1, 2. a) ¿Imaraykun mana manchakunanchischu ima sasachakuypiña tarikuspapas? b) ¿Imamantan kay yachachikuypi yachasunchis?

 DIOSTA serviqkunaqa yachanchismi imaymana sasachakuykunapi tarikunanchista, Biblian nin: “Imaymanapi ñak’arispan Diospa gobiernonmanqa jaykusun”, nispa (Hech. 14:22). Ichaqa yachallanchistaqmi imaymana sasachakuyninchiskunaqa mosoq pachapi tukupunanta. Mosoq pachapiqa “manan wañuypas kanqañachu, manañataqmi llakikuypas, waqaypas, ni nanaypas kanqañachu” (Apo. 21:4).

² Manaña llapa sasachakuykunamantachu Jehová Dios librawasun chaypas kallpatan qowasun chaykunata aguantananchispaq. Apóstol Pablopas paywan kaqkunapas imaymana sasachakuykunapin tarikurqanku. Chaymi payqa Roma iñiq t’aqapi cristianokunata nirqan: “Munakuwaqninchispa yanapayninwanmi tukuy chaykunata atipashanchis”, nispa (Rom. 8:35-37). Noqanchistapas Jehová Diosqa yanapawasunmi ima sasachakuypiña tarikuqtinchispas. Kay yachachikuypin yachasunchis imaynatas Jehová Dios Josetapas yanaparqan chayta imaynatas noqanchistapas yanapawasunman chaytapas.

3. ¿Iman pasarqan Joseta?

³ Jacobqa anchatan munakurqan wawan Josetaqa (Gén. 37:3, 4). Chayraykun kuraq wayqenkunaqa Joseta cheqnikuyta qallarirqanku. Jinan Josetaqa madianita negociantekunaman vendepurqanku. Chay runakunaqa Egipto nacionmanmi Joseta aparqanku, chay nacionqa karupiraqmi kasharqan. Chayman chayaspataq Potifarman vendepurqanku.  Chhaynan Josepa vidanqa karqan, juj p’unchaymi munasqa wawa karqan qhepa p’unchaymantaq esclavoman tukupurqan (Gén. 39:1).

4. ¿Ima sasachakuykunapin tarikusunman José jina?

⁴ Biblian nin: “Mana allin tiempopas, ima mana allinpas llapamanmi qonqaylla chayamun”, nispa (Ecl. 9:11). Noqanchispas Diostaña servishanchis chaypas qonqayllan ima sasachakuykunapipas tarikusunman (1 Cor. 10:13). Otaq Jesusta qatikusqanchisrayku runakuna cheqnikuwasunman qatikachawasunman ima (2 Tim. 3:12). Imapiña tarikusunman chaypas Jehová Diosqa yanapawasunpunin chay sasachakuykunata atipananchispaq. Kunan yachasun imaynatas Josetapas yanaparqan chayta.

5. ¿Imatan Potifar repararqan Josepi? (Génesis 39:2-6).

⁵ (Leey Génesis 39:2-6). Potifarqa yacharqanmi Joseqa allin llank’aq sumaq rijch’ayniyoq wayna kasqanta. Chaymi repararqan Josewan Jehová Dios kashasqanta tukuy imapi yanapasqantapas. b Qhepa tiempomantaq Potifarqa Joseta churarqan payta yanapananpaq wasinpi tukuy ima kaqmantapas encargakunanpaq. Potifarqa imaymana bendicionkunatan chaskirqan Joserayku.

6. ¿Imaynan tarikunman karqan José?

⁶ Juj ratu Josepi piensasun. ¿Imatan pay munashanman karqan? ¿Potifar allin qhawarinantachu munashanman karqan? Yaqapaschá payqa libre kayta munasharqan chhaynapi taytanman kutipunanpaq. Allin llank’anataña patronnin qorqan chaypas manan librechu karqan, patronninpas juj dioskunatan servirqan. Jehová Diosqa manan Potifartaqa nirqanchu Joseta kacharipunanpaqqa. Aswanpas astawanraqmi imaymana sasachakuykunapi tarikurqan.

