1-2. a) Nan̈ino atsika tsy gaga izikoa misy fitsapan̈a avoa atsika? b) Ino raha hidinihintsika amy lahatsoratra ty?

 TSY gaga atsika panompony Jehovah izikoa miatriky fitsapan̈a. Baiboly baka efa nivolan̈a fa ‘atsika tsy maintsy miatriky raha sarotro maro zay vo tafiditry amy Fanjakan̈any Zan̈ahary.’ (Asa. 14:22) Haintsika koa fa efa amy donia vaovao an̈y problemo sasany vo tsy ho hisy eky. Fotony amy zen̈y “fahafatesan̈a tsy ho hisy eky, alahelo tsy ho hisy, tarain̈y tsy ho hisy, tehotehoko tsy ho hisy.”​—Apok. 21:4.

² Atsika tsy arovany Jehovah tsy ho voany problemo. Fa ndray zen̈y, atsika ampiany hiatriky izio. Aleva onon̈o raha nivolan̈iny apostoly Paoly tamindro Kristianin̈y ta Roma. Izy antsendriky nitanisa raha sarotro maromaro niain̈any ndreky tojy rahalahiny. Baka tio izy nanoratra karaha ty: ‘Atsika miboaka ho pandresy tsarabe, fotony araiky tia atsika io man̈ampy atsika.’ (Rom. 8:35-37) Dikanizen̈y, vitany Jehovah man̈ampy anao hahomby nata amy fotoan̈any anao mbala an̈atiny problemo. Alô baka zahavantsika karakory nataony Jehovah nan̈ampy Josefa, ndreky akory koa han̈ampiany anao.

3. Ino fiovan̈a tampoko nisy tamy fiain̈anany Josefa?

³ Tiany Jakoba mare Josefa zanakanany. (Gen. 37:3, 4) Hitaniry zokiny raha zen̈y ke iro nafana fô Josefa mare. Iro koa fa nahita hiriky, direkty izy nalafondro tamy pivarotro midianita. Ke Josefa nindesindro pivarotro aby io ta Ezipty,  anjatony kilometara miala amy tany nisy izy. Koa fa navy tan̈y, izy nalafondro tamy Potifara, sefony piambin̈y Farao. Niova tampoko fiain̈anany Josefa! Tamindro tan̈y, izy olo farany tiany babany, fa betibetiky tio izy nanjary andevony Ezipsianin̈y.​—Gen. 39:1.

4. Karaha Josefa, ino koa raha mety avoa atsika?

⁴ Baiboly mivolan̈a fa “olo jiaby samy mety ho voa raha ratsy.” (Mpito. 9:11, Baiboly Masin̈y​—Dikanteny Mora Vakin̈y, angiley) Problemo aby avoa atsika io efa raha “pahazo olo jiaby.” (1 Kor. 10:13) Fa misy fotoan̈a koa atsika mijaly fotony atsika pan̈aradia Jesosy. Baka amy finoan̈antsika, ohatra, mahavy atsika mety halainolo baraka, toherindro, na koa hinjehindro foeky. (2 Tim. 3:12) Fa ndray ino fitsapan̈a atrefinao, Jehovah afaka man̈ampy anao hahomby. Karakory ma nan̈ampiany Josefa?

5. Ino raha hitany Potifara nampahomby Josefa? (Genesisy 39:2-6)

⁵ Vakia Genesisy 39:2-6. Hitany Potifara fa Josefa tsaiky lelahy farandraha mahay raha sady mavitriky miasa. Hainy ino antony nahavy zen̈y, fotony hitany fa “nataony Jehovah nahomby lan̈iany raha nataony [Josefa].” b Ke Josefa nanjary natokisany Potifara mare. Josefa nitindreny hiandraikitry raha jiaby tantran̈onany. Ke vokany, loso niadan̈a mare Potifara.

6. Mety ino tsapany Josefa tamy raha navoa izy?

⁶ Ino raha tsapanao izikoa anao tamy plasiny Josefa? Izy ma nan̈iry ho hitany Potifara avio hamezany kadô, sa ino raha ten̈a niriny? Azo antoko fa izy nan̈iry ho afaka andevo, amy zen̈y izy mahavita mody amy babany an̈y. Sady ndray tio tombontsoa jiaby nazony tantran̈ony Potifara tao, Josefa mbala andevonolo tsy manompo Jehovah fo. Jehovah tsy nan̈ano raha hahavy Potifara hamosotro Josefa. Nahainandombolombo fo koa raha navoa Josefa koa fa nandeha fotoan̈a.

