STODI AATIKL 4
Jehoava Bles Evriting Weh Wi Du fi Goh da di Memoaryal
“Kip aan di du dis fi memba mi.”—LOOK 22:19.
SANG 19 Krais Eevnin Meel
WEH WI WAHN DISKOS? a
1-2. Wai wi goh da di Memoaryal evri yaa?
BOWT 2,000 yaaz agoa, Jeezas mi giv ih laif fi wee, ahn dat mek wi ga di apachooniti fi geh evalastin laif. Pahn di nait bifoa Jeezas mi ded, hihn mi staat op wahn serimoni weh mi inklood bred ahn wain. An ih koman ih falowaz fi kip di du dis fi memba hihn.—1 Kor. 11:23-26.
2 Az Kristyanz, wee obay Jeezas koman bikaaz wi lov hihn wahn lat. (Jan 14:15) Evri yaa joorin di Memoaryal seezn, weh da di weeks bifoa an afta di Memoaryal, wi shoa dat wi tankful fi weh Jeezas du fi wi ahn wi tek di taim fi meditayt ahn pray bowt weh fi hihn det meenz fi aala wi. Wi aalso hapi fi du moa eena di minischri fi invait az moch peepl az pasabl fi jain wi fi dis speshal okayzhan. An af koars, wi mek op wi main fi noh mek notn stap wi fahn aten di Memoaryal.
3. Weh wi wahn diskos eena dis aatikl?
3 Az Jehoava peepl, wee du wi bes fi memba Krais det. Eena dis aatikl, wi wahn kansida chree wayz how wi du dat: (1) wi selibrayt di Memoaryal di way Jeezas mi teech ih disaiplz, (2) wi invait adaz fi kohn da di Memoaryal, ahn (3) wi selibrayt di Memoaryal noh mata weh wi di goh chroo.
WI SELIBRAYT DI MEMOARYAL DI WAY JEEZAS MI DU IT
4. Wat da sohn kweschan weh geh ansa da di Memoaryal evri yaa, ahn wai di ansaz impoatant fi wee? (Look 22:19, 20)
4 Evri yaa da di Memoaryal, wi lisn tu wahn Baibl taak weh ansa sohn impoatant kweschan. Wi laan wai hyoomanz need di ransom ahn how wan man ku ded fi pay fi lata peepl sinz. Di Memoaryal rimain wi weh di bred ahn wain reprizent, ahn wi aalso laan hoo aal sopoas tu eet di bred ahn jrink di wain. (Reed Look 22:19, 20.) Ih aalso help wi fi tink bowt di wandaful blesinz weh Jehoava pramis dehn wan weh wahn liv fareva pahn di ert. (Isa. 35:5, 6; 65:17, 21-23) Dehnya tingz impoatant ahn wi waahn apreeshiayt dehn. Wahn lata peepl noh andastan dehnya tingz ahn dehn noh apreeshiayt wai Jeezas sakrifais impoatant. Ahn dehn noh selibrayt Jeezas det di way hihn mi teech ih disaipl dehn fi du it. Bot wai dehn noh du it di way Jeezas waahn?
5. Afta moas a di apasl dehn mi ded, how peepl mi staat selibrayt Jeezas det?
5 Wahn lee wail afta moas a Jeezas apaslz ded, faals Kristyanz mi kom eena di kangrigayshan. (Mach. 13:24-27, 37-39) Dehn mi “twis di chroot kaaz dehn waahn get di disaiplz fi fala dehn.” (Aks 20:29, 30) Wan way how dehn “twis di chroot” da wen dehn teech peepl dat Jeezas neva ded “jos wan taim fi di sin dehn a lata peepl” laik how di Baibl seh. Insted, dehn teech dat hihn haftu aafa ih laif oava ahn oava agen. (Heeb. 9:27, 28) Ahn wahn lata peepl bileev dehnya faals teechin. Dehn goh da cherch evri week, sohntaim evri day, fi memba Jeezas sakrifais. Di Kyaatlik Cherch kaal dis “di Hoali Kamyoonyan.” b Ada rilijan selibrayt Jeezas det evri now ahn den, ahn fi dehn membaz mait noh reeli andastan weh Jeezas sakrifais meen. Som peepl mait aks, ‘Ai reeli ku geh fergivnis fi mai sinz chroo Jeezas det?ʼ Peepl wuda aks da kweschan bikaaz dehn lisn tu peepl weh noh bileev dat dehn ku geh fergivnis bikaaz a Jeezas sakrifais. Bot how Jeezas chroo chroo falowaz help peepl fi andastan weh Jeezas sakrifais meen ahn how dehn shuda selibrayt Jeezas det?
