1, 2. a) Ñucanchicunaca ¿imatata ali yachapanchi? b) Cai temapica ¿imatata ricugripanchi?

 JEHOVATA tucui sirvijcunaca imapash llaquicunata charina cashcataca alimi yachanchi. Chaimanda parlashpami Bibliapica: “Ninanda sufrishca jipami Taita Diospa Gobiernomanga yaicushun” nin (Hech. 14:22). Shinallata paraíso alpapillami cunanbi charishca llaquicuna o problemacunaca ñana tianga. Shinallata cunan punllapi charishca llaquicunata paraíso alpapi ñana charinatapash alimi yachapanchi. Chaipica “huañuipash nunca más ñana tiangachu. Ima llaquipash, huacaipash, ima nanaipash nunca más ñana tiangachu” (Apoc. 21:4).

² Jehová Dios llaquicunata charichun saquishpapash chai llaquicunata aguantachunmi ñucanchitaca ayudan. Roma llactamanda huauquipanicunaman apóstol Pablo imata nishcata ricupashunchi. Paillata y paipa huauquipanicunapash ima llaquicunata charinajushcata parlashca jipaca, caitami escribirca: “Pai ñucanchita juyashcamandami, ñucanchicunaca tucui chaicunata mishai ushashcanchi” nishpa (Rom. 8:35-37). Cai shimicunahuanga ñucanchicuna ima llaquicunata charishpapash Jehová Dios ali causachun ayudajtami ricupanchi. Cunanga Jehová Dios José runagu ali causachun imashna ayudashcata y ñucanchicunatapash imashna ayudajta ricupashunchi.

3. José runagupa causaica ¿imashinata ñapash cambiarca?

³ Jacob runagu paipa churi Joseta ninanda juyashcata ricunallami carca (Gén. 37:3, 4). Joseta ninanda juyajta ricushpami paipa huauquicunaca ninanda envidiai callarirca. Chaimandami Josetaca madianita gentecunaman jatushpa cacharca. José runagutaca  Egipto llactamanmi aparca. Chaipi cashpaca Potifar runamanmi jaturca. Potifar runaca faraonba guardiacunapa jefemi carca. Josepa causaica ñapashmi cambiarca. Paica paipa taita ninanda juyajpi causashca cashpapash Egipto llactapi esclavo shinami causai callarirca (Gén. 39:1).

4. ¿Ima llaquicunatata chari ushapanchi?

⁴ Bibliapica na yashcapi tucuicunata imapash pasai ushanlla ninmi (Ecl. 9:11, TNM). Huaquinbica tucui gentecuna charishca problemacunatallatami ñucanchipash charinchi (1 Cor. 10:13). Talvez huaquingunaca ñucanchicuna Jesusta catijushcamandami ñucanchimanda burlaringa, jarcaicunata churanga o catiriashpa llaquichinga (2 Tim. 3:12). Ima llaquicunata charijpipash Jehová Diosca ñucanchicuna ali causachunmi ayudaita ushan. José runaguta imashna ayudashcata ricupashunchi.

5. Potifar runaca ¿imatata cuenta japirca? (Génesis 39:2-6).

⁵ (Génesis 39:2-6​ta liipangui). Potifar runaca José runagu tucuita ali ruraj, ali trabajador cashcatami ricurca. Shina ricushpami paica: ‘Mandaj Dios, Josehuan cashcata. Chaimanda, tucui imata José rurajpipash Mandaj Diosca, paipaj maquipillata ali llujshichun’ ayudajushcata cuenta japirca. b Tiempo jipaca, Potifar runaca José paita ayudashpa pai charishca tucui cosascunata cuidachunmi encargarca. Jehová Dios Joseta ayudajushcamandaca Potifar runapashmi bendiciongunataca chasquirca.

6. José runaguca ¿imashinashi sintirishcanga?

⁶ José runagu imashna sintirishcata pensaripashunchi. Joseca ¿imatapachata rurangapaj munarca? ¿Potifarpa ñaupapi ali ricuringapallachu munarca? Na, paica libre quidashpa paipa taitapa huasiman tigrangapami munarca. Potifar runapa huasipi ashtaca responsabilidadcunata charishpapash, Joseca yanga dioscunata adoraj runapa esclavomi carca. Jehová Diosca Potifar runa Joseta libre saquichunga na imatapash rurarcachu. Chai jahuapash Joseca ashtahuan llaquicunata, problemacunatami charigrijurca.

