1-2. Engkai maka tiap tahun reh kita ku acara Peringet-ingeten?

 HAMPIR 2.000 tahun si lewat, ibereken Jesus kegeluhenna man banta gelah banci kita nggeluh rasa lalap. Bas berngi sope kematenna, iperentahken Jesus murid-muridna guna erban acara Peringeten si sederhana alu roti ras anggur. Si e arus ilakoken kalak e guna nginget pengorbanen Jesus.​—1 Kor. 11:23-26.

² Sipatuhi perentah Jesus perban keleng kel ateta ia. (Joh. 14:15) Tiap tahun bas minggu-minggu sope ras kenca acara Peringet-ingeten, sicidahken pengerganta nandangi kai si lakoken Jesus alu ngukuri ras notoken kai erti kematenna man banta. Meriah ka ukurta mereken terbuen bas pelayanen guna ngundang enterem kalak asa bancita gelah reh ku acara si istimewa e. Selain si e, pasti siusahaken gelah la lit kai pe si erban kita la banci reh ku acara Peringet-ingeten.

3. Kai kari sibahas bas artikel enda?

³ Bas artikel enda sibahas kari telu cara umat Jahwe ngelakoken si mehulina guna acara Peringet-ingeten Kematen Jesus, (1) alu ngelakoken acara Peringet-ingeten bagi si ajarken Jesus, (2) alu ngundang kalak si deban ku acara Peringet-ingeten, ras (3) alu ngikuti acara Peringet-ingeten amin pe susah situasita.

4. Kebenaren kai saja si banci sipelajari bas acara Peringet-ingeten janah engkai maka meherga kel kebenaren-kebenaren e? (Lukas 22:19, 20)

⁴ Tiap tahun bas acara Peringeten, sibegiken khotbah si erpalasken Pustaka si mereken jawapen nandangi piga-piga penungkunen kerna tebusen. Arah acara e, banci siteh engkai maka manusia perlu tebusen janah uga kematen sekalak jelma banci nebus dosa enterem kalak. Sipelajari ka kai erti roti ras anggur bas acara e janah ise si banci man roti ras minem anggur e. (Baca Lukas 22:19, 20.) Iingetken ka kita kerna pasu-pasu man kalak si erpengarapen nggeluh rasa lalap i doni. (Jes. 35:5, 6; 65:17, 21-23) Seh kel ergana kebenaren-kebenaren si banci sidat bas acara e. Miliaren kalak la angkana kerna si e janah la ergaina pengorbanen Jesus si luar biasa. Selain si e, la lakoken kalak e acara Peringeten bagi si ajarken Jesus. Engkai?

5. Kenca rasul-rasul Jesus buen enggo mate, uga cara kalak mperingeti kematen Jesus?

⁵ La ndekah kenca rasul-rasul Jesus enggo buen mate, kalak Kristen si palsu mulai masuk ku runggun. (Mat. 13:24-27, 37-39) Ipeseh kalak e “ajaren sesat. Ate kalak e gelah murid-murid Jesus jadi pengikutna.” (Perb. 20:29, 30) Salah sada “ajaren sesat” si ipeseh kalak Kristen si palsu eme ajaren maka arus mulih-ulih ikorbanken Jesus dagingna. Tapi, iajarken Pustaka maka Jesus mate “sekali seh rasa lalap guna maba dosa enterem jelma.” (Heb. 9:27, 28) Gundari, enterem kalak si bujur si tek nandangi ajaren palsu e. Ratur kalak e pulung bas gereja, mon-mon tiap wari, guna ngerayaken kai si igelari kalak e “Ekaristi” ntah pe “Misa Kudus.” b Organisasi agama si deban la bage rusurna ngerayaken kematen Jesus, tapi buen anggota kalak e la angkana kai erti pengorbanen Jesus. Piga-piga kalak mungkin tersungkun-sungkun, ‘Payo nge kematen Jesus banci ngampuni dosaku?’ Engkai maka kalak e tersungkun-sungkun kerna si e? Perban tek kalak e maka dosa la banci iampuni alu kematen Jesus, bagi si ikataken kalak. Uga cara murid-murid Jesus nampati kalak guna ngangkai erti kematen Jesus ras cara si benar guna mperingeti kematenna?

6. Bas tahun 1872, kesimpulen kai si iban sada kelompok ajar-ajar Pustaka?

⁶ Bas pendungi abad 19, sada kelompok ajar-ajar Pustaka si ipinpin Charles Taze Russell mulai mpelajari Pustaka alu tutus. Merhat kalak e meteh kebenaren kerna erti pengorbanen Jesus ras uga arusna cara mperingeti kematenna. Bas tahun 1872, enggo teh kalak e maka pengorbanen Jesus banci jadi tebusen man enterem jelma. Kai si enggo teh kalak e, ibagikenna ka man kalak si deban. Ipeseh kalak e kerna si e arah buku-buku, koran, ras majalah. La ndekah kenca si e, mulai me iban kalak e acara Peringet-ingeten Kematen Jesus sekali sada tahun, iusih kalak e kalak Kristen abad pertama.

