1-2. Uḍighi ika kụ yira rootughiạn ghan bọ ḍuugh phọ aZizọs torobọ alhạ?

 ESI 2,000 asiạ epẹ omhạn, aZizọs utuạn ni iyira amhugh, pidị yira orue omhoọgh ghuḍum k’agee-pọ. Ḍughul phọ eḅaạl odị kamugh bọ, aZizọs atọ ni aḅenhị bumatuạn phọ odị mọ ootughiạn ghan eḍighieeny ephomhoghiạn phọ odị r’eḍighieeny dị i/moghi iboom araraạr epel abrẹd r’amiim.—1 Kọr. 11:23-26.

² Yira rodạph ghan itọ phọ aZizọs loor esi dị yira opomhoghiạn nyodị. (Jọn 14:15) Torobọ alhạ, siḍughul otu aMemorial phọ, yira roḍeenhaan ghan ni osereghiạn phọ ayira koghị esi ipẹ odị uḍighinhaan bọ iyira, esi oghol emhụ eḍighieeny phọ ephẹn phọ ogbirima r’oḅereghị ilọ emhụ aḍuugh phọ odị. Kụ r’iḅeeraạn ghan kẹn ni iyira obughẹ arukumuan ayira epẹ erugh phọ, omhạgh aani oomo abulọ yira kotue oru aani eḍighieeny phọ ephẹn phọ egbatanhaạn bọ. Kụ oḅilhẹ oḍighi oomo ilọ yira kotue omhiịn mọ yira okị aani ni.

3. Eeghe kụ edị yira kooḅeghiọn siẹn emhuoghaạph phọ ephẹn phọ?

³ Siẹn emhuoghaạph phọ ephẹn phọ, yira kooḅeghiọn iraạr areten dị eḍeenhaan mọ awe phọ aZihova molhọgh ni iboom ikuph ootughiạn ghan aḍuugh phọ aZizọs: (1) ophạm ghan eten phọ epẹ aZizọs atọ bọ, (2) omhạgh ghan abunhọn oru aani, ḅilhẹ (3) ophinhom aani abin aMemorial phọ etigheri igbagarạ asidọl.

4. Eeghe ikpanhạ araraạr kụ edị yira rotuughạ ghan siphẹ aMemorial phọ torobọ alhạ, kụ uḍighi ika kụ ewạ bọ dị yira kosereghiạn igey phọ ipẹ phọ? (Luk 22:19, 20)

⁴ Torobọ alhạ dị yira oghị aani aMemorial phọ, yira ronaghạn ghan oghaạph aBaibul dị aphanyanhaạn ibadị asipuru. Yira rotuughạ ghan ilọ iyaạr phọ eḍighi bọ kụ omhạr awe omhoghi bọ  etagharạn ḅilhẹ r’idị aḍuugh oniin oye ketue etagharạn ibadị esi ikarạph. Ruutughianhạm ghan kẹn iyira iyaạr phọ amiim mọ r’abrẹd phọ emherenyạn bọ ḅilhẹ r’abuphẹ omhoọgh bọ elhiom olhe r’ophughọl. (Bạl Luk 22:19, 20.) Yira oḅilhẹ rogbirima ghan ilọ aḍisẹph phọ rekori bọ buphẹ omhoọgh bọ oḍuom olhoghi orọl isiẹn ade phọ k’agee-pọ. (Isa. 35:5, 6; 65:17, 21-23) R’amem r’amem ku/sighẹ raraạr phọ ipẹ yira rotuughạ ghan bọ upeghom ephegh. Loor esi dị ariisi eelạ awe u/legheri raraạr phọ iphẹn phọ, esi iduọn phọ, bidị u/sereghiạn iyaạr phọ ekiạ phọ aZizọs eru bọ. Bidị ro/pạm ghan aMemorial phọ eten phọ epẹ aZizọs atọ bọ. Eeghe kụ iḍighi?

