TÖHAKÖÖPÖ ĀTIKÖL 4
Kētö Inkòlô Meh An Min Yāvē Yěm Yihtökūö Im Memorīöl
“Ngatī tī pöichö haköpkölōnre tö chu.”—LŪK. 22:19.
TINKÖÖKÖ 19 Töhet Inmūlkūö Ngam Mā
RAHËICHTAMAT a
1-2. Kūö yòh öi yihtökūö öi in ngam Memorīöl?
NËT köiny samyeūheu rô-angen ang Yēsū nö kēḵngö nômöre tö pò kūö hī lökten ayī-ö töngamuh öi maheūkku tö hī min örheūheu aṅ tö kūö ò nö kēḵngö nômöre tö pò kūö hī. Urēhěkūö ngam kinpaha ò ngaich vë-ekūö yik haköptöre ang Yēsū nö kētö chööngö nö hōten cha nö fēkö inlahen ò nö kēḵngö nômöre. Ngaich hōten cha nö nyā ngam rôtī òk ngam vain inrē.—1 Kòr. 11:23-26.
2 Hang chööngö Yēsū in inrē ayī-ö kūö hī öi hangenlōn tö ò. (Yôh. 14:15) Lökten ayī-ö örheūheu urēhěkūö yanihi ngam Memorīöl öi fēkö minë inlahen tī ò nö in hī tö kūö ò nö kēḵngö nômöre tö pòkūö hī. Ngaich sitih inlahen ayī-ö öi teūngen tö minë inkôlò re? In e mikahakūö ayī-ö öi hòṅ iṙôken inlahen öi hameuk tö minlēḵṙenre in ngam tö kitaknyu mahām ò. Ngön min ayī-ö öi im la-en inhānga ngaich havëten yip tarik inrē nö yihtökūö nö in e, ngaich yihtökūö inrē ayī-ö öi in e. Ngaich un hěng ma-asökngöröön hī öi chuh in e.
3. Asuh öp min mikahkūö hī öi löktö in ngih ātiköl?
3 Mööḵlö kinëken ön ngam Memorīöl tö më Vamënyen Yāvē. In ngih ātiköl in min öi mikahtökūöre tö minë tö lūöi inlahen: (1) sā inköptöre cha-a tö Yēsū nö kēken ngam Memorīöl, (2) havëtö yip tarik inrē cha-a nö yihtökūö nö in e, (3) yěn pòrô cha-a nö kihngen sön cha-a nö kēken e.
NGAM INKÖPTÖ HĪ TÖ YĒSŪ NGATĪ INLAHEN ÖI FĒKÖ NGAM KINPAHA Ò
4. Asuh nup ṙung tö vënyu I alaha ngam minkahten im Memorīöl kūö yòh ayī-ö ötkô höö elmat tö u? (Lūkös 22:19, 20)
4 Kaheuk samyeūheu in el ṙētak ngam Memorīöl öi hang öp töhěng minkahten ngaich pōyen minë tö vënyu nö in e. Tö sā ngam inlahen hī kūö yòh öi hòṅ lōnu tö ngam ṙāi ṙinānyi, ngaich sitih inlahen më tö lāku ṙòken tarik nö teūngen tö inṙē-ěl tököölre nö löktö in ngòh töhěng tak tarik. Fēḵlöng min ayī-ö tö yip tö mihôiṅ nyā ngam ṙôtī hēk òk ngam vāin hēk minkahngö chīö anū-ö. (Vë-evkūö Lūkös 22:19, 20.) Kakken minë inkòlô in min inrē nup taneūnglen hī min el ngam Peretāis. (Isa. 35:5, 6; 65:17, 21-23) Tö pōiṙāi nun minë kanô-en aṅmat ngam Paipöl lökten in ötkô öi hööhö elmat tö u. Pōyen yin më tarik aṅ ing panam töt akahakūö tö u hēk öt akahakūö cha-a inrē töp chö-öny Yēsū nö kēḵngö nômöre. Ōt yip tarik ma-afēkö kinpaha Yēsū hö-ö pöri nö sā inlahen ngam inchöngtenre tö ò. Kūö yòh cha-a nö ngatī inlahen?
