1, 2. a) ¿Diosta sirvijcunaca pruebacunata charinataca imamantataj yachanchij? b) ¿Cai yachaipica imatataj yachashun?

 DIOSTA sirvijcunaca llaquicunata charinatami alli yachanchij. Bibliapica: “Diospaj Gobiernopi yaicungapajca achca llaquicunatami apana canchij” ninmi (Hechos 14:22). Shinapish tucui cai llaquicuna Paraíso Allpallapi tucurina cashcatami alli intindinchij. Chaipica llaquipish, huacaipish, nanaipish, huañuipish ña mana ashtahuan tiyangachu (Apocalipsis 21:4).

² Jehová Diosca ñucanchijcuna pruebacunata charichunmi saquin. Pero chaicunata ahuantachunmi ayudacun. Apóstol Pablo Romapi causaj huauqui panicunata ima nishcatami ricushun. Paica huauqui panicunapaj pruebacunamanta parlashpaca: “Tucui caicunataca pai cꞌuyashcamantami ñucanchijca tucuita mishanchij” nircami (Romanos 8:35-37). Cai versopi ricushca shinaca Jehová Diosca tucui pruebacunata ahuantashpa catichunmi ayudanga. Cunanca José llaquicunata chari horas Jehová Dios paita ima shina ayudashcatami ricushun.

3. ¿Josepaj causaica ima shinataj menos pensado cambiarca?

³ Jacobca paipaj churi Josetami paipaj tucui huahuacunata yalli cꞌuyarca (Génesis 37:3, 4). Chaimantami Josepaj huauquicunaca paita pꞌiñai callarircacuna. Qꞌuipacarin madianitacunamanmi esclavota shina cꞌatushpa cacharcacuna. Chai madianitacunaca carupi caj Egipto llajtamanmi Joseta apashpa rircacuna. Chaipica soldadocunata mandaj Potifar nishca runamanmi cꞌaturcacuna. Chashnami Joseca menos pensado esclavo tucurca (Génesis 39:1).

4. ¿Ñucanchijpish José shinaca ima llaquicunatataj chari tucunchij?

 ⁴ Bibliapica: “Tucuicunatami llaquica ñapish japi tucunlla” ninmi (Eclesiastés 9:11, La Biblia. Traducción del Nuevo Mundo). Chaimantami ñucanchijpish tucui gentecuna charishca llaquicunallatataj charinchij (1 Corintios 10:13). Ashtahuancarin Jesuspaj discípulo cashcamantami gentecunaca ñucanchijmanta burlarincuna, jarcaicunatapish churancuna, catirashpapishmi llaquichincuna (2 Timoteo 3:12). Cai llaquicunata charijpipish Jehová Diosmi tucui alli richun ayudai tucun. Cunanca Jehová Dios Joseta ima shina ayudashcatami ricushun.

5. ¿Jehová Dios Josehuan cashcataca ima shinataj Potifarca cuentata curca? (Génesis 39:2-6).

⁵ (Génesis 39:2-6-ta liyipai). Potifarca José yuyaisapa joven cashcata, trabajador cashcatami ricurca. Paica Jehová Dios, Josehuan cashcamanta tucuita alli ruraj cashcatapishmi ricurca. b Chaimantami Potifarca paipaj tucui charishca cosascunata cuidachun Joseta churarca. Chaita rurashcamantami chai egipcio runaca achca bendicioncunata chasquirca.

6. ¿Joseca ima shinashi sintirishcanga?

⁶ José ima shina sintirishcapi yuyashunchij. ¿Paica achca mingashcacunata pajtachicushpapish imatashi ashtahuan munashcanga? ¿Sinchita trabajashpaca Potifarpaj ñaupajpi alli ricurinallatachu munashcanga? Mana. Joseca shujtaj dioscunata adoraj runapaj esclavo canatami saquisha nishcanga. Paipaj yayapaj huasiman tigranatapishmi munashcanga. Shinapish Jehová Diosca Potifar, Joseta cacharichichunca mana imata rurarcachu. Ashtahuanpish Joseca mana yuyashcapimi ashtahuan llaquicunata charina carca.

7. ¿Josepaj llaquicuna tucurinapaj randica imataj tucurca? (Génesis 39:14, 15).

⁷ Génesis capítulo 39-pica Potifarpaj huarmi Joseta achcata munashcata, paihuan siririsha nishcatami huillan. Pero  Joseca chai huarmihuanca mana siririsha nircachu. Chaimantami chai huarmica dimastij pꞌiñarishpa paipaj cusataca, José paita violasha nishcata llullashpa huillarca (Génesis 39:14, 15-ta liyipai). Potifar chaita yachaj chayashpaca Josetaca carcelpimi churarca. Chaimi Joseca huaquin huatacunata carcelpi saquirirca (Génesis 39:19, 20). Chai carcelca shuj jatun jutcu laya o jatun cisterna layami cashcanga. Chaipica dimastij amsa, shuj llaquinai carcelmi cashcanga (Génesis 40:15). Ashtahuancarin Bibliapica shuj tiempopi Josepaj chaquicunata, cungatapish cadenacunahuan huatashcatami huillan (Salmo 105:17, 18). Josepaj llaquicuna tucurinapaj randica paica ashtahuan llaquicunatami charirca.