7. José ashtahuan llaquicunata chari callarishcataca ¿imamandata nipanchi? (Génesis 39:14, 15).

⁷ Génesis capítulo 39​pi ricushcashnaca Potifar runapa huarmica Joseta munai callarishpami  ‘ñucahuan puñui’ nishpa atichijurca. Chai nishcata José na uyajpimi chai huarmica ninanda culirashpa Joseca ‘violangapajmi munahuarca’ nishpa juchachirca (Génesis 39:14, 15​ta liipangui). Potifar runa chaita yachaj chayashpami Josetaca carcelpi churarca. Joseca huaquin huatacunatami carcelpi yalirca (Gén. 39:19, 20). Chai carcelpi causaica ¿imashinata carca? José runagu ‘ñucata prezu churarca’ nishpaca ‘shuj utujupi churai tucushcatami’ nijurca. Shinaca chai carcelca yana yana, chulunlla, llaquinayai pushtumi cashcanga (Gén. 40:15). Bibliapica huaquin tiempotaca Josetaca chaquicunapi y cungapipash cadenacunahuan huatashpami charirca nin (Sal. 105:17, 18). Joseca ashtahuan llaquicunata charishpami catirca. Paica Potifarpa huasipi esclavo cashpapash ashtaca responsabilidadcunatami charirca. Pero cunanga llaquinai carcelpimi prezo carca.

8. Llaquicuna ashtahuan miranshna cajpipash ¿imatata seguro cai ushapanchi?

⁸ Imapash llaquicunahuan cashpa y Jehová Diosta ña mañashca cashpapash ¿llaquicuna ashtahuan ashtahuan mirajtachu ricupashcangui? Cai mundota Diablo controlajushcamandami shuj shuj llaquicunata charinchi. Pero Jehová Diosca cai llaquicunata ama charichunga na jarcanllu (1 Juan 5:19). Pero ñucanchicunata ima pasajujta Jehová Dios ricujujta y ñucanchimanda preocuparijtaca seguromi cai ushapanchi (Mat. 10:29-31; 1 Ped. 5:6, 7). Paica ñucanchitaca cashnami nin: “Ñucaca nunca na candaca saquishachu, nunca na candaca jichushachu” ninmi (Heb. 13:5). Ñucanchi problemacuna na ucha arreglarinshnalla ricurijpipash Jehová Diospa ayudahuanga aguantashpa cati ushashunmi. Jehová Diosca Josetaca shinami ayudarca.

9. José carcelpi cajpi Jehová Dios ayudajushcataca ¿imashinata yachapanchi? (Génesis 39:21-23).

⁹ (Génesis 39:21-23​ta liipangui). José ashtaca llaquicunata charijpipashmi Jehová Diosca José ali causachun ayudarca. José runaguhuanga ¿imata pasarca? Joseca Potifar runapa confianzata y respetota ganashcashnallatami, carcelta mandaj runapa confianzata y respetotapash ganashca carca. Chaimi Josetaca tucuilla prezocunata ricuchun encargarca. Chaimandami Bibliapica: “José ricushpa cuidajushcamandaca, prezuna huasipi mandaj runaca” imamandapash na preocuparircachu ninmi. Shina ocupado cashcamandami Joseca ñana paipa llaquicunapi yapata pensarijushcanga. Shuj importante runapa huarmita violashca nishpa Joseta juchachishca cajpipash, paimanga carcelpica ashtaca autoridadtami cushcarca. ¿Imamandata shina pasarca? Imashinami Génesis 39:23​pi nishcashnaca: “Mandaj Diosmi, Josehuan carca. Chaimandami imata pai rurajpipash, Mandaj Diosca tucuipi ali llujchijurca”.

10. ¿Imamandata Joseca nali causajurca nishpa pensaita ushapanchiman?

