1-2. (a) Diesorọ o rhe gbe avwanre unu e de hirharokuẹ ebẹnbẹ-ẹn? (b) Die yen a cha ta ota kpahen vwẹ uyono nana?

 O GBE idibo ri Jihova unu siẹrẹ ayen de hirharokuẹ ebẹnbẹ-ẹn. Kidie Baibol na tare nẹ tavwen avwanre ke sa ro Uvie rẹ Ọghẹnẹ na, e che hirharoku “ukpokpogho buebun.” (Iru 14:22) Vwọba, a je riẹn nẹ ọ dia ebẹnbẹn avwanre ejobi yen e che se si no bẹsiẹ a ke ro akpọ kpokpọ rẹ Ọghẹnẹ rẹ “ughwu gbe cha dia ọfa-a, eyẹ omaemuohọ eye oviẹ eyẹ odjadja ọfa-a.”​—Ẹvw 21:4.

² Jihova sẹro rẹ avwanre rere ebẹnbẹn vwo jẹ avwanre oma ete-e. Ẹkẹvuọvo, ọ chọn avwanre uko vwo chirakon rayen. Jokaphiyọ oborẹ ọyinkọn Pọl vuẹ Inenikristi re dia Rom. Ẹsosuọ, o ke djunute ebẹnbẹn evo rọ vẹ iniọvo rọyen hirharokuẹ. O de si: Avwanre phiẹ kparobọ womarẹ “ohwo rọ guọnọ avwanre.” (Ro 8:​35-37) Ọnana mudiaphiyọ nẹ Jihova sa chọn wẹ uko vwo phikparobọ dede nẹ ebẹnbẹn rẹ wo chirakon rọyen je herọ. E ja mrẹ oborẹ Jihova chọn Josẹf uko vwo phikparobọ kugbe oborẹ ọ sa vwọ chọn wẹ uko vwo ru ọtiọyen.

3. Ewene vọ yen vwomaphia vwẹ akpeyeren ri Josẹf kpregede?

³ Jekọp nabọ djephia phenphẹn nẹ ọyen vwo ẹguọnọ rẹ ọmọ rọyen Josẹf mamọ. (Jẹ 37:​3, 4) Fikirẹ ọnana, emọ ri Jekọp ekpako ke rioma kpahen oniọvo rayen. Uphẹn na vwo rhiephiyọ, ayen da shẹ Josẹf vwọ kẹ ineki rẹ Midian evo. Ineki yena da vwẹ Josẹf vwọ yan iroko buebun vwo kpo Ijipt, vwẹ oboyin, ayen da shẹ vwọ kẹ Pọtifa rọ dia onotu rẹ ihwo re rhẹrẹ Fero. Kpatakpata  ọyen akpeyeren ri Josẹf weneri vwo nẹ ọmọ rẹ ọsẹ vwo ẹguọnọ rọyen vwo kpo ọviẹn ghevweghe rẹ ohwo ri Ijipt.​—Jẹ 39:1.

4. Idjerhe vọ yen e se vwo rhiẹromrẹ ebẹnbẹn kerẹ ọkpọ rẹ Josẹf hirharoku?

⁴ Baibol na tare nẹ, “emu re brare phia vwọ kẹ kohwo kohwo.” (Agh 9:​11, Holy Bible​—Easy-to-Read Version) O vwo ebẹnbẹn rẹ avwanre hirharokuẹ “ro jẹ ohwo ọfa oma ete-e” kọyen, edavwini rẹ ihworakpọ eje hirharokuẹ. (1 Kọ 10:13) Yẹrẹ a sa rioja kidie avwanre idibo ri Jesu. Kerẹ udje, a sa vwẹ avwanre jehwẹ, vwọso yẹrẹ mukpahen avwanre fikirẹ esegbuyota rẹ avwanre. (2 Ti 3:12) O toro ebẹnbẹn rẹ wo hirharokuẹ-ẹ, Jihova sa chọn wẹ uko vwo phikparobọ. Idjerhe vọ yen o vwo ru ọtiọyen vwọ kẹ Josẹf?

