1-2. (a) Kaia e se ‵poi ei tatou māfai ko fe‵paki mo fakalavelave? (e) Ne a mea ka sau‵tala tatou ki ei i te mataupu tenei?

 E PELĀ me ne tino o Ieova, e se ‵poi tatou māfai ko fe‵paki mo fakalavelave. E iloa ne tatou me fai mai te Tusi Tapu, “e ‵tau mo tatou o ulu atu ki loto i te Malo o te Atua e auala i puapuaga e uke.” (Galu. 14:22) E iloa foki ne tatou me e se mafai o faka‵lei katoatoa a nisi fakalavelave o tatou ke oko ki te taimi ko ola tatou i te lalolagi fou a te Atua, telā “ka se toe ai se mate, ka se toe ai foki se fanoanoa, se tagi io me se ‵mae.”—Faka. 21:4.

² E se puipui ne Ieova tatou mai fakalavelave. Kae e fesoasoani mai a ia ke kufaki tatou. Mafaufau ki pati a te apositolo ko Paulo ki Kelisiano kolā ne ‵nofo i Loma. Muamua la, ne taku atu ne ia a fakalavelave kolā ne fe‵paki mo ia mo ana taina. Oti aka tusi mai ei a ia: “Ko o‵mai eiloa tatou mo te manumalo katoatoa i mea katoa konei e auala i a ia telā ne alofa mai ki a tatou.” (Loma 8:35-37) Ko tena uiga e mafai eiloa ne Ieova o fai ne ia koe ke manuia faitalia me koi fepaki koe mo te fakalavelave tenā. Ke onoono tatou ki te auala ne fesoasoani atu a Ieova ki a Iosefa ke manuia mo te auala e mafai o fesoasoani mai a Ia ki a tatou.

3. Ne mafuli fakavave pefea te olaga o Iosefa?

³ Ne lavea faka‵lei atu a te lasi o te alofa o te toeaina ko Iakopo ki tena tama ko Iosefa. (Kene. 37:3, 4) Ona ko te mea tenā ne loto ma‵sei a tama ma‵tua a Iakopo ki te lotou taina. I te mauaga  ne latou te avanoaga, ne fakatau atu ne latou a Iosefa ki tino faipisinisi mai Mitiana. Ne ave ne tino faipisinisi a Iosefa i se fia selau kilomita te ‵mao ki Aikupito, kae toe fakatau atu ne latou ki a Potifala, te takitaki o leoleo a te Falao. Ne mafuli fakavave te olaga o Iosefa, mai se tama fakapelepele a tena tamana ki se pologa fatauva a se tino Aikupito!—Kene. 39:1.

4. E mafai pefea o fe‵paki tatou mo se tulaga faigata e pelā mo Iosefa?

⁴ E fai mai te Tusi Tapu me “i mea ma‵sei e ‵tupu ki tino katoa.” (Fai. 9:11, Holy Bible—Easy-to-Read Version) I nisi taimi e fe‵paki tatou mo tulaga faiga‵ta kolā e “masani o oko atu ki tino”—telā ko fakalavelave kolā e fe‵paki mo tino katoa. (1 Koli. 10:13) Io me kāti e logo‵mae fua tatou me i a tatou ko soko o Iesu. E pelā me se fakaakoakoga, e mafai o fakatauemu mai, ‵teke mai, io me fakasaua tatou ona ko te ‵tou fakatuanaki. (2 Timo. 3:12) Faitalia me se a te fakalavelave e fepaki mo koe, e mafai ne Ieova o fai ne ia ke manuia koe. Ne fai pefea ne ia te mea tenā ki a Iosefa?

5. Se a te mea ne fakaiku aka ne Potifala me ko te pogai ne manuia ei a Iosefa? (Kenese 39:2-6)

⁵ Faitau te Kenese 39:2-6. Ne lavea ne Potifala a te atamai mo te galue malosi o te tamataene ko Iosefa. Kae ne iloa foki ne ia te pogai ne fai ei a ia penā. Ne lavea ne Potifala me “ne fai ne Ieova ke manuia faeloa [a Iosefa].” b Fakamuli ifo, ne fai ne te tagata Aikupito tenā a Iosefa mo fai tena tavini. Ne ‵tofi foki ne ia a Iosefa ke pule i tena fale kātoa. Ne a mea ne iku mai i ei? Ne maua ne Potifala a fakamanuiaga.

6. E mata, ne pefea a lagonaga o Iosefa ki te tulaga ne fepaki mo ia?

⁶ Mafaufau me tu koe i te tulaga o Iosefa. Se a te mea ne manako malosi a ia ki ei i lō nisi mea aka? E mata, ke lauiloa kae ke maua sena taui mai i a Potifala? E mautinoa me ne manako malosi a Iosefa ke fakasaoloto a ia kae toe foki atu ki tena tamana. Kae ui ei, faitalia a tauliaga e uke ne maua ne ia i te fale o Potifala, ne tumau eiloa Iosefa i te fai pelā me se pologa ki tena matai telā se tino fapaupau. Ne seki fai ne Ieova ke fakasaoloto ne Potifala a Iosefa. Kae ka gasolo eiloa o masei atu te tulaga o Iosefa.

7. I auala fea ne gasolo aka ei te tulaga o Iosefa mai te masei ki te masei atu? (Kenese 39:14, 15)

⁷ E ‵tusa mo te tala i te Kenese mataupu 39, ne fiafai te avaga a Potifala ki a Iosefa kae ne taumafai faeloa o fakakolekole tou tagata. Kae ne seki talia ne Iosefa ana taumafaiga katoa konā. Fakamuli ifo, ne kaitaua malosi tou fafine ki a Iosefa kae ‵losi atu me ne taumafai a Iosefa o pukemālō tou fafine. (Faitau te Kenese 39:14, 15.) I te logoga a Potifala i te mea tenā, ne ‵pei ne ia Iosefa ki te falepuipui mō se fia tausaga. (Kene. 39:19, 20) Ne pefea te tulaga i te falepuipui? A te pati Epelu telā ne fakaaoga ki te “falepuipui” ne nofo i ei a Iosefa e mafai o fakauiga ki se “vaikeli,” io me se “lua,” e fakaasi mai i ei a te pouli tagataga o te koga tenā kae ne mafaufau a ia me ko seai sena fakamoemoega. (Kene. 40:15; fml.) E se gata i ei, e fai mai foki te Tusi Tapu me ne ‵loka a vae o Iosefa ki seni kae saisai tena ua ki filifili. (Sala. 105:17, 18) Ne gasolo eiloa te tulaga o Iosefa mai te masei ki te masei atu. Ne ‵fuli tena olaga mai se pologa fakatalitonugina ki se pagota se aoga.

8. Kafai foki loa e gasolo o masei atu se fakalavelave, se a te mea e mafai o mautinoa i a tatou?

⁸ Kai fepaki koe mo se tulaga faigata telā ne vau mai te masei ki te masei atu faitalia au ‵talo e uke ne fai? E mafai o tupu se mea penā. E se puipui ne Ieova tatou mai fakalavelave i te lalolagi telā e pule ne Satani. (1 Ioane 5:19) Kae e mafai o mautinoa i a koe te mea tenei: E iloa ‵lei ne Ieova a mea fe‵paki mo koe kae atafai a ia ki a koe. (Mata. 10:29-31; 1 Pe. 5:6, 7) E se gata i ei, ne tauto mai a ia: “Ka se tiaki lele eiloa ne au a koe, kae ka se tuku tiaki lele eiloa ne au a koe.” (Epe. 13:5) E mafai o fesoasoani atu a Ieova ke kufaki koe faitalia me foliga mai me ko seai se aoga o tou tulaga. Ke onoono tatou me ne tupu pefea te mea tenā ki a Iosefa.

9. E lavea atu pefea me ne fakatasi atu eiloa a Ieova ki a Iosefa i te falepuipui? (Kenese 39:21-23)

⁹ Faitau te Kenese 39:21-23. Ke oko foki loa ki te ‵toe tulaga faigata i te falepuipui, ne fai ne Ieova ke manuia a Iosefa. E pefea la? Fakamuli ifo, ne kamata o talitonu kae āva a te pule o te falepuipui ki a Iosefa, e pelā eiloa mo te mea ne tupu ki a Potifala. E seki leva kae fai ne te pule o te falepuipui ke pule atu a Iosefa ki pagota katoa. A te ‵tonuga loa, e fai mai te Tusi Tapu me “ko seai eiloa se mea e tausi ne te pule o te falepuipui.” Nei la, ko isi ne mea e mafai o fakalavelave i ei te mafaufau o Iosefa—ko galuega aoga. Se ‵fuliga vave eiloa! Ne mafai pefea o maua ne se pagota telā ne ‵losi atu me ne pukemālō ne ia a te avaga a te takitaki o leoleo, se tulaga fakatalitonugina penei? E tasi fua te fakamatalaga ki ei. E fai mai te Kenese 39:23, “ne fakatasi atu faeloa a Ieova ki a Iosefa kae ne fai ne Ieova ke iku manuia katoa a mea kolā e fai ne ia.”

10. Fakamatala mai a te pogai ne seki mafaufau a Iosefa me ko manuia a ia i mea katoa.

¹⁰ Ke toe mafaufau me tu koe i te tulaga o Iosefa. Mai tua o ‵losiga ‵se ne fai ki a ia mo te ‵pei atu ki te falepuipui, se a tau faka‵tau e mata, ne mafaufau a ia me ne manuia a ia i mea katoa? Se a te mea ne manako malosi a Iosefa ki ei i lō nisi mea aka? E mata, ke maua ne ia te taliaga a te pule o pagota? Kāti ne manako malosi a Iosefa ke fakasaoloto kae ‵tala mai te falepuipui. Ne fakamolemole atu a ia ki te suā pagota telā ko pili o ‵tala ke fai atu ki te Falao a mea e uiga ki a ia ko te mea ke tapale keatea a ia mai te tulaga masei tenā i te falepuipui. (Kene. 40:14) Kae ne seki faipati te pagota tenā ki te Falao i te taimi tenā. Tenā ne toe nofo Iosefa i loto i te falepuipui mō se suā lua tausaga. (Kene. 40:23; 41:1, 14) Kae ko Ieova ne tumau eiloa  i te fai ne ia ke manuia tou tagata. E pefea la?

11. Se a te atamai fakapito ne tuku atu ne Ieova ki a Iosefa, kae ne fesoasoani atu pefea a te mea tenei ke fakataunu i ei a te fuafuaga a Ieova?

¹¹ Kae koi ‵pei a Iosefa i te falepuipui, ne fai ne Ieova ke isi ne moemiti e lua a te tupu o Aikupito kolā ne fai ei ke se toka tena mafaufau. Ne manako malosi a te Falao ke iloa ne ia te uiga o moemiti konā. I te iloaga ne te tupu me mafai ne Iosefa o fakamatala a uiga o moemiti, ne uga tena fekau ke vau a ia. Ona ko te fesoasoani o Ieova ne mafai ne Iosefa o fakamatala a moemiti konā kae ne fiafia te Falao ki manatu fakatonutonu ne tuku atu ne ia. I te laveaga ne ia me fakatasi atu a Ieova ki te tamataene tenā, ne fakasopo ne te Falao a Iosefa ke pule i te fakasoaatuga o meakai i Aikupito kātoa. (Kene. 41:38, 41-44) Fakamuli ifo, ne poko se oge meakai telā ne seki pokotia fua i ei a Aikupito kae penā foki mo Kanana, te fenua telā e ‵nofo i ei a te kāiga o Iosefa. Ko tu atu nei a Iosefa i te tulaga telā ko mafai o faka‵sao ne ia a tena kāiga e penā foki mo te gafa telā ka sae mai i ei te Mesia.

