1-2. (a) Ngera uchul me ngdiak el mechas a rengud sel bo dechebangel a ringel? (b) Ngera kede mo mesaod er tia el suobel?

 KID el chedal a Jehovah a diak lemechas a rengud sel bo dechebangel a ringel. A Biblia melekoi el kmo, “Kid a kired el mo chuarm er a betok el ringel e mochu soiseb er a Rengedel a Dios.” (Rel. 14:22) Kede dirrek el medengei el kmo a bebil er a mondai er kid a di mo mesmechokl er a chelsel a beches el blekeradel, el “dikea lluut el mor ngii a kodall, e mo diak a klengiterreng, ma langel, ma ringel.”​—Och. 21:4.

² A Jehovah diak el stob a ringel el bo dechebangel. Engdi ngolengeseu er kid loutekangel. Molatk a ledilu Paulus el mora Rekristiano el kiliei er a Rom. A kot e ngulemasech a ringel el ngii me a rudam er ngii a chelebangel. A uriul e ngdilu el kmo: “Ngikel betik a rengul er kid a uchul me kede kmal di mo mesisiich er a ikal rokui!” (Rom 8:35-37) Tia belkul a kmo a Jehovah sebechel rullid el mo ungil er aike el rokui el doruul alta kede chelebangel a ringel. Me dosaod er a rolel e a Jehovah ngilsuir a Josef el mo ungil er aike el rokui el tekoi el lurruul me a rolel e ngsebechel ngosukau el dirrek.

3. Ngera el tekoi a di mle kiul el duubech er a klengar er a Josef?

³ A Jakob a di mle bleketakl lochotii el kmo ngkmal mle betik a rengul er a ngelekel er a Josef. (Gen. 37:3, 4) Sei a uchul me a rubekul a Josef a kmal mle mechechei er ngii. Sera lebo er ngii a techellir e tulterur a Josef el mora rechad er a Midian el rulterau a klalo. Tirka ngiluu a Josef el betok el dart el mael el mora Ekipten e liluut loterur el mora Potifar, el ofiser er a Farao el mle merreder er a klekar er a blil. Ngkmal di mle kiul  mengodech a klengar er a Josef. Ngika el kmal mle betik er a rengul a demal a mlo sibai er a Ekipten.​—Gen. 39:1.

4. Ngera el omelsemai a locha bo dechebangel losisiu er a tekoi el dilubech el mora Josef?

⁴ A Biblia melekoi el kmo a “mekngit el tekoi a duubech el mora rokui el chad.” (Oli. 9:11, Holy Bible​—Easy-to-Read Version) A lebebil e kede mo chobangel a ringel “lodengei a rechad,” el belkul a kmo ngringel el rokui el chad a chobangel. (1 Ko. 10:13, NW) Me a lechub e kede chelebangel a ringel lekid el disaiplo er a Jesus. El ua tiang, te locha mo oltuub, omtok, me a lechub e te oldechelakl er kid le ngklaumerang er kid a uchul. (2 Ti. 3:12) Ngii di el ringel el omchebangel, a Jehovah sebechel ngosukau el mo ungil er aike el bek el moruul. Ngmilekera meruul el uaisei el kirel a Josef?

5. Ngera ngmle uldesuel a Potifar er a uchul me a Josef a mle ungil er a rokui el tekoi el lurruul? (Genesis 39:2-6)

⁵ Monguiu er a Genesis 39:2-6. A Potifar a mlo mtebengii el kmo, a Josef a mle mellomes a rengul e chad er a ureor. Ngdirrek el mle medengelii a uchul me a Josef a uaisei a blekerdelel. A Potifar a milsa el kmo, “a RUBAK a rirellii me ng di mlo ungil er a ikel rokui el tekoi el lurruul.” b Cherengel a taem e ngrirellii el mo mengedengil a blil me a kloklel el rokui. Me ngngera dilubech? Milenga el mo ungilbesul a Potifar.

6. Nglocha ngera mle uldesuel a Josef el kirel a blekeradel lemla er ngii?

⁶ Momes a blekeradel loba osengel a Josef. Ngera el tekoi a kmal soal? Ngmle soal a Potifar a lesang e lebsa omeksulel? Sel mle kot el soal a Josef a mo mimokl me lsebechel lmuut el mora demal. E alta ngkmal mle betok a ileakl el techall lolab er a blil a Potifar, engdi ngika dirk mle sibai e a merredelel a dimlak losiou er a Jehovah. Me nguaisei a Jehovah dimlak lerellii a Josef el mo mimokl. A klengar er ngii a bai liluut el kmal mo meringel.