¹⁰ José imashna sintirishcapi cutin pensaripashunchi. Joseca yangamandami carcelpi churai tucushca carca. Shinaca ¿José ali causajushcatachu yapangui? Joseca ¿imatapachata rurangapaj munarca? ¿Carcelta mandajpa ñaupapi ali ricuringapachu munarca? Na, paica paita perdonashpa libre saquichunmi munashcanga. Joseca carcelmanda llujshingapaj munaimandami libre llujshigrijuj shuj prezo runataca faraonman ñucamanda parlapangui nishpa rogarca (Gén. 40:14). Shinapash cai runa Josemanda faraonman na ucha parlashcamandami Joseca ishcai huata más carcelpi yalircara (Gén. 40:23; 41:1, 14). Shina cashpapash, Jehová Dios ayudajushcamandami Joseca ali causajurca.

11. ¿José imata rurachunda Jehová Diosca ayudarca? Joseta shina ayudashpaca ¿imashinata Jehová Diosca paipa munaita pactachirca?

¹¹ Jehová Diosca Egipto llactamanda reytaca ishcai muscuicunatami muscuchirca. Y chai reyca chai muscuicuna ima significajta yachangapami munarca. Chaimi José runagu chai muscuicuna ima cashcata villai ushashcata yachaj  chayarca. Chaimandami Joseta cayachun cacharca. Joseca carcelpirami carca. Joseca Jehová Diospa ayudahuanmi chai rey charishca muscuicuna ima significajtami villai usharca. Shinallata imata rurana cashcatapashmi nirca. Chaita uyashpaca, faraonga manllarishcami quidarca. José runagu Jehová Diospa ayudata charishcata cuenta japimandami chai reyca Egipto llactapa alimentocunata José administrachun encargarca (Gén. 41:38, 41-44). Huaquin huatacuna jipaca shuj yarjai tiempomi chayamurca. Y caica na solo Egipto llactatallaca llaquichircachu sino Canaán llactatapashmi llaquichirca. Cai llactapica Josepa familiami causajurca. José runaguca Egipto llactapi ashtaca autoridadta charimandami paipa familiatapash salvai usharca. Tiempohuanga paipa familiamandami Mesiasca shamugrijurca.

12. Jehová Diosca ¿imashinata Josetaca ayudarca?

¹² Josepa causai imashina cambiashcapi pensaripashunchi. José shuj esclavo cashpata Potifarpa ñaupapi ali ricurichunga ¿pita ayudajurca? ¿Imamandata carcelta mandaj runaca José tucuilla prezocunata ricuriachun a cargo churarca? ¿Pita faraondaca muscuchirca? Y ¿pipa ayudahuanda José runaguca chai muscuicuna ima significajta villai usharca? ¿Pi ayudashcamandata Josetaca Egipto llactamanda alimentocunata administrachun churarca? (Gén. 45:5). Jehová Dios José runaguta ayudajushcamandami José imata rurajpipash ali llujshin carca. Aunque Josepa huauquicuna Joseta jatushpa cachashca cajpipash chai situaciondaca Jehová Diosca paipa voluntadta pactachingapami utilizarca.

13. Jehová Diosca ñucanchi llaquicunata anchuchingapaca ¿siemprechu imatapash ruran?

¹³ Josepa causaimanda yachajushpaca cashnami pensarita ushapanchiman: Jehová Diosca ñucanchi llaquicunata anchuchingapaca ¿siemprechu imatapash ruran? Llaquicunata charishca jipa ñucanchi causaipi ali cosascuna pasachunga ¿Jehová Diosca tucuita controlanllu? Bibliapica na chaitaca yachachinllu (Ecl. 8:9; 9:11). Pero llaquicunata charijpi Jehová Dios ñucanchita ricuriajushcata y ñucanchi mañashcacunata uyajushcataca seguromi capanchi (Sal. 34:15; 55:22; Is. 59:1). Shinallata llaquicunata aguantashpa ñaupaman catichunbashmi ayudan. ¿Imashinata Jehová Diosca chaitaca ruran?