5. Die yen Pọtifa riẹn kpahen oboresorọ erọnvwọn vwo yovwin kẹ Josẹf? (Jẹnẹsis 39:​2-6)

⁵ Se Jẹnẹsis 39:​2-6. Pọtifa niroso nẹ Josẹf ọyen ọwena ọ ke rha dia ọgbowian. Ọ je riẹn oboresorọ. Pọtifa riẹnre nẹ, “Ọrovwohwo re jabọ rẹ obo [Josẹf] ruẹ ejobi vwo yovwi kẹ.” b Ọtiọyena, ọ da reyọ Josẹf vwo mu odibo romobọ rọyen. Ọ da je reyọ Josẹf vwo mu ohwo rọ vwẹrote uwevwin rọyen eje. Die yen nẹ obuko rọyen rhe? Akpọ de rhi yovwin Pọtifa.

6. Mavọ yen oma ru Josẹf kpahen ẹdia rọyen na?

⁶ De vwẹ ẹwẹn roro oborẹ oma ru Josẹf. Die yen ọ ma guọnọ vwẹ ẹdia yena? Ọyen ọ rẹ Pọtifa vwo noso ji brọghọ phiyoma? Ẹjo, obo rọ ma guọnọ yen, e vwo siobọno rere ọ se bru ọsẹ rọyen ra. Dede nẹ Josẹf vwo uphẹn buebun vwẹ uwevwin ri Pọtifa, ọviẹn yen o ji ruẹ vwẹ otọ rẹ onini rọ riẹn Jihova-a. Jihova ruro rere Pọtifa vwo siobọnu Josẹfu-u. Jẹ ebẹnbẹn ri Josẹf cha rhoma miovwinphiyọ.

7. Mavọ yen ẹdia ri Josẹf hepha vwọ rhoma miovwinphiyọ? (Jẹnẹsis 39:​14, 15)

⁷ Kirobo ra niyẹnrẹn rọyen vwẹ Jẹnẹsis uyovwin 39, Josẹf ko je aye ri Pọtifa,  ọ da davwẹngba abọ buebun vwọ riẹriẹ o vwo nene vwerhẹn. Kọke kọke ọ da davwẹngba ọ vwọ riẹriẹ, Josẹf kọ sian kẹ. Ukuotọ rọyen, ivun rẹ Josẹf de rhi miovwon mamọ, o de gun efian nyẹ nẹ ọ guọnọ gba ọyen nene vwerhẹn. (Se Jẹnẹsis 39:​14, 15.) Ọke rẹ Pọtifa vwo nyo, o de do Josẹf phiyọ uwodi, etiyin kọyen ọ diare ikpe buebun. (Jẹ 39:​19, 20) Mavọ yen uwodi na hepha? Ota rẹ Hibru rẹ Josẹf vwọ fan “uwodi” se mudiaphiyọ “orhare rọ kpọ mu” yẹrẹ “ukpotọ,” ro djerephia nẹ asan rọ hepha na mu ebri, ọ je nẹrhẹ ofu dje mamọ. (Jẹ 40:15) Vwọba, Baibol na djere nẹ o ji vwo ọke ọvo ra vwọ reyọ igoni vwọ gba awọ rọyen, a da rha vwẹ ọghrọrọn vwọ kanre ohọre rọyen. (Un 105:​17, 18) Ẹdia ri Josẹf na kọ rhoma miovwẹnphiyọ. Ẹdia rọ hepha kerẹ ọviẹn ra vwẹroso de rhi wene kpo ohwo ra kanre.

8. Ọ da tobọ dianẹ ebẹnbẹn rẹ avwanre rhoma miovwẹnphiyọ, imuẹro vọ yen e se vwo?

⁸ Wo hirharoku ẹdia ọvo rọ pha gangan jovwo re, dede nẹ wọ nẹrhovwo nẹ otọ rẹ ubiudu rhe, jẹ erọnvwọn rhoma miovwẹnphiyọ? Ọyen obo ra sa mrẹ. Jihova dobọ rẹ ebẹnbẹn jẹ rere i vwo jẹ avwanre oma e te vwevunrẹ akpọ nana rẹ Eshu suẹn na-a. (1 Jọ 5:19) Jẹ, wo se vwo imuẹro nana: Jihova nabọ riẹn obo wo hirharokuẹ, o ji vwo ọdavwẹ wẹn. (Mt 10:​29-31; 1 Pi 5:​6, 7) Vwọba, Jihova veri nẹ, “Me sa phiẹn wẹ-ẹ eyẹ me sa sen wẹ-ẹ.” (Hib 13:5) Jihova sa chọn wẹ uko vwo chirakon ọ da tobọ dianẹ ofu rẹ akpọ dje we hwe. E ja mrẹ oborẹ Jihova ru ọnana wan vwẹ ẹdia ri Josẹf.