7. Ngmilekera blekeradel er a klengar er a Josef e lmuut el kmal mo meringel? (Genesis 39:14, 15)

⁷ Ngua desa er a 39 el bliongel er a Genesis, a bechil a Potifar a mlo soal a Josef e  kmal di millasem el meruul er ngii el mo bad lobengkel. Engdi bek el taem loruul el uaisei e a Josef a mle kotouar er ngii. Ngkmal mlo kesib a rengul er a Josef me ngultelecheklii el kmo, ngmillasem lolterebek er ngii. (Monguiu er a Genesis 39:14, 15.) A Potifar er a louchais er ngii, e ngchilsmerii a Josef er a blil a kelebus. Me a Josef a mlo kelebus el melai a rak. (Gen. 39:19, 20) Ngmle uangera tia el blil a kelebus? A tekoi er a Hebru luluusbech er ngii a Josef el kirel a tekoi el “kelebus” a sebechel belkul a kmo “bokungo.” Ngbelkul a kmo a blil a kelebus lemla er ngii a mle milkolk e ngii a mle feel el kmo ngkmal diak a rolel a ltobed er ngii. (Gen. 40:15, NW; ftn.) A Biblia dirrek el melekoi el kmo ngmla er ngii a taem e ngmle llechotel ochil er a bombatel e mla er ngii a deel el meliuekl er a chiklel. (Psa. 105:17, 18) A blekeradel er a klengar er a Josef a liluut el kmal mo meringel. Ngika el sibai el kmal luluumerang er ngii a mastang er ngii a chelechang e ngkelebus.

8. Mo lmuut me a lluut el mo meringel a tekoi el dechelebangel er ngii, me ngngera sebechel mo ulterekokl a rengud er ngii?

⁸ Ngmla ta el bo mchebangel er a blekeradel el kmal meringel e liluut el mo imis el meringel alta ngkmal blak a rengum el meluluuch? Tia sebechel duubech. A Jehovah diak el stob a ringel er a beluulechad el longedereder er ngii a Satan me lak el duubech el mei er kid. (1 Jn. 5:19) Engdi ngsebechel mo ulterekokl a rengum er tiang: Jehovah ungil medengelii a ringel el omchelebangel er ngii, e ngii a kmal omekerreu er kau. (Mt. 10:29-31; 1 Pe. 5:6, 7) Me a lmuut kung, ngtibir el kmo: “Ngkmal diak bo kcheroid er kau ma ka kchitau.” (Heb. 13:5, BT) Jehovah sebechel ngosukau loutekangel mo lmuut er a obom feel el kmo ngdiak a rolel e mtobed er ngii. Ka me desa rolel e a Jehovah mirruul er tiang el kirel a Josef.

9. Ngera ochotii el kmo a Jehovah ulebengkel a Josef er a lengar er a kelebus? (Genesis 39:21-23)

⁹ Monguiu er a Genesis 39:21-23. Mo lmuut er a chelsel tia el kmal meringel el taem er a klengar er a Josef el kelebus, me a Jehovah rirellii el mo ungil er aike el rokui el lurruul. Ngmilekerang? Omerollel a taem e a Josef a ngiluu a klaumerang me a omengull er ngike el merreder er a rekelebus, el ua Potifar. Cherengel a taem e ngrirellii el mo oungerachel er a rokui el kelebus. A Biblia melekoi el kmo a “merreder er a kelebus a dimlak lousbech el mo omes a ngii di le ngerang el luluungerachel a Josef.” Me a Josef a mlo er ngii a ureor el mengesang er a uldesuel. Tia omelodech el dimlak el expect er ngii el mo uaisei. Ngmekera chad el mlotelechakl el olterebek er a bechil a ngarbab el ofiser e nguu a deruchall el uaisei? Ngdi ngar ngii a ta el luchul. A Genesis 39:23 a kmo: “RUBAK a ulebengkel e riruul a bek el tekoi el lurruul el di mlo ungil.”

