1, 2. а) Шенелделерге таваржып чоруурувус чүге кайгамчык эвес? б) Бо статьяга чүнү сайгарар бис?

 ШЕНЕЛДЕЛЕРГЕ таваржып чоруурувус кайгамчык эвес. Чүге дизе Библияда: «Бурганның Чагыргазынче кирерде, хөй хилинчекти көрүп эртер ужурлуг бис» — дээн (Аж.-ч. 14:22). Оон аңгыда, «өлүм-даа, ыы-сыы-даа, ажыг-шүжүг-даа, аарышкы-даа турбас» чаа делегейге чедир чамдык бергелеривис долузу-биле шиитпирлеттинмес деп билир бис (Ажыд. 21:4).

² Иегова бисти шенелде бүрүзүнден камгалавас-даа болза, оларны ажып эртеринге дузалап турар. Павел элчинниң Римде христианнарга чүнү бижээнин эскериңер. Баштай ол бодунуң болгаш акы-угбаларның таварышкан дыка хөй бергелерин бижээш, улаштыр мынча дээн: «Биске ханы ынак Бурганның ачызында бүрүнү-биле базып каан тиилекчилер бис» (Рим. 8:35—37). Ынчап кээрге, шенелде төнмээнде-ле, Иегова биске тиилекчилер болурунга дузалап болур. Ам Иегованың Иосифке канчаар дузалажып турганын база биске канчаар дузалап болурун көрүптээлиңер.

3. Иосифтиң чуртталгазы хенертен канчаар өскерли берген?

³ Иаков Иосиф дээр оглунга дыка ынак турган (Э. д. 37:3, 4). Ол дээш ооң улуг акылары Иосифти көрбестеп эгелээн. Арга тыптып кээрге-ле, олар ону мадиан садыгжыларга садыпкан. А садыгжылар ону чүс-чүс километр  ыракта Египетче аппарган. Аңаа Иосифти фараоннуң камгалакчыларының даргазы Потифарга садыпкан. Иосифтиң чуртталгазы хенертен өскерли берген: ол чоокта чаа адазының ынак оглу тургаш, ам египетчи кижиниң кулу апарган! (Э. д. 39:1).

4. Чүү дээш Иосифтиң ышкаш байдалга таваржып болур бис?

⁴ Библиядан алырга, кижи бүрүзүнүң таваржып чоруур бергелеринге таваржып болур бис (Эккл. 9:11; 1 Кор. 10:13). А чамдыкта Христостуң өөреникчилери болганывыс дээш хинчектенип чоруур бис. Чижээ, ол дээш улус бисти кочулап, удурланып, безин истеп сүрүп болур (2 Тим. 3:12). Кандыг-даа бергелерге таваржыр болзувусса, Иегова биске тиилээринге дузалаар. Иосифке Ол канчаар дузалаан?

5. Иосифти көрүп тургаш, Потифар кандыг түңнелге келген? (Эге дөс 39:2—6).

⁵ Номчуптуңар: Эге дөс 39:2—6. Иосифти кызымак болгаш мергежилдиг ажылчын деп, Потифар эскерип каан. Ооң чүге ындыг болганын ол билир турган. «Дээрги-Чаяакчы Иосифти кагбайн, кады чораан [боорга], ооң ажыл-херээ чогумчалыг» деп, Потифар көрген b. Үе эрткенде, ол египетчи кижи Иосифти чалча кылып алгаш, бажыңының ажыл-херээн башкарар долу эргени берген. Ооң соонда Иегова Потифарны йөрээп эгелээн.

6. Иосиф байдалынче канчаар көрүп болур турган?

⁶ Ам бо байдалче Иосифтиң талазындан көрүп көрээлиңер. Ол чүнү эң күзеп турган? Потифарның ээ көрүүшкүнүн бе? Чок, ол хосталганы алгаш, ачазынче чаныксап турган. Иосиф Потифарның бажыңынга харыысалгалыг ажылдарлыг турган-даа болза, ол дөмей-ле кул турган. Потифар Иосифти салбаан, харын-даа ону оон-даа шыңгыы шенелделер манап турган.

