1-2. (a) Dahme kahrehda kitail sohte kin pwuriamweikihla ni atail lelohng kahpwal kan? (b) Dahme kitail pahn koasoiapene nan iren onop wet?

 NIN duwen sapwellimen Siohwa aramas kei, kitail sohte kin pwuriamweikihla ni atail kin lelohng kahpwal kan. Kitail wehwehki me duwehte me Paipel mahsanih, “kitail uhdahn pahn powehdi soangen kahpwal tohto pwe kitail en kak pedolong nan Wehin Koht.” (Wiewia 14:22) Kitail pil ese me ekei atail kahpwal kan sohte pahn mwahula lao kitail pahn momour nan sapwellimen Koht sampah kapwo, wasa me “mehla solahr pahn wiawi, solahr mwahiei, solahr sengiseng oh solahr medek.”—Kaud. 21:4.

² Siohwa sohte kin ketin irehdi atail kahpwal kan. Ahpw e kin ketin sewese kitail en dadaurete. Tehk dahme wahnpoaron Pohl ndaiong Kristian akan nan Rom. Keieu e koasoia kahpwal kan me ih oh rie Kristian akan lelohng. Ih eri ntingihedi: “Kitail kana douluhl pwehki meno me ketin poakohng kitail.” (Rom 8:35-37) Met wehwehki me Siohwa kak ketin seweseiuk en pweida ni omw kin dadaur pahn kahpwal ehu. Kitail pahn kilang ia duwen Siohwa eh ketin sewese Sosep en pweida, oh ia duwen Eh kak ketin seweseiuk.

3. Wekidekla dah kan me mwadangete wiawihong Sosep?

³ Seikop kasalehda me e uhdahn poakohng nah pwutako Sosep. (Sen. 37:3, 4) Pwehki met, nein Seikop pwutak laud kan tepida peiriniong riarail pwutako. Irail eri netikihla Sosep  ong sounnet en mehn Midian kan. Sounnet ko wahla Sosep Isip, mwail epwiki kei sang eh wasao, oh irail uhd netikihong Podipar, nein Parao kaunen sounsilasil kan. Ia uwen en Sosep mour eh mwadangete wekila, sang eh wia nein eh pahpao pwutak kompoake ong lidu en Isip men!—Sen. 39:1.

4. Ia duwen atail kak lelohng kahpwal ehu me duwehte dahme Sosep lelohng?

⁴ Paipel mahsanih me “paisuwed kin lelohng aramas koaruhsie.” (Ekl. 9:11) Ekei pak kitail kin lelohng kahpwal kan me “kin lelohng aramas koaros.” (1 Kor. 10:13) De ele kitail kin lokolok pwehki kitail wia sapwellimen Sises tohnpadahk kei. Karasepe, mwein mie me pahn kapailoke, uhwong, de kaloke kitail pwehki atail pwoson. (2 Tim. 3:12) Sohte lipilipil soangen kahpwal dah me ke lelohng, Siohwa kak ketin seweseiuk en pweida. Ia duwen eh ketin sewese Sosep?

5. Dahme Podipar medewehki duwen Sosep eh kin pweida? (Senesis 39:2-6)

⁵ Wadek Senesis 39:2-6. Podipar tehkada me Sosep pwutak koahiek men oh e kin doadoahk laud. E pil ese dahme kahrehda. Podipar kilang me Siohwa “kin ketin ieiang Sosep oh mehkoaros kin pweida mwahu reh.” b Kedekedeo, Podipar pilada Sosep en wiahla nah sounpapah. E pil wiahiong Sosep en apwalih imweo pwon. Ia imwilahn met? Soahng koaros pweida mwahu rehn Podipar.

6. Ele ia ahn Sosep pepehm duwen eh irairo?

⁶ Medewehla ia ahn Sosep pepehm. Dahme e uhdahn mwahuki laudsang soahng teikan koaros? E men Podipar en tehk ih oh katingih? Mwein ele Sosep uhdahn men saledekla pwe en kak pwurala rehn eh pahpao. Mendahki pwukoa koaros me e alehdi nan imwen Podipar, Sosep wiahte lidu en soumas men me sohte kin kaudokiong Siohwa. Siohwa sohte ketin wiahiong Podipar en kasaledekla Sosep. Oh en Sosep kahpwalo pahn suwedla.

