NSUNZO 4
Yehova Onoruriha Guru Enkosihu ya Okala Vamuttuponi wa Wubuwela Okwa wa Yezu
“Ejiyá eraganiví muddubuwelaga miyo.”—LK. 22:19.
JIBO 19 Siyarhi ya Nabuya
DHINASUNZE IYO a
1-2. Ninubuwelela nni Okwa wa Yezu vyaka dhotene?
VYAKA 2.000 mundduni, Yezu ohiperheka egumi yaye efugulile dila wi iyo nakele egumi yamukalakala. Omattiyu womariha ahinatti okwa, Yezu oharuma anamafwara aye wubuwelaga merelo a okwela akosiliye modhela wita muttupo wovevuwa okosiliye na pawu vina vinyu.—1 Kor. 11:23-26.
2 Iyo ninowiwelela nlamulo ntti nivahile Yezu sabwani ninomukwela venjene. (Jo. 14:15) Sumana dhing’onovi Muttupo wa Okwa wa Yezu ohinafiya vina ogavira, iyo ninolagiha otamalela wehu mwa ejile enikoseliye modhela otamela mudhidhi wa olobela vina otanalela entapulela okwa wa Yezu. Ottiya ejo, ninodhowa olaleya wi nakonvidari attu owinjiva egawodheya adhe avitaganyihe na iyo. Kanittiye elobo txilobo oniyeleliha okala vamuttuponi wa Wubuwela Okwa wa Yezu.
3. Txini enasunze iyo mwari mwa nsunzo ntti?
3 Mwari mwa nsunzo ntti, ninele osunza dhilobo ttaru dhinattukulela Anamoona a Yehova okosa guru ya Wubuwela Okwa wa Yezu: (1) ovirihamo muttupo wa Wubuwela Okwa wa Yezu dhahene ninga musunzihiliye, (2) wakonvidari attu ena wi akale vamuttuponiva vina (3) ovilibihedha wona muttupoya masiki nigumanagana makattamiho.
OVIRIHAMO MUTTUPO WA WUBUWELA OKWA WA YEZU DHAHENE NINGA MUSUNZIHILIYE
4. Mavuzo gani anakuliwa yaka-yaka va Wubuwelani Okwa wa Yezu nanda oziwa dhowakula dha mavuzo aba ekalele nni yamakamaka mwa iyo? (Luka 22:19, 20)
4 Yaka-yaka va Wubuwelani Okwa wa Yezu, ninovuruwana diskursu ya Bibilia enakula mavuzo menjene. Iyo ninosunza sabwaya enfunela nlogo na attu yobolo vina okwa wa muttu mmodha onttimiha dhavi dhottega dha attu enjene. Ottiya ejo ninosunza bani onfwanyela oja pawu, omwa vinyu vina ejile entapulelani. (Kengesa Luka 22:19, 20.) Ninotanaalela mareliho anakele abale ana njedhelo nokala velaboni ya vati. (Iza. 35:5, 6; 65:17, 21-23) Jamakamaka iyo oziwa dhibaribari esi na dhowakula dha mavuzo aba. Sabwani attu matxikwi na matxikwi kannonelamo dhintapulela dhilobo esi vina kanvaha ttima entapulela okwa wa Yezu. Ottiya ejo awene kanvirihamo Muttupo wa Wubuwela Okwa wa Yezu dhawene ninga musunzihile Yezu. Sabwaya?
5. Mukweli arumiwi a Yezu, attu aromile Wubuwela Okwa wa Yezu dhavi?
5 Muvirile mudhidhi mung’onovi arumiwi a Yezu bakwile, mmulogoni mwahivolowa Akristu a wota. (Mt. 13:24-27, 37-39) Awene anloga dhilobo “dhovirigana, àkwekwethelaga Akristu wafwara awene.” (Mer. 20:29, 30) Dhilobo eso “dhovirigana” dhalogani aroma na masunziho a wi Kristu kaviperhekile “kuluwi othimiha dhothega dha athu,” aviriganihaga ejile enloga Bibilia. Awene aloga wi mukutto waye wanfwanyela okosiwa wili-wili. (Aheb. 9:27, 28) Masaka abano attu owinjiva anorumela masunziho aba opela malago. Awene anotugumala mmakapela sumana dhotene—dila dhina siku-siku—wi obuwele okwa wa Yezu venevo “vantugumanelani oja Okarestiya.” b Makuru mena a marelijiau anotugumanela wubuwela okwa wa Yezu Kristu, mbwenye awene vina kannonelamo mowakwana-mwene entapulela okwa wa Yezu. Ena anovivuza, ‘Okwa wa Yezu onottimiha-wene dhottega?’ Txini enattukulela okosa nivuzo ntti? Dila dhina jowi awene anokwekwettiwa na abale anloga wi okwa wa Yezu kunwodha ottimiha dhottega. Anamafwara atxibarene a Yezu, anowakamihedha attu ononelamo entapulela okwa wa Yezu vina mukalelo wapama wa wubuwela okwa waye.
