1-2. (a) Akin et agtayo la nabibigla ed saray subok? (b) Antoy pantongtongan tayo ed sayan artikulo?

 AGTAYO la nabibigla ed saray subok. Amta tayo imay ibabaga na Biblia ya “nepeg itayon ondalan ed dakel ya irap pian makaloob itayo ed Panarian na Dios.” (Gawa 14:22) Amta tayo met ya wala ray problema natan ya dia lad balon mundo nasolusyonan, ta ditan et “anggapo lay patey, anggapo met lay panermen tan panakis tan panotot.”—Apo. 21:4.

² Ag-ipapaliis nen Jehova iray lingkor to ed saray subok, pero tutulongan to ra pian nasarag da iratan. Imanoen imay sulat nen apostol Pablo ed saray agagi ed Roma. Kayari ton binitla iray subok ya dadalanen da, oniay imbaga to: “Sigpot itayon manatalo diad panamegley na samay mangaarod sikatayo.” (Roma 8:35-37) On, anggano ondadalan tayod subok, agto labay ya ibagan ag-itayo inaro tan ag-itayo bebendisyonan nen Jehova. Pantongtongan tayo no panon ya benendisyonan nen Jehova si Jose legan ya ondadalan ed graben subok. Insan tayo pantongtongan no panon to tayo met ya bebendisyonan natan.

3. Antoy biglan agawa ed bilay nen Jose?

³ Inar-aro nen Jacob so anak ton si Jose. (Gen. 37:3, 4) Alikas itan na saray kuya nen Jose kanian nanselos ira. Lapud  selos da, inlako da laingey Jose ed saray negosyanten Midianita. Sikatoy inyakar na sarayan negosyante diad Ehipto tan inlako dad si Potifar, say pangulo na saray guardia na Faraon. Biglan anguman so bilay nen Jose! No dati et balibali bilay to ta inar-aro nen ama to, natan et pakaskasi lan aripen ed Ehipto.—Gen. 39:1.

4. Singa si Jose, antoy posible met ya nagawad bilay tayo?

⁴ Ibabaga na Biblia ya walan-walay “ag-iilaloan a nagawa” ed anggan siopa. (Ecl. 9:11) Diad tua, saray subok ya dadalanen tayo et “asali [met la] na arum.” (1 Cor. 10:13) No maminsan, nasusubok tayo lapud disipulo itayo nen Jesus. Singa bilang, ompan lapud satan et balawen, kontraen, o pairapen itayo na arum. (2 Tim. 3:12) Antokaman so subok ya dadalanen mo, tandaan mo ya tulongan tan bendisyonan ka nen Jehova. Panon to itan ya ginawa ed si Jose?

5. Antoy inisip nen Potifar nen anengneng to ya maaligwas so amin ya gagawaen nen Jose? (Genesis 39:2-6)

⁵ Basaen so Genesis 39:2-6. Naimano nen Potifar ya matalino tan makulikuli si Jose. Tan agto la pankelawan no akin. Ibabaga na Biblia ya anengneng nen Potifar ya “gagawaen nen Jehova a matalona [o maaligwas] so amin a gagawaen [nen Jose].” b Asabi panaon, pinili nen Potifar si Jose ya magmaliw ya personal a lingkor o katiwala to. Impaasikaso to met lad si Jose so amin ya kaykayarian to. Antoy resulta ey? Inmasenso si Potifar.

6. Anto kasi alikna nen Jose nen dinmakep ya daiset so situasyon to?

⁶ Anto kasi alikna nen Jose nen medyo ondadakep lay situasyon to? Kasin maliket lad bilay to ta walad sikatoy pabor nen Potifar? Andi, ta seguradon say labay to et makasempet lad sikara tan nanengneng to lamet si ama to. Anggano tinmagey so posisyon to, aripen nin siansia na sakey ya agmandadayew ed si Jehova. Seguro, ipipikasi nen Jose ed si Jehova ya ibulos la komon nen Potifar. Pero aliwan ontan so agawa. Mas linmoor ni ingen so situasyon to.

