1-2. (a) Ndi ngani ri sa mangali musi ri tshi ṱangana na milingo? (b) Ri ḓo amba nga ha mini kha ino thero?

 SA IZWI ri vhathu vha Yehova, a ri mangali musi ri tshi tea u sedzana na milingo. Ri a zwi ḓivha uri Bivhili i ri: “Ri fanela u tambula zwihulu uri ri dzhene Muvhusoni wa Mudzimu.” (Mish. 14:22) Ri dovha ra zwi ḓivha uri dziṅwe dza thaidzo dzashu a dzi nga tandululei u vhuya u swika musi ri tshi khou tshila shangoni ḽiswa ḽa Mudzimu hune ‘lufu lu si tsha ḓo vha hone, u ṱungufhala, u lila na vhuṱungu zwi si tsha ḓo vha hone.’—Nzumb. 21:4.

² Yehova ha iti uri ri si ṱangane na milingo. Naho zwo ralo, musi ri tshi ṱangana nayo, u a ri thusa uri ri kone u i konḓelela. Ṱhogomelani zwe muapostola Paulo a zwi vhudza Vhakriste vhe vha vha vha tshi khou dzula kha ḽa Roma. O thoma nga u vha vhudza thaidzo dze ene na vhahawe vha vha vha khou sedzana nadzo. Nga murahu a kona u ri: “Ri a kunda kha zwithu zwoṱhe ri tshi thuswa nga we a ri funa.” (Vharoma 8:35-37) Zwenezwi zwi amba uri Yehova a nga ni thusa uri ni bvelele naho ni tshi khou konḓelela thaidzo. Kha ri vhone uri Yehova o thusa hani Yosefa uri a bvelele na uri inwi a nga ni thusa hani.

3. Vhutshilo ha Yosefa ho ṱavhanya ha shanduka nga nḓila-ḓe?

³ Yakobo ho ngo vhuya a zwi dzumba uri u funa murwa wawe Yosefa nga mbilu yawe yoṱhe. (Gen. 37:3, 4) Zwenezwo zwo ita uri vhakomana vha Yosefa vha mu itele vivho. Musi vha tshi wana tshibuli, vho rengisa Yosefa kha Vhamidiani. Vhenevho Vhamidiani vho dzhia Yosefa vha mu isa Egipita he ha vha hu  kule-kule na hayani hawe nahone e henengei o dovha a rengiselwa Potifara we a vha e muhulwane wa vhalindi vha Farao. Vhutshilo ha Yosefa ho ṱavhanya ha shanduka. O vha e murwa a funwaho nga maanḓa nga khotsi awe, zwino o vha o no vha phuli ngei Egipita!—Gen. 39:1.

4. Ri nga sedzana hani na mulingo u fanaho na we Yosefa a sedzana nawo?

⁴ Bivhili i ri: ‘Zwithu zwi si zwavhuḓi zwi wela vhoṱhe.’ (Muh. 9:11) Nga zwiṅwe zwifhinga, milingo ine ra sedzana nayo ‘na vhaṅwe’ vho no sedzana nayo. (1 Vhakor. 10:13) Nga zwiṅwe zwifhinga ri nga tambula nga nṱhani ha uri ri vhatevheli vha Yesu. Sa tsumbo, ri nga goḓiwa kana ra tovholwa nga nṱhani ha zwine ra zwi tenda. (2 Tim. 3:12) Hu sa londwi uri ni khou sedzana na mulingo ufhio, Yehova a nga ni thusa uri ni bvelele. O thusa hani Yosefa uri a bvelele?

5. Potifara o vhona mini kha nḓila ye Yosefa a vha a tshi khou bvelela ngayo? (Genesi 39:2-6)

⁵ Vhalani Genesi 39:2-6. Potifara o zwi ṱhogomela uri Yosefa ndi muṱhannga a re na vhukoni na uri o vha e mushumi wa biko. O vha a tshi zwi ḓivha uri ndi ngani Yosefa o tou ralo. Potifara o zwi vhona uri “Yehova o vha a tshi khou ita uri [Yosefa] a bvelele kha zwithu zwoṱhe.” b Nga u ya ha tshifhinga, Potifara o ita uri Yosefa a vhe muḓinḓa wawe. O dovha a vhea Yosefa uri a lange nnḓu yawe yoṱhe. Ha itea mini? Potifara a ya a tshi ḓi bvelela.