7. Ia duwen en Soses kahpwalo eh uhdahn suwedla? (Senesis 39:14, 15)

⁷ Nin duwen me Senesis irelaud 39 kasalehda, en Podipar pwoudo mwahukihda  Sosep oh pwurupwurehng kasonge ih. Ehuehu ahnsou, Sosep kin nda soh. Eri liho uhdahn lingeringerda pahn Sosep oh e nda me Sosep song en angkehlailih. (Wadek Senesis 39:14, 15.) Ni Podipar eh rongada met, e kesehlong Sosep nan imweteng, oh e mihmi wasao erein sounpar kei. (Sen. 39:19, 20) Ia mwomwen nan imwetengo? Lepin lokaiahn Ipru me Sosep doadoahngki ong “imweteng” kak wehwehki “pwarer” de “pwoahr.” Met kasalehda me wasa me e mihmi ieo kin rotorot oh e pehm me sohte eh koapworopwor. (Sen. 40:15) Paipel pil kasalehda me erein ahnsou kis, neh kan oh tepinwere kin selkihdi selmete. (Mel. 105:17, 18) En Sosep kahpwalo uhdahn suwedla. E wia lidu likilik men, ahpw met e mihla nan imweteng.

8. Mehnda ma atail kahpwal kan pahn suwedla, dahme kitail kak kamehlele?

⁸ Mie pak me omw kahpwal suwedla mendahki ke kin kapakap ni ngidingid? Met kak wiawi. Siohwa sohte kin ketin irehdi atail kahpwal kan nan sampah ehu me mi pahn kaundahn Sehdan. (1 Sohn 5:19) Ahpw ke kak kamehlele met: Siohwa uhdahn ketin mwahngih dahme ke kin lelohng, oh e kin ketin nsenohkin uhk. (Mad. 10:29-31; 1 Pit. 5:6, 7) Patehng met, e ketin inoukihda: “I sohte pahn mweisang uhk oh I sohte pahn keseiukala.” (Ipru 13:5) Siohwa kak ketin seweseiuk pil ni ahnsou me mwomwen sohte omw koapworopwor. Kitail pahn kilang ia duwen met eh mehlel ong Sosep.

9. Dahme kasalehda me Siohwa kin ketin ieiang Sosep ni eh mi nan imweteng? (Senesis 39:21-23)

⁹ Wadek Senesis 39:21-23. Mendahki eh mi nan kahpwal laud ni eh sensel, Siohwa ketin sewese Sosep en pweida. Ia duwen? Kedekedeo, kaunen imwetengo likihala oh wauneki Sosep, duwehte me Podipar wia. Kaunen imwetengo wiahiong Sosep en pwukoahki tohnimweteng teikan. Ni mehlel Paipel mahsanih me “kaunen imwetengo sohte kin kedirepwki en Sosep pwukoa.” Met Sosep ahneki doadoahk mwahu. Wekidekla wet wiawi ni soh kasikpe! Ia duwen tohnimweteng men me alehdi karaunlikamw me dene e song en angkehlailih en lapalap men eh pwoud eh kak ale soangen pwukoa laud wet? Kahrepe ehute mie. Senesis 39:23 mahsanih me Siohwa “kin ketin ieiang Sosep pwe mehkoaros me e kin wia en pweida mwahu.”

