1-2. a) Nagnino ro fa haintika tie tsy maintsy hiatreke olagne tika? b) Ino ty hodinehentikagne ato?

 FA haintika tie tsy maintsy hiatreke olagne tika. Hoe ty Baiboly: “Tsy maintsy miatreke haoreagne maro tika vaho izay ho tafilitse amy i Fanjakàn’Andrianagnaharey ao.” (Asa. 14:22) Haintikagne ka fa misy olagne ila’e tsy ho voavaha naho tsy le amy tontolo vaovao agne. Agne zao vaho “tsy hisy sasa ty fate, ty alahelo ndra ty toreo ndra ty fanaintaignagne.”​—Apok. 21:4.

² Tsy miaro antika mba tsy ho azo o lozao ty Jehovah. Faie ampea’e tika mba hahavita hiaretse irey. Mareho ty raha nirehafe i apostoly Paoly tamo o Kristiana ta Roma agneo toy. Nirehake ty olagne sambe karaza’e natrehe’e naho o rahalahi’e rehoe heike ty Paoly. Ie naho fa niavy eo, le izao ty nisorate’e: “Miakatse ho mpandrese amy izay iaby tikagne, satria magnampe antika i tea antikagney.” (Rom. 8:35-37) Trea amy io fa afake magnampe azo ty Jehovah ndra tie tsy afake aza ty olagne mahazo azo fa eo avao. Andao tika handineke ty fomba nagnampea i Jehovah i Josefa naho ty fomba agnampea’e azo.

3. Ino ty fiovagne tampoke nisy tamy ty fiaigna i Josefa?

³ Trea tamy ty raha natao i Jakoba fa tena nitea’e mandikoatse i ana’e ila’e rey ty Josefa. (Gen. 37:3, 4) Nanjare nialogna i zoke’e rey areke ty Josefa noho ze raha zay. Naho fa  nahatrea hirike iareo, le navily iareo tamo o mpivarotse midianitao ty Josefa. Nindese o mpivarotse rehoe ta Ejipta agne ty Josefa. Ie naho fa niavy agne reke, le navily iareo tamy i Potifara, i sefo ty mpiambegne i Faraoy. Tena niova tampoke ty fiaigna i Josefa. Teo reke niarake tamy i baba’e tena nitea azey, faie amy izao reke lasa o ndevo a Ejipta agne.​—Gen. 39:1.

4. Ino ty raha va’e hanjò antika?

⁴ Rehafe ty Baiboly tie “va’e ho voan-draha amy ty andro tsy ampoize’e” o ndatio. (Mpito. 9:11) Misy fotoagne tika manjare sahiragne, satria miatreke olagne ‘mpahazo o ndatio.’ (1 Kor. 10:13) Ndra va’e hijale ka tika noho itika mpiana i Jesosy. Va’e hisy ndaty ohatse hikizake, hanohetse naho hagnenjeke antika noho ty raha inoantikagne. (2 Tim. 3:12) Faie ndra inogn’ino raha sarotse atrehe’o, le matokia rehe fa afake magnampe azo ty Jehovah. Akore zao ty nagnampea’e i Josefa?

5. Ino ty fagnatsoahan-keve i Potifara miomba ze raha natao i Josefa? (Genesisy 39:2-6)

⁵ Vakio ty Genesisy 39:2-6. Nivoamare i Potifara fa tanora mahira-tsaigne naho tea miasa ty Josefa. Nihay i Potifara ka ty anto’e nahavy izay. Nitrea i Potifara tie ‘natao i Jehovah nitomombagne iaby ze raha natao’ i Josefa. b Nanjare mpanompo natokisa o Ejipsiana iohoe ty Josefa tamy ty fara’e. Tinendre’e mba hiandraikitse ze tan-tragno’e tao iaby ka ty Josefa. Le ino ty nivoka izay? Tsy nisy raha nampiasa loha i Potifara sasa.

6. Ino ty raha va’e ho nitsapa i Josefa noho ty raha nanjò aze?

⁶ Mba alao sare an-tsaigne heike ty raha va’e ho nitsapa i Josefa tamy izay. Ino ty raha tena nipaliave’e? Nivoamare i Potifara vao zay, le nimei’e aze? Azo inoagne fa tena nitea i Josefa zao naho nivotsoragne reke, amy izay afake noly aman-drae’e agne. Maregne ka fa nanagne tombotsoa maro reke tan-tragno i Potifara ao, faie mbe nindevo reke sady mpanompo sampy o tompo’e iohoe. Tsy nanao ze hagnafaha i Potifara i Josefa ty Jehovah. Vao mainke niharaty aza ty raha niaigna’e.

