1-2. (a) Nalende ombun kenem bol min wonom kunum, malmal nasmen? (b) Yu duwom pi enamen bar, nawal omukro kanamen?

 JOHOVA alambem man meimen, ombun kenem bol min wonom, malmal nasmen. Kenem pilkane esmen Baibel dom, “Got Gapman tawol enda bar tuwal moramen ne pinjin dal, ombun puli kaunamen” padom. (Apo 14:22) Kenem pilkane esmen, ombun pende yipe kaumon pornaninda, papundo se kunum kol tuwal punamen. Kunum ele, “gosmon mem, kumbol ombun si ke ne, nganj ngimbil simen porninda.”—Rev. 21:4.

² Ombun porpor kenem bol min wonom, Johova gul nanem. Ba olom kenem pakerondo, akilgi ne ombun e kaumon. Aposol Pol komna, Rom Kristen monjip yu nim, buro pisamen. Olom yero pilgi ding angam man, ombun pende kaujip mal nim. Bulto embe nim: “Kenem kankawei wei kanim ye, wusngam a wal porpor kenem bol min wonom, tomene kesmen panim.” (Ro. 8:35-37) E tadom ombun pamora, ba Johova pakerondo kaunamen kaple enem. Yipe yu duwom enamen bar, komna Johova, Josep nalmal pakerom ala kenem nalmal, pakeronda mal kanamen.

3. Josep nomolpa erim bar, nal ombun ende wamnam min wom?

³ Jekop, ngangem Josep kankawei wei kanem. (Stt. 37: 3, 4) Embe erim bar, Jekop ngangem man Josep kin kumbol kes tonjip. Embe pile, Midian ye nom pende wonjip bar olom ngo ku sinjip. Ala ye nom walem e, olom sise kulu kolbar Isip punjip. Josep ala— ku bolngo, Fero ami ye kerma Potitar toprosim. Kunum ele wamnam wei, Josep kin wal jel mal min wom, Dam olom kankanim pornim, olom Isip alamb kongan nip ye mom!—Stt. 39:1.   

4. Josep ombun kauwum, kenem nalmal ding mal kaunamen?

⁴ Baibel, “ombun alamb porpor bol min wonom pandom.” (Ekl. 9:11, Holy Bible—Easy-to-Read Version) Kunum pende “alamb puli”—kauwum ombun kenem kaumon eri. (1 Kor. 10:13) Mo kenem Jises disaipol ende meimen bar, ombun kaunamen eri. Ende embe mal, kenem pilgi nimen wal erkelde, alamb kenem to yu kuram, opyem enam, mo to karpos keram eri. (2 Tim. 3:12) Nal ombun ende min wonda, Johova nim pakerondo akilgi ne kaudol. Olom Josep kin nalmal embe erim?

5. Nalernge Potifar Josep, wal porpor erim woka pum, Johova pakeronom panim? (Stat 39:2-6)

⁵ Stat 39:2-6 gere. Potifar pilkane erim, Josep ye gal ombolom bol wei mom, ala kongan ombol wei erim. Nalmem pange, wal embe mal min wom, Potifar pilkane erim. Olom pilkane erim, “Johova erkelnge [Josep] wal porpor erim, wo kaeri” pum. b Bulto, Potifar erkelnge Josep olom garwom kol kongan ye mom, ala wal porpor kantawol erim eri. Embe erim bar nawal min wom? Potifar kin wal ka min wom.

6. Josep olom kin wal min wom bar, nalne pim?

⁶ Josep nawal olom bol min wonda ne, pim mal buro pile. Nawal ende olom bol min wonda kapim. Olom kongan ka erim bar, Potifar pilkane ere, topum ka ngonda nepim mo? Kenem pilkane esmen, olom karpos pam kelnde priari pu, dam ala kanal nepisa pim. Josep, Potitfar gara wal porpor mom kantawol erim, ba olom Johova lotu ernangom ye, kongan nip ye mom. Johova, Potifar bunuman ngondo,  Josep kelnde priari punda ne narim. Josep kin ombun wose kerma punda mal pam.

7. Josep kin ombun pam, nalmal wose kerma pum? (Stt. 39:14, 15)

⁷ Stat sapta 39 dom, Potifar ambiem Josep kankawei wei kane, kunum puli wur ding panabel ne erim, ba Josep olom tuirom. Embe erim bar, kumbol mul si Josep na ngujinal ne enem pane, yu gend nim. (Stat 39:14, 15 gere.) Potifar yu e pim kunum, Josep to karpos kelnge, kongar pende pam. (Stt. 39:19, 20) Karpos gar nalmal wei sem? Ibru yu “karpos” pane Josep nim e, yu mem embe, “tupo” ende mal meneto emil wei ernge, ori wonam kaple narim e pilnim. (Stt. 40:15, ftn.) Baibel taninde pilkane esmen, Josep sibem sein to, numun a ain pakjip. (Sng. 105:17, 18) Josep kin ombun pam wose kerma wei pum. Olom kongan nip ye ka ende mom, ba olom ye kes mal kane kenjip pu karpos pam.

