1-2. (a) Ke ntaba di sa re makatse mo re tlela ke dintshitshire? (b) Ga hlogotaba yowa re nyoko petapeta ka ying?

 BATHO ba Jehova, a di ba makatse mo ba tlela ke mathatha. Bhayibele yi re, “Re tshwanele re hlupegisiwe ka matla mo re soko kena Mmušong wa Modimo.” (Meber. 14:22) Re ya di tšiba tsa gore mathatha ya rune ya mangwana ma ka sa ro napa ma fela go segela ka dinako tsa mo re phela ga lefase la nyuwane la Modimo, ga gore “malikgu ma ko ba ma sa sa le šiyo, le go lla kela go gotla kela go kwa go baba.”—Kut. 21:4.

² Jehova aa re kugetsi ka se sengwana gore re sa tlele ke mathatha. Mara o re gelepa gore re ma tiyisele. Lebelela tso Pawulo wa lepostola a di hlayyeng ga Makreste ya gore ke mo ma dula Roma. Sa mathomo o bolabodiye ka dintshitshire tsa go tlala tsa gore yene le magagabo ke mo ba ghulana natso. Ke mokane a ngwala gore: “Re hludiye ga dilo tsowa ka mokana ga tsona ka taba la matšhika ya ye wa gore o re nyaka ka matla.” (Marom. 8:35-37) Tsone di rela gore Jehova a ka go gelepa gore o phomelele le mo o kene o tiyisele mathatha. Tla re boneneng ka mokgo Jehova a yyeng a gelepa Josefa gore a phomelele le gore le rune a ka re gelepa ka mokgo mang.

3. King so se yyeng sa tšhentšha ka go yakgoswa lephelong la Josefa?

³ Di fo ba lekgwaying gore mopatriyareka Jakobo ga morwayi wage Josefa ke mo a mo nyaka ka matla. (Gen. 37:3, 4) Tsotsone di makiye gore barwayi ba Jakobo ba gore ke ba bagolo ba thomise go jelasela bhuti wa bona. Mo ba thulegela ke lešuba ba yye ba rekisa Josefa ga mogoba wa bo ba go sepela ba rekisa ba Mamidiyene. Batho bone ba go rekisa ba yye ba tseya Josefa ba sepela  naye makgolo ya dikhilomitha ba ya naye Egepita, ba segela ba mo rekisa fote, ba mo rekisela Potifaro, ndhuna ya bomatšinghelane ba Faro. Josefa ke mo go le morwayi wa gore papage o mo nyaka ka matla mara lephelo lage le tšhentšhiye ka go yakgoswa nakwela ba maka gore go be lebhantiti la go tseyediwa fase ka matla ku Egepita!—Gen. 39:1.

4. Re ka makegela king sa gore se ka feleletsa se maka gore re tlele ke mathatha ya go tshwana le ya Josefa?

⁴ Bhayibele yi re “Dilo tsa go befa di makegela ye mongwana le ye mongwana.” (Mmo. 9:11, Holy Bible—Easy-to-Read Version) Le rune ka dinako tse dingwana re ka tlela ke mathatha ya gore a ma ‘thome ka rune’ go leng mathatha ya gore batho ka mokana ga bona ba gahlana nawo. (1 Makor. 10:13) Kela re ka fo hlorisiwa go le ka taba la gore ke rune malata ya Jeso. Mo re beyisa, ba ka re poyilanya, ba re phigisa kela le mong go re hlorisa ka taba la so re se dumelang. (2 Thim. 3:12) Le mo re ka tlela ke mathatha ya mošaga mang, Jehova o nyoko maka gore re ma hlule. Tsotsone o di makele Josefa ka mokgo mang?

5. Potifaro o fetsiye ka gore king mo a bona Josefa a phomelela? (Genesi 39:2-6)

⁵ Bala Genesi 39:2-6. Potifaro o di bonne tsa gore Josefa ke mo go le mosogana wa go hlalefa ka matla fote ke mo a sa tshwate. Fote Potifaro ke mo a di tšiba gore ke ntaba go le ka mokgonone. Potifaro o di bonne tsa gore “Jehova o maka gore dilo ka moka tso Josefa a di makang di phomelele.” b Mo nako yi kene yi ya, Leegepita lone le yye la maka gore Josefa a be lelata la lona. Fote o yye a maka gore a wokamele ntlo yage. Tsotsone di yye dya mo gelepa ka ying? Potifaro o yye a phomelela.

