1, 2. Ka uagu woudin sagü irumu lidan Aritaguagülei?

 KEI BURÍ 2.000 irumu guentó, lúmagiñe líchuguni Hesusu libagari wawagu, ani seremei lun katei le, gachansinbadiwa lubéi lun wawinwandun lun súnwandan. Guñoun lubaragiñebei lounwen Hesusu adügati aban adamurini sensiyuti le ñein lubéi layusura fein tuma diwéin. Ruti gumadi houn lani disipulugu lun hasigirun adügei katei le lun haritaguni óunwenbu ínsiñeni le larufudunbei (1 Ko. 11:23-26).

² Wagía kristiánugu gaganbaditiwa lun gumadi le líchugubei Hesusu ladüga hínsiñe lan woun saragu (Huan 14:15). Lidan lidaani Aritaguagülei, arufuda wamuti weiri lan lebegi sákürifisiu le woun. Kei hénpulu, sagatiwa dan lun wafurieidun luma lun wararamagun asaminara ka lan mini lubéi lounwen Kristu. Lanwoun lira, hínsiñeti woun wásügürün saragu dan lidan apurichihani lun wagunbirahaniña sun gürigia ha wayaraatiña lun hachülürün wama lidoun weyu espechaliti le. Le linarün katei, mabusenrúntiwa lun ñein lan somu katei adarasahatiwa lun machülürün wamá lidoun Aritaguagülei.

3. Kaba wariha lidan aturiahani le?

³ Wagía lubúeingu Heowá áfaaguatiwa saragu lun waritaguni lounwen Kristu. Lidan aturiahani le warihiba ǘrüwa katei le arufudubalin áfaaguni le: 1) adüga wamuti Aritaguagülei le ítara kei lariñaguni Hesusu, 2) agunbiraha wamutiña amu lun houdin wama lúmati 3) adüga wamuti Aritaguagülei le, íbini laganagua lénrengunga.

4. a) Ka inarüni afuranguagüdüwabei sagü irumu lidan Aritaguagülei? (Lúkasi 22:19, 20). b) Ka uagu súdini lubéi lun gunfurandawa lan inarüni burí le?

⁴ Sagü irumu, dan le woudin lidan Aritaguagülei, aganbatiwa aban yanu tídangiñeti Bíbülia le óunabubalin fiu álügüdahani furangu. Kei hénpulu, ka uagu wemegeirei lebegi esefuruni ani ida liña ladüga lounwen ábanrügü wügüri lun ferudunawa lan hafigoun saragu gürigia. Haritaguagüda lumutiwa yanu le kátaña lan éigibaña tídangiñe fein gurá hagía tídangiñe diwéin luma ka lan mini lubéi burí katei le (aliiha huméi Lúkasi 22:19, 20). Lidan yanu ligía, wararamaguba asaminara luagu abinirúni le lunbei habihini ha hemenigibaña lun hawinwandun ya ubouagu (Isa. 35:5, 6; 65:17, 21-23). Súdiniti lun gunfuranda wamani inarüni burí le; ani lunti waritagun luagu añahein lan saragu míñunu gürigia úati gunfuranda hamani katei le ani ibidiñeti houn ida luba lan harufuduni gebegi lan sákürifisiu le ladügübei Hesusu hawagu. Lanwoun lira, madügün hamuti laritaguagüle lounwen Hesusu kei lariñaguni ida luba lan ladügǘn. Kati uagu?

5. Lárigiñe hounwengun hiibe-agei apostolugu, ida liña hagumeserun gürigia aritaguei lounwen Hesusu?

⁵ Murusun dan lubaragiñe hóunwegun hiibe-agei lani Hesusu apostolugu, aba hagumeserun kristiánugu mama inarünitiña ebelura lidoun damuriguaü (Mat. 13:24-27, 37-39). Ariñagatiña meha “iyeeni lun hafalaruniña afiñetiña”(Adü. 20:29, 30). Aban lídangiñe “iyeeni” le hagumeserubei arufudaha lau lásügürün dan, luagu míchugun lani Hesusu lúgubu “ábanrügü wéiyaasu lun lagidaruni hafigoun gürigia”. Amu luéi le tarufudahabei Bíbülia, arufudahatiña giñe lunti lan laritawagún lani Hesusu sákürifisiu saragu wéiyaasu mámarügü aban wéiyaasu luagu irumu (Ebü. 9:27, 28). Uguñe weyu, saragu gürigia haruma tanigi afiñetiña luagu arufudahani mama inarüniti le. Ñǘdüntiña ligilisirugu sagü dimaasu íbini sagü weyu, lun lidan hamá sacrificio de la misa (ostia tuma diwein). b Luéigiñe le aban oubaü, anihein relihión diseguaraüti haritaguni lounwen Kristu, gama lumoun hiibe-agei lílana úati gunfuranda hamani furangu, ka lan mini lubéi katei le. Háfuga hálügüdagun fiu hádangiñe houngua: “Inarüni san gayara lan ferudunawa lan nifigoun seremei lounwen Hesusu?”. Fiu hádangiñe adüga hamuti álügüdahani le ladüga ariñawagúaali lan houn meseriwín lan lani Hesusu sákürifisiu lun ferudunawa lan wafigoun. Agia lánigu Kristu ha inarünitiña, ka hadügübei?

