1-2. (a) Wai na yumi no kirap nogut olsem yumi save karim ol hevi? (b) Yumi bai stori long wanem samting long dispela atikol?

 YUMI ol lain bilong Jehova, yumi no kirap nogut taim yumi karim ol hevi. Yumi save long tok Baibel i mekim olsem: “Bilong i go insait long Kingdom Bilong God, yumi mas karim planti hevi.” (Apo. 14:22) Na tu, yumi save olsem sampela hevi bilong yumi i no inap pinis olgeta i go inap long taim yumi stap long nupela taim em God i kamapim, long dispela taim “bai i no gat dai moa, na [yumi] bai i no bel hevi moa na krai moa, na [yumi] bai i no inap pilim pen gen.”​—Rev. 21:4.

² Jehova i no save banisim yumi long ol hevi. Maski i olsem, em i save helpim yumi long sanap strong na karim ol dispela hevi. Lukim tok aposel Pol i mekim long ol Kristen i stap long Rom. Pastaim, em i kolim ol hevi we em yet na ol bratasista bilong em i karim. Bihain, em i tok: “Long rot bilong dispela man husat i bin laikim yumi tumas, yumi save winim tru olgeta dispela samting.” (Rom 8:35-37) Dispela i makim olsem Jehova i ken helpim yu long sanap strong taim yu wok yet long karim hevi. Yumi ken stori long hau Jehova i bin helpim Josep long sanap strong na hau Em inap helpim yu.

3. Wanem senis i kamap wantu tasol long laip bilong Josep?

³ Bilipman Jekop i soim klia olsem em i laikim tru pikinini man bilong em Josep. (Stt. 37:3, 4) Dispela i mekim na ol bikpela pikinini man bilong Jekop i jeles long brata bilong ol. Taim ol i lukim rot i op, ol i salim Josep long sampela bisnisman bilong lain Midian. Ol dispela bisnisman i kisim Josep inap planti  handret kilomita i go long Isip, long dispela hap ol i salim Josep gen—ol i salim em long Potifar, em ofisa bilong Fero na kepten bilong ol gad. Wantu tasol laip bilong Josep i senis, pastaim em i stap olsem pikinini em papa i laikim tru, tasol nau em i stap olsem wokboi nating bilong wanpela man Isip!​—Stt. 39:1.   

4. Yumi inap bungim wanem kain ol hevi?

⁴ Baibel i tok: “Taim nogut . . . , i save painim olgeta” man. (Ekl. 9:11) Sampela taim yumi save bungim ol hevi “i save kamap long olgeta man”—em ol kain hevi we olgeta man i save karim. (1 Kor. 10:13) O yumi inap karim hevi bikos yumi ol disaipel bilong Jisas. Olsem, ol man inap tok bilas long yumi, birua long yumi, o mekim nogut long yumi bikos long bilip bilong yumi. (2 Tim. 3:12) Maski wanem hevi yu karim, Jehova inap mekim yu sanap strong na karim dispela hevi. Hau em i helpim Josep long mekim olsem?

5. Potifar i luksave olsem husat i wok long helpim Josep? (Stat 39:2-6)

⁵ Ritim Stat 39:2-6. Potifar i luksave olsem Josep em wanpela yangpela man i gat gutpela save na em i man bilong wok hat. Na tu, Potifar i save long risen bilong dispela samting. Em i lukim olsem “olgeta samting Josep i mekim, Jehova i wok long mekim i kamap gutpela.” b I no longtaim, dispela man Isip i mekim Josep i kamap wokman bilong em. Na tu, em i makim Josep long bosim olgeta samting long haus bilong em. Wanem samting i kamap? Potifar i kisim biknem.

