1-2. (a) Ahabw’enki kitarikututangaaza twahikwaho oburemeezi? (b) Nituza kushwijuma ki omu kicweka eki?

 ITWE abaheereza ba Yehova, tikirikututangaaza twahikwaho oburemeezi. Ahakuba Baibuli neegira ngu, “tushemereire kutaaha omu Bukama bwa Ruhanga, nituraba omu busaasi bwingi.” (Byak. 14:22) Kandi nitumanya ngu bumwe aha buremeezi obu twine tiburaahweho kuhitsya obu turaahikye omu nsi ensya, eraabe etarimu ‘okufa, n’obu kwakuba okucura, okurira nari obusaasi.’—Kush. 21:4.

² Yehova tarikuzibira oburemeezi kutatuhikaho. Kwonka, naatuhwera kubugumisiririza. Yetegyereze eki entumwa Paulo yaagambiire Abakristaayo Abarooma. Akabanza yaagamba aha buremeezi butari bumwe obu we n’ab’eishe-emwe abandi baabaire nibarabamu. Akahandiika ati: “Tusingwire nangwa n’okukiraho ahabw’Ogwo owaatukunzire.” (Rom. 8:35-37) Eki nikimanyisa ngu Yehova naabaasa kukuhwera kuba omusinguzi waaba oine oburemeezi. Ka tureebe oku Yehova yaahwereire Yosefu kuba omusinguzi n’oku arikubaasa kukuhwera.

3. Yosefu akahikwaho mpinduka ki omu bwire bukye?

³ Yakobo omushaija omwesigwa akakyoreka butunu ngu naakunda munonga mutabani we Yosefu. (Kut. 37:3, 4) N’ekyarugiremu, bakuru be bakagirira eihari murumuna waabo. Ku baatungire akagisha, bakamuguza abashuubuzi Abamidiani. Abashuubuzi abo bakatwara Yosefu Misri hare n’owaabo, baamuguza Potifaari, omukuru w’abarinzi ba Faraho. Embeera za Yosefu ka zaahindukire ahonaaho, kuruga omu kuba omwana orikukundwa ishe akaba omuhuuku w’Omunyamisri!—Kut. 39:1.

4. Nitubaasa kuhikwaho tuta oburemeezi nk’obu Yosefu yaarabiremu?

 ⁴ Baibuli neegira ngu “ebintu bibi nibihika ahari oburi omwe.” (Mub. 9:11, Holy Bible—Easy-to-Read) Obumwe nitugira oburemeezi oburikuhika aha ‘bantu boona’, nibyo bigyezo ebirikuhika ahari buri muntu. (1 Kor. 10:13) Nari nitubaasa kubonabona ahabw’okugira ngu turi abeegi ba Yesu. Nk’eky’okureeberaho, nitubaasa kujumwa, kuhakanisibwa nari kuhiiganisibwa ahabw’okwikiriza kwaitu. (2 Tim. 3:12) N’obu waakuhikwaho buremeezi ki, Yehova naija kukuhwera kubusingura. Ekyo akakyoreka ata ahari Yosefu?

5. Potifaari akeetegyereza ki aha bikwatiraine n’obusinguzi bwa Yosefu? (Okutandika 39:2-6)

⁵ Shoma Okutandika 39:2-6. Potifaari akeetegyereza ngu Yosefu akaba ari omutsigazi w’obwengye kandi omwekambi. Kandi akaba naamanya ahabw’enki yaabaire ari atyo. Potifaari akareeba ngu Yehova ‘akaba naaha [Yosefu] omugisha omuri byona ebi arikukora.’ b Bwanyima, Omunyamisri akahindura Yosefu omureeberezi w’eka ye. Kandi akamukwatsa ebi yaabaire aine byona. Niki ekyarugiremu? Potifaari akaba omugaiga rugambwa.

6. Yosefu naabaasa kuba yaayehuriire ata aha bikwatiraine n’embeera ye?

⁶ Teeraho kweta omu bigyere bya Yosefu. Niki ekyabaire kiri kikuru ahariwe? Mbwenu shi akaba naayenda kureebwa nari kusiimwa Potifaari? Obundi, Yosefu akaba naayenda kurekurwa kugaruka owa ishe. Ahakuba, n’obu Yosefu araabe yaabaire aine omwanya mukuru omu nju ya Potifaari, akaba akiri omuhuuku wa mukama we omukaafiire. Yehova tarareeteire Potifaari kurekura Yosefu. Kandi omu bwire bukye embeera ya Yosefu ekaba neeza kwongyera kuguma.

