1, 2. (1) ¿Imapi tarikunamantam Diosta serviqkunaqa yachanchik? (2) ¿Imamantam kay yachachikuypi yachasunchik?

 JEHOVA DIOSTA serviqkunaqa yachanchikmi sasachakuykunapi tarikunanchiktaqa. Bibliapipas ninmi: “Diospa gobiernonpi kanapaqqa achka sasachakuykunawanmi ñakarinanchik”, nispa (Hech. 14:22). Yachanchiktaqmi Jehova Dios gobiernamuwaptinchikña ‘wañuypas, llakikuypas, waqaypas chaynataq nanaypas’ manaña kananmanta (Apoc. 21:4).

² Jehova Diosqa sasachakuyninchikkunata mana chinkachispanpas yanapawanchikmi hinalla aguantanapaq. Apostol Pablom Roma nacionpi iñiqkunaman cartata qillqaspan nirqa imakunawan sasachakusqankumanta. Nirqataqmi kikinpas chayna sasachakuykunapi tarikusqanmanta. Chaymantañataqmi nirqa: “Kuyawaqninchik Jesucristo yanapawasqanchikraykum tukuy chay sasachakuykunapi kaspapas allinta takyanchik”, nispa (Rom. 8:35-37). Chaywanmi yachanchik Jehova Dioswan Jesusqa sasachakuykunapiña tarikuptinchikpas allinlla kanapaq yanapawananchikmanta. Chaymi kay yachachikuypi yachasunchik Jehova Diosninchik Joseyta imayna yanapasqanmanta. Yachasunchiktaqmi kunan tiempopipas Diosninchikqa imayna yanapawasqanchikmanta.

3. ¿Imam qunqayllamanta Joseyta pasarurqa?

³ Joseypa wawqinkunaqa allintam yacharqaku taytanku Jacob Joseyta kuyasqanta (Gen. 37:3, 4). Chaymi Joseytaqa  chiqniyta qallaykuspanku Ismael kasta negociante runakunaman rantikururqaku. Hinaptinmi Ismael runakuna Egipto nacionman pusakurqaku. Egipto nacionqa Joseypa wasinmantaqa karu-karupim karqa. Chaypim rantikururqaku Egiptota kamachiqpa soldadonkunata kamachiq Potifarman. Joseyqa kuyasqa kasqanmantam qunqayllamanta sirvienteña rikurirurqa (Gen. 39:1).

4. ¿Ima sasachakuykunapim tarikuchwan?

⁴ Bibliapim nin: “Llapallankumanmi mana allin punchawkuna chayamun”, nispa (Ecl. 9:11). Chayraykum wakin runakunaman hina ñuqanchikmanpas sasachakuykuna chayamuwanchik (1 Cor. 10:13). Jesuspa qatiqnin kasqanchikraykum wakinpiqa ñuqanchikmanta burlakunku. Wakinpiñataqmi ayllunchikkunapas utaq autoridadkunapas Diosta servinanchikta harkakunku (2 Tim. 3:12). Ichaqa chayna sasachakuykunapi tarikuptinchikpas Jehova Diosninchikqa allinlla kananchikpaqmi yanapawanchik. Yachaykusunyá Joseyta imaynata yanapasqanmanta.

5. ¿Imamantataq Potifarqa cuentata qukururqa? (Rimarimuytaq Genesis 39:2-6 nisqanmantapas).

⁵ (Leey Genesis 39:2-6). Potifarmi qawarqa Joseyqa tukuy imatapas allin ruwaq kasqanta chaynataq allin llamkaq kasqanta. Chaymi cuentata qukururqa “Joseywan Jehova Dios kasqanta hinaspa […] tukuy ima ruwasqanpi Jehova Dios yanapasqanta”. b Tiempopa risqanman hinam Joseyqa Potifarpa yanapaqninña karqa chaynataq wasinpi tukuy imamanta nanachikuqña karqa. Chaymi Jehova Diosqa Joseyrayku Potifartaqa anchata bendecirqa.

6. ¿Imatam Joseyqa anchata munarqa?

⁶ Kaypi piensarisun: ¿Imatataq Joseyqa munarqa? ¿Potifarwan kuyachikuytachu? Manam. Payqa yaqapaschá anchata munarqa sirviente kayta saqispan taytanpa wasinman kutikuyta. Potifarpa wasinpi wakin sirvientekunamanta aswan allinpaq hapisqa kaspanpas Joseyqa hinallam Diosta mana serviq runapa sirvienten karqa. Diosqa manam Joseytaqa libraykurqachu Potifarpa sirvienten kasqanmantaqa. Hinaspapas Joseyqa llumpay sasachakuykunapiraqmi tarikunan karqa.

