ARADMAN NGA ARTIKULO 3
Hi Jehova Nabulig ha Imo nga Maglampos
“Kaupod ni Jose hi Jehova . . . , ngan ginpapalampos ni Jehova an ngatanan nga iya ginbubuhat.”—GEN. 39:2, 3.
KARANTAHON 30 Akon Amay, Akon Dios Ngan Sangkay
MAHITUNGOD HAN ARTIKULO a
1-2. (a) Kay ano nga diri kita nahipapausa nga may mga problema kita? (b) Ano an aton hihisgotan hini nga artikulo?
SUGAD nga katawohan ni Jehova, diri kita nahipapausa kon may mga problema kita. Maaram kita nga an Biblia nasiring nga “kinahanglan sumulod kita ha Ginhadian han Dios pinaagi hin damu nga kasakitan.” (Buh. 14:22) Maaram liwat kita nga an pipira han aton mga problema bug-os la nga masusulbad kon nabubuhi na kita ha bag-o nga kalibotan han Dios, diin “mawawara na an kamatayon, pati an kabidoan, pagtangis, ngan kasakit.”—Pah. 21:4.
2 Diri kita ginpuproteksyonan ni Jehova tikang ha mga problema. Pero ginbubuligan kita niya nga mailob ito. Pansina an ginsiring ni apostol Pablo ha mga Kristiano nga naukoy ha Roma. Siyahan, gin-unabi niya an damu nga problema nga gin-aatubang niya ngan han iya kabugtoan. Katapos, nagsurat hiya: “Bug-os nga nagdadaog kita pinaagi ha iya nga nahigugma ha aton.” (Rom. 8:35-37) Nagpapasabot ini nga mapapalampos ka ni Jehova bisan ha panahon nga nagpapadayon an imo problema. Kitaon ta kon paonan-o ni Jehova ginbuligan hi Jose nga magin malampuson ngan kon paonan-o ka niya mabubuligan.
KON TIGDA NGA NAGBABAG-O AN KAHIMTANG
3. Ano nga tigda nga pagbag-o an nahitabo ha kinabuhi ni Jose?
3 Iginpakita han patriarka nga hi Jacob nga hinigugma gud niya an iya anak nga hi Jose. (Gen. 37:3, 4) Sugad nga resulta, an mas magurang nga mga anak nga lalaki ni Jacob nangabugho ha ira bugto. Han may nakita hira nga oportunidad, iginbaligya nira hi Jose ha usa nga grupo han mga negosyante nga Midianita. Gindara hi Jose hito nga mga negosyante ngadto ha Ehipto, nga ginatos ka kilometro an kahirayo, diin iginbaligya na liwat hiya—kan Potipar, an lider han mga gwardya han Paraon. Madagmit gud nga nagbag-o an kinabuhi ni Jose, tikang ha pagin pinaura nga anak han iya tatay ngadto ha pagin ubos nga uripon han usa nga Ehiptohanon!—Gen. 39:1.
4. Ha ano nga paagi kita bangin umatubang hin problema nga puropariho han gin-atubang ni Jose?
4 An Biblia nasiring nga “an magraot nga butang nahitatabo ha ngatanan.” (Ecles. 9:11, Holy Bible—Easy-to-Read Version) Usahay naatubang kita hin mga kakurian nga “komon nga nahitatabo ha mga tawo”—karuyag sidngon, mga problema nga naieksperyensyahan han ngatanan nga tawo. (1 Cor. 10:13) O mahimo kita mag-antos tungod la kay mga disipulo kita ni Jesus. Pananglitan, bangin tamayon, kontrahon, o pagtimarauton pa ngani kita tungod han aton pagtoo. (2 Tim. 3:12) Anoman nga problema an imo gin-aatubang, mapapalampos ka ni Jehova. Paonan-o niya ito ginbuhat para kan Jose?
Ginbuligan ni Jehova hi Jose nga maglampos bisan han ginbaligya hiya basi magin uripon ni Potipar ha Ehipto (Kitaa an parapo 5)
5. Ano an nahunahuna ni Potipar mahitungod han kalamposan ni Jose? (Genesis 39:2-6)
5 Basaha an Genesis 39:2-6. Napansin ni Potipar nga hi Jose baltok gud nga batan-on ngan maduruto nga trabahador. Maaram liwat hiya kon kay ano. Nakita ni Potipar nga ‘ginpapalampos ni Jehova an ngatanan nga ginbubuhat ni Jose.’ b Ha kamaihaan, ginhimo hini nga Ehiptohanon hi Jose nga iya personal nga kabulig. Ginpadumara liwat niya kan Jose an iya bug-os nga panimalay. Ano an resulta? Nag-asenso hi Potipar.
