1-2. (a) Xeeni hiyo nihintikinihiwa ahu okathi sinniphwanya aya mixankiho? (b) Exeeni ninrowa ahu othokorerya mwaha ola?

 OKHALA wiira na arumeyi a Yehova, hiyo khanintikinihiwa okathi sinniphwanya aya mixankiho. Maana, ninnisuwela ele Biibiliya onihimya awe wiira: “Nihaana ohaawa vanceene nihinatthi okela Moomweneni mwa Muluku”. (Mit. 14:22) Nave hiyo, ninnisuwela wiira mixankiho sahu sikina khasinrowa omala sootheene mpakha orwa elapo esya ya Muluku. Maana elapo eyo khonrowa “okhala okhwa, nnakhala oriipiwa murima, wala wunla, hata woona owereya”. — Wiis. 21:4.

² Yehova khonikhoottiherya mixankiho onikhumelela. Masi, owo onninikhaliherya ovilela okathi sinnikhumelela aya mixankiho iyo. Nwehe ele murummwa Paulo aalenle awe makristau yaakhala oRoma. Owo onnihimya mixankiho sinceene yena ni axinna awe yaakumana aya. Nuumala-vo, owo aalempe so: “Hiyo ninnixintta moomalela mwaha wa ole oniphentale”. (aRom. 8:35-37) Eyo enooniherya wiira Yehova onoonikhaliherya oxintta khula muxankiho onniphwanya hata okhalaka muulupale. Vano, nrowe niwehe moota Yehova aamukhalihenrye awe Yosefe ni moota onrowa awe onikhaliherya.

3. Makhalelo a Yosefe yaaturukeyale sai moowaakuveya?

³ Yakobe aanimphenta vanceene Yosefe, yoowo aari mwanawe. (Maph. 37:3, 4) Mwaha wa yeeyo, axuulupale awe Yosefe yaanimukhalela nrima. Nuumala-vo, awo yaahimutumiha Yosefe, yaatumiheeryaka anamarotta oMadiyani. Moottharelana awo yaahimuroiha wExiitu, weiwo khumutumiherya Potifari murumeyi a etthoko ya mwene Farawo. Mooriipiha murima makhalelo a Yosefe yaahiturukeya moowaakuveya. Okhala wiira  aari mwaana oophentiwa ni apapawe vano khukhala epottha wExiitu. — Maph. 39:1.

4. Mixankiho xeeni ninkumana ahu sinlikana ni sa Yosefe?

⁴ Biibiliya onihimya wiira: ‘Otakhaliwa khonimuthanla mutthu’. (Mus. 9:11) Ikwaha sikina, sinniniphwanya mixankiho sinaaphwanya “atthu ootheene”, eyo piiyo, mixankiho sinaaphwanya apinaatamu ootheene. (1 aKor. 10:13) Aahiiso, hiyo pooti ohaaxiwa mwaha wookhala atthareli a Yesu. Mwa ntakiheryo, hiyo pooti oveehiwa, onyokhiwa hata olupatthiwa mwaha wa waamini wahu. (2 Tim. 3:12) Moohicikha mixankiho sinniphwanya, Yehova onoonikhaliherya oxintta. Yehova aamukhalihenrye sai Yosefe?

5. Exeeni yaamukupaliha Potifari wiira Yehova aanimukhaliherya Yosefe? (Maphattuwelo 39:2-6.)

⁵ Musome Maphattuwelo 39:2-6. Potifari aahiweha wiira Yosefe aari oosuwela ovara miteko ni ooluttuweliwa. Nave aanisuwela etthu yaamwiirinhe Yosefe okhala mutthu ooluttuweliwa. Potifari aahoona wiira ‘[Yehova] aari ni Yosefe okhala wiira aanireeriha miteko sootheene saavara awe’. b Nuuvira okathi, Potifari aahimuthanla Yosefe wiira okhale namakhaliherya awe. Nave Potifari aahimuthanla Yosefe wiira okhapeleleke etthoko awe yootheene. Exeeni yaakhumelenle? Potifari aahithaaciri.

6. Woonasa wene, exeeni Yosefe aaphavela awe okathi aakumana awe mixankiho?

⁶ Nkahaya muupuwele moota Yosefe oonela awe itthu iye sootheene saamwiiranenle. Niireke munnisuwela etthu yaamwiiriha Yosefe oluttuweliwa ovara miteko sawe? Niireke aaphavela wooniwa ni otthuveliwa ni Potifari? Tthiri etthu Yosefe aaphavela awe, yaari otaphuliwa wiira otthikele owaani aawehe apapawe. Nto nnaamwi Yosefe aarina iparakha sinceene vatthokoni wa Potifari, nlelo Yosefe aahaana omwiiwelela Potifari yoowo ahaamurumeela Yehova. Masi Yehova khaamurumenle Potifari wiira omutaphule Yosefe. Ohiya-vo, makhalelo a Yosefe yaamutepa oxankiha.

