1-2. a) Manino ro fa ampoizintsika hoe hiatriky raha sarotsy tsika? b) Ino ty hodinihintsika amy lahatsoratsy toy ato?

 VAHOAKINI-JEHOVAH tsika, le fa ampoizintsika hoe hiatriky raha sarotsy tsika. Haintsika fa mivola ty Baiboly hoe “tsy maintsy miatriky fijalea maro tsika vo ho tafilitsy amy Fanjakà-Ndranahary ao.” (Asa. 14:22) Haintsika koa fa misy problemo tsy ho afaky tanteraky laha tsy amy tontolo vaovao any. Fa “tsy hisy sasy ty fahafatesa” amy zay, “sady tsy hisy sasy ty alahelo na ty fitaraina na ty raha mahararirary.”​—Apok. 21:4.

² Tsy miaro antsika tsy ho azoni-raha sarotsy Jehovah. Fe ampeany tsika mba hahavita hiaritsy ani-raha rey. Henteo moa ty raha nivolanini-apostoly Paoly tamy Kristiana ta Roma any. Niresahiny tse ty raha sarotsy niaretany noho ty mpiara-manompo aminy, bakeo ie nivola hoe: “Lasa mpandresy tanteraky tsika amy raha iaby rezay, satria manampy antsika azy tea antsika iny.” (Rom. 8:35-37) Midika raha zay fa afaky manampy anao Jehovah, ndre eo aza ty raha sarotsy mahazo anao. Ndao hohenteantsika hoe akory ty fomba nanampeani-Jehovah ani-Josefa, le akory koa ty fomba anampeany anao.

3. Ino ty raha niova tampoky tamy fiainani-Josefa?

³ Hita tamy raha nataoni-Jakoba hoe tena teany Josefa anany. (Gen. 37:3, 4) Farany nialona ani-Josefa zokiny rey. Lafa nahita fomba hamarota ani-Josefa amy zay rozy, le navilin-drozy tamy mpamarotsy baka Mediana any rezay ie. Nandesini-Midianita rey nana Ejipta any Josefa, bakeo navilin-drozy koa lafa tany, le nivilini-Potifara, azy sefoni-mpiamby ani-Farao  iny. Niova tampoky ty fiainani-Josefa. Ie tanilani-babany tena tea azy teo iny, lasa andevon’olo ta Ejipta any!​—Gen. 39:1.

4. Ino ty raha sarotsy mety hatrehintsika?

⁴ Mivola ty Baiboly fa mety ho azon-draha raty tsika iaby. (Mpito. 9:11) Mety hiatriky raha sarotsy “fa mpahazo ty olo” tsika kindraiky. (1 Kor. 10:13) Fe mety hijaly koa tsika satria mpianatsini-Jesosy. Mety hisy hikizaky, ohatsy, tsika, na hisy hanohitsy, na hisy hanenjiky mihintsy aza, vokatsini-raha inoantsika. (2 Tim. 3:12) Fe ndre ino ndre ino ty raha sarotsy mahazo anao, le afaky manampy anao Jehovah ka ho vitanao ty hiatriky ani-raha zay. Akory ty nanaovany ani-zay tamy Josefa?

5. Ia hoasani-Potifara ty nanampy ani-Josefa lafa nihitany hoe nety ty raha nataoni-Josefa? (Genesisy 39:2-6)

⁵ Vakio Genesisy 39:2-6. Hitani-Potifara fa tena nahay raha Josefa sady nazoto niasa. Hainy hoe ino ty nahavy ani-zay. Hitany hoe “nataoni-Jehovah nety iaby ze raha nataoni-[Josefa].” b Farany ie lasa mpanompo natokisani-Potifara. Nampiandraiketiny ani-Josefa koa ty raha iaby tan-tranony ao. Ino ty vokany? Lasa nimpanarivo Potifara.

6. Ino ty raha mety mba nirìni-Josefa?

⁶ Mba alao sary an’eritseritsy moa hoe ino ty raha mety ho tan-tsaini-Josefa ao. Ino zao, ohatsy, ty raha mba nirìny? Ty hahazo sitraky amy Potifara noho hameany valisoa va? Azo antoky fa tena teani-Josefa laha nafahy tsy ho andevo ie, amy zay mba afaky mimpoly amy babany any. Marina fa nana tombontsoa maro tan-tranoni-Potifara ao Josefa, fe mbo niandevon’olo tsy nanompo ani-Jehovah io avao ie. Tsy nataoni-Jehovah ze hahavy ani-Potifara hanafaky ani-Josefa. Vomaiky aza niharaty ty raha niainany.

