1-2. Mumu liaka mutukaya ha Chiwanyino cha Yesu cha mwaka uno?

 HIKWAPALIKA miaka 2.000, Yesu kahanyine mwono wenyi ha kutukuula ni kwazulula jila hanga tukazuke mwono wa mutolo. Ha ufuku muze te kanda achifwa, Yesu yahana shimbi kuli tumbaji twenyi hanga ewuluke chitapo chenyi cha zango ha kulinga chiwanyino chize hakupwa wika mbolo ni vinyu.—1 Kori. 11:23-26.

² Twakwononokena shimbi yino ya Yesu, mumu twakumuzanga chinji. (Yoa. 14:15) Hita mwaka ha jimwe poso muze chiwanyino cha Yesu kanda chilingiwa ni muze hichalingiwa, twakusolola usakwililo wetu ha yize iye alingile ha kusa mashimbu hanga tulembe ni kupukuna ha kufwa chenyi. Chikwo nawa, twakuzanga chinji kwambujola hanga tukwase atu anji apwe hamuwika ni yetu ha chiwanyino chacho. Kashika, twakusa tachi hanga tuchine kwecha chuma nichimwe chitukwike kuya ha Chiwanyino cha Yesu.

3. Yika mutushimutwina ha mutwe uno?

³ Ha mutwe uno, mutushimutwinaho majila atatu waze twakusela tachi hanga tuye ha chiwanyino cha Yesu: (1) twakulinga chiwanyino cha Yesu ha kukaula chilweza chize mwene ahichikile, (2) twakusanyika akwetu ha chiwanyino chacho, ni (3) twakuya ha chiwanyino cha Yesu chipwe ngwe yuma yinakale ku mwono wetu.

4. Yihula yika akukumbulula hita mwaka ha chiwanyino cha Yesu? Mumu liaka chili chilemu kunyingika makumbululo jacho? (Luka 22:19, 20)

⁴ Hita mwaka ha Chiwanyino cha Yesu, twakwivwa pande  jize jinakatuka mu Mbimbiliya ni kukumbulula yihula yeka ni yeka. Twakunyingika mumu liaka atu anafupiwa ukuule ni chize kufwa cha mutu umuwika chinakonekena shili ya anji. Kakutwiwulula yize mbolo ni vinyu yinalumbunuka ni waze atamba kulia mbolo ni kunwa vinyu. (Tanga Luka 22:19, 20.) Chikwo nawa, twakupukuna ha yiwape ya kulutwe lia matangwa yize mutukazuka hano hashi. (Iza. 35:5, 6; 65:17, 21-23) Kunyingika umwenemwene uno chili chilemu chinji kuli yetu. Tununu twa atu kaunyingikine nawa keshi kulemesa chitapo cha Yesu. Ayo nawa keshi kulinga chiwanyino cha Yesu kulita ni chize mwene atesele. Mumu liaka?

5. Hanyima lia kufwa cha apostolo eswe, kuchi atu aputukile kulinga chiwanyino cha kufwa cha Yesu?

⁵ Hanyima lia kufwa cha apostolo eswe a Yesu, Akwa-Kristu a mahuza yanjila mu chikungulwila. (Mateu 13:24-27, 37-39) Ayo yaputuka “kuhanjika yuma ya mahuza ni kukoka tumbaji hanga aakaule.” (Yili. 20:29, 30) Mahuza amwe waze apwile ni kulongesa kali ngwo, Yesu kakahanyine mujimba wenyi “kamuwika hanga akambate milonga ya anji,” ngwe chize Mbimbiliya yakwamba, alioze ngwo, chitapo chenyi mapwa ni kuchihana mashimbu eswe. (Hepre. 9:27, 28) Musono, atu anji a mbunge yipema kakufuliela ha malongeso jacho a mahuza. Ayo kakuya mu mayingeleja hita poso, ha mashimbu amwe hita tangwa hanga alinge yize akuvuluka ngwo, “Missa.” b Mayingeleja akwo keshi kwiwuluka kufwa cha Yesu mashimbu eswe, alioze anji a kuli ayo kanyingikine kanawa ulumbunwiso wa chitapo cha Yesu. Amwe mahasa kulihula ngwo: ‘Shina kufwa cha Yesu muchihasa lume kukonekena shili ya mutu?’ Mumu liaka akulihula chocho? Kanji-kanji, mumu kaalongesele kuli waze akwamba ngwo, chitapo cha Yesu kuchishi kukonekena shili ya atu. Mba kuchi tumbaji amwenemwene a Yesu akukwasa atu kunyingika mutapu walita wa kulingilamo chiwanyino chenyi?

