ASU AYÉ’É 4
Yéhôva a botane ngul ése bia ve asu na bi tabe Mesimesa’ane
“Kelané ôsu a bo jame di mi simesa’ane ma.”—LUC 22:19.
JIA 19 Tawôla Tate
ÔBALEBAS a
1-2. Amu jé bia tabe Mesimesa’ane mbu ôse?
DEN a nga ke mimbu 2000 a mvuk, Yésus a nga ve ényiñe jé asu dangan, nalé a nga ve bia fane ya bi ényiñe ya melu mese. Alu Yésus a nga kandane tabe a beyé’é bé, a nga nyoñe mebuka’a me fembé a won a jô be na be li’i be simesane nye’an a nga nye’e be.—1 Cor. 11:23-26.
2 Bia tôñ atiñe Yésus éte amu bia nye’e nye abui. (Jean 14:15) Mbu ôse éyoñe ya Mesimesa’ane bia liti na bia nyane ntañ éyoñe bia nyoñ éyoñe ya fase meye’elan été beta jame Yésus a nga bo asu dangan. Bia nene fe ésaé nkañete jangan a bañete abui bôte na é zu tabe a bia môs ôte. A bi nji kañese na jam éziñ é bo na bi bo teke tabe Mesimesa’ane.
3. Jé bia zu yen ayé’é di?
3 Ayé’é di, bia zu yene mame melale bebo bisaé be Yéhôva ba ve ngule ya bo asu na be tabe Mesimesa’ane ya awu Yésus: (1) Ba bo Mesimesa’ane fo’o ve avale Yésus a nga jô na be bo, (2) ba bañete bôte bevo’o Mesimesa’ane, a (3) ba tabe Mesimesa’ane akusa bo minjuk.
BA BO MESIMESA’ANE FO’O VE AVALE YÉSUS A NGA JÔ NA BE BO
4. Benya mejôô bevé ba ngôné mbu ôse Mesimesa’ane, a amu jé bi nji yiane nyoñe be éngbwemese? (Luc 22:19, 20)
4 Mbu ôse éyoñe bia tabe Mesimesa’ane, bia wô’ô nkañete wo so Bible. Wo ve bia biyalane ya abui minsili. Nkañete ôte wo kate bia amu jé ntañ ô ne mfi asu môta binam a aval avé awu môte wua é ne buti minseme mi abui bôt. Ba ba’alane fe bia atinane ya belet a won a za a yiane nyu won a di belet. (Lañe’e Luc 22:19, 20.) Bia simesane fe ndi nleme bôte ba ye bi fane ya nyiñe nnôm éto si va be bili. (Ésa. 35:5, 6; 65:17, 21-23) Bi nji yiane nyoñe benya mejôô bete éngbwemese. Bemillion be bôte be nji yeme mame mete a be nji yeme mfi ya metuna’a Yésus a nga bo. Be ne fe teke bo Mesimesa’ane ya awu dé aval a nga jô na bi li’i bi bo’ok. Amu jé?
5. Mvus awu minlômane mi Yésus, aval avé bôte be nga taté na ba bo Mesimesa’ane?
5 Mone éyoñ mvus awu minlômane mi Yésus, bivuse bekristene bi nga nyiin akônda été. (Matt. 13:24-27, 37-39) Be mbe be kobô’ô “mame me ne minsose na be dutu beyé’é na be tôñe be.” (Mame mi. 20:29, 30) Jame da ya “mame me ne minsos” bivuse bekristene bi mbe bi ye’ele’e bôt é ne na, Yésus a nji ve nyule jé “éyoñe jia ya biyoñe bise na a be’e minseme mi abui bôt,” avale Kalate Zambe a jô, ve na mveane wé wo yiane boban éyoñ ése. (Héb. 9:27, 28) Melu ma, abui bôte da buni minsose mite. Be ne mbane ya ke menda me Zambe, bevo’o ba ke môs ôse asu na be ke bo jôme ba loone na, “sacrifice de masse.” b Miñyebe mivok mi wô’ô simesan awu Yésus biyoñe biziñ, ve abui bôt é ne teke dañe yeme mfi ya awu Yésus. Bôte béziñe be ne sili na: ‘Ye awu Yésus é ne fo’o bo na me bi njamane ya mam abé mam?’ Amu jé ba bôé nsili ôte? Amu be jaéya zu ba ye’ele be na awu Yésus é vo’o buti minsem. Aval avé benya beyé’é be Yésus ba volô bôte mfa’a ôte?