6. Lidan irumu 1872, ka gunfuranda habéi fiu aturiahatiña Bíbülia?

⁶ Lidan burí irumu 70 le lánina sígulu diisi-nefu, aba hagumeserun fiu aturiahatiña Bíbülia, ha lalidihabaña Charles Russell, akutihoun Bíbülia buidu buidu. Busentiña meha gunfuranda hamani lueirin lebegi lani Hesusu sákürifisiu, busentiña giñe hasubudiruni ida luba lan haritaguni lounwen. Lidan irumu 1872, aba gunfuranda hamani lau tídehan Bíbülia fayei lani Hesusu lebegi hesefurun sun gürigia. Ani maramudun hamuti ariñahani le hadarirubei. Lubaragiñe lira, aba haburuchaguagüdüni tidan burí líburu, periodiku tuma garüdia. Murusun dan lárigiñe, aba hagumeserun adügei Aritaguagülei ábanrügü wéiyaasu luagu irumu, ítara kei meha hadügüni kristiánugu ha lánina furumiñeti sígulu.

7. Ida liña wasagarun saragu buiti uguñe weyu lídangiñe akutihani le hadügübei furumiñetiña aturiahatiña Bíbülia?

⁷ Ida liña wasagarun buiti uguñe weyu lídangiñe le hakutihabei kristiánugu haruma tanigi hagüra? Biní lumuti Heowá áfaaguni le hadügübei, ani seremei lun áfaaguni ligía gayaraati warihini furangu le mini lubéi lani Hesusu sákürifisiu luma sun le gayaraabei libihini (1 Huan 2:1, 2). Furendeitiwa giñe ayanuha tan Bíbülia luagu  bián emenigini houn gürigia ha gaganbadibaña lun Bungiu: ibagari sielu ani móunwedadibaña ha lúnbaña heresibiruni, lúmati ibagari lun súnwandan ya ubouagu houn saragu míñunu gürigia. Dan le wararamagun asaminara luagu lanarime wínsiñe lun Heowá luma saragu buiti le wasagarubei lídangiñe lani Hesusu sákürifisiu yarafatimaati wasandiragun woungua lun (1 Fe. 3:18; 1 Huan 4:9). Ligíati, ítara kei íbirigu úaraguatiña ha lánina binadu dan, agunbiraha wamutiña giñe gürigia lun houdin wama lidan Aritaguagülei le adügǘbei ítara kei lariñaguni Hesusu.

8. Ka hadügübei lubúeingu Heowá lun hagunbirahan amu gürigia lidoun Aritaguagülei? (Ariha humóun iyawaü).

⁸ Barǘ haña lubúeingu Heowá saragu irumu agunbirahaña gürigia lidoun Aritaguagülei. Lidan irumu 1881, agunbiraha tumutiña garüdia to íbirigu ha Merigabaña lun hóundarun tidan aban muna Allegheny uburugu (Pensilvania) lun hadügüni Aritaguagülei ñein. Dan lárigiñe kada damuriguaü aba lagumeserun adügei Aritaguagülei. Lidan ǘrüwa-hati irumu 1940 ligía lariñawagún houn apurichihatiña gayara lan hagunbirahaniña furumiñeguarügü gürigia ha busentiña lun houdin lidoun Aritaguagülei. Ani, lidan irumu 1960, óunahatu Beteli luagu furumiñeti wéiyaasu agunbirahagülei lun damuriguaü. Lúmagiñe dan ligía, wagía gefentiña luagu Heowá áfanreinhadiwa saragu míñunu agunbirahagülei. Ka uagu wadireira saragu dan luma áfaaguni lun dasi le?

9, 10. Ka asagarubaña saragu buiti lídangiñe áfaaguni le wadügübei lun wagunbirahan amu gürigia lidoun Aritaguagülei? (Huan 3:16).