5. Sitih inlahen kinëken öng ngam kinpaha Yēsū unôichrit më haköptö ò nö kapah?
5 Unôichrit kinpaha yik mahaköp nö yòkhötre më tö minyôny Kristīön nö el minë māṅ. (Mët. 13:24-27, 37-39) Ngaich “ṙôtö tötlöök, nö hòṅ hachōḵngen nyin mahaköp nö asīnken cha.” (Inl. 20:29, 30) Ngam “ṙô tötlöök” tö Yēsū yin nö hòṅ ṙōlheūh nö kēḵngö nômöre, ngaich möl ayī-ö öi teūngen tö inṙē-ělre. Lööknyi ṙô pöri ngam Paipöl nö vë-eny nang hī nö ngö ṙô. ‘Ngatī Ang Kristū nöng hĕng heuh nö kēḵngöre, nö keun kanöölö tömaṙôngö.’ (Hep. 9:27, 28) Pōyen yip ngaich tarik ṙamātö-ellōnre nö in ngih ṙô. Ngaich chu el keurcha cha-a nö chö-öny tö “Mīssa hēk Mās” inrē ngaich örheūheu cha-a nö kēken e. b Ōtre nun minë tinlööken tö akahakūö tö inlahen Yēsū nö kapah, öt akahakūö pöri cha-a töm chö-öny ò nö kēḵngö nômöre. Ōtre yip tarik tö ngö ṙô tö hī öt teūngen tö inṙē-ělre öi löktö in ngam kinpaha Yēsū, ngö mufē inrē yip tarik, ‘Teungen öi min tö inṙē-ěl tökööl re yěi ṙatö-ellōnre öi im kinpaha Yēsū?’ Mikahtökūöre pöri min ayī-ö tö inlahen më tökô-en Kristīön nö sitih inlahen nö mikahtö elnang yip tahëng tö Yēsū nö kūö yòh nö kēḵngö nômöre hēk mikahtö elnang yip tahëng inrē cha-a tö ngam tölöng inlahen hī öi fēkö ngam kinpaha Yēsū?
6. Ik samyeūheu 1872, asuh ök ngaich mikahkūö më Paipöl istutent?
6 Ik samyeūheu 1870 ang Chāls Rössöl hēk tö yik Paipöl istutent inrē ngaich chumkūöṙen cha-a nö haköpmat ngam Paipöl nö mikahtökūöre cha-a tö Yēsū nö kūö yòh nö kapah ngaich asuh öp yanöölen hī tö ngam inlahen ò nö kitaknyö mahāmre. Ngaich sitih inlahen öi fēkö ngam kinpaha ò inrē ngaich ik samyeūheu ngaich 1872 yihlöre mikahkūö ngaich cha-a tö minë inṙēlö tökööl ngòh tarik nö im tökitaknyu mahām Yēsū. Hö-ö pöri cha-a nöng tölngö in re tī tö ngam mikahkūöre pön löktö in minë līpöre hēk minë niūs pēpör cha-a nö minkahtölōn më taṙòkhöre tarik ngaich unôichrit e ngaich cha-a nö fēkö ngam kinpaha Kristū nö i tö hěng samyeūheu nö sā inlahen yik raneh Kristīön.
7. Asuh öp yanöölen hī tö nuk kanô tö yik Paipöl istutent?
7 In nuk urěh samyeūheu nuk mikahkūö yik Paipöl istutent teūngen ayī-ö tö yanöölen re töngamuh öi sitih inlahen? Löktö ngam inkòlô ayī-ö öi akahakūö tö Yēsū nö kūö yòh nö kapah hēk asuh öp yanöölen hī öi löktö im kinpaha ò. (1 Yôh. 2:1, 2) Löktö im Paipöl inrē ayī-ö öi akahakūö tö yip tö chiplö lamöklōn Yāvē nö ōt min yip chamuh el halīöngö nö örheūheu nö aṅ, ngaich yip tö pōyen inrē min tarik tö örheūheu nö aṅ ikūö ngih panam. Yēḵ hī öi fēken u ngaich kôtö kūö ayī-ö tö hanangenlōn Yāvē tö hī. Ngaich pōyen minë taneuglen hī inkòlô öi löktö in ngam tö kitanyu mahām Yēsū ngaich löktö in e ayī-ö öi röhta öi in Yāvē. (1 Pīt. 3:18; 1 Yôh. 4:9) Lökten ayī-ö öi havëten yip tahëng inrē nö yihtökūö nö in ngam Memorīöl.
