1-2. (a) Wuarom wundat ons daut nich, daut wie Schwierichkjeiten haben? (b) Waut woa wie en disen Artikjel seenen?

 AUS Jehova sien Volkj wundat ons daut nich, daut wie Schwierichkjeiten derch motten. Wie weeten, daut de Schreft sajcht, daut wie motten “derch väl schwoaret en daut Gottesrikj nenn gonen” (Apj. 14:22). Wie weeten uk, daut eenje von onse Trubbels nich woaren gaunz opphieren, ea wie woaren en Gott siene niee Welt läwen. “Doa woat kjeen Doot ooda Trua ooda Hielen ooda Weedoag mea sennen” (Opb. 21:4).

² Jehova woat ons nich von de Schwierichkjeiten wajchhoolen, oba hee woat ons halpen, dee uttohoolen. Kjikj, waut de Apostel Paulus to de Christen säd, waut en de Staut Room wonden. Ieescht rieejd hee väl Schwierichkjeiten opp, waut siene Breeda derchgonen musten. Dan schreef hee: “En aul dit hab wie de äwahaunt, om däm sient haulwen, dee ons goot es” (Reem. 8:35-37). Dit bediet, daut Jehova ons halpen kaun, Erfolch to haben, mau rajcht en dee Tiet, wan wie Schwierichkjeiten derchgonen. Well wie mol seenen, woo hee Josef holp, Erfolch to haben un woo hee die halpen kaun.

3. Woo veendad Josef sien Läwen sikj haustich?

³ Jakob wees gaunz dietlich, daut hee sienen Sän Josef sea leewd (1. Mo. 37:3-4). Un wäajen daut wieren Jakob siene elre Säns äaren Brooda Josef aufjenstich. Aus dee dan eene Jeläajenheit sagen, vekoften dee Josef aun eene Grupp Haundelsmana von Midian. Dise Mana neemen Josef hundade Kilomeeta met no Ägipten. Doa wort am noch wada vekoft, un dit Mol aun Potifar, dän bowaschten von dän Kjennich  siene Woaka. Josef sien Läwen endad sikj haustich. Ieescht wia hee sien Voda sien leewa Sän, un nu wia hee een läach aunjeseena Sklow en Ägipten (1. Mo. 39:1).

4. Waut fa Schwierichkjeiten kjenn wie bie dise Tiet haben?

⁴ De Bibel sajcht: “Schlajchtet passieet aulem” (Liera 9:11, Holy Bible—Easy-to-Read Version). Eenjemol hab wie “menschlich bekaunde” Schwierichkjeiten. Daut sent Schwierichkjeiten, waut aule Menschen beläwen (1. Kor. 10:13). Veleicht mott wie uk doawäajen lieden, wäajen wie Jesus siene Nofolja sent. Biejlikj woat ons veleicht vespott ooda wie haben Wadastaunt ooda mau rajcht Vefoljunk wäajen onsen Gloowen (2. Tim. 3:12). Krakjt endoont waut vonne Schwierichkjeiten wie uk derch motten, Jehova kaun ons halpen, Erfolch to haben. Woo deed hee daut bie Josef?

5. Waut wort Potifar en, aus Josef met aules Jlekj haud? (1. Mose 39:2-6).

⁵ Läs 1. Mose 39:2-6. Potifar wort en, daut Josef sikj met väl vestunt un sea schauft. Hee wist uk wuarom. Potifar sach, daut Jehova Josef “Jlekj jeef met aules waut hee deed”. b Met de Tiet muak dis Ägipta Josef to sienen perseeneljen Deena. Hee stald Josef uk äwa sien gaunzet Hus aun. Woo kjeem daut ut? Potifar haud een goodet Wiedakomen.

6. Woo haft Josef daut woomäajlich en siene Omstend jegonen?

⁶ Stal die mol väa, woo Josef daut mott jegonen haben. Waut jankad Josef secha daut dolste? Wull hee haben, daut Potifar am sull beloonen un huach aunseenen? Secha wull Josef leewa wada frie woaren, daut hee trigj no sienen Voda kunn. Wan hee uk väl Väarajchten haud bie Potifar sien Hus, wia hee doawäajen oba een Sklow von eenen Mensch, waut nich Jehova deend. Jehova brocht Potifar nich bat doa, Josef frie to moaken, un Josef siene Loag wudd noch väl schlemma woaren.