7. Karakory nahavy problemony Josefa nahainisôsoko fo? (Genesisy 39:14, 15)

⁷ Tantarainy Genesisy toko faha-​39, fa vadiny Potifara setry tamy Josefa ke  nikatsikatsiky izy fo. Fa Josefa tsy nan̈eky hiaraka taminany. Tamy farany, romotro viavy io ke Josefa nataony seky han̈olan̈a izy zen̈y. (Vakia Genesisy 39:14, 15.) Potifara koa fa naharen̈y zen̈y, Josefa nampidiriny tamy prizon. Ke izy nigadra tao tan̈atiny taon̈o maro. (Gen. 39:19, 20) Karakory ma tan̈aty prizon io tao? Dikany volan̈a hebreo nampiasainy Josefa ivolan̈ana “prizon” io “lavaka famorian̈a rano”, na “lavaka.” Nety nahiziky tao, ke nampakivy izy. (Gen. 40:15; l.p.a.) Tsy zen̈y fo, Baiboly koa mivolan̈a fa nisy fotoan̈a vitiny Josefa nitadian̈a tamy silisily avio vozon̈onany nasian̈a gadra vy. (Sal. 105:17, 18) Nahainisôsoko fo jaliny Josefa. Izy andevo natokisan̈a mare, kanefa tio fo nampidirin̈y prizon.

8. Ino raha mety atokisantsika ndray mahaimaresaka problemontsika?

⁸ Efa nisy fotoan̈a ma anao nifen̈y mare nivavaka momba problemonao, kanefa raha io nahainandombolombo fo? Mety hiboaka ankitin̈y raha karaha zen̈y. Jehovah tsy miaro atsika tsy ho voany fitsapan̈a amy doniany Satana ty. (1 Jaona 5:19) Fa ndray zen̈y, matokisa fa hitany Jehovah raha jiaby hiaretanao avio izy ten̈a mikarakara anao. (Mat. 10:29-31; 1 Pet. 5:6, 7) Tsy basinizen̈y fa izy efa nampan̈anten̈a karaha ty: “Zaho tsy hiala anao foeky. Tsisy andra han̈ariako anao!” (Heb. 13:5) Nata efa karaha tsy ho voavaha problemo mahazo anao, tsarova fa Jehovah afaka man̈ampy anao. Alô zahavantsika raha nandalo tamy Josefa.

9. Karakory ahitan̈a fa Jehovah nitahy Josefa taminizy nigadra? (Genesisy 39:21-23)

⁹ Vakia Genesisy 39:21-23. Ten̈a tsy nora raha navoa Josefa taminizy nigadra. Fa ndray zen̈y, izy mbala nataony Jehovah nahomby fo. Tamy fomba akory? Koa fa nandeha fotoan̈a, sefony prizon io nanjary natoky sady nan̈aja Josefa, karaha izy tamy Potifara in̈y. Baka tio Josefa nataony sefo io niandraikitry gadra jiaby. Baiboly mitantara fa ‘tsisy raha nampiasaloha sefony prizon io raha jiaby nirahiny nikarakarainy Josefa.’ Nahazo asa tsara Josefa, ke nanjary nisy raha nahavarian̈a izy. Zay raha tsy nampoizin̈y foeky! Aia ke olo efa natao nitady han̈olan̈a vadiny tandapany Farao, tio fo nanjary natokisan̈a ke nahazo andraikitry maventy karaha zen̈y! Raha zen̈y tsy ho hisy foeky izikoa tsy “Jehovah nitahy Josefa, ke nataony Jehovah nahomby raha jiaby nataony.”​—Gen. 39:23.

