1-2. (a) Mwaha wa heeni nihintikhinaahu vaavo ninvirihaahu maxupo? (b) Ninkela woona heeni mwa yoosomeene yeela?

 NTOKO atthu a Yehova, hiyo khanintikhina vaavo ninvirihaahu maxupo, nto Biblya onhima weera, “Mwa sohawa sintxipale nnaphwanela ovolowa omwene wa Muluku.” (Mit. 14:22) Mene nto noosuwela weera maxupo ninvirihaahu enrowa omalihiwa moomalela vaavo ninrowaahu opatxera okhala elapo enyowani, “Ni okhwa khorwa okhala veli, nari winla, nari wikhupanyera, nari ovoreya khorwa okhala tho vawi sopatxera sovira khuluwi.”—Apok. 21:4.

² Yehova onnaakhulela weera hiyo enikhumeleleke maxupo mene nto owo onnanikhavihera weera nivileleke maxupo awo, moone ele murummwa Paulo aalenlaawe akristu yaakhala oRoma owo aahima maxupo mantxipale aavirinhaawe ni asinna, nto owo onhime ha: “Vano mwa itthu seiya sothene nri owerya niwoko na yole onithunne hiyo.” (Arom. 8:35-37) Eyo enoonihera weera Yehova pooti wookhaviherani nnaamweera nivirihaka maxupo. Nrowe noone moota Yehova aamukhavihenraawe Yosefe ni moota onrowaawe wookhaviherani nyuwo.

3. Moota heeni ekumi ya Yosefe yaatxentxeñyaaya moowaakuveya?

³ Yakobe aamutthuna Yosefe waapwaha anamwanaawe ootheene. (Eph. 37:3, 4) Eyo yaaheeriha weera anamwane akina a Yakobe, emwinleleke ehatxe Yosefe. Vaavo yaakhanlaayano eparakha, awo yaamutumiha Yosefe yaatumiheraka mamidiyaani yaawo yaari anamaronda. Awo yaamukuxa Yosefe emurowihaka nipuro nootepa orakama, nto awo yaamutumiha ekwaha yanaaveeli, ekwaha ela ntoko kaporo emutumiheraka Potifari Muxipitu namuku a Farawo ni mutokweene anamasukaawe.  Ekumi ya Yosefe yaatxentxeya mootutuxera, mahiku vakhaaneene muttuli owo aari mwaana oosiveleyaxa, vano owo aakhala kaporo a Wixipitu!—Eph. 39:1.

4. Maxupo heeni ninvirihaahu mwaha wa nroromelo nahu?

⁴ Ni Biblya enre “Niwoko othene aya annavariwa ni ehuhu ni erisa.” (Koh. 9:11) Emaara ikina hiyo ninnakumana ni maxupo yaawo enaaphwanya “atthu akina,”—eyo tiiyo, maxupo mutthu ori poothe onvirihaawe. (1 Akor. 10:13) Ni imaara ikina hiyo ninnahaawa mwaha wa nroromelo nahu. Mwa ntakihero, atthu akina pooti oniveeha, naari onitheya, ni onittharatthara mwaha wa nroromelo nahu. (2 Tim. 3:12) Muhipwatthaka maxupo heeni nyuwo munvirihaanyu, Yehova onoowera wookhaviherani ntoko hiihaale aamukhavihenraawe Yosefe.

5. Potifari oonelenle eheeni ni okhumela nnene wa Yosefe? (Ephattuwelo 39:2-6)

⁵ Musome Ephattuwelo 39:2-6. Potifari aahoonelela weera Yosefe aari mmiravo a miteko ni amiruku, ni aahoonelela weera Yosefe annakhumela nnene mmutekoni mwawe. Ni owo aasuwela mwaha wa heeni. Potifari aahoonelela weera “Yehova annakhavihera miteko sootheene sa [Yosefe.]” b Noovira etempu, Potifari aamukhaliha muhooleli awe. Owo aamuhiyera okosoopa itthu sootheene sa vaate vawe. Yookhumelelaaya yaari tiivi?

6. Oweharu Yosefe oonela hayi maxupo aakumanaaweno?

⁶ Nkeererani wiihela nipuro na Yosefe. Ni moone, etthu heeni owo aatthunaawe? Neereke owo aatthuna wooniwa ni Potifari ni oxukureliwa? Apaale Yosefe aatthuna otthikela wa amusi awe. Mene Yehova khaakhulenle weera Potifari amuhiye Yosefe otthikela owannyawe. Mene nto maxupo a Yosefe yaaroovirelela.