7. Ino ty mampiseho hoe vomaiky niharaty ty raha niainani-Josefa? (Genesisy 39:14, 15)

⁷ Resahini-​Genesisy toko faha-​39 fa nitea ani-Josefa valini-Potifara iny, ka nitaominy matetiky ie mba hanao firaisa taminy. Fe tsy naneky mihintsy Josefa. Farany nimeloky ampela io, le nivola ie fa nao zao Josefa fa ho  nandrava azy. (Vakio Genesisy 39:14, 15.) Lafa nireni-Potifara raha zay, le nigadràny Josefa, sady tam-prizon ao avao tanatini-tao vitsivitsy. (Gen. 39:19, 20) Nanao akory moa prizon io? Mety hidika hoe “lavaky famoria rano” na “lavaky” ty safà hebreo nampiasani-Josefa hoe “prizon”, zany hoe pilasy maìky sady mahakivy. (Gen. 40:15, f.a.p) Mivola koa ty Baiboly hoe nasia seny ty tombokini-Josefa noho ty vozony tanatini-fotoa vitsivitsy. (Sal. 105:17, 18) Vomaiky niharaty ty raha niainani-Josefa. Ie nimpanompo tena natokisa iny lasa nigadra.

8. Ino ty raha azontsika antoky, ndre miharaty aza ty raha iainantsika?

⁸ Fa nisy fotoa va iha niatriky raha sarotsy, fe vomaiky niharaty avao raha iny ndre fa nivavaky mafy tamy Jehovah iha? Mety hiseho raha zay. Tsy miaro antsika tsy ho azoni-raha sarotsy amy tontoloni-Satana toy eto Jehovah. (1 Jaona 5:19) Fe ndre zay, le afaky matoky iha hoe haini-Jehovah soa ty raha mahazo anao, sady mikarakara anao ie. (Mat. 10:29-31; 1 Pet. 5:6, 7) Fa nampitamà koa ie hoe: “Tsy hanenga anao mihintsy aho, sady tsy hahafoy anao mihintsy.” (Heb. 13:5) Afaky manampy anao hiaritsy Jehovah ndre atao raha tsy ho afaky mihintsy raha mahazo anao iny. Ndao moa hohenteantsika fa zay mihintsy ty raha niseho tamy Josefa.

9. Ino ty mampiseho fa nanampy ani-Josefa Jehovah tamy ie nigadra iny? (Genesisy 39:21-23)

⁹ Vakio Genesisy 39:21-23. Tena tsy nimora ty fiaina tam-prizon tao. Fe ndre zay, le mbo nataoni-Jehovah nety ty raha nataoni-Josefa. Akory ty nanaovani-Jehovah ani-zay? Lafa nandeha ty fotoa, le nanjary natokisani-sefoni-prizon iny Josefa, manahaky fatokisani-Potifara azy taloha iny. Farany ie nitendreni-sefoni-prizon iny hiandraikitsy ani-gadra sisany rey. Mivola aza ty Baiboly fa “tsy nisy nampiasa loha ani-sefoni-prizon iny mihintsy ty raha nankiny tamy Josefa.” Lasa nahazo asa soa ie. Tena tsy nampino raha zay! Manino Josefa ro nanankina andraikitsy bevata manahaky ani-zay, kanefa ie nasara hoe nandrava valini-manam-pahefà, le zay ty antony nahagadra azy? Mazava ty antony. Resahini-​Genesisy 39:23 fa “nataoni-Jehovah nety iaby ze raha nataoni-Josefa.”