6. Josefa a ka fo ba a yye a tikwa ka mokgo mang ka seyemo sage?

⁶ O fo nagana gore Josefa ke mo a tikwa ka mokgo mang. King so ke mo a se nyaka ka matla go feta dilo tse dingwana? Ayitsano ke mo a nyaka gore Potifaro a mo tseyele gedimo le go mo rufa? Ka matlamatla, Josefa ke mo a nyaka gore ba mo lokolle gore a thogo sologa a boyele ga papage. Le mo yi le gore Josefa ke mo a na le mmereko wa mayemo ka mutšing wa Potifaro, mara ke mo go sa na go le lebhantiti la motho wa gore aa rapele Jehova. Jehova a sanka a maka gore Potifaro a lokolle Josefa. Fote seyemo sa Josefa ke mo se nyoko thomisa go tooka.

7. Nka mokgo mang seyemo sa Josefa se yyeng sa fo befa ka matla? (Genesi 39:14, 15)

⁷ Genesi tema 39 yi re, mosadi wa Potifaro ke mo a nabela Josefa fote o liketsiye ga tleletlele go mo woka. Ka moka nako Josefa ke mo gana a tiyisiye ka ganong. O yye a feleletsa a kwatela Josefa ka matla ke mokane a mo hlayela matsaka, a re o liketsiye go mo reyipa. (Bala Genesi 39:14, 15.) Mo Potifaro a kwa ka taba yowa, o yye a bošela Josefa jele ga gore o yye a dula mengwaga ya go tlala. (Gen. 39:19, 20) Jele yone ke mo yi tshwana le ying? Lentsu lo Josefa a le berekisiyeng la Seheberu la go rela “jele” le ka rela “mokoti,” tsotsone di šupetsa gore mo ne a le gona ke mo go f’lo re phi fote a se na tshepo. (Gen. 40:15; setwaba) Fote Bhayibele yi šupetsa gore mawoto ya Josefa ke mo ba ma tlemme ka diketane tsa senakonyana fote ke mo ba mo tšhokele ka ditshipi ho molaleng. (Pis. 105:17, 18) Seyemo sa Josefa se yye sa thomisa go gakga ka matla. O tlugiye ga go ba lebhantiti la go tshepega a ba lebhantiti la go tseyediwa fase ka matla.

8. King sa gore a re se kamake mo mathatha ma re gogisa thabeng?

⁸ Ayitsano o yye wa tikraya o le ga seyemo sa go thathafa ka matla sa gore se fo ya se tooka le mo o rapela o šwennye? Tsotsone di ka makega. Jehova aa re kogetsi ka se sengwana gore mathatha ya lefase la gore le lawola ke Sathane ma sa re tlele. (1 Joh. 5:19) Le mo go le ka mokgonone o sa kamake taba ya gore: Jehova o di bona gabutši tso o tshwaraganneng natso fote wa tihlupa ka wene. (Mat. 10:29-31; 1 Pet. 5:6, 7) Se sengwana fote so a re tshepisiyeng sona ke gore: “Nka sa go lisetse fote nka sa ro go lahla.” (Maheb. 13:5) Jehova a ka go gelepa gore o tiyisele le mo hlasenyana yi sa sa le šiyo ga seyemo sago. Tla re lebeleleneng gore tsotsone di makegiye ka mokgo mang ga Josefa.

9. King so se šupetsang gore Jehova ke mo a kene a na le Josefa nakwela a le jele? (Genesi 39:21-23)

⁹ Bala Genesi 39:21-23. Le ga seyemo sa go thathafa sa nakwela Josefa a le jele, Jehova o yye a maka gore a phomelele. Ka mokgo mang? Mo goya-goya, ye wa go wokamela jele o yye a thomisa go tshepa Josefa le go mo hlompa, go tshwana le ka mokgo Potifaro a makiyeng. Go se botala, ye wa go wokamela jele o yye a maka gore Josefa a lawole mabhantiti ya mangwana. Gabutšibutši, Bhayibele yi re “Ye wa go wokamela jele ke mo a sa hlupege ka dilo tso Josefa ne a di pasopa.” Josefa ke mo a na le mmereko wa gabutši wa go wo maka. Phela a go ka mokgo ne re ka yi nagana ka gona! Di kgonega byang gore lebhantiti lo ne ba le hlayela matsaka, ba re le liketsiye go reyipa mosadi wa ndhuna ya masole ba le neye mmereko wo mogolo ka mokgo? Hlatollo nka yyoši. Genesi 39:23 yi re, “Jehova ke mo a na le Josefa, fote Jehova o makiye gore a phomelele ga dilo ka mokana ga tsona.”