6. Josep inap pilim olsem wanem long hevi i painim em?

⁶ Traim long tingim hau Josep i bin pilim. Em i laikim wanem samting moa winim olgeta samting? Yu ting em i laik bai Potifar i luksave long wok bilong em na givim namba long em? Ating Josep i laik bai ol i lusim em i go fri so em i ken go bek long papa bilong em. Maski Josep i bosim ol samting long haus bilong Potifar, em i stap yet olsem wanpela wokboi nating aninit long dispela bosman i no lotuim Jehova. Jehova i no mekim samting bilong kirapim Potifar long lusim Josep i go fri. Na ol samting long laip bilong Josep i laik i go nogut moa.

7. Long wanem rot hevi bilong Josep i go nogut moa? (Stat 39:14, 15)

⁷ Olsem i stap long Stat sapta 39, meri bilong Potifar i laikim Josep na planti taim em i traim long pulim Josep long slip wantaim em. Long olgeta wan wan taim em i mekim olsem, Josep i sakim em. Bihain, em i belhat nogut tru long Josep na em i sutim tok long Josep olsem em i traim long reipim em. (Ritim Stat 39:14, 15.) Taim Potifar i harim dispela, em i putim Josep long kalabus, na Josep i stap long hap inap sampela yia. (Stt. 39:19, 20) Laip long kalabus i olsem wanem? Dispela tok Josep i yusim olsem “kalabus,” long tok Hibru em inap makim “hul insait long graun,” na dispela i soim olsem hap Josep i stap long en i tudak nogut tru na i no gat rot long kisim helpim. (Stt. 40:15; ftn.) Na tu, Baibel i tok ol i pasim ol sen long lek bilong Josep na ol i pasim ol ain long nek bilong em. (Sng. 105:17, 18) Hevi bilong Josep i go nogut moa. Pastaim em i stap olsem wanpela wokboi em ol i trastim na nau em i kamap wanpela kalabusman i no gat nem.

8. Taim wanpela hevi i go nogut moa, yumi ken save tru long wanem samting?

⁸ Yu bin bungim wanpela hevi we i go nogut moa maski yu beten strong long dispela hevi i mas pinis? Dispela samting inap kamap. Jehova i no save banisim yumi long ol hevi long dispela graun em Satan i bosim. (1 Jon 5:19) Tasol yu ken save tru long dispela samting: Jehova i save long hevi yu wok long karim, na em i save wari tru long yu. (Mat. 10:29-31; 1 Pita 5:6, 7) Na moa yet, em i promis olsem: “Mi no inap tru long lusim yu, na mi no inap givim baksait long yu.” (Hib. 13:5) Jehova inap helpim yu long sanap strong na karim hevi maski yu pilim olsem i no gat rot. Yumi ken stori long hau dispela samting i bin painim Josep.

9. Wanem samting i soim olsem Jehova i stap wantaim Josep taim em i bin stap long kalabus? (Stat 39:21-23)

⁹ Ritim Stat 39:21-23. Laip bilong Josep i hatwok moa taim em i stap long kalabus, tasol Jehova i bin helpim em. Hau? Sampela haptaim bihain, ofisa bilong kalabus i trastim Josep na rispektim em, wankain olsem Potifar i bin mekim. I no longtaim, ofisa bilong kalabus i makim Josep long lukautim ol narapela kalabusman. Baibel i tok: “Ofisa bilong kalabus i no wari long ol wok Josep i lukautim.” Nau Josep i gat wok long mekim, na em i bisi long mekim olsem. Em narapela kain senis i bin kamap! Olsem wanem wanpela kalabusman em ol i sutim tok long em olsem em i bin traim long reipim meri bilong wanpela ofisa i kamap wanpela man em ol i trastim tru? I gat wanpela risen tasol long dispela samting i kamap. Olsem Stat 39:23 i tok: “Jehova i stap wantaim Josep, na Jehova i mekim na olgeta samting em i mekim i kamap gutpela.”