7. Panon ya linmoor so situasyon nen Jose? (Genesis 39:14, 15)

⁷ Base ed Genesis kapitulo 39, kursonada na asawa nen Potifar si Jose, kanian aminpigapiga ton sinali ya akiten pian mi-sex ed sikato. Pero aglabay nen Jose kanian mansyodot ya maong. Diad syodot to, binaliktad toy agawa tan inakusaan toy Jose ya rapist! (Basaen so Genesis 39:14, 15.) Anisia si Potifar kanian impaipriso toy Jose. Pigapigaran taon ton inanosan so mair-irap ya bilay ed prisoan. (Gen. 39:19, 20) Nen indeskribe nen Jose so angiprisoan dad sikato, say inusar ton salita et literal ya mankabaliksan na “bobon” o “abot.” Ompan ditan et ngalngali anggapoy liwawa kanian makapa-depress. (Gen. 40:15, paimanod leksab) Ibabaga met na Biblia ya inggulonggulong day sali nen Jose tan inkadena day beklew to. (Sal. 105:17, 18) Agto seguro ilaloan ya onloor so situasyon to. No dati et pantitiwalaan ya aripen, natan et pakaskasi lan priso.

8. Anggano onloor so problema o subok ya dadalanen tayo, makaseguro tayo ed anto?

⁸ Asalim la ya anta impikasim ed si Jehova ya nalemewan ka komon ed dadalanen mon subok et mas linmoor laingen so situasyon mo? Posiblin nagawa itan, ta diad sayan mundo nen Satanas, ag-itayo ipapaliis nen Jehova ed saray subok. (1 Juan 5:19) Pero nia so segurado: Amta nen Jehova so dadalanen mo tan imamalasakit to ka. (Mat. 10:29-31; 1 Ped. 5:6, 7) Oniay insipan to: “Agta kan balot taynanan, tan agta kan balot paulyanan.” (Heb. 13:5) Kanian no say pakaliknam et anggapo lay solusyon na problemam, tandaan mo ya manggawan-manggaway paraan si Jehova pian nasarag mo itan. Nengnengen tayo no panon to itan ya ginawa ed si Jose.

9. Antoy patunay ya bebendisyonan nen Jehova si Jose anggano walad prisoan? (Genesis 39:21-23)

⁹ Basaen so Genesis 39:21-23. Anggano mairap so bilay diad prisoan, mapatpatnag ya bebendisyonan nen Jehova si Jose. Nala nen Jose so tiwala tan respeto na manunan opisyal na prisoan. Kanian ag-abayag, impiya to lad si Jose so amin ya priso tan si Jose la so mangigaganggan ed amin ya gagawaen da. Dia tua, ibabaga na Biblia ya “aglan balot pampapagaan [o pibabalian] na manunan opisyal na prisoan” so amin ya inmatalek to lad si Jose. Kanian imbes ya na-depress si Jose, amayamay la natan so iyuulo tan gagawaen to. Seguro agmakapanisiay Jose ed sayan agawa! Anta sikatoy naakusaan ya rapist, natan balet, sikatoy pantitiwalaan na manunan opisyal na prisoan. Amta tayo no akin ya ontan so agawa. Ibabaga na Genesis 39:23 ya “si Jehova et walad si Jose tan pinagmaliw nen Jehova a matalona so amin a ginawa to.”