12. I auala fea ne fai ei ne Ieova ke manuia a mea e fai ne Iosefa?

¹² Mafaufau la, ki mea fakaofoofogia ne ‵tupu i te olaga o Iosefa. Ko oi ne fai ne ia a Potifala ke saga tonu ki a Iosefa, telā se pologa se taulia? Ko oi ne fai ne ia te pule o pagota ke fiafia ki a Iosefa, telā se pagota fatauva? Ko oi ne fai ne ia ke isi ne moemiti a te Falao kae ke mafai ne Iosefa o fakamatala a moemiti konā? Ko oi ne fakamalosi ne ia a te Falao ke fakasopo a Iosefa ke pule i te fakasoaatuga o meakai i Aikupito? (Kene. 45:5) E manino ‵lei me ko Ieova ne fai ne ia ke manuia a mea katoa e fai ne Iosefa. I te fakaotiga, ne ‵fuli ne Ieova a te togafiti matagā a taina o Iosefa ke fai mo fai se auala ke fakataunu i ei a Tena loto.

13. E mata, e pule mai a Ieova ki so se mea e tupu ki ‵tou olaga? Fakamatala mai.

¹³ Ne a mea e mafai o tauloto ne tatou mai te tala o Iosefa? E mata, e pule mai a Ieova ki so se mea e tupu ki a tatou? E mata, e fulifuli ne ia mea ‵tupu i ‵tou olaga ko te mea ke mafau‵fau a tino me isi se pogai ‵lei e ‵tupu i ei a mea ma‵sei? Ikai, e se akoako mai i te Tusi  Tapu a te manatu tenā. (Fai. 8:9; 9:11) Kae tenei te mea e iloa ne tatou: Kafai ko fe‵paki tatou mo se fakalavelave, e lavea ne Ieova te mea tenā kae lagona ne ia a ‵tou ‵tagi mō se fesoasoani. (Sala. 34:15; 55:22; Isa. 59:1) Kae sili atu i ei, e mafai o fesoasoani mai a Ieova ke kufaki tatou mo te manuia i tulaga faiga‵ta. E pefea la?

14. E fesoasoani mai pefea a Ieova ki a tatou i taimi faiga‵ta?

¹⁴ E tasi o auala e fesoasoani mai a Ieova ki a tatou ko te tukumaiga o fakamafanafanaga mo fakamalosiga, maise i te taimi telā e ma‵nako malosi tatou ki ei. (2 Koli. 1:3, 4) Tenā te mea ne tupu ki a Eziz, se taina i Turkmenistan telā ne fakasala ki se lua tausaga i te falepuipui ona ko tena fakatuanaki. “I te taeao ne tu ei au ki te fono,” ko ana pati, “ne fakaasi mai ne se taina a te Isaia 30:15, telā e fai mai penei: ‘A te malosi o koutou ko te otou ‵nofo filemu kae fakaasi atu te loto talitonu.’ Ne fesoasoani mai faeloa te fuaiupu tenei ke nofo filemu au kae fakalagolago ki a Ieova i so se mea. A te mafaufau ‵loto ki te fuaiupu tenei ne fesoasoani mai ki a au i te taimi kātoa ne ‵pei ei au i te falepuipui.” E masaua ne koe se taimi i tou olaga ne fesoasoani atu a Ieova e auala i te tukuatuga o fakamafanafanaga mo fakamalosiga i te taimi eiloa telā ne manako malosi koe ki ei?

15-16. Ne a au mea ne tauloto mai te tala o Tori?

