1, 2. a) ¿Andijtsïnisï no ísku pakatajki engachi tsʼéjkukuechani jatsiajka? b) ¿Ambeerichi uandani jaua ini jorhenguarhikua jimbo?

 JUCHANTSÏNI engachi Tata Diosï Jeobaeri marhuariika, nójtsïni ísku pakatasïndi engachi tsʼéjkukuechani jatsiajka. Jimboka Biblia arhisïnga: “Uétarhisïndi eskachi mámaru ambe tekaantsparini inchaaka Diosïiri juramukuarhu” (Uku. 14:22). Ístuchi míteska eskaksï máru juchaari uandanhiateecha, jimbanhi parhakpinirkuksïsï uaaka sési niántani, nani enga nóteru jauakia “uarhikua, ka ni uandanhiata, ka enga nóteru nema uera[aka] o pʼamenchani” (Jaŋ. 21:4).

² Tata Diosï Jeoba jurajkusïndi eskachi tsʼéjkukuechani jatsiauaka, perujtsïni jarhuatasïndi parachi úni tekaantani. Ju je exeni ambe ma enga apostoli Pablu arhiapka imani kristianuechani engaksï Roma irekapka. Enga na uandapkia imani uandanhiateecheeri engaksï imeeri erachiicha ka enga ístu ima nitamakuarhini japka, arhiaspti: “Iámindu ambe jimbo jucha andapiti uérasïnga imani jimbo engajtsïni xáni kánikua uékajka” (Rom. 8:35-37). I ambe arhikuekasïndi eska Tata Diosï Jeoba úsïnga eskajtsïni sési nicheaka, nájkirukachi tsʼéjkukua ma jimbo nitamakuarhini jauaka. Ju je exeni ambe enga úpka Tata Diosï paraka Joséni iámindu ambe sési uérakupiringa ka néna engajtsïni uaaka jarhuatani iásï juchantsïni.

3. ¿Néna niáraspi Joséeri tsípikua ma repentku mójtakurhini?

³ Iáminduechaksï mítespti eska Jakobu kánikua xénchasïreenga imeeri uájpa Joséni (Gén. 37:3, 4). Ísï jimbo, Joséeri ermanu jémbeecha engaksï sánderu kʼériipka ueenasptiksï enbidia pʼikuarherani. Ka jiáni engaksï úpka ísï úni, íntspikuarhisptiksï Madiani  anapu komersiantiichani máru. Ima achamasïichaksï Ejiptu páspti Joséni, enga kánikua iauani japka jima uératini. Ka jimaksï íntspikuarhintaspti Potifarini enga orhejtsïkuauenga imeechani engaksï faraonini kuájchakuenga. Joséeri tsípikua ma repentku mójtakurhispti; orheta imeeri taati kánikua xénchasïreendi joperu tátsekua jántspirku máesptia Ejiptu (Gén. 39:1).

4. ¿Náki uandanhiateechanchi úpirini jatsiani engaksï sáno májkueni járhaka eska imeecha enga José jatsiapka?

⁴ Biblia uandasïndi eska “méntkisï úkuarhisïnga ambe ma enga ma no erokuarhijka” (Ecl. 9:11). Ménichanchi imani uandanhiateechani jatsiasïnga engaksï iámindu kʼuiripuecha nitamakuarhiajka (1 Kor. 10:13). O jamberijtsïni kʼuiripuecha teresmarhujti, nójtsïni jurajkuni parachi Tata Diosïni marhuakuni, ojtsïni no sési kamani jimbokachi Jesúsiiri chúxapatiiska (2 Tim. 3:12). Ambe uéjki jimbochi nitamakuarhini jarhani, Tata Diosï Jeoba uaati úni eskajtsïni sési nicheaka. Ju je exeni néna enga jarhuatapka Joséni.

5. ¿Ambeeri kuenta íntskukuarhespi Potifari? (Génesis 39:2-6).

