1-2. Taano ta nag-aatender kita sa Memoryal kada taon?

 HAROS 2,000 na taon na an nakaagi kan itao ni Jesus an saiyang buhay para sa sato, na nagbukas kan dalan para magkamit kita nin buhay na daing katapusan. Kan banggi bago magadan si Jesus, pinagbutan niya an saiyang mga parasunod na girumdumon an pagkamuot na ipinahiling niya paagi sa sarong simpleng seremonya na may tinapay asin arak.—1 Cor. 11:23-26.

² Sinusunod ta an pagbuot ni Jesus huling namumutan ta siyang marhay. (Juan 14:15) Kada taon pag panahon nin Memoryal, ipinapahiling ta an satong pagpapahalaga sa ginibo niya paagi sa pagtao nin panahon para may pagpamibing hurop-hurupon an kahulugan kan saiyang kagadanan. Maugma ta man na dinadagdagan an satong pakikikabtang sa ministeryo, na iniimbitaran an pinakadakul na tawong posible na umiba sa sato sa espesyal na okasyon na ini. Asin siyempre, determinado kita na dai pagtugutan an ano man na makaulang sa sato sa pag-atender sa Memoryal.

3. Ano an pag-uulayan ta sa artikulong ini?

³ Sa artikulong ini, pag-uulayan ta an tulong paagi na kun sain an mga lingkod ni Jehova naggibo nin mahalagang mga paghihinguwa para girumdumon an kagadanan ni Jesus: (1) paagi sa pag-establisar giraray kan arugan na itinao ni Jesus, (2) paagi sa pag-imbitar sa iba na mag-atender sa Memoryal, asin (3) paagi sa pagselebrar kan Memoryal sa ibong nin masakit na mga kamugtakan.

4. Anong mga katotoohan an itinatampok kada taon sa Memoryal, asin taano ta dapat na pahalagahan tang marhay an mga katotoohan na iyan? (Lucas 22:19, 20)

⁴ Sa Memoryal kada taon, nagdadangog kita sa sarong pahayag na basado sa Bibliya na nagtatao nin malinaw na mga simbag sa dakul  na hapot. Nanunudan niyato kun taano ta an mga tawo kaipuhan nin pantubos asin kun taano ta an kagadanan nin sarong tawo puwedeng makabayad sa mga kasalan nin dakul na tawo. Naipapagirumdom sato kun ano an irinerepresentar kan tinapay asin kan arak saka kun siisay an dapat na magkakan kan tinapay asin mag-inom kan arak. (Basahon an Lucas 22:19, 20.) Asin hinuhurop-hurop ta an mga bendisyon na nakatagama para duman sa mga nagpapahalaga sa paglaom na mabuhay nin daing katapusan digdi sa daga. (Isa. 35:5, 6; 65:17, 21-23) Dapat na pahalagahan tang marhay an mga katotoohan na iyan. Binilyon na tawo an dai nasasabutan iyan, asin dai ninda naaapresyar kun gurano kahalaga an atang ni Jesus. Dai man ninda sineselebrar an Memoryal kan saiyang kagadanan nin uyon sa halimbawa na inestablisar niya. Taano man?

5. Pakatapos na magadan an kadaklan sa mga apostol, ano an nangyari sa arugan na itinao ni Jesus sa paggirumdom kan saiyang kagadanan?

⁵ Dai nahaloy pakatapos na magadan an kadaklan sa mga apostol ni Jesus, nakalaog sa kongregasyon an imitasyon o bakong totoong mga Kristiyano. (Mat. 13:24-27, 37-39) Nagtaram sinda nin “mga bagay na biribid tanganing irayo an mga disipulo asin pasunudon sa sainda.” (Gibo 20:29, 30) An saro sa “mga bagay na biribid” na pinunan na itukdo kan bakong totoong mga Kristiyano iyo na dai daa idinulot ni Jesus an saiyang hawak nin “saro sanang beses para sa gabos na panahon tanganing darahon an mga kasalan nin dakul,” arog kan sinasabi sa Bibliya, kundi na an saiyang atang kaipuhan na idulot nin pauruutro. (Heb. 9:27, 28) Sa ngunyan dakul na sinserong tawo an nagtutubod sa palsong katukduan na ini. Nagtitiripon sinda sa mga simbahan nin regular—kun minsan aroaldaw—tanganing isagibo an inaapod na “an Banal na Komunyon.” b An ibang relihiyosong organisasyon bakong arog kaiyan kaparating isineselebrar an kagadanan ni Jesus, pero kadaklan kan saindang miyembro bakong malinaw an pakasabot sa kahulugan kan atang ni Jesus. Puwedeng may mga maghapot, ‘Talaga daw na mapapatawad an mga kasalan ko paagi sa kagadanan ni Jesus?’ Taano ta ihinahapot ninda iyan? Sa nagkapirang sitwasyon, naimpluwensiyahan kaya sinda kan mga tawo na nagdududa na puwedeng mapatawad an mga kasalan paagi sa atang ni Jesus. Paano inaatubang kan tunay na mga parasunod ni Jesus an isyung iyan?

6. Kan 1872, ano an nasabutan kan sarong grupo nin mga estudyante sa Bibliya?

⁶ Kan huring kabtang kan ika-19 siglo, sarong grupo nin mga estudyante sa Bibliya na pinanginutan ni Charles Taze Russell an pinunan na pag-adalan na marhay an Kasuratan. Gusto nindang maaraman an katotoohan manungod sa halaga kan atang ni Jesus asin kun paano an saiyang kagadanan dapat na girumdumon. Kan 1872, nagkaigwa sinda nin basado sa Bibliyang pakasabot na si Jesus talagang nagtao nin pantubos para sa bilog na katawuhan. An mga nasabutan ninda dai ninda sinadiri. Imbes, ipinalakop ninda an tataramon paagi sa mga libro, mga diyaryo, asin mga magasin. Asin puon kaidto, bilang pag-arog sa inot na siglong mga Kristiyano, pinunan nindang magtiripon nin sarong beses sana sa kada taon para iselebrar an Memoryal.

7. Paano kita nakikinabang sa ginibong pagsiyasat kan inot na mga estudyanteng idto sa Bibliya?

⁷ Sa ngunyan nakikinabang kita sa ginibong pagsiyasat kan sinserong mga Kristiyanong lalaking idto dakul na taon na an nakaagi. Paano? Sa tabang ni Jehova, nabuksan an satong mga mata sa katotoohan manungod sa atang ni Jesus asin sa kun ano an magigibo kaiyan sa katawuhan. (1 Juan 2:1, 2) Nanudan ta man na sinasabi kan Bibliya an manungod sa duwang paglaom para sa mga tawo na napapaugma an Diyos—imortal na buhay sa langit para sa nagkapira asin daing katapusan na buhay digdi sa daga para sa minilyon  na iba pa. Mas napaparani kita ki Jehova pag iniisip-isip ta kun gurano niya kita namumutan asin kun paano kita personal na nakikinabang sa atang ni Jesus. (1 Ped. 3:18; 1 Juan 4:9) Kaya arog kan maimbod na mga lalaki kaidto, iniimbitaran ta an iba na umiba sa sato sa pagselebrar kan Memoryal nin uyon sa arugan na itinao ni Jesus.

8. Ano an ginibo kan mga lingkod ni Jehova para imbitaran an iba na mag-atender sa Memoryal? (Hilingon an ritrato.)

⁸ Haloy nang ginigibo kan mga lingkod ni Jehova an pag-imbitar sa iba na mag-atender sa Memoryal. Puon pa kan 1881, iniimbitaran na an mga tugang sa Estados Unidos na magtiripon sa sarong pribadong harong sa Allegheny, Pennsylvania, para sa espesyal na okasyon na iyan. Pag-abot nin panahon, isinasagibo na an Memoryal sa kada kongregasyon. Kan Marso 1940, sinabihan an mga parahayag na puwede na nindang imbitaran an siisay man sa saindang teritoryo na nagpahiling nin interes. Kan 1960, sa inot na pagkakataon, nagtao an Bethel sa mga kongregasyon nin imprentadong mga imbitasyon. Puon kan taon na iyan, binilyon na imbitasyon sa Memoryal an naidistribwir. Taano ta nagtatao kita nin dakul na panahon asin naghihinguwang marhay para imbitaran an iba?

9-10. Sairisay an nakikinabang sa satong mga paghihinguwa na imbitaran an iba sa pag-atender sa Memoryal? (Juan 3:16)

⁹ An sarong dahilan kun taano ta iniimbitaran ta an iba na mag-atender sa Memoryal kaiba ta iyo na gusto tang maaraman kan mga maatender na ini sa inot na pagkakataon an katotoohan manungod sa ginibo ni Jehova asin ni Jesus para sa sato gabos. (Basahon an Juan 3:16.) Naglalaom kita na an mahihiling ninda asin madadangog  sa pag-atender sa Memoryal mapahiro sa sainda na makanuod nin urog pa asin magin mga lingkod ni Jehova. Pero may iba pa na nakikinabang man.

¹⁰ Iniimbitaran ta man an mga dai na naglilingkod ki Jehova. Ginigibo ta iyan para ipagirumdom sa sainda na namumutan pa man giraray sinda nin Diyos. Dakul sa sainda an naghihimati sa satong imbitasyon, asin nauugmang marhay kita na mahiling sinda. An pag-atender sa Memoryal nagpapagirumdom sa sainda kun gurano sinda kaugma sa paglilingkod ki Jehova kaidto. Pag-isipan an halimbawa ni Monica. c Nagin aktibong parahayag giraray siya sa panahon nin COVID-19 na pandemya. Pagkatapos na mag-atender nin Memoryal kan 2021, sinabi niya: “Espesyal na marhay sa sako an Memoryal na ini. Sa inot na pagkakataon pakalihis nin 20 taon, nagibo ko giraray na makapagpatotoo sa mga tawo asin maimbitaran sinda na mag-atender sa Memoryal. Ginibo ko an pinakamakakaya ko para diyan huling nagpapasalamat na marhay ako sa ginibo ni Jehova asin ni Jesus para sa sako.” (Sal. 103:1-4) Akuon man o dai kan mga tawo an satong imbitasyon, maigot tang iimbitaran an iba na mag-atender sa Memoryal, huling aram ta na pinapahalagahan ni Jehova an satong mga paghihinguwa.

11. Paano binendisyunan ni Jehova an satong mga paghihinguwa na imbitaran an mga tawo na mag-atender sa Memoryal? (Hageo 2:7)

¹¹ Abundang binebendisyunan ni Jehova an satong mga paghihinguwa para imbitaran an mga tawo na mag-atender sa Memoryal. Kan 2021, sa ibong kan mga restriksiyon dahil sa COVID-19 na pandemya, an bilang kan mga nag-atender uminabot sa 21,367,603. Haros duwa may kabangang doble nanggad iyan kan bilang kan mga Saksi ni Jehova sa bilog na kinaban! Siyempre, bako sana sa bilang kan mga nag-atender interesado si Jehova. Interesado siya sa mga indibidwal. (Luc. 15:7; 1 Tim. 2:3, 4) Kumbinsido kita na ginagamit ni Jehova an satong gibuhon na pag-imbitar para tabangan kita na mahanap an mga tawong sadiyosan an puso.—Basahon an Hageo 2:7.

12. Anong mga kamugtakan an puwedeng magin dahilan na magin dipisil sa sato an pagselebrar kan Memoryal? (Hilingon an ritrato.)

¹² Ihinula ni Jesus na sa panahon nin huring mga aldaw, mapapaatubang kita sa manlain-lain na masakit na mga kamugtakan—pagkontra nin mga kapamilya, persekusyon, mga giyera, mga epidemya, asin dakul pang iba. (Mat. 10:36; Mar. 13:9; Luc. 21:10, 11) May mga pagkakataon, na dahil sa mga kamugtakan na ini nagigin dipisil para sa sato na iselebrar an Memoryal kan kagadanan ni Jesus. Ano an ginibo kan satong mga tugang para mapangganahan an siring na mga kadipisilan, asin paano sinda tinabangan ni Jehova?

13. Paano binendisyunan ni Jehova an kusog nin buot asin determinasyon ni Artem para iselebrar an Memoryal mantang nasa presuhan siya?