7. ¿Ima sasachakuykunapiraqmi Joseyqa tarikurqa? (Rimarimuytaq Genesis 39:14, 15 nisqanmantapas).

⁷ Genesis libropa 39 capitulonpim willawanchik Potifarpa warmin Joseyta qawapayayta qallaykusqanmanta hinaspa paywan puñunanpaq sapa punchaw hikutasqanmanta. Joseymi ichaqa mana munarqachu. Chaymi chay warmiqa llumpayta piñakururqa hinaspanmi Joseyta yanqamanta tumpaspan nirqa abusayta munasqanmanta (leey Genesis 39:14, 15). Chayta qusan Potifar yacharuspanmi Joseytaqa carcelman hinarachirqa. Chaymi Joseyqa carcelpi unay wata karqa (Gen. 39:19, 20). ¿Imaynam karqa chay carcelqa? Carceltaqa hebreo rimaypiqa ninkutaqmi “pozo” utaq “uchku” kasqanta. Chayna kasqanmantam Joseypas nirqa. Chaywanmi yachanchik chay carcelqa manchakuypaq tutayay kasqanta (Gen. 40:15, uray patanpi willakuy). Chaymantapas bibliapim niwanchik Joseytaqa chakimanta cadenarusqankuta chaynataq kunkamanta cadenarusqankuta (Sal. 105:17, 18). Qawasqanchikman hinam Joseyqa sasachakuypi tarikuchkaspanña aswan sasachakuypiraq tarikurqa. Sirviente kachkaptinmi yanqamanta carcelmanraq hinarurqaku.

8. ¿Imamantam mana iskayrayananchikchu llumpay sasachakuykunapi tarikuspapas?

⁸ Wakinpiqa sasachakuykunapi tarikuspa yanapaykuwananchikpaq Diosninchikta mañakuptinchikpas aswanraqpaschá sasachakuykunaqa yapakun. Satanaspa munaychakusqan pachapi kawsasqanchikraykum Jehova Diosqa sasachakuyninchikkunataqa manaraq chinkachinchu (1 Juan 5:19). Ichaqa manapunim iskayrayananchikchu ima sasachakuypas tarikusqanchikta Jehova Diosninchik allinta yachasqanmantaqa hinaspa yanapaykuwananchikmantaqa (Mat. 10:29-31; 1 Ped. 5:6, 7). Chaymantapas Jehova Diosninchikqa niwanchikmi: “Manapunim haykapipas saqisqaykichu nitaqmi qunqasqaykichu”, nispa (Heb. 13:5). Arí, Jehova Diosqa yanapawanchikmi ima sasachakuykunatapas hinalla aguantanapaq. Chaynamá Joseytapas yanapaykurqa.

9. ¿Imaynatam yachanchik Jehova Dios Joseyta carcelpi kachkaptin yanapaykusqanta? (Rimarimuytaq Genesis 39:21-23 nisqanmantapas).

⁹ (Leey Genesis 39:21-23). Jehova Diosmi Joseytaqa carcelpi kachkaptinpas tukuy imata allinta ruwananpaq yanapaykurqa. ¿Imaynatam yanapaykurqa? Jehova Dios yanapaptinmi presokunata qawaq runapas Joseytaqa confianzapaqña hapirqa. Chaymi Joseypa makinpiña lliw presokunata saqiykurqa. Bibliapipas nintaqmi: ‘Presokunata qawaqqa manam iskayrayarqachu Josey allin ruwaq kasqanmantaqa’, nispa. Chaykunapi yanapakuspanmi Joseyqa sasachakuyninkunamantaqa manaña llumpaytaqa llakikuqchu. Admirakuypaqmá Potifarpa warminta Josey abusaruyta munasqanmanta tumpachkaptinkupas presokunata cuidananpaqña niykusqankuqa. Chayqa karqa Genesis 39:23 nisqanman hinam. Chaypim nin: “Jehova Diosmi Joseyta yanaparqa ima ruwasqanpas allin kananpaq”, nispa.