⁵ (Arhinta je Génesis 39:2-6). Potifari exespti eska José tumbi máespka enga jánhastiipka ka ánchikuarhiriini. Ka kurhanguspti andisï xásïipi. Kuenta íntskukuarhespti eska “Tata Diosï Jeoba, José jingoni jarhaspka ka eska Tata Diosï Jeoba úsïreenga eska iámindu ambe enga ima ueenga sési uérakupiringa”. b Ísï tátsekua, Potifari úspti eska José imani jingoni jámapiringa para jarhuatani ka imani erakuspti paraka kuidaripiringa iámu imeeri kʼumanchikuani. Enga Potifari ísï úpka, niáraspti uánikua kóntperateechani jatsiani.

6. ¿Na pʼikuarhereeni José imani ambe jimbo enga nitamakuarhini japka?

⁶ Ju je eranhaskani na enga pʼikuarherapka José. ¿Ambesï sánderu uékeeni ima? ¿Eska Potifari sési exepiringa ka íntskuni ambe ma? Jamberi ambe enga José sánderu uékeenga, jindeespti libreeni ka kʼuanhatsentani imeeri taati jémbeeri kʼumanchikuarhu. Nájkiruka José uánikua pribilejiuechani jatsiapka Potifariiri kʼumanchikuarhu, José útasï jántspiri máespti achamasïiri ma enga máteru diosïichani kómarhiauenga. Tata Diosï Jeoba no úspti eska Potifari jurajkupiringa Joséni. Ka tátsekua José niáraspti sánderu no sési nitamakuarhini.

7. ¿Andichisï uandajki eska José sánderu no sési nitamakuarhixapka? (Génesis 39:14, 15).

⁷ Eska na uandajka Génesis kapitulu 39, Potifariiri témba tsitisïreendi Joséni ka mémindu arhispti eska imani jingoni apondipiringa. Peru José méntkisï arhisïreendi eska no ísï úpiringa. Potifariiri témba xáni ikiaspti José jingoni enga jamberi uandapka eska José uékasïreenga biolariini (arhinta je Génesis 39:14, 15). Enga Potifari mítepka ini ambe, ónhatarkuarhispti Joséni ka ima jima pakaraspti máru uéxurhini (Gén. 39:19, 20). Ka ¿néna jándespi jima enga José ónhakata japka? Uandakua enga José úrapka ebreu jimbo para kárselini arhikuekani, ístu tradusirinhasïndi komueska “posu ma” o “pila ma”. I ambe arhikuekasïndi eska jima kánikua pápkʼandespka ka eska no sési pʼikuarherakuarhisïreenga jima jarhani (Gén. 40:15, nota). Ístu, Biblia uandasïndi eska ma tiempu jimbo, Josénksï jóndukuspka ka jójchakuni kadeneecha jingoni (Sal. 105:17, 18). José sánderu no sési nitamakuarhixaptia; jántspiri máespti enga mintsinharhikuepka ka tátsekua ónhakata jarhasptia.

8. ¿Ambeerichi uaa seguru jarhani nájkirukachi sánderu no sési nitamakuarhini jauaka?

⁸ ¿Ménisïchi niáraski uandanhiata ma jatsini enga sánhani arhipka sánderu kʼéni nájkirukachi jucha kánikua kómarhipka Tata Diosïni? Úpiringachi indeni ambe úkuarhinchani. Tata Diosï Jeoba no úsïndi eskachi no jatsiauaka tsʼéjkukuechani ini parhakpini jimbo enga Satanási juramuni jaka (1 Juanu 5:19). Peruchi uaaka seguru jarhani eska juchaari taati, jingontku jarhaska imani ambe jingoni engachi nitamakuarhijka ka eska uandanhiasïnga juchantsïni jimbo (Mat. 10:29-31; 1 Ped. 5:6, 7). Ístu, arini ambejtsïni aiachisti: “Jíkeni no méni késtakuchiaka ka níjtukini méni jurajkuni jandiajku” (Ebr. 13:5). Tata Diosï Jeobaeri jarhuajperata jingoni, uaakachi orhepani uérakuni imani ambe enga ísï xarharajka enajki kánikua kʼéri ambee. Meru inde ambesï nitamakuarhipti José.

9. ¿Ambe xarhatasïni eska Tata Diosï Jeoba, José jingoni jarhaspka jiáni enga ima kárselirhu japka? (Génesis 39:21-23).