6. Chiyulo chika akwachile chizavu cha Alongi a Mbimbiliya ha mwaka 1872?

⁶ Ha sekulu 19, chizavu cha Alongi a Mbimbiliya chize apwile ni kusongwela kuli ndumbu Charles Taze Russell, yaputuka kulilongesa chinji Mbimbiliya. Ayo kazangile chinji kunyingika kanawa ulemu wa chitapo cha Yesu ni chize atamba kwiwuluka kufwa chenyi. Ha mwaka 1872, ayo yakwata chiyulo chize te chinakatuka mu Mbimbiliya ngwo, Yesu kahanyine ukuule hanga alamwine atu eswe. Ayo kakaswekele yize te analilongesa. Shimbu achilinge, yayisolola kuli akwo kupalikila mu mikanda ni mu tuposhi. Hazehene, yaputuka kukaula chilweza cha Akwa-Kristu ku sekulu yitangu ha kwiwuluka kufwa cha Yesu kamuwika ha mwaka.

7. Kuchi twakuyuka ha umwenemwene uze Alongi a Mbimbiliya awanyine?

⁷ Musono, twakuyuka chinji ha umwenemwene uze awanyine mandumbu jacho ha miaka yinji kunyima. Mu mutapu uka? Yehova kanatukwase kunyingika ulumbunwiso wa chitapo cha Yesu ni yize muchikalinga hali yetu ni hali atu eswe. (1 Yoa. 2:1, 2) Hitwanyingika nawa ngwetu, Mbimbiliya yakusolola kutalatala chaali hali atu waze akuvwisa Zambi kuwaha—cha waze makaya mu malilu ni waze makatwama hano hashi. Zango lietu hali Yehova liakutukwasa kukundama kuli iye ni kuyuka ha chitapo cha Yesu. (1 Petu.  3:18; 1 Yoa. 4:9) Kashika, chizechene ngwe mandumbu jetu kunyima, tusanyikenu atu anji hanga akeze ha chiwanyino cha Yesu chize muchikalingiwa kulita ni chilweza chize mwene ahichikile.

8. Yika Yela ja Yehova akulinga hanga asanyike atu ha chiwanyino cha Yesu? (Tala chizulie.)

⁸ Chize ha miaka yinji, Yela ja Yehova kakusanyika akwo ha chiwanyino cha kwiwuluka kufwa cha Yesu. Ku uputukilo wa mwaka 1881, mandumbu ni mapangi mu Pennsylvania, Estados Unidos kaasanyikine mu zuwo lia umwe ndumbu hanga alinge chiwanyino cha Yesu. Ha kupalika cha mashimbu, hita chikungulwila yichiputuka kulinga chiwanyino cha Yesu. Ha Março ya 1940, akwa-kwambujola yaakolweza hanga asanyike mutu mweswawo te mazanga kupwa ha chiwanyino chacho. Ha mwaka 1960, ha chisuho chitangu, Mbetele yiyituhwisa mapapilo a kusanyika no atu ha chiwanyino cha Yesu. Kukatuka ha shimbu liacho, twakuhana kuli atu tununu a tununu twa mapapilo a chiwanyino cha Yesu. Mumu liaka twakusa tachi hanga tusanyike atu ha chiwanyino cha Yesu?

9-10. Aya akuyuka ha tachi jize twakusa hanga tusanyike atu a chiwanyino cha Yesu? (Yoano 3:16)

⁹ Chikuma chimwe chize twakusanyikina atu ha chiwanyino cha Yesu, chili ngwo twakuzanga hanga anyingike umwenemwene ha chisuho chitangu hakutwala ha yize Yehova ni Yesu anatulingila. (Tanga Yoano 3:16.) Twakushimbwila ngwetu, yize mevwa ni kumona ha chiwanyino muyikwasa hanga alilongese yuma yinji ni kupwa tuvumbi twa  Yehova. Alioze, kuli atu akwo nawa waze akuyuka.

¹⁰ Twakusanyika nawa atu waze haneche kulingila Yehova. Twakuchilinga hanga twewulule ngwo, Zambi machinunga ni kwazanga. Anji kakutayiza muze twakwasanyika, nawa twakuwahilila ha kwamona ha chiwanyino. Kupwa ha chiwanyino cha Yesu, chakwakwasa kwiwuluka chize apwile ni kuwahilila ha kulingila Yehova. Tutalenu chilweza cha Monica. c Iye kaputuka nawa kwambujola ha mashimbu a COVID-19. Hanyima lia kupwa ha chiwanyino cha Yesu, yamba ngwenyi: “Chino chapwile chiwanyino chalipwila kuli yami. Hikwapalika miaka 20, chino chili chisuho chitangu chize nambujola kuli atu ni kwasanyika ha chiwanyino cha Yesu. Nasele tachi hanga ngusanyike atu ha chiwanyino, mumu nakusakwilila ha yize Yehova ni Yesu akungulingila.” (Samu 103:1-4) Chipwe ngwe atu matayiza kwiza ha chiwanyino cha Yesu hanji ka, nihindu twakulinga yize mutuhasa mumu tunanyingika ngwetu Yehova kakulemesa tachi jetu.