7. Иосифтиң байдалы канчаар нарыыдай берген? (Эге дөс 39:14, 15).

⁷ Эге дөс 39-ку эгеде Иосифти Потифарның кадайы эскерип каан деп бижээн. Ол херээжен ону чоокшулажыылы деп чаңгыс удаа эвес көгүткен. Ынчалза-даа Иосиф  алыспайн, оон дезип-ле турган. Төнчүзүнде ол хорадаанындан «ол мени күштээр деп турду» деп Иосифти буруудаткан. (Номчуптуңар: Эге дөс 39:14, 15.) Ол бүгүнү Потифар билип кааш, Иосифти элээн каш чыл ишти кара-бажыңнап каан (Э. д. 39:19, 20). Ол кара-бажың кандыг турган? Иосифтиң мында ажыглаан еврей сөзү «суг шыгжаар черни; оңгарны» илередип турар чадавас (Э. д. 40:15). Бо бүгү ооң турган чери дүмбей караңгы база ооң байдалы үнер арга чок турган деп бодалды дамчыдып турар. Оон ыңай Библияда Иосифтиң буттарын кезек үе дургузунда кинчилер-биле бектеп кааш турган дээн (Ыд. ыр. 104:17, 18). Ийе, Иосифтиң чуртталгазы оон-даа берге апарган: ол кул тургаш, ам херектен апарган.

8. Шенелделер дам-на бергедээр-даа болза, чүү чүвеге бүзүреп болур бис?

⁸ Чаннып мөргүүрүңерге-даа байдалыңар дам-на баксырап турган бе? Ындыг чүүл бооп болур. Эрликтиң чагырып турар делегейинде таваржып турарывыс шенелде бүрүзүнден Иегова бисти камгалавайн турар (1 Ин. 5:19). Ынчалза-даа Иегова силерниң чүү чүвеге таваржып турарыңарны билир база силер дээш сагыш човап чоруур деп чигзинмеңер (Мф. 10:29—31; 1 Пет. 5:6, 7). Оон аңгыда, Ол: «Сени кажан-даа кагбас мен, сенден кажан-даа ойталавас мен» — деп аазап турар (Евр. 13:5). Байдал чеже-даа идегел чок ышкаш сагындырза, ону ажып эртеринге дузалаар күштү Иегова бээр. Бурган Иосифке канчаар дузалааныл, көрүптээлиңер.

9. Иосиф кара-бажыңга олурда, Иегова ооң-биле кады турган деп кайыын көскү? (Эге дөс 39:21—23).

⁹ Номчуптуңар: Эге дөс 39:21—23. Иосиф кара-бажыңга олурда безин, Иегова аңаа чедиишкинни хайырлап турган. Канчаар? Потифарның ээ көрүүшкүнүн чедип алганы дег, Иосиф кара-бажың даргазының бүзүрелин болгаш хүндүткелин чаалап алган. Соонда «кара-бажыңның даргазы хоругдаттырганнарны Иосифтиң холунга берипкен». Библияда «кара-бажыңның даргазы чүү дээш-даа сагыш човавас болу берген» дээн. Ийе, Иосифке бергелеринден чардыгып болур ажылдар тыптып келген. Байдалдың ынчаар өскерли бээри Иосифтиң сагыжынга-даа, дүжүнге-даа кирбээн! Потифарның кадайын күштээр часкан деп буруудаткан херектен кижи канчап ындыг харыысалгалыг ажылды кылып эгелээнил? Аңаа чүгле чаңгыс тайылбыр бар. Эге дөс 39:23-те: «Дээрги-Чаяакчы Иосиф-биле кады болгаш, ол чүнү-даа кылырга, шупту чүве чогуп бүдүп турган» — дээн.

10. Иосиф бодун бүгү талазы-биле чедиишкинниг мен деп чүге бодавайн турган? Тайылбырлаптыңар.