7. ¿Ima sasachakuykunapin José astawan tarikapurqan? (Génesis 39:14, 15).

⁷ Bibliapin willan Potifarpa esposan nishutapuni Joseta qhawapayasqanta, sapa kutinsi mat’ipayaq paywan puñunanpaq. Ichaqa Joseqa manan chay warmitaqa  kasurqanchu, chaywanmi chay warmiqa nishutapuni phiñakurqan jinaspa Joseta tumparqan: “Paymi noqata abusawananpaq jamusqa”, nispa (leey Génesis 39:14, 15). Potifarqa creerqanmi warminpa nisqantaqa jinaspa Joseta carcelman wisq’achirqan, chaymi Joseqa askha watakuna carcelpi wisq’asqa kasharqan (Gén. 39:19, 20). ¿Imaynan José chaypi kashanman karqan? Chay wisq’asqanku carcelqa tutayaq laqha ukhun karqan, chaypi kayqa nishu llakikunapaqmi karqan (Gén. 40:15). Bibliaq willasqan jina Josetaqa fierro cadenawanmi chakintapas kunkantapas watarqanku (Sal. 105:17, 18). Jinaspapas astawanmi Joseqa imaymana sasachakuykunapi tarikusharqan; confianapaq esclavo kasqanmantan presoman tukupurqan.

8. ¿Imamantan mana iskayanchischu ima sasachakuypiña tarikuspapas?

⁸ Noqanchispas yaqapaschá imaymana sasachakuykunapi tarikurqanchis, maytaña Jehová Diosmanta mañakusunman karqan chaypas manapaschá chayqa tukukurqanchu. Saqrataq kay pachata kamachishan chayqa Jehová Diosqa manan llapa sasachakuykunamantachu juj milagropi librawasun (1 Juan 5:19). Chhaynaña chaypas Jehová Diosqa allintan yachan imayna kashasqanchista, payqa noqanchisraykun llakikun (Mat. 10:29-31; 1 Ped. 5:6, 7). Jinaspapas, paymi niwanchis: “Manan jayk’aqpas saqesaykichu, manan jayk’aqpas wijch’usaykichu”, nispa (Heb. 13:5). Jehová Diosqa atiytan qowasun ima sasachakuytapas aguantananchispaq, imaynan Josewanpas ruwarqan jinata.

9. ¿Imaynapin yachanchis carcelpiña kashaspas Jehová Dios Joseta yanapasqanta? (Génesis 39:21-23).

⁹ (Leey Génesis 39:21-23). Jehová Diosmi Josetaqa yanaparqan ima ruwasqanpas allinkama lloqsinanpaq imaymana sasachakuykunapiña tarikurqan chaypas. Carcelpi guardia umalliqpas allintan Josetaqa qhawarirqan, chaymi chay guardiaqa Joseta churarqan presokunata qhawananpaq. Bibliapin nin: “Chaymi guardia umalliqa manaña llakikuqchu payman encargasqa kaqkunamantaqa”, nispa. Chaywanmi Joseqa manaña chay llakikuyllapichu piensarqan. Paytaqa Potifarpa warminta violayta munasqanmantan tumparqanku, chaywanpas confiashallarqankun paypiqa. ¿Imarayku? Génesis 39:23 nisqan jinapas “Jehová Diosmi Josetaqa tukuy imapi yanapasharqan, chhaynapi ima ruwasqanpas allinkama lloqsinanpaq”.

10. ¿Imapin José masta piensashanman karqan?

