1-2. (a) Fu san ede a no e fruwondru wi taki wi e kisi fu du nanga tesi? (b) San wi o luku na ini na artikel disi?

 A NO e fruwondru wi te wi leki a pipel fu Yehovah e kisi tesi. Wi e frustan te Bijbel e taki dati „wi musu pasa furu banawtu fu man go na ini a Kownukondre fu Gado” (Tori 14:22). Wi sabi tu taki sonwan fu den problema fu wi o lusu soso te wi de na ini a nyun grontapu, pe „dede no o de moro. Nowan sari, noso krei, noso pen no o de moro.”​—Openb. 21:4.

² Yehovah no e kibri wi gi tesi ma a e yepi wi fu horidoro. Poti prakseri na san Paulus ben taigi den Kresten di ben e libi na ini Rome. A bigin kari wan tu tesi di en nanga den brada ben ondrofeni. Baka dati a skrifi: „Toku wi o wini krinkrin nanga yepi fu a sma di lobi wi” (Rom. 8:35-37). Disi wani taki dati Yehovah kan meki sani waka bun gi yu awinsi yu e kisi fu du nanga tesi. Kow go luku fa Yehovah ben meki sani waka bun gi Yosef èn fa a kan yepi yu.

3. Fa Yosef libi kenki wantronso?

³ Yakob ben sori krin taki a ben lobi en manpikin Yosef srefisrefi (Gen. 37:3, 4). A bakapisi ben de taki den moro owru manpikin fu Yakob ben kon dyarusu tapu a brada fu den. Di den kisi na okasi den seri Yosef gi wan grupu bisnisman fu Midian. Den bisnisman disi tyari Yosef go na Egepte, hondrohondro kilometer fu pe a ben e tan. Baka dati den seri en gi Potifar di ben na edeman fu den waktiman fu kownu. Yosef libi kenki heri esi. Fosi, a ben de na ini wan osofamiri pe en papa ben  lobi en srefisrefi, ma now a ben de wan srafu fu wan Egeptesma.​—Gen. 39:1.

4. Sortu tesi wi kan kisi?

⁴ Bijbel e taki dati ’ogri ten nanga sani di wi no e fruwakti kan miti wi alamala’ (Preik. 9:11). Son leisi wi e kisi fu du nanga tesi di tra libisma e kisi tu (1 Kor. 10:13). Noso a kan taki wi e kisi fu du nanga tesi soso fu di wi na disipel fu Yesus. Fu eksempre, sma kan spotu wi, den kan gens wi èn den kan frufolgu wi fu a bribi fu wi ede (2 Tim. 3:12). Awinsi sortu tesi wi e kisi, Yehovah kan meki sani waka bun gi wi. Fa a ben du dati gi Yosef?

5. San Potifar kon frustan di a si taki sani ben e waka bun gi Yosef? (Genesis 39:2-6)

⁵ Leisi Genesis 39:2-6. Potifar kon si taki Yosef ben de wan koni yonguman èn taki a ben e wroko tranga. Èn a ben sabi fu san ede dati ben de so. Potifar ben e si taki „Yehovah ben e meki ala sani di Yosef ben e du, waka bun”. b Te fu kaba, Potifar meki Yosef yepi en nanga ala sani. A poti Yosef fu luku en heri oso srefi. San ben de a bakapisi? Sani ben e waka bun gi Potifar.

6. San yu denki taki Yosef ben wani trutru?

⁶ Pruberi fu poti yusrefi na ini a situwâsi fu Yosef. San a ben wani trutru? A ben wani meki Potifar si taki a ben e wroko tranga? A ben wani moro frantwortu? Nôno. A musu de taki Yosef ben wani kon fri èn drai go baka na en papa. No frigiti taki awinsi fa a ben abi furu frantwortu na ini na oso fu Potifar, toku Yosef ben de wan srafu fu wan sma di no ben e anbegi Yehovah. Yehovah no sorgu taki Potifar meki Yosef kon fri. Èn a situwâsi fu Yosef ben o kon moro ogri srefi.

7. Na sortu fasi a situwâsi fu Yosef ben kon moro ogri? (Genesis 39:14, 15)

⁷ Soleki fa Genesis kapitel 39 e sori, dan a wefi fu Potifar ben kon kisi firi gi Yosef èn omeni leisi a pruberi fu meki Yosef kon didon nanga en. Ma ala leisi  baka Yosef ben weigri fu du dati. Te fu kaba a kon atibron so te tapu Yosef, taki a lei gi en taki a pruberi fu verkracht en. (Leisi Genesis 39:14, 15.) Di Potifar yere disi, a poti Yosef na strafu-oso èn Yosef tan drape omeni yari langa (Gen. 39:19, 20). Fa a ben de na strafu-oso? A Hebrew wortu di Yosef gebroiki gi „strafu-oso” wani taki wan „peti”. Disi e sori taki pe a ben de ben dungru èn a ben firi leki nowan howpu ben de gi en moro (Gen. 40:15). Bijbel e sori tu taki fu wan pisi ten den ben fasi den futu fu Yosef nanga bui èn taki den ben tai en nanga isri keti (Ps. 105:17, 18). A situwâsi fu Yosef ben e kon moro ogri. Fosi, a ben de wan srafu di en masra ben e frutrow, ma now a ben de na strafu-oso.