⁹ (Arhinta je Génesis 39:21-23). Nájkiruka José kánikua no sési nitamakuarhini japka, Tata Diosï Jeoba úspti eska sési nikupiringa. ¿Néna? Úspti eska tiempu jingoni kárselirhu anapu orhejtsïkuti mintsikapiringa ka janhanharhini Joséni ísï eska na úpka Potifari jingoni ka no ióndaspti arhini Joséni eska ima orhejtsïkuapiringa máteruechani engaksï ónhakata japka. Ka Biblia uandasïndi eska “ima enga kárselini orhejtsïkuenga no ma ambe pendienti pásïreen[ga] ima ambeeri enga Joséni jurajkukupka para exeni”. Ini ambe jimbo, iásï José jatsisptia ánchikuarhita ma enga jarhuatapka máteru ambe eratseni. ¿A no eskajtsïni i ambe ísku pakatasïnga? ¿Néna úpirini achamasï ma enga arhinhapka eska uékaspka biolariini acheetiiri témbani ma enga juramukuarhu ánchikuarhienga, xáni kánikua juramukua intsïnhani? Génesis 39:23 arhisïndijtsïni andisï ísï úkuarhipi: “Tata Diosï Jeoba, José jingoni jarhasp[ti] ka Tata Diosï Jeoba úsïreendi eska iámindu ambe enga ima ueenga sési uérakupiringa”.

10. ¿Andisï José úpirini eratseni eska no iámindu ambe sési uérakuxapka?

¹⁰ Ju je ménderu eratsentani na enga pʼikuarhereenga José. Engaksï ísï chkuanderakua ambe jauatakupka ka ónhanksï, ¿eratsepi eska iámindu ambe sési uérakuxapka?, ¿ambesï sánderu uékeeni José?, ¿jindeepi eska kárselirhu anapu orhejtsïkuti sési exepiringa? Jamberi ambe enga José sánderu uékeenga, jindeespti eska arhinhapiringa eska ima no no sési ambe niátaspka ka eska petanhantapiringa kárselirhu. Asta kurhakuspti acheetini ma enga petanhantapka kárselirhu eska uandontskuarhekupiringa faraonini imeeri ambe paraka petantapiringa kárselirhu enga xáni no sési nitamakuarhini japka (Gén. 40:14). Peru jimboka inde acheeti  ióndaspka uandontskuarhekuni faraonini Joséeri ambe, ima útasï tsimani uéxurhini pakaraspti kárselirhu (Gén. 40:23; 41:1, 14). Peru Tata Diosïiri jarhuajperata jimbo, Joséni seguiriispti sési nikuni. ¿Néna úkuarhispi inde ambe?

11. ¿José ambe úsïreeni úni Tata Diosï Jeobaeri jarhuajperata jimbo, ka i ambe néna jarhuajpespi paraka úkuarhipiringa ambe enga Tata Diosï eratsetini japka?

¹¹ Enga José útasï ónhakuarhetini japka, Tata Diosï Jeoba úspti eska Ejiptu anapu juramuti, tsimani tsánharhikuechani jatsiapiringa engaksï kánikua uandanhiatapka. Faraoni uékaxapti míteni ambeksï arhikuekaasïreeni inde tsánharhikuecha. Ísï jimbo, enga mítepka eska José úpiringa aianguni ambe engaksï arhikuekeenga tsánharhikuecha, pʼitajkuarhispti. Tata Diosï Jeobaeri jarhuajperata jingoni, José no solu aianguspti ambe engaksï arhikuekeenga tsánharhikuecha, sino ístu arhispti ambe enga jatsipka para úni. Inde ambe ísku pakataspti faraonini. Ka enga kuenta íntskukuarhepka eska Tata Diosï Jeoba jarhuatasïreenga ini tumbini, erakuspti paraka ima exepiringa iámu Ejiptu anapu tʼirekueri ambe (Gén. 41:38, 41-44). Ísï tátsekua, kʼéri kʼarhingua ma jarhaspti Ejiptu ka ístu Kanaáni jima enga Joséeri familia irekapka. Joperu jimboka iásï José juramukua jatsispkia, úpirindia jarhuatani imeeri familiani. Tiempu jingoni imeechaksï niárapirindi jindeeni ima familia enga jimbo Mesíasi jupiringa.

