THIWIWEC MIR 4
Yehova bemiyo mugisa iwi kero mwa mi timo Poy pi tho pa Yesu
“Wumeduru nitimo kumeni, wupoy ko pira.”—LUKA 22:19.
WER 19 Cemo mir uthieno pa Rwoth
I ADUNDO a
1-2. Pirang’o kubang’ oro wabed wacidho i Poy pi tho pa Yesu?
ORO kadhu kago 2000 niai ma Yesu umiyo kwo pare piwa, pi niyabu iwa yo mi nwang’u kwo ma rondo ku rondo. Yesu ung’olo ni julubne i diewor m’i wang’ tho pare nia gibed gipoy pi mer pare, ma gibed gitim ko lembe moko ma yot m’uketho iye mukathi ku divai.—1 Kor. 11:23-26.
2 Waworo lembe ma Yesu ng’olo pilembe wamare lee. (Yoh. 14:15) Kubang’ oro i kind nindo mi Poy pi tho pa Yesu, wanyutho foyofoc mwa pi gin m’etimo nwang’u wabeparu man waberwo pi thelembe mi tho m’etho ko piwa. Bende, wabedo kud anyong’a nimedo amora mwa i tic mi lembanyong’a pi nilwong’o dhanu dupa i kadhiri ma wacopo kara gidikiri kudwa i coko maeno ma segi. I andha, wabed wayiyo ngo nyanok de gin moko ucerwa nicidho i Poy pi tho Yesu.
3. Wabineno lembang’o i thiwiwec maeni?
3 I thiwiwec maeni, wabineno yore adek ma dhanu pa Yehova gi ii ko lee pi nitimo Poy pi tho pa Yesu: (1) nitime calu ma Yesu uponjo kogi, (2) nilwong’o dhanu mange de gibin iye, man (3) nitime kadok kud i kind peko.
NITIMO POY PI THO YESU CALU MA YESU UPONJO
4. Kubang’ oro jubed juketho nwoc iwi lemandha ma kani i Poy pi tho pa Yesu, man pirang’o wacikara nineno lemandhane ni gin ma pire teki? (Luka 22:19, 20)
4 Kubang’ oro i Poy pi tho pa Yesu, wabed wawinjo ponji m’ujengere iwi Biblia ma dwoko wang’ penji dupa thwolo thwolo. Wabed wawinjo thelembe m’uketho dhanu gitie ku yeny mi jamgony man kite ma tho pa ng’atu acel romo umo ko dubo pa dhanu dupa. Jubed jupoyo wiwa i kum gin ma mukathi ku divai ubenyutho man nia ng’a m’ucikere nicame man nimadhe. (Som Luka 22:19, 20.) Waparu bende lembe iwi mugisa ma jugwoko ni ju ma gitie ku genogen ma ber mi kwo iwi ng’om. (Isa. 35:5, 6; 65:17, 21-23) Wacikara nineno lemandha maeno ni gin ma pire tek. Dhanu milioni swa ginyang’ ungo i lembe maeno, man ging’eyo ngo nyanok de kite ma lam ma Yesu uthiero pire tie tek ko. Gitimo ngo bende Poy pi tho pa Yesu nimakere kud ayi m’eponjo. Pirang’o?
5. I ng’ey tho mi jukwenda, dhanu ucaku paru pi tho pa Yesu nenedi?
5 Nyanok i ng’ey ma jukwenda ma pol utho, Jukristu mi ndra ucaku mondo i cokiri. (Mat. 13:24-27, 37-39) Gikwong’o ponjo “ponji mi ndra kara gitel julub i tokgi.” (Tic. 20:29, 30) Kud i kind “ponji mi ndra” ma gicaku ponjone moko tie nia Yesu uthiero ngo kume “wang’ acel pi nja kara eyey dubo mi dhanu dupa” calu ma Biblia uyero, ento nia ukwayu jubed juthier lamne kendo kendo wang’ dupa. (Ebr. 9:27, 28) Tin de dhanu dupa giyiyo migi ponji mi ndra maeno. Gibed gicokiri karacelo kubang’ yenga, saa moko ke kubang’ ceng’ i ot pa mungu migi kunoke ot kanisa pi nicamu kum rwoth ma Katholiki lwong’o nia “kumunyu ma leng’.” b Dini mange de beparu pi tho pa Yesu wang’ acel acel, ento ginyang’ ungo cuu nia lam ma Yesu uthiero thelembene tie ang’o. Jumoko romo penjiri kumae: ‘Nyo tho pa Yesu ubenyutho andha nia dubo para copo wekere?’ Pirang’o gibed gipenjiri kumeno? Pilembe gidaru yiyo wec ma dhanu beyero nia tho pa Yesu copo kabu ngo dubo migi. Julub mandha pa Yesu ke gidaru peko maeno nenedi?