8. ¿Jahuanpi jahuanpi llaquicuna japijpipish ima shinataj Jehová Diosca ayudanga?

⁸ ¿Jehová Diosta ayudachun mañashpapish jahuanpi jahuanpichu achca llaquicunata charishcangui? Cai millai mundota Diablo mandacushcamantami Jehová Diosca ñucanchijcuna llaquicunata charichun saquinlla (1 Juan 5:19). Shinapish llaquicunata chari horas ñucanchijcuna ima shina sintirishcata, ima tucucushcataca paica allimi yachan (Mateo 10:29-31; 1 Pedro 5:6, 7). Chaimantami Jehová Diosca: “Cantaca manataj saquishachu, manataj shitashachu” nin (Hebreos 13:5). Jehová Diospaj ayudahuanmi mana tucuripaj laya llaquicunata ahuantashpa cati tucushun. Jehová Diosca Josetapishmi chashna ayudarca.

9. ¿José carcelpi cajpica ima shinataj Jehová Diosca paita bendiciarca? (Génesis 39:21-23).

⁹ (Génesis 39:21-23-ta liyipai). Joseca achca llaquicunata charijpipish Jehová Diosca paita bendiciashpami catirca. Joseca Potifarpaj respetota, confianzatapishmi ganashca carca. Chai shinallatajmi Jehová Diosca prezucunata cuidaj ñaupajpipish alli ricurichun Joseta ayudarca. Chaimantami chai runaca tucui prezucunata cuidachun Joseman mingarca. José prezucunata cuidacushcamantami chai runaca mana imata preocuparirca. Chai tucuita pajtachichun mingashcamantami Joseca alli sintirishca canga. Pero caipi yuyashun. Josetaca Potifarpaj huarmita violasha nishcamantami juchachishcacuna carca. ¿Chashna juchachijpipish prezucunata mandajca imamantataj Josepi confiai callarirca? Génesis 39:23-pi nishca shinaca, “Joseca Mandaj Dios paihuan cajpimi, tucui pai imata rurashcapish alli llujshirca”.

10. ¿Joseca imamantataj llaquilla sintirishcanga?

¹⁰ José ima shina sintirishcapi cutin tigra yuyashunchij. Paita yangamanta juchachishcamantami carcelpi carca. Chaita yuyarishpami Joseca mana alli sintirishcanga. Shinallataj ¿Joseca imatashi ashtahuan munashcanga? ¿Prezucunata mandaj ñaupajpi alli ricurinallatachu munashcanga? Mana. Paica paita cacharichichun, libre canatapishmi munashcanga. Chaimantami carcelmanta llujshij shuj prezutaca faraonman paimanta alli parlachun, carcelmanta surcuchun mañarca (Génesis 40:14). Shinapish chai runa faraonhuan mana rato parlashcamantami Joseca ishqui huatacunandij carcelpi catina carca (Génesis 40:23; 41:1, 14). Pero Jehová Dios Joseta ayudashpa catishcamantami carcelpi cajpipish tucui alli llujshirca. Jehová Dios paita ima shina ayudashpa catishcata ricushun.

11. a) ¿Jehová Diosca Josetaca ima shinataj bendiciarca? b) ¿José chai bendicionta chasquishcamantaca Diospaj munai pajtarichunca ima shinataj ayudarca?

 ¹¹ José carcelpi cajpica Jehová Diosca Egipto llajtata mandaj faraontaca ishqui muscuicunatami muscuchirca. Faraonca chai ishqui muscuicuna ima nisha nishcata yachasha nishcamantami Joseta cayachun cacharca. Joseca Diospaj ayudahuanmi chai ishqui muscuicuna ima nisha nishcata, faraón imata rurana cashcatapish huillarca. Faraonca Joseta Jehová Dios ayudaj cashcatami cuentata curca. Chaimantami Egiptopi tiyaj tucui granocunata ricuchun Joseta churarca (Génesis 41:38, 41-44). Huaquin huatacuna qꞌuipaca Egipto llajtapi, Canaán llajtapimi jatun yaricai tiyarca. Canaán llajtapica Josepaj familiami causarca. Pero José Egipto llajtapi shuj jatun mandaj cashcamantami paipaj familiata ayudai tucurca. Tiempo qꞌuipacarin Josepaj familiamantami Mesías shamuna carca.

12. ¿Jehová Diosca José llaquicunata chari horasca ima shinataj paita bendiciarca?

¹² Joseca achca llaquicunata charishpapish achca bendicioncunatami chasquirca. Pero ¿pitaj chashna Joseta bendiciarca? ¿Potifar Josepi confiai callarichunca pitaj ayudarca? ¿Prezucunata mandajpish Josepi confiachunca pitaj ayudarca? ¿Faraonpaj ishqui muscuicuna ima nisha nishcata huillachunpish pitaj Joseta ayudarca? ¿Egipto llajtapi shuj jatun mandaj tucuchunpish pitaj chashna nombrachun churarca? (Génesis 45:5). Jehová Diosllatajmi Josetaca chashna bendiciarca. Josepaj huauquicuna paita llaquichina yuyaihuan chaita rurajpipish Jehová Diosca paipaj munaita pajtachichunmi Joseta utilizarca.