7. Kai gunana man banta hasil riset arah ajar-ajar Pustaka mbarenda?

⁷ Hasil riset arah ajar-ajar Pustaka erguna ka man banta gundari. Enggo sampati Jahwe kita ngangkai kai erti pengorbanen Jesus ras kai gunana man banta. (1 Joh. 2:1, 2) Enggo ka sipelajari  maka lit dua pengarapen bas Pustaka man kalak si erban meriah ukur Dibata, eme kegeluhen si rasa lalap i surga man piga-piga kalak ras kegeluhen rasa lalap bas doni man jutan kalak si deban. Alu ngukuri uga kelengna ate Jahwe kita ras uga belinna manpaat pengorbanen Jesus man banta, reh rembakna me kita ras Jahwe. (1 Pet. 3:18; 1 Joh. 4:9) Emaka bali bagi turang seninata si mbarenda, siundang kalak si deban guna ngikuti acara Peringet-ingeten Kematen Jesus bagi si ajarken Jesus.

8. Kai si lakoken umat Jahwe guna ngundang kalak ku acara Peringet-ingeten? (Nen gambar.)

⁸ Mbarenda nari umat Jahwe enggo ngundang kalak ku acara Peringeten Kematen Jesus. Bas awal tahun 1881, turang senina i Amerika Serikat iundang guna pulung ras-ras bas rumah sekalak turang senina i Allegheny, Pennsylvania, guna acara si istimewa e. La ndekah kenca si e, tiap runggun banci erban acara Peringeten. Bas bulan Maret 1940, perberita-perberita iiahken guna ngundang ise pe si berminat i daerahna ku acara e. Bas tahun 1960, i je me tangtangna isikapken Betel undangen tercetak man runggun-runggun. Mulai paksa si e, enggo miliaren undangen Peringet-ingeten ibagiken. Engkai maka bage buena waktu ras kerja keras si ilakoken guna ngundang kalak si deban?

9-10. Ise saja si ndatken manpaat perban siusahaken ngundang kalak ku acara Peringeten? (Johanes 3:16)

⁹ Salah sada alasen ngundang kalak ku  acara Peringeten eme gelah kalak si tangtangna reh ku acara e banci mpelajari kebenaren kerna kai si enggo lakoken Jahwe ras Jesus man banta. (Baca Johanes 3:16.) Ngarap kita gelah kai si idah ras ibegi kalak e bas acara e, banci ngiahken ia mpelajari terbuen kerna Jahwe ras nggit ngelayani Jahwe. Ise ka si banci ndatken manpaat arah acara e?

¹⁰ Siundang ka kalak si lanai aktip ngelayani Jahwe, alu bage siingetken kalak e maka tetap nge keleng ate Jahwe ia. Mbue arah kalak e si nggit ngaloken undangenta janah meriah ukurta ngidah kalak e. Alu reh ku acara Peringeten, e ngingetken kalak e uga riahna ukur kalak e mbarenda sanga ngelayani Jahwe. Cuba ukuri contoh Monica. c Mulai ka ia erberita sanga terjadi pandemi COVID-19. Kenca reh ia ku acara Peringeten tahun 2021, bagenda nina, “Acara Peringeten e istimewa kel man bangku. I je me tangtangna bas 20 tahun enda banci ka aku erberita ras ngundang kalak ku acara Peringeten. Kulakoken asa ngasupku ngundang kalak perban ngata bujur kel aku man kai si enggo lakoken Jahwe ras Jesus man bangku.” (Ms. 103:1-4) La soal aloken kalak undangenta ntah lang, siusahaken asa ngasupta ngundang kalak ku acara Peringeten, sebap siteh iergai Jahwe usahata.

11. Uga Jahwe masu-masu usahata ngundang kalak ku acara Peringet-ingeten? (Hagai 2:7)

¹¹ Mbue kel pasu-pasu Jahwe man usahata ngundang kalak ku acara Peringet-ingeten. Bas tahun 2021, amin pe lit pembatasen perban pandemi COVID-19, kalak si reh ku acara Peringeten jumlahna lit 21.367.603 kalak. La pernah bage buena kalak si reh. Jumlah e hampir dua setengah kali buen asangken jumlah Saksi Jahwe i sebelang doni. Amin pe bage, labo kerna jumlah kalak si reh ngenca si iperdiateken Jahwe. Tapi ermediate Jahwe man tiap kalak si reh. (Luk. 15:7; 1 Tim. 2:3, 4) Tek kita maka sanga sibereken undangen man kalak si deban, isampati Jahwe kita jumpa ras kalak si bujur.​—Baca Hagai 2:7.