6. I kum oro 1872, ungu moko mi juponj Biblia ginyang’ i kum lembang’o?
6 I oro 1870, ungu moko mi juponj Biblia ma Charles Taze Russell ubino telo wiye, ucaku ponjo Lembagora mii mandha. Gimito ging’ey nia i andha lam ma Yesu uthiero thelembene tie ang’o man kite ma juromo poy ko pi tho pa Yesu. I kum oro 1872, ginyang’ nimakere ku Biblia nia kara andha Yesu umiyo jamgony pi dhanu ceke. Gigwoko ngo gin ma ginyang’ i kume igi gigi. Ento gimewo lembene nikadhu kud i buku, i lembang’eya, man i gazeti. Man ndhundhu i ng’eye, gikwong’o cokiri kende kende wang’ acel kubang’ oro pi nipoy pi tho pa Yesu calu Jukristu mi rundi ma kwong’a.
7. Wabenwang’u bero nenedi i kum sayusac ma juponj Biblia gitimo?
7 Tin eni wabenwang’u bero nikum sayusac ma Jukristu maeno gitimo oro dupa udaru kadhu. Nenedi? Yehova ukonyowa ninyang’ i thelembe mi lam ma Yesu uthiero, gin ma lamne bitimo iwa man ni dhanu ceke. (1 Yoh. 2:1, 2) Waponjo bende nia Biblia umiyo genogen ario ni dhanu ma gibenyayu anyong’a i Mungu, niwacu kwo ma tho ngo i polo ni jumoko man ni milioni swa mi dhanu mange ke kwo ma rondo ku rondo iwi ng’om. Wacoro ceng’ini i vut Yehova kinde ma wabeneno mer m’emaru kowa man kite ma wan giwa wabenwang’u ko bero nikum lam ma Yesu uthiero. (1 Pet. 3:18; 1 Yoh. 4:9) Pieno, calu umego mwa ma pwe mi rundi ma con, walwong’o jumange de kara gibin gidikiri kudwa i Poy pi tho pa Yesu nimakere kud ayi ma Yesu uponjo.
NILWONG’O DHANU MANGE DE I POY PI THO PA YESU
Icopo timo ang’o kara idikiri cuu i kampany mi lwong’o dhanu i Poy pi tho pa Yesu? (Nen udukuwec mir 8-10) e
8. Dhanu pa Yehova gidaru timo ang’o pi nilwong’o jumange i Poy pi tho pa Yesu? (Nen cal.)
8 Dhanu pa Yehova gibed gilwong’o dhanu i Poy pi tho pa Yesu oro dupa udaru kadhu. I oro 1881, julwong’o umego ku nyimego mir États-Unis pi nicicokiri karacelo i ot p’umego moko i Allegheny, Pennsylvania, pi coko maeno ma segi. I ng’eye, cokiriman ucaku timo Poy pi tho pa Yesu kende. I dwi mir 3, oro 1940, juyero ni jurwey nia giromo lwong’o dhanu mi kabedo migi m’umaru lemandha ubin i iye. Bethel ucaku oro karatasi mi lwong’o ni cokiri wang’ ma kwong’a i oro 1960. Niai eca, jubecuku poko karatasi milioni swa mi lwong’o dhanu i Poy pi tho pa Yesu. Pirang’o wabed wating’o saa man kero ma lee pi nilwong’o dhanu mange?
9-10. Jukani ma ginwang’u bero kinde ma wabelwong’o jumange i Poy pi tho pa Yesu? (Yoh. 3:16)
9 Thelembe acel m’uketho wabed walwong’o jumange nicokiri kudwa i Poy pi tho pa Yesu, utie pilembe wabemito dhanu ma gibino wang’ ma kwong’a ging’ey gin ma Yehova giku Yesu gitimo iwa wan ceke. (Som Yohana 3:16.) Watie ku genogen nia lembe ma gibineno man ma gibiwinjo bicwalugi niponjo lembe lee man nidoko jurutic pa Yehova. Ento jumange de ginwang’u bero i kum lembene.