9. Die yen djerephia nẹ Jihova vẹ Josẹf herọ ọke rọ vwọ hẹ uwodi? (Jẹnẹsis 39:​21-23)

⁹ Se Jẹnẹsis 39:​21-23. Tobọ vwẹ evunrẹ ọke ọgangan nana re vwo mu Josẹf phiyọ uwodi na, Jihova nẹrhẹ erọnvwọn yovwin kẹ. Vwẹ idjerhe vọ? Ọke vwọ yanran na, Josẹf da rhe mrẹ aroesiri rẹ olori rẹ uwodi na, kirobo rọ hepha ọke rọ vẹ Pọtifa vwọ herọ. O rhe kri-i, olori rẹ uwodi na de phi kemu kemu kugbe ihwo rehẹ uwodi na phiyọ obọ ri Josẹf nẹ ọ vwẹrote. Vwọrẹ uyota, Baibol na da ta: “Olori rẹ uwodi na rha davwerhọ re obo ra vwọ kẹ Josẹf yọnre na-a.” Asaọkiephana Josẹf vwo iruo ro ruẹ re, rọ sa nẹrhẹ o si ẹwẹn nu ebẹnbẹn rọyen na. Ọnana ghini ewene ro rhẹro rọye-en! Mavọ yen a sa vwọ reyọ okpẹdia tiọyen vwọ kẹ ohwo re mu phiyọ uwodi ra tare nẹ ọ guọnọ gba aye rẹ onini rọyen ro vwo nene vwerhẹn? Orọnvwọn vuọvo yen sa suọ. Vwo nene oborẹ Jẹnẹsis 39:23 tare, “Ọrovwohwo vọye herọ; kemu kemu ro ruru ejobi, Ọrovwohwo da nẹrhẹ oyovwi.”

10. Dje oboresorọ Josẹf se vwo roro nẹ erọnvwọn eje yovwin kẹ ọye-en.

¹⁰ Davwẹngba vwọ rhoma vwẹ ẹwẹn roro oborẹ oma ru Josẹf. Ọke re vwo gun efian nyẹ ji muo phiyọ uwodi nu, wo rorori nẹ o se no nẹ erọnvwọn eje yovwin vwọ kẹ? Die yen Josẹf ma guọnọ vwẹ ẹdia yena? Ọyen rọ vwọ mrẹ aroesiri rẹ olori rẹ uwodi na? Ẹjo, obo rọ guọnọre yen rọ vwọ vrabọ rẹ efian re mu banrọ na, e mi ji siobọno. Ọ tobọ vuẹ ohwo ọfa re mu phiyọ uwodi na re che vwo siobọno nẹ o nene ọyen ta ota kẹ Fero rere e se vwo siobọno nẹ evunrẹ uwodi rọ nẹrhẹ akpọ nu ohwo ọhọ na. (Jẹ 40:14) Ẹkẹvuọvo, ọshare na ta ota kpahọn kẹ Fero ugege re vwo siobọno nu-u. Ọtiọyena, Josẹf da dia uwodi na ẹgbukpe ivẹ efa soso. (Jẹ 40:23; 41:​1, 14) Ẹkẹvuọvo, Jihova je  nẹrhẹ obo ro ruẹ eje yovwẹnphiyọ. Vwẹ idjerhe vọ?

11. Ẹgba roghẹresan vọ yen Jihova vwọ kẹ Josẹf, kẹ mavọ yen ọnana vwo toroba orugba rẹ ọhọre ri Jihova?

¹¹ Ọke rẹ Josẹf je vwọ hẹ uwodi, Jihova da nẹrhẹ ovie rẹ Ijipt vwerhẹn evwerhẹn ivẹ ri kpokpiro ẹwẹn. Fero ghene guọnọ riẹn otọ rẹ evwerhẹn na. Ọke ra vwọ vuẹ ovie na nẹ Josẹf vwo ẹgba rọ vwọ fan otọ rẹ evwerhẹn, o de ji ohwo re se. Womarẹ ukẹcha ri Jihova, Josẹf da fan otọ rẹ evwerhẹn na. Uchebro rẹ aghwanre rọ vwọ kẹ Fero da je nẹrhẹ oma vwerhọn. Ọ rhe vwọ riẹn nẹ Jihova vẹ Josẹf herọ, ọ da reyọ vwo mu ohwo rọ vwẹrote emuọre rẹ Ijipt eje. (Jẹ 41:​38, 41-44) Ọke vwọ yanran na, owẹvwe ọgangan de rhi fi vwẹ otọ rẹ Ijipt ji te Kenan, rọ dia asan rẹ orua ri Josẹf dia. Enẹna, Josẹf hẹ ẹdia ro de se sivwin orua rọyen rọ dia uvwiẹ rẹ Mesaya na che nurhe.