6. Bai 1872, weh wahn groop a Baibl styoodents mi geh fi andastan?
6 Eena di layt 19th senchri, Brada Charles Taze Russell lang wid wahn groop a Baibl styoodents mi staat wahn deep stodi a di Baibl. Dehn mi waahn noa di chroot bowt wai Jeezas sakrifais mi impoatant ahn how dehn shuda selibrayt fi hihn det. Soh bai 1872, dehn mi geh fi andastan dat Jeezas mi ded fi evribadi. Dehn neva kip weh dehn laan tu dehnself. Insted, dehn yooz difrent buk, nyoozpaypa, ahn magazeen fi tel adaz weh dehn laan. Lee wail afta, dehnya Baibl styoodents mi staat kapi di egzampl a di fers-senchri Kristyanz ahn selibrayt di Memoaryal wan taim fi di yaa.
7. How wee benifit fahn di risaach weh di Baibl styoodents mi du?
7 How wee benifit fahn di risaach weh dehnya Baibl styoodents mi du? Jehoava di help wi fi andastan weh Jeezas sakrifais meen ahn weh aal da sakrifais wahn du fi wee. (1 Jan 2:1, 2) Wi geh fi laan weh di Baibl seh bowt di too hoap weh Gaad gi peepl weh obay ahn, weh da fi liv da hevn er fi liv fareva rait ya pahn dis ert. Wen wi si how wi benifit fahn Jeezas sakrifais ahn humoch Jehoava lov wi, dis mek wi kohn kloasa tu Jehoava. (1 Peet. 3:18; 1 Jan 4:9) Jos laik wi bradaz ahn sistaz bak den, wee kapi fi dehn egzampl an invait evribadi fi jain wi fi selibrayt di Memoaryal a Jeezas det jos laik how Jeezas mi shoa wi fi du it.
WI INVAIT ADAZ FI SELIBRAYT DI MEMOARYAL
Weh wi ku du fi invait az moch peepl az wi kud fi aten di Memoaryal? (Paragraaf 8-10) f
8. Weh aal Jehoava servants du fi invait adaz fi jain dehn fi selibrayt di Memoaryal? (Koment pahn di picha.)
8 Fi yaaz, Jehoava servants di invait peepl fi aten di Memoaryal wid dehn. Fahn bowt 1881, di bradaz ahn sistaz eena di United States mi meet tugeda da wahn brada hows da Allegheny, Pennsylvania, fi selibrayt di Memoaryal. Laytaraan, eech kangrigayshan mi ga dehn oan Memoaryal. Eena Maach 1940, dehn mi tel di poblishaz fi invait enibadi eena dehn teritori weh mi shoa inchres fi kohn da di Memoaryal. Fi di fers taim, eena 1960 Betel mi staat print sohn invitayshan fi mek di kangrigayshan dehn giv owt. Sins den, wi giv owt bilyanz a invitayshan fi di Memoaryal. Wai wee spen soh moch taim ahn werk soh haad fi invait adaz?
9-10. Hoo aal wi help wen wi invait adaz fi kohn da di Memoaryal? (Jan 3:16)
9 Wi invait adaz fi selibrayt di Memoaryal wid wi bikaaz wi waahn dehn wan weh kohn fi di fers taim laan bowt Jehoava ahn Jeezas ahn weh dehn du fi wi. (Reed Jan 3:16.) Wi waahn mek weh dehn si ahn hyaa da di Memoaryal moov dehn fi waahn laan moa ahn fi staat serv Jehoava. Bot da noh onli dehn benifit.