7. Moota heeni maxupo a Yosefe yaatxeerereyaaya? (Ephattuwelo 39:14, 15)

⁷ Ntoko enooniheraaya ekapiitulu 39 ya Ephattuwelo, amwaariye Potifari yannamusivela vantxipale Yosefe. Nto ikwaha sootheene awo yaamweerelaaya weera akonane, owo annakhootta. Vaavo yoonalaaya weera Yosefe annakhootta, awo yaamoothera weera  aatthuna waakoniha. (Musome Ephattuwelo 39:14, 15.) Vaavo Potifari iiwalaawe masu ale, aarumiha weera Yosefe awaleliwe okadeya, nto ti weiwo aakhalaawewo. (Eph. 39:19, 20) Nto yaakhanle moota heeni ekadeya ene? Masu eHeberi Yosefe aavarihenlaawe muteko ooweera “ekadeya” pooti otaphulela “munlittini,” naari “mmaniiliyani”, enoonihera weera naari ni epiphi ni khayaakhanle yooweherera yookhumamo. (Eph. 40:15, enoota.) Mwa yeeyo, Biblya onnahima weera metto sa Yosefe saatthukiwa ni onyooro ni muxikoni mwawe yaamuhela eyuuma. (Nsal. 105:17, 18) Maxupo a Yosefe yaamweera otepa wantxeerereya. Muhooleli oororomeleya vano nto aari peresu.

8. Nnaamweera nthorihiwaka, eheeni nintthuneyaahu ororomela?

⁸ Nyuwo mootoko oviriha maxupo mweekumini mwanyu nnaamweera nvekelaka eneera waatxeerereya? Eyo pooti weereya mwaha wooweera elapo ela enlamuleliwa ni Satana, nto Yehova khonnaakiha maxupo ahu. (1 Yoh. 5:19) Nnaamweera vareene hiiho nyuwo, muroromeleke weera Yehova onnoona maxupo ootheene munvirihaanyu ni owo onnoopwatthani. (Math. 10:29-31; 1 Ped. 5:6, 7) Opwaha mwa yeeyo, Yehova oolaihera weera: “Nkirwa wohiya nari nkirwa wònyanyala.” (Aheb. 13:5) Nnaamweera nyuwo moonaka weera khamunwera ovilela maxupo awo, Yehova onimookhaviherani. Nrowe noone moota Yehova aamukhavihenraawe Yosefe.

9. Eheeni enoonihera weera Yehova aari ni Yosefe vaavo aatthukinwaawe? (Ephattuwelo 39:21-23)

⁹ Musome Ephattuwelo 39:21-23. Yehova annareeliha itthu sootheene Yosefe aapakaawe, nnaamweera aari mukadeya. Moota heeni? Hiihaale ntoko yeereñyaawe ni Potifari Yehova aamweeriha mutokweene a mukadeya amusiveleke ni omuroromela Yosefe, moohipisa Yosefe ahaakhela muritti woowaahoolela maperesu makina. Biblya oneera: “Ekhweli mutokwene a mukariposo ahiya opwattha itthu sari ni Yosefe,” vanonto Yosefe aakhalano muteko yoowo waammaliha malatta. Ala yaari matxentxo owo ahaawehereraawe, tthiri yaari matxentxo ooxupa wiiweexexa. Moota heeni mutthu aatthukinwe mwaha woowootheriwa waakoniha amwaarawe Potifari, orowaawe ovahiwa muteko ntoko ole? Eyo yeereñye mwaha wa ele nimphwanyaahu va Ephattuwelo 39:23. Eneera: “Niwoko Yahvéh àri ni yowo wowi siso sothene eraiye, Yahvéh ànamparakhiha.”