12. ¿Ambe úspi Tata Diosï Jeoba paraka Joséni sési nikupiringa?

¹² Ju je eratsentani ambe enga xáni nitamakuarhipka José. ¿Né úspi eska Potifari sési exepiringa Joséni, enga ima jántspiri máepka? ¿Né úspi eska kárselirhu anapu orhejtsïkuti arhipiringa Joséni eska ima orhejtsïkuapiringa máteruechani engaksï ónhakata japka? ¿Né úspi eska faraoni tsánharhikuechani jatsiapiringa ka né jarhuataspi Joséni paraka mítepiringa ambe engaksï arhikuekeenga tsánharhikuecha? ¿Né úspi paraka José erakunhapiringa para exeni Ejiptu anapu tʼirekueri ambe? (Gén. 45:5). Iámindu i ambe xarhatasïndi eska Tata Diosï Jeoba úspka eska iámindu ambe enga José ueenga sési uérakupiringa. Tata Diosï Jeoba no jurajkuspti eskaksï Joséeri ermanu jémbeecha uándikupiringa. Sánderu sési, úspti ambe ma paraka úkuarhipiringa ambe enga ima uékeenga.

13. ¿Tata Diosï Jeoba úsïni ambe ma méni engachi nitamakuarhini jarhajka ambe ma jimbo?

¹³ ¿Ambechi jorhenguarhisïni imani ambe jingoni enga José nitamakuarhipka? Eska Tata Diosï Jeoba no úsïnga ambe ma méni engachi  nitamakuarhini jarhajka ambe ma jimbo. Ka eska no úsïnga eskachi no sési nitamakuarhiaka solu parachi jorhenguarhini ambe ma (Ecl. 8:9; 9:11). Peru jarhasti ambe ma engachi jimbo seguru jaka: eska jiáni engachi uandanhiata ma jatsijka, Tata Diosï Jeoba jingontku jarhasïnga iámindu ambe jimbo ka eska kurhaasïnga jiáni engachi mintsita jingoni kurhakujka eskajtsïni jarhuataaka (Sal. 34:15; 55:22; Is. 59:1). Ka ístujtsïni jarhuatasïndi parachi úni orhepani uérakuani uandanhiateechani. ¿Néna ísï úsïni?

14. ¿Nénajtsïni jarhuatasïni Tata Diosï Jeoba jiáni engachi no sési nitamakuarhini jarhajka?

¹⁴ Tata Diosï Jeobajtsïni mémindu uinhaperantasïndi ka sésijtsïni pʼikuastani jiáni engachi meru uétarhinchani jarhajka (2 Kor. 1:3, 4). Meru indeni ambesï exepti erachi Eziz enga Turkmenistán anapueka engaksï tsimani uéxurhini ónhapka kárselirhu imeeri jakajkukuecha jimbo. Ima uandantasïndi: “Imani tsípa jimbo engani jusgarinhapiringa erachirini ma exeraspti ambe enga arhijka Isaías 30:15, jimini arhisïndi: ‘Chájtsï uinhapiti jauaka engajtsï no sáni chéska ka engajtsï mintsinharhikua xarhataska’. I amberini jarhuataspti parani no xáni uandanhiani ka parani mintsikani Tata Diosï Jeobani. Eratsentani ini karakatani jarhuatasptireni parani úni tekaantani iámindu imani tiempu engani ónhakata japka”. ¿Miásïnchi na engajtsïni Tata Diosï Jeoba uinhaperantapka ka sési pʼikuastantani, meru jiáni engachi uétarhinchani japka?

15, 16. ¿Ambechi jorhenguarhisïni ima ambeeri enga Tori nitamakuarhipka?