10. Akin et posiblin alikna nen Jose ya sikatoy agbebendisyonan nen Jehova anggano nagmaliw ya katiwala diad prisoan?

¹⁰ Imadyin mo pa lamet no antoy alikna nen Jose nen sikatoy nagmaliw ya katiwala diad prisoan. Kasin maliket lad bilay to ta walad sikatoy pabor na manunan opisyal? Malamang ya andi, ta say labay ton talaga et makapaway la ed prisoan. Diad tua, nen walay kapara ton priso ya asingger lan ibulos, oniay imbilin to: “Salita mo ak ed Faraon, pian nipaway ak ed sayan pasen.” (Gen. 40:14) Pero, abayag ni antis ya anonotan na sayan laki ya istoryaen ed si Faraon so tungkol ed si Jose, kanian masulok nin duay taon ya nan-anos ed prisoan. (Gen. 40:23; 41:1, 14) Tuloytuloy balet ya benendisyonan nen Jehova. Akin et ontan so nibaga tayo?

11. Anton espisyal ya abilidad so inter nen Jehova ed si Jose, tan panon itan ya akatulong pian nasumpal so gagala nen Jehova?

 ¹¹ Legan ya wala nid prisoan si Jose, pinankugip nen Jehova so Faraon na duaran makapaaburidon kugip. Labay na Faraon ya naamtaan no antoy kabaliksan na saratan. Nen naamtaan to ya walay abilidad nen Jose ya ipatalos iray kugip to, impatawag to. Diad tulong nen Jehova, impatalos nen Jose iraman ya kugip tan nan-suggest ni ingen no antoy marakep ya gawaen na Faraon. Manbilib ya maong so Faraon. Anengneng to ya igigiya na Dios si Jose, kanian sikato la so pinili ton mangasikaso ed abasto na interon Ehipto. (Gen. 41:38, 41-44) Ag-abayag, walay graben eras ya agawad Ehipto tan diad Canaan, ya kawalaan na pamilya nen Jose. Lapud samay posisyon nen Jose, sarasarag ton tulongan so pamilya to pian ag-ira ompatey ed eras tan naprotektaan so pamilyan panlapuan na Mesias.

12. Diad amin ya agawad si Jose, panon ya sikatoy benendisyonan nen Jehova?

¹² Isip mo pa ray makapakelaw ya agawad bilay nen Jose. Siopa kasi so rason akin et sikatoy naimano nen Potifar anta aripen met labat? Siopay nanggaway paraan pian pantiwalaan na manunan opisyal na prisoan si Jose anta priso met labat? Siopa kasi nanlapuan na saramay akugip na Faraon, tan siopay angiter na abilidad nen Jose ya mangipatalos ed saratan? Siopay nampakiwas ed Faraon ya pilien si Jose ya mangasikaso na abasto na interon Ehipto? (Gen. 45:5) Anggapoy arum noag si Aman Jehova. Sikato so mamebendisyon ed amin ya gagawaen nen Jose. On, anggan samay mauges ya ginawa na saray kuya nen Jose et pinagmaliw nen Jehova ya paraan pian nasumpal so gagala to.

13. Kasin kokontrolen nen Jehova so amin ya nagagawa ed bilay tayo? Ipaliwawa.

¹³ Anto ray naaralan tayo ed saray agawad bilay nen Jose? Kasin kokontrolen nen Aman Jehova so amin ya nagagawa ed bilay tayo? Kasin kaibad plano to iray subok ya dadalanen tayo ta amta ton parad pankaabigan tayo lanlamang iratan? Andi, aliwan  ontan so ibabangat na Biblia. (Ecl. 8:9; 9:11) Pero aya so segurado: Amta nen Jehova so amin ya dadalanen tayon subok tan dedengelen to tayo no onkerew tayoy tulong. (Sal. 34:15; 55:22; Isa. 59:1) Tan seguradon tulongan to tayo pian naanosan tayoy anggan anton irap. Panon to balet itan ya gagawaen?