⁹ Aban lídangiñe resun le adügübei lun wagunbirahan amu gürigia lidoun Aritaguagülei ladüga  busén wamá hasubudiruni le adüga laalibei Heowá luma Hesusu wawagu (aliiha huméi Huan 3:16). Busentiwa línchahaniña le haganbubei luma le harihibei lidan furumiñeti wéiyaasu guñoun ligía lun hasubudiruni Heowá buidu luma lun aban hamá lubúeingu. Gama lumoun mámarügüñanu hagía asagara buiti luagu áfaaguni le wadügübei lun wagunbirahan amu.

¹⁰ Agunbirahagülei to wafanreinhaboun hountu giñe ámuya gürigia: gürigia ha ígira hamaalibei heseriwidun lun Heowá. Agunbiraha wamutiña lidoun Aritaguagülei lun waritaguagüdüniña hínsiñememegiña lan lun Bungiu. Ani gúndaatiwa dan le warihini chülǘ hamá saragu hádangiñe lidoun Aritaguagülei. Guñoun ligía, haritaguagüda lumutiña ugundani le hasandirubei dan meha le heseriwidunbei lun Heowá. Ariha waméi tikesin Mónica. c Lidan lidaani sandi COVID-19 ábaya tagumeserun apurichiha, lárigiñe tidin lidan Aritaguagülei lidan irumu 2021. Ariñagatu: “Espechaliti Aritaguagülei le nun. Anihán furumiñeti wéiyaasu lidan 20 irumu gayara lan napurichiha houn amu gürigia, ani agunbirahanaaña lidoun Aritaguagülei. Adüga numuti tídangiñe sun taruman nanigi, ladüga teinki numuti le adüga laalibei Heowá luma Hesusu nuagun” (Sal. 103:1-4). Anha hagía yebe gürigia o maha hamá tun agunbirahagülei to wederegehaboun, adüga wamuti sun wayaraati lun wagunbirahaniña ladüga subudi wamuti gebegi lan lun Heowá áfaaguni le wadügübei.

11. Ida liña labiniruni Heowá sun áfaaguni le wadügübei lun wagunbirahaniña gürigia lidoun Aritaguagülei? (Ahéu 2:7).

¹¹ Biní laali Heowá áfaaguni le wadügübei lau wadügüni sun wayaraati lun wagunbirahaniña gürigia lidoun Aritaguagülei. Kei hénpulu, íbini ru lan lúrudu gumadi ladüga sandi COVID-19, lidan irumu 2021, chülütiña 21.367.603 gürigia lidoun Aritaguagülei. Chülütiña lóugiñe bián wéiyaasu hibe gefentiña luagu Heowá ha lídanbaña sun ubóu lidoun Aritaguagülei. Inarüni, le súdinibei lun Heowá gürigia mama átiriñanu lan achülürütiña (Luk. 15:7; 1 Tim. 2:3, 4). Chouru wamuti yusu lani Heowá apurichihani le lánina tederegehóun agunbirahagülei lubá Aritaguagülei lun líderaguniwa adarira gürigia ha haruma tanigi (aliiha huméi Ahéu 2:7).

12. Ka burí katei gayaraabei ladügün lun midin wamá lidoun Aritaguagülei? (Ariha humoun iyawaü).

¹² Ariñagati Hesusu lidan lanme lagumuhóun dan, wásügürüba lan lídangiñe ámuñegueinarügü turobuli: híchuguba waduheñu lidere dan woun, wéibaahouba, ñeinbei wuribu luma sandi galugurahati (Mat. 10:36; Mar. 13:9; Luk. 21:10, 11). Furumiñeguarügü lídangiñe katei le gayaraati ladügün lun midin wamá lidoun Aritaguagülei. Ka hadügübei wábirigu dan le hásügürün lídangiñe turobuli burí le, ani ida liña líderaguniña Heowá?