7. Makhalelo a Yosefe yaatempe sai oxankiha? (Maphattuwelo 39:14, 15.)

⁷ Ntoko Maphattuwelo ekapiitulu 39 onihimya awe, mwaara a Potifari aahisiveliwa vanceene ni Yosefe nto aaninveka ikwaha sinceene. Masi Yosefe aanikhootta orupa ni  mwaara a Potifari. Nuumala-vo, aahinanariwa vanceene ni Yosefe khumootherya wiira aaphavela omutuphela. (Musome Maphattuwelo 39:14, 15.) Okathi Potifari aiwale awe itthu iyo, owo aahimutthukwela Yosefe mukhatteya memmo aakhanle awe mwa iyaakha vakhaani. (Maph. 39:19, 20) Makhalelo yaari sai mukhatteya? Nuulumo na eheeberi Yosefe aarumenle awe noowi “mukhatteya” pooti otaphulelaka “nlitti noowiixa aahiiso nlitti ntoko epoosu”, yooniheryaka wiira Yosefe aari mweepiphini ni khaarina nlipelelo. (Maph. 40:15) Nave, Biibiliya onnooniherya wiira nuuvira okathi, Yosefe aahitthukiwa mmettoni, muxikoni ni ekwirinti. (Esal. 105:17, 18) Nave-tho, makhalelo a Yosefe yaamutepa oxankiha. Owo aari epottha yoororomeliwa vano khukhala namutthukiwa aahiiso pereso.

8. Hata mixankiho sahu sitepaka, etthu xeeni nikhanle ahu ookupaliki?

⁸ Niireke sootoko woophwanyani mixankiho sinceene hata mwanvekenle Yehova? Eyo pooti wiiraneyaka. Yehova khonikhoottiha mixankiho iyo sinikhumelelaka olumwenku ola oneettihiwa ni Satana. (1 Yoh. 5:19) Hata vari siiso, mukupaliki ela: Yehova onnisuwela itthu sootheene sinookhumelelani, ni onimookhapelelani. (Math. 10:29-31; 1 Ped. 5:6, 7) Yehova onnileiherya ohimyaka so: “Miyo nkinikhala-khala koohiyakani, nave nkinikhala-khala koonyanyalakani”. (aHeeb. 13:5) Yehova onimookhaliheryani ovilela hata okathi mixankiho sanyu sinikhala aya ntoko wiira khasinrowa omala. Nrowe niwehe moota eyo yiiraneyale aya ni Yosefe.

9. Exeeni enooniherya wiira Yehova aari ni Yosefe okathi aari awe mukhatteya? (Maphattuwelo 39:21-23.)

⁹ Musome Maphattuwelo 39:21-23. Nnaamwi Yosefe aarina mixankiho sinceene mukhatteya, Yehova aahimukhaliherya oxintta mixankiho iye. Moota xeeni? Siisaale ntoko aaroromeliwe awe ni Potifari, nuuvira okathi Yosefe aaniroromeliwa ni ottittimihiwa ni muulupale a mukhatteya. Exeeni yaamwiirinhe muulupale a mukhatteya omuthanla Yosefe wiira aakhapeleleke apereso akina? Tthiri Biibiliya onihimya wiira: “Mulupale owo khettelela miteko sanvaherenrya awe Yosefe nnákhala vakhani”. Yosefe aahikhalana muteko munceene woovara. Ale yaari marukunuxo yahaalipelela awe! Vaaweryaneyale sai pereso ootheriwe omutuphela mwaara awe mukhulupale, ororomeliwa ni ovahiwa muritti ole? Owo aahiroromeliwa ni ovahiwa muritti ole mwaha wa etthu emosa. Maphattuwelo 39:23, onihimya so: “Apwiya yaari ni yoowo. Tthiri sootheene siiraawe Apwiya yaanimukhaliherya”. (PIIPILIYA Emakhuwa.)