8. Kenem ombun wo kerma punda, ba namal pakeronda ne pilgi ninamen?

⁸ Nim ombun kerma wei kauwo, kumbola wei pile yane don, ba ombun pornadom. Satan mal tawol enem bar, ombun puli kenem bol min wonda, ba Johova ombun porpor to pornaninda. (1 Jo. 5:19) Ba, nim pilgi wei nindel: Nal ombun ende nim kauno, Johova pilkane enem, embe pile, nim pilngo dongal ngondo kaudol. (Mt. 10:29-31; 1 Pi. 5:6, 7) Olom yu pende eri ne, embe nim: “Na nim wak wei naronal ala nim bulwei nangonal.” (Hib. 13:5) Ombun min wonda Johova nim pakerondo, kauwo akilgi nindel. Wal embe, Josep bol min wom mal kanamen.

9. Josep karpos pam kunum, nawal pende taninde pilkane esmen, Johova olom bol weieri mom? (Stat 39:21-23)

⁹ Stat 39:21-23 gere. Josep karpos pam kunum, Johova erkelnge wal ka olom kin min wom. Nawal min wom? Potifar, Josep bol pilgi nim mal, karpos tawol erim ye, olom bol pilgi nim eri. Kanan wonapungo, karpos tawol erim ye Josep karpos ga pende kantawol endel panim. Baibel dom, “karpos kantawol erim ye, olom wal porpor Josep angela kelnge, kantawol erim.” Kunum ele Josep bunuman puli nakem, nalerim olom enda—kongan puli mom. Min nawond nepim wal min wom! Karpos ye, kot gar kongan erim ye, ambiem ngujinal ne erim ye, nalmal kongan kerma embe mal ngonam? Stat 39:23 dom, “Johova, Josep bol molo, wal porpor erim erkelnge woka pum.”

10. Nalernge Josep wal porpor enal, woka napunda nepim mal yu bolto.

¹⁰ Josep namal pim mal buro pile. Olom yu gend nengo, to sip karpos kenjip kunum, olom bol wal porpor woka punda nepim mo? Nalwal ende Josep bol min wonda ne, kawei wei pim? Olom wal pende erim bar, karpos tawol erim ye, olom bol kapisa nepim mo? Josep bunuman kerma ende pam e, karpos pam wakro kerambe priari punal nepim. Olom karpos seori punda erim ye nengo, nim pu Fero nekeli na karpos pai, kelde ori punal panim. (Stt. 40:14) Ba ye e, pu Fero wamnam ne nangom. Ne nangom bar, Josep kongar tal ala karpos pam. (Stt. 40:23; 41:1, 14) Embe pamba, Johova erkelnge olom bol wal ka anjngo min wom. Nalmal embe erim?

11. (a) Johova nalmal erkelnge, Josep wal puli enda kaple erim? (b) Wal e, nalmal erkelnge Johova kapim wal weieri min wom?

 ¹¹ Josep karpos pamom kunum, Johova erkelnge Isip king wur kubanj ombolom bol tal kanim. Fero bunuman dongal wei pam, wurkubanj tal, mem kanpol tonal nepim. Embe pile, Fero, Josep wur kubanj mem neori kelkel erim paninjip pim kunum, pune tuya nim. Johova, Josep pakerongo wurkubanj mem ne king ngo, ala wal pende enda mal, negom eri. Fero pilkane erim, Johova, Josep bol mom pile, olom kulu Isip porpor mokun kantawol enda panim. (Stt. 41:38, 41-44) Bulto, komb kono kerma keswei sem, e kulu Isip mongse ma, kulu Kenan Josep pemili aiem man monjip bar pra. Josep pemili aiem man, kantawol er siyem kera kunum min wom, nalerim, olom talap wusngam a Mesaia min wonda pam.

12. Nal wusngam pende Johova erkelnge, wal ka Josep bol min wom?

¹² Wal jelmal pende, Josep kin min wom mal, buro pile. Namal wei erkelnge Potifar, kongan nip ye Josep bol kapim? Namal erkelnge karpos tawol erim ye, Josep kankanim? Namal wei erkelnge, king Fero wur kubanj ombolom bol tal kanim, ala namal bu ka ngongo Josep wur kubanj mem neori kem? Namal wei erkelnge Josep Isip tuwalto, mokun kantawol enda paninjip? (Stt. 45:5) Weieri, kenem pilkane esmen, Johova mongse erkelnge Josep wal ka puli olom kin min wom. Johova erkelnge, Josep angam man mambnem kes enjip wusngam a, Johova kapim wal weieri min wom.