13. ¿Jehová Diosca ima llaquicuna ñucanchijta ama japichunchu cuidacun?

¹³ ¿Josepaj causaimantaca imatataj yachai tucunchij? ¿Jehová Diosca ñucanchijtaca tucuipichu cuidacun? ¿Ima llaquicuna ñucanchijta ama japichunchu cuidacun? Mana. Bibliaca chaitaca mana yachachinchu (Eclesiastés 8:9; 9:11). Chashna cajpipish ñucanchijcuna llaquicunata charijpica  Jehová Diosca cada uno ima shina sintirishcataca allimi yachan. Paita ayudachun mañajpipish ñucanchijtami uyan (Salmo 34:15; 55:22; Isaías 59:1). Ashtahuancarin llaquicunata ahuantashpa catichunmi ayudanga. Ima shina ñucanchijta ayudacushcata ricushun.

14. ¿Sinchi punllacunapica ima shinataj Jehová Diosca ñucanchijta ayudan?

¹⁴ Jehová Diosca ñucanchij minishticui horasmi cushichin, fuerzatapish cun (2 Corintios 1:3, 4). Turkmenistanmanta Eziz shuti huauquitami chashna ayudarca. Paitaca paipaj crishcacunamantami carcelpi churarcacuna. Huauqui Ezizca: “Ñucata juzgana punllapica shuj huauquica Isaías 30:15-tami ricuchirca. Chai versopica Jehová Diosca: ‘Ñucapi shunguta churajpi, casijlla cajpica muyujta pirca shinami canta huaquichisha’ ninmi. Chai shimicunaca tranquilo sintiringapaj, Jehová Diospi confiangapajmi ayudarca. Carcelpi cai horasca chai versota yuyarishpami fuerzasta japircani” ninmi. ¿Jehová Diosca cantapishchu chashna cushichishpa ayudashca?

15, 16. ¿Cai panipaj experienciamantaca imatataj yachai tucunchij?

¹⁵ Shuj prueba tucurishca qꞌuipaca Jehová Dios ñucanchijta ima shina ayudashcatami cuentata cunchij. Shuj panipaj ejemplopi yuyashun. Paipaj churi Masonca seis huatacunata cáncer ungüita charishcamantami huañurca. Paipaj churita pirdishcamantami chai panica dimastij llaquilla sintirirca. Paica: “Shuj churita huañuipi chingachinaca tucuimanta yalli llaquimi can. Shujtaj yaya mamacuna nishca shinaca huahuacunata achcata sufricushcata ricunaca ñucanchijllataj sufricushcatapish yalli ashtahuan llaquimi can” ninmi.

 ¹⁶ Cai panica achca llaquilla sintirishpapish Jehová Dios paita ima shina ayudashcatami yuyarirca. Paica: “Ñuca churi ungushca cai horasca Jehová Diosca ñucanchijta cꞌuyaihuanmi cuidashpa catirca. Ñuca churi Mason ungushca cashcamanta visitacunata mana chasqui tucujpipish huauqui panicunaca ishqui horascunata viajashpami hospitalman rishpa catircacuna. Paicunaca hospitalmantaca mana ladoyarcacunachu. Cullquisitotapish cushpami ñucanchijta ayudarcacuna. Chashna sinchi punllacunapica tucui minishtishca cosascunatami siempre charircanchij” ninmi.  Jehová Diosca cai panitapish, paipaj churitapish minishticui horasmi ayudashpa catirca.

17, 18. ¿Jehová Dios ñucanchijta ayudacushcata ricungapajca imatataj rurana canchij? (Salmo 40:5).

¹⁷ (Salmo 40:5-ta liyipai). Shuj runaca urcu puntacama chayanatachari munan. Shinapish alaja pushtucunata ricungapajca asha asha shayarishpami rina can. Chai shinallatajmi ñucanchijpish llaquicunata chari horas asha asha shayaricuj shina, Jehová Dios ñucanchijta ima shina bendiciacushcata ricuna canchij. Chaimanta llaquicunata charishpapish, “¿cai punllapica Jehová Diosca ima shinataj ñucata bendiciashca? ¿Chai llaquicunata ahuantashpa catichunca ima shinataj ñucata ayudacun?” nishpami tapurina canchij. Jehová Dios cada punlla ima shina bendiciacushcata ama cungaringapajmi esforzarina canchij.

¹⁸ Jehová Diosta pruebacunata tucuchichun mañanaca allimi can (Filipenses 4:6). Shinapish llaquicunata chari horasca Jehová Dios ñucanchijta ima shina ayudacushcatami alli ricuna canchij. Jehová Diosca llaquicunata ahuantashpa catichunca fuerzastami cusha nin. Chashna ayudashcamanta paita pagui nishunchij. Chashnami Jehová Dios, Joseta ayudashca shinallataj ñucanchijtapish ayudacushcata manataj cungarishun (Génesis 41:51, 52).