6. Mbu 1872, jam avé mone angôse beyé’é Bible a nga tu’a wôk a lat a Mesimesa’ane?
6 Memane ya ntete mimbu 19, Charles Taze Russell a nga bôndé mone angôse beyé’é Bible asu na be taté na ba yé’é mimfufube mintilan. Be mbe be kômbô’ô yeme mfi ya metuna’a Yésus a nga ve. Mbu 1872, ayé’é Bible dap é nga volô be na be yeme na Yésus a nga ve ntañ asu môta binam ase. Be nji ba’ale ñyeman ôte asu dap étam. Be nga miase foé éte a zene ya bekalate a bekalate mefoé. Be nji jañele éyoñ, be nga vu bekristene ya ntete mimbu ôsu, mbe bete be nga taté na ba bo Mesimesa’ane éyoñe jia mbu.
7. Aval avé bia bu’ubane mame mese beyé’é Bible be nga bo melu mvus?
7 Melu ma, bia ke ôsu a bu’uban a mame bekristene bete be nga jeñe den a ntoo abui mimbu. Aval avé? A mvolane Yéhôva bi nga kôme wô’ô benya mejôô a lat a metuna’a me Yésus a mbamba be mame ba so été. (1 Jean 2:1, 2) Bi nga yé’é Kalate Zambe na ndi nlem é ne ébaé asu bôte ba kañe Zambe, ba bé ke nyiñe yôp mbe bete be vo’o beta wu, a bemillion be bôte ba ye nyiñe si va nnôm éto. Bii kabetane Yéhôva éyoñe bia yen abim avé a nye’e bia a abime bibotane bia bi bi so’o metuna’a me Yésus. (1 P. 3:18; 1 Jean 4:9) Nde aval ane bobejañe ya melu mvus, bia bañete bôte bevo’o na be zu tabe Mesimesa’ane a bia avale Yésus émien a nga ye’ele.
BA BAÑETE BÔTE BEVOK MESIMESA’ANE
Jé ô ne bo asu na ô tu’a nyoñ ngap ôbane nkañete ya Mesimesa’ane? (Fombô’ô abeñ 8-10) e
8. Mam mevé bebo bisaé be Yéhôva ba bo asu na be bañete bôte bevok Mesimesa’ane? (Fombô’ô fôtô.)
8 Den a ntoo abui mimbu bebo bisaé be Yéhôva ba jaé zu ba bañete bôte bevok Mesimesa’ane. Mbu 1881, be nga bañete bobejañ a besita ya Amelka na be ke tôban Allegheny, Pennsylvanie, asu ésulan é ne ngum aval. Mvuse ya valé, akônda ése é nga taté na da bo Mesimesa’ane wôé. Ngone lale ya mbu 1940, be nga jô bekañete mbamba foé na be ne bañete môt ase a nye’e mejô me Zambe abeñ nkañete dap na a zu tabe Mesimesa’ane. Béthel a nga kuli mefep mimbañete éyoñ ôsu Mesimesa’ane ya mbu 1960. Ataté éyoñ éte be kabeya mefep me mbañete bemillard asu Mesimesa’ane. Amu jé bia nyoñ abim éyoñ éte, a ve ngul ése na bi bañete bôte bevok?
9-10. Beza bia bañete Mesimesa’ane? (Jean 3:16)
9 Amu wua a bo na bi bañete bôte bevo’o na be zu tabe Mesimesa’ane a bia a ne na, bia yi na bôte ba zu tabe Mesimesa’ane éyoñ ôsu be zu yé’é jame Yéhôva ba Yésus be nga bo asu dangan bia bese. (Lañe’e Jean 3:16.) Bi too ndi na, mam bé yen a wôk môse Mesimesa’ane ma ye tindi be na be bi nkômbane ya yé’é mam mefe a su’ulane bo bebo bisaé be Yéhôva. Ve bôte befe be ne fe yene mfi ya été.