7. Embeera ya Yosefu ekongyera eta kusiisikara? (Okutandika 39:14, 15)

⁷ Nk’oku kirikworekwa omu Okutandika eshuura 39, muka Potifaari akarigira Yosefu kandi kaingi akaba ateeraho kumushendashenda. Kwonka Yosefu akaba ataikiriza kubyama nawe. Empereruka, akaguubwa kubi yaabeiherera Yosefu ngu yaaba naateeraho kumuhamba. (Shoma  Okutandika 39:14, 15.) Potifaari ku yaakihuriire, akata Yosefu omu kihome yaagumayo kumara emyaka. (Kut. 39:19, 20) Embeera omu kihome zikaba ziri zita? Ekigambo ky’Oruheburaayo eki Yosefu yaakoreise “ekihome” nikibaasa kumanyisa “ekiziba,” nari “ekiina,” ekirikworeka ngu akaba ari omu mwirima kandi ataine matsiko. (Kut. 40:15) Kandi, Baibuli neeyoreka ngu ebigyere bya Yosefu bakabikomesa emihama, n’amaraka ge baagabohesa enjegyere z’ebyoma. (Zab. 105:17, 18) Embeera ekaba neeyongyera kusiisikara. Akaruga omu kuba omuhuuku orikwesigwa yaahinduka embohe.

8. Nitubaasa kugira buhame ki n’obu embeera ya kwongyera kuguma?

⁸ Embeera yaawe eyongyeire kuba mbi, n’obu oraabe nooshaba obutaruha? Ekyo nikibaasa kubaho. Yehova tarikuzibira oburemeezi kutatuhikaho oburikureetwa ensi ya Sitaane. (1 Yoh. 5:19) Kwonka noobaasa kugira obuhame ngu, Yehova naayetegyereza gye embeera yaawe kandi naakufaho. (Mat. 10:29-31; 1 Pet. 5:6, 7) Ekindi, naaraganisa ati: “Tindikutsigaho, kandi tindikuhemukaho na kakye.” (Heb. 13:5) Yehova naabaasa kukuhwera kugumisiriza embeera yaawe yaakureetera kwehwa amatsiko. Ka tureebe oku yaahweraire Yosefu.

9. Niki ekirikworeka ngu Yehova akaba ari hamwe na Yosefu obu yaabaire ari omu kihome? (Okutandika 39:21-23)

⁹ Shoma Okutandika 39:21-23. Yehova akabaasa kuhwera Yosefu kuba omusinguzi obu yaabaire ari omu kihome. Ata shi? Bwanyima y’obwire, Yosefu atandika kusiimwa n’okukundwa omurinzi w’ekihome, nk’oku kyabaire kiri obu yaabaire ari owa Potifaari. Ku haahingwireho obwire, omukuru w’ekihome akaha Yosefu obujunaanizibwa bw’okureeberera embohe ezindi. Nangwa, Baibuli neegira ngu ‘omurinzi w’ekihome taragarukire kureeberera kintu kyona omu bi yaamukwatsize.’ Hati Yosefu akaba aine bingi by’okukora eby’omugasho. Egyo ka yaabaire eri empinduka eyaabaireho kitaraariire! Omusibe owaatairwe omu kihome arikujunaanwa ahabw’okuteeraho kuhamba muka mukuru w’engambo, akaba naabaasa ata kuheebwa obujunaanizibwa nk’obwo? Eky’okugarukamu ni kimwe kyonka. Okutandika 39:23 nihagira ngu, Yehova “akaba ari hamwe na [Yosefu], kandi ebi yaabaire akora byona, [Yehova] akaba abiha omugisha.”