6. Yosefa a nga vha o ḓipfa hani nga vhuimo he a vha e khaho?

⁶ Humbulani uri Yosefa o vha a tshi khou ḓipfa hani. Ndi mini zwe a vha a tshi khou zwi ṱoḓa nga mbilu yawe yoṱhe? Naa o vha a tshi khou ṱoḓa u vhoniwa na u lambedzwa nga Potifara? Khamusi Yosefa o vha a tshi khou ṱoḓa u vhofholowa uri a vhuyelele kha khotsi awe. Ngoho ndi ya uri , hu sa londwi ndugelo dze a vha e nadzo nḓuni ya Potifara, Yosefa o vha a tshi kha ḓi tou vha phuli nahone muṋe wawe o vha a sa gwadameli Yehova. Yehova ho ngo ita uri Potifara a vhofholole Yosefa. Nahone vhuimo ha Yosefa ho vha vhu tshi kha ḓi ḓo ṋaṋa u vhifha.

7. Vhuimo ha Yosefa ho ṋaṋa hani u vhifha vhu tshi ya? (Genesi 39:14, 15)

⁷ Samusi zwo sumbedzwa kha Genesi ndima 39, mufumakadzi wa Potifara o vha a tshi funa  Yosefa nahone o lingedza lunzhi uri a ite uri a lale nae. Tshifhinga tshoṱhe Yosefa o vha a tshi hana. Mafheleloni, mufumakadzi wa Potifara a sinyuwa lwe a vhuya a tou pomoka Yosefa uri o lingedza u mu tzhipa. (Vhalani Genesi 39:14, 15.) Musi Potifara a tshi zwi pfa, o posa Yosefa dzhele nahone Yosefa a dzula henefho lwa miṅwaha yo vhalaho. (Gen. 39:19, 20) Vhutshilo ho vha vhu hani musi e dzhele? Musi Yosefa a tshi ṱalusa “dzhele” o shumisa ipfi ḽa Tshihevheru ḽine ḽa nga amba “dindi.” Zwenezwo zwi nga vha zwo vha zwi tshi khou amba uri fhethu he a vha e hone ho vha hu na swiswi nahone o vha a tshi vhona hu si na fhulufhelo. (Gen. 40:15; ṱms.) Zwiṅwe hafhu, Bivhili i amba uri lwa tshifhinganyana, milenzhe ya Yosefa yo vha yo vhofhiwa nga ngeḓane na mukulo wawe wo vhofhiwa nga tsimbi. (Ps. 105:17, 18) Vhuimo ha Yosefa ho vha vhu tshi khou ṋaṋa u vhifha vhu tshi ya. O vha e phuli i fhulufhelwaho, fhedzi zwino o vha o no vha dzhele.

8. Naho vhuimo vhu tshi khou ṋaṋa u vhifha vhu tshi ya, ni nga vha na vhungoho ha mini?

⁸ Naa no no ḓiwana ni kha vhuimo vhune ha khou ṋaṋa u vhifha vhu tshi ya, hu sa londwi uri ni khou rabela lunzhi? Zwenezwi zwi nga itea. Yehova ha iti uri ri si ṱangane na milingo ngauri shango ḽine ra vha khaḽo ḽi khou vhuswa nga Saṱhane. (1 Yoh. 5:19) Naho zwo ralo, ni nga vha na vhungoho ha uri Yehova u a vhona zwoṱhe zwine na khou sedzana nazwo nahone u na ndavha na inwi. (Mat. 10:29-31; 1 Pet. 5:6, 7) Zwiṅwe hafhu, u fhulufhedzisa uri: “Ndi nga si vhuye nda u ṱutshela, ndi nga si vhuye nda u laṱa.” (Vhahev. 13:5) Yehova a nga ni thusa uri ni konḓelele naho zwi tshi vhonala u nga vhuimo haṋu a vhu nga lugisei. Kha ri vhone uri Yehova o thusa hani Yosefa.