8. Fu san wi kan de seiker awinsi fa wan tesi e kon ogri?

⁸ Oiti yu ben de na ini wan muilek situwâsi di ben kon moro ogri aladi yu ben e begi fayafaya? Dati kan pasa. Yehovah no e kibri wi gi tesi di e miti wi na ini a grontapu disi di Satan e tiri (1 Yoh. 5:19). Toku wi kan de seiker taki Yehovah sabi ala sani di e pasa nanga wi èn taki a e broko en ede nanga wi (Mat. 10:29-31; 1 Petr. 5:6, 7). Boiti dati, a pramisi wi: „Mi no o libi yu kwetikweti èn noiti mi o gowe fu yu” (Hebr. 13:5). Yehovah kan yepi wi fu horidoro awinsi fa a gersi leki nowan howpu de gi wi. Meki wi luku fa a ben yepi Yosef.

9. San e sori taki Yehovah ben de nanga Yosef di a ben de na strafu-oso? (Genesis 39:21-23)

⁹ Leisi Genesis 39:21-23. Awinsi fa a situwâsi no ben makelek na ini a strafu-oso, Yehovah ben e meki sani waka bun gi Yosef. Fa a du dati? Baka wan pisi ten, na edeman fu a strafu-oso bigin frutrow Yosef neleki fa Potifar ben e frutrow en. A no langa baka dati, na edeman fu a strafu-oso poti Yosef fu luku ala den tra strafuman. Fu taki en leti, Bijbel e taki dati „na edeman fu a strafu-oso no ben abi fu broko en ede kwetikweti nanga nowan wroko di Yosef ben e du”. Now Yosef ben abi wan wroko di a ben kan du. Dati ben de wan kenki di a no ben fruwakti. Fa wan strafuman di sma ben taki dati a ben wani verkracht a wefi fu wan edeman ben kan kisi so furu frantwortu? Na wán piki nomo de. Soleki fa Genesis 39:23 e sori, dan „Yehovah ben de nanga Yosef. Yehovah meki ala sani di Yosef ben e du, waka bun.”

10. Fruteri fu san ede Yosef no ben e firi leki ala sani ben e waka bun gi en.

¹⁰ Pruberi fu poti yusrefi baka na ini a situwâsi fu Yosef. Baka di den lei gi en èn poti en na strafu-oso, yu denki taki a ben e firi leki ala sani ben e waka bun gi en? San Yosef ben wani? A ben wani taki na edeman fu a strafu-oso feni en bun? No, Yosef ben wani kon fri. A ben aksi wan tra strafuman srefi di ben o kon fri fu taki nanga Farao gi en so taki en srefi ben kan komoto na strafu-oso (Gen. 40:14). Ma a man no taki nanga Farao wantewante. A bakapisi na taki Yosef ben musu tan na strafu-oso ete tu yari (Gen. 40:23; 41:1, 14). Toku Yehovah ben tan meki sani waka bun gi Yosef. Fa a du dati?

11. Sortu spesrutu sani Yehovah meki Yosef du èn fa a sani dati meki a wani fu Yehovah kon tru?

¹¹ Di Yosef ben de na strafu-oso ete,  Yehovah meki a kownu fu Egepte kisi tu dren di ben trobi en. Farao ben wani sabi san den dren disi ben wani taki. Di a kownu kon yere taki Yosef ben man fruklari den dren gi en, a seni kari en. Yehovah yepi Yosef fu fruklari den dren gi kownu èn kownu ben breiti nanga a rai di a ben gi en. Farao ben man si taki Yehovah ben de nanga a yonkuman disi. Dati meki a poti en fu prati nyanyan gi den sma fu Egepte (Gen. 41:38, 41-44). Te fu kaba, na angriten no ben de na ini Egepte wawan ma owktu na ini Kanan, a kondre pe den famiri fu Yosef ben e libi. Now Yosef ben abi a makti fu yepi en famiri fu no dede fu angri èn na so fasi a famiri fu pe a Mesias ben o komoto no ben o kisi pori.

12. Na sortu fasi Yehovah meki sani waka bun gi Yosef?

¹² Prakseri ala den sani di ben pasa na ini Yosef en libi. Suma meki Potifar poti prakseri na Yosef, di a ben de wan srafu nomo? Suma meki na edeman fu a strafu-oso poti prakseri na Yosef, di a ben de wan strafuman? Suma meki Farao kisi dren di ben e trobi en? Èn suma meki Yosef fruklari den dren dati? Suma meki Farao poti Yosef fu prati nyanyan gi den sma fu Egepte? (Gen. 45:5) A no de fu taki dati na Yehovah ben meki ala den sani di Yosef ben e du, waka bun. Aladi den brada fu Yosef ben wani kiri en, toku Yehovah kenki a situwâsi dati fu meki a wani fu En pasa.