7. Nagnino ro rehafegne tie vao mainke niharaty ty raha niaigna i Josefa? (Genesisy 39:14, 15)

⁷ Rehafe ty Genesisy toko faha-39 fa nitea i valy i Potifaray ty Josefa, sady lava nitaone’e mba handre ama’e avao ka reke. Faie lava niliere i Josefa avao reke isake tie nanao izay. Niboseke i ampelay tamy ty fara’e, le natao’e kitomboke ty Josefa tie nao fa ho namahotse aze zao. (Vakio ty Genesisy 39:14, 15.) Naho fa nirey i Potifara ze raha zay, le nalefa’e tam-pirizò agne ty Josefa. Le tagne avao reke tagnate ty taogne maromaro. (Gen. 39:19, 20) Nanao akore i pirizò nisy azey? Ty rehake hebreo nadika tihoe “pirizò”, le azo adika tihoe “lavake.” Trea amy izay fa naiegne naho tena nahakivy ty tagnate’e tao. (Gen. 40:15; f.a.p.) Rehafe ty Baiboly ka fa nisy fotoagne nirohizagne seny ty tombo’e, le nisiagne seny ty tam-bozo’e teo. (Sal. 105:17, 18) Vao mainke nindra ty haraty ty raha nahazo i Josefa. Nanjare ndevo ie mba ni-mpanompo natokisagney.

8. Ino ty raha atokisantika ndra tie vao mainke miharaty aza ty raha mahazo antika?

⁸ Fa nisy fotoagne vao rehe nisahiragne le nivavake mafe faie ndra vao mainke niharaty ty raha nahazo azo? Miseho ty raha hoe izay kindraike. Tsy miaro antika amy ze raha raty va’e hiseho amantika amy ty tontolo fehe i Satana toy eto ty Jehovah. (1 Jaona 5:19) Faie afake matoky rehe tie ony i Jehovah soa ty raha iaigna’o, sady tena midare azo reke. (Mat. 10:29-31; 1 Pet. 5:6, 7) Fa nampitamà hoe izao ka reke: “Tsy hienga azo raho, sady tsy hahafoe azo.” (Heb. 13:5) Afake magnampe azo hahavita hiaretse ty Jehovah ndra tie hoe fa tsy misy azo tamaegne sasa zay aza ty raha mahazo azo. Andao tika handineke ty fomba nanoa’e izay tamy i Josefa.

9. Ino ty manoro fa nitahy i Josefa ty Jehovah tamy ireke tamy i pirizò agney? (Genesisy 39:21-23)

⁹ Vakio ty Genesisy 39:21-23. Nampea i Jehovah ty Josefa, ndra tie tena nimafe aza ty raha niaigna’e tam-pirizò tao. Nanjare natokisa ty lahibey i figadragney naho nihajae’e ty Josefa, nanahake ty raha niaigna’e tamy ie tamy i Potifara taoy. Tamy ty fara’e, le nankine i lahibey i figadragney tama’e iaby ze gadra tao. Rehafe ty Baiboly tie ‘tsy nisy raha nampinekoneko i lahibey i figadragney sasa tamy ze raha nankigne’e tamy i Josefa.’ Nanjare nisy raha nifantohagne amy izay zao ty Josefa satria nisy asa natao’e. Tena tsy nampoize’e ze fiovagne zay! Aia ka ty nisy ndaty ginadra noho ireke natao kitomboke tie fa ho namahotse ty valy ty manamboninahitse zao ro hahazo andraikitse hoe izay? Tsy misy ankoatse itoy ty anto’e. Hoe ty Genesisy 39:23: “Nitahie i Jehovah ty Josefa, sady natao’e tomombagne iaby ze raha natao’e.”