¹⁵ Sáno méntkisï, nóchi kuenta íntskukuarhesïnga na engajtsïni jarhuatapka Tata Diosï Jeoba engachi no sési nitamakuarhini japka, sino asta jiáni enga na sési niántajkia iámindu ambe. Pirenchi ma enga Tori arhinhajka ústi exeni eska i ambe meru ísïiska. Imeeri uájpa Mason seisi uéxurhini kánseri pʼamenchaspti ka enga 14 jatiripkia uarhispti. Ini ambe jimbo, Tori kánikua kómu pʼikuarheraxapti. Ima uandasïndi: “No ma ambe jarhasti enga sánderu no sési pʼikuastajka  naandini ma eska uarhiranchani sapini ma”. Ka ístu uandasïndi: “Seguru jarhaska eskaksï iámindu taatiicha májkueni eratsesïnga eska ji, eska sánderu no sésiiska exeni eska juchaari sapi ma no sési nitamakuarhixaka ka eska juchajku mismu no sési nitamakuarhini jarhani”.

¹⁶ Nájkiruka Tori kánikua no sési nitamakuarhipka, ísï tátsekua eratsentaspti ambe enga xáni úpka Tata Diosï Jeoba para jarhuatani. Ima uandasïndi: “Engani miántajka ambe engani nitamakuarhipka, úsïnga exeni eskarini Tata Diosï Jeoba xénchperakua jingoni kuidarispka iámu indeni tiempu enga juchiiti sapi pʼamenchani japka. Pori ejemplu, erachiichaksï asta tsimani ora biajarisïreendi paraksï ospitalirhu niárani, nájkiruka Mason no ueenga imeechani jingoni uandontskuarheni jimboka kánikua no sési pʼikuarherani jarhasïreenga. Ospitalirhu, méntkisï jarhasïreendi nema parajtsïni jarhuatani. Ka ístujtsïni jarhuataspti sentabu jingoni. Asta jiáni engachi kánikua no sési nitamakuarhini japka, nóchi méni kueratanchaspka ambe ma”. Tata Diosï Jeoba íntskuspti Torini ka Masonini ambe engaksï xáni uétarhincheenga paraksï úni tekaantani (exe je rekuadruni “ Tata Diosï Jeobajtsïni íntskusti meru imani ambe engachi uétarhincheenga”).

17, 18. ¿Ambejtsïni jarhuataa exeni ka agradeserikuni ambe enga újka Tata Diosï Jeoba parajtsïni jarhuatani jiáni engachi uandanhiata ma jatsijka? (Salmo 40:5).

¹⁷ (Arhinta je Salmo 40:5). Enga nema kʼumanchikua ma úni jarhajka, ambe enga uéjka jindeesti kʼamarani ka jima irekani. Peru enga úni jarhajka, anhaxurhisïndi ka exesïndi na enga xáni kánikua úkia. Sáno májkueni, juchajtuchi jatsiska para anhaxurhini ka eratsentani na engajtsïni Tata Diosï Jeoba jarhuatani jaka parachi úni orhepani uérani engachi no sési nitamakuarhini jarhajka. Enga na kʼamarakia jurhiatikua ma, ju je kurhamarhikuarhini: “¿Nénarini kóndeski iásï Tata Diosï Jeoba? Nájkirukani útasï no sési nitamakuarhini jaka, ¿ambe úxaki Tata Diosï parareni jarhuatani tekaantani?”. Ju je jánguarhintani pauani pauani exeni sikiera ma ambe enga Tata Diosï Jeoba úka parajtsïni kóndentani.

¹⁸ Tata Diosï Jeoba no no sési exesïndi ka kurhanguchisïndijtsïni engachi kurhakujka eskajtsïni kénditacheaka uandanhiatani engachi nitamakuarhini jarhajka (Filip. 4:6). Peru ju je no mirikurhiani kóntperatechani engachi iásï jatsiani jaka. Jimboka ambe uéjkichi nitamakuarhini jarhani, Tata Diosï Jeobajtsïni aiachisïndi eskajtsïni íntskuaka uinhapikua ka eskajtsïni jarhuataaka parachi úni tekaantani. Ísï jimbo, ju je méntkisï agradeserikuni Tata Diosï Jeobani imani ambe jimbo enga újka parajtsïni jarhuatani. Engachi ísï úska, exeakachi eskajtsïni Tata Diosï Jeoba jarhuataxaka parajtsïni sési nicheni jiáni jamberi engachi uandanhiateechani jatsiajka ísï eska na úpka José jingoni (Gén. 41:51, 52).