1-2. To mihecahecaan hano mirienang kita to Piharatengan a Saˈopo?

 ˈAYAW no 2,000 miheca, sapidaˈocaw kita maˈorip, kinafalahay ci Yis to ˈorip ningra. ˈAyaw no mamapatay cingra toya dadaya, palimoˈotay to nisawawaan tano epang ato epah kantang a misikay, miharateng to mikitiniay i olah ningra a pikinafalah to ˈorip.—1 Korinto 11:23-26.

² Mahemekay kita midofdof to sapalimoˈot ni Yis, samanen tada maolahay kita cingraanan. (Yohani 14:15) To mihecahecaan itini Piharatengan a Saˈopo ˈayaw ato ikor a pina lipay, sapaihkalaw to piakoˈid ci Yisan, mipalakay kita to toki misongilaˈ a mitolon, hanaca midotim to pikinafalah ningra to ˈorip pakayni kitanan o maanan ko tatodong. Sapisaadihayaw kita to mitosilay a tayal, mitahidang to ˈalomanay tamdaw malacafay kitanan mirienang tonini mikiriwiˈay a saˈopo. Roma i, misetekay kita to falocoˈ caka macona no maamaan a demak ko pirienang ita to Piharatengan a Saˈopo.

3. Onini a lalakaw mamilengo to maanan?

³ Onini a lalakaw mamilengo, to sapiharatengaw to pikinafalah ni Yis, finawlan no Kawas misaˈicelay itini tolo a demakan: (1) Doedoen ko sapalimoˈot ni Yis misikay tonini Piharatengan a Saˈopo, (2) mitahidang to tamdaw mirienang to Piharatengan a Saˈopo, (3) remoen ko masakenakenaay a saconged misikay tonini Piharatengan a Saˈopo.

4. To mihecahecaan Piharatengan a Saˈopo mamitadtad to maanan a salicay? Cipinang tonini a kimad hano o masakalimlaan a sapalemed hani? (Luka 22:19, 20)

⁴ To mihecahecaan itini Piharatengan a Saˈopo matengilay ita ko cecay misalalangiay to Fangcalay Cudad a kimad,  o mamisongilaˈ a mitadtad to adihayay salicay konini a kimad. Tinakoen, hano misaali ko tamdaw to sapatefoc? O pikinafalah no cecay tamdaw to ˈorip hano ngangaˈay masodod ko raraw no ˈalomanay tamdaw? O maanan ko mitaypiyawan no epang ato epah? Itini tonini a saˈopo o cima ko kakomaen to epang ato epah? (ˈOsien ko Luka 22:19, 20.) Onini a kimad papadama kitaanan misongilaˈ a miharateng, itini i lakoing a nokaˈorip tada fangcalayto. (Isaya 35:5, 6; 65:17, 21-23) Mafanaˈ tonini a kimad tada o kalimlaan a sapalemed. Soˈlinay haw i, pinaay walwal a tamdaw cowa ka cipinang tonini a kimad, cowa ka pakahapinang to masakalimlaan ko pikinafalah ni Yis to ˈorip, cowa ka pidoedo cangra to isalakatay sapalimoˈot ni Yis a miharateng cingranan. Hano mahaen hani?

5. O ˈalomanay tarokos mapatay ikor, misatapangay ko tamdaw tano maanan a pakayraan a miharateng to kapatay ni Yis hani?

⁵ O ˈalomanay tarokos ni Yis mapatay ikor caka halafin, makaniway a Krisciyang milonokay a micomod i kasakopang. (Matay 13:24-27, 37-39) ‘Pacacoˈisay cangra, misolot to sikawdan mikotod i cangranan.’ (Dmak 20:29, 30) O makaniway a Krisciyang ikor mitenakay to mararaway a kimad, mamisaliyaliyaw ci Yis patafang to niyah sanay, ao cowa ka lecad to misowalan no Fangcalay Cudad, ci Yis ‘kinacecayay aca patafang to niyah, ngaˈayto mitamorong to raraw no ˈalomanay tamdaw’ sanay. (Hipray 9:27, 28) Anini ˈalomanay mihakelongay tamdaw maolatay nonini mararaway a kimad, marariday cangra anoca to romiˈamiˈad tayra i kiyokay mirienang to ‘Patafangay i Pimisaan.’ b O romaroma kiyokay soˈlin cowa ka rarid misikay to piharatengan to kapatay ni Yis, kawra ˈalomanay mihakelongay cowa ka cipinang to pikinafalah ni Yis to ˈorip palaˈosiay to maanan. O roma tamdaw saan miharateng alatek: “O patay ni Yis soˈlin ngaˈay mihepol to raraw ako han?” Hano ira ko mahaenay a sasa nangra hani? Alatek macadaay nangra ko pifiyor nora cowa pakasoˈlin to sapatefoc a tamdaw. Mihaenay i, o soˈliˈlinay mihakelongay ci Yisan a tamdaw samaanay ko pinengneng ato piharateng to pikinafalah ni Yis to ˈorip hani?