10 Bia bañete fe bôte be voéya nsisime den a ntoo ayap éyoñ. Nalé a volô be na be bo te vuane na Yéhôva a ngenan a nye’e be. Abui e wô’ô so, a bi wô’ô bo angôndô ya meva’a ya beta yene be. Éyoñe ba tabe Mesimesa’ane, nalé a volô be na be beta simesan abime mevak be mbe be bili melu mvus éyoñe be mbe be kañe’e Yéhôva. Bi tame kobô ajô Monica. c Nkañete mbamba foé mfe a nga beta nye ve évak ya bo mame ya nsisim éyoñe ya COVID-19. Éyoñ a nga mane tabe Mesimesa’ane ya mbu 2021, a nga jô na: “Mesimesa’ane ya mbu wu a mbe ngum aval asu dam. Mvuse mimbu 20, éyoñ ôsu di ma te kui na me kañete bôt a bañete be Mesimesa’ane. Me nga futi nleme wom ôse ésaé éte amu me mbe me kômbô’ô ve Yéhôva ba Yésus akiba asu mam mese be nga bo asu dam.” (Bsa. 103:1-4) To’o bôte ba so nge momo, bii ve ngul ése na bi bañete be Mesimesa’ane, bi yeme na Yéhôva a yene ngul ése bia ve asu na bi bo de.
11. Aval avé Yéhôva a nga botane ngule bi nga ve na bi bañete bôt Mesimesa’ane? (Aggée 2:7)
11 Yéhôva a nga botan ngul ése bi nga ve na bi bañete bôt Mesimesa’ane. Mbu 2021, akusa bo bityi COVID-19 a nga so bie, tañe bôt é nga tabe Mesimesa’ane é mbe 21 367 603. Tañe bôt éte é ne tañe Bengaa be Yéhôva bese ya si biyoñe bibaé a étun! É ne été na, sake tañe bôte nje Yéhôva a dañe fombô. A nye’e môt ase ya be bia. (Luc 15:7; 1 Tim. 2:3, 4) Bi ne tabe ndi na nge bia nyoñ éyoñe ya bañete bôte bevok, Yéhôva é volô bia na bi yeme bôte be bili mbamba été nsisim.—Lañe’e Aggée 2:7.
BÔTE BA TABE MESIMESA’ANE AKUSA BO MINJUK
Yéhôva a botane ngul ése bia ve asu na bi tabe Mesimesa’ane (Fombô’ô abeñ 12) f
12. Minju’u mivé mi ne bo na é bo ayaé ya tabe Mesimesa’ane? (Fombô’ô fôtô.)
12 Yésus a nga jô na melu ma su’ulan, bia ye tôbane minju’u mevale meval mi so’o menda me bôt, étibila’a, bibubua bi akon, akeke. (Matt. 10:36; Marc 13:9; Luc 21:10, 11) Biyoñ biziñ, é wô’ô bo ayaé na bi tabe Mesimesa’ane ya awu Yésus. Aval avé bobejañ a besita be nga bo asu na be dañ avale minju’u éte, aval avé Yéhôva a nga volô be?
13. Aval avé Yéhôva a nga botan ayo’o nlem Artem a nkômban a mbe a bili na a bo Mesimesa’ane?
13 Mimbôk. Bobejañ be ne mimbôk amu mbunane wop ba ve ngul ése asu na be bo Mesimesa’ane. Bi tame yen jam é nga kui Artem. Éyoñe ya Mesimesa’ane ya mbu 2020, a mbe mfetan mone étune nda ya nda mimbôk a mimbôk mife minyin. Akusa bo a mbe mfetane nda mimbôk, a nga kui na a bi fembé a won asu Mesimesa’ane, a nga kômesane fe aval a ye bo nkañete ya Mesimesa’ane asu dé émien. Ve mimbôk mivok mi mbe mi nya’a ta’a mi bela’ane fe mbia minkobô. Nde Artem a nga bo aya? A nga ye’elane be na be bo teke nyu sika a kobô mbia minkobô fo’o ve awolo da. Artem a nga kame na be nga kañese bo de. A jô na: “Me nga kômbô be ve atinane ya Mesimesane.” Akusa bo be nga jô na be nji kômbô vô’ôlô jili, ve éyoñ be nga mane yen mam mese Artem a nga bo a jô, bebien be nga taté na ba sili nye minsili a lat a Mesimesa’ane.