10. Muthalihe Moota heeni Yosefe ahoonaawe okhumela nnene mwa soothesene.

¹⁰ Mweerere veeli wiihela nipuro na Yosefe. Noomala wootheriwa ni owaleliwa mukadeya nyuwo munuupuwela weera itthu sootheene sannamweettela nnene? Etthu heeni Yosefe aatthunaawe mwa etempu ene yeele? Neereke owo aasaasa oxukureliwa ni mutokweene a mukariposo? Moohihovela waakhula ti wooweera hooye, etthu Yosefe aatthunaawe waari woonihera weera owo khaakhanleno nthowa ni annaphwanela otaphuliwa. Owo aamuleelela peresu mukhwaawe aataphuliwa weera: “Mene wapuhá vavale, òkùpuwéle miyo. Txonde, okònele ehaya yomi tho, wùlumase sa miyo vamaithoni va Farawo, weera akikumihe mpani mumu.” (Eph. 40:14) Nto peresu ole aataphulinwe khuulumme etthu eyo ni Farawo aphiakaru. Nto mwaha wa yeeyo Yosefe aakhala iyaakha piili mukadeya. (Eph. 40:23; 41:1, 14) Nnaamweera vaareene hiiho Yehova aavirelela omukhavihera Yosefe. Moota heeni?

11. Owera heeni Yehova anvahaawe Yosefe, ni moota heeni eyo yaakhavihenraaya okwanihera yootthuna ya Yehova?

¹¹ Vaavo Yosefe aaraawe mukadeya, Yehova  aaheriha weera mwene a oXipitu alohe itthu piili sowoopiha. Farawo aaxupeya atthunaka wiiwexexa etthu saataphulelaaya sooloha iye, vaavo aasuwenlawe weera Yosefe annawera otaphulela sooloha, aarumiha otaphuliwa, akhaviheriwaka ni Yehova, Yosefe aawera otaphulela sooloha iye, ni owo aamusiveliha ni miruku anvanhaawe, Farawo aahoona weera Yehova annamukhavihera Yosefe, mwa yeeyo Yosefe aathanliwa weera athukumanye sootxa sootheene sa wExipitu. (Eph. 41:38, 41-44) Noovira etempu vakhaani yaakhumelela etala etokotoko wExipitu ni ilapo ikina ni oKanani weiwo yaakhalaayawo amusi awe Yosefe. Vano owo aakhalano owera wowaakhavihera amusi awe ni okosoopa erukulu eraawe ayariwe Mesiya.

12. Moota heeni Yehova aamukhavinheraawe Yosefe mwa itthu sootheene?

¹² Muupuwelele itthu sootheene sereñye mweekumini mwa Yosefe. Taani eerinhe weera Potifari amuroromeleke Yosefe yoowo aari kaporo paahi? Taani eerinhe weera mutokweene a mukadeya amureereleke murima Yosefe yoowo aari peresu? Taani eerinhe weera Farawo alohe itthu iye soowoopiha? Ni taani yeerinhe weera Yosefe awere otaphulela itthu iye? Taani aamweerihe Farawo omuthanla Yosefe weera athukumanyeke yootxa wExipitu? (Eph. 45:5) Moohihovela Yehova eeriha weera itthu sootheene Yosefe aapakaawe sikhumeleke nnene. Nnaamweera Yosefe aahasulinwe ni asinnawe, muhoolo mwaya Yehova aatxentxa itthu sawe sootheene weera akwanihere yootthunaawe.

13. Neereke Yehova onnawehaweha itthu sootheene sinnikhumelela? Muthalihe.

¹³ Eheeni ninxuttera ahu ni itthu seereñye mweekumini mwa Yosefe? Neereke Yehova onnavoleela maxupo ootheene enkhumelela mweekumini mwahu? Neereke Yehova oneeriha itthu sootheene soonanara onikhumelela weera muhoolo seereeye itthu sooreera? Hooye, khaiyene ti yeeyo Biblya onnixuttiha awe. (Koh. 8:9; 9:11) Ekhaikhai tiila, Yehova onnasuwela itthu sootheene hiyo ninviriha ahu ni onnaniiwa vaavo ninvekela ahu. (Nsal. 34:15; 55:22; Yes. 59:1) Opwaha mwa yeeyo,  Yehova onnanikhavihera naavirihaka maxupo. Nto ompaka moota heeni eyo?

