʼugö. (Mat. 10:29-31; 1 Fe. 5:6, 7) Baero daʼö, no ifabuʼu, ”Lö manö uröi ndraʼugö ba lö uʼositengagö ndraʼugö.” (Heb. 13:5) Ibeʼe khöu waʼanau gölö Yehowa hewaʼae na hulö lö lala-lala dödöu ba zalua khömö andrö. Datatutunö hewisa wanolo Yehowa Yosefo irege anau gölönia.

9. Hadia zangoromaʼö wa fao Yehowa khö Yosefo sagötö so ia ba gurunga? (1 Moze 39:21-23)

⁹ Baso 1 Moze 39:21-23. Hewaʼae ba gurunga so Yosefo, tola mofozu ia ibeʼe Yehowa. Me no numalö maʼifu ginötö, ibörögö faduhu dödö gafalo gurunga khö Yosefo. Ifosumange Yosefo, hulö simane Fotifa mböröta. Ba gafuriata, ifataro Yosefo tobali sozago niha gurunga tanö böʼö. Imane Sura Niʼamoniʼö, ”Lö saʼae abu dödö gafalo gurunga ba halöwö nibeʼenia khö Yosefo.” So halöwö Yosefo iadaʼa hewaʼae ba gurunga so ia. Daʼa waʼatebulö si lö mudöna-döna. Hewisa wa tola mubeʼe noro dödö sebua simane daʼö ba niha gurunga nifobahulu ba wohoröni foʼomo zokhö yaʼia? So wanema linia ba 1 Moze 39:23, ”Börö me fao-fao khönia Yehowa, ba mofozu fefu nifaluania ibeʼe Yehowa.”

10. Hadia iwaʼö Yosefo wa no mofozu ia gofu hezo manö? Tutunö.

¹⁰ Fuli khalaigö hadia nirasoi Yosefo me luo daʼö. Moloʼö yaʼugö, me no aefa lafobahulu ba labeʼe ia ba gurunga, hadia irasoi wa no mofozu ia gofu hezo manö? Hadia zindruhunia zomasi Yosefo? Hadia omasi ia na ifaduhusi tödö ia kafalo gurunga? Te abölö omasi ia na laheta ba hulunia niböbögö khönia ba laʼefaʼö ia. No göi irai iʼandrö ba niha gurunga tanö böʼö si lö ara tö muʼefaʼö, enaʼö fahuhuo ia khö Waraʼö ba wangefaʼö yaʼia moroi ba gurunga sogömi-gömi andrö. (1 Mo. 40:14) Hizaʼi, me no mubeʼe baero niha daʼö moroi ba gurunga, olifu ia khö Yosefo. Ba lö tebulö so ba gurunga Yosefo ba zi dua fakhe tö. (1 Mo. 40:23; 41:1, 14) Hewaʼae simanö, lö tebulö mofozu Yosefo ibeʼe Yehowa. Hewisa wamalua Yehowa daʼö?

11. Hadia waʼabölö nibeʼe Yehowa khö Yosefo, ba hewisa wa moʼamakhaita daʼö khö Mesia si no ifabuʼu Yehowa?

¹¹ Me ba gurunga so nasa Yosefo, ibeʼe Yehowa dombua wangifi khö Waraʼo irege lö sökhi-sökhi dödönia. Omasi sibai Waraʼo wangiʼila eluaha wangifinia andrö. Me irongo wa tola ifoʼeluaha wangifi Yosefo, ifakaoniʼö Yosefo  andrö enaʼö laʼohe fönania. Börö wanolo Yehowa, tola ifoʼeluaha wangifi si dombua andrö khö Waraʼo. Ibeʼe göi mbua gera-era si sökhi irege toröi-röi ba dödö Waraʼo daʼö. Iʼila Faraʼo wa fao Yehowa khö nono matua andrö. Börö daʼö, ibeʼe khö Yosefo noro dödö sebua ba wangöhöna balazo ba danö Miserai. (1 Mo. 41:38, 41-44) Ba gafuriata, alua mbaŵa lofo sabölö-bölö ba danö Miserai hegöi ba Ganaʼana, banua si toröi ösi nomo Yosefo. Iadaʼa, tola iʼefaʼö nösi nomonia Yosefo moroi ba mbaŵa lofo. Daʼö mbörö wa lö tebulö terorogö ngaʼötö sofeta khö Mesia.

12. Hewisa wa tola mofozu fefu nifalua Yosefo ibeʼe Yehowa?

¹² Törö tödöu hewisa waʼauri Yosefo ba angeragö wanofu-nofu daʼa: Haniha zameʼe ba dödö Wotifa enaʼö iʼameʼegö tödö Yosefo hewaʼae na ha sawuyu ia me luo daʼö? Haniha zameʼe ba dödö kafalo gurunga enaʼö ifaduhusi tödö Yosefo si no mukuru me luo daʼö? Haniha zameʼe fangifi khö Waraʼo irege lö sökhi-sökhi dödönia, ba haniha zameʼe faʼatua-tua khö Yosefo ba wamoʼeluaha? Haniha zameʼe ba dödö Waraʼo enaʼö ibaliʼö Yosefo andrö sangöhöna balazo ba danö Miserai? (1 Mo. 45:5) Tatu manö Yehowa zamalua daʼö fefu. Ibeʼe mofozu fefu nifalua Yosefo. Hewaʼae na laʼalui lala ira gaʼania ba wamunu yaʼia, hizaʼi ibulöʼö zalua khönia andrö Yehowa enaʼö alua gohitö dödönia.