10. Manino Josefa ro mety nahatsapa hoe fa tsy misy hevitsy sasy ty raha niainany? Hazavao.

¹⁰ Mba alao sary an’eritseritsy ndraiky moa hoe ino ty raha mety ho tan-tsaini-Josefa ao. Nalefa amy prizon any ie satria nasara nanao raha tsy nataony. Mety mbo nahatsapa avao va hoasanao Josefa hoe nanampy azy amy kila raha iaby Jehovah? Ino zao ty raha mba tena nirìny? Ty hahazo sitraky amy sefoni-prizon iny va? Azo antoky fa mba naniry ie hoe ho bototsy. Nivolaniny mihintsy aza gadra raiky fa marìny ho bototsy iny mba hiresaky amy Farao mikasiky azy, amy zay ie mba haboaky baka am-prizon ao. (Gen. 40:14) Fe tsy niresaky tamy Farao gadra iny lafa nibototsy. Farany mbo nijano tam-prizon tao tanatini-roe tao mahery Josefa. (Gen. 40:23; 41:1, 14) Fe ndre zay, le nanampy azy avao Jehovah. Tamy fomba akory?

11. Ino ty fahaiza miavaky nameani-Jehovah ani-Josefa, le manino raha zay ro nanatanteraky ty sitraponi-Jehovah?

¹¹ Tamy Josefa mbo tam-prizon tao iny, le nataoni-Jehovah nanonofy raha nampatahotsy mpanjakani-Ejipta iny. Nampiasa loha ani-Farao nofy reo, ka teany ho hay ty dikany. Nampikaihini-mpanjaka iny Josefa, lafa nihainy hoe mahay manazava nofy. Nampeani-Jehovah Josefa ka nihainy ty nanazava ani-nofy rey, sady tena nahatseriky ani-Farao  ty torohevitsy mahasoa nameani-Josefa azy. Lafa nihitani-Farao fa tena nanampy ani-Josefa Jehovah, le nitendreny ie ho mpiandraikitsy ty sakafo ta Ejipta ao. (Gen. 41:38, 41-44) Nisy mosary ta Ejipta tao tafara atoy. Nisy mosary koa ta Kanana any, zany hoe tamy tanà misy ty fianakaviani-Josefa tany. Afaky nanavotsy ty fianakaviany Josefa tamy zay, ka niaro ty razambe hiaviani-Mesia.

12. Ino ty nataoni-Jehovah mba hanampea ani-Josefa?

¹² Misy raha tsy de nampoizy niseho tamy Josefa. Mba eritsereto moa hoe ia ty nahavy ani-Potifara hahavoamariky ani-Josefa, kanefa ie olo niandevo? Ia koa ty nahavy ani-sefoni-prizon iny hankasitraky ani-Josefa, kanefa ie olo gadra? Ia ty nahavy ani-Farao lasa hanonofy noho nanampy ani-Josefa hahay hanazava ani-nofy rey? Ia ty nampirisiky ani-Farao hanendry ani-Josefa mba ho mpiandraikitsy ty sakafo ta Ejipta tao? (Gen. 45:5) Mazava ho azy fa Jehovah ro nanampy ani-Josefa mba ho mety iaby ty raha nataony. Ndre ta ho namono ani-Josefa aza rahalahiny rey, le novàni-Jehovah ho fomba raiky hanatanteraha ty sitrapony raha iny.

13. Ilikilirani-Jehovah iaby va ze raha miseho amy fiainantsika? Hazavao.

¹³ Ino ty ianarantsika baka amy tantarani-Josefa? Ilikilirani-Jehovah iaby va zany ze raha miseho amy fiainantsika? Mandahatsy ty raha iaby miseho amy fiainantsika va ie, ka lafa misy raha raty miseho le misy antony soa zay? Aha, tsy mampianatsy ani-zay ty Baiboly. (Mpito. 8:9; 9:11) Fe zao ty raha haintsika: Mahita ty raha sarotsy mahazo antsika Jehovah sady mijanjy ty fitaraina ataontsika. (Sal. 34:15; 55:22; Isaia 59:1) Tsy zay avao, fa afaky manampy antsika hiaritsy raha sarotsy koa Jehovah. Akory ty anaovany ani-zay?

14. Akory ty anampeani-Jehovah antsika lafa tsika miatriky raha sarotsy?

¹⁴ Ino ty fomba raiky anampeani-Jehovah antsika? Mampionona noho mampahery antsika ie, le matetiky amy fotoa tena ilàntsika azy ty isehoani-raha zay. (2 Kor. 1:3, 4) Zay ty raha niseho tamy Eziz, rahalahy mipetraky a Turkménistan any. Voaheloky higadra roe tao ie vokatsini-finoany. Hoy ty asany: “Maraindraini-andro hitsarà ahy iny, le nisy  rahalahy raiky zay nampiseho ahy ty Isaia 30:15. Mivola andininy io hoe: ‘Hatanjaky nareo laha tsy taitaitsy noho matoky avao.’ Nanampy ahy tsy ho taitaitsy avao andininy io sady nanampy ahy hiantehitsy tamy Jehovah tamy kila raha iaby. Nivetsevetseko avao andininy io, le zay ro nanampy ahy hiaritsy tanatini-fotoa nahagadra ahy iny.” Fa nisy fotoa koa va iha tena nila fampionona noho fampahereza, le tamy fotoa zay mihintsy Jehovah nanampy anao?