7. Woo wort Josef siene Loag von schlemm noch emma schlemma? (1. Mose 39:14-15).

⁷ Soo aus 1. Mose Kapitel 39 sajcht, haud Potifar siene Fru een Uag opp Josef un  see proowd, am emma wada to veleiden. Oba Josef säd ar jiedatsmol auf. Dan wort see soo doll äwa Josef, daut see säd, daut hee haud jeprooft, met ar Schaund to driewen (läs 1. Mose 39:14-15). Aus Potifar daut hieed, leet dee Josef enstoppen un Josef must fa eenje Joaren em Jefenkjnis bliewen (1. Mo. 39:19-20). Woo wia daut Jefenkjnis? Daut hebräische Wuat, waut Josef fa “Jefenkjnis” brukt, kaun “Zista” ooda “Growen” bedieden, un hee jeef doamet auntovestonen, daut daut eene diestre Städ wia un hee sikj onen Hopninj feeld (1. Mo. 40:15). De Schreft sajcht uk, daut Josef siene Feet fa eene Tiet en Kjäden jebungen wieren un hee rom sien Jenekj eenen Iesarinkj haud (Psa. 105:17-18). Josef siene Loag wort von schlemm noch emma schlemma. Ieescht wia hee een Sklow, waut se vetruden, un nu wia hee een läach aunjeseena Jefangna.

8. Äwa waut kjenn wie ons secha sennen, wan onse Schwierichkjeiten uk schlemma woaren?

⁸ Best du mol en eene schwieeje Loag jewast, waut von schlemm noch emma schlemma wort, wan du uk iernstlich bäden deetst, daut daut sull bäta woaren? Soont kaun passieren. En eene Welt, waut von dän Soton beharscht woat, woat Jehova ons nich von de Trubbels wajchhoolen (1. Joh. 5:19). Oba du kaust die doawäajen secha sennen, daut Jehova daut enwoat, waut du derchmotst un daut hee om die bekjemmat es (Mat. 10:29-31; 1. Pet. 5:6-7). Hee haft uk vesproaken: “Ekj woa die nich veloten, die nich em Stich loten” (Heb. 13:5). Mau rajcht en eene Loag, waut sikj onen Hopninj späat, kaun Jehova die halpen uttohoolen. Well wie mol seenen, woo hee daut bie Josef deed.

9. Waut wiest, daut Jehova met Josef wia, aus hee em Jefenkjnis wia? (1. Mose 39:21-23).

⁹ Läs 1. Mose 39:21-23. Jehova holp Josef, Erfolch to haben, mau rajcht en dise schwoare Tiet, aus hee enjestopt wia. Woo? Met de Tiet vetrud de Väaschta von de Aunjestalde am un respakjt am, krakjt soo aus Potifar daut ea deed. Daut dieed goanich lang, dan stald de Väaschta von de Aunjestalde Josef äwa de aundre Jefangne aun. Nu haud Josef wada eene Oabeit, wua hee sikj kunn met drock hoolen. De Schreft sajcht mau rajcht: “De Aunjestalda kjemmad sikj nuscht om de Dinja, dee hee Josef äwajäft haud”. Daut wia eene Endrunk, wua hee nich met jeräakjent haud! Woo kunn een Jefangna nu soone wichtje Oppgow kjrieen, wan hee doch beschulcht wort, daut hee haud wult Schaund driewen met de Fru von dän Väaschten von dän Kjennich siene Woaka? Daut kunn bloos wäajen eent sennen. Soo aus daut en 1. Mose 39:23 sajcht: “De HAR wia met Josef un jeef am Erfolch en aules waut hee deed.”