14. Panon itayon tutulongan nen Jehova no wala tayod mairap ya situasyon?

¹⁴ Manggaway paraan si Aman Jehova pian napaseseg tan napabiskeg to tayo diad eksakton panaon ya kakkaukolan tayo itan. (2 Cor. 1:3, 4) Ontan so naeksperiensya nen Brother Eziz ya taga Turkmenistan. Sikatoy asentensiaan ya napriso na duay taon ta agto labay so mansundalo. Oniay imbaga to: “Diad samay kabuasan antis ak ya litisen ed korte, walay brother ya impabasa tod siak so Isaias 30:15. Kuan to ditan et: ‘Say biskeg yo et akadepende ed pansiansia yon kalmado tan pangipatnag yoy panagmatalek.’ Balbaleg so nitulong na sayan teksto pian kalmado ak labat tan ipaubayak lan amin ed si Aman Jehova. Inagew-agew ko itan ya sankanonot legan ak ya walad prisoan.” Sika ey? Walay nanonotan mon agawad bilay mo ya tinulongan ka nen Jehova nen kakkaukolan moy panamaseseg?

15-16. Antoy naaralan mod si Sister Tori?

¹⁵ No maminsan, na-realize tayo labat ya benendisyonan tan tinulongan itayo nen Jehova no alampasan tayo la so sakey ya subok. Ontan so a-realize nen Sister Tori. Say anak ton si Mason et anem taon ya nilabanan toy sakit ya cancer anggad inatey. Agaylay ermen nen Sister Tori. Kuan to: “Ansakisakit ya nanenengneng moy anak mo ya maniirap ya maong. No maminsan naiisip ko ya siak la komon so nansakit, aliwan sikato.”

¹⁶ Pero kada no pawilen nen Sister Tori iray  agawgawa legan ton aasikasoey Mason, nari-realize to ya dakdakel so ginawa nen Jehova pian nasarag to iman. Kuan to: “No isipen ko ray agawgawa, nari-realize ko ya maar-aroy Aman Jehova. Singa bilang, manbiahe na duay oras iray agagi pian napasyar da kamid ospital anggano amta ra ya agda met lanlamang nanengneng si Mason lapud makapkapuy. Walan-walay agi ya manaalagar ed waiting room. Wadtan labat ira ta labay dan ipaliknay suporta. Agda kami met pinaulyanan diad saray materyal ya pankaukolan mi. Mair-irap may situasyon mi, pero say makapakelaw agkamin balot kinmulang.” On, tinulongan nen Jehova iyan sanina pian nasarag da iman ya mair-irap ya subok.—Nengnengen so kahon ya “ Agkamin Balot Pinaulyanan nen Jehova.”

17-18. Antoy gawaen tayo pian nanengneng tayo no panon itayon tutulongan tan bebendisyonan nen Jehova anggano ondadalan tayod subok? (Salmo 40:5)

¹⁷ Basaen so Salmo 40:5. Say goal na mountain climber et makasabi ed toktok na palandey. Pero diad panha-hiking to, seguradon ontunda ya sagpaminsan ta wala ray mararakep ya view. Mipadpara, no ondadalan tayod sakey ya subok, siempre say labay tayo et manampot la komon itan. Pero maabig no ontunda tayon magano tan isipen tayo no panon itayon tutulongan tan bebendisyonan nen Aman Jehova. Kada agew, tepetan moy sarilim: ‘Antoy naawat kon bendisyon natan? Anggano mair-irap so situasyon ko, panon ak ya tutulongan nen Jehova pian nasarag ko itan?’ Seguradon walan-walay anggan sakey ya naisip mo ya ginawa nen Jehova pian natulongan to ka.

¹⁸ Ompan ipipikasim ya naekal la komon so problema o subok ya dadalanen mo. Diad tua, agmet makapuy no ontan so ipikasim. (Fil. 4:6) Pero agtayo komon bulag ed saray bendisyon ya iiter nen Jehova. Di ba, insipan to ya pabiskegen tan tulongan to tayo pian nasarag tayo ray subok? No malikas ka ed saray gagawaen nen Jehova parad sika, nanengneng mo ya tutulongan tan bebendisyonan ka nen Jehova, ya singa ginawa tod si Jose.—Gen. 41:51, 52.