14. Mam mevé bobejañ be nga bo asu na bôt be tabe Mesimesa’ane akusa bo ébubua ôkon COVID-19?
14 Ébubua ôkon COVID-19. Éyoñ ébubua ôkon ôte ô nga taté, bebo bisaé be Yéhôva be nji be ve beta tabe Mesimesa’ane nsamba. Ve be nji kamane be na be bo Mesimesa’ane. d Mekônda me bili internet tyi’ibi me nga bo Mesimesa’ane nkol. Ve bemillion be bôte ki be nji bi internet be nga bo aya? Mesi méziñ, be nga mane bo nta’ane mam asu na nkañete ya Mesimesa’ane ô lôte télé nge ke radio. Nde fe, abui bebéthel é nga bo na be kôñelan nkañete ôte tañe minkobô 500, ndemben bôt be bo ngule ya bo Mesimesa’ane. Nde fe bobejañ be nga mane kômesane na be ve bôt be enregistrement ya été.
15. Nkañete Sue wo ye’ele bia jé?
15 Mewosane ya nda bôt. Asu bôte béziñ, beta njuk a ne kamane be na be tabe Mesimesa’ane a ne mewosane ya nda bôt. Bi tame zu kobô ajô Sue, ñyé’é Bible. Mbu 2021, môse wua ôsusua Mesimesa’ane, Sue a nga kate môte ba nye be mbe be yé’é Bible na a vo’o tabe Mesimesa’ane amu nda bôte jé ja wosane nye. Ñye’ele Bible wé a nga lañ nye Luc 22:44. Ane a nga kate nye na éyoñ a tôbane minjuk a yiane jeñe na a vu éve’ela Yésus nnye ate a nga ye’elane Yéhôva a tabe nye mebun. Môs ô nga tôé valé, Sue a nga mane kômesane belet a won asu Mesimesane, a nga yene fe éfuse ya môs é ne ngum aval be nga futi jw.org. Mam me ngô’é, a nga tabe Mesimesa’ane étune nda jé a zene ya téléfôn. Mvuse ya valé, Sue a nga tili môte ba nye ba yé’é Bible a jô’ô nye na: “Ô nga ve ma ngule nyul abui angô’é. Me nga bo jam ése me mbe ngule ya bo asu na me tabe Mesimesa’ane, a Yéhôva a nga bo mam mese mevok. Ma yeme ki aval me ne kate wo abim mevak ma wôk a abim akiba ma ve wo!” Ye wo simesane na Yéhôva fe a ne volô wo nge ô tele aval été éte?
16. Amu jé bi ne tabe ndi na Yéhôva é botan ngul ése bia ve asu na bi tabe Mesimesa’ane? (Beromain 8:31, 32)
16 Yéhôva a nye’e ngul ése bia ve asu na bi tabe Mesimesa’ane ya awu Yésus. Bi ne tabe ndi na, a ye botane bia nge bia liti na bia nyane ntañ a nga ve asu dangan. (Lañe’e Beromain 8:31, 32.) Enyoñané ntyi’an ya tabe Mesimesa’ane ya mbu wu a ve ngule jangan ése asu na bi nene ésaé nkañete jangan éyoñe ya Mesimesa’ane.
JIA 18 Bia ve akéva amu ntañ
a Môse Tusedé ya Ngone lale é too melu 4, ya mbu 2023, bemillion be bôte ya si ése meku’u menyine ba ye bo Mesimesa’ane ya awu Yésus. Abui ya été da ye tabe Mesimesa’ane éyoñ ôsu. Bengaa be Yéhôva béziñe be mbe ayôñe nsisime melu mvuse be fe ba ye zu sulan a bia. Da ye bo ayaé asu bôte béziñe na be tabe Mesimesa’ane, ve bé ve ngule ya tabe. Été ése ô tele, ô ne tabe ndi na wo ye ve Yéhôva nlem avak nge wo ve ngule na ô tabe valé môs ôte.
b Bôte ba buni mame mete ba simesane na môse Mesimesa’ane, belet a won ba tyendé a veñesane nyul a metyi me Yésus. Ba simesane na éyoñ ése ba bo de, a ne fo’o nyul a metyi me Yésus mme ba belane me.
c Bia te tyendé biyôlé biziñ.
d Fombô’ô fe jw.org minlô mejô mi ne na “Le Mémorial de 2021.”