6. Ano an bangin inabat ni Jose ha iya sitwasyon?
6 Imadyina kon ano an inabat ni Jose. Ano gud ba an iya karuyag? An mapansin ngan balosan ni Potipar? Mas daku an posibilidad nga karuyag ni Jose nga magkaada kagawasan basi makabalik hiya ha iya tatay. Kay kon huhunahunaon, bisan pa han ngatanan nga pribilehiyo ni Jose ha panimalay ni Potipar, uripon la gihap hiya hin pagano nga agaron. Waray pagiosa ni Jehova hi Potipar nga tagan hi Jose hin kagawasan. Ngan an sitwasyon ni Jose nagin mas maraot pa gud.
KON MAGIN MAS MARAOT AN SITWASYON
7. Ha ano nga paagi mas nagtikaraot an kahimtang ni Jose? (Genesis 39:14, 15)
7 Sugad han iginsusumat ha Genesis kapitulo 39, naruyagan han asawa ni Potipar hi Jose ngan ginsinulay hiya nga makighilawas ha iya. Ha kada pagsusulay niya, nagdudumiri hi Jose. Ha urhi, nasina gud hiya kan Jose salit gin-akusaran niya hi Jose nga nagsari kuno paglugos ha iya. (Basaha an Genesis 39:14, 15.) Pakabati ni Potipar hini, iya ginpriso hi Jose, ngan nagpabilin didto hi Jose hin pipira ka tuig. (Gen. 39:19, 20) Ano an kahimtang ha prisohan? An Hebreo nga pulong nga gin-gamit ni Jose para ha “prisohan” mahimo mangahulogan hin “tirokan hin tubig,” o “buho,” nga baga hin nagpapasabot nga masirom an iya palibot ngan inabat hiya hin kawaray-paglaom. (Gen. 40:15; ftn.) Iginpapakita liwat han Biblia nga ha sulod hin pipira ka panahon an mga tiil ni Jose nakagapos hin kadena ngan an iya liog nakabutang ha mga puthaw. (Sal. 105:17, 18) Mas nagtitikaraot na an kahimtang ni Jose. Tikang ha pagin tinaporan nga uripon, nagin ubos nga priso hiya.
8. Bisan kon magtikagrabe an usa nga problema, ha ano kita makakasiguro?
8 Nakaeksperyensya ka na ba hin makuri gud nga sitwasyon nga mas nagtikaraot la bisan pa han imo paniguro ha pag-inampo? Puydi ito mahitabo. Diri kita ginpuproteksyonan ni Jehova tikang ha mga problema ha kalibotan nga ginmamandoan ni Satanas. (1 Juan 5:19) Bisan pa hito, makakasiguro ka hini: Maaram gud hi Jehova han imo gin-aagian, ngan nahigugma hiya ha imo. (Mat. 10:29-31; 1 Ped. 5:6, 7) Dugang pa, nagsaad hiya: “Diri ko gud ikaw babayaan, ngan diri ko gud ikaw pababay-an.” (Heb. 13:5) Hi Jehova makakabulig ha imo nga makailob bisan ha panahon nga baga hin waray na paglaom an imo kahimtang. Kitaon ta kon paonan-o ito nahitabo kan Jose.
Hi Jehova kaupod ni Jose bisan han priso hiya ngan igintapod ha iya an ngatanan nga priso (Kitaa an parapo 9)
9. Ano an nagpapakita nga hi Jehova kaupod ni Jose han priso hiya? (Genesis 39:21-23)
9 Basaha an Genesis 39:21-23. Bisan hinin makuri nga panahon han kapriso, ginpalampos ni Jehova hi Jose. Paonan-o? Inabot an panahon nga hi Jose gintaporan ngan ginrespeto han hitaas nga opisyal, pariho han ginbuhat hadto ni Potipar. Waray pag-iha, igintapod han hitaas nga opisyal kan Jose an iba nga mga priso. Ngani, an Biblia nasiring nga “diri na gud ginpapanginano han hitaas nga opisyal han prisohan an igintapod kan Jose.” May-ada na yana mapupokusan hi Jose—mapulsanon nga buruhaton. Diri gud adto ginlalaoman nga pagbag-o! Kay ano nga an priso nga gin-akusaran nga nagsari paglugos ha asawa han usa nga opisyal ha palasyo gintaporan hin sugad nga posisyon? Usa la an rason. Sugad han ginsisiring han Genesis 39:23, “hi Jehova kaupod ni Jose ngan ginpapalampos ni Jehova an bisan ano nga iya ginbubuhat.”
10. Isaysay kon kay ano nga bangin waray umabat hi Jose nga malampuson hiya ha tanan nga butang.
10 Imadyina utro an gin-abat ni Jose. Katapos akusaran hin sayop ngan mapriso, ha imo paghunahuna, inabat ba niya nga malampuson hiya ha tanan nga butang? Ano gud ba an karuyag ni Jose? An makarawat an pag-uyon han hitaas nga opisyal han prisohan? Mas daku an posibilidad nga karuyag ni Jose nga maabswelto ngan makagawas. Ginhangyo pa ngani niya an usa nga priso nga hirani na pagawson nga unabihon hiya ha Paraon basi makagawas na hiya hiton nakakadepres nga prisohan. (Gen. 40:14) Pero ito nga tawo waray dayon makiistorya ha Paraon. Salit hi Jose nagpabilin dida hito nga prisohan hin duha pa ka tuig. (Gen. 40:23; 41:1, 14) Bisan pa hito, padayon nga ginpalampos hiya ni Jehova. Paonan-o?
11. Ano nga espesyal nga abilidad an iginhatag ni Jehova kan Jose, ngan paonan-o ito nakabulig ha pagtuman han katuyoan ni Jehova?
11 Samtang priso hi Jose, ginpahinabo ni Jehova nga an hadi han Ehipto magkaada duha nga nakakapabaraka nga inop. Karuyag gud mahibaroan han Paraon an kahulogan hito. Han nahibaroan han hadi nga hi Jose may abilidad nga mag-interpretar hin mga inop, iya iginpatawag hi Jose. Ha bulig ni Jehova, gin-interpretar ni Jose an mga inop ngan naimpres an Paraon ha iya praktikal nga sagdon ha iya. Nasantop han Paraon nga hi Jehova kaupod ni Jose, salit iya ginpili ini nga batan-on nga magin administrador han pagkaon ha bug-os nga Ehipto. (Gen. 41:38, 41-44) Ha urhi, nagkaada duro nga gutom nga nakaapekto diri la ha Ehipto kondi pati liwat ha Canaan, an tuna diin naukoy an pamilya ni Jose. Matatalwas na yana ni Jose an iya pamilya ngan hito nga paagi matitipigan an tulin nga pagtitikangan han Mesias.
12. Ha ano nga mga paagi ginpalampos ni Jehova hi Jose?
12 Hunahunaa an urusahon nga mga panhitabo ha kinabuhi ni Jose. Hin-o an nagpagios kan Potipar nga tagan hin atensyon hi Jose, nga uripon la? Hin-o an nagpagios ha hitaas nga opisyal han prisohan nga magpakita hin pag-uyon kan Jose, nga ubos nga priso? Hin-o an naghatag ha Paraon hin nakakapabaraka nga mga inop ngan naghatag kan Jose han abilidad nga ig-interpretar ito? Hin-o an nagmaniobra han desisyon nga tuinan hi Jose nga magin administrador han pagkaon ha Ehipto? (Gen. 45:5) Klaro nga hi Jehova an nagpalampos han tanan nga ginbuhat ni Jose. Ha kataposan, an maraot nga plano han kabugtoan ni Jose ginhimo ni Jehova nga paagi basi matuman Niya an Iya kaburut-on.
KON PAONAN-O KA GINPAPALAMPOS NI JEHOVA
13. Nanginginlabot ba hi Jehova ha tagsa nga sitwasyon nga aton gin-aatubang? Isaysay.
13 Ano an aton mahibabaroan ha rekord parte kan Jose? Nanginginlabot ba hi Jehova ha tagsa nga sitwasyon nga aton gin-aatubang? Ginmamaniobra ba niya an tagsa nga panhitabo ha aton kinabuhi, salit may maopay nga rason an tanan nga magraot nga butang nga nahitatabo? Diri, an Biblia diri nauyon hito nga panhunahuna. (Ecles. 8:9; 9:11) Pero maaram gud kita hini: Kon may-ada kita problema, maaram hito hi Jehova ngan namamati hiya ha aton mga pangaraba para hin bulig. (Sal. 34:15; 55:22; Isa. 59:1) Labot pa hito, hi Jehova makakabulig ha aton nga mailob an mga kakurian. Paonan-o?
14. Paonan-o kita ginbubuligan ni Jehova ha mga panahon han kakurian?
14 Usa nga paagi nga hi Jehova nabulig ha aton amo an pagliaw ngan pagdasig ha aton, agsob nga ha eksakto gud la nga panahon. (2 Cor. 1:3, 4) Ito an nahitabo kan Eziz, usa nga brother ha Turkmenistan nga ginsentensyahan hin duha ka tuig nga kapriso tungod han iya pagtoo. “Han aga nga bibistahon ako,” siring niya, “iginpakita ha akon han usa nga brother an Isaias 30:15, nga nasiring: ‘Magigin makusog kamo kon magpapabilin kamo nga kalmado ngan masarig kamo.’ Ini nga bersikulo nakabulig ha akon nga magpabilin nga kalmado ngan isarig kan Jehova an ngatanan. An pagpamalandong hini nga bersikulo nakabulig ha akon ha bug-os nga panahon nga priso ako.” May nahuhunahuna ka ba nga panahon ha imo kinabuhi nga ginbuligan ka ni Jehova pinaagi ha pagliaw ngan pagdasig ha imo han ginkikinahanglan mo gud ito?