¹⁰ Бо байдалче ам база Иосифтиң талазындан көөрүн кызыңар. Ону меге буруудаткаш, кара-бажыңче октаптарга, ол бодун бүгү талазы-биле чедиишкинниг мен деп бодап турган бе? Чүү деп бодаар силер, Иосиф чүнү эң күзеп турган? Кара-бажың даргазының мурнунга эки ажылдакчы болуксап турган бе? Ону агартыпкаш, дүрген салыпкан болза деп, Иосиф күзеп турган чадавас. Безин ол хосталгаже удавас үнер херектенден фараонга ооң дугайында чугаалаарын дилээн (Э. д. 40:14). Ынчалза-даа ол кижи ону уттупкан. Түңнелинде Иосиф кара-бажыңга улаштыр ийи чыл олурган (Э. д. 40:23; 41:1, 14). Ындыг-даа бол, Иегова аңаа чедиишкинни берип турган.

11. Иегова Иосифке кандыг арга-шинекти берген база Бурганның күзел-соруун күүседиринге ол кандыг салдар чедирген?

¹¹ Иосиф кара-бажыңга турда, Иегова  Египеттиң хаанынга ийи дүвүренчиг дүш көргүскен. Фараон оларның ужур-утказын билип алыксап турган. Иосиф дүштерниң утказын тайылбырлап шыдаар деп билип кааш, ол ону кара-бажыңдан кыйгыртып алган. Иегованың ачызында Иосиф ол дүштерни тайылбырлааш, мерген угаанныг сүмелер бээрге, фараон кайгап ханмаан. Иегова Иосиф-биле кады деп көргеш, фараон ону Египеттиң шупту аъжы-чемин харыылаар кылдыр томуйлап каан (Э. д. 41:38, 41—44). Соонда Египетке коргунчуг аш-чут эгелээн. Ол аш-чут Иосифтиң өг-бүлези чурттап турган Ханаанга база болган. Эрге-дужаалының ачызында Иосиф өг-бүлезин база Мессияга чедирер үре-салгалды камгалап шыдаан.

12. Иегова Иосифке чедиишкинни канчаар берип турган?

¹² Иосифтиң чуртталгазында болган кайгамчык болуушкуннарның дугайында боданып көрүңер. Ол кулче кичээнгей салыр кылдыр, Потифарны кым оттурган? Өске херектеннерни башкарар кылдыр, кара-бажың даргазы Иосифти томуйлап каан. Кымның ачызында ол чүүл болдунган? Фараонга дүвүренчиг дүштерни, а Иосифке ону тайылбырлаар арга-шинекти кым берген? Египеттиң бүгү аъжы-чемин харыылаар кылдыр, фараон Иосифти томуйлаан. Ол кымның удуртулгазы болган? (Э. д. 45:5). Бо бүгү чүүлге чедиишкинни Иосифке Иегова берген. Иосифтиң акылары ону өлүрерин күзеп-даа турган болза, Иегова күзел-соруун күүседир дээш, байдалды өскертипкен.

13. Иегова чуртталгавыстың байдал бүрүзүнче киржип турар бе? Тайылбырлаптыңар.

¹³ Иосифтиң төөгүзүнден чүнү өөренип ап болур бис? Иегова чуртталгавыстың байдал бүрүзүнче киржип турар бе? Бир багай чүве болу бээрге, аңаа албан бир чылдагаан турган-дыр деп бодаары шын бе? Чок, Библия ынчаар өөретпейн турар (Эккл. 8:9; 9:11). Ынчалза-даа мону утпас бис: шенелделерге таваржы бээривиске, Иегова ону билир база дуза дилээн мөргүлдеривисти дыңнап турар (Ыд. ыр. 33:16; 54:23; Иса. 59:1). Оон артык, Иегова ол  бергелерни чедиишкинниг ажып эртеринге дузалап болур.

14. Берге байдалдарда Иегова силерге канчаар дузалап турар?