¹⁵ E masani o lavea ne tatou a te fesoasoani o Ieova ke kufaki i se tulaga faigata, māfai ko oti atu a te tulaga faigata tenā. Ne lavea ne te tuagane ko Tori a te ‵tonu o te mea tenā. Ne masaki a tena tama tagata ko Mason i te kenisa mō se ono tausaga ke oko ki te taimi ne malōlō atu ei mai te olaga nei. E maina tatou me ne mafatia malosi a Tori. Ne fai mai tou fafine, “Ailoga e isi se suā mea aka telā e sili atu tena logo‵mae penei mo te mea ne fepaki mo au, e  pelā me se mātua.” Ne toe fai mai tou fafine, “E talitonu au me lotoma‵lie a nisi mātua me e sili atu te masei ke kilo atu ki tau tama e logo‵mae i lō te logo‵mae e mafai o maua ne koe.”

¹⁶ Faitalia te logo‵mae o Tori i te tulaga tenā, kae fakamuli ifo ne fakaasi mai ne ia a auala ne fesoasoani atu a Ieova ki a ia ke mafai o kufaki. “Kafai e mafaufau au ki te taimi tenā,” ko ana pati, “e lavea ne au a te alofa o Ieova i te taimi ne masaki ei taku tama. E pelā mo taimi ko tō masaki ei a Mason ke āsi atu ne tino ki a ia, kae ne faima‵laga mai eiloa a taina mo tuagane i se leva e lua itula ke oko mai ki te fakaimasaki. Ne isi faeloa se tino e toka o fesoasoani kae ‵lago mai ki a māua. E se gata i ei, ne maua faeloa ne māua a mea faka-te-foitino e manakogina. Ke oko foki loa ki toe taimi faiga‵ta, ne maua eiloa a mea e ma‵nako māua ki ei.” Ne tuku atu ne Ieova a mea e manakogina ne Tori ke kufaki, kae penā foki ki a Mason.—Onoono ki te pokisi “ Ne Tuku Mai ne Ieova a Mea Kolā ne Manakogina ne Māua.”

17-18. Ne a mea ka fesoasoani mai ke lavea kae loto fakafetai tatou ki te fesoasoani o Ieova i taimi o fakalavelave? (Salamo 40:5)

¹⁷ Faitau te Salamo 40:5. A te tino kake mauga e taumafai ke oko a ia ki te taulu o te mauga. Kae i te taimi e kake ei a ia, e mānava tou tagata i nisi koga ke onoono ki mea ‵gali e lavea ne ia. I se auala tai ‵pau, ke mānava malie faeloa o mafaufau ki te auala ne fesoasoani atu a Ieova ke manuia koe, faitalia foki loa me kufaki koe i se tulaga faigata. I te fakaotiga o aso takitasi, ke fesili ifo penei: ‘I auala fea ne lavea ne au a fakamanuiaga a Ieova i te aso nei? Faitalia eiloa me koi tumau te tulaga faigata tenei, ne fesoasoani mai pefea a Ieova ke kufaki au?’ Taumafai ke lavea ne koe se fakamanuiaga e tasi mai i a Ieova telā ne fesoasoani atu ke manuia koe.

¹⁸ E tonu, kāti e ‵talo faeloa koe ke oti atu tou fakalavelave tenā. E malamalama tatou i te mea tenā me se mea loa e ‵tau o fai. (Fili. 4:6) Kae e ‵tau foki o lavea ne tatou a fakamanuiaga ko maua ne tatou. Ne tauto mai a Ieova me ka fakamalosi kae ka fesoasoani mai a ia ke kufaki tatou. Tela la, ke loto fakafetai faeloa ki te fesoasoani o Ieova ki a koe. Kae ka lavea ne koe a te auala e fesoasoani atu a Ieova ke manuia koe, e pelā mo te mea ne fai ne ia ki a Iosefa, faitalia foki loa me seki palele atu te fakalavelave tenā.—Kene. 41:51, 52.