9. Ndi mini zwine zwa sumbedza uri Yehova o vha a tshi khou tikedza Yosefa musi e dzhele? (Genesi 39:21-23)

⁹ Vhalani Genesi 39:21-23. Na nga tshenetshi tshifhinga tshi konḓaho tsha musi Yosefa e dzhele, Yehova o ita uri Yosefa a bvelele. Nga nḓila-ḓe? Nga u ya ha tshifhinga, muḓinḓa wa dzhele o thoma u fhulufhela na u ṱhonifha Yosefa u fana na zwe zwa itwa nga Potifara mathomoni. Hu sa athu u fhela tshifhinga, muḓinḓa wa dzhele o mbo ḓi tendela uri Yosefa a vhe ene ane a langa vhaṅwe vhafariwa. Musi Bivhili i tshi zwi ṱalusa i ri: “Muḓinḓa wa dzhele o vha a si tsha ṱhogomela zwine zwa ṱhogomelwa ngae.” Yosefa o vha o no wana muṅwe mushumo une a nga vha a tshi khou u ita. Yeneyo yo vha i tshanduko ye ya vha i songo lavhelelwa! Muthu we a fariwa nge a pomokwa uri o lingedza u tzhipa mufumakadzi wa muṅwe wa vhaḓinḓa vha Farao a nga fhulufhelwa hani dzhele? Hu na muthu muthihi we a vha a tshi nga ita uri zwenezwi zwi konadzee. Genesi 39:23 i ri: “Yehova o vha e na Yosefa. Yehova a ita uri zwoṱhe zwine a zwi ita zwi bvelele.”

10. Ṱalutshedzani uri ndi ngani Yosefa a tshi nga vha o ḓipfa a sa khou bvelela kha zwithu zwoṱhe.

¹⁰ Dovhani ni lingedze u humbula uri Yosefa o vha a tshi khou ḓipfa hani. Musi o no pomokwa na u valelwa dzhele, ni vhona u nga o ḓipfa a tshi khou bvelela kha zwithu zwoṱhe? Ndi mini zwe Yosefa a vha a tshi khou zwi ṱoḓa nga mbilu yawe yoṱhe? Naa o vha a tshi khou ṱoḓa u takalelwa nga muḓinḓa muhulwane wa dzhele? Khamusi zwe Yosefa a vha a tshi khou zwi ṱoḓa ndi u vhofhololwa. O ita na u humbela muṅwe wa vhafariwa we a vha e tsini na u vhofholowa uri a mu ambele na Farao uri a mu bvise kha yeneyo dzhele i tsikeledzaho. (Gen. 40:14) Naho zwo ralo, onoyo munna ho ngo ṱavhanya o amba na Farao. Nga nṱhani ha zwenezwo, Yosefa o fhedza miṅwe miṅwaha mivhili e kha yeneyo dzhele. (Gen. 40:23; 41:1, 14) Fhedzi Yehova o bvela phanḓa a tshi ita uri Yosefa a bvelele. O zwi ita hani?

11. Yehova o ṋea Yosefa vhukoni vhufhio ho khetheaho nahone zwenezwi zwo thusa hani uri hu itee tshipikwa tsha Yehova?

 ¹¹ Musi Yosefa a tshi kha ḓi vha dzhele, Yehova o ita uri khosi ya Egipita i ḽore miḽoro mivhili i tshuwisaho. Farao o vha a tshi ṱoḓa u ḓivha uri yeneyi miḽoro i amba mini. Musi khosi i tshi zwi pfa uri Yosefa u na vhukoni ha u ṱalutshedza miḽoro, yo humbela uri a ḓiswe khayo. Yehova o thusa Yosefa uri a ṱalutshedze yeneyo miḽoro nahone Farao a takadzwa na nga nyeletshedzo ye Yosefa a mu ṋea yone. Farao o zwi vhona uri Yehova u khou thusa Yosefa, nga zwenezwo, a mu ita uri a vhe ene a ṱhogomelaho zwiḽiwa zwoṱhe zwa Egipita ḽoṱhe. (Gen. 41:38, 41-44) Nga murahunyana, ha vha na nḓala khulu kha ḽoṱhe ḽa Egipita na kha ḽa Kanana he muṱa wa ha Yosefa wa vha u tshi dzula hone. Yosefa o vha a tshi nga kona u tshidza muṱa wahawe nahone zwenezwi zwo thusa u tsireledza Messia we a vha a tshi ḓo bva kha wonoyo muṱa.

12. Yehova o ita hani uri Yosefa a bvelele?

¹² Humbulani nga ha zwithu zwi tevhelaho zwi songo ḓoweleaho zwe zwa itea vhutshiloni ha Yosefa. Ndi nnyi we a ita uri Potifara a takalele Yosefa we a vha a tshi tou vha phuli zwayo? Ndi nnyi we a ita uri mulindi wa dzhele a takalele Yosefa we a vha a tshi tou vha mufariwa zwawe? Ndi nnyi we a ita uri Farao a vhe na miḽoro i tshuwisaho na we a ita uri Yosefa a kone u i ṱalutshedza? Ndi nnyi we a ṱuṱuwedza Farao uri a vhee Yosefa sa ene ane a ḓo ṱhogomela zwiḽiwa zwoṱhe zwa Egipita? (Gen. 45:5) Zwi tou vha khagala uri ndi Yehova we a ita uri zwoṱhe zwe Yosefa a zwi ita zwi bvelele. Naho vhakomana vha Yosefa vho vha vha tshi ṱoḓa u mu vhulaya, Yehova o shandula zwiimo zwa Yosefa a ita uri tshipikwa tshawe tshi itee.

13. Naa Yehova u a dzhenelela kha vhuimo vhuṅwe na vhuṅwe vhune ra sedzana naho? Ṱalutshedzani.

¹³ Ri guda mini kha mafhungo a Yosefa? Naa Yehova u a dzhenelela kha vhuimo vhuṅwe na vhuṅwe vhune ra vha ri khaho? Naa u a shandula zwithu vhutshiloni hashu uri zwithu zwoṱhe zwivhi zwine zwa itea kha riṋe zwi fhedzisele zwi na tshiitisi tshavhuḓi? Na kathihi. Bivhili a i tikedzi enea mahumbulele. (Muh. 8:9; 9:11) Naho zwo ralo, zwine ra zwi ḓivha ndi uri, musi ri tshi sedzana na mulingo, Yehova u vha a tshi khou zwi vhona nahone u a ri pfa musi ri tshi mu lilela. (Ps. 34:15; 55:22;  Yes. 59:1) Zwiṅwe hafhu, Yehova a nga ri thusa uri ri konḓelele milingo nga hu bvelelaho. A nga ri thusa hani?

14. Yehova u ri thusa hani zwifhingani zwi konḓaho?

¹⁴ Iṅwe nḓila ine Yehova a ri thusa ngayo ndi nga u ri khuthadza na u ri ṱuṱuwedza nga tshifhinga tshone-tshone. (2 Vhakor. 1:3, 4) Zwenezwi ndi zwe wahashu Eziz wa ngei Turkmenistan a zwi vhona. O vha o gwevhiwa miṅwaha mivhili dzhele nga nṱhani ha lutendo lwawe. U ri: “Nga matsheloni a ḓuvha ḽe nda vha ndi tshi khou ya u senga ngaḽo, muṅwe wahashu o ntsumbedza luṅwalo lwa Yesaya 30:15, lune lwa ri: ‘Ni ḓo vha na maanḓa arali na dzika na vha na fhulufhelo.’ Yeneyi ndimana yo dzula i tshi nthusa uri ndi dzike na uri ndi ḓitike nga Yehova kha zwithu zwoṱhe. U elekanya nga ha yeneyi ndimana zwo nthusa musi ndi dzhele.” Ndi lini he Yehova a vhuya a ni thusa nga u ni khuthadza na u ni ṱuṱuwedza nga tshifhinga tshone-tshone?

15-16. Ni guda mini kha tshenzhelo ya Vho Tori?

¹⁵ Kanzhi ri zwi vhona mulingo wo no fhela uri Yehova o ri thusa u u konḓelela. Wahashu Vho Tori vho tendelana na zwenezwo. Ṅwana wavho ane a pfi Mason o vha na khentsara lwa miṅwaha ya rathi, nga murahu a mbo ḓi lovha. Zwi tou pfala uri Vho Tori vho vha vho ṱungufhala nga maanḓa. Vha ri: “Sa mme ,a thi athu u vhuya nda sedzana na vhuimo vhu konḓaho u fhira honovhu. Ndi na vhungoho ha uri na vhaṅwe vhabebi vha ḓo tendelana na nṋe musi ndi tshi ri, u vhona ṅwana wau a tshi tambula zwi vhavha u fhira musi iwe muṋe u tshi khou tambula.”

¹⁶ Naho zwo ṱungufhadza Vho Tori musi vha tshi vhona ṅwana wavho a tshi khou tambula nga u rali, nga murahu vho zwi vhona uri Yehova o vha thusa hani uri vha konḓelele. Vha ri: “Musi ndi tshi humbula nga ha tshenetshiḽa tshifhinga, ndi a kona u zwi vhona uri Yehova  o nthusa musi ṅwananga a tshi khou lwala. Sa tsumbo, naho Mason o vha a tshi khou lwala lwe a vha a sa tendelwi u vha na vhaeni, vhahashu vho vha vha tshi reila awara mbili uri vha ḓe sibadela. Ho vha hu tshi dzula hu na vhahashu henefho sibadela vho ḓiimisela u ri tikedza. Zwiṅwe hafhu, vhahashu vho ita vhungoho ha uri ri na zwoṱhe zwine ra zwi ṱoḓa. Naho vhuimo ho vha vhu tshi khou konḓa vhukuma, ro vha ri tshi dzula ri na zwine ra zwi ṱoḓa.” Yehova o thusa Wahashu Vho Tori na ṅwana wavho Mason uri vha konḓelele.—Vhalani bogisi “ Yehova O Ri Ṋea Zwe Ra Vha Ri Tshi Zwi Ṱoḓa.”

17-18. Ri nga thuswa nga mini uri ri dzhiele nṱha nḓila ine Yehova a ri thusa ngayo zwifhingani zwi konḓaho? (Phisalema 40:5)

¹⁷ Vhalani Phisalema 40:5. Muthu ane a khou gonya thavha u vha e na tshipikwa tsha u swika nṱha ha thavha. Naho zwo ralo, musi a sa athu u swika u a ima fhethu hunzhi a sedza fhasi uri a vhone zwithu zwavhuḓi. Nga nḓila i fanaho, ri tea u ita ri tshi ima, ra humbula nga ha nḓila ine Yehova a khou ita ngayo uri ri bvelele naho ri tshi kha ḓi konḓelela mulingo. Musi ḓuvha ḽi tshi kovhela, ni ḓivhudzise uri: ‘Yehova o mphaṱhutshedza nga nḓila-ḓe ṋamusi? Naho ndi tshi kha ḓi sedzana na mulingo, Yehova u khou nthusa hani uri ndi konḓelele?’ Zwi nga vha zwavhuḓi arali na vhona tshithu tshithihi tshine Yehova a khou tshi ita u itela u ni thusa.

¹⁸ Ndi ngoho uri ni nga vha ni tshi khou rabela uri mulingo une na khou sedzana nawo u fhele. Zwenezwo zwo tea nahone zwi a pfala. (Vhafil. 4:6) Fhedzi ri tea u ṱhogomela na nḓila ine Yehova a khou ri fhaṱutshedza ngayo zwino. Ri tea u ita zwenezwi ngauri Yehova u ri fhulufhedzisa uri u ḓo ri khwaṱhisa na u ri thusa uri ri konḓelele. Nga zwenezwo, ni tea u livhuwa uri Yehova u khou ni tikedza. Arali na vha na eneo mavhonele, ni ḓo zwi vhona uri Yehova u khou ni thusa uri ni bvelele, samusi o ḓi thusa na Yosefa uri a bvelele naho a tshi khou sedzana na milingo.—Gen. 41:51, 52.