15-16. Ino ty ianaranao baka amy tantarani-Tori?

¹⁵ Matetiky lafa milamy raha sarotsy nahazo antsika iny, zay vo tsapantsika hoe nanampy antsika hiaritsy Jehovah. Zay ty raha nitsapani-ranabavy kaihy hoe Tori zay. Nivoani-kansera anakilahiny mana anara Mason zay. Nialy mafy tamy arety io anakilahiny io tanatini-6 tao, zisiky nahafaty azy. Azo antoky hoe tena nalahelo biby Tori. Nivola ie hoe: “Amy maha reny ahy, le iny ty raha farani-ze tsy nizakako.” Nivola koa ie hoe: “Mino aho fa tsy misy ray aman-dreny tsy hieky hoe tena mafy marary anaky zao, ka le aleony ie ro mijalijaly tozay ty anany.”

¹⁶ Marina fa nalahelo biby Tori lafa nahita ani-anakilahiny iny nijalijaly. Fe nivetsevetseny tafara atoy ty fomba nanampeani-Jehovah azy hiaritsy. Hoy ty asany: “Tsapako hoe tena nanampy ahy Jehovah tamy aretini-anakilahiko iny. Nisy fotoa, ohatsy, Mason narary mafy le tsy niazo tsidihy, fe maro ty ranadahy noho rahavavy niavy tan-dapotaly any ndre baka lavitsy any aza. Tozoro nisy mpiara-manompo avao tamy efitsy fandinasa olo tao sady parè hanampy rozy. Namean-drozy ze raha nilànay koa zahay. Tsy nisy raha nanahira anay mihintsy ndre tamy fotoa tena nimafy aminay iny aza.” Nameani-Jehovah ani-Tori ze raha nilàny mba hahavitany hiaritsy,  le zay koa ty nataony tamy Mason.​—Henteo ty efajoro hoe “ Nanome Ze Raha Nilànay Avao Jehovah.”

17-18. Ino ty hanampy antsika hahita noho hankasitraky ty fanampea ameani-Jehovah antsika lafa misy raha sarotsy? (Salamo 40:5)

¹⁷ Vakio Salamo 40:5. Lafa misy olo raiky manganiky vohitsy, le ho avy amy tampony eny ty raha kendreny. Fe amy lala ombany iny misy pilasy maromaro azony ijanona, le afaky manentinenty ze raha soasoa hitany ie. Manahaky ani-zay koa ty tokony ataonao. Manokana fotoa tsy tampaky mba hametsevetsea ty fomba anampeani-Jehovah anao hahavita hiaritsy raha sarotsy, ndre mbo tsy voavaha aza problemonao iny. Saky tampitsy ty andro kiraidraiky, le eritsereto zao: ‘Akory ty fomba nanampeani-Jehovah ahy nandroany? Marina fa mbo tsy voavaha raha mahazo ahy toy, fe akory ty anampeani-Jehovah ahy hiaritsy?’ Henteo tsy no misy raha raiky farafahakeliny ataoni-Jehovah mba hanampeany anao hiaritsy.

¹⁸ Marina fa mety hivavaky iha mba ho tampitsy any problemo mahazo anao iny. Ara-dalàna raha zay sady zay ty tokony hataonao. (Fil. 4:6) Fe tokony ho haintsika koa ty fitahia ananantsika henanizao. Mampitamà Jehovah fa hanome hery antsika noho hanampy antsika hiaritsy. Ka halino mihintsy zany ty misaotsy ani-Jehovah satria manampy anao ie. Laha manao ani-zay iha, le ho hitanao hoe manampy anao hahavita hiatriky raha sarotsy Jehovah, manahaky ty nataony tamy Josefa, ndre mbo miatriky raha sarotsy aza iha.​—Gen. 41:51, 52.