10. Mutthokiherye etthu yaamwiiriha Yosefe ohuupuwela wiira itthu sootheene saanimweettela saana.

¹⁰ Nrowe nimananihe wuupuwelela moota Yosefe oonela awe okathi ole. Nuumala Yosefe wootheriwa ni otthukweliwa mukhatteya, ni khuvahiwa miritti iye, niireke owo uupuwela wiira itthu sootheene saanimweettela saana? Etthu xeeni-tho ekina Yosefe aaphavela awe? Niireke aaphavela wooniwaka saana ni muulupale a mukhatteya? Nnaari, masi etthu Yosefe aaphavelexa awe vanceene, waari otaphuliwa paahi. Nave owo aahinvekela pereso mukina aarowa otaphuliwa wiira alavule ni Farawo wiira omukumihe mukhatteya mme. (Maph. 40:14) Masi, mulopwana ole khaalavunle ni Farawo okathi ene yoole Yosefe anvekenle awe. Nto, eyo yaahiiriha Yosefe okhala mukhatteya mme mwa iyaakha piili. (Maph. 40:23; 41:1, 14) Nnaamwi vari siiso, nlelo Yehova aanimukhaliherya Yosefe ni miteko sawe. Moota xeeni?

11. Owerya xeeni Yehova anvanhe awe Yosefe, nto eyo yaakhalihenrye sai wiiraneya yoolakela ya Yehova?

¹¹ Yosefe nlelo ori ene mukhatteya, Yehova  aahimwiiriha mwene a wExiitu oloha ikwaha piili. Mootikinihiwa, mwene Farawo aaniphavela osuwela ele yaataphulela aya sooloha iye. Okathi mwene aasuwenle awe wiira Yosefe aaniwerya otaphulela sooloha, owo aahimwiitthaniha. Okhaliheriwaka ni Yehova, Yosefe aahiwerya otaphulela sooloha sa mwene ni mwene aahitikinihiwa vanceene ni osuwela Yosefe aarina awe. Nuumala woona wiira Yehova aari ni mulopwana ole, mwene Farawo aahimuthanla Yosefe wiira okhale mukhulupale a elapo yootheene ya wExiitu. (Maph. 41:38, 41-44) Muhoolo mwaya, yaahikhumelela etala yinceene ohiya paahi wExiitu nave-tho elapo ya oKanaani, elapo yeeyo yaakhala aya emusi ya Yosefe. Vano Yosefe aahikhalana owerya wowoopola emusi awe, yeeyo aarowa awe okhumelela Mesiya.

12. Mwa enamuna xeeni Yehova aamureelinhe awe Yosefe?

¹² Nkahaya muupuwele mixankiho sootheene saamukhumelenle Yosefe. Ti pani aamwiirinhe Potifari osiveliwa ni Yosefe, yoowo aari epottha yahooneliwa vatthu? Ti pani aamwiirinhe mukhulupale a mukhatteya omureerela murima Yosefe, nnaamwi aari pereso? Tani aamwiirinhe mwene Farawo oloha itthu sootikiniha ni tani anvanhe owerya Yosefe wootaphulela sooloha iyo? Tani aamwiirinhe mwene Farawo omuthanla Yosefe wiira okhale mukhulupale a elapo yootheene ya wExiitu? (Maph. 45:5) Moohaanyiherya, aari ti Yehova yoowo aareelinhe miteko sootheene sa Yosefe. Wanikisa waya, nnaamwi axuulupale awe Yosefe yaaphavela omwiiva, Yehova aahituruka makhalelo awe wiira omalelihe yootthuna awe.

13. Niireke mixankiho sootheene sinnikhumelela, eyo enitaphulela wiira Yehova oniphavela onivaha itthu sooloka? Mutthokiherye.

¹³ Exeeni eniixutta ahu ni itthu saamukhumelenle Yosefe? Niireke Yehova onninikhaliherya okathi onniphwanya aya khula muxankiho? Niireke khula muxankiho onnikhumelela, eyo entaphulela wiira Yehova omphavela onivaha itthu sooloka? Nnaari maana Biibiliya khonihimya eyo. (Mus. 8:9; 9:11) Masi etthu ninsuwela ahu tiila: Okathi sinniphwanya aya mixankiho, Yehova onnisuwela ni onooniwiriyana okathi nimmuxonttela ahu wiira onikhaliherye. (Esal. 34:16; 55:23; Yes. 59:1) Ohiya-vo, Yehova  onoonikhaliherya wiira niwerye oxintta mixankiho iyo. Moota xeeni?