5. Mem mọ ibadị abutelhedom mọ aZizọs omhuughu bọ, ika kụ edị abuniin awe omhiigh ootughiạn aḍuugh phọ odị?

⁵ Ibadị abutelhedom mọ aZizọs romugh bọ, bịn u/kol aKristẹn oḍigh siẹn ookpomhoghan phọ. (Mat. 13:24-27, 37-39) Kụ “ogbaaghị okpẹ ilọ ookeleghi abumatuạn phọ osighẹ.” (Iiḍighi 20:29, 30) Oniin “okpẹ” dị u/kol aKristẹn phọ abuẹn phọ omhiigh otughemhị pọ mọ “aKraist o/sighẹ loor odị ophighironhọm ekiạ phọ mem bịn owophom ikarạph aḍita,” idiphọ aBaibul phọ aghaạph bọ, kuolọ mọ emoghi ni ophighirọn ghan ekiạ phọ mem etum mem. (Hib. 9:27, 28) Kụ rodon ibadị awe omeeraam ni okpẹ phọ ophọn phọ. Bidị rogbor ghan ni kookpomhoghan siphẹ asisiosị phọ abidị—eeni amem torobọ aḍio—ootughiạn aḍuugh phọ aZizọs. Rokol ghan Eḍighieeny phọ ephẹn phọ mọ “Ekiạ Dị Aḍita Kụ Ropinyiọn.” b Kụ abunhọn dị odi inhọn aruukụ iiḅereghị rogbor ghan kẹn ni kootughiạn ḍuugh phọ aZizọs, kuolọ ibadị abidị u/legheri emhụ iyaạr phọ aZizọs atuạn bọ kụ amhugh. Abuniin ropuru ghan ni mọ, ‘Aḍuugh phọ aZizọs remạ ghan mọ kotue ni osạr ikarạph phọ amhị uwilhenhaạn imhị ḍughụm?’ Uḍighi ika kụ bidị ropuru ghan bọ ḍipuru phọ aḍiphẹ phọ? Eeni amem, pọ aloor esi dị bidị momhiigh romeeraam we phọ abuphẹ rotughemhị ghan bọ mọ ekiạ phọ aZizọs ke/tue eḍighi idị kosạr ikarạph phọ ayira oḅilhenhaạn. Ika kụ edị abugey abumatuạn phọ aZizọs morue olhoghonhaạn we ḍighaạgh olhegheri iyaạr phọ aḍuugh phọ aZizọs emherenyạn bọ ḅilhẹ reten ootughiạn ghan aḍuugh phọ?

6. Eeghe kụ edị egu anmụny askul aBaibul phọ orue onhaghanhạn lhạ phọ 1872?

⁶ Rekị bọ oteẹny eekunha 19 okuron asiạ phọ, aCharles Taze Russell aḍiemhiom ni egu anmụny askul aBaibul omhiigh okiririom otuughạ ḍinyạ iigbia phọ. Bidị uwạ ghan olhegheri iyaạr phọ ekiạ phọ aZizọs ekạr bọ emherenyạn r’ipẹ kokạr ghan bọ ootughiạn ḍuugh phọ odị. Lhạ phọ 1872, bidị urue ni omhiịn siphẹ aBaibul phọ mọ aZizọs amitiom ekiạ otagharạn omhạr awe. Kụ bidị u/boronhom ipẹ bidị otuughạ bọ. Bidị ughaạph ni iphẹn phọ oḅenhị bunhọn dị eego esi arinyạ, newspaper, ḅilhẹ r’asimagazin. Kụ i/bia igenhi bịn bidị omhiigh ookpomhoghan amem torobọ alhạ idiphọ aKristẹn oḅẹl okuron asiạ phọ, ootughiạn aḍuugh phọ aKraist.

7. Ika kụ edị yira romooghọm suọ esi araraạr phọ anmụny askul aBaibul phọ owaaghị yogh bọ omhiịn?

⁷ Rodon yira rokelhọm ni raraạr phọ anmụny askul aBaibul phọ abuphẹ phọ owaaghị bọ omhiịn siạ epẹ omhạn. Ika? R’olhoghonhaạn aḍighaạgh aZihova yira monhaghanhạn emhụ ekiạ etagharạn phọ aZizọs r’asuọ dị omhạr awe komooghọm esi ekiạ phọ epẹ phọ. (1 Jọn 2:1, 2) Yira moḅilhẹ kẹn otu omiịn siphẹ aBaibul phọ mọ arebenhẹ Enhaạn omoọgh iyạl oḍuom olhoghi—buniin kokeel k’akẹ kụ omoọgh loor  dị ke/tue emugh kụ abunhọn irubal kotọl siẹn ade phọ k’agee-po. Asiya phọ ayira r’aZihova rekpạr ghan ni mem dị yira ootughiạn ilọ ephomhoghiạn phọ odị amhoọgh bọ aru esi ayira ḅilhẹ r’asuọ phọ yira omhoọgh bọ esi ekiạ etagharạn phọ aZizọs. (1 Pit. 3:18; 1 Jọn 4:9) Idiphọ abumor phọ ayira iḍiodi phọ okpẹ bọ oḍuom olhoghi phọ, yira romạgh ghan ni bunhọn oḍighan ayira ootughiạn aḍuugh phọ aZizọs eten phọ epẹ odị atọ bọ.