13. Hadia lö tebulö fao khöda Yehowa gofu hadia ia zalua khöda? Tutunö.

¹³ Hadia rahu-rahu si tola tahalö ba zalua khö Yosefo? Hadia lö tebulö fao khöda Yehowa gofu hadia ia zalua khöda? Hadia yaʼia mbörö wa tola alua khöda zi lö sökhi enaʼö alua gohitö dödönia? Löʼö. Lö tefaudu daʼö ba nifahaʼö Zura Niʼamoniʼö. (Sango. 8:9; 9:11) Hizaʼi si no tatu, aboto ba dödö Yehowa zalua khöda ba ifondrondrongo na taʼandrö tolo khönia. (Si. 34:15; 55:22; Yes. 59:1) Tola mofozu ita ibeʼe Yehowa ba wanaögö faʼabasaki. Hewisa lalania?

14. Hewisa wanolo Yehowa yaʼita ba mbaŵa waʼabasaki?

¹⁴ Tola itolo ita Yehowa. Lalania, ibeʼe khöda wondrara dödö ba faʼabölö, sasesenia ba ginötö si tefaudu. (2 Ko. 1:3, 4) Daʼö nirasoi  dalifusöda ira matua sotöi Eziz ba Turkmenistan. No lakuru ia ba zi dua fakhe faʼara börö wamatinia. Imane wanutunö, ”Sihulö wongi sibai fatua lö muʼetuʼö hukumagu, so samösa dalifusöda sangoromaʼö khögu Yesaya 30:15. Ösinia: ’Na lö miböhöli waʼafaduhu dödö ba lö mangiwa dödömi, hasambalö abölö ami.’ Ayati daʼö zanolo yaʼo enaʼö lö tebulö so khögu waʼahono dödö ba uʼodaligö Yehowa gofu hadia ia zalua. Sagötö feʼasogu ba gurunga, teʼabölöʼö ndraʼo ero na uʼangerönusi ayati daʼa.” Hadia itörö tödömö hewisa wameʼe Yehowa khöu fondrara dödö ba faʼabölö ba ginötö si tefaudu?

15-16. Hadia wamahaʼö nihalöu ba zalua khö Tori?

¹⁵ Sasesenia, awena aboto ba dödöda wanolo moroi khö Yehowa na no tataluʼi mbaŵa waʼabasaki andrö. Daʼö nirasoi dalifusöda ira alawe sotöi Tori. Göna kanker nononia matua sotöi Mason ba zi önö fakhe faʼara, aefa daʼö mate. Afatö sibai dödö Tori ba waʼamate nononia andrö. Imane wanutunö, ”Daʼa zabölö afökhö sibai nirasoigu yaʼo si samösa ina.” Inönö nasa wangumaʼö, ”Faduhu dödögu wa fao dödö ndra satua fefu ba niwaʼögu andre, wa abölö afökhö khöda na taʼila tefakao nonoda moroi na yaʼita samösa zorasoi.”

¹⁶ Sindruhu sa, abua sibai zalua khö Tori andrö. Hizaʼi ba gafuriata, me ifuli itörö tödönia zalua andrö, imane wangumaʼö, ”Iadaʼa awena aboto ba dödögu wa lö tebulö itolo ndraʼo Yehowa sagötö mofökhö nonogu. Duma-dumania, me itugu tebai saʼae Mason irege tebai itemaʼö niha samaigi yaʼia, lö tebulö möi ndra talifusöda ba ruma saki, hewaʼae na dua za ira wanörö moto ofeta ba nahia daʼö. Lö tebulö so ndra talifusöda ba ruang tunggu ba wanolo yaʼaga. Latolo göi ndraʼaga ba zoguna khöma. Hewaʼae na ba waʼabasaki so ndraʼaga, lö irai moʼamböta  ndraʼaga.” Ibeʼe fefu zoguna khö Tori Yehowa enaʼö anau gölönia, ba simane daʼö göi nifaluania khö Mason.—Faigi kotak ” Ibeʼe Hadia Zindruhu Soguna Khöma Yehowa.”

17-18. Hadia zinangea tafalua enaʼö aboto ba dödöda wanolo moroi khö Yehowa ba taʼameʼegö tödö daʼö? (Sinunö 40:5)

¹⁷ Baso Zinunö 40:5. Si toʼölönia, na isösö hili si samösa niha, ohitö dödönia enaʼö ofeta ia ba zuzu hili. Hizaʼi sagötö fofanönia, tola manö ilau molombase sabata ba wamaigi faʼasökhi ba zi fasuinia. Simanö göi na ötaögö waʼabaski, olombase sabata ba angeragö hewisa wa tola mofozu ndraʼugö ibeʼe Yehowa hewaʼae na lö saefaʼö nasa ba waʼabasaki andrö. Ero bongi, tola öʼangeragö daʼa: ’Hadia howu-howu nitemagu maʼökhö daʼa moroi khö Yehowa? Hewaʼae na lö saheta gabula dödögu, hewisa wanolonia yaʼo enaʼö anau gölögu?’ Tandraigö angeragö howu-howu Yehowa sameʼe khöu faʼanau gölö ba zi maʼökhö daʼö, he ha sambua.

¹⁸ Te ölau mangandrö enaʼö aheta ndraʼugö ba waʼabasaki. Lö fasala daʼö, ba tefaudu ia ba goi-goi Zura Niʼamoniʼö. (Fil. 4:6) Hizaʼi, moguna aboto ba dödöda howu-howu si no tatema. No ifabuʼu Yehowa wa iʼabölöʼö ba itolo ita enaʼö anau gölöda. Börö daʼö, böi irai olifuʼö wa tola anau gölöu börö wanolo moroi khö Yehowa. Na itörö tödömö daʼö, tola aboto ba dödömö wa lö tebulö itolo ndraʼugö Yehowa, simane fanolonia Yosefo. Tola mofozu ndraʼugö ibeʼe hewaʼae na ötaögö waʼabasaki.—1 Mo. 41:51, 52.