10. Willarimuy carcelpi kaspan Josey imayna tarikusqanmanta.

¹⁰ Joseypa imayna tarikusqanpiyá kaqmanta piensarisun. ¿Yanqamanta carcelpi kasqanraykuchu tukuy ima ruwasqanpas allin karqa? ¿Imatam astawan munarqa? ¿Presokunata qawaq runawan kuyachikuytachu? Payqa munarqa carcelmanta kacharinankutam. Chaymi huk kutipi Joseyqa carcelmanta kacharisqa runata nirqa Egiptota kamachiq runata carcelmanta kacharinanpaq niykapunanpaq (Gen. 40:14). Ichaqa chay runaqa kamachiqman willakuytaqa qunqarurqam, chaymi Joseyqa iskay wataraq carcelpi karqa (Gen. 40:23; 41:1, 14). Chaywanpas, Jehova Dios yanapaptinmi Joseypa  tukuy ima ruwasqanqa allin karqa. ¿Imaynanpi?

11. ¿Ima ruwaytam Joseyqa atirqa Diospa yanapakuyninwan? ¿Ima kaptintaq Joseyqa ayllunta yanapaykurqa?

¹¹ Carcelpi Josey kachkaptinmi Egiptota kamachiqta Jehova Dios iskay kutikama sueñorachirqa. Paymi yacharurqa sueñoyninpa ima ninan kasqanta Josey willay atisqanmanta. Chaymi carcelmanta Joseyta qayachimurqa. Jehova Diospa yanapakuyninwanmi Joseyqa Egiptota kamachiqman sueñoyninpa ima ninan kasqanta willarqa. Nirqataqmi imam ruwananmantapas. Chaywanmi Egiptota kamachiqqa anchata admirakurqa. Joseyta Jehova Dios yanapasqanmanta cuentata qukuspanmi Egipto nacionpi kawsaykunamanta nanachikunanpaq churaykurqa (Gen. 41:38, 41-44). Watakuna pasaytam, Egipto nacionpiwan Canaan lawpi muchuy qallaykurqa. Canaan lawpiqariki Joseypa ayllunmi yacharqa. Egipto nacionpi kawsaykunamanta nanachikusqanraykum Joseyqa aylluntapas chay muchuy tiempopi mana wañurunankupaq yanapayta atirqa. Paykunamantamriki Jesuspas rikurimunan karqa.

12. ¿Imakunapim Jehova Diosqa Joseyta yanapaykurqa?

¹² Kaykunapi piensarisun: ¿Pitaq Joseytaqa yanapaykurqa Potifar sutiyuq runa confianzapaq hapinanpaq? ¿Pitaq Joseytaqa yanaparqa presokunata kamachiq kananpaq akllaykunankupaq? ¿Pitaq Egipto nacionta kamachiqtaqa sueñochirqa? ¿Pitaq Joseytaqa yanaparqa Egipto nacionta kamachiqpa sueñoyninpa ima ninan kasqanmanta willananpaq? ¿Pitaq Joseytaqa Egipto nacionpi kawsaykunamanta nanachikunanpaq churaykachirqa? (Gen. 45:5). Manamá iskayrayanchikchu tukuy chaykunata ruwananpaq Joseyta Jehova Diosninchik yanapasqanmantaqa, wawqinkuna Joseyta wañuchiyta munachkaptinkupas Jehova Diosqa munaynin cumplikunanpaqmi tukuypi yanapaykurqa.

13. ¿Yaqachu Jehova Diosqa sasachakuykunata churawanchik chaynapi yanapawananchikpaq?

¹³ ¿Imatam Joseyta pasasqanmanta yachachwan? ¿Dios munaptinchu imapas pasawanchik? ¿Yaqachu Jehova Diosqa sasachakuykunata churawanchik chaynapi yanapawananchikpaq? Bibliapiqa manam chaytaqa ninchu (Ecl. 8:9; 9:11). Ichaqa manam iskayrayanchikchu imapas pasawasqanchikmanta Diosninchik  allinta yachasqanmantaqa chaynataq mañakusqanchikta uyariykuwasqanchikmantaqa (Sal. 34:15; 55:22; Is. 59:1). Payqa manamá uyariyllachu-uyariwanchik aswanqa sasachakuyninchikta aguantananchikpaqmi yanapaykuwanchik. ¿Imaynata? Chaymantayá qatiqninpi yachaykusunchik.

14. ¿Imaynatam Jehova Diosqa sasachakuykunapi tarikuptinchik yanapaykuwanchik?