8. Eeghe kụ edị awe phọ aZihova moḍighi omhạgh aani abunhọn mọ oḍighan bidị ootughiạn ḍuugh phọ aKraist? (Miịn afoto phọ.)

⁸ Eḍighi ni eḍighinhom iyaạr awe aZihova omhạgh aani abunhọn dị koḍighan bidị ootughiạn ḍuugh phọ aZizọs. K’alhạ phọ 1881, kụ edị aWatchtower phọ amhạgh bumor r’abumaranhi epẹ United States mookpomhoghan olhoghotu onyọ umor epẹ Allegheny, Pennsylvania, ophinhom aani abin eḍighieeny phọ ephẹn phọ egbatanhaạn bọ. Kụ esighẹ rekị bịn omhiigh ophạm atorobọ ookpomhoghan aMemorial phọ. Kụ unwanyụ aMarch 1940, uḅenhị ni bukaaphọm mọ bidị kotue ni omạgh torobọ oye dị amhoọgh ḍiḅeeraạn epẹ ekol phọ abidị oru aani. Kụ lhạ phọ 1960 aBetẹl omhiigh oghiọm arookpomhoghan phọ ḍinyạ aḍimhạgh phọ. Kụ egbi k’amem mọ opọ phọ modiighi rinyạ aḍimhạgh phọ riisi eelạ abạl. Uḍighi ika kụ yira rolọgh ghan bọ oomo ikuph phọ iphẹn phọ omhạgh aani awe mọ uḍighan iyira ootughiạn ḍuugh phọ aKraist?

9-10. Abuọ anhiạn kụ romooghọm ghan suọ esi ikuph phọ yira rolọgh ghan bọ omhạgh aani abunhọn oru aani aMemorial phọ? (Jọn 3:16)

⁹ Otuughạ olhegheri iyaạr phọ aZihova r’aZizọs muḍighinhaan bọ iyira kụ eniin ephigh phọ yira romạgh ghan bọ bunhọn oru aani aMemorial  phọ, ekạr ekpaariọm buphẹ ephẹn kụ eḍighi bọ eḅẹl amem abidị. (Bạl Jọn 3:16.) Kụ yira roḍuom ghan olhoghi mọ ipẹ bidị konaghạn bọ oḅilhẹ omiịn mem dị bidị oru, kenyu ni bidị oru olhegheri obughẹ ilọ aZihova oḅilhẹ oḍighi arebenhẹ odị. Abunhọn romooghọm aani ghan kẹn ni suọ.

¹⁰ Yira romạgh aani ghan kẹn ni buphẹ mowilhẹ bọ okumu aZihova. Yira roḍighi ghan iduọn phọ ootughianhạm abidị mọ Enhaạn apomhoghiạn ni bidị. Kụ ibadị romeera ghan ni oru aani, kụ olhoghi ayira raḅaạl ghan ni omhiịn abidị. Oghị aani aMemorial phọ reetughianhạm ghan bidị ipẹ bidị oghelhọm ghan bọ okumu aZihova epẹ omhạn. Ooḅeghiọn eḍeenhaan aMonica. c Amem ezẹgh aKOVID-19 phọ kụ edị odị aḅilhẹ aḍighi okaaphọm. Odị morigheel bọ aMemorial olọ 2021, odị aḅẹm mọ: “AMemorial phọ ophọn phọ akạr kụ utir imhị eten dị egbatanhaạn. Loor esi dị ephẹn kụ eḅẹl amem dị mị marue amhạgh aani we oru aani aMemorial phọ esi 20 asiạ. Kụ loor osereghiạn phọ mị amhoọgh bọ aghị esi ipẹ aZihova r’aZizọs muḍighinhaan bọ imhị, mị akạr kụ akuọm loor omhạgh aani awe oru aani aMemorial phọ.” (Ps. 103:1-4) Mughumọ awe omeera oru obobọ u/meera, yira roḍighi ghan ni oomo ipẹ yira kotue bọ omhạgh aani abunhọn oḍighan ayira ootughiạn aḍuugh phọ aZizọs, loor esi dị yira olegheri ni mọ aZihova asereghiạn ni ikuph phọ ayira.