10. Hazavao tie nagnino ty Josefa ro va’e nahatsapa tie tsy nitomombagne ze raha natao’e.

¹⁰ Alao sare an-tsaigne indraike heike ty raha nitsapa i Josefa. Nieretseretse vao reke tie nitomombagne iaby ze raha natao’e, ie amy izao reke taloha io nisy nanao kitomboke le ginadra? Ino ty tena nipaliave i Josefa? Ty hahazo sitrake tamy i lahibey i figadragney vao? Ty raha hoe tena azo inoagne, le nitea i Josefa naho nivotsoragne reke. Ie aza nangatake tamy i gadra raike ho votsoragney mba hirehake tamy i Farao hagnakatse aze boake am-pirizò ao. (Gen. 40:14) Faie ndra tsy nirehake tamy i Farao i lahilahỳ naho fa nakaregne. Ty voka’e, nijanogne tam-pirizò tao tagnate ty roe taogne fagnampe’e ty Josefa. (Gen. 40:23; 41:1, 14) Faie mbe nagnampe  aze avao ty Jehovah. Amy ty fomba akore?

11. Ino ty fahaiagne nimey i Jehovah i Josefa, le nagnino io ro nagnampe tamy ty fagnatanterahagne ty fikasà i Jehovah?

¹¹ Tamy i Josefa tam-pirizò aoy, le natao i Jehovah ze hahavy i mpanjaka i Ejiptay hagninofy. Nampivali-doha aze o nofi’e roe rehoe, le tena nitea’e ho hay ty dika’e. Naho fa nihay i mpanjakay tie mahay magnazava ty dika o nofio ty Josefa, le nampagala’e. Nampea i Jehovah ty Josefa, le nivita’e ty nagnazava i nofy rey, sady tena naharese lahatse i Farao ty torohevetse nirehafe’e. Nitrea i Farao fa nitahy o lahilahy tanora iohoe ty Jehovah, hafarà’e ie ty tinendre’e hiandraikitse ty hanegne iaby ta Ejipta agne. (Gen. 41:38, 41-44) Nisy keré mafe naho fa tafara tatoy, le tsy i Ejipta avao ty niazo’e fa ndra i Kanana ka, i tane nitoboha ty keleia i Josefay. Afake namonje i keleia’e rey ty Josefa amy izao, sady nanjare nivoaro ty taranake hiavia i Mesiay noho ze raha natao’e zay.

12. Akore ty fomba nagnampea i Jehovah i Josefa?

¹² Mba dineho heike ty raha niseho tamy ty fiaigna i Josefa. Ia ty nahavy i Potifara hahamareke i Josefa tamy ie nindevoy? Ia ty nahavy i lahibey i figadragney hankasitrake i Josefa, tamy ie nigadray? Ia ty nahavy i Farao hagninofy naho nagnomey i Josefa fahaiagne hagnazava ty dika i nofy rey? Ia ty nandrisike i Farao hanendre i Josefa mba hiandraikitse ze hanegne iaby ta Ejipta tagne? (Gen. 45:5) Tsy isalasalagne fa i Jehovah ro nahavy ze raha natao i Josefa ho tomombagne. Ndra tie nité hamono i Josefa aza i rahalahi’e rey, le novà i Jehovah mba hagnatanterahagne ty zoton’arofo’e i raha natao iareoy.

13. Miaro antika amy ze hene raha va’e hanjò antika vao ty Jehovah? Hazavao.

¹³ Ino ty ianarantika boake amy ty tantara i Josefa? Manao raha mba hikalagnagne ze hene raha va’e hahazo antika vao ty Jehovah? Atao’e vao ze hampisy raha raty amy ty fiaignantika, le avy eo i raha rey ovà’e amy izay misy anto’e soa ty nisehoa’e? Oho’o, tsy mampianatse izay ty Baiboly. (Mpito. 8:9; 9:11) Faie izao ty raha haintikagne: Naho fa misy raha sarotse manjò antika, le ony i Jehovah igne sady mijanjigne antika reke naho  fa itika mipay fagnampeagne ama’e. (Sal. 34:15; 55:22; Isaia 59:1) Ankoatse izay, le afake magnampe antika mba hahavita hiaretse reke. Amy ty fomba akore?