10. Stori long wai na Josep inap pilim olsem olgeta samting em i mekim i no kamap gutpela.

¹⁰ Traim tingim gen hau Josep i bin pilim. Bihain long ol i sutim tok long em na putim em long kalabus, yu ting em i pilim olsem olgeta samting em i mekim i kamap gutpela? Josep i laikim wanem samting moa winim olgeta narapela samting? Yu ting em i laik bai ofisa bilong kalabus i laikim em? Ating Josep i laik bai ol i luksave olsem em i no gat asua na ol i ken lusim em i go fri. Em i bin askim tu wanpela narapela kalabusman em klostu nau ol bai lusim em i go fri long makim maus bilong em na askim Fero long lusim em i go fri. (Stt. 40:14) Tasol taim dispela man i lusim kalabus em i no hariap long i go tokim Fero. Olsem na Josep i stap long dispela kalabus inap 2-pela yia moa. (Stt. 40:23; 41:1, 14) Maski i olsem, Jehova i wok yet long helpim Josep. Hau em i helpim em?

11. (a) Jehova i givim wanem save long Josep? (b) Olsem wanem dispela i helpim Josep long inapim samting Jehova i tingting pinis long mekim?

 ¹¹ Taim Josep i stap long kalabus, Jehova i mekim na king bilong Isip i kisim 2-pela narakain driman we i mekim em i pret nogut tru. Fero i laik tru long save ol dispela driman i makim wanem samting. Taim king i painimaut olsem Josep i gat save long tokaut long ol driman, em i tokim ol long kisim em i kam. Jehova i helpim Josep, na em i kamapim mining bilong ol driman bilong Fero na ol tok em i kamapim long Fero i mekim em i kirap nogut. Fero i lukim olsem Jehova i stap wantaim dispela yangpela man, olsem na em i makim Josep long bosim wok bilong tilim kaikai long olgeta hap bilong Isip. (Stt. 41:38, 41-44) Bihain, bikpela hangre i kamap long Isip na long Kenan tu, em hap we famili bilong Josep i stap long en. Nau Josep i gat rot long seivim famili bilong em na long dispela rot em bai lukautim lain em Mesaia bai kamap long en.

12. Long wanem ol rot Jehova i mekim ol samting Josep i mekim i kamap gutpela?

¹² Tingim ol narakain samting i kamap long laip bilong Josep. Husat i kirapim Potifar long luksave long Josep, em wanpela wokboi nating? Husat i kirapim ofisa bilong kalabus long laikim Josep, em wanpela kalabusman i no gat nem? Husat i kamapim 2-pela narakain driman long Fero we i mekim em i pret nogut tru na givim save long Josep long kamapim mining bilong ol dispela driman? Husat i kirapim Fero long makim Josep olsem bosman bilong tilim kaikai long Isip? (Stt. 45:5) Em i klia tru, Jehova i mekim ol samting Josep i mekim i kamap gutpela. Maski ol brata bilong Josep i laik kilim em i dai, Jehova i yusim dispela olsem rot bilong inapim samting Em i tingting pinis long mekim.

13. Yu ting Jehova i save stiaim olgeta samting i painim yumi? Stori long dispela.

¹³ Yumi kisim wanem skul long stori bilong Josep? Yu ting Jehova i save stiaim olgeta samting i painim yumi? Yu ting em i save stiaim olgeta samting long laip bilong yumi na bai olgeta samting nogut i painim yumi i kamapim gutpela samting? Nogat, Baibel i no tok olsem. (Ekl. 8:9; 9:11) Tasol yumi save long dispela samting: Taim yumi bungim wanpela  hevi, Jehova i luksave long dispela na em i save harim ol beten yumi mekim bilong kisim helpim. (Sng. 34:15; 55:22; Ais. 59:1) Na moa yet, Jehova i ken helpim yumi long sanap strong na karim ol hevi. Hau em inap mekim olsem?