HAVËTÖ YIP TAHËNG INRĒ NÖ IM MEMORĪÖL
Sitih inlahen öm mihôiṅ öm kalēḵ alaha im kintölngö ngam Memorīöl invitēsön, kömpēn? (Ngëichköm perekrāf 8-10) e
8. Asuh nup inlahen më Vamënyen Yāvē yēḵ cha nö havëten yip tarik nö im Memorīöl? (Ngëichkö ngam nyat.)
8 Kaheuk samyeūheu yin më Vamënyen Yāvē nö havëten yip tarik nö yihtökūö nö in ngam Memorīöl sā tinöölö ṙô yik prötör sistör ik 1881, nö i Pennsylvania i Ĕlīkëni yik prötör nö mūl cha-a nö i patīre hòṅ cha nö ṙòkhöre nö kēken e. Unôichrit e hēk minë māṅ nö i kamngöre nö kēken ngam Memorīöl. Ngaich ik Māch 1940 nö vënyu nang më prötör sistör nö mihôiṅ nö havëtu yip tö hòṅ mikahtökūöre. Ngaich ik 1960 nö löktö el Pětel minë invitēsön hòṅ cha nö katöl yip tahëng tarik. Löktö kūö in e söl ing töngamuh öi havëten yip tö pōyen öi katöl hö kūö cha töm invitēsön hòṅ cha nö yihtökūö. Kūö yòh öi ngatī inlahen öi havëten yip tarik nö yihtökūö? Ngaich kūö yòh öi hòṅ kēnyö ṙētak re.
9-10. Achīö yip tö mihôiṅ nö havëtu tö hī nö im Memorīöl? Ngaich sitih inlahen min cha-a nö teūngen tö yanöölen re? (Yôhan 3:16)
9 Hěng ön ngam lānyngen hī öi havëten yip tahëng nö yihtökūö nö in ngam Memorīöl pön më töt akahakūö tö Yāvē hòṅ cha nö ṙūöhtö mikah kūöre. Asuh nup inrē tī na Yāvē hēk Yēsū nö in cha. (Vë-evkūö Yôhan 3:16.) Lōnu in tö cha nö chumkūöṙen nö hang ngam minkahten im Memorīöl hòn sīöp ngam inlahen cha nö mikahtökūöre tö Yāvē ngaich vī töre cha-a nö tarik ò.
10 Havëten yip tarik in inrē nö im Memorīöl yip ramāngenre sin nö löklōn Yāvē. Yēḵ hī ngatī inlahen ngaich sā famëlen cha ayī-ö tö Yāvē nö hangenlōn tö cha. Ōtre yin më hamô-en minë invitēsön hī ngaich yěn yihtökūö ngaich ṙamlōn ayī-ö ngaich fē-ělre cha-a tö minë inlahen re nö löklōn Yāvē. Töi ngëichken ngih inchō-elmat inlahen sistör Monika c rultenre anga-aṅ nö ahangköm tölöök inhānga ik COVID-19. Ik sā ò nö yihtökūö nö im Memorīöl ik 2021 ngaich ngö ṙô anga-aṅ: “Ṙanamlōn ön ngih nö samyeūheu nö in chu pöich 22 samyeūheu rò-angen öich öt ahangköm tölöök inhānga öich in yip tarik ik sā chu pöri ngaich öich ahangköm tölöök inhānga ngaich havëten cha nö yihtökūö nö im Memorīöl. Ṙamlōn chin tö minë inlahen tī Yāvē hēk Yēsū nö in chu lökten öich holtö nganöötöre öich havëten yip tarik nö yihtökūö.” (Sal. 103:1-4) Pòrô yip tarik nö yih hēk öt yih höng iṙūöhen ayī-ö öi havëten cha. Ngaich köp lōn inrē tö Yāvē nö ṙamlōn nö meuk minë la-en hī.
11. Ngam inlahen hī öi ma-anyre öi havëten yip tarik nö im Memorīöl ngaich sitih inlahen ang Yāvē nö kē-ěkūö tö inkôlô? (Hakai 2:7)
11 Yēḵ hī ma-anyre öi havëten yip tarik nö yihtökūö nö im Memorīöl ngaich kē-ěkūö hī ang Yāvē tö inkòlô hī. Tö sā hī ik samyeūheu 2021, ik ṙētak ngam COVID-19 ngam tölëlngökūö invah, öt hěngkang chūök ayī-ö öi mūl öi 2,13,67,603 ṙôken öi yamihtökūö. Yēḵ hī öi Keuheūtngöre chūök öi ngëicha tö yip Vamënyen Yāvē ngaich pōyen yik havëtö cha. Hö-ö pöri ang Yāvē nöng angū-ö ngëichkö ṙôken yip yamih pön ngëichkö ellōn ngòh tarik. (Lūk. 15:7; 1 Tim. 2:3, 4) Lökten yěi ma-anyre öi havëten yip tarik im Memorīöl ngaich hayööken hī ang Yāvē öi chöh yip tarik tö yāichö ellōn.—Vë-evkūö Hakai 2:7.