12. Idjerhe sansan vọ yen Jihova vwọ nẹrhẹ erọnvwọn yovwin kẹ Josẹf?

¹² Roro kpahen erọnvwọn re rhẹro rọye-en re phiare vwẹ akpeyeren ri Josẹf. Ono yen nẹrhẹ Pọtifa vwo oniso rẹ Josẹf rọ dia ọviẹn ghevweghe? Ono yen nẹrhẹ Josẹf re mu phiyọ ekanrọ, mrẹ aroesiri rẹ olori rẹ uwodi na? Ono yen nẹrhẹ Fero vwerhẹn evwerhẹn ri kpokpiro ẹwẹn je kẹ Josẹf ẹgba vwọ fan otọ rayen? Ono yen nẹrhẹ Fero reyọ Josẹf vwo mu ohwo rọ vwẹrote emuọre rẹ Ijipt? (Jẹ 45:5) O phẹnre nẹ Jihova yen nẹrhẹ kemu kemu rẹ Josẹf ruru yovwin kẹ. Ukuotọ rọyen, ona rẹ iniọvo ri Josẹf hwori rẹ ayen vwo hwe jovwo, Jihova da wẹnẹ vwo ru ọhọre rọyen.

13. Jihova si avwanre nẹ kebẹnbẹn kebẹbẹn re hirharoku? Djekpahọn.

¹³ Die yen avwanre se yono vwo nẹ ikuegbe ri Josẹf na rhe? Kebẹnbẹn kebẹnbẹn re hirharoku yen Jihova si avwanre nẹ? Ọ wẹnẹ obo re phia vwẹ akpeyeren rẹ avwanre rere ebẹnbẹn re hirharoku eje vwọ ghwa erhuvwu rhe? Ẹjo, Baibol na yono ọtiọye-en. (Agh 8:9; 9:11) Ẹkẹvuọvo, avwanre vwo imuẹro nẹ: E de hirharoku ebẹnbẹn, Jihova riẹn o ji nyo oviẹ rẹ avwanre. (Un 34:15; 55:22; Aiz 59:1) Vwọ  vrẹ ọyena, Jihova sa chọn avwanre uko vwo chirakon rẹ ebẹnbẹn rhirin re te oba. Vwẹ idjerhe vọ?

14. Ukẹcha vọ yen Jihova vwọ kẹ avwanre vwẹ ọke rẹ ebẹnbẹn?

¹⁴ Idjerhe ọvo rẹ Jihova vwọ chọn avwanre uko yen ọ vwọ kẹ avwanre obicha vẹ ọbọngan vwẹ ọke ro fori. (2 Kọ 1:​3, 4) Ọnana yen obo re ghwa phia vwo kẹ oniọvo Eziz, vwẹ Turkmenistan re mu phiyọ uwodi ẹgbukpe ivẹ fikirẹ esegbuyota rọyen. Ọ da ta: “Vwẹ urhiọke rẹ ẹdẹ re che vwo guẹdjọ na, oniọvo ọvo de dje Aizaya 30:15 kẹ vwẹ rọ tare ne, ‘Vwẹ oma ehwemuẹ kugbe ẹro ẹvwọ suọ ọye ogangan rẹ ovwan epha.’ Ẹkpo ri Baibol nana chọn vwẹ uko vwo vwo ẹwẹn re dọe je vwẹroso Jihova vwẹ kemu kemu. Ẹkpo ri Baibol nana ri mi roro kpahan ọkieje na chọn vwẹ uko me vwọ hẹ evunrẹ uwodi na.” Wọ sa vwẹ ẹwẹn roro ọke ọvo vwẹ akpeyeren wẹn rẹ Jihova vwo bicha wẹ je vwẹ ọbọngan kẹ wẹ ọke rẹ wọ ma vwọ guọnọ?

15-16. Die yen wo yono vwo nẹ obo re phia vwọ kẹ Tori rhe?