13. Ombun porpor kenem kaumon, Johova kantawol nanem ba olom kankelde min wonom mo? Yu bolto.

¹³ Josep yu bolom omukro kanjin bar, nawal kerma duwom esmen? Ombun porpor kenem kin wonom, Johova pakero kantawol enem mo? Kenem  nomolpa esmen bar, ombun porpor kaumon Johova kantawol naere, kankelde kenem bol min wonom mo? Mawei, Baibel yu embe nadom. (Ekl. 8:9; 9:11) Embe paim ba, kenem pilkane esmen: Ombun kenem bol min wondo, ke ne Johova pakera ne yane  nimen kunum, olom weieri pilkane enem. (Sng. 34:15; 55:22; Ais. 59:1) Johova kenem pakero dongal ngondo, ombun kauwo akilgi ninamen kaple enem. Olom kenem nalmal pakeronda?

14. Ombun min wonom kunum, Johova kenem nalmal pakeronom?

¹⁴ Wusngam ende Johova kenem pakeronom e, dongal na kumbol amin ngonda yu, kunum kun ngonom. (2 Kor. 1:3, 4) Wal embe mal angjen Eziz, kulu Turkmenistan meim bol min wom, olom pilgi nim bar kongar tal, to karpos kenjip. Angjen embe nim: “Ombun na bol min wom, kinimba kot punal ne erind kunum,” pilgi ding “angna ende, Aisaia 30:15 a, yu pam tanim. Yu ele paim embe nim: ‘Enem kine molo, na bol pilgi ninjip dal, dongal moram.’ Wes e, na pakerongo kine molo, Johova pakeronda ne pilgi nind. Na karpos pand kunum, wes e kunum kunum buro pinjip na pake weirom.” Kunum ende nim pake sindel ambsik pam, Johova nim pakero dongal ngom mo?

15-16. Tori bol wal min wom bar, nim nawal duwom enen?

¹⁵ Kunun puli, ombun min wonom kunum Johova pakeronom pilkane nasmen, ba ombun porninde, bulto pilkane esmen. Wal embe mal ambajen Tori bol min wom. Ambajen e, ngangem Mason kes kensa kongar 6-poro pam, ala olom kongar 14 mom kunum gom. E erkelnge ambajen kes wei pim. Olom embe nim, “na ngal  manjep ende moral kunum, ombun embe mal nawonda nepinjip mal, min wom.” Olom yu pende embe nim, na weieri ninal, ngal danjep manjep, ngaljep man ombun kauwum kunum, enjep ngimbil sim e, pase minto pu, enjep enjep ombun pande nganj ngimbil sim e ngonom.”

 ¹⁶ Ombun kerma ambajen Tori bol min wom, ba bulto, Johova olom nalmal pakerom, mal buro pim. Olom embe nim, “na buro yem kel pis kunum,” pilkane erind, Johova na ngangna bol kanka mem tanim. E embe mal, na ngangna kes wo kerma wei pum kunum, yu ninda kaple narim, ba angjen ambajen man anj dunglom 2- aua mal kele, olom ausik gar pambar pupo enjip. Angjen ambajen man pende pu, ausik gar, pakeronamen ne kui—molmolo enjip. Ala kil nganj wal ambjik pam, pra pakerojip eri. Embe pile, ombun wo kerma pum kunum, kil nganj wal ende tabem wei narim. Johova ambajen Tori na olom ngangem bol sinabel ambjik pam wal, kunum kun ngongo si ombun pam kauwo akilgi ninjil.”—“ Johova Kenem Ambsik Paim Wal Ngo, Kaple Enem” pane yu boks a paim kane.

17-18. Ombun duwom pam kunum Johova nim pakrom, nalmal pilkane ere sangiyo nindel? (Sng 40:5)

¹⁷ Buk Song 40:5 gere. Kibem mingnem alamb, olom bunuman kerma paim e, semin kibem mulom a wei punal nepisem. Ba olom kibem ming min punda bar, ipal pende mol kapil si, kulu pende kanja dumam sem. Embe ding mal, ombun ende nim bol min wonda, ba nim kunum pende kele, Johova nim nalmal pakerongo, wal ka pende nim bol min wonom mal, kunum kunum buro pisel. Kunum dingding ne, nimnem ki embe sindel: ‘Yipe kunum Johova wal ka ende, na ngom mo?’ Ombun min wo pamora, ba Johova nalmal pakerondo akilgi don? Johova nim pakerongo wal ka ende, nim kin wom mal buro pile.

¹⁸  Weieri, ombun kenem bol min wonom kunum, Johova pakeronda ne yane nimen. Embe esmen bar alla napaim. (Fili. 4:6) Ba wal ka pende yipe kenem bol min wonom mal, buro pisamen eri. Wal nawal min wonda, Johova kenem pakerondo, akilgi ninamen padom. Embe pile Johova, Joseph pakerongo akilgi ne ombun kauwum mal, nim pra pakeronda ne pilgi wei nindel.—Stt. 41:51, 52.