¹³ Pagkapreso. An satong mga tugang na nasa presuhan huli sa saindang pagtubod ginigibo an saindang pinakamakakaya para girumdumon an kagadanan ni Jesus. Pag-isipan an halimbawa ni Artem. Durante kan panahon nin Memoryal kan 2020, iprineso siya sa sarong 17 metro kuwadradong selda na sagkod sa limang preso an puwedeng ilaog. Dawa nakapreso, nagibo niya na makakua nin nagkapirang bagay para magamit niya bilang mga emblema sa Memoryal, asin plinano niya na magpahayag sa Memoryal para makinabang siya. Pero an mga kaibanan niya sa selda nagsisigarilyo asin grabe kun magmuda. Ano an ginibo niya? Pinakiulayan niya sinda na dai nguna magmuda asin magsigarilyo sa laog sana nin sarong oras. Napangalas si Artem ta nagtugot an mga kairiba niya sa selda na dai nguna  magsigarilyo o magmuda durante kan Memoryal. Sinabi ni Artem, “Nag-alok kutana ako sa sainda na ipakipag-ulay an manungod sa Memoryal.” Dawa nagsayuma sindang maaraman an manungod sa okasyon na iyan, pagkatapos na mahiling asin madangog ninda si Artem sa pagselebrar niya kan Memoryal, nagparahapot na sinda manungod diyan.

14. Anong mga paghihinguwa an ginibo para iselebrar an Memoryal sa ibong kan COVID-19 na pandemya?

¹⁴ COVID-19 na pandemya. Kan magpuon an pandemyang ini, dai nagibo kan mga lingkod ni Jehova an in-person na pag-atender sa Memoryal. Pero dai iyan nakaulang sa sainda para iselebrar an Memoryal. d An mga kongregasyon na may access sa Internet ginibo an Memoryal paagi sa videoconference. Pero paano man an minilyon na mayo nin access sa Internet? Sa nagkapirang mga nasyon, naggibo nin mga areglo para ibrodkast an pahayag sa telebisyon o sa radyo. Dugang pa, may mga sangay na irinekord an pahayag sa labing 500 na lengguwahe tanganing maski an mga nasa hararayong lugar makapagselebrar kan Memoryal. Asin an pigrekord na pahayag ihinatod kan maimbod na mga brother sa mga tugang na nasa hararayong lugar na iyan.

15. Ano an manunudan mo sa halimbawa kan tinutukduan sa Bibliya na si Sue?

 ¹⁵ Pagkontra nin mga kapamilya. Para sa nagkapira, an pinakadakulang ulang sa pagselebrar kan Memoryal iyo an pagkontra nin mga kapamilya. Pag-isipan an halimbawa ni Sue na sarong tinutukduan sa Bibliya. Kan 2021, kan aldaw bago an Memoryal, sinabi ni Sue sa nagtutukdo sa saiya sa Bibliya na dai siya makakaatender sa Memoryal huli sa pagkontra kan saiyang mga kapamilya. Binasa sa saiya kan nagtutukdo sa saiya sa Bibliya an Lucas 22:44. Dangan ipinaliwanag kaini sa saiya na pag nakakaeksperyensiya kita nin mga kadipisilan, dapat na sunudon ta an halimbawa ni Jesus paagi sa pagdulok ki Jehova sa pamibi asin lubos na pagtiwala sa Saiya. Kinaagahan, inandam ni Sue an mga emblema asin hiniling an espesyal na programa nin Pang-agang Pagsamba sa jw.org. Kan bangging idto, mantang solo sa saiyang kuwarto, nagkonektar siya gamit an saiyang cellphone para makaatender sa Memoryal. Pakatapos kaiyan, nagsurat si Sue sa nagtutukdo sa saiya sa Bibliya: “Napakusog mo akong marhay kasuudma. Ginibo ko an gabos para makaatender sa Memoryal, asin tinabangan talaga ako ni Jehova. Grabe nanggad an sakong kaugmahan asin pagpapasalamat!” Sa hiling mo, matatabangan ka man daw ni Jehova pag napaatubang ka sa arog man kaiyan na sitwasyon?

16. Taano ta makakapagtiwala kita na bebendisyunan ni Jehova an satong mga paghihinguwa para makaatender sa Memoryal? (Roma 8:31, 32)

¹⁶ Pinapahalagahan na marhay ni Jehova an satong mga paghihinguwa para girumdumon an kagadanan ni Jesus. Makakasigurado kita na bebendisyunan niya kita pag ipinapahiling ta an satong pagpapahalaga sa ginibo niya para sa sato. (Basahon an Roma 8:31, 32.) Kaya, lugod na magin determinado kita na mag-atender sa Memoryal sa taon na ini asin na gibuhon an makakaya ta para dagdagan an satong pakikikabtang sa espirituwal na mga aktibidad sa panahon nin Memoryal.