14. Yehova onnikhavihera moota heeni vaavo ninvirihaahu maxupo?

¹⁴ Moota Yehova onnikhavihera awe, ori onnimaaliha ni onilipiha. (2 Akor. 1:3, 4) Tiyeeyo yeereñye ni munna mmoha onkhala oTurcomenistão oniitthaniwa Eziz owo atthukiwa mpuwa mwa iyaakha piili ni emeya mwaha wa nrororomelo nawe, owo ohimme ha: “Oxexelo wa nihiku nne kaarowaaka othorihiwa, munna mmoha aakoonihera yoolepa ya Yesaya 30:15 yeeyo eneera:“mwìtthuwá ni mwìwelelá, munolipa” yoolepa ela yaakikhavihera okhala oomaaleleya ni omuroromela Yehova mwa itthu sootheene. Ni ophimelela yoolepa ela yaakikhavihera etempu yootheene kaaraka mukadeya. Neereke nyuwo munnuupuwelela emaara Yehova ookhavihenraaweni, oolipinhaaweni ni oomaalinhaaweni emaara yeeyo nyuwo mwahaawelaanyuxa nikhavihero?

15-16. Etthu heeni nyuwo muxuttenraanyu ni ntakihero na Tori?

¹⁵ Imaara sintxipale hiyo ninnoona weera Yehova oonikhavihera wamala weereriwa wahu, murokora mmoha oneeriwa Tori aahoona eyo yeereyaka mweekumini mwawe, owo aakhalano mwanawe mmoha eeriwa Mason, owo aakhalano eretta eneeriwa câncer, ni mwaana owo aayeleela ekumi awe, nto vanooneya weera Tori aaxupeya, “Miyo kinoona weera waasimaaye khiyaavo etthu yootepa ovoreya opwaha omoona mwanaaya okhwaaka, nave kinoona weera yoole ori tiithi aamwaakhulela weera onnavoreya omoona mutthu mwanawe ahaawaka woopwaha mwaneenaaya.”

¹⁶ Yooweereya ela yaamuxupa vantxipale Tori, nto, vaawo owo aapatxera wuupuwelela moota Yehova aamukhavihera awe mwa  iyaakha sootheene iya. Olelo va, “kuupuwelaka” iyaakha sa muttuli kinnawera woona ntata noosivela na Yehova moota nikikhavihenraaya etempu ele mwanaka aavooreyiwaawe. Mwa ntakihero, “vaavo Mason aatenpaawe oneeriwa ohiwaakeleke aletto, asinna yaanneetta ikwaha soorokama ewaaka onilipiha hospitale. Mulako wa hospitale asinna khiyaathowa ewaaka okivaha nikhavihero nne miyo kaahaawelaaka. Opwaha mwa yeeyo, asinna yaanakikhavihera ni itthu saaweerutthuni, naamwi hiyo naaviriha maxupo ale hiyo naakhalano itthu naahaawelaahu.” Yehova anvaha Tori itthu sootheene weera awere ovilela ni Mason ene. Nwehe equaadru eneera: “ Yehova oonivaha etthu ele naahawelaahu.”

17-18. Eheeni enrowa onikhavihera woonexexa weera Yehova onnanikhavihera etempu ninviriha ahu maxupo, ni oxukurela eyo? (Nsalmu 40:5)

¹⁷ Musome Nsalmu 40:5. Yootthuna ya alipa enwela mwaako ophiya vasulu va mwaako, naamwi vareene hiiho, awo anneemela mapuro makina enawehexexa oreera waya. Emoha-moharu, mwiivaheke etempu weera muupuwelele moota Yehova onookhaviheraaweni nnaamwera nvirihaka maxupo. Okhwipi wa nihiku, nyuwo mwiikoheke ha: ‘Moota heeni Yehova okireelihaawe nihiku noolelo? Mweekhaikhai maxupo khemanle nto Yehova okikhavihenre moota heeni?’ Mweerereke woona etthu emoha yeeyo Yehova ooreelihaaweni.

¹⁸ Moohihovela nyuwo munnavekela weera maxupo anyu evire, ettiitthu ti wooreera opaka eyo. (Afil. 4:6) Nave ti wooreera owehexexa mareeliho nnaakhela ahu wa Yehova viinaano, mene nto, noosuwela weera Yehova ooniroromeliha weera onoonikhavihera ni onilipiha weera nivilele. Tivanto muxukureleke itthu soothesene Yehova onoovahaaweni, mweera haawo nyuwo munoowera woona ni maitho anyu weera Yehova onimookhaviherani vaavo munvirihaanyu maxupo ntoko hiihaale aamukhavihenra awe Yosefe.—Eph. 41:51, 52.