10. Menlau kawehwehda dahme kahrehda Sosep kakete medewe me e sohte pweida ni soahng koaros?

¹⁰ Medewehla ahn Sosep pepehm. E ale karaunlikamw oh selidi, ia duwe, e pehm me e pweida ni soahng koaros me e kin wia? Dahme Sosep mwahuki laudsang soahng teikan? E men kenikenla mwohn kaun en imwetengo? Sosep uhdahn men saledekla. E pil peki rehn emen ienge tohnimwetengo en koasoiong Parao pwe en kak saledeksang imwetengo. (Sen. 40:14) Ahpw ohlo sohte mwadangete koasoiong Parao. Pwehki met, Sosep mihmihte nan imwetengo pil sounpar riau. (Sen. 40:23; 41:1, 14) Ahpw Siohwa kin ketin pousehlahte sewese ih en pweida. Ia duwen?

11. Koahiek tohrohr dah me Siohwa ketikihong Sosep, oh ia duwen met eh sewese kupwuren Siohwa en pweida?

¹¹ Erein Sosep mihmi nan imweteng, Siohwa ketin kahrehiong nanmwarki en Isip en ouramankihda ouraman riau. Parao uhdahn men ese ia wehwehn ouraman pwukat. Ni nanmwarkio eh esehda me Sosep kak kawehwehda ouraman kan, e ileklahng ih. Pwehki sapwellimen Siohwa sawas, Sosep kawehwehda  ouraman ko oh Parao perenkihda kaweid mwahu me e kihong. Ni eh esehda me Siohwa kin ketin ieiang mwahnakapw menet, Parao idihada Sosep en apwalih mwenge koaros nan Isip. (Sen. 41:38, 41-44) Mwuhr lehk lapalap ehu wiawi me kahrehda kahpwal laud ehu, kaidehnte nan Isip ahpw pil nan Kenan, sahpw me ahn Sosep peneinei kin kousoan ie. Met Sosep kak doarehla eh peneinei oh kolokolete kadaudok me pahn kapwarehda Mesaia.

12. Ni ahl dah kei me Siohwa ketin sewese Sosep en pweida?

¹² Medewehla soahng kan me wiawi nan en Sosep mour. Ihs me kamwakid Podipar en tehk Sosep, me wia lidu men? Ihs me kamwakid kaun en imwetengo en perenki Sosep, me wia tohnimweteng men? Ihs me kahrehiong Parao en ouramankihda ouraman ko oh kihong Sosep koahiek en kawehwehda ouraman pwukat? Ihs me kamwakid Parao en idihada Sosep pwehn apwalih mwenge kan nan Isip? (Sen. 45:5) E sansal me Siohwa me kin ketin sewese Sosep en pweida ni soahng koaros me e kin wia. Mendahki rien Sosep ko pilahnehda en kemehla ih, Siohwa ketin wekidala irairo pwe en kak kapwaiada kupwure.

13. Ia duwe, Siohwa kin ketin kaunda soahng koaros me kitail kin lelohng? Menlau kawehwehda.

¹³ Dahme kitail kak sukuhlkihsang Sosep? Ia duwe, Siohwa kin ketin iang pidada soahng koaros me kitail kin lelohng? E kin ketin kaunda soahng koaros me kin wiawi nan atail mour, kahrehda soahng suwed koaros me lelohng kitail kin wiawi pwehki kahrepe mwahu? Soh, Paipel sohte kin padahngki met. (Ekl. 8:9; 9:11) Ahpw kitail ese met: Ni atail kin lelohng kahpwal ehu, Siohwa kin ketin mwahngih met oh kin ketin karonge atail peksawas. (Mel. 34:15; 55:22; Ais. 59:1) Laudsang met, Siohwa kak ketin sewese kitail en dadaurete pahn kahpwal kan. Ia duwen?