12. Situasi kai si banci erban mesera siakap reh ku acara Peringeten? (Nen gambar.)

¹² Enggo inubuatken Jesus maka bas wari-wari pendungi pasti siadapi mbue situasi si mesera, misalna tentangen arah keluarga, penganiayan, perang, wabah penakit, ras si debanna. (Mat. 10:36; Mrk. 13:9; Luk. 21:10, 11) Mon-mon situasi si bage banci erban mesera siakap ngikuti acara Peringeten Kematen Jesus. Kai nge silakoken turang seninata guna ngadapi situasi si bage, ras uga cara Jahwe nampati kalak e?

13. Uga Jahwe masu-masu sipat Artem si perpang ras tekadna guna ngelakoken acara Peringeten bas penjara?

¹³ Sanga ipenjaraken. Turang seninata si ipenjaraken perban kinitekenna ngelakoken asa bancina guna mperingeti kematen Jesus. Cuba ukuri contoh Artem. Bas tahun 2020 bas minggu-minggu sope ras kenca acara Peringeten, ia ipenjaraken bas ingan si belangna 17 meter persegi radu ras empat ntah lima tahanen si deban. Amin pe ipenjaraken, banci denga datna lambang-lambang guna acara Peringeten, janah irencanakenna guna mpeseh khotbah  Peringet-ingeten guna dirina. Tapi, teman-temanna bas penjara e rusur ngisap ras cakap kotor. Kai si lakokenna? Ipindona man kalak e gelah ngadi lebe kalak e cakap kotor ras ngisap sada jam dekahna. Sengget kel Artem perban setuju teman-temanna. Bagenda nina Artem, “Kutawarken man kalak e guna nceritaken kerna acara Peringeten.” Tangtangna la kalak e nggit megikenca. Tapi, kenca idah kalak e ras begina Artem ngelakoken acara Peringeten, melala penungkunen kalak e kerna acara e.

14. Uga acara Peringeten banci tetap ilakoken amin pe lit pandemi COVID-19?

¹⁴ Sanga terjadi pandemi COVID-19. Perban terjadi pandemi, umat Jahwe la banci erban acara Peringeten alu jumpa langsung. Tapi acara Peringeten tetap iban. d Runggun-runggun si lit jaringen Internetna banci erban acara e alu video-conference. Tapi uga kerna jutan kalak si la lit jaringen Internetna? Bas piga-piga negri, iaturken me gelah acara  e isiarken arah TV ntah pe radio. Selain si e, kantor-kantor cabang ngerekam khotbah Peringeten e bas lebih 500 bahasa, alu bage kalak si tading bas daerah si terpencil banci ngikuti acara Peringeten. Turang senina si dilaki ngaturken gelah rekamen e banci seh ku kalak si merluken.

15. Kai si banci sipelajari arah usihen sekalak si erlajar Pustaka si gelarna Susan?

¹⁵ Sanga lit tentangen arah keluarga. Man piga-piga kalak, tentangen si mberatna guna reh ku acara Peringeten eme tentangen arah keluarga. Cuba ukuri contoh arah sekalak si erlajar Pustaka si gelarna Susan. Bas tahun 2021, sada wari sope acara Peringeten, ikataken Susan man kalak si ngajari ia Pustaka maka la ia banci reh ku acara Peringeten perban lit tentangen arah keluargana. Kalak si ngajarken ia Pustaka mbacaken Lukas 22:44. Kenca si e jelaskenna maka sanga siadapi situasi si sulit, arus siusih Jesus alu ertoto man Jahwe ras tek man baNa. Paginna isikapken Susan lambang-lambang guna Peringeten janah itontonna acara Ibadah Pagi man Peringet-ingeten bas jw.org. Bas berngina sanga sisada ia bas kamarna, ibegikenna acara Peringeten arah HP-na. Kenca si e, itulisna bagenda man kalak si ngajari ia Pustaka, “Enggo pegegehindu kel aku nderbih. Kulakoken kai si banci kulakoken guna ngikuti acara Peringeten janah sampati Jahwe aku. La terturiken aku uga riahna ukurku ras uga belinna pengataken bujurku!” Menurutndu banci nge sampati Jahwe kam bas ngadapi situasi si seri?

16. Engkai maka tek kita pasti pasu-pasu Jahwe usahata reh ku acara Peringeten? (Roma 8:31, 32)

¹⁶ Iergai Jahwe kel usahata guna ngikuti acara Peringeten Kematen Jesus. Tek kita maka pasti pasu-pasu Jahwe kita adi siergai kai si enggo lakokenNa man banta. (Baca Roma 8:31, 32.) Emaka ertekadlah kita guna reh ku acara Peringeten bas tahun enda. Silakokenlah terbuen man Jahwe bas minggu-minggu sope ras kenca acara Peringeten.