10. Shoboorora ahabw’enki Yosefu atarateekateekire ngu n’omusinguzi omu buri kimwe.

¹⁰ Teeraho kugaruka kweta omu bigyere bya Yosefu. Bwanyima y’okucwerwa orubanja omu muringo gutahikire kandi akateebwa omu kihome, noogira ngu akeereeba nk’omusinguzi omu buri kimwe? Niki ekyabaire kiri kikuru ahari Yosefu? Tugire ngu akaba naayenda kusiimwa omukuru w’abarinzi b’ekihome? Obundi, Yosefu akaba naayenda kwihwaho orubanja akarekurwa. Nangwa akashaba omusibe owaabaire naaza kurekurwa kumutonganirira ahari Faraho kugira ngu abaase kumwiha omu kihome. (Kut. 40:14) Kwonka, omushaija ogwo taragambiire Faraho ahonaaho. N’ekyarugiremu, Yosefu akaguma omu kihome emyaka endiijo ebiri. (Kut. 40:23; 41:1, 14) Kwonka nabwo, Yehova akagumizamu kuhwera Yosefu kuba omusinguzi. Ata shi?

11. Yehova akabaasisa Yosefu kukora ki, kandi kikahwera kita omu kuhikiiriza ekigyendererwa kya Yehova?

¹¹ Obu Yosefu yaabaire ari omu kihome, Yehova akareetera omugabe wa Misri kuroota ebirooto bibiri birikutiinisa. Faraho akaba naayendera kimwe kumanya amakuru g’ebirooto ebyo. Omugabe ku yaamanyire ngu Yosefu naabaasa kumushoboororera amakuru g’ebirooto ebyo, akatuma ngu bamureete.  Ahabw’obuhwezi bwa Yehova, Yosefu akabaasa kushoboorora ebirooto ebyo kandi omugabe akashemezibwa obuhabuzi burungi obu yaamuhaire. Faraho ku yaareebire ngu Yehova ari hamwe na Yosefu, akamutoorana kukurira amabiikiro g’eby’okurya omu nsi yoona eya Misri. (Kut. 41:38, 41-44) Bwanyima, hakabaho enjara y’amaani omuri Misri na Kanaani ahu ab’eka ya Yosefu baabaire nibatuura. Hati Yosefu akaba aine obushoboorozi bw’okujuna ab’eka ye abaabaire nibaija kurugamu Mesia.

12. Yehova akahwera ata Yosefu kuba omusinguzi?

¹² Teekateeka aha mpinduka ezaahikire ahari Yosefu kitaraariire. N’oha owaareeteire Potifaari kukunda Yosefu, omuhuuku kwonka? N’oha owaareeteire omukuru w’abarinzi b’ekihome kusiima Yosefu, omusibe enshoberwa? N’oha owaareeteire Faraho kuroota ebirooto birikutiinisa kandi akabaasisa Yosefu kubishoboorora? N’oha owaahigire Faraho kutoorana Yosefu kukurira amabiikiro g’eby’okurya omuri Misri? (Kut. 45:5) Hatariho kubangaanisa, Yehova niwe yaabaasiise Yosefu kusingura. Aha muheru gwa byona, Yehova akakoresa orukwe rw’obwinazi orwa beene ishe Yosefu kuhikiiriza ekigyendererwa kye.

13. Mbwenu shi Yehova naagira eki yaakora kutuhwera omu buri mbeera? Shoboorora.

¹³ Ebyahikire ahari Yosefu nitubyegyeraho ki? Mbwenu shi Yehova naagira eki yaakora kutuhwera omu buri mbeera? Naatuteeraho oburyo, kugira ngu ebintu bibi byona ebirikutuhikaho birugyemu ebirungi? Ngaaha, Baibuli terikushagika emiteekateekyere nk’egyo. (Mub. 8:9; 9:11) Kwonka, nitumanya ngu, twaba nitugyezibwa, Yehova naaba naareeba kandi naahurira okutaka kwaitu. (Zab. 34:15; 55:22; Isa. 59:1) Okukira byona, Yehova naabaasa kutuhwera kuba abasinguzi omu kwemera oburemeezi. Ata shi?