15-16. Ano an imo nahibaroan ha eksperyensya ni Tori?
15 Agsob nga kon tapos na an usa nga kakurian, dida la naton nasasantop kon paonan-o kita ginbuligan ni Jehova nga mailob ito. Napamatud-an han sister nga hi Tori nga tinuod ito. An iya anak nga lalaki nga hi Mason may kanser ha sulod hin unom ka tuig tubtob nga namatay hiya. Salit masurub-on gud hi Tori. Siring niya, “Para ha akon, ini na an pinakamasakit nga nahitabo ha akon sugad nga nanay.” Nagsiring liwat hiya, “Sigurado ako nga mauyon an iba nga mga kag-anak nga mas makuri makita nga nag-aantos an imo anak kay ha ikaw mismo an nakakaeksperyensya hito.”
16 Pero bisan kon makuri gud ito nga problema, ha urhi ginhunahuna ni Tori kon paonan-o hiya ginbuligan ni Jehova nga mailob ito. “Kon gindudumdom ko an mga panhitabo,” siring niya, “nakikita ko an mahigugmaon nga bulig ni Jehova ha bug-os nga panahon nga may sakit an akon anak. Pananglitan, bisan han grabe na hi Mason salit diri na niya kaya kumarawat hin mga bisita, an kabugtoan nabiyahe hin duha ka oras ngadto ha hospital. Pirme may tawo ha waiting room—nga andam ngan naruruyag bumulig. Igintagana liwat nira an amon materyal nga panginahanglan. Bisan ha pinakamakuri nga panahon, waray gud kami makulangi.” Iginhatag ni Jehova kan Tori an iya ginkikinahanglan basi makailob, ngan ginbuhat liwat Niya ito para kan Mason.—Kitaa an kahon nga “Iginhatag ni Jehova ha Amon Kon Ano Gud an Amon Ginkikinahanglan.”
PIRME HUNAHUNAA AN MGA BENDISYON HA IMO
17-18. Ano an mabulig ha aton nga makita ngan maapresyar an suporta ni Jehova ha mga panahon nga may problema kita? (Salmo 40:5)
17 Basaha an Salmo 40:5. Tumong han usa nga mountain climber nga makaabot ha pungkay han bukid. Pero damu an mga lugar ha iya ruta diin puydi hiya humunong ngan mag-enjoy han kahusay han palibot. Ha pariho nga paagi, pirme paghatag hin panahon nga humunong ngan hunahunaon kon paonan-o ka ginpapalampos ni Jehova bisan ha panahon nga gin-iilob mo an usa nga kakurian. Ha kataposan han tagsa nga adlaw, pakianhi an imo kalugaringon: ‘Ha ano nga paagi ko nakita nga ginbendisyonan ako ni Jehova yana? Bisan kon nagpapadayon pa an problema, paonan-o ako ginbubuligan ni Jehova nga makailob?’ Kitaa kon may mahuhunahuna ka nga bisan usa la nga bendisyon tikang kan Jehova nga nagpalampos ha imo.
18 Oo, bangin nag-aampo ka nga matapos na unta an imo problema. Natural la ito ngan angayan. (Fil. 4:6) Pero kinahanglan mo liwat hibaroan an mga bendisyon nga may-ada kita yana. Kay kon huhunahunaon, nagsasaad hi Jehova nga iya kita paparig-unon ngan bubuligan nga makailob. Salit magin mapasalamaton pirme ha suporta ni Jehova ha imo. Kon bubuhaton mo ito, makikita mo kon paonan-o ka ginbubuligan ni Jehova nga maglampos, sugad han iya ginhimo para kan Jose, bisan ha mga panahon nga may problema ka.—Gen. 41:51, 52.
KARANTAHON 32 Dapig kan Jehova!
a Kon nag-aagi kita hin makuri nga problema, bangin diri naton hunahunaon nga “malampuson” kita. Bangin hunahunaon ta nga aplikado la an sugad nga pulong kon tapos na an aton problema. Pero an mga panhitabo ha kinabuhi ni Jose nagtututdo ha aton hin importante nga leksyon—hi Jehova makakabulig ha aton nga maglampos bisan ha panahon nga nagpapadayon pa an aton mga problema. Isasaysay hini nga artikulo kon paonan-o.
b Inin siyahan nga mga pagbag-o ha pagin uripon ni Jose iginsusumat han Biblia ha pipira la nga bersikulo, pero posible nga nahitabo ito ha paglabay han pipira ka tuig.