¹⁰ Jujmanta Josepi piensasun: ¿Imaynan pay carcelpi kashanman karqan? ¿Ima ruwasqanpas allinkama lloqsinanpichu piensashanman karqan? Manachá. ¿Imatan pay munashanman karqan? Payqa libre kaytachá munasharqan, chaychá jefenwanpas allinpi kayta munarqan chhaynapi kacharipunanpaq. Jinaspapas presomasintan Joseqa nirqan: “Kaymanta lloqsipuspaqa amayá qonqawankichu. Khuyapayaykuwankiyá, jinaspa noqamanta faraonman willanki”, nispa (Gén. 40:14). Ichaqa chay runaqa qonqarapurqanmi. Jinaspa iskay watamantaraq yuyarirqan Josepa nisqanta, jinan Josemanta faraonman willarqan (Gén. 40:23; 41:1, 14). Chaywanpas Jehová Diosmi Josetaqa yanapashallarqan chaymi ima ruwasqanpas allinkama karqan.

11. ¿Ima yachaytan Jehová Dios Joseman qorqan, imatan chayrayku ruwakurqan?

¹¹ Carcelpi José kashaqtinmi Jehová Diosqa  Egipto rey faraonta mosqochirqan. Faraonqa yachaytapunin munasharqan imaninanmi chay mosqokusqan chayta. Jinan yacharurqan Joseqa mosqoykunata sut’inchaq kasqanta, jinaspa Joseta wajachimurqan. Jehová Diospa yanapayninwanmi Joseqa faraonpa mosqokusqanta sut’incharqan, jinaspa faraonman willarqan imachus ruwananta. Chayta nisqanmantan faraonqa anchatapuni admirakurqan, chayraqmi yacharqan Jehová Dios Josewan kashasqanta, jinan Joseta mijuykunamanta encargakuqta churarqan (Gén. 41:38, 41-44). Tiempowanmi yarqay wata chayamurqan, jinan mana Egiptopipas, ni Josepaq tiyasqan Canaán llaqtapipas mijuy kapurqanchu. Mijuykunamanta encargakuq kasqanraykun Joseqa familianta yanapayta atirqan, chay familianmantan Mesiasqa jamunan karqan.

12. ¿Imaynatan Jehová Dios Joseta yanaparqan?

¹² ¿Imaynatan Jehová Dios Joseta yanaparqan? Josetan Potifarwan allinpaq qhawarichirqan, esclavoña José karqan chaypas. Carcelpi jefenpas confiarqanmi Josepiqa chaymi juj presokunamanta encargakuqta churarqan. Faraontapas mosqoycharqanmi chhaynapi José chay mosqokusqanta sut’inchananpaq, jinaspapas atiytan Joseman qorqan faraonpa mosqokusqanta sut’inchananpaq. Chaymantapas mijuykunamanta encargakuqmi Joseqa kapurqan (Gén. 45:5). Sut’in kashan, Jehová Diosmi Josetaqa yanaparqan ima ruwasqanpas allinkama kananpaq. Mana allintaña Joseta wayqenkuna ruwarqanku chaypas Jehová Diosqa chay mana allintan allinman tukuchirqan chhaynapi munayninta junt’ananpaq.

13. ¿Llapa sasachakuykunamantachu Jehová Dios librawasun?

¹³ ¿Imatan Josemanta yachasunman? ¿Llapa sasachakuykunamantachu Dios librawanchis? Manan. Llapapas qonqaymi ima sasachakuypipas tarikusunman (Ecl. 8:9; 9:11). Ichaqa Jehová Diosqa ima sasachakuypipas tarikuqtinchisqa makillan qhawamushawanchis uyarintaqmi mañakusqanchistapas (Sal. 34:15; 55:22; Isa. 59:1).  Chaymantapas payqa kallpatan qowasunchis chay sasachakuyninchiskunata aguantananchispaq chhaynapi allillan kananchispaq.

14. ¿Imaynatan Jehová Dios yanapawanchis sasachakuykunapi tarikuqtinchis?

