1-2. а) Соске на сием изненадиме со иси амен неволје? б) Со ка дикха ки акаја статија?

 САР е Јеховаскоро народо, амен на сием изненадиме кеда иси амен неволје. Свесна сием башо адава со вакерела и Библија: „Ваљани те накха таро бут пхарипа, те шај те кхува ко е Девлескоро Царство“ (Дела 14:22). Исто аѓаар џанаја кај несаве таро амаре проблемија нане целосно те решинен пе са џикоте на живинаја ко е Девлескоро нево свето коте со „мерибе нане те овел више, ни жалибе, ни ројбе, ни дукха“ (Отк. 21:4).

² О Јехова дозволинела те случинен пе аменге неволје. Ама ов поможинела аменге те истрајна. Приметин со вакерѓа о апостол Павле е христијаненге таро Рим. Ко почеток спомнинѓа несаве неволје со доживинѓа лен ов хем лескере пхраља. Пало адава пишинѓа: „Ко са акава побединаја преку окова со мангља амен“ (Рим. 8:35-37). Акава значинела кај о Јехова шај те керел амен успешна чак џикоте трајнела несаво проблеми. Акана те дикха сар о Јехова поможинѓа е Јосифеске те овел успешно хем сар шај туке да те поможинел.

3. Сар таро јекх пути менинѓа пе о живото е Јосифескоро?

³ О Јаков јасно сикавѓа кај бут мангела сине пле чхаве е Јосифе (1. Мој. 37:3, 4). Адалеске е Јаковескере јавера чхаве сине љубоморна пумаре пхралеске. Кеда сине лен прилика,  ола бикинѓе е Јосифе е Мадијамцонге. Акала трговција ингарѓе е Јосифе џи ко Египет, коте со панда јекх пути бикинѓе е Јосифе е Петефриаске, о главно чувари е Фараонескоро. Е Јосифескоро живото таро јекх пути менинѓа пе, таро најмангло чхаво пе дадескоро акана уло робо ко Египет (1. Мој. 39:1).

4. Сар шај те аракхљова ко слично проблеми сар о Јосиф?

⁴ И Библија вакерела кај о лошна буќа случинена пе сариненге (Проп. 9:11). Понекогаш иси амен проблемија со иси са е манушен (1. Кор. 10:13). Или шај иси амен неволје адалеске со сием ученикија е Исусескере. На пример шај вреџинена амен, противинена пе аменге или чак прогонинена амен баши амари вера (2. Тим. 3:12). Бизи разлика саве проблемеа соочинаја амен, о Јехова шај те керел те ова успешна. Сар поможинѓа е Јосифеске?

5. Со халило о Петефри башо е Јосифескоро успех? (1. Мојсеева 39:2-6).

⁵ Читин 1. Мојсеева 39:2-6. О Петефри дикхља кај о Јосиф сине бут способно хем вредно, хем исто аѓаар џанља соске. О Петефри дикхља кај „о Јехова денѓа е Јосифеске успех ко са со керела сине“. b Пало несаво време акава Египќани леља е Јосифе те служинел леске лично. Ов исто аѓаар чхивѓа ле те овел главно ко лескоро кхер. Адалеске о Петефри овела сине са побарвало.

6. Сар веројатно осетинела пе сине о Јосиф?

⁶ Пробин те замислине туке сар осетинѓа пе о Јосиф. Која сине лескири најбари желба? Дали ов мангља о Петефри те приметинел ле хем те наградинел ле? Најверојатно е Јосифескири желба сине те овел ослободимо те шај те иранел пе ко пло дад. Иако сине ле бут предностија ко е Петефриаскоро кхер, о Јосиф сепак сине робо некаске со на служинела е Јеховаске. Ама, о Јехова на поттикнинѓа е Петефриа те ослободинел е Јосифе, а е Јосифескири ситуација овела сине са полошно.

7. Сар е Јосифескири ситуација овела сине са полошно? (1. Мојсеева 39:14, 15).

⁷ Тари 1. Мојсеева 39 поглавје дикхаја кај  о Јосиф свиџинѓа пе е Петефриаскере ромњаке хем адалеске ој бут пути мангља те завединел ле. О Јосиф секова пути одбинѓа ла. Ко крајо ој добором бут хољанѓа е Јосифеске со ховавѓа кај ов мангља те силујнел ла. (Читин 1. Мојсеева 39:14, 15.) Кеда о Петефри шунѓа башо акава ов фрдинѓа е Јосифе ко затвор коте со ачхило некобор берш (1. Мој. 39:19, 20). Саво затвор сине адава? О хебрејско лафи со користинѓа ле о Јосиф башо „затвор“ шај те значинел „јама“, хем таро акава шај те хаљова кај сине ко јекх темно тхан хем мислинѓа кај нане ле надеж (1. Мој. 40:15, фус.). Исто аѓаар, и Библија сикавела кај несаво време е Јосифескере пре хем и мен сине пханле ко синџирија (Пс. 105:17, 18). Е Јосифескири ситуација овела сине таро лошно ко полошно. Таро слуга касте со сарине шај те овел лен сине доверба уло затворенико со сине пханло ки темно дупка.