10 Wabed walwong’o bende ju ma gikwiyo i thenge mi tipo. Watimo lembuno pi nipoyo wigi nia fodi asu Mungu umarugi. Ju ma dupa gijolo lwong’o mwa, man anyong’a negowa ninenogi ka gibino. Bino i Poy pi tho pa Yesu poyo wigi i kum kite ma gibed gitimo ko con ni Yehova kud anyong’a. Wakenenu lapor pa Monica. c Monica ucaku rweyo lembanyong’a kendo i kind thong’om mi Korona eni. I ng’ey m’ecidho i Poy pi tho pa Yesu i oro 2021, eyero kumae: “Poy pi tho pa Yesu ma wang’uni ubino ira segi mandha. Wang’ ma kwong’a i ng’ey oro 20, kan aforweyo lembanyong’a ni dhanu man alwong’ogi i Poy pi tho pa Yesu. Amiyara zoo pi nilwong’o jumange pilembe atie ku foyofoc pi gin ma Yehova giku Yesu gitimo ira.” (Zab. 103:1-4) Kadok nwang’u dhanu ujol lwong’o mwa kunoke ngo de, re waii ku kero mwa zoo pi nilwong’ogi i Poy pi tho pa Yesu, pilembe wang’eyo nia Yehova foyo kero ma wabetimo.
11. Yehova udaru poko mugisa iwi kero mwa nenedi pi lwong’o dhanu i Poy pi tho pa Yesu? (Hagai 2:7)
11 Yehova udaru poko mugisa lee dit iwi kero ma wabetimo pi nilwong’o dhanu i Poy pi tho pa Yesu. I oro 2021, kadok nwang’u thong’om mi Korona ukelo macero de, re wend dhanu m’utimo Poy pi tho pa Yesu ubino 21367603. Eno tie kago wend Jumulembe pa Yehova mi ng’om zoo wang’ ario ku nusu! I andha, Yehova dieng’ ungo ku wend dhanu m’ucokiri. Ento edieng’ pi ng’atuman acel acel m’ubino. (Luka 15:7; 1 Tim. 2:3, 4) Wang’eyo andha nia kinde ma wamiyo karatasi mi lwong’o ni jumange, Yehova konyowa ninwang’u ju m’adundegi leng’.—Som Hagai 2:7.
NITIMO POY PI THO PA YESU KADOK I SAA MI PEKO
Yehova bemiyo mugisa iwi kero mwa mi timo Poy pi tho pa Yesu (Nen udukuwec mir 12) f
12. Lembang’o ma copo ketho nitimo Poy pi tho pa Yesu bedo iwa lembe ma teki? (Nen cal.)
12 Yesu ular uwacu nia i nindo mi kajik ceng’, wabinwang’ara ku kwond peko ceke: jai mi wedi mwa, lwiny, thong’om, ku lembe mange de dupa. (Mat. 10:36; Mark. 13:9; Luka 21:10, 11) Saa moko lembe maeno ketho nitimo Poy pi tho pa Yesu bedo iwa lembe ma tek. Umego ku nyimego mwa gitimo ang’o pi voyo peko maeno man Yehova ke ukonyogi nenedi?
13. Yehova umiyo mugisa nenedi ni Artem pi tegocwiny man lembakeca m’ebino ko mi timo Poy pi tho pa Yesu i koli?
13 Kol. Umego ku nyimego mwa ma jutwiyogi i kol pi yiyoyic migi gitimo kero migi ceke pi nitimo Poy pi tho pa Yesu. Wakewec iwi lapor p’umego Artem. I Poy pi tho pa Yesu m’ukadhu i oro 2020, jutwiye i otkol mi metre kare 17, ma jukol abic re ma romo iye. Kadok ebino i kol, re asu enwang’u jamtic moko mi timo Poy pi tho pa Yesu man epangu nimiyo korolembene pire gire. Jukol wagi mange utie umadh taba man ju ma dhoggi reco. Umego mwa utimo ang’o? Ekwayugi nia timba gikegiwek wec ma reco ku madhu taba pi saa acel kende ci. Ku bati ma ber, jukol wagi uyiyo nia gibimadhu ngo taba man gibiyero ngo wec ma reco i saa mi Poy pi tho pa Yesu. Artem uwacu kumae: “Anwang’u kaka mi weco kugi iwi Poy pi tho pa Yesu.” Kadok giwacu nia gimaru ngo niwinjo korolembe, re i ng’ey ma gineno man giwinjo Poy pi tho pa Yesu ma Artem utimo, gin ceke gipenjo penji iwi lembene.