14. Llaquicunata charijpica Jehová Diosca ¿imashinata ayudan?

 ¹⁴ Jehová Diosca minishtijuj horaspipachami ñucanchitaca animashpa cushichin (2 Cor. 1:3, 4). Turkmenistán llactamanda Eziz huauquiguca paipa causaipillatami Jehová Dios chaita imashina pactachishcata ricurca. Paica Jehová Diosta sirvimandami carcelpica ishcai huatata yalirca. Paica: “Juicio horaspica shuj huauquiguca Isaías 30:15​ta ricuchihuarca. Cai textoca: ‘Ñucata yariajlla causashpa casilla shuyashpami, shinlli tucunguichi’ ninmi. Cai shimicunaca Jehová Diospi confiachun, tranquilo cachunmi ayudahuarca. Cai textopi pensarinami carcelpi caj horas fuerzata charishpa aguantachun ayudahuarca” ninmi. ¿Llaquicunata charishpa minishtijuj horaspipacha Jehová Dios imashina quiquindapash animashpa cushichishpa ayudashcata yaripanguichu?

15, 16. Tori panigupa experienciamandaca ¿imatata yachajupanchi?

¹⁵ Huaquinbica shuj llaquita yalishca jipami Jehová Dios ñucanchita imashina ayudashcata cuenta japinchi. Tori shuti paniguca cai shimicuna cierto cashcatami cuenta japirca. Panigupa Mason shuti churiguca seis huatacunata cancerhuan sufrishpami huañurca. Shina pasajpica, panigu Torica ninandami sufrirca. Paica ninmi: “Shuj huahua huañushcata ricunaca mamacunapaca ashtahuan jatun llaquimi can. Shinallata ñucanchicuna sufrishpaca llaquiyanchimi. Pero taitamamacuna huahuacuna sufrinajujta ricushpaca ashtahuanbachami llaquiyanchi” nircami.

¹⁶ Cai jatun llaquita charishca shuj tiempo jipaca Jehová Dios paita imashina ayudashcatami panigu Torica cuenta japirca. Paica ninmi: “Ñuca churigu huañujuj horas tiempopi pensarishpaca Jehová Dios imashina ñucata ayudashcatami ashtahuan cuenta japini. Ñuca churigu Mason paita visitajpi chasquingapaj fuerzata na charijpipash huaquin turiñañacunaca visitangapaj  ishcai horasta viajashpami shamun carca. Ñucanchi ima minishtirishcagupi ayudangapaj y animangapaca turiñañacunaca siempremi hospitalpi carca. Culquigutapash carashpami turiñañagucunaca ñucanchita ayudan carca. Ashtahuan difícil punllacunapipashmi minishtirishca cosasgucunaca na faltarca”. Tori shuti panigu y paipa churi Mason llaquicunata aguantashpa ñaupaman catichunga Jehová Diosca siempremi ayudarca (“ Jehová Diosca ñucanchi minishtinajushcatapacha cushpami ayudarca” nishca recuadrota ricupangui).

17, 18. Jehová Dios ñucanchita imashna ayudashcata ricushpa agradicingapaca ¿imatata rurana capanchi? (Salmo 40:5).

¹⁷ (Salmo 40:5​ta liipangui). Pipash shuj montañata vitsajushpaca, chai montaña jahuaman chayangapapachami munan. Pero chai montaña jahuaman chayangacamanga shuj shuj paisajecunata ricushpa visitangapami tiempota llujchin. Shina cuendami llaquicunata aguantangapaj Jehová Dios ñucanchita imashina ayudajushcata pensaringapaj tiempota llujchina capanchi. Shinaca cunan punllapica ¿Jehová Diosca imashinata bendiciahuashca? Llaquicuna na tucurijpipash aguantashpa catichunga ¿Jehová Diosca imashinata ayudahuajun? nishpami pensarina capanchi. Cada punllami Jehová Dios imashna bendiciashcapi pensaringapaj esforzarina capanchi.

¹⁸ Imapash llaquicunata charishpa chai llaquicunata tucuchipai nishpa Jehová Diosta mañanaca normalmi can. Y chaita ruranaca alimi can (Filip. 4:6). Shinapash cunanbi charishca bendiciongunapi pensarinami capanchi. Jehová Diosca ñucanchicunaman fuerzata cushpa aguantachun ayudasha nishpami prometishca. Shinaca Jehová Dios ñucanchita ayudashcamandaca siempremi agradicina capanchi. Shina rurashpami José runaguta ayudashcashnallata llaquicunata charijpipash aliguta causachun Jehová Dios ñucanchita ayudajushcata cuenta japipashun (Gén. 41:51, 52).