6. Tahira 1872 miheca, mafanaˈay to maanan a kimad ko micekiway to Fangcalay Cudad a tamdaw?

⁶ 1870 miheca, ci Loso ato romaroma tamdaw misatapangay micalep micekiw to Fangcalay Cudad. Sakafanaˈaw cangra o pikinafalah ni Yis to ˈorip iraay ko maanan a epoc, ato sasamaan miharateng to kapatay ni Yis. Tahira 1872 miheca, onini a micekiway to Fangcalay Cudad a tamdaw ihkalayto mahapinang o pakayniay i polong a tamdaw ko sapipatafang ni Yis to ˈorip malo sapatefoc. Mafanaˈ cangra tonini a kimad ikor, o niyah aca ko mafanaˈ cowa ka saan ko harateng, ao pakaynian i cudad, sinfon ato casi milasil tonini a soˈlinay kimad. Roma i, kalikiay cangra mitodong to i saka 1 hahekalan a Krisciyang, misatapang cecay miheca kinacecay aca miharateng to kapatay ni Yis.

7. O minaroˈan no micekiway to Fangcalay Cudad a tamdaw samaanay palemed kitaanan hani?

⁷ Samanen onini a Krisciyang itini ˈayaw no pina miheca misongilaˈay micekiw to Fangcalay Cudad, ato ira ko sapalemed ni Yihofa, hato cipinangay kita nohatini to milingatay to sapatefoc a soˈlinay kimad, mafanaˈ to pikinafalah ni Yis iraay ko maanan a tatodong i polong no tamdaw. (1 Yohani 2:1, 2) Mananamayho ita, sowal no Fangcalay Cudad o mihaydaan no Kawas a tamdaw iraay ko cowa ka lecad a hatokel—o romaroma tamdaw tatayra i kakarayan milifok to cowa ko mamapatay a ˈorip, masawalwalay a tamdaw wa itini fafekang no sera milayap to midaˈocay a ˈorip. Haratengen hakowaay ko kaolah ni Yihofa kitaanan,  ato mikitini sapatefoc ni Yis mamilifok kita to hakowaay a epoc, mihaen mamatongal ko sapiingidaw ita ci Yihofaan. (1 Pitiro 3:18; 1 Yohani 4:9) Mihaenay makalimay kita malecad to isalakatay madimadiay a salikaka, mitahidang to romaroma tamdaw malacafay kitaanan midoedo to paihkalan ni Yis a pakayraan miharateng cingranan.

8. Samaanay misaˈicel ko finawlan ni Yihofa, mitahidang to tao mirienang to Piharatengan a Saˈopo hani? (Nengnengen ko coka.)

⁸ Pinaayto miheca, finawlan ni Yihofa mitahidangay to tamdaw papirienang to Piharatengan a Saˈopo. Saka 1881 miheca, milasilay ko Mikecolay, mitahidang to i Padakaay a salikaka tayra i Alekeni no Pinsifaniya, itini i lomaˈ no cecay a salikaka misikay to Piharatengan a Saˈopo. Ikorto i, kahacecay a kasakopang misatapangayto misikay toniya saˈopo. 1940 miheca saka 3 folad, macadaay no salikaka ko sakayat, papitahidang to i kilacay a tamdaw mirienang tonini a saˈopo. 1960 miheca, o Pitil misatapangayto miinsac to satahidang papirienang tonini Piharatengan a Saˈopo. Mikitiya a misatapang, adihayayto ko mapalilamay no mita a satahidang a tancang. Misamaanay hano palaken ita ko adihayay a toki ato ˈicel a mitahidang to tao hani?

9-10. Mitahidang kita to tamdaw mirienang to Piharatengan a Saˈopo, o masamaanay a tamdaw ko mamilifok to epoc hani? (Yohani 3:16)

⁹ O cecay lalangian ita mitahidang to tamdaw i, makalimay kita toya sakinacecay mirienang a tamdaw ngaˈay mikitini i saˈopo minanam, ci Yihofa aci Yis pakayni kitaanan to polong a tamdaw misadakay to maanan. (ˈOsien ko Yohani 3:16.) Makalimay kita cangranan pakayni  manengnengay matengilay i Piharatengan a Saˈopo tangongol ko pitemer to falocoˈ, telocto sakacipinangaw to adihayay, salikor malo midokoayto ci Yihofaan a tamdaw. Kawra cowa ko cangra aca, iraayho ko romaroma tamdaw ngaˈay milifok to haepoc.

¹⁰ Mitahidangayho kita to misawaday to midokoay a demak a salikaka mirienang to Piharatengan a Saˈopo, samanen makalimay kita cangranan miharateng to kamayanay maolah ci Yihofa cangranan. Maˈaraw ita micada cangra to satahidang mirienang to Piharatengan a Saˈopo, tada mahemekay kita! Mirienang to Piharatengan a Saˈopo wa padama cangranan miharateng, midoko ci Yihofaan isalakat hakowaay ko kalipahak itiya. Nengnengen ko tinakoan ni Monika, c itiniay cingra i 2019 a lifong a tatokian miliyaw misatapang mitosil. Mirienang to 2021 miheca Piharatengan a Saˈopo ikor, sanay cingra: “Oniya Piharatengan a Saˈopo pakayni takowanan tada mikiriwiˈay. Lalomaˈ no 20 miheca, sakinacecay ako misawacay to tao, mitahidang cangranan mirienang to Piharatengan a Saˈopo. Soˈlinay misarocod ko falocoˈ ako a midemak, samanen tada miakoˈiday kako to kihcod nano demak ni Yihofa aci Yis takowanan.” (ˈOlic 103:1-4) Ano micada anca manaˈay ko tamdaw, misarocoday kita palilam to satahidang, samanen mafanaˈay kita misalimlaay ci Yihofa to mihadakan ita a ˈicel.

11. Misaˈicel kita mitahidang to tamdaw mirienang to Piharatengan a Saˈopo, samaanay milifok to sapalemed ni Yihofa hani? (Hakay 2:7)

¹¹ Misaˈicel kita mitahidang to tamdaw mirienang to Piharatengan a Saˈopo, soˈlinay mapalemed ni Yihofa. Isaka 2021 miheca, maconaay no lifong ko demak ita, kawrira iraayho ko 2,136 ˈofad 7,603 a tamdaw mirienang to Piharatengan a Saˈopo, o kaˈaloman no mirienangay tamdaw 2.5 tingloh ko kaˈaloman to komod no Misawacayay Tamdaw ni Yihofa. Manaokaniw, o kaciharatengan ni Yihofa cowa ko kaˈaloman no mirienangay, ao ciharatengay Cingra tora mirienangay a kahacecay tamdaw. (Luka 15:7; 1 Timoti 2:3, 4) Pakasoˈlinay kita, ano misaˈicel a mitahidang to tamdaw mirienang tonini Piharatengan a Saˈopo i, o papadamaen ni Yihofa kita pakahela to matatodongay ko waywayan a tamdaw.—ˈOsien ko Hakay 2:7.

12. O maanan a pakayraan ko miconaay kitaanan hato pasangaray mirienang to Piharatengan a Saˈopo? (Nengnengen ko coka.)

¹² Paliˈayaway ci Yis, itiniay kita i salikoray a ˈawaled wa malifa ko masakenakenaay a sapalifet, mahawpay ko sapalak, lalood, lifong ato pisafelit no paro no lomaˈ. (Matay 10:36; Marko 13:9; Luka 21:10, 11) Mihaenay, miharateng to pikinafalah ni Yis cowato ko madoloay alatek. Samaanay ko salikaka miremo to hatiniay a sacona hani? Samaanay ci Yihofa padama cangranan hani?

13. Itini kapalitan ci Aeciyawmo misetekay to falocoˈ miharateng to pikinafalah ni Yis, samaanay ci Yihofa palemed cingranan hani?

¹³ Mapalit. Oya pakayniay pihakelongan mapalit a salikaka misarocoday miharateng to pikinafalah ni Yis. Nengnengen ko tinakoan ni Aeciyawmo. Itini ˈayaw ato ikor no Piharatengan a Saˈopo to 2020 miheca, marofoay cingra itini kaemingay a tapalitan. Oniya tapalitan sepatay ko marofoay a tamdaw, latekay tahiraay i lalima. Soˈlin pasangaray ko pakayraan, kawra mahelaay ningra ko pina sapisalisin a dafong, ciharatengayho pakayni i niyah mihadak to kimad no Piharatengan a Saˈopo. Kawra, kalacafayay cingranan marofo a tamdaw iraay ko mitamakoay iraay ko somowalay to kaacekan a sowal. Samaanay ko demak ningra hani? Milicayan ningra cangra lalomaˈ  no cecay toki ngaˈay eca ka pitamako, ecaho ka somowal to kaacekan a sowal. Kafahkaˈan i, mihayiay cangra. Milicayanho ni Aeciyawmo cangra sakacipinangawto Piharatengan a Saˈopo hokira, soˈlin manaˈay cangra, kawra maˈaraw ko pisikay ni Aeciyawmo to Piharatengan a Lisin, mitengilho to mihadakan ningra a kimad ikor, adihayayto ko salicay nangra cingranan.

14. Sapisikayaw to Pikinafalah ni Yis to Piharatengan a Saˈopo itini kalifongan a tatokian, misaˈicelay ko finawlan no Kawas to maanan?

¹⁴ 2019 a lifong. Kalifongan a tatokian, o finawlan ni Yihofa soˈlin cowa ka ngaˈay tayra i Kasaˈopoan mirienang to Piharatengan a Saˈopo, kawra cowa ka miconged konini cangranan miharateng to pikinafalah ni Yis. d Itini iraay ko wanglo a kitiraan, adihayay kasakopang itiniay i tingnaw misikay to Pikinafalah ni Yis to Piharatengan a Saˈopo. Orato, awaay ko pakayraan misangwang a tamdaw samaanto hani? Itini roma a kitakit, pakaynian no fenpo i tilifi anca i laciyo pasadak to kimad no Piharatengan a Saˈopo. Roma i, cowa ka lecad a fenpo milokoingay tonini a kimad, mataˈlifay ko 500 kasasiroma no sowal. Onini a milokoingan pafelian no salikaka ko misaaliay a tamdaw, mihaen ano  itiniayto i maraayay a kilac a tamdaw ngaˈayay misikay tonini a saˈopo.

15. Mikitini taˈarawan ni Susan mananamay iso ko maanan hani?

¹⁵ Masafelitay no paro no lomaˈ. Pakayni i romaroma tamdaw, sapirienangaw to Piharatengan a Saˈopo masafelitay no paro no lomaˈ. Nengnengen ko tinakoan ni Susan. O micekiway to Fangcalay Cudad cingra, ˈayaw no cecay romiˈad to Piharatengan a Saˈopo isaka 2021 miheca, pasowalan ningra ko singsi no Fangcalay Cudad, tona misafelitay ko paro no lomaˈ, awaay ko pakayraan ningra mirienang to Piharatengan a Saˈopo. Singsi no Fangcalay Cudad ni Susan miˈosiay to Luka 22:44, ikor pasowalan cingra, ano tahalifa kita to pasangar i, tatodongen ci Yis, ngitangiten ci Yihofa mitolon misarocod a mitadiˈec Cingranan. Tocila, misadayay ci Susan to epang ato epah, halo minengneng i jw.org wangcan to mikiriwiˈay kamok no dafak a pidoko. Toya dadaya, cecayay cingra itini kafotiˈan tano tingwa mirienang to Piharatengan a Saˈopo. Ikorto, patikamiay cingra to singsi no Fangcalay Cudad, sowal sa: “Ya sowal iso inacila tada pakalalokay takowanan. To sapirienangaw to Piharatengan a Saˈopo, misaˈicelay kako midemak, soˈlinay padama ci Yihofa takowanan. Tada mahemekay kako a miakoˈid!” Ano tahalifa kiso to malecaday a pasangar, o papadamaen ni Yihofa kiso sanay kiso miharateng han?

16. Hano ngaˈay pakasoˈlin kita, misaˈicel mirienang to Piharatengan a Saˈopo o mamilifok to sapalemed ni Yihofa hani? (Loma 8:31, 32)

¹⁶ Maˈaraw ni Yihofa ko pisaˈicel ita miharateng to pikinafalah ni Yis, maedeng o mamahemek Cingra. Adihayay ko nano demak Ningra kitaanan, tano waywayan kita paihkal to piakoˈid no niyah Cingranan, o mamilifok to sapalemed Ningra. (ˈOsien ko Loma 8:31, 32.) Mihaenay, seteken ita ko falocoˈ mirienang to pikinafalah ni Yis Piharatengan a Saˈopo anini miheca, hanaca itini ˈayaw ato ikor no Piharatengan a Saˈopo i pina a lipay misarocod mirienang to midokoay a demak.