¹⁵ Ọke buebun, avwanre mrẹ oborẹ Jihova chọn avwanre uko vwo chirakon rẹ ebẹnbẹ-ẹn jokpanẹ o nẹ otọ re. Oniọvo aye ọvo re se Tori, mrẹ ọnana vughe. Ọmọshare rọyen Mason nene ọga rẹ ikansa muabọ ẹgbukpe esan soso o ki rhi ghwu. Vwọrẹ uyota, obo re phiare na da Tori mamọ. Ọ da ta: “Me nama vwẹ ẹwẹn roro orọnvwọn ọfa rọ sa da vwẹ te ọtiọna kerẹ ọmiọvwọ-ọn. O muẹro nẹ emiọvwọn efa je cha rhọvwen nẹ, ọmiaovwẹn ra vwọ mrẹ ọmọ rẹ ohwo rọ rioja gan vrẹ ọ ra da rioja na komobọ.”

¹⁶ Dede nẹ ebẹnbẹn na ghene gan mamọ, Tori de rhi roro kpahen idjerhe  sansan rẹ Jihova vwọ chọn uko vwo chirakon. O vwo “roro kpuko,” ọ da ta: “Me mrẹ ukẹcha ri Jihova vwẹ uvwre rẹ ọke rẹ Mason vwo muọga na. Kerẹ udje, ọke rẹ ọga na vwọ gan tẹdia ra gbe rhọvwan nẹ ohwo vuọvo mrẹ Masoni-i, iniọvo na je djẹ inọke ivẹ soso vwo cha Họspito na. Ọkieje yen wọ vwọ mrẹ ohwo vwẹ asan ra da hẹrhẹ ihwo ro vwo owenvwe ji muegbe rọ vwọ vwẹ ukẹcha phia. Vwọba, ayen je vwẹrote ọdavwẹ rẹ avwanre. Ọke rẹ erọnvwọn ma vwọ gan dede, oborẹ avwanre guọnọre kanre avwanre-e.” Jihova vwẹ oborẹ Tori guọnọre ro se vwo chirakon vwọ kẹ, ọtiọyen o ji ru vwọ kẹ Mason.​—Ni ekpeti na “ Jihova kẹ Avwanre Oborẹ Avwanre Ghene Guọnọ dẹn.”

17-18. Die yen cha chọn avwanre uko vwo vwo oniso ji dje ọdavwaro kpahen ukẹcha rẹ Jihova vwọ kẹ avwanre vwẹ ọke rẹ ebẹnbẹn? (Une rẹ Ejiro 40:5)

¹⁷ Se Une rẹ Ejiro 40:5. Ọdavwẹ rẹ ohwo ro yere ugbenu, ọyen ro vwo te obenu eje. Ẹkẹvuọvo, ro vwo yere yanran na ọ sa domaji vwẹ asan evo ro vwo ni erọnvwọn iyoyovwin rọ mrẹ. Vwẹ idjerhe vuọvo na, vwẹ ọkieje vwọ ghwọrọ ọke roro kpahen oborẹ Jihova vwọ chọn wẹ uko dede nẹ wo chirakon rẹ ebẹnbẹn. Kẹdẹ kẹdẹ ọke de she, nọ oma wẹn: ‘Idjerhe vọ yen Jihova vwo bruphiyọ kẹ vwẹ nonẹna? Dede nẹ ebẹnbẹn na je herọ, mavọ yen Jihova vwọ chọn vwẹ uko vwo chirakon?’ Nabọ no sẹ wọ sa mrẹ ọ da hanvwe ebruphiyọ ri Jihova ọvo rọ nẹrhẹ erọnvwọn yovwin kẹ wẹ.

¹⁸ Vwọrẹ uyota, ọ sa dianẹ wọ nẹrhovwo rere ebẹnbẹn na se vwo no. Ọyena ghwa obo ri fori nẹ wo ru. (Fil 4:6) Ẹkẹvuọvo o ji fo nẹ avwanre vwo oniso rẹ ebruphiyọ sansan rẹ avwanre vwori enẹna. Marho, ọ vwọ dianẹ Jihova veri nẹ ọyen cha bọn avwanre gan je chọn avwanre uko vwo chirakon. Ọtiọyena vwẹ ọkieje vwo dje ọdavwaro phia kpahen ukẹcha rẹ Jihova vwọ kẹ wẹ. Wo de ru ọtiọyen, kẹ wọ cha mrẹ oborẹ Jihova ruẹ rere erọnvwọn vwo yovwin kẹ wẹ kirobo ro ruru vwọ kẹ Josẹf, ọ da tobọ dianẹ ebẹnbẹn na je hẹ otọ.​—Jẹ 41:​51, 52.