14. Ia duwen Siohwa eh kin ketin sewese kitail erein ahnsou apwal kan?

¹⁴ Ehu ahl me Siohwa kin ketin sewese kitail iei sang ni eh ketin kansenamwahwih oh kangoange kitail, oh e kin ketin kalapw wia  met ni ahnsou me keieu konehng. (2 Kor. 1:3, 4) Ih met me wiawihong Eziz, brother men nan Turkmenistan me selidi sounpar riau pwehki eh pwoson. E koasoia, “Nimenseng en rahn me I pahn ale kopwung, emen brother kasalehiong ie Aiseia 30:15 (NW) me mahsanih: ‘Kumwail pahn kehlail ni amwail kin meleilei oh kasalehda amwail likih ie.’ Iretikitik wet kin ahnsou koaros sewese ie en meleilei oh likih Siohwa ni soahng koaros. En doudouloale iretikitik wet kin sewese ie erein ei mi nan imweteng.” Ke kak medewehla ahnsou ehu nan omw mour me Siohwa ketin seweseiuk sang ni eh ketin kansenamwahwih oh kangoangeiuk ni ahnsou me ke keieu anahne?

15-16. Dahme ke sukuhlkihsang dahme wiawihong Tori?

¹⁵ Kitail kin kalapw esehda ia duwen Siohwa eh ketin sewese kitail erein kahpwal ehu ihte mwurin kahpwalo eh mwahula. Sister men me adaneki Tori diarada me met mehlel. Nah pwutako Mason soumwahuki kanser erein sounpar weneu lao eh mehla. Tori uhdahn nsensuwedla. E koasoia, “I sohte medewe me mie kahpwal ehu me laudsang met ong ie nin duwen nohno men.” E pil koasoia, “I kamehlele me pahpa nohno teikan pahn pwungki me en kilang noumw serio lokolok, suwed sang omw pein lokolongki.”

¹⁶ Mendahki Tori uhdahn nsensuwedla, mwuhr e medewe ia duwen Siohwa eh ketin sewese ih en dadaur. E koasoia, “Ni ei medewehla ahnsowo, I kak kilang ia duwen Siohwa eh ketin sewese ie erein nei pwutako eh soumwahu. Karasepe, pil ni ahnsou me Mason uhdahn soumwahu oh sohte kak tuhwong meteikan, riat Kristian kan kin tangahki sidohsa awa riau kohdo ni imwen winio. Ahnsou koaros mie riat kan me kin awiawih  likin at pereo, oh re kin onopada en sawas. Oh pil riat ko kin apwalih at anahn kan. Pil ni ahnsou me keieu apwal, e kin mie dahme se anahne.” Siohwa kin ketikihong Tori dahme e anahne pwehn dadaurete, oh e pil ketin wia met ong Mason.—Menlau kilang koakono “ Siohwa Ketikihong Kiht Dahme Se Uhdahn Anahne.”

17-18. Dahme pahn sewese kitail en kilang oh kalahnganki sapwellimen Siohwa sawas erein ahnsou apwal kan? (Melkahka 40:5)

¹⁷ Wadek Melkahka 40:5. Emen me kin kohdahla pohn nahna kin akadeiong en lel ni kadokeo. Ahpw mie wasa tohto me e kak uhdi oh kilang soahng kaselel kan. Duwehte met, en kaukaule wiahda ahnsou en uhdi oh medewe ia duwen Siohwa eh kin ketin seweseiuk en pweida mehnda ma ke kin lelohng kahpwal ehu. Ni kaimwiseklahn ehuehu rahn, idek rehmw: ‘Ni ahl dah me I kilang sapwellimen Siohwa kapai rahnwet? Mendahki kahpwalo mihmihte, ia duwen Siohwa eh kin ketin sewese ie en dadaur?’ Tehk ma ke kak kilang ehu kapai sang rehn Siohwa me seweseiuk en pweida.

¹⁸ Mehlel, mwein ke kin kapakapki omw kahpwalo en sohla. Ih met me tohto kin wia oh e konehng en wia met. (Pil. 4:6) Ahpw kitail pil anahne kilang kapai kan me kitail ahneki ahnsou wet. Siohwa kin ketin inoukihda me e pahn ketin kakehlaka kitail oh sewese kitail en dadaur. Eri, ahnsou koaros kalahnganki me Siohwa kin ketin seweseiuk. Ke pahn kilang ia duwen Siohwa eh kin ketin seweseiuk en pweida duwehte eh ketin wiahiong Sosep, pil ni ahnsou apwal.—Sen. 41:51, 52.