14. Olsem wanem Jehova i save helpim yumi long taim bilong hevi?

¹⁴ Wanpela rot Jehova i save helpim yumi em long rot bilong mekim isi bel bilong yumi na strongim yumi, na planti taim em i save mekim olsem long taim stret. (2 Kor. 1:3, 4) Dispela em samting i bin kamap long Eziz, em wanpela brata long Turkmenistan, kot i bin salim em i go stap 2-pela yia long kalabus bikos long bilip bilong em. Em i tok: “Long moning long de bilong kot bilong mi, wanpela brata i soim mi Aisaia 30:15, we i tok: ‘Yupela bai kamap strong sapos yupela i stap isi na trastim mi.’ Oltaim dispela ves i save helpim mi long stap isi na trastim Jehova long olgeta samting. Mi tingim tingim long bel dispela ves na em i helpim mi long dispela haptaim mi bin stap long kalabus.” Yu inap tingim wanpela taim long laip bilong yu we Jehova i bin helpim yu na mekim isi bel bilong yu taim yu nidim stret helpim?

15-16. Yu kisim wanem skul long ekspiriens bilong Tori?

¹⁵ Planti taim, yumi save luksave long hau Jehova i bin helpim yumi taim hevi bilong yumi i pinis. Wanpela sista nem bilong em Tori, em i luksave olsem dispela samting em i tru. Pikinini man bilong em Mason i bin karim hevi bilong sik kensa inap 6-pela yia i go inap long em i dai. Dispela i bin mekim Tori i bel hevi tru. Em i tok: “Olsem wanpela mama, dispela samting i mekim mi bel hevi moa winim ol narapela samting.” Em i tok moa: “Mi save olsem ol narapela papamama inap wanbel olsem taim yu lukim pikinini bilong yu i karim hevi, dispela inap mekim yu bel hevi moa winim sapos yu yet i karim dispela hevi.”

 ¹⁶ Tori i bin bel hevi tru long dispela taim, tasol bihain em i tingim ol rot Jehova i bin helpim em long karim dispela hevi. Em i tok: “Taim mi tingim bek dispela taim, mi inap lukim hau Jehova i bin helpim mipela taim pikinini bilong mi i sik. Olsem, long ol taim we Mason i sik nogut tru na em i no inap long lukim ol visita, ol bratasista i save draiv inap 2-pela aua i kam long haus sik. Olgeta taim wanpela brata o sista i save stap long risepsen—redi long givim helpim. Na tu, ol bratasista i lukautim mipela long ol samting bilong skin em mipela i nidim. Na long ol taim we mipela i pilim hatwok tru, mipela i no save sot long wanpela samting.” Jehova i givim strong em Tori i nidim bilong sanap strong na karim hevi, na em i mekim olsem tu long Mason.​—Lukim blok “ Jehova i Givim Mipela Samting Mipela i Nidim.”

17-18. Wanem samting bai helpim yumi long luksave na amamas long helpim Jehova i givim yumi long taim bilong hevi? (Buk Song 40:5)

¹⁷ Ritim Buk Song 40:5. Wanpela man bilong kalapim maunten i save putim mak olsem em bai i go antap long het bilong maunten. Tasol i gat planti hap long rot we em i ken stop na lukim ol naispela samting. Wankain olsem, planti taim yu ken lusim haptaim long stop na tingim hau Jehova i wok long helpim yu taim yu karim wanpela hevi. Long pinis bilong olgeta wan wan de, askim yu yet: ‘Long wanem rot mi lukim blesing bilong Jehova long nau? Maski mi karim yet hevi, hau Jehova i wok long helpim mi long sanap strong na karim hevi?’ Tingim wanpela blesing i kam long Jehova we i helpim yu long sanap strong.

¹⁸ Em tru olsem, ating yu wok long beten long hevi bilong yu i mas pinis. Em orait long yu mekim olsem na i stret long yu mekim olsem. (Fili. 4:6) Tasol yumi mas luksave tu long ol blesing yumi kisim long nau. Bikpela samting em Jehova i tok promis long strongim yumi na helpim yumi long sanap strong na karim hevi. So no ken tru lusim tingting olsem Jehova i wok long helpim yu. Taim yu mekim olsem, yu bai luksave long hau Jehova i wok long helpim yu long mekim ol samting yu mekim i kamap gutpela, na em inap mekim olsem tu long taim bilong ol bikpela hevi, olsem em i bin mekim long Josep.​—Stt. 41:51, 52.