10. Woosoo feeld Josef sikj woomäajlich soo, daut hee nich en aules Erfolch haud?

¹⁰ Proow die nochmol väatostalen, woo Josef sikj en dise Loag mott jefeelt haben. Jleefst du, daut hee sikj soo feeld, daut hee en aules Erfolch haud, nodäm daut se am faulsch beschulcht un enjestopt hauden? Waut wia daut, waut Josef daut leefste wudd haben wult? Wull hee bie dän väaschten Aunjestalden von daut Jefenkjnis huach aunjeseenen sennen? Secha nich! Daut leefste wull Josef wada frie sennen. Hee säd mau rajcht to eenen aundren Jefangnen, waut doa wudd rutkjennen, daut hee sull fa am to dän Farao räden, om daut hee kunn ut dit schlemme Jefenkjnis rutkomen (1. Mo. 40:14). Oba dis Maun räd nich fuaz to Farao von am, un doawäajen must Josef noch twee Joa lenja em Jefenkjnis sennen (1. Mo. 40:23; 41:1, 14). Oba Jehova holp am, wieda Erfolch to haben. Woo deed hee daut?

11. Waut fa besondret kunn Josef met Jehova siene Help doonen, un woo holp dit, daut Jehova sien Väanämen utjefieet wort?

 ¹¹ Aus Josef em Jefenkjnis wia, leet Jehova dän Kjennich von Ägipten twee Dreem haben, waut am sea beorruijden. Dis Farao wia gaunz vetwiewelt un wull weeten, waut dee bedieden. Aus de Kjennich dan enwort, daut Josef kunn Dreem utlajen, schekjt hee am holen. Josef kunn dise Dreem met Jehova siene Help utlajen un de Farao wia sea vewundat äwa dän gooden Rot, waut Josef am jeef. De Farao sach daut, daut Jehova met disen jungen Maun wia un hee stald Josef äwa daut Ätwoa en gaunz Ägipten aun (1. Mo. 41:38, 41-44). Lota wia doa eene groote Hungaschnoot, waut nich bloos Ägipten troff, oba uk Kanaan, daut Launt, wua Josef siene Famielje wond. Nu kunn Josef siene Famielje raden, un doaderch wia daut mäajlich, daut de Messias lota von dise Famielje aufstaumen kunn.

12. Woo holp Jehova Josef, Erfolch to haben?

¹² Denkj mol äwa daut butajeweenelje no, waut en Josef sien Läwen passieed. Wäa brocht Potifar bat doa, daut hee oppmoakjsom opp Josef wort, waut bloos een Sklow wia? Wäa brocht dän väaschten Aunjestalden vom Jefenkjnis bat doa, daut hee Josef bäta behaundeld, waut bloos een eefacha Jefangna wia? Wäa jeef Farao de Dreem, waut am sea beorruijden, un wuarom kunn Josef dee utlajen? Wäa wia hinja de Entscheidunk, Josef auntostalen äwa aul daut Ätwoa en Ägipten? (1. Mo. 45:5). Gaunz secha wia daut Jehova, waut Josef leet Erfolch haben! Wan Josef siene Breeda am uk wullen dootmoaken, endat Jehova dise Loag, daut hee sienen Wellen kunn utfieren.

13. Fot Jehova en jieda Loag, waut wie beläwen, mank? Laj daut ut.

¹³ Waut lia wie von daut, waut Josef beläwd? Fot Jehova emma, en jieda Loag, mank, waut wie derchmoaken? Lenkjt Jehova aules soo, daut daut schlajchte, waut doa passieet, to waut goodet deent? Nä, de Schreft lieet soont nich (Liera 8:9; 9:11). Oba eent weet wie: Wan wie Schwierichkjeiten derchmoaken, woat Jehova daut en, un hee hieet ons, wan wie om Help bäden (Psa. 34:16; 55:23; Jes. 59:1). Un Jehova kaun  ons uk halpen, onse Schwierichkjeiten met Erfolch uttohoolen. Woo?