¹⁴ Jehova Diosqa tiempollanpim sasachakuypi tarikuptinchik sunqunchikta tiyaykachin hinaspa kallpanchaykuwanchik (2 Cor. 1:3, 4). Chaynam pasarqa Eziz sutiyuq iñiqmasinchikwanpas, paytam Diosninchikta servisqanrayku Turkmenistan nacionpi iskay watapaq carcelman hinarurqaku. Paymi willakun: “Juezpa qayllanman manaraq richkaptiymi hukkaqnin iñiqmasinchik Isaias 30:15 nisqanta leeykapuwarqa, chaypim nin: ‘Ñuqapi hapipakuspa hawkalla kaspaykichikqa kallpayuqmi kankichik’, nispa. Chaypi nisqanmi yanapawarqa hawkalla kanaypaq hinaspa Jehova Diosninchikpi hapipakunaypaq, chay textopi nisqanqa yanapawarqataqmi carcelpi kaspay mana llumpayta hukmanyarunaypaqpas”, nispa. Ñuqanchiktapas Jehova Diosqa sasachakuykunapi tarikuptinchikmi tiempollanpi sunqunchikta tiyaykachispa kallpanchaykuwarqanchik ¿aw?

15, 16. ¿Imatam yachachwan iñiqmasinchik Dorita pasasqanmanta?

¹⁵ Wakinpiqa manam chayllachu cuentata qukunchik imaynata sasachakuyninchikpi taytanchik Jehova Dios yanapawasqanchikmanta. Huk iñiqmasinchiktam chayna pasarurqa, paytam sutichasun Doriwan. Mason sutiyuq wawanqa suqta wata cancerwan unqusqanmantam wañukullarqa. Paymi nin: “Muspaypi hinam tarikullarqani waway wañukuptin manam ima ruwaytapas atirqanichu”, nispa. Ninraqmi: “Imawanpas kikinchik ñakarisqanchikmantaqa wawanchik ima unquywanpas llumpayta ñakarisqanta  qawaspanchikmi astawanqa llakikunchik, chayna kasqantaqa lliw tayta-mamam yachanku”, nispa.

¹⁶ Iñiqmasinchik Doriqa tiempopa pasasqanman hinam sasachakuypi tarikuptin Diosninchik imayna yanapasqanpi yuyaymanarqa. Paymi willakun: “Waway unqusqa tarikuptinmi Jehova Diosqa kuyakuywan tukuypi yanapaykuwarqa, iñiqmasinchikkunapas hospitalpi waway kaptinmi iskay hora carrowan viajaspanku watukamuwaqku. Iñiqmasinchikkunaqa manam saqiwarqakuchu. Paykunaqa qullqichankuwanpas yanapaykuwaqkum, chaymi mana imamantapas usuqchu kaniku”, nispa. Jehova Diosqa iñiqmasinchik Doritawan wawantam tukuy sasachakuyninkunata aguantanankupaq yanapaykurqa (qaway “ Jehova Diosqa tiempollanpim kallpanchaykuwarqaku” niqta).

17, 18. ¿Imatam ruwana sasachakuykunapi tarikuptinchik Jehova Dios yanapawasqanchikmanta cuentata qukunapaq? (Rimarimuytaq Salmos 40:5 nisqanmantapas).

¹⁷ (Leey Salmos 40:5). Urqu puntanman chayanapaqqa sama-samariykuspam qispinchik, samaykuspañataqmi chaypi kaq tukuy imakunata qawanchik. Chayna hinam ñuqanchikpas sapa kuti yuyaymanananchik Jehova Diosninchik imaynata sasachakuykunata aguantanapaq yanapawasqanchikpi. Manaraq puñuykuchkaspam nikuchwan: “¿Imaynatataq kunan punchaw Dios yanapawarqa? Sasachakuypi kaptiypas, ¿imaynatam Jehova Diosqa yanapawachkan hinalla aguantanaypaq?”, nispa. Sapa punchawyá kallpanchakusun Jehova Diosninchik imakunapi yanapawasqanchikpi yuyaymananapaq.

¹⁸ Allinmi sasachakuyninchikkunata chinkachinanpaq Diosta mañakuyqa (Filip. 4:6). Chaywanpas amayá qunqasunchu Diosninchik tukuy tiempo yanapawasqanchiktaqa. Jehova Diosqa niwanchikmi sasachakuykunata aguantanapaq kallpata quwananchikmanta, chayna yanapawasqanchikmantam tukuy sunqumanta agradecekunanchik. Chayta ruwaspaqa cuentatam qukusun sasachakuypi tarikuptinchikpas allinlla kanapaq Joseyta hina Jehova Dios yanapawasqanchikmanta (Gen. 41:51, 52).