10. Mosaod er a uchul me a Josef a locha dimlak le feel el kmo ngmle ungil er aike el rokui el lurruul.

¹⁰ Ka mluut lomes a blekeradel loba osengel a Josef. Uriul er a lemotelechakl e lemekelebus, omomdasu ngmle feel el kmo ngungil er a rokui el tekoi loruul? Ngera el tekoi a kmal soal? Nguu a kengei er a merreder er a rekelebus? A Josef a mle soal mo mimokl. Ngika ullengit er a ta er a kelebus el mle kmedu el tuobed me longedecheduch er a Farao el kirel me lsebechel tobed er tia el milkolk el blil a kelebus. (Gen. 40:14) Engdi ngika el chad a dimlak lemereched el mo mengedecheduch er a Farao el kirel. Me a Josef a liluut el kelebus el eru el rak. (Gen. 40:23; 41:1, 14) Me nguaisei, engdi a Jehovah a millemolem el meruul er ngii el mo ungil er aike el rokui el loruul. Ngmilekerang?

11. Ngera ileakl el duch a lebilsa Josef a Jehovah, e tia ngmilekera olengeseu el otutii a moktek er ngii?

 ¹¹ A Josef er a lengar er a kelebus a Jehovah rirellii a Farao el mo omerrous a teblo el berrous el kmal milengesang er ngii. A Farao a kmal mle soal mo medengei a belkul. Sera bo lodengei el kmo a Josef a ngar ngii a duch er ngii louchais a belkul a berrous e ngmlo nguu el mei. Ngoeak a ngelsuil a Jehovah e a Josef uluuchais a belkul a berrous. Me a dirrek a Farao a kmal mlo soal a ngeso er a uldasu el lebilsang. Sera lesa el kmo a Jehovah ulebengkel a Josef e ngtiltkii el mo oungerachel a rokui el kall er a beluu er a Ekipten. (Gen. 41:38, 41-44) Uriul e ngdilubech a klou el bosech er a kall er a Ekipten me a Kanaan, el beluu lekiliei er ngii a telungalek er a Josef. Me a Josef er chelechang a sebechel losebelii a telungalek er ngii e mekerreuii a uldidellel a rasech el mora Mesias.

12. Ngoeak a ngera el rolel e a Jehovah rirellii a Josef el mo ungil er aike el rokui el lurruul?

¹² Molatk aika el blekeradel er a klengar er a Josef. Ngtecha rirellii a Potifar el mo mtab osengel er a Josef el sibai? Ngtecha rirellii a merreder er a blil a kelebus el mo ungil er a Josef el kelebus? Ngtecha milsa berrusel a Farao el kmal mlo mengesang er ngii e milsa Josef a duch el mo ouchais a belkul? Ngtecha rirellii a Farao el mo rullii a Josef el mo oungerachel a kall er a Ekipten? (Gen. 45:5) Ngbleketakl el kmo ng Jehovah rirellii a Josef el mo ungil er aike el rokui el lurruul. Me a Jehovah ngiluu tia el kmal rasechebeab lomerellir a rubekul a Josef e mileltii el mo rolel e ngotutii a moktek er ngii.

13. A Jehovah ngomekrael a rokui el tekoi el duubech el mei er kid? Mosaod.

¹³ Ngera kede suub er a klengar er a Josef? A Jehovah ngmo stob a bek el ringel el bo dechebangel? Ngomekrael a rokui el mekngit el duubech er a klengar er kid me a rokui el mekngit el tekoi el duubech a ngar ngii a ungil luchul? Ngdiak, a Biblia diak lolisechakl el uaisei. (Oli. 8:9; 9:11) Engdi kede medengei el kmo: Sel bo dechebangel a ringel e a Jehovah ungil medengei e orrenges a nglunguched lolengit a ngeso. (Psa. 34:15; 55:22; Isa. 59:1) Me a lmuut kung,  Jehovah sebechel ngosukid el mtekangel a ringel. Ngoeak a ngera el rolel?