10 Wi aalso geh di chaans fi invait adaz weh stap serv Jehoava. Dat rimain dehn dat Gaad stil lov dehn. Wahn lata dehn mi aksep di invitayshan an gaahn da di Memoaryal. Wi mi soh hapi fi si dehn deh. Wen dehn goh da di Memoaryal, ih help dehn fi tink humoch dehn yoostu injai di serv Jehoava. Mek wi luk pahn Monica egzampl. c Joorin di COVID-19 pandemik, shee mi staat tu serv Jehoava agen. Afta shee gaahn da di Memoaryal eena 2021, dis da weh shee seh: “Di Memoaryal speshal tu mee now. Fi di fers taim eena 20 yaaz, Ah mi geh fi preech tu adaz an invait dehn fi jain wi wen wi selibrayt di Memoaryal. Bikaaz Ai mi soh tankful fi weh Jehoava ahn Jeezas du fi mee, Ai du evriting weh Ah kud fi invait dehn da di Memoaryal.” (Ps. 103:1-4) Weda er nat peepl aksep wi invitayshan, wee du wi bes fi invait peepl da di Memoaryal, ahn wee noa dat Jehoava apreeshiayt aal weh wi du.
11. How Jehoava bles aal wi haad werk fi invait peepl tu di Memoaryal? (Haggai 2:7)
11 Wen Jehoava si how haad wi werk di invait peepl tu di Memoaryal, hihn hapi an ih bles weh wi du. Eena 2021, eevn doa wi kudn preech laik wi yoostu bikaaz a di COVID-19 pandemik, 21,367,603 peepl gaahn da di Memoaryal. Dat da moa dan too an a haaf taimz di nomba a Jehoava Witnisiz rong di werl! Weh mata di moas tu Jehoava da eech persn weh kohn da di Memoaryal, noh di amonk a peepl. (Look 15:7; 1 Tim. 2:3, 4) Soh wee ku bee shoar dat wen wi invait adaz, Jehoava wahn help wi fi fain peepl weh ga wahn gud haat.—Reed Haggai 2:7. d
WI SELIBRAYT DI MEMOARYAL EEVN WEN LAIF GEH HAAD
Jehoava bles aal weh wi du fi selibrayt di Memoaryal (Paragraaf 12) g
12. Weh ku mek it haad fi mek wi selibrayt di Memoaryal? (Koment pahn di picha.)
12 Jeezas mi seh dat wi wuda fays sohn haad sichuwayshan joorin di laas dayz, laik waar, persikyooshan, ahn siknis, an eevn wi famili mait deh gens wi. (Mach. 10:36; Maak 13:9; Look 21:10, 11) Dehnya da sohn tingz weh kuda mek it haad fi mek wi selibrayt di det a Jeezas. Wat da sohn tingz weh wi bradaz rong di werl du fi deel wid dehnya sichuwayshan, ahn how Jehoava help dehn?
13. How Jehoava mi bles Artem fi selibrayt di Memoaryal wail ih mi deh da prizn?
13 Bradaz eena prizn. Wi bradaz weh deh da prizn fi dehn fayt du evriting weh dehn kud fi memba Jeezas sakrifais. Artem da wan a dehndeh bradaz. Joorin di weeks rong di 2020 Memoaryal taim, dehn mi put ahn eena wahn smaal sel weh kehr op tu faiv peepl. Dis neva stap hihn fahn geh aala di tingz weh ih mi wahn need fi selibrayt di Memoaryal. Hihn mi eevn plan fi gi di Memoaryal taak fi ihself. Bot di man dehn weh mi deh wid ahn eena di saym sel doz kos wahn lat. Soh weh hihn mi du? Artem mi aks dehn fi mek dehn noh kos er smoak fi wan owa. Hihn mi sopraiz wen dehn agree fi du weh ih aks. Artem seh: “Ai mi chrai tel dehn bowt di Memoaryal.” Eevn doa dehn neva waahn hyaa bowt it, dehn mi ga lata kweschanz afta dehn si how Artem mi selibrayt di Memoaryal.