¹⁴ Jehová Diosninchisqa necesitasqanchis ratupin sonqochawanchis kallpachawanchis ima (2 Cor. 1:3, 4). Chaytan Turkmenistán nacionmanta Eziz hermanonchispas rikurqan. Paytaqa Diospi iñisqanraykun iskay wata carcelpi kananpaq juchacharqanku. Paymi nin: “Juzgawananku p’unchaypin juj hermano Isaías 30:15 textota leepuwarqan, chaypin nin: Thajlla kaspan, noqapi confiaspallan kallpayoqqa kankichis, nispa. Chay simikunan noqataqa yanapawarqan thajlla kanaypaq Jehová Diosllapi confianaypaqpas. Carcelpi kashaspaypas maytan chay textoqa yanapawarqan”, nispa. Yaqapaschá noqanchistapas chhaynata Jehová Dios yanapawarqanchis, ¿imaynan sientekurqanchis chayta reparaspa?

15, 16. ¿Imatan Tori hermananchispa experiencianmanta yachasunman?

¹⁵ Kikin ratupiqa manapaschá reparakusunmanchu imaynata Jehová Dios yanapashawasqanchista. Chaymi pasarqan Tori hermananchiswanpas. Paypa wawanqa cáncer onqoywanmi wañukapurqan, Masonqa soqta watakunan chay onqoywan ñak’arirqan. Chaywanmi Tori hermananchisqa sinchi llakisqa kasharqan. Paymi nin: “Manachus jina mayqen mamapas kay nanaytaqa aguantanmanchu. Noqanchisqa imaynapas kashasunmanraqchá wawaykiq sufrisqanta rikuspan ichaqa mana imanakuytapas atinkichu”, nispa.

¹⁶ Tiempowanmi Tori hermananchisqa repararqan Jehová Dios tukuy chaykunata  aguantananpaq yanapasqanta. Paymi nin: “Waway onqoshaqtinqa Jehová Diosmi sumaqta yanapawarqan. Mayninpiqa nishutan wawayqa onqorapuq, manan visita chaskinallanpaqpas kallpan kaqchu. Hermanokunan ichaqa iskay horata jina viajamuqku hospitalman jamunankupaq chhaynapi yanapawanankupaq kallpachawanankupaq ima. Qolqetapas qoykuwaqkun, manan imaykupas faltawarqankuchu”, nispa. Jehová Diosmi Tori hermananchistapas Mason wawantapas yanaparqan chay sasachakuyta aguantanankupaq (qhaway “ Jehová Diosmi tiempollanpi imachus necesitasqaykuta qowarqanku” nisqata).

17, 18. ¿Imatan ruwananchis sasachakuykunapi tarikuspa Jehová Dios imaynatachus yanapashawanchis chayta reparananchispaq? (Salmos 40:5).

¹⁷ (Leey Salmos 40:5). Orqoman wichashaspaqa sama-samarispan purinchis ¿riki? Sapa samarispaqa imakunas kashan chaytan qhawarikuchis ¿riki? Chhaynatan juj ratu sayaykunanchis imaynatas Jehová Dios yanapashawanchis chaypi piensananchispaq. Yaqapaschá p’unchay manaraq tukushaqtin tapukusunman: “¿Ima bendicionkunatan kay p’unchay Jehová Diosmanta chaskirqani? ¿Imaynatan kay p’unchay yanapawarqan kay sasachakuyniyta aguantanaypaq?”, nispa. Chayta ruwaspaqa sapa p’unchaymi reparasun imaynata Jehová Dios bendeciwasqanchista.

¹⁸ Maytachá munashanchis Jehová Diosqa jujpaqkama sasachakuyninchiskunata tukupunanta (Filip. 4:6). Allintan reparananchis Jehová Dios imaynata yanapashawasqanchista. Manaña sasachakuyninchis tukunmanchu chaypas Jehová Diosqa kallpatan qowasunchis chay sasachakuykunata aguantananchispaq. Chaymi chaykunamanta Jehová Diosta “gracias” ninanchis, chaytachus ruwasunchis chayqa reparasunmi imapas allillan lloqsiwananchispaq Jehová Dios yanapawasqanchista, imaynan Josewan ruwarqan jinata (Gén. 41:51, 52).