6. Txini edhile ononelamo nikuru na anamasunza a Bibilia yaka ya 1872?
6 Vasogorhova sekulu 19, nikuru na anamasunza a Bibilia nasogorheliwa na Charles Taze Russell nahiroma osunza venjene Nzu na Mulugu. Awene afuna aziwe ebaribari sabwa ya ttima ya mukutto wa Yezu vina mukalelo wapama wa wubuwela okwa wa Yezu. Yaka ya 1872, awene ahidha opepesa mBibiliani badha ononelamo wi mukutto okosile Yezu onowapurihamo otene. Ottiya ejo, awene anvirihamo esile dhasunzani. Mwavenevo ahiroma wawaddela attu ena modhela manivuru, majornale vina marevista. Mwa mudhidhi mung’onovi ahiroma ovirihamo esile dhakosa Akristu a nsaka zana noroma, vayakani antugumanela muttupo wa Wubuwela Okwa wa Yezu.
7. Nimpurelamo dhavi dhopepesa dha anamasunza oroma?
7 Masaka abano iyo ninopurelamo dhopepesa dhikosile Akristu akalilewo masaka a mundduni. Dhavi? Na nikamihedho na Yehova mento ehu ahifuguwa, ninoziwa ebaribari sabwa ya mukutto wa Yezu Kristu vina esile dhinapurelemo nlogo na attu sabwa ya mukutto obu. (1 Jo. 2:1, 2) Iyo ninosunza mBibiliani wi nlogo na attu nili velaboni ya vati ninimwagalaliha Mulugu—nihikana njedhelo, nikuru ning’ono ninakalege wirimu, oku matxikwi menjene a attu anele okala namukalakala velaboni ya vati. Nigakala ofiyedheya na Yehova, omukwela wehu onelege wunuwa vina ninelege odhowavi nipurelagamo venjene mukutto wa Yezu. (1 Ped. 3:18; 1 Jo. 4:9) Dhahene ninga mwakosela abalihu a mundduni, iyo ninowakonvidari attu wi avitaganyihe na iyo va muttuponi wa Wubuwela Okwa wa Yezu nivirihagamo esile dhasunzihile Yezu anamafwara aye.
WAKONVIDARI ENA WI ONE WUBUWELA OKWA WA YEZU
Txini enfwanyela weyo okosa wi wakonvidari attu enjene wi akale va muttuponi wa Wubuwela Okwa wa Yezu? (Kang’ana ddima 8-10) e
8. Txini enkosa nlogo na Mulugu wi akonvidari attu ena okala muttuponi wa Wubuwela Okwa wa Yezu? (Koona foto.)
8 Mwa vyaka dhinjene nlogo na Mulugu ninowakonvidari attu wi akale muttuponi wa Wubuwela Okwa wa Yezu. Yaka ya 1881, abali na arogora a Estados Unidos ahiwobiwa batugumanela muttupo obu vatakulu va mbali o Allegheny, Pensilvânia. Vasogorhova, abali etene antugumanela Muttupo obu mmilogoni mwawa. Marsu wa yaka ya 1940, anamalaleya ahaddeliwa wi anfwanyela omukonvidari muttu ddi muttu wa mmuruddani mwawa wana efunelo ya wona muttupo obu. Yaka ya 1960, paromile Beteli opida konvinti wa wubuwela okwa wa Yezu. Oromana yakene ejile, mabiliyawu a konvinti a Wubuwela Okwa wa Yezu anopakiwavi. Sabwaya jani enlabihedha iyo mudhidhi vina guru wi nakonvidari attu ena?
9-10. Bani ompurelamo guru enkosihu ya wakonvidari attu wi akale va muttuponi wa Wubuwela Okwa wa Yezu? (Joau 3:16)
9 Mwaha mmodha onnittukulela wakonvidari attu ena wi one muttupo wa Wubuwela Okwa wa Yezu jawi, abale anona muttupo obu dila yoroma, asunze ebaribari sabwa ya Yehova vina ejile enikoseli Yezu. (Kengesa Joau 3:16.) Ninojedhela wi awene agewa vina agoona dhinakosiwe va Muttuponi obu dhattukulele osunza wi akale alabeli a Yehova. Dhahene ninga empurelamo attu ena.
10 Iyo vina ninowakonvidari abale attiyile omulabela Yehova mwa vyaka dhinjene. Nigakosa dhawene, ninowawubutxedha wi Yehova onowakwelavi. Enjene anakonvidari iyo anodhaga, vina ninowagalala wawona. Awene agadha va muttuponi wa Wubuwela Okwa wa Yezu anowubuwela wagalala wanani mudhidhi wamulabelani Yehova. Katanalela yotagiha ya Monica. c Iyene wiyedhiwe mmulogoni mwari mwa eredda eji ya COVID-19. Mumaleliye wona muttupo wa Wubuwela Okwa wa Yezu wa yaka ya 2021, ohiloga: “Okala va muttuponi wa Wubuwela Okwa wa Yezu ji elobo yamakamaka mwigumini mwaga. Mwa vyaka 20 dhivirile eji dila yoroma, ewodhilimi wakonvidari attu ena wi adhe va muttuponi wa Wubuwela Okwa wa Yezu. Miyo ddihikosa muli mwetemwene wi ddakonvidari attu, ddinkosela ejuwene wi dditamalele ejile eddikoseli Yehova vina Yezu.” (Masal. 103:1-4) Kintanala akala attu anakonvidarihu anodha obe nne iyo ninodhowavi nakonvidarigi attu wi akale va muttuponi wa Wubuwela Okwa wa Yezu, sabwani ninoziwa wi Yehova onowona guru dhinkosihu.
11. Yehova onruriha dhavi guru enkosihu ya wakonvidari attu wi akale va muttuponi wa Wubuwela Okwa wa Yezu? (Ajeu 2:7)
11 Yehova onoruriha guru yehu ya wakonvidari attu wi akale va muttuponi wa Wubuwela Okwa wa Yezu. Yaka ya 2021, masiki attu vaharumelihiwani otugumana mumodhani sabwa ya eredda ya COVID-19, attu okwaranya 21.367.603 ahona muttupo wa Wubuwela Okwa wa Yezu. Muttengo obu, dila bili na jiddiga a Anamoona a Yehova ali orugunuwa elabo yotene! Mbwenye Yehova kanzuzumela winjiva wa muttego wa attu. Iyene onomuzuzumela muttu ddi muttu onkala va muttuponi wa Wubuwela Okwa wa Yezu. (Lk. 15:7; 1 Tim. 2:3, 4) Iyo nihikana nikuluvelo wi Yehova onolabihedha mabasa ehu a wakonvidari attu wi anikamihedhena wafwanya attu ana efunelo ya omulabela.—Kengesa Ajeu 2:7.
OVILIBIHEDHA WONA MUTTUPOYA MASIKI NA MAKATTAMIHO
Yehova onoruriha guru yehu ya okala va muttuponi wa Wubuwela Okwa wa Yezu (Kang’ana ddima 12) f
12. Makattamiho gani annirutxiha wona muttupo wa Wubuwela Okwa wa Yezu? (Koona foto.)
12 Yezu ohivuhulela wi masiku omariha, iyo nigahigumanana makattamiho menjene—widdiwa na anamudhi, ofwarafwariwa, koddo, maredda na makattamiho mena. (Mt. 10:36; Mk. 13:9; Lk. 21:10, 11) Makattamiho aba dila dhina anonirutxiha wona muttupo wa wubuwela okwa wa Yezu. Txini enkosaga abali na arogora wi awodhe okwaranya makattamiho aba nanda Yehova onakamihedha dhavi?
13. Yehova orurihile dhavi oliba murima wa Artem na efunelo yaye ya wona muttupo wa Wubuwela Okwa wa Yezu masiki bali mukambura?
13 Ofugeliwa mukamburha. Abalihu anfugeliwa mukamburha sabwa ya nroromelo nawa anokosaga muli mwetemwene wi one muttupo wa Wubuwela Okwa wa Yezu. Koona yotagiha ya Artem. Muttupo wa Wubuwela Okwa wa Yezu okosiwe yaka ya 2020, wubuweliwe iyene bafugeliwe mukambura sela ya 17 metros quadrados, sela ejile eng’ono mwahikala afugeliwi ena atanu. Masiki bali mukambura, wahiroma okosa masasanyedho wi one muttupo wa Wubuwela Okwa wa Yezu, wahiroma otamela mukatte, vinyu vina diskursu. Mbwenye attu abela afugeliwe vamodha na iyene ankobola fola vina anruwana vaddiddi. Txini ekosiliye? Iyene wahakumbira wi mwari mwa wora modha ahiruwane vina ahikobole fola. Emutikinihile Artem, jawi mudhidhi wakosiye diskursu ya Wubuwela Okwa wa Yezu alobwana abale kakobolile fola vina karuwanile. Artem ohiloga dhahi, “Miyo ddahigana wanonihedhamo entapulela muttupo wa Wubuwela Okwa wa Yezu.” Awene kafunile onvuruwana, mbwenye vamonilani Artem eddihaga muttupoya, awene ahimukumbirha wi awaddelemo yatapulelani.
14. Veteyile eredda ya COVID-19 guru gani ekosiwe wi abali one muttupo wa Wubuwela Okwa wa Yezu?
14 Eredda ya COVID-19. Veteyile ezini eji, nlogo na Mulugu kanitugumanile vamodhavi wi one muttupo obu. Mbwenye eji kiyatximihile wi ahiwodhe wona Muttupoya. d Milogo dhana ewodhelo ya okana interneti dhihiwodha wona Muttupoya na vidiyu konferensia. Ki abali matxikwi na matxikwi ahana ewodhelo y’okana interneti? Mu dhilabo dhina, mwahikosiwa masasanyedho wi abali one muttupo obu na televizau obe na radiyo. Ottiya ejo filiali dhina dhahikosa masasanyedho a okapula diskursu ya Wubuwela Okwa wa Yezu na dhilogelo okwaranya 500 wi abali ankala muttemba awodhe ovuruwana diskursu ya muttupo wa Wubuwela Okwa wa Yezu. Abali ororomeleya anttukula dhokapuliwa esi wi avahedhe abali ena ahana ewodhelo ya okana.
15. Txini esunziliwe na namasunza wa Bibilia onkuweliwa Sue?
15 Widdiwa na anamudhi. Makattamiho mena anrutxiha wona muttupo wa Wubuwela Okwa wa Yezu, widdiwa na anamudhi. Koona yotagiha ya namasunza wa Bibilia onkuweliwa Sue. Yaka ya 2021, siku na Wubuwela Okwa wa Yezu nihinafiya, Sue wahimwaddela namasunziha waye wa Bibilia wi sabwa ya widdiwa na anamudhi vatakulu, kagawodhile wona muttupo wa Wubuwela Okwa wa Yezu. Namasunziha waye wa Bibiliha wahengese Luka 22:44. Venevo omutapulelamo wi nigagumanana makattamiho orutxa, ninofwanyela ofwara yotagiha ya Yezu, nimulobelele Yehova vina nimukuluvele kakamwe Iyene. Mmangwananimwa, Sue wahisasanyedha pawu na vinyu vina boona porogarama ya mu jw.org ya Webedha wa Membesi siku na wubuwela okwa wa Yezu. Omattiyu wa siku nttile, bali okwartu wahiwodha wona Wubuwela Okwa wa Yezu na telefoni yaye. Mmalelani, Sue wahimulebela namasunza waye wa Bibilia: “Nyuwo muddipangarhaza venjene nzilo. Ddahikosa muli mwetemwene wi ddone muttupo wa Wubuwela Okwa wa Yezu nanda Yehova wahiddikamihedha. Miyo kaddina mazu a olagiha otamalela waga ddihagalala venjene!” Weyo ogagumanana makattamiho akene, onokuluvelaga wi Yehova onele wukamihedha?
16. Txini ennikuluveliha wi Yehova onele oruriha guru enkosihu ya wona muttupo wa Wubuwela Okwa wa Yezu? (Roma 8:31, 32)
16 Yehova onotamalela venjene guru enkosihu ya Wubuwela Okwa wa Yezu. Nikuluvele wi iyene onele oniruriha nigalagiha otamalela wehu mwa esile dhinikoseliye. (Kengesa Roma 8:31, 32.) Nikose muli mwetemwene wi niwodhe wona muttupo wa Wubuwela Okwa wa Yezu yaka eji vina nivilibihedhe wakonvidari attu ena.
JIBO 18 Ninotamalela Yobolo
a Txipirhi labo 4 na Abrili yaka ya 2023, attu matxikwi na matxikwi orugunuwa elabo yotene anele okala va muttuponi wa Wubuwela Okwa wa Yezu. Enjene mwa awene dila yoroma enonani muttupo obu. Abale attiyile omulabela Yehova na attu ena attiyile wona muttupo obu mwari mwa vyaka dhinjene anele okalavo. Attu ena ahipattiwa makattamiho anarutxiha wona muttupo obu, masiki dhawene anele owodha wona. Kintanala makattamiho anupatta, okane ebaribari wi Yehova onele oruriha guru yawo ya wona muttupo obu.
b Mudhidhi ontugumanani, anamakapelaya anorumela wi pawu na vinyu dhinosadduwa bikala maningo vina nikami na Kristu. Awene anubuwela wi nikami vina maningo a Kristu sisuwene. Nona mudhidhi wetene ontugumanani muttu-muttu onoja okarestiya.
c Mazina mena ahitxinjiwa.
d Koona vina mu jw.org, “Memorial de 2021.”