¹⁴ Иегова биске канчаар дузалап турар? Чижээ, Ол биске дыка херек үеде аргалалды болгаш деткимчени берип турар (2 Кор. 1:3, 4). Бүзүрели дээш кара-бажыңга ийи чыл шииттирген Туркменистандан Эзис дээр акывыс-биле шак ындыг болган. Ол үлешкен: «Суд боор хүнде даң бажында меңээ бир акый Исайя 30:15-те сөстерни көргүскен. Ында: „Силерниң күжүңер — сагыш амыр боорунда, Меңээ идегээринде“ — деп бижээн. Ол шүлүк меңээ дүвүревезинге база кандыг-даа байдалдарда Иеговага ынанырынга кезээде дузалап турган. Кара-бажыңга олурумда, ол бодалдар мени дыка деткээн». Силерге ылаңгыя дуза херек турда, Иегованың канчаар дузалаанын сактыр-дыр силер бе?

15, 16. Ториниң төөгүзүнден чүнү өөренип ап болур бис?

¹⁵ Иегованың биске канчаар дузалап турганын колдуунда чүгле шенелде соонда эскерип каар бис. Тори дээр угбавыс ону бодунга көрген. Ооң оглу Мейсон алды чыл ишти ыжык аарыы-биле демисежип келген. Хомуданчыг чүүл, ол рак аарыындан чок апарган. Ториниң чүрээ аарышкыдан ыстап-саргып, чарлыр чыгыы турган. Ол мынча дээн: «Ие кижиге оон артык ажыг-шүжүг турбас деп бодаар мен. Ада-ие бүрүзү төлүнүң хинчектенип турарын көөрүнүң орнунга, боду хинчектенгени дээре деп чөпшээрежир боор оң».

¹⁶ Соонда Тори ол аар-берге үелерде Иегованың аңаа канчаар дузалажып турганын сактып чугаалаан: «Оглумнуң аарып турган чылдарының дургузунда Иегова кезээде  мээң-биле турган деп көрдүм. Чижээ, Мейсон улус хүлээп шыдавас кылдыр суларап, шылап каар турган. Ынчалза-даа акы-угбалар эмчиже бисти деткиир дээш, дөмей-ле кээп турганнар. Орукче ийи шак үнер-даа болза, эмчиге оларның кайы-бирээзи албан чедип кээр турган. Оон аңгыда, олар бистиң өг-бүлевиске акша-төгерик-биле база дузалашканнар. Эң-не берге үеде безин бистиң шупту чүвевис четчир турган». Бергелерни ажып эртеринге Иегова Ториге дузалаан. Ол Мейсонну база кагбаан. (« Иегова биске херек чүүлдү өй-шаанда берип турган» деп көзенекти көрүңер.)

17, 18. Берге үелерде Иегованың деткимчезин көрүп каарынга база үнелээринге биске чүү дузалаар? (Ырлар 39:6).

¹⁷ Номчуптуңар: Ырлар 39:6. Альпинист кижиниң сорулгазы — дагның шыпшык кырынче чедип алыры-дыр. Ынчалза-даа ол орук ара турупкаш, чараш бойдусту магадап көөр. Ооң-биле дөмей, Иегованың силерге эң берге байдалда безин чедиишкинниг болурунга канчаар дузалажып турганын боданыр дээш, үени үндүрүңер. Кежээниң-не бодуңардан: «Иегова бөгүн мени канчаар йөрээгенил? Бергелерим шиитпирлеттинмээн-даа болза, Иегова меңээ канчаар дузалажып турар?» деп айтырыңар. Бо айтырыгларга харыылап тургаш, Бурганның оода-ла чаңгыс йөрээлин эскерерин кызыңар.

¹⁸ Шенелдевис төнүп кагзын деп мөргүүрүнде багай чүве чок (Флп. 4:6). Ынчалза-даа амгы үеде бар йөрээлдеривисти база эскерер ужурлуг бис. Иегова бисти быжыктырып база бергелерни ажып эртеринге дузалаарын аазаан болгай. Ынчангаш Иегованың хүн бүрүде берип турар деткимчези дээш өөрүп четтириңер. Ынчан дыка берге үелерде безин Бурганның, Иосифке дузалааны дег, силерге база дузалап турарын көрүп каар силер. Бүгү талазы-биле албан чедиишкинниг боор силер! (Э. д. 41:51, 52).