SÖN ÖI YIHTÖKŪÖ ÖI IN NGAM INFĒKÖ KINPAHA YĒSŪ EL ṘĒTAK KANIHGEN
Yēḵ hī min öi yihtökūö im Memorīöl ngaich kētö inkòlô hī min ang Yāvē (Ngëichköm perekrāf 12) f
12. Kūö yòh yip prötör sistör nö kēken ngam Memorīöl? (Ngëichkö ngam nyat.)
12 Vë-eny nang hī ang Yēsū tö nup kanihngen min nö yih el ngih manā-aṅ sakāmö tö sā minë mikūönö hī nö ötlēken hī kinyūngö hēk tölëlngökūö invah hēk pōyen inrē nup kanihngen. (Mët. 10:36; Māk. 13:9; Lūk. 21:10, 11) Anū-ö kanihngen hī öi kēken ngam Memorīöl. Töi mikahtökūöre tö inlahen më prötör sistör nö sitih inlahen cha-a nö la-al minë kanihngen re, hēk sitih inlahen inrē më prötör sistör nö hayööken cha?
13. Asuh nuk inkôlò Artöm tö tī Yāvē kūö ò nö öt ṙāken nö kēken ngam Memorīöl?
13 Chēl. Ōtre yip prötör sistör hī më-el chēl kēken ngam Memorīöl. Töi ngëichkö inlahen prötör Artöm hē ò nö el chēl nö kēken ngam Memorīöl ik 2020 chaphöt anga-aṅ nö el tö kun uròhò ngaich holtuṙah inrē anga-aṅ tö yik tö fëntak holre tö sā ò. Sitih inlahen anga-aṅ nö kēken ngam memorīöl? Pōyen nuk hamūllö ò lanënen ò nö kēken ngam Memorīöl ngaich halēn ngam inlahen re anga-aṅ nö kētö ngam minkahten. Ngaich yik holtöṙah ò pöri nöng töng ötlēḵnö ṙô yěn ṙò-òvö ngaich pōp inrē cha-a. Ngaich ngö ṙô ngam prötör nö in cha höng hěng hang kanta yin sin öi ui chōichö ṙô hēk ui pōp inrē, pingangkūö pöri öi meuk inlahen yik holtöṙah ò pön hang ṙô ò. Ngö ṙô ngam prötör “Hö-ö öi hòṅ mikahtökūöre tö inlahen ngih Memorīöl” ngaich sōḵ cha-a, ik sā cha pöri ngaich nö meuk inlahen prötör nö kēken ngam Memorīöl, ngaich pōyen ngaich nuk hatön cha.
14. Im ranulten ngam invah COVID-19 asuh nuk tö halēnlöng hòṅ hī öi vāyö inlahen öi kēken ngam Memorīöl?
14 COVID-19. Ik sā ranulten ngam invah COVID-19, öt hěng kang chūök ngaich më Vamënyen Yāvē nö kēken ngam Memorīöl. Sön pöri cha-a nöng sā ṙēngen tö mūl. d Nö sitih inlahen? Pön ōt minë Māṅ tö aṅv-in tö intörnet, lökten cha-a nöng löktö in ngam vitiōkònfrëns nö kēken ngam Memorīöl. Ngaich sitih inahen minë Māṅ töt aṅhav in tö intörnet, nö kēken ngam Memorīöl? Kamngu chūök nö ikūö minë panam nö halēnlöng inlahen ngam prōkrām nö meūkö nö el TV hēk rētiō (radio) nö hāngö tö më prötör sistör. Ngaich pōyen tö 500 ëlô angū-ö nö translētö ngaich rikòtingö inrē. Ngaich sömtu minë rikòting nö in më tö marôvat chūök hol maneuk hī, ngatī inlahen ngam Memorīöl nö kēkaṙen.
15. Asuh öp haköplö hī in Sū?
15 Yěi ötlēkaṙan tö më aṅ ngam mikūönö. Ōtre yip holmaneuk hī tö kinhngen nö yihtökūö nö im Memorīöl kūö yip aṅ patī cha nö ötlēken cha. Töi hang inlahen Sū ngòh tö ṙònghöichṙen nö istötī. Ik 2021, Memorīöl, urēhěkūö e anga-aṅ nö fūn ngam sistör ngam kamë istötī ò nö vë-eny nang ngam sistör töre nö öt yihtökūö nö im Memorīöl pön sōḵtu tö më aṅ patīre, vë-ekūö ngam līpöre, Lūkös 22:44 ngam sistör nö ahangtö tö elnang Sū nö vë-eny nang ò tö hī yēḵ hī öi kihngen ngaich hòṅ asīnken Yēsū öi vë-ekūö Yāvē. Ngaich hòṅ ṙatö-ellōnre tö ò nö öthō nö öt hayööken hī. Im tahëng sakāmö ngaich ang Sū nö halēnlö ngam rôti töm vāin ngaich meuk ngam morning vörsīp anga-aṅ nö löktö el ngam jw.org ngam tö halēnlöng im ṙētak Memorīöl. Ngaich im lā-harap anga-aṅ nö chuh el ngam uròhò re nö löktö el fūn nö kēken ngam Memorīöl. Unôichngöre ang Sū nö ngöṙô tī nö kūich chittri im sistör ngam kamë istötī ò, “ṙamlōn chin pöich vë-ekūö meh vahë, teūngen chū-ö tö inreuskö alahare nup töng tölngö kanò-ò chu öich kēken ngam Memorīöl ngatī inlahen chū-ö, ṙāḵlö nup taṙòkhöre chū-ö öich in Yāvē ṙamlōn takô chin öich ha-öinyö Yāvē.” Sitih lōn öm më-eṅ ngatī kanihngen ang min Yāvē nö hayööken meh?
16. Kūö yòh öi mihôiṅ ṙatö-ellōnre tö Yāvē min nö kētö inkòlô hī yěi yihtökūö im Memorīöl? (Rōma 8:31, 32)
16 Yěn meuk inlahen meh ang Yāvē öm ma-aiyre öm kēkö ngam Memorīöl hēk minlēḵṙen inrē tö ngam tökitaknyu mahām ngam kūön ò. Ngaich pōyen ṙanamlōn anga-aṅ ngaich kē-ěkūö meh min tö inkòlô. (Vë-evkūö Rōma 8:31, 32.) Lökten ta-a chěi töi halēnlö inlahenre öi yihtökūö öi im Memorīöl el ngih samyeūheu. Ngaich in minë chingënt urēhěkūö ngam Memorīöl, ngaich holtö nganöötöre öi löklōn Yāvē.
TINKÖÖKÖ 18 Hameuktö Minlēḵṙenre Töm Tö Tökitaknyu Maham Yēsū
a Im Tuesday, Ĕprĕl 4, 2023, yin min më tö lāku ṙôken tarik famëkö ngam kinpaha Yēsū nö keuheūtngöre chūök nö ing panam. Ōt yip tö möl nö yihtökūö nö in e, hēk yip Vamënyen Yāvē inrē yip tö marô-angen nö öt yihtökūö nö in e. Ōt inrē yip tö pōyen kanihngen sön cha-a nö yihtökūö nö in e. Pòrô nup töng sitih inlahen kanihngen hī yēḵ hī pöri öi yihtökūö in ngam infēkö kinpaha Yēsū ngaich ṙamlōn ang Yāvē nö meuk inlahen hī.
b Ngö rô lōn yin më tarik yěn yihtökūö nö kē ngam töhet inmūlkūö, tö ngam ròtī hēk töm vāin nö harī-ingre nö sā ngam alaha hēk mahām Kristū. Sā tökô-en anga-an tö rô cha nö kētö ngam alaha re hēk kitaknyöm mahām re tö pôkūö cha yē cha nö kē ngam töhet inmūlkūö ngam Mas inrē tō rô. Sā tum heuh cha nö kē ngam töhet inmūlkūö ngatī tumheuh nyin ang Kristū nö kēngöre tö pôkūö cha.
c Harīki ngam Minë-eny.
d Ngëichkö ngam ātiköl im jw.org ngam tö ngö kui “2021 Memorīöl Komëmoresön.”