14. Woo halpt Jehova ons, wan wie Schwierichkjeiten derchmoaken?

¹⁴ Eene Wajch, woo Jehova ons halpt, es, wan hee ons treest un Moot toosprakjt. Daut deit hee foaken krakjt to de rajchte Tiet (2. Kor. 1:3-4). Daut wia soo aus Eziz, eenen Brooda en Turkmenistan, daut jinkj, waut wäajen sienen Gloowen veuadeelt wort fa twee Joa Jefenkjnis. Hee sajcht: “Aun dän Zemorjes, aus mien Jerecht wia, wees een Brooda mie Jesaja 30:15, wua daut sajcht: ‘Wan jie stell bliewen un vetruen hoolen, woa jie stoakj sennen.’ Dis Varsch haft mie emma jeholpen, ruich to bliewen un en aules opp Jehova to vetruen. Äwa disen Varsch notodenkjen, holp mie de gaunze Tiet, aus ekj enjestopt wia.” Hast du mol soont beläft, daut Jehova die krakjt dan holp un die Moot toospruak, wan die daut daut dolste fäld?

15-16. Waut lieescht du von daut, waut Tori beläwd?

¹⁵ Foaken see wie daut bloos lota, wan wie äwa eene Schwierichkjeit trigjdenkjen, waut wie derchmusten, woo Jehova ons doabie holp. Bie eene Sesta, waut Tori heet, wia daut soo. Äa Sän, Mason, haud fa sas Joa Kjräft, bat hee storf. Daut es to vestonen, daut Tori sea truarich wia. See sajcht: “Ekj jleew, daut wia daut gaunz schlemste, waut ekj aus Mame beläwen kunn.” See sajcht uk noch: “Ekj sie mie secha, daut aundre Elren daut uk sajen, daut daut schlemma es, dien Kjint seenen lieden, aus selfst to lieden.”

¹⁶ Wan Tori daut uk sea truarich muak, daut see äaren Sän soo sea lieden sach, docht see oba lota doaräwa no, woo Jehova ar jeholpen haud uttohoolen. See sajcht: “Wan ekj nu äwa dee Tiet nodenkj, kaun ekj seenen, woo Jehova mie dän tietäwa jeholpen haft, aus mien Sän krank wia. Biejlikj  wan Mason uk too krank wia toom Besuch kjrieen, kjeemen de Breeda un Sestren doawäajen batem Hospitol, wan dee uk twee Stund auf wonden. Doa wia emma wäa reed en de Luastow, om ons to halpen un unjastetten. Dee kjemmaden sikj uk om ons em tieteljen. Mau rajcht en de schwanste Tieden haud wie emma aules, waut ons fäld.” Jehova jeef Tori daut, waut see brukt toom uthoolen, un hee deed daut uk fa Mason. (See dän Kausten “ Jehova jeef ons krakjt daut, waut ons fäld.”)

17-18. Waut woat die halpen to seenen, woo Jehova die en Schwierichkjeiten halpt, un woo kaust du uk dankboa sennen? (Psalm 40:6).

¹⁷ Läs Psalm 40:6. Eena, waut enne Boaj klautat, well bat de Spetz komen. Oba hinjawäajes kaun hee doawäajen opp väl Städen stellhoolen un kjikjen, woo schmock daut lat. Doo daut uk biejlikj soo un näm die de Tiet un hool stell un denkj doaräwa no, woo Jehova die jeholpen haft, Erfolch to haben, wan du Schwierichkjeiten uthoolen motst. Denkj opp Enj von jieda Dach doaräwa no: “Woo haft Jehova mie vondoag jeholpen? Woo halpt Jehova mie uttohoolen, wan de Schwierichkjeit uk noch nich äwa es?” Proow, oppet weinichste eene Sach to seenen, waut Jehova jedonen haft toom die halpen, Erfolch to haben.

¹⁸ Daut es to vestonen un uk goot, wan du bätst, daut diene Schwierichkjeiten sellen een Enj haben (Filip. 4:6). Oba wie sellen uk de Säajnungen em Uag hoolen, waut wie nu jroz haben. Jehova haft je vesproaken, ons to stoakjen un ons to halpen uttohoolen. Doawäajen sie emma dankboa doafäa, daut Jehova die unjastett. Dan woascht du uk seenen, woo Jehova die halpt, en Schwierichkjeiten Erfolch to haben, krakjt soo aus bie Josef (1. Mo. 41:51-52).