11. Kuchi Yehova kakuwahisa tachi jize twakusa hanga tusanyike atu ha chiwanyino cha Yesu? (Hagaia 2:7)

¹¹ Yehova kakuwahisa tachi jize twakusa hanga tusanyike atu ha chiwanyino cha Yesu. Ha mwaka 2021, chipwe ngwe kwapwile yikwiko ya musongo wa COVID-19, nihindu ha chiwanyino cha Yesu hapwile atu 21.367.603. Atu waze apwileho, kanahiane Yela ja Yehova a hashi heswe ha yisuho yaali ni chipinji! Ewa, Yehova keshi kulihulikila wika ha unji wa atu, alioze kakulihulikila hali hita mutu yoze wakupwa ha chiwanyino chacho. (Luka 15:7; 1 Timo. 2:3, 4) Tuli ni shindakenyo ngwetu, Yehova kakuzachisa mulimo wetu wa kusanyika atu hanga atukwase kuwana waze akwete mbunge yipema.—Tanga Hagaia 2:7.

12. Yika muyihasa kutukwika kuya ha chiwanyino cha Yesu? (Tala chizulie.)

¹² Yesu kambile ngwenyi, ha matangwa a kusula te mutupalika mu yipikalo yeka ni yeka ngwe, yihungumiona mu usoko, ukanjiso, jita, misongo ni yuma yikwo nawa. (Mateu 10:36; Marku 13:9; Luka 21:10, 11) Nyi tunapalika mu yuma yino, ha mashimbu amwe chakupwa chikalu kuya ha chiwanyino cha Yesu. Yika mandumbu jetu akulinga mba akumbe kapinda wacho nawa kuchi Yehova akwakwasa?

13. Kuchi Yehova awahishile hamu lia Artem lia kulinga chiwanyino mu zuwo lia ususu?

¹³ Mu zuwo lia ususu. Mandumbu jetu waze ali mu mazuwo a ususu mumu lia ufulielo wo, kakulinga yize mahasa hanga alinge chiwanyino cha Yesu. Tutalenu chilweza cha Artem. Ha mashimbu a chiwanyino cha Yesu cha 2020, iye kamusele mu chimwe chipatulo chikehe muze apwile ni kusa funge atano ha chisuho chimuwika. Chipwe ngwe kapwile mu zuwo lia ususu, nihindu kafupile mbolo ni vinyu yize te mazachisa ha chiwanyino cha Yesu ni kululieka yuma hanga alinge pande. Alioze, waze apwile no mu chipatulo chimuwika te kakunwa makanya ni kuhanjika maliji a sonyi. Mba yika iye alingile? Yaeta hanga eche kunwa makanya ni kuhanjika maliji a sonyi chipwe ha ola yimuwika. Hachino, atu jacho yecha kunwa makanya ni kuhanjika maliji a sonyi ha shimbu lize te Artem analingi chiwanyino. Artem yamba ngwenyi: “Nalihanyine hanga ngwalweze hakutwala ku  chiwanyino cha Yesu.” Chipwe ngwe o kamulwezele ngwo kazangile kwivwa yuma yacho, hanyima lia kumona Artem malinga chiwanyino, yaputuka kumuhula hakutwala ku chiwanyino chacho.

14. Kuchi atu ja Yehova alingile chiwanyino cha Yesu chipwe ngwe kwapwile musongo wa COVID-19?

¹⁴ Ha mashimbu a COVID-19. Muze musongo uno wokele chinji, atu ja Yehova te kechi kuhasa nawa kulinga chiwanyino cha Yesu hamuwika mu mazuwo a Wanangana. Alioze, chino kuchakaakwikile kulinga chiwanyino cha Yesu. d Yikungulwila yize yapwile ni Internet yinakalinga chiwanyino chacho ha videoconferência. Mba yika mutwamba hali tununu twa mandumbu waze kakapwile ni Internet? Mu yifuchi yimwe, kalingile katalilo hanga pande ja chiwanyino jipalike ku TV ni ku yisaji ya fuji. Chikwo nawa, mitango yinakakopa pande mu malimi kuhiana 500 hanga akwase chipwe mandumbu waze atwama kusuku no alinge chiwanyino. Mandumbu jetu kalingile katalilo  hanga atwale pande jacho kuli waze te anajifupu.

15. Yika walilongesa ha chilweza cha longi wa Mbimbiliya anavuluