STÙDIO 3
Geovà l’è sempre drio giutarte!
‘Ma Geovà l’era con Giusepe. . . . E tuto quel che Giusepe el fea ndea ben’ — GÉN. 39:2, 3.
CÀNTICO 30 Me Dio, me Amigo e me Pupà
COSSA CHE NDAREMO IMPARAR? a
1-2. (a) Parché che belche saveino che ndarìssino infrontar tante dificoltà? (b) Cossa che ndaremo imparar in questo stùdio?
NOANTRI belche saveino che ndarissìno infrontar tante dificoltà. Parché? Parché la Bìblia la dise che i servi de Geovà i gavaria de infrontar tante dificoltà fin che i ndesse rento el Regno de Dio. (Ati 14:22) Noantri anca savemo che i nostri problemi sol i ndarà finirse nel novo mondo de Dio, quando “no ghen sarà pi la morte, gnanca pi tristessa, gnanca piander, gnanca dolor”. — Apo. 21:4.
2 No l’è parché servimo a Geovà che no gavaremo mia problemi. Ma lu el ne giuta a ndar avanti. Varda quel che el apòstolo Paolo el ga dito ai fradei in Roma. Dopo de parlar de arquante dificoltà che lori i era drio infrontar, lu el ga dito: ‘Gràssie a quel che el ne ga amà che semo boni de vinser a tute queste robe.’ (Rom. 8:35-37) Alora, podemo esser sicuri che Geovà el ndarà giutarne anca quando semo drio infrontar una dificoltà. In questo stùdio, ndaremo imparar come Geovà el ga giutà Giusepe e come el pol giutar anca a noantri.
QUANDO VIEN FORA LE DIFICOLTÀ
3. Come che la vita de Giusepe la ga cambià de colpo?
3 Giacò el ghe volea tanto ben al so fiol, Giusepe. (Gén. 37:3, 4) Par quela, i fradei de Giusepe i gavea tanta invìdia de lu e i volea farghe mal. Alora, lori i lo ga vendesto a arquanti comersianti dela tera de Midian. Questi comersianti lo ga menà al Egito, che l’era un posto tanto distante. Dopo, lu l’è stà vendesto come schiavo a Potifar, che l’era una dele autorità de Faraò. Alora, proa pensar come la vita de Giusepe la ga cambià tanto. Lu l’era un caro fiol, e de colpo, l’è deventà un poro schiavo! — Gén. 39:1.
4. Che dificoltà fursi infrontemo?
4 La Bìblia la dise che ‘a tuti pol suceder robe rugne o che no i speta mia.’ (Ecl. 9:11) Noantri infrontemo dificoltà compagno a tute le persone. (1 Cor. 10:13) Ma anca podemo gaver problemi parché ndemo drio a Gesù. Par esémpio, pol esser che le persone le ne ride drio, le ne vien contra o le ne perseghe. (2 Tim. 3:12) Ma Geovà el ndarà giutarne a infrontar tute queste dificoltà. Vedemo adesso come che lu el ga giutà Giusepe.
Quando Giusepe l’è stà vendesto come schiavo a Potifar nel Egito, Geovà lo ga giutà (Varda el paràgrafo 5.)
5. Parché che Potifar el ga capio che Geovà l’era drio giutar a Giusepe? (Génesi 39:2-6)
5 Ledi Génesi 39:2-6. Potifar el ga visto che Giusepe l’era un toso pròpio bravo e che el laorea tanto. Lu el savea che Geovà el fea che ndesse ben tuti i laori de Giusepe. b Alora, Potifar el ga scoliesto Giusepe par giutarlo e par tender dela so casa e de tuto quel che el gavea. Par quela, la vita de Potifar la ze restada tanto meio. c
6. Come che Giusepe fursi el se sentia?
6 Proa pensar come che Giusepe el se sentia. Sarà che quel che lu el volea l’era un laoro importante nela casa de Potifar? Nò, parché lu ancora l’era un schiavo, e Potifar no’l adorea mia a Geovà. Quel che Giusepe el volea l’era esser molà e tornar ala casa de so pare. Magari, Geovà no’l ga fato che Potifar lo assesse ndar via. Invesse, la vita de Giusepe la ze restada ancora pedo.
QUANDO LE DIFICOLTÀ LE RESTA ANCORA PI BRUTE
7. Come che la vita de Giusepe la ga cambià nantra volta? (Génesi 39:14, 15)
7 Génesi capìtolo 39 mostra che la dona de Potifar la ga proà tante volte butarse do con Giusepe, parché lu l’era un gióveno tanto bel. Ma lu no’l ga volesto butarse do con ela. Alora, ela la ze restada tanto cativa che la ga dito che Giusepe el volea violentarla. (Ledi Génesi 39:14, 15. d) Quando Potifar lo ga savesto, lu el ga metesto Giusepe in preson e lo ga assà lì par tanti ani. (Gén. 39:19, 20) La parola che Giusepe el ga doperà par parlar de ndove l’era la preson anca la vol dir “buso” o “posso”. Cossita, capimo che l’era un posto tanto bruto, scuro e no ghen’era come scampar via. (Gén. 40:15) La Bìblia anca la mostra che Giusepe l’è restà preso con un fero nel col e cadene nei pié par un tempo. (Sal. 105:17, 18) Alora, nantra volta, la vita de Giusepe la ze restada ancora pedo. Lu l’era un schiavo che el so paron el se fidea tanto, ma l’è deventà un presonero.
8. De cossa che podemo esser sicuri se un problema che semo drio infrontar el resta ancora pedo?
8 Dele volte, semo drio tribolar e el problema el resta ancora pedo, anca se domandemo el aiuto de Geovà. Te ga belche sucedesto una roba cossita? Anca se te obedissi a Geovà, te ndarè tribolar parché l’è Sàtana el paron de questo mondo. (1 Gio. 5:19) Ma ricòrdate che Geovà el sa quel che te sì drio infrontar e el se preocupa tanto con ti. (Mat. 10:29-31; 1 Pie. 5:6, 7) Varda quel che Geovà el ga prometesto nela Bìblia: “Mi mai vao assarte e mai vao abandonarte.” (Ebr. 13:5) Alora, te pol esser sicuro che Geovà el ndarà giutarte a ndar avanti, anca se te ghè un problema che l’è tanto fadiga. Adesso, vedemo come che Geovà el ga giutà Giusepe.
Quando Giusepe l’è stà metesto in preson e l’è stà scoliesto par tender dei altri presoneri, Geovà l’era drio giutarlo (Varda el paràgrafo 9.)
9. Parché che savemo che Geovà l’era con Giusepe? (Génesi 39:21-23)
9 Ledi Génesi 39:21-23. e Geovà el ga giutà che Giusepe el ndesse ben ancora che el fusse in preson. Parché che savemo che l’è stà pròpio cossita? Parché el paron dela preson el se fidea in Giusepe e lo ga scoliesto par tender de tuti i altri presoneri. Cossita, Giusepe el gavea un laoro de far. No l’era de gnanca de creder! Giusepe l’era stà acusà de violentar la dona de so paron e l’è stà metesto in preson. Ma adesso, tuti i se fidea in lu. Semo sicuri che l’è pròpio vera quel che dise Génesi 39:23: “Geovà l’era con Giusepe e Geovà el fea che ndesse ben tuto quel che Giusepe el fea.”
10. Parché che fursi Giusepe no’l pensea che tuto l’era drio ndar ben con lu?
10 Proa pensar nantra volta come che Giusepe el se sentia. Lu l’è stà acusà de una roba che no’l gavea mia fato, e i lo ga metesto in preson. Alora, sarà che Giusepe el pensea che tuto l’era drio ndar ben con lu? Sarà che quel che Giusepe el volea l’era che el paron dela preson el se fidesse in lu? Sicuro che nò. Invesse, lu el volea esser molà dela preson e che tuti i savesse che lu no’l gavea colpa de gnente. Alora, quando un presonero l’è stà molà, Giusepe el ghe ga domandà che el contesse al Faraò cossa che gavea sucedesto. (Gén. 40:14) Ma quel omo no’l ghe ga dito gnente. Cossita, Giusepe l’è restà nantri due ani in quela bruta preson. (Gén. 40:23; 41:1, 14) Ma Geovà el seitea a giutarlo. Come?
11. (a) Intanto che Giusepe l’era in preson, cossa che Geovà lo ga giutà a far? (b) Che roba importante Geovà el ga giutà Giusepe a far quando ghe ga mancà de magnar ala so fameia?
11 Intanto che Giusepe l’era in preson, Geovà lo ga giutà a spiegar quel che le persone le se insognea. Alora, Geovà el ga fato che Faraò el se insognesse due volte. Quel rè el volea tanto saver cossa volea dir quel che el se gavea insognà. Alora, el ga mandà ciamar Giusepe e l’è restà maraveià coi consili che lu el ghe ga dato. Faraò el ga visto che Giusepe el gavea el aiuto de Geovà. Par quela, lu lo ga scoliesto par tender de tuto el magnar che ghen’era nel Egito. (Gén. 41:38, 41-44) Un tempo dopo, ga mancà magnar nela tera del Egito e in Canaan, che l’era la tera ndove stea la fameia de Giusepe. Cossita, Giusepe l’è stà bon de giutar a tuti dela so fameia, de ndove vegnaria el Messia.
12. Come che Geovà el ga giutà Giusepe?
12 Proa varda tuto quel che ga sucedesto nela vita de Giusepe, e pensa come che Geovà lo ga giutà. Come che Potifar el se ga fidà tanto nte un poro schiavo? Parché che el paron dela preson el ga giutà Giusepe? Chi che ga fato Faraò insognarse e ga giutà Giusepe a spiegar cossa volea dir? Parché che Faraò el ga scoliesto Giusepe par tender de tuto el magnar che ghen’era nel Egito? (Gén. 45:5) Sicuro che l’è stà Geovà che el ga fato tute queste robe suceder parché la era la so volontà. I fradei de Giusepe i ga proà farghe mal, ma ancora cossita, Geovà lo ga giutà e el ga fato che tuti i laori de Giusepe i ndesse ben.
COME CHE GEOVÀ EL TE GIUTA?
13. Sarà che Geovà el controla tuto quel che sucede nela nostra vita? Spiega.
13 Alora, vedemo cossa che podemo imparar cola stòria de Giusepe. Sarà che Geovà el controla tuto quel che sucede nela nostra vita? Sarà che lu el fà suceder robe brute par dopo farle deventar una roba bona? Nò, no l’è quel che la Bìblia la mostra. (Ecl. 8:9; 9:11) Magari, semo sicuri che quando tribolemo, Geovà l’è atento e el scolta quando ghe domandemo aiuto. (Sal. 34:15; 55:22; Isa. 59:1) E lu el fà ancora de pi. Geovà el ne giuta a dàrghene fora con tute le dificoltà. Ndemo veder come.
14. Come che Geovà el ne giuta a infrontar le nostre dificoltà?
14 Geovà el pol giutarne a infrontar le nostre dificoltà quando el ne dà consolo e coraio pròpio nela ora giusta. (2 Cor. 1:3, 4) L’è stà questo che ga sucedesto col fradel Eziz, che l’è de star nel Turcomeniston. Lu l’è stà metesto in preson parché l’è una Testimònia de Geovà, e l’è stà condanà a restar là par due ani. Lu el ga dito: “Nel giorno del me giulgamento nel tribunal, un fradel el me ga mostrà Isaia 30:15 che dise: ‘Valtri gavaré forsa se resté tranquili e se ve fidé in mi.’ Questo testo el me ga giutà a restar calmo e a fidarme in Geovà. Pensarghe sora questo testo me ga giutà tuto el tempo intanto che ero in preson.” Alora, proa sempre ricordarte dele volte che Geovà el te ga dato consolo e coraio, pròpio quando te gavei de bisogno.
15-16. Cossa che te ghè imparà de quel che ga sucedesto con Tori?
15 Dele volte, sol semo boni de veder come Geovà el ne ga giutà dopo che una dificoltà la se finisse. L’è stà pròpio questo che ga sucedesto con Tori. El so fiol, Mason, el ga bio càncaro par 6 ani e l’è morto. Tori la ze restada col cuor spacà. Ela la ga dito: “Penso che no ghen’è roba pi bruta par una mare che veder el so fiol cossita. Son sicura che, par un pare e una mare, saria meio sofrir qualche dificoltà lori stessi che veder el so fiol sofrir.”
16 Tori la ga sofrio tanto de veder el so fiol tribolar de quela maniera. Ma dopo, la ga capio come che Geovà la ga giutada a infrontar quela dificoltà. Ela la ga dito: “Intanto che me fiol l’era malà, Geovà el me ga giutà tanto. Par esémpio, fin quando Mason l’era tanto malà che no’l podea mia ricever vìsite, fradei e sorele i viaiea due ore par vegner al ospedal. Sempre ghen’era qualchedun là fora che el me spetea par darme consolo e par giutarme. Come i fradei e sorele sempre i ne ga giutà, no ne ga mai mancà gnente. Anca quando l’era pròpio fadiga, noantri sempre ghemo bio quel che ne ocorea.” Alora, podemo veder come che Geovà el ga dato a Tori e a Mason quel che i gavea de bisogno par perseverar. — Varda el quadro “ Geovà el ne ga dato pròpio quel che ne ocorea”.