8. Ко со шај те ова сигурна чак кеда амари ситуација овела полошно?

⁸ Дали иси тут проблеми кова со овела са полошно иако бут пути молинѓан тут башо адава? Адава шај те случинел пе. Ко свето коте со владинела о Сатана нашти те очекујна о Јехова те цидел амендар о неволје (1. Јов. 5:19). Сепак, шај те ова сигурна кај о Јехова бут шукар џанела таро со накхаја хем нане леске са јекх (Мат. 10:29-31; 1. Пет. 5:6, 7). Освен адава ов ветинѓа: „Никогаш нане те мукхав тут хем никогаш нане те иранав туке мо думо“ (Евр. 13:5). О Јехова шај те поможинел туке те истрајне чак кеда мислинеа кај тли ситуација нане те овел пошукар. Те дикха сар акава поможинѓа е Јосифеске.

9. Со сикавела кај о Јехова сине е Јосифеа џикоте сине ко затвор? (1. Мојсеева 39:21-23).

⁹ Читин 1. Мојсеева 39:21-23. Чак џикоте о Јосиф сине ки пхари ситуација ко затвор, о Јехова денѓа ле успех. Сар? Пало несаво време о Јосиф стекнинѓа и доверба хем о поштовање таро главно управители е затворескоро, исто сар со сине адава случај е Петефријаја. Пало кратко време о главно управители чхивѓа е Јосифе те овел главно е јавере затворениконге. Уствари, и Библија вакерела кај „о управители е затворескоро на ваљани сине више те грижинел пе баши ни јекх бути која со доверинѓа ла е Јосифеске“. О Јосиф на сине више обично затворенико, акана сине ле одговорно бути колаја со сине зафатимо. Акава ретко случинела пе. Сар шај те овел денди асавки важно задача јекхе затвореникоске кова со сине обвинимо кај мангља те силујнел јекхе важно службеникоскере ромња? Иси само јекх објаснување башо акава. Сар со пишинела ки 1. Мојсеева 39:23: „О Јехова сине е Јосифеа хем о Јехова денѓа ле успех ко са со керела сине“.

10. Објаснин соске о Јосиф шај мислинела сине кај нане успешно ко са со керела.

¹⁰ Пробин панда јекх пути те чхиве тут ки е Јосифескири ситуација. Откеда сине погрешно обвинимо хем чхивдо ко затвор, дали мислинѓа кај тано успешно ко са со керела сине? Со мангела сине о Јосиф највише таро са? Дали мангела сине о управители е затворескоро те дикхел шукар ки лесте? Најверојатно о Јосиф мангља те овел ослободимо. Ов чак замолинѓа е јавере затворенико со сине ослободимо те керел лафи е Фараонеа те шај те икљол таро затвор (1. Мој. 40:14). Ама акава мануш на керѓа одма лафи е Фараонеа. Адалеске о Јосиф ачхило панда дуј берш ко адава затвор (1. Мој. 40:23; 41:1, 14). Сепак, о Јехова понадари да денѓа ле успех. Сар?

11. Сави посебно способност денѓа о Јехова е Јосифеске, хем сар адава поможинѓа те исполнинел пе е Јеховаскири намера?

 ¹¹ Џикоте о Јосиф сине ко затвор, о Јехова керѓа о Фараони те дикхел дуј суне со вознемиринѓе ле. О Фараони мангља те џанел со значинена адала суне. Кеда о Фараони дознајнѓа кај о Јосиф шај те објаснинел о суне, вакерѓа те анен ле ки лесте. О Јехова поможинѓа е Јосифеске те објаснинел о суне хем воодушевинѓа е Фараоне адалеа со денѓа ле практично совет. Адалеске со џанља кај о Јехова тано е Јосифеа, о Фараони чхивѓа ле те овел главно башо хајбе ко цело Египет (1. Мој. 41:38, 41-44). Покасно сине баро бокхалипе ко Египет хем ко Ханаан, ки пхув коте со живинела сине е Јосифескири фамилија. О Јосиф акана шај сине те поможинел пле фамилијаке хем те заштитинел и лоза колатар со ваљани сине те авел о Месија.

12. Ко саве начинија денѓа о Јехова е Јосифеске успех?

¹² Размислин башо необична настанија со случинѓе пе ко е Јосифескоро живото. Кој поттикнинѓа е Петефриа те приметинел е Јосифе кова со сине обично робо? Кој чхивѓа е управителе таро затвор те дикхел шукар ко Јосиф кова со сине јекх обично затворенико? Кој керѓа о Фараони те дикхел адала суне хем кој денѓа и способност е Јосифеске те објаснинел лен? Кој водинѓа и одлука е Фараонескири те чхивел е Јосифе те овел главно башо хајбе ко Египет? (1. Мој. 45:5). Очигледно о Јехова сине адава со керѓа о Јосиф те овел успешно ко са со керела сине. Иако е Јосифескере пхраља мангле те мударен ле, о Јехова менинѓа и ситуација те шај те исполнинел пли намера.