14. How di bradaz rong di werl mi selibrayt di Memoaryal joorin di COVID-19 pandemik?
14 Joorin di COVID-19 pandemik. Jehoava Witnisiz kudn selibrayt di Memoaryal fays-tu-fays wail di pandemik mi-di goh aan. Bot dat neva stap dehn. e Sohn kangrigayshan weh ga Intanet mi chooz fi schreem di Memoaryal taak oava veedyo kaal. Pahn tap a dat, di branch aafis mi mek araynjments fi dehn wan weh noh ga Intanet fi braadkyaas it pahn TV ahn rayjo. Ahn dehn eevn rikaad di Memoaryal taak eena oava 500 langwij fi dehn wan weh liv weh lee bit a peepl deh. Ahn sohn bradaz mi araynj fi kehr dehndeh rikaadn fi peepl weh mi need it.
15. Weh wi laan fahn wahn Baibl stodi weh naym Sue?
15 Wen wi famili deh gens wi. Fi som a wi, wi famili weh deh gens wi mek it haad fi selibrayt di Memoaryal. Mek wi luk pahn di egzampl a wahn Baibl stodi weh naym Sue. Di day bifoa di Memoaryal, shee mi tel ih Baibl teecha dat ih kyaahn goh bikaaz fi shee famili neva laik dat shee mi-di stodi di Baibl wid di Witnisiz. Fi shee teecha mi shayr Look 22:44 wid ahn. Den ih tel ahn dat wen wi di goh chroo prablemz, wi shuda poar owt wi haat tu Jehoava ahn reeli chros eena ahn, jos laik weh Jeezas mi du. Di maanin a di Memoaryal, Sue geh di bred ahn di wain redi ahn den shee wach di speshal Maanin Wership proagram pahn jw.org. Da saym eevnin, shee gaan eena ih room bai ihself ahn wach di Memoaryal pan ih foan. Afta dat, ih tel ih Baibl teecha: “Yoo mi inkorij mi wahn lat yestudeh. Ai du evriting Ai kud fi wach di Memoaryal, ahn Jehoava mi reeli help mi. Ah kyaahn tel yu how hapi Ah hapi!” Yu tink Jehoava ku help yu if yu famili deh gens yu?
16. Wai wi ku bee shoar dat Jehoava wahn bles aal weh wi du fi goh da di Memoaryal? (Roamanz 8:31, 32)
16 Jehoava hapi wen hihn si dat wi du evriting wi kud fi selibrayt di det a Jeezas. Ahn wi ku bee shoar dat hihn wahn aalwayz bles wi wen wi shoa dat wi tankful fi aal weh hihn don du fi wi. (Reed Roamanz 8:31, 32.) Mek wi mek op wi main fi goh da di Memoaryal dis yaa, ahn mek it wahn goal fi du moa eena di preechin werk joorin di Memoaryal seezn.
SANG 18 Tankful fi di Ransom
a Pahn Choozdeh, Aypril 4, 2023, milyanz a peepl rong di werl wahn gyada tugeda fi selibrayt di Memoaryal a Krais det. Lata peepl wahn aten fi di fers taim. Adaz weh mi stap serv Jehoava ahn weh noh aten fi yaaz wahn dehdeh tu. Som peepl wahn haftu chrai haad fi mek it da di Memoaryal bikaaz a dehn serkomstans. Yu ku bee shoar dat Jehoava wahn bee hapi dat yu deh da di Memoaryal, noh mata weh sakrifais yu mait haftu mek fi dehdeh.
b Wen dehnya rilijan selibrayt di det a Jeezas ahn dehn eet di bred ahn di wain, dehn akchwali bileev dat dehn di eet Jeezas badi ahn jrink ih blod. Eech taim dehn tek paat eena dis serimoni, dehnya peepl tink dat Jeezas badi ahn blod di geh sakrifais aal oava agen.
c Som a di naym dehn chaynj.
d Haggai 2:7: “‘An Ai wahn shayk op di nayshan dehn, ahn di preshos tingz fahn owta aala di nayshan dehn wahn kom eena dis hows; an Ai wahn ful it op wid mai gloari,ʼ dis da weh Jehoava di Komanda a di hevnli aami seh.”
e Si di aatikl dehn weh naym “2021 Memorial Commemoration” pahn jw.org.