10. Nan̈ino Josefa mety nieritreritry fa tsisy nahomby raha jiaby nataony?

¹⁰ Asa akory tsapanao izikoa anao tamy plasiny Josefa? Fahitanao izy, mety nihevitry ma Josefa fa nahomby raha jiaby nataony, kanefa izy voaheloko ndreky nigadra tamy raha tsy nataony aby? Josefa ma nan̈iry hahazo sitraka tamy sefony prizon io, sa ino raha ten̈a niriny? Hay be fa izy nan̈iry ho afaka gadra. Akory ahaizantsika zen̈y? Izy nangataka taminolo araiky efa ho afaka gadra mba hikoran̈a momba izy amy Farao, amy zen̈y izy ho afaka koa. (Gen. 40:14) Fa lelahy io tsy direkty nikoran̈a tamy Farao. Ke mbala tavela taon̈o aroe tamy prizon tao Josefa. (Gen. 40:23; 41:1, 14) Fa ndray zen̈y, mbala nataony Jehovah nahomby fo raha jiaby nataony. Tamy fomba akory?

11. Ino fahaizan̈a manokan̈a namezany Jehovah i Josefa, avio nan̈ino raha zen̈y nan̈ampy tamy fahatantirahany fikasan̈any Jehovah?

¹¹ Tamy Josefa mbala tamy prizon, Jehovah nampan̈inofy Farao nofy aroe mampavozo mare. Niasaloha mare Farao, fotony tiany ho hay dikany nofinany. Izikoa fa hainy panjaka io fa Josefa mahay dikany nofy, direkty  izy nikahiany. Ino raha niboaka? Nampiany Jehovah i Josefa ke vitany nan̈ambara tamy Farao dikany nofinany. Nambarany Josefa izy koa raha tokony hataony, ke gaga mare Farao. Ndray Farao mba niaiky fa Jehovah nan̈ampy Josefa. Ke nitindreny hiandraikitry hanin̈y tamy firenenany Ezipty foeky Josefa. (Gen. 41:38, 41-44) Tafara tatỳ, nisy mosary mare ta Ezipty ndreky ta Kanana, tany nisy fianakavian̈any Josefa. Afaka nan̈ampy fianakavian̈anany tsy hofoatiny mosary izy, ke tsy ho lany taranaka fianakavian̈a hiboahany Mesia.

12. Ino aby raha nataony Jehovah baka hampahomby Josefa?

¹² Diniha hely baka raha aby tsy nampoizin̈y niboaka tamy fiain̈any Josefa. Azovy ma nahavy Potifara hatoky Josefa, kanefa izy andevo? Azovy nahavy sefony prizon in̈y tsara fan̈ahy tamy Josefa, kanefa izy gadra? Azovy nampan̈inofy Farao raha mampavozo ndreky nan̈ampy Josefa hahay dikany nofy aby io? Azovy nandrisiky Farao hanendry Josefa hanjary piandraikitry hanin̈y ta Ezipty? (Gen. 45:5) Hay be fa Jehovah nampahomby raha jiaby nataony Josefa. Ke tamy farany, tetiky ratsindro rahalahiny Josefa aby in̈y, nivoany Jehovah ho fomba han̈atantirahany sitraponany.

13. Jehovah ma mifehy raha jiaby mandalo amy fiainan̈antsika? Hazavà.

¹³ Ino raha ianarantsika baka tamy tantarany Josefa? Jehovah ma mifehy raha jiaby mandalo amy fiainan̈antsika? Izy ma mandahatra raha jiaby miboaka amy fiain̈anantsika, ke tsy maintsy misy antony tsara fo matoa atsika avoa raha? Baiboly tsy mampianatra raha karaha zen̈y foeky. (Mpito. 8:9; 9:11) Fa ty raha haintsika: Atsika koa fa miatriky fitsapan̈a, hitany Jehovah raha mahazo atsika avio tandrin̈esany kaiky vonjy ataontsika. (Sal. 34:15; 55:22; Isaia 59:1) Tsy vitany zen̈y fo fa, izy afaka man̈ampy atsika hahavita hiaritry raha sarotro jiaby amy fiain̈anantsika. Amy fomba akory?