14. Yehova onnikhaliherya sai okathi sinniphwanya aya mixankiho?

¹⁴ Enamuna emosa Yehova onnikhaliherya awe ori onimaaliha ni onilipiha, nave ikwaha sinceene onnipaka eyo okathi wooreerela. (2 aKor. 1:3,4) Eyo ti etthu yaamwiiranenle munna mmosa iitthaniwa Eziz, onikhala oTurcomenistão yoowo aalamuliwe otthukweliwa iyaakha piili mukhatteya mwaha wa waamini wawe. Nave owo ohimmye so: “Nihiku nimosa voosiisu, munna mmosa aahikooniherya yoolepa ya Yesaya 30:15, yeeyo enihimya so: ‘Mwakiroromela ni murima, munoolipa’. Khula okathi eversiikulu iyo yaanikikhaliherya okhala oomaaleleya ni omuroromela Yehova mwa itthu sootheene. Wuupuwelela eversiikulu ele yaahikikhaliherya vanceene okathi kaari aka mukhatteya”. Niireke munnuupuwela okathi Yehova ookhalihenryaaweni oomaalihaka-ni ni woolipihani okathi wooreerela?

15-16. Etthu yaamwiiranenle murokora Catarina, enniixuttiha-ni?

¹⁵ Ikwaha sikina ninnoona wiira Yehova oonikhaliherya nuumala muxankiho owo ovira. Murokora mmosa oniitthaniwa Catarina c aahoona wiira eyo ekeekhai. Mwanawe, iitthaniwa Meison aahikhalana oretta wa kanser mwa iyaakha 6 nuumala-vo aahikhwa. Murokora owo aahiriipiwa murima vanceene. Owo onihimya so: “Mwaha wookhala maama miyo kuupuwela wiira nkaarowa owerya ovilela muxankiho ole”. Nave owo onnincererya oriki: “Kinnikupali wiira anamuyari anceene anneemererya waakhumelela mixankiho ohikhanle onweha mwanaya ohaawaka”.

¹⁶ Nnaamwi muxankiho ole waari wootepa owereya, muhoolo mwaya Catarina aahoona wiira Yehova aahimukhaliherya mwa inamuna  sinceene ovilela muxankiho ole. Owo ohimmye so: “Kuupuwelaka okathi ole, kinnoona wiira Yehova ookikhaliherya ovilela oretta wa mwanaka. Mwa ntakiheryo, okathi mwanaka aatepa awe owereiwa, anna ni arokora yaaniivahererya wiira amukuxe ni ikaaro aya amuroihaka ospitaali mukwaha waaviriha iwoora piili. Nave khula okathi anna yaanirowa ospitaali oolikaneene wiira anikhaliherye. Nave-tho anna yaaninivaha itthu saanithowa. Hata okathi yoole wootepa oxankiha hiyo naanikhalana itthu saanithowa”. Yehova aahimukhaliherya murokora Catarina vamosa ni mwanawe okathi wa muxankiho ole. Nwehe ekaaxa eni: “ Yehova Aahinivaha Itthu Naaphavela Ahu”.

17-18. Exeeni enrowa onikhaliherya wuupuwelela ni oxukhurela moota Yehova onnikhaliherya awe okathi wa mixankiho? (Esalimo 40:6.)

¹⁷ Musome Esalimo 40:6. Vakhala wiira mutthu onniwela mwaako, yoolakela awe ori ophiya vasulu. Masi aakhala mapuro manceene oneemela awe wiira owehe itthu sooloka siniphwanya awe. Mwa enamuna emosaru, nviriheke okathi muupuwelaka moota Yehova onookhaliheryaaweni hata okathi wa mixankiho. Wanikisa wa khula nihiku, mwiikoheke so: ‘Mareeliho xeeni Yehova okivahale awe olelo? Nnaamwi sikiphwanyaka mixankiho, Yehova onikikhaliherya sai ovilela?’ Nuumala-vo, mmananiheke oweha hata ekhalaka etthu emosa Yehova opanke awe wiira ooreeliheni.

¹⁸ Woonasa wene nyuwo munniviriha okathi munceene nvekelaka wiira muxankiho anyu omala-male. Tthiri eyo etthu yookhalela ni yooloka. (aFil. 4:6) Nave nihaana wuupuwelela mareeliho nirina ahu nenna-va. Yehova onnileiherya onilipiha ni onikhaliherya ovilela. Nto khula okathi mmuxukhureleke Yehova mwaha woowookhaliheryakani. Mwapaka eyo, munimoona moota Yehova onookhaliheryaaweni oxintta mixankiho ntoko aamukhalihenrye awe Yosefe. — Maph. 41:51, 52.