11. Ika kụ edị aZihova masẹph ikuph phọ ayira omhạgh abunhọn oru aani aMemorial phọ? (Haggai 2:7)

¹¹ AZihova akạr kụ rasẹph ghan ikuph phọ yira rolọgh ghan bọ omhạgh aani abunhọn oru aani aMemorial phọ. Etigheri isophoghom mọ ezẹgh aKOVID-19 phọ ekọm bọ, 21,367,603 awe kụ uphinhom aani bin ootughiạn aḍuugh phọ aZizọs lhạ phọ 2021. Onhụ abạl phọ opọ phọ rakị ni omhạn iyạl r’egbem onhụ abạl Abugbaanhaạn AZihova siẹn aḅirinhi phọ! Ii, ko/ginha onhụ abạl awe phọ abuẹn phọ bịn kụ edị aZihova amhoọgh ogbolhomaam. Kuolọ torobọ oye dị aru. (Luk 15:7; 1 Tim. 2:3, 4) Yira okuphom ni owol mọ torobọ amem dị yira ongọ oye ḍinyạ aḍimhạgh phọ aZihova rusighẹ ghan iyira kụ awaạm buphẹ omhoọgh bọ iserereẹny arokpom mọ.—Bạl Haggai 2:7.

12. Ighẹn asidọl kụ ketue eḍighi iyaạr dị kikparanhaạn iyira oḍighom ootughiạn aḍuugh phọ aZizọs? (Miịn afoto phọ.)

¹² AZizọs aḅẹm mọ siḍio aruukunha phọ, mọ yira kosoman ni igbagarạ asidọl kirokirọ—isophoghom siphẹ eghunotu phọ, igbiphoghọm, raaghạm, reezẹgh, ḅilhẹ r’inhọn. (Mat. 10:36; Mạk 13:9; Luk 21:10, 11) Eeni amem, asidọl phọ iphẹn phọ reḍighi ghan ni idị kikparanhaạn iyira oḍighom aani ootughiạn aḍuugh phọ aZizọs. Eeghe kụ edị abumor r’abumaranhi phọ ayira moḍighi okpạr opu ipaanhaạn phọ ipẹ phọ, kụ ika kụ edị aZihova malhoghonhaạn bidị ḍighaạgh?

13. Ika kụ edị aZihova asẹph akpọ oḅio phọ ḅilhẹ rosopha phọ Artem ophạm aani aMemorial phọ siphẹ ikoli phọ?

¹³ Ikoli. Abumor phọ ayira odoghoḍi bọ ikoli loor omheeraam mọ abidị roḍighi ghan ni oomo ipẹ bidị kotue bọ ootughiạn aani aḍuugh phọ aZizọs. Ooḅeghiọn eḍeenhaan Artem. Odị r’inya abunhọn urọl li obạm osoph ikoli (183-sq-ft) siwiki phọ ophạm bọ aMemorial alhạ phọ 2020. Kuolọ ghalhamọ r’iduọn odị arọl bọ ni otu ikoli phọ, odị arue ni amhoọgh miim r’abrẹd aMemorial phọ, kụ odị aḅilhẹ aakolhobian oghelhọm oghaạph aMemorial phọ. Kuolọ buphẹ r’odị orọl bọ pạ osoph ikoli phọ uphughọl ghan asigrẹt kụ oḅilhẹ ootunyian ghan. Kuolọ eeghe kụ edị odị aḍighi? Odị alhọm bidị mọ esi oniin awạ phọ odị kapạm bọ aMemorial phọ  mọ bidị ku/pughọl asigrẹt uḅilhẹ uu/tunyian. Kụ dị eḍigh ni iikia esi Artem, bidị umheeraam ni mọ bidị k/opughọl asigrẹt ḅilhẹ mọ bidị koo/tunyian mem mọ odị kaḍighi bọ aMemorial phọ. Artem aḅẹm mọ, “Mị utirom ni bidị ilọ aMemorial phọ, kuolọ bidị uḅẹm mọ bidị u/wạ onhaghạn.” Toroboiperolbọ bidị upuru yogh ni Artem sipuru mem mọ bidị omhiịn bọ oḅilhẹ onhaghạn oomo ipẹ Odị aphạm bọ aMemorial phọ.