14. Yehova naatuhwera ata omu mbeera zigumire?

¹⁴ Omuringo gumwe ogu Yehova arikutuha obuhwezi n’okutuhuumuriza kandi akatugumya omu bwire obuhikire. (2 Kor. 1:3, 4) Eki nikyo kyahikire aha w’eishe-emwe Eziz kuruga Turkmenistan, owaacwerairwe ogw’okukomwa emyaka ebiri ahabw’okwikiriza kwe.  Naagira ati: “Aha izooba ry’okuhozesibwa kwangye, ow’eishe-emwe akanyoreka Isaaya 30:15, aharikugira hati: ‘Omu kutuuza n’omu kwesiga nimwo amaani gaanyu garaarugye.’ Omushororongo ogwo gukampwera kuguma nyikaikaine n’okwesiga Yehova omu buri kimwe. Okuteekateeka aha mushororongo ogwo kikampwera obwire bwona obu naamazire omu kihome.” Noobaasa kwijuka obu Yehova yaakuhwera arikukuhuumuriza kandi akakugumya obu kyabaire nikyetengyesa munonga?

15-16. Nooyegyera ki ahari Tori?

¹⁵ Kaingi, bwanyima y’okuraba omu buremeezi nibwo turikureeba enyima tukateekateeka aha ku Yehova abaasize kutuhwera kuba abasinguzi. Ekyo nikyo kyahikire ahari munyaanyazi-itwe orikwetwa Tori. Omutabani, Mason, akateganisibwa ekookoro kumara emyaka mukaaga kuhitsya obu yaafa. Eki, kikareetera Tori kugira obusaasi bwingi. Naagira ati: “Tindikuteekateeka ngu hariho embeera egumire munonga eyaakubaasize kundeetera obujune nk’omuzaire.” Naayongyeraho ati: “Ningira ngu abazaire abandi nibaikirizana naanye ngu okureeba omwana waawe naabonabona nikireeta obusaasi okukira okuba niwe waabonabona.”

¹⁶ N’obu Tori araabe yaahikirweho oburemeezi oburikureeta obuhinza mutima, bwanyima akateekateeka aha ku Yehova yaamuhweraire kugumisiriza. Naagira ati: Ku ndikwijuka obu mutabani wangye yaabaire arwaire nindeeba oku Yehova yaampweraire. Nk’eky’okureeberaho, obu Mason yaabaire arwaire areembire atarikubaasa kureeba abaija kumutaayaayira, ab’eishe-emwe na banyaanyazi-itwe bakaba bavuga kumara eshaaha ibiri kwija omu irwariro. Butoosha hakaba haaba hariho omuntu oyeteekateekire  kuhwera. Kandi, tukaba tuba twine byona ebirikwetengyesa eby’omubiri. Nangwa n’omu bwire bugumire munonga, tihaine ekitwakyenire.” Yehova akaha Tori obuhwezi oburikwetengyesa kugumisiriza, kandi nikyo yaakoreire na Mason.—Reeba akabokusi “ Yehova Akatuha Byenyini Ebyabaire Nibyetengyesa.”

17-18. Niki ekiraatuhwere kureeba n’okusiima obuhwezi obu Yehova arikuha twaba twine oburemeezi? (Zaaburi 40:5)

¹⁷ Shoma Zaaburi 40:5. Omuntu weena orikutemba orushozi naaba agyendereire kuhika aha katungu. Kwonka, naabaasa kugira ahu yaahika ayemerere areebe ebintu birungi ebimwetoroire. Nikyo kimwe, butoosha teeraho kugira obwire bw’okuteekateeka oku Yehova arikukuhwera kuba omusinguzi waaba oine oburemeezi. Buri izooba, yebuuze oti: ‘Haine oku Yehova yaampwera? N’obu ndaabe kiine oburemeezi, Yehova ariyo naampwera ata kugumisiriza?’ Fayo kuteekateeka aha kintu kimwe eki Yehova akozire kukuhwera kuba omusinguzi.

¹⁸ Noobaasa kuba oriyo nooshaba ngu oburemeezi buhweho. Ekyo nikyetegyerezibwa kandi ohikire kukikora. (Fil. 4:6) Kwonka twine n’okuta omutima aha migisha ei twine hati. Ahakuba, Yehova naaturaganisa kutugumya n’okutuhwera kugumisiriza. N’ahabw’ekyo butoosha siima Yehova ahabw’obuhwezi obu arikukuha. Reero noija kureeba oku arikukuhwera kuba omusinguzi, nk’oku yaahweraire Yosefu, nangwa n’omu mbeera zigumire.—Kut. 41:51, 52.