10. Hlatolla gore ke ntaba Josefa a yye a tikwa nkare aa phomelele ga dilo ka mokana ga tsona.

¹⁰ Liketsa fote go nagana ka mokgo Josefa ke mo a tikwa ka gona. Ka nthago ga gore ba mo hlayele matsaka fote ba mo bošele jele, ayitsano o nagana gore ke mo a tikwa a phomelele ga dilo ka mokana ga tsona? King so Josefa ke mo a se nyaka ka pelo yage ka mokana ga yona? Ayitsano ke mo a nyaka gore ye wa go wokamela jele a mo nyake ka matla? So Josefa ke mo a se nyaka ka matla ke gore ba mo lokolle. Wa tšiba o yye a fawa ga lebhantiti le lengwana la gore ke mo ba nyoko le lokolla go se botala gore le mmolabolele le Faro gore a mo ntshe mone jele ya gore ne yi kgahleletsa. (Gen. 40:14) Mara, morenene a sanka a mmotsa ga Faro ka go yakgoswa. Tsotsone dya maka gore Josefa a dule mone jele mengwaga ye mengwana ka mmedi. (Gen. 40:23; 41:1, 14) Le mo go le ka mokgonone, Jehova o yye a fo maka gore a phomelele ga tso a di makang. O di makiye ka mokgo mang?

11. Jehova o yye a maka gore Josefa a kgone go maka ying fote tsotsone di gelepiye ka mokgo mang gore go makege tso Jehova a di nyakang?

 ¹¹ Nakwela Josefa a sa le jele, Jehova o yye a maka gore kgoši ya ku Egepita yi lore meloro ka mmedi ya go sa mo yetsedisi. Faro ke mo di mmaba ka matla a nyaka go tšiba gore meloro yone yi rela ying. Mo kgoši yi di kwelela tsa gore Josefa wa di kgona tsa go hlatolla meloro, a re ba mmitse. Josefa o yye a di kgona tsa go hlatolla meloro yone fote o jabodisiye Faro ka tso a mo yeletsiyeng ka tsona. Faro ke mo a di bona tsa gore Josefa o gelepa ke Jehova, ke mokane Faro o yye a kgeta Josefa gore a wokamele tsa go ja tsa Egepita ka moka. (Gen. 41:38, 41-44) Ka nthago, ku Egepita le Kanana go leng naga yo ba ga bo Josefa ne ba dula ga yona, go yye gwa wa tlala ye kgolo. Gana byalo Josefa ke mo a ka di kgona tsa go phonisa ba mutši wa gabo fote tsone ne di rela gore mo nako yi kene yi ya Mesiya ke mo a nyoko belegiwa ga leloko lone.

12. Jehova o yye a maka ka mokgo mang gore Josefa a phomelele?

¹² O fo nagana ka dilo tsa go sa tlwayelega tso di makegiyeng ho lephelong la Josefa. Ke mang a makiyeng gore Potifaro a sa mo takisi maahlo ga Josefa wa gore go fo ba lelata? Ke mang a makiyeng gore ye wa go wokamela jele a kwane le Josefa lebhantiti la go sa re selo? Ke mang a makiyeng gore Faro a lore meloro ya go sa mo yetsedisi ke mokane a maka gore Josefa a thogo yi hlatolla? Ke mang a makiyeng gore ba kgete Josefa gore a wokamele tsa go ja tsa Egepita? (Gen. 45:5) Di fo ba lekgwaying gore ke Jehova a makiyeng dilo ka mokana ga tsona gore Josefa a phomelele. Le mo yi le gore bobhuti ba Josefa ke mo ba nyaka go mmolaya, Jehova o yye a tšhentšha seyemo sone gore a thogo maka tso yene a di nyakang.

13. Ayitsano Jehova o fo dula a kenelela ga seyemo se sengwana le se sengwana so re gahlanang naso? Hlatolla.

¹³ Re tšhuta ying ga taba yowa ya Josefa? Ayitsano Jehova o fo yakgoswa a maka se sengwana ga seyemo se sengwana le se sengwana so re gahlanang naso? Ayitsano go na le bošakašakane byo a bo makang bya gore mo dilo tsa go befa di makega re fetse ka gore di tshwanele di makege? Dho, Bhayibele a yi yeme le taba yone. (Mmo. 8:9; 9:11) Le mo go le ka mokgonone, so re se tšibang ke gore: Mo re ghulana le dintshitshire, Jehova wa di bona tso re ghulanang natso fote wa  re kwa mo re mo llela gore a re gelepe. (Pis. 34:15; 55:22; Jes. 59:1) Go tokegela gana hone, Jehova a ka kgona go re gelepa gore re tiyisele dintshitshire. Ka mokgo mang mara?