RICÒRDATE SEMPRE DELE BELE ROBE CHE GEOVÀ EL TE GA DATO
17-18. Cossa che ne giutarà a veder che Geovà l’è belche drio giutarne? (Salmo 40:5)
17 Ledi Salmo 40:5. Una persona che la ze drio far su una casa la ze premosa de finirla. Ma intanto che el laoro el va avanti, ela la se ferma par veder quanto la ga belche fato. Noantri ghemo de far compagno. Come cossita? Te ghè de torte el tempo tuti i giorni par pensarghe sora come Geovà l’è drio giutarte a dàrghene fora cole to dificoltà. Proa catar fora al manco una benedission che Geovà el te ga dato. Te pol domandarte: ‘Come che Geovà el me ga benedio ancoi? Anca se go una dificoltà, come che lu l’è drio giutarme a dàrghene fora?’ f
18 Fursi te sì drio pregar che Geovà el finissa fora cola to dificoltà, e no le sbalià farlo. (Fil. 4:6) Ma stà atento ale benedission che te ghè adesso. Geovà el ne ga prometesto che el ne darà forsa e el ne giutarà a perseverar. Alora, sempre daghe valor al aiuto che Geovà l’è drio darte. Se te fè cossita, te vederè che Geovà l’è drio far che vae ben tuto quel che te fè, compagno ga sucedesto con Giusepe. — Gén. 41:51, 52.
CÀNTICO 38 Geovà el te farà forte
a Quando semo drio infrontar dificoltà, fursi pensemo che Geovà no l’è drio giutarne. Pol esser che pensemo che se ghemo el so aiuto no ndaremo mia tribolar. Ma quel che ga sucedesto con Giusepe ne insegna che Geovà l’è drio giutarne anca quando infrontemo bruti colpi. In questo stùdio, ndaremo imparar come che Geovà lo fà.
b La Bìblia la dopera pochi versìcoli par contar quel che ga sucedesto con Giusepe intanto che lu l’era un schiavo. Ma fursi, queste robe le ga sucedesto in tanti ani.
c (Génesi 39:2-6) Ma Geovà l’era con Giusepe. Par quela, tuto quel che el fea ndea ben e lu l’è stà metesto par tender dela casa del so paron, el egìpsio. 3 E el so paron el ga visto che Geovà l’era con Giusepe e che Geovà el fea che tuto quel che el fea ndesse ben. 4 El so paron ghe volea tanto ben e lo ga scoliesto come quel che lo giutea. Alora, Potifar el ga scoliesto Giusepe par tender dela so casa e de tuto quel che lu el gavea. 5 Dopo che el egìpsio lo ga scoliesto par tender dela so casa e de tuto quel che lu el gavea, Geovà el ga benedio la casa del egìpsio par causa de Giusepe. Geovà l’era drio benedir tuto quel che ghen’era nela casa e nel campo del so paron. 6 Dopo, Potifar el ga dato a Giusepe el laoro de tender de tuto quel che lu el gavea. Lu no’l se preocupea con gnente, sol con quel che el gavea de magnar. E Giusepe l’è deventà bel e forte.
d (Génesi 39:14, 15) la ga scominsià a osar e la ga ciamà i òmini dela casa. La disea: “Vardé sol! El me omo el ga portà qua rento casa questo ebreo che el vol far che i altri i ne rida drio. L’è vegnesto qua in serca de butarse do con mi, ma mi go scominsià a osar con tute le forse che gavea. 15 E quando el me ga scoltà osar, lu el ga assà la so roba qua e el ga scampà via.”
e (Génesi 39:21-23) Ma Geovà el seitea con Giusepe, el ghe dimostrea amor leal e el fea che el gavesse la aprovassion del paron dela preson. 22 Alora, el paron dela preson el ga mandà Giusepe tender de tuti i prisioneri che ghen’era nela preson. Giusepe el comandea tuto el laoro che se fea lì. 23 El paron dela preson no’l se preocupea pròpio con gnente de quel che Giusepe el gavea de tender, parché Geovà l’era con Giusepe e Geovà el fea che ndesse ben tuto quel che Giusepe el fea.
f (Salmo 40:5) Ò, Geovà, me Dio, te ghè fato tante robe! Tuto quel che te ghè fato l’è de maraveiarse e te vol tante robe bone par noantri. Nissun l’è compagno a ti. Mi no saria gnanca bon de parlar de tuto quel che te ghè fato, parché le ze tante robe!