13. Yehovah e kibri wi gi ibri situwâsi di e miti wi? Fruklari dati.

¹³ San wi kan leri fu a tori fu Yosef? Yehovah e kibri wi gi ibri situwâsi di e miti wi? A e meki ibri ogri sani di wi miti na ini wi libi, waka bun? No, Bijbel no e leri wi dati (Preik. 8:9; 9:11). Ma san wi sabi na disi: Te wi e kisi fu du nanga wan tesi, dan Yehovah sabi san e miti wi èn a e yere wi te wi e bari kari en fu yepi wi (Ps. 34:15; 55:22; Yes. 59:1). Boiti dati, Yehovah kan yepi wi fu horidoro. Fa a e du dati?

14. Fa Yehovah e yepi wi na ini muilek ten?

 ¹⁴ Wan fasi fa Yehovah e yepi wi, na taki a e trowstu wi èn a e gi wi deki-ati. Furu tron a e du dati na a yoisti ten (2 Kor. 1:3, 4). Na so a ben de nanga Eziz, wan brada fu Turkmenistan di ben musu koti tu yari strafu fu a bribi fu en ede. A e taki: „Na a mamanten di mi ben musu go na krutu, wan brada ben sori mi a tekst fu Yesaya 30:15. Drape e taki: ’Efu unu wani de tranga, dan a wan-enkri sani di un musu du na fu tan tiri èn frutrow na mi tapu.’ A tekst disi yepi mi fu no bruya èn fu frutrow tapu Yehovah na ini ala sani. A heri pisi ten di mi ben de na strafu-oso, na a tekst disi ben e yepi mi.” Yu kan prakseri wan ten na ini yu libi di Yehovah trowstu yu èn gi yu deki-ati di yu ben abi dati fanowdu trutru?

15-16. San wi kan leri fu na ondrofenitori fu Sisa Tori?

¹⁵ Furu tron a de so taki te wan tesi kon na wan kaba, dan fosi wi e si fa Yehovah yepi wi. Wan sisa di nen Tori e taki dati a sani dati tru. En manpikin Mason ben abi kanker siksi yari langa èn a dede te fu kaba. A no de fu taki dati Tori ben sari srefisrefi. A taki: „Disi ben de a moro muilek situwâsi gi mi leki mama.” A taki tu: „Mi de seiker taki ala papa nanga mama o agri nanga mi taki a e hati moro fu si fa yu pikin e pina, leki te yu srefi e pina.”

¹⁶ Aladi a ben hati Tori srefisrefi fu si fa en manpikin e pina, toku a ben man si fa Yehovah yepi en fu horidoro. A e taki: „Te mi e denki baka san pasa, dan mi si fa Yehovah yepi mi di mi manpikin ben e siki srefisrefi. Fu eksempre, aladi  fisitiman no man kon luku Mason te a ben e siki srefisrefi, toku brada nanga sisa ben e rèi tu yuru langa fu kon na a ati-oso. Ala ten brada nanga sisa ben de drape fu yepi wi èn fu gi wi deki-ati. Boiti dati, den brada nanga sisa fu wi ben e sorgu gi ala den sani di wi ben abi fanowdu. Awinsi fa a situwâsi no ben makelek son leisi, toku wi ben abi ala den sani di wi ben abi fanowdu.” Yehovah ben gi Tori san ben de fanowdu fu horidoro èn a yepi Mason tu fu tai hori na en te na dede.​—Luku a faki „ Yehovah gi wi soifri san wi ben abi fanowdu”.

17-18. San kan yepi wi fu si èn fu warderi a fasi fa Yehovah e yepi wi na ini muilek ten? (Psalm 40:5)

¹⁷ Leisi Psalm 40:5. A marki fu wan sma di e kren wan bergi na taki a wani doro na a ede fu a bergi. Ma te a e kren a bergi a kan stop na omeni presi fu luku den moi sani na en lontu. Na a srefi fasi wi musu teki a ten fu denki fa Yehovah e yepi wi aladi wi e kisi fu du nanga wan tesi. Na a kaba fu ibri dei, yu kan aksi yusrefi: ’Na sortu fasi Yehovah blesi mi tide? Fa Yehovah yepi mi fu horidoro aladi a tesi fu mi de ete?’ Luku efu yu man si awinsi wán fasi fa Yehovah meki sani waka bun nanga yu.

¹⁸ A kan taki yu e begi taki a tesi fu yu kon na wan kaba. Wi e frustan dati èn dati na wan bun sani (Fil. 4:6). Ma wi no musu frigiti fu teri den blesi di wi e kisi nownow. Boiti dati, Yehovah pramisi wi taki a o tranga wi èn taki a o yepi wi fu horidoro. Sobun, de nanga tangi taki Yehovah de nanga yu. Neleki Yosef yu o man si fa Yehovah o meki sani waka bun gi, awinsi yu e kisi tesi.​—Gen. 41:51, 52.