14. Jehova o re gelepa ka mokgo mang ka dinako tsa mo go thathafa?

¹⁴ Mokgwa wo mongwana wo Jehova a re gelepang ka wona ke ka go re tiyisa a boya a re kgomoletsa ka matlamatla ka nako yo re yi hlokang. (2 Makor. 1:3, 4) Tsone ke tso di makegeleng mogageru Eziz wa ku Turkmenistan wa gore ba mmošele jele mengwaga ka mmedi ka taba la tumelo yage. O yitseri, “Ka bošego bya letšatši lo ne ba nyoko n’yahlula ka lona, mogageru o nšupetsiye lengwalo la Jesaya 30:15, la gore le re: ‘O ko ba le matšhika mo o dula o bebiye fote o šupetsa gore o na le tshepo.’ Temanyana yowa ga go tlala ke mo yi n’gelepa gore ke dule ke kgibiye fote ke tisamele ka Jehova ga dilo ka mokana ga tsona. Go ghayela ka temanyana yowa ne go n’gelepa ka matla nakwela ke sa le jele.” Ayitsano o sa gopola nakwela Jehova a yyeng a go gelepa mo o nyaka go tiyisiwa le go kgomoletsiwa?

15-16. O ka tšhuta ying ga tso di yyeng dya makegela Tori?

¹⁵ Ga go tlala mo re nagana tsa ku nthago ke gona re kgonang go bona ka mokgo Jehova a re gelepiyeng gore re tiyisele dintshitshire. Mogageru wa mosadi ye ba reng ke Tori o di bone gore tsotsone ke mong nnete. Morwayi wage Mason ke mo a kenne ke bolwele bya khensa kobodi ya mengwaga go segela a hlokafala. Wa tšiba re ya mo kwisisa ga Tori mo a yye a kwa go baba ka matla. O yitseri, “Ne ke sa nagane gore nka lebana le seyemo sa go thathafa ka mokgo ke le mmelegi.” O tokegele ka gore, “A ke kamake gore le babelegi ba bangwana ba ka yema le nna mo ke re ka mpa go baba howa go kwe ke nna yi seng ngwane waka.”

¹⁶ Le mo yi le gore Tori ke mo di mo kwisa go baba ka matla mo a bona morwayi wage a kwa go baba, ka nthagonyana Tori o yye a nagana ka mokgo Jehova a yyeng a mo gelepa gore a tiyisele. O  re, “Mo ke nagana ka nako yone, ke bona ka mokgo Jehova a n’gelepiyeng ka gona mo morwayi waka a kene a lwala. Mo re beyisa, ka dinako tse dingwana mo Mason a lwala ka matla magageru ke mo ma dhrayiva diawara ka dipedi ba tla sepetlele. Ke mo go fo dula go na le ye mongwana wa gore o re yemele fote a tikemisele go re thega a sa tšhofe ke motho. Fote magageru ke mo ma bona polane ka tso re di gayelang. Le mo seyemo se galaka ke mo re sa gayele selo.” Jehova o neyye Tori tso ke mo a di nyaka gore a thogo tiyisela fote o makiye ka mokgonone le ga Mason.—Lebelela lebhokisi la gore “ Jehova o re Nneye so ke mo re se Nyaka.”

17-18. King so se ka re gelepang gore re thogo bona le go leboga taba ya gore Jehova wa re gelepa gore re tiyisele ka dinako tsa mo go thathafa? (Pisalema 40:5)

¹⁷ Bala Pisalema 40:5. Motho wa gore o kalama thaba so a tikemiseleng go se segelela ke gore a segele ku malenghelengheng. Le mo go le ka mokgonone, go na le dipoleke tsa go tlala tso di leng ga pata yone ga gore a ka yemanyana a jabolela go lebelela dilo tsa go bafala tso a di bonang. Le wene o ka fo tseya nako o nagana ka mokgo Jehova a makiyeng gore o phomelele le mo o kene o tiyisele mathatha. Mo letšatši le lengwana le le lengwana le fela, o ka tiputsisa gore: ‘Ke bonne Jehova a nrufa ka mokgo mang lekgono? Le mo ke sa na ke tlaparele ke mathatha, Jehova o n’gelepa ka mokgo mang gore ke tiyisele?’ O bone ho nkare o ka kgona go bona selo ka ssoši so Jehova a yyeng a go rufa ka sona sa gore se makiye gore o phomelele.

¹⁸ Ke nnete gore o ka fo ba o rapelela gore tso o ghulanang natso di nape di ya le noka. Phela tsone dya kwagala fote di gabutši. (Mafil. 4:6) Mara a di nyake re takisa maahlo tso re rufiwang ka tsona gana byalo. Akere Jehova o re tshepisa go re tiyisa le go re gelepa gore re tiyisele. Byalo, o sa lisetse go dula o yi tseyela gedimo taba ya gore Jehova wa go thega. Ke mokane o nyoko bona ka mokgo Jehova a go gelepang ka gona gore o phomelele go tshwana le mo a yye a maka le ga Josefa nakwela a ghulana le dintshitshire.—Gen. 41:51, 52.