13. Ida liña labiniruni Heowá ganigi luma áfaaguni le larufudubei Artiom lun ladügüni Aritaguagülei tidan furisun?

¹³ Furisun. Íbirigu ha tídanbaña furisun ladüga hafiñen áfaagutiña saragu lun haritaguni lounwen Kristu. Ariha waméi lani Artiom hénpulu. Lidan lidaani Aritaguagülei lidan irumu 2020, dáüwañu liña tidan aban furisun to 17 méturu tidabuberen luma timigifen, (183 ugudi tidabuberen luma timigifen) le ñein lubéi hadaüraña 5 gürigia lidan aban. Lau sun lira, ibiha lumuti le lemegeirubei lun ladügüni Aritaguagülei, adüga ligía aransehani lun líchuguni yanu lúniwagua. Gama lumoun ñeinñein aban turobuli: agumulahatiña lupaanágu ani sun weyu hau burí ayanuha bulagiadi. Kati ladügübei Artiom? Aba lálügüdüniña anhein gayara lubéi magumulahan hamá luma lun madimurehan hamá bulagiadi íbini luagu aban oura. Wéirigüda lumutu lanigi hánharun. Ariñagati: “Ariñagatina houn gayara lan nafuranguagüdüni houn,  ka lan uagu ladügǘwa Aritaguagülei”. Íbini harufudun mebereseni, lárigiñe harihini ladügüni Aritaguagülei, aba hadügün álügüdahani lun.

14. Ka hadügübei lumutuniña Heowá lun hadügüni Aritaguagülei íbini laganagua sandi COVID-19?

¹⁴ Sandi galugurahati, COVID-19. Ladüga sandi galugurahati le, siñá lubéi woudin lidan Aritaguagülei tidan Luban Wadamuridagun. Lau sun lira adüga wamuti. d Damuriguaü le gánibei Interneti adüga hamuti adamuridaguni le luéigiñe Zoom. Gama lumoun, agíati míñunu íbirigu ha manibaña Interneti, ida liña hadüga? Lidan saragu ageiraü rúati yanu lánina Aritaguagülei tuéigiñe bigibigitu o tuéigiñe radiu. Lanwoun lira, adügatu sukursáli aransehani lun gürawarüa lan yanu lánina Aritaguagülei lidan lóugiñe 500 iñeñein houn gürigia ha awinwandubaña lidan fulasu le dísebei le ñein lubéi ua lan Interneti lun gayara lan haganbuni sun gürigia Aritaguagülei. Ani añahein íbirigu adügatiña aransehani lun hachülüragüdüni yanu le gürawárüwali houn íbirigu ha.

15. Ka wafurendeirubei túmagiñe aban aturiahatu Bíbülia to gíriboun Sue?

¹⁵ Híchugun waduheñu lidere dan woun. Lénrengunga  le wéiritimabei le úmabei hagagibudagua fiu íbirigu híchugun haduheñu lidere dan houn lun moudin hamá lidoun Aritaguagülei. Ligía asuseredubei tun aban aturiahatu Bíbülia to gíriboun Sue. Aban weyu, lidan irumu 2021, lubaragiñe Aritaguagülei aba tariñagun Sue tun íbiri to íchuguboun aturiahani tun híchuguña lan tiduheñu lidere dan tun, siñabei lan tidin lidoun Aritaguagülei. Aba taliihani íbiri tuguya le lariñagubei Lúkasi 22:44 tun. Aba tafuranguagüdüni tun, dan lan le gaturobulin wamá, le lan buídubei lun wadügüni wasigiruni lani Hesusu hénpulu, wafurieidun lun Heowá lau sun wafiñen luagu líderagubadiwa lan. Larugan, aba tadügünu Sue fein íbihatou diwéin, aba tarihini programa espechaliti lánina áhuduraguni lánina binaafin lidan jw.org. Dan le lachülürünbei lóurate Aritaguagülei aba tebelurun lidoun tisonburun aba tachakürüni tubenari aba taganbahani yanu lani Aritaguagülei luéigiñe tigagamurun. Lárigiñe aba tábürühan aban gárada tun íbiri to íchuguboun aturiahani tun, tariñaga tun: “Wurinouga rútibu saragu dǘgüdaguaü nun. Adüga numuti sun niyaraati lun lidan nan Aritaguagülei, ani adüga lumuti Heowá le yuubei lun. Sanditina aban lanarime ugundani, seremei numutibu”. Anhein hásügürüña lubéi lídangiñe aban sügǘ ítarati, afiñetün san gayara lan líderagunün Heowá?

16. Ka uagu chouru wabalin labinirubei lan Heowá sun áfaaguni le wadügübei lun wachülürün lidoun Aritaguagülei? (Rómana 8:31, 32).

¹⁶ Wéiriti lebegi lun Heowá sun áfaaguni le wadügübei lun waritaguni lounwen Liráü. Gayaraati wachoururuni labinirubadiwa lan ánhawa arufudei weteingiradi luagu le adüga laalibei wawagu (aliiha huméi Rómana 8:31, 32). Adüga waméi sun le mégeiwabei lun meferidirun wamani Aritaguagülei lánina irumu le. Adüga wamá lanwoun le adüga wamaalibei luagu Heowá lidan lidaani Aritaguagülei le.