14. Dhanu pa Yehova gitimo lembang’o kara jutim Poy pi tho pa Yesu i nindo mi thong’om mi Korona?
14 Korona. Kinde ma thong’om mi Korona upodho, egam ecopere ngo ni dhanu pa Yehova nia gicokiri karacelo. Re lembuno ucerogi ngo nitimo Poy pi tho pa Yesu. d Cokiri ma gibino kud Internet i bang’gi, gibed gitimo programne nikadhu kud i video. Ka dong’ dhanu milioni dupa ma gibino mbe kud Internet i bang’gi ke? I ng’om moko, jumaku yub ma kara korolembe mi programne ukadh i televizio kunoke radio. M’umedo maeno, filial umaku korolembe mi Poy pi tho pa Yesu i dhok ma kadhu 500 kara ju ma gin’i kabedo ma bor de gitim programne. Bende, umego gibed gioro korolembe ma jumakune i kabedo eno ni ju ma gitie ku yenyne.
15. Lapor pa Sue ubemiyo iri ponji ma kani?
15 Jai mi wedi mwa. Ni jumoko, peko ma hai ma ginwang’u pi nitimo Poy pi tho pa Yesu utie jai mi wedi migi. Wakewec iwi lapor pa japonj Biblia moko ma nyinge Sue. I oro 2021, nindo acel i wang’ timo Poy pi tho pa Yesu, Sue uwacu ni japonji pare nia, ebicopere ngo ire nitimo Poy pi tho pa Yesu nikum jai mi jupagi. Japonji pare usomo ire Luka 22:44. I ng’eye ekoro ire nia, tek wabenwang’ara ku peko, wacikara nilubo lapor pa Yesu ma warwo ko i bang’ Yehova man waketh genogen mwa ceke i wiye. Urwonde, Sue uketho mukathi ku divai ubedo ayika, man elubo program mi ponji ma segi mi kugweno i jw.org. Uthieno ma cing’ nica, emondo kende i kusika pare man elubo ponji mi Poy pi tho pa Yesu ku jumange nikadhu kud i simu. I ng’eye Sue ukiewo ni japonji pare kumae: “Itielo cwinya lee mandha ma nyaworo. Atimo kero para ceke pi nitimo Poy pi tho pa Yesu, e Yehova ukonya. Ang’eyo ngo nia ayer ang’o pi nifoyi!” Nyo in de ibeparu nia Yehova copo konyi tek ibenweng’iri i lembe ma rom ku pa Sue?
16. Pirang’o cwinywa tek nia Yehova bimiyo mugisa iwi kero ma wabetimo pi nipoy pi tho pa Yesu? (Jurumi 8:31, 32)
16 Yehova neno kero ma watimo pi nipoy pi tho pa Yesu ni gin ma pire tek. Cwinywa tek nia ebimiyo mugisa iwa kinde ma wabenyutho foyofoc mwa pi gin m’etimo iwa. (Som Jurumi 8:31, 32.) Dong’ wek wabed ayika nitimo Poy pi tho pa Yesu mi oro maeni, man watimu kero mwa ceke i kind nindo maeno pi nitimo lee ni Yehova.
WER 18 Wabefoyi lee pi jamgony
a Ceng’ kas’ario, nindo 4, dwi mir ang’wen, oro 2023, dhanu milioni dupa i wang’ ng’om zoo gibicokiri i Poy pi tho pa Yesu. Ni ju ma dupa ebibedo igi wang’ ma kwong’a. Ju ma gikwiyo i thenge mi tipo ma gibino ngo i Poy pi tho pa Yesu pi oro dupa de gibibedo nuti. Jumange ke gibenwang’iri ku peko ma lee ma nwang’u romo cerogi, re asu gibibino. Kadok ibenweng’iri ku lembe ma nenedi de, ng’ey nia anyong’a binego Yehova pi kero m’ibitimo pi nibedo nuti.
b Dhanu mi dini eno giyiyo nia i saa mi seremoni, mukathi ku divai lokere doko ni kum man ni rimb Kristu. Giparu nia kum Yesu man rimbe, jubed juthiere andha saa ceke ma ng’atini ubecame man ubemadhe.
c Juloko nying’ moko.
d Nen bende i jw.org, thiwiwec “Le Mémorial de 2021.”