14. Akory an̈ampiany Jehovah atsika lera atsika miatriky raha sarotro?

¹⁴ Matetiky, ohatra, Jehovah mankahery atsika amy fotoan̈a ten̈a ilavantsika zen̈y.  (2 Kor. 1:3, 4) Karaha zen̈y iziô raha nataony taminy Eziz, rahalahy araiky mipetraka a Turkménistan. Eziz navoaheloko higadra taon̈o aroe, nohony finoan̈anany. Hoizy: “Tamy maraindrain̈iny hitsaran̈a zaho, nisy rahalahy araiky nan̈aboaka taminaka Isaia 30:15. Izio mivolan̈a: ‘Hahazo angovo anaro izikoa matoky tsarabe fa tsy taitaitry.’ Andininteny io nan̈ampy zaho ho kalma ndreky hatoky Jehovah tamy raha jiaby. Fisaintsain̈ana andininy io nan̈ampy zaho tamy fotoan̈a jiaby nampigadra zaho.” Asa azonao onon̈o ombian̈a Jehovah nan̈ampy anao, ke nankahery anao tamy fotoan̈a ten̈a nilavanao zen̈y?

15-16. Ino raha ianaranao baka amy tantarany Tori?

¹⁵ Matetiky, tsy azontsika onon̈o aby fomba an̈ampiany Jehovah atsika koa tsy efa afarany problemo io. Karaha zen̈y iziô ranabavy Tori. Mason an̈arany zanany lelahy. Tan̈aty tsiota taon̈o tsaiky io niady tamy kansera, firaka izy naty. Alahelo tsisy ambaka izy niny Tori tamy zen̈y. Hoizy: “Amy maha reny zaho, hitako fa tsisy raha mafimafiny maty zanaka zen̈y. Avio zaho masaky mivolan̈a fa aleony raimandreny, izy miaritry raha marary tozay mahita zanany mijaly.”

¹⁶ Narary tamy Tori raha niaretany io, fa tafara tatỳ, nidinihiny fomba nan̈ampiany Jehovah izy tamy problemo io. Karaha ty raha nivolan̈iny: “Zaho koa fa nandiniky raha nandalo tamy fotoan̈a namparary zanako in̈y, hitako fa nan̈ampy zaho ankitin̈y Jehovah. Ohatra araiky iziô, nisy fotoan̈a zanako narary mare ke tsy afaka nivangian̈a, fa iro ranadahy ndreky rahavavy aby io mbala navy fo. Iro amy zen̈y nila nandeha tomabily lera aroe vo navy tamy lopitaly io. Ke nisy olo von̈ono han̈ampy zahay fo nidoko tamy tany fiambesan̈a olo tao. Iro nan̈ampy zahay hahazo  raha nilainay. Ke ndray tamy fotoan̈any zahay ten̈a sahiran̈a, zahay mbala nahazo raha ten̈a nilainay fo.” Tori namezany Jehovah raha nan̈ampy izy hahavita hiaritry, karaha zen̈y koa nataony tamy Mason.​—Zahava efajoro “ Namezany Jehovah Zahay Raha Ten̈a Nilainay.”

17-18. Ino han̈ampy atsika hahita ndreky hankasitraka fan̈ampiany Jehovah atsika lera an̈atiny raha sarotro? (Salamo 40:5)

¹⁷ Vakia Salamo 40:5. Tanjon̈onolo araiky pan̈aniky bongo, ho avy amy tendronizio. Fa parapaviany an̈y, izy mety hijanojanon̈o matetiky hankafy raha maro tsara hitany amy lalan̈a. Karaha zen̈y koa, mba mipitraha hely matetitetiky, ke diniha akory an̈ampiany Jehovah anao hahomby fo, ndray iô problemo. Isaka hariva, man̈ontania ten̈a karaha ty: ‘Ino raha tsara nataony Jehovah taminaka niany? Ndray mbala iô problemonaka, akory an̈ampiany Jehovah zaho hahavita hiaritry?’ Aleva onon̈o farafaharatsiny raha araiky nataony Jehovah taminao.

¹⁸ Azo antoko fa anao mety hivavaka baka ho afaka problemonao. Tsisy maharatsy zen̈y, sady efa zen̈y edy ny tokony hatao. (Fil. 4:6) Fa ndray zen̈y, mila alaintsika onon̈o koa fitahian̈a efa azontsika amy zioty. Jehovah mampan̈anten̈a fa izy hankahery ndreky han̈ampy atsika hiaritry. Ke mifen̈a fo hahay hankasitraka fan̈ampiany Jehovah. Anao koa man̈ano zen̈y, ndray anao an̈atiny raha sarotro, ho hitanao fo fomba an̈ampiany anao hahomby, karaha nataony tamy Josefa.​—Gen. 41:51, 52.