13. Дали о Јехова контролиринела са со случинела пе аменге? Објаснин.

¹³ Со шај те сикљова таро е Јосифескоро извештај? Дали о Јехова реагиринела ки секоја лошно ситуација со доживинаја ла? Дали ов намерно мукхела те доживина нешто лошно те шај те случинел пе нешто шукар? На, и Библија на сикавела асавко нешто (Проп. 8:9; 9:11). Ама јекх бути џанаја: Кеда накхаја таро несаво пхарипа, о Јехова дикхела адава хем шунела кеда молинаја  ле баши помош (Пс. 34:15; 55:22; Иса. 59:1). Ов керела панда нешто, поможинела амен успешно те истрајна ко пхаре ситуацие. Сар?

14. Сар поможинела аменге о Јехова ко пхаре времија?

¹⁴ Јекх начин сар о Јехова поможинела амен тано аѓаар со бут пути ко право време дела амен утеха хем охрабрување (2. Кор. 1:3, 4). Акава случинѓа пе јекхе пхралеске таро Туркменистан со викинела пе Езиз хем сине дуј берш пханло ко затвор баши пли вера. Ов вакерела: „Адава сабајле кеда судинѓе манге јекх пхрал сикавѓа манге о стихо таро Исаија 30:15 коте со пишинела: ’Ачховен смириме хем сикавен доверба, адава ка овел тумари сила!‘ Акава стихо поможинѓа манге те ачховав смиримо хем ко са те овел ман доверба ко Јехова. Адава со размислинава сине башо акава стихо, поможинѓа манге цело време џикоте сиум сине пханло“. Шај ли те сетине тут ки јекх ситуација таро тло живото кеда о Јехова поможинѓа туке аѓаар со утешинѓа тут хем охрабринѓа тут баш кеда највише ваљанѓа туке?

15-16. Со сикљовеа тари Тори?

¹⁵ Бут пути хаљоваја сар о Јехова поможинѓа аменге откеда накхела и неволја. Јекх пхен која со викинела пе Тори шај те потврдинел акава. Лакере чхаве е Мејсоне сине ле шов берш рако хем пало адава муло. Шај те хаљол пе кај и Тори сине пхаѓи тари дукх. Ој вакерела: „Сар дај нане побари дукх таро адава те нашаве тле чхаве. Сигурно сиум кај о јавера родителија ка согласинен пе манцар кај те дикхе тле чхаве сар цидела муке тано бут попхаро него ту те ове ки асавки ситуација“.

¹⁶ Иако адава со доживинѓа сине бут пхаро, и Тори покасно размислинѓа башо адава сар о Јехова поможинѓа лаке ко адава  време. Ој вакерела: „Кеда размислинава башо адава време, шај те дикхав сар о Јехова поможинѓа манге џикоте сине насвало мло чхаво. На пример, чак кеда о Мејсон сине добором бут насвало со нашти сине те приминел посета, сепак о пхраља хем о пхења патујнена сине дуј саатија те шај те авен ки болница. Секогаш сине некој ки болница хем спремно аџикерена сине те поможинен. Исто аѓаар, о пхраља грижинена пе сине башо амаре материјална потребе. Чак кеда сине аменге најпхаро, секогаш сине амен адава со ваљанѓа аменге“. И Тори добинѓа таро Јехова адава со ваљанѓа лаке те шај те истрајнел, хем исто аѓаар о Мејсон да. (Дикх и рамка „ О Јехова денѓа амен баш адава со ваљанѓа аменге“.)

17-18. Со ка поможинел аменге те дикха хем те ценина е Јеховаскири поддршка џикоте трајнена о неволје? (Псалм 40:5).

¹⁷ Читин Псалм 40:5. Јекхе планинарескири цел тани те ресел скроз упре ки планина. Ама џикоте керела адава, некобор пути шај ка ачхол те шај те уживинел ко шужо поглед. Ко слично начин, амен да ваљани редовно те ачхова хем те размислина башо адава сар о Јехова дела амен успех те истрајна ко пхаре времија. Ко крајо таро секова диве пуч тут: „Сар о Јехова наградинѓа ман авдиве? Иако панда иси ман проблеми, сар о Јехова поможинела манге те истрајнав?“ Тегани дикх дали авела туке ки годи барем јекх бути колаја со поможинѓа туке о Јехова.

¹⁸ Ту сигурно молинеа тут те шај те завршинен тле проблемија. Адава тано нормално хем шукар тано те кере адава (Фил. 4:6). Ама ма бистре о берекетија со иси тут акана. О Јехова ветинела кај ка дел тут сила хем ка поможинел туке те истрајне. Секогаш ов благодарно башо адава со о Јехова поддржинела тут. Тегани шај те дикхе сар о Јехова поможинела туке те ове успешно, сар со керѓа адава ко случај е Јосифеа, чак џикоте трајнена о неволје (1. Мој. 41:51, 52).