14. Ngmekera Jehovah olengeseu er kid er a chelsel a meringel el taem?

¹⁴ A ta er a rolel e a Jehovah olengeseu er kid, a omeskid ongelaod me a omelisiich er sel taem el kmal dousbech er ngii. (2 Ko. 1:3, 4, BT) Tiakid a dilubech el mora Eziz, lodam er a Turkmenistan el mlo kelebus el eru el rak el kirel a klaumerang er ngii. Ngmelekoi el kmo: “A tutau er a sils er a kerrekerilek e ngmla er ngii a odam lulechotii er ngak a Isaia 30:15, el ngii a melekoi el kmo: ‘Di mchelellakl el oumeral ulsirs er ngak. Isei e kom mo mesisiich e selebechakl.’ Tia el bades a mle blechoel lolengeseu er ngak me ngmelemolem el chelellakl a renguk e oumera el ulsirs er a Jehovah er a chelsel a rokui el tekoi. Omelebedebekek er tia el bades a ngilsukak er a taem el kkelebus.” Ngsebechem el lotkii a taem er a klengar er kau el Jehovah ullengeseu er kau loeak a longelaod e lolisiich er kau er sel taem el kmal muluusbech er ngii?

15-16. Ngera ke suubii er a experience er a Tori?

¹⁵ Ngblechoel uriul er a bo lemerek a ringel el dengar ngii e kede mo mtebengii a rolel e a Jehovah ngilsukid er ngii. A odos el Tori milsang el kmo tia kmal klemerang. A ngelekel er a Mason a mle smecher el kasinoma el elolem el rak e mo smecher. A Tori kmal mlo mekngit a rengul. Ngmelekoi el kmo, “Ngdiak a lmuut el meringel el ringel el mei er ngak el chedil el uai tiang. A kuumerang el kmo a ruungalek a mo kongei el kmo nglmuut el meringel er kid omes er a ngeleked el chuarm, er a bai lekid a chuarm.”

¹⁶ Alta tia kmal mle meringel el blekeradel, a Tori uriul e ngmlo melatk er a rolel e a Jehovah ullengeseu er ngii loutekangel. Ngmelekoi el kmo: “Sel kulatk er tiakid el taem e  ngsebechek el mesa chimal a Jehovah er a lesecher a ngelekek. El ua tiang, mo lmuut er aike el taem el sal kmal mlo smecher a Mason me ngdiak el sebechel lomes er a rechad, a rudam me a rudos a dirk ulemekall el eru el sikang el mei er a osbitar. Ngmle blechoel el ngar ngii a chad er a waiting room el kltmokl lolengeseu er kemam. Te dirrek el milskemam aike el ki mousbech. Mo lmuut er a chelsel a imis el meringel el taem, me ngdi mla er ngii aike el ki mousbech.” A Jehovah milsa Tori a luluusbech er ngii el mo outekangel e dirrek el mirruul el uaisei el kirel a Mason.​—Momes er a baks el “ Jehovah Milskemam Sel Kmal Ki Muluusbech er Ngii.”

17-18. Ngera mo ngosukid el mesa ngelsuil a Jehovah er a temel a ringel, e mo oba omereng el saul el kirel? (Psalm 40:5)

¹⁷ Monguiu er a Psalm 40:5. A chad el melemiakl a rois a turrekong er ngii a mora chetebtel a rois. Me nguaisei engdi ngbetok aike el techall er a omerollel el sebechel stob e omes er a view. Ngdi osisiu, mongoit a taem el stob e molatk er a rolel e a Jehovah a meruul er kau el mo ungil er aike el rokui el tekoi el moruul alta ke chelebangel er a ringel. A ulebengelel a bek el sils e di lekau el oker: ‘Ngoeak a ngera el rolel e ak mesa klengeltengat er a Jehovah er chelecha el sils? Alta kdirk chelebangel er a meringel el blekeradel, ngmekera Jehovah e olengeseu er ngak loutekangel?’ Mletkii a at least e ng one el klengeltengat er a Jehovah el mla ngosukau.

¹⁸ Nguaisei, ke locha meluluuch me bo lemerek a tekoi el mchelebangel er ngii. E ungil omoruul el uaisei. (Fil. 4:6) Engdi ngkired el dirrek el melatk a klengeltengat el dolab er chelechang. A Jehovah tibir el kmo ngmo melisiich er kid e ngosukid loutekangel. Me bo blechoel loba omereng el saul el kirel a Jehovah lolengeseu er kau. Seikid e ke mo mesa rolel e ngolengeseu er kau el mo ungil er aike el rokui el moruul, el ua lurruul er ngii el mora Josef, el mo lmuut er a chelsel a meringel el taem.​—Gen. 41:51, 52.