14. Akore ty agnampea i Jehovah antika naho fa itika miatreke olagne?

¹⁴ Agnisa ty fomba raike agnampea i Jehovah antika ty fampionognagne naho ty fampaherezagne mei’e antika, sady mateteke ro amy ty fotoagne tena ipaliantikagne aze ty anoa’e izay. (2 Kor. 1:3, 4) Izay zao ty raha nitsapa i rahalahy Eziz, toboke a Turkménistan agne. Nivoaheloke higadra tagnate ty roe taogne reke, satria tsy nimete hanao maramila. Hoe reke: “Tamy ty maraindray i andro hitsaràgne ahikey, le nisy rahalahy zay nanoro ahy ty Isaia 30:15. Izao ty rehafe o andinin-teny io: ‘Hatanjake nareo naho tony avao sady feno toky.’ Nagnampe ahy ho tony avao naho hitoky amy i Jehovah amy ze kila raha o andinin-teny io. Nisaintsaigneko avao io, le izay ty tena nagnampe ahy hiaretse tagnate i fotoagne nigadrakoy.” Fa nisy fotoagne vao rehe nipay fagnampeagne mafe, le nagnampe azo ty Jehovah tamy izay sady nampionogne naho nampahery azo?

15-16. Ino ty ianara’o boake amy ty raha niaigna i Tori?

¹⁵ Mateteke ro fa afake i olagne nahazo antikagney vaho tsapantika tie nagnampe antikagne ty Jehovah. Izay zao ty raha nitsapa i rahavave Tori. Nivoa ty kansera ty Mason ana-dahi’e, le nitsaboegne tagnate ty enen-taogne. Nimate ty Mason tafara izay. Tena nalahelo ty Tori tamy izay. Hoe reke: “Amy ty maha rene ahy, le io ty raha fara izay ty mafe natreheko.” Hoe ka reke: “Mino raho fa magneke o rae aman-dreneo tie ndra aleoleo’e ihe ro mijale ta tie ty ana’o.”

¹⁶ Tena nalahelo mafe ty Tori naho fa nahatrea ty fijalea i ana-dahi’ey. Faie izao ty rineha’ e naho fa nisaintsaigne ty fomba nagnampea i Jehovah aze reke tafara tatoy: “Naho fa misaintsaigne i fotoagne rey raho, le nitsapako tie nagnampe ahy ty Jehovah tamy i ana-dahikoy nararey. Ndra tie tsy afake nahita o ndaty nitilike azeo ohatse ty Mason tamy ie narare mafey, le nandeha nitilike anay o rahalahio naho o rahavaveo ndra tie lavitse aza i lapotaly nisy anaỳ. Lava nisy rahalahy naho rahavave nanohagne anay avao ty tey. Nagnomey ze raha nipaliave’ay ara-nofo ka iareo. Nisy fotoagne aza zahay tena nisahiragne, faie lava nahazo ze raha nipaliave’ay avao.”  Nimey i Jehovah i Tori naho i Mason ze raha nipaliave iareo mba hahavità iareo hiaretse.

17-18. Ino ty hagnampe azo hahafantatse naho hankasitrake ty fanohagna i Jehovah azo tamy ihe niatreke raha sarotsey? (Salamo 40:5)

¹⁷ Vakio ty Salamo 40:5. Ty ho avy an-dengo o vohitseo ey ty tanjo o ndaty mpanganike vohitseo. Faie maro ty toeragne azo’e ijanognagne, mba hitofagne kede ndra hagnentea’e raha soasoa. Hoe izay ka ty toko’e hatao’o. Manokàgna fotoagne tsy tapake mba handineha’o ty fomba nagnampea i Jehovah azo, mba hahavità’o hiatreke ty olagne mahazo azo. Saintsaigno zao isake hariva: ‘Ino tamy ty raha niseho tandroany ro ahatreavako fa nagnampe ahy ty Jehovah? Ndra tie mbe eo aza i olagney, akore ty agnampea i Jehovah ahy mba hahavitako hiaretse aze?’ Hotrea’o fa hisy raha raike farafahatsiampe’e manoro tie nagnampe azo ty Jehovah.

¹⁸ Va’e nangatake ty mba hiafaha i olagne mahazo azoy rehe. Ara-dalàna zay sady mete. (Fil. 4:6) Faie tsy toko’e ho halignontikagne ka ty fitahiagne fa azontika amy izao. Ankoatse izay, i Jehovah le mampitamà tie hagnomey hery naho hagnampe antika mba hahavitantikagne hiaretse. Ankasitraho lognandro areke ty fanohagna i Jehovah azo. Hotrea’o amy izay fa magnampe azo Reke, ndra tie miatreke olagne aza rehe, manahake ty natao’e tamy i Josefa.​—Gen. 41:51, 52.