14. Eeghe iikolhobian kụ edị omitiom omhiịn mọ opạm ni aMemorial phọ etigheri ezẹgh aKOVID-19 phọ?

¹⁴ Ezẹgh aKOVID-19 phọ. Mem mọ ezẹgh phọ emhiigh bọ, awe phọ aZihova u/tue uukpomhoghan eniin esi u/pạm aMemorial phọ. Kuolọ ipẹ phọ i/sophoghom bidị ophạm aMemorial phọ. d Arookpomhoghan dị omhoọgh intanẹt uphạm ni aMemorial phọ dị eego esi aZoom. Kuolọ kokaạph ika ilọ irubal abuphẹ u/moọgh aani bọ intanẹt ekpisi abidị? Iniin areelhe, umitiom ni iikolhobian dị ongọ oghaạph aMemorial phọ ologhi aradio obobọ TV. Oḅarạm isiẹn, ilạ agadạ phọ uḅạ ni olhọgh esi oghaạph aMemorial phọ runhụ dị epel 500 pidị awe dị odi  iboọr arikpisi otue opạm aani aMemorial phọ. Kụ abumor dị okpẹ oḍuom olhoghi umhiịn ni mọ abumor r’abumaranhi phọ odi bọ rikpisi phọ iphẹn phọ omoọgh oghaạph aMemorial phọ.

15. Eḍeenhaan phọ aSue itughemhị iyira eeghe?

¹⁵ Isophoghom Eghunotu. Buniin rosoman ghan ni ipaanhaạn oghị aani aMemorial phọ siphẹ eghunotu phọ abidị. Oobeghiọn eḍeenhaan oniin odị rotughemhị ghan Baibul phọ dị oghol mọ Sue. Lhạ phọ 2021, diọ phọ eḅaạl kopạm bọ aMemorial phọ, aSue aḅenhị opọ ratughemhị ghan bọ nyodị Baibul phọ mọ loor isophoghom mọ edi bọ eghunotu phọ abidị, mọ onọ ka/tue akị aani aMemorial phọ. Opọ ratughemhị ghan bọ nyodị Baibul phọ aạl li Luk 22:44. Dị edaphạn esi phọ odị aạl bọ, odị aḅenhị Sue mọ mem lọ yira osoman ḍikparamhinheẹn adọl mọ ewạ dị yira kodaphạn eḍeenhaan phọ aZizọs esi oḍuraan otuman aZihova esi iiḅereghị kụ okpasị oomo oḍuom olhoghi phọ ayira esi odị. Kụ ḍio aMemorial phọ, aSue aakolhobian abrẹd r’amiim mọ aḅilhẹ aphogh iiseeny aḌiroọr phọ egbatanhaạn bọ siphẹ jw.org. Kụ ḍughul phọ aḍiphẹ phọ, odị asighẹ ni fon phọ odị anhaghanhạm oghaạph aMemorial phọ siphẹ osoph odị. Kụ aMemorial phọ moru oten, kụ odị agẹ ḍinyạ aghiọm opọ ratughemhị ghan bọ nyodị Baibul phọ kụ aḅẹm mọ: “Nạ ukạr kụ ulhoghonhaạn imhị ḍighaạgh iḍue phọ eten bọ. Mị ulhọgh ni ikuph oghị aani aMemorial phọ, kụ aZihova aḍighi ni ipẹ esugha bọ. Ikpo-onhụ bịn ke/tue ekaạph odọ oḅaạl olhoghi phọ r’osereghiạn phọ mị amhoọgh bọ!” Nạ ragbi mọ aZihova katue ni alhoghonhaạn nyinhạ ḍighaạgh eḍighi maạr dị nạ asoman dọl dị erọl iduọn phọ ḍughụm?

16. Eeghe kụ iḍighi kụ yira okuphom bọ ni owol mọ aZihova kasẹph ni ikuph phọ ayira oghị aani aMemorial phọ? (Rom 8:31, 32)

¹⁶ AZihova akạr kụ rasẹph ghan ikuph phọ yira rolọgh ghan bọ ootughiạn aḍuugh phọ aZizọs. Kụ mem dị yira oḍeenhaan osereghiạn esi ipẹ odị uḍighinhaan bọ iyira, yira kotue ni okuphom owol mọ odị kusẹph ni iyira. (Bạl Rom 8:31, 32.) Esi iduọn phọ, oḍighi ni oomo ipẹ yira kotue bọ, oghi aani aMemorial alhạ phọ aḍiẹn phọ kụ oḅilhẹ obughẹ rukumuan phọ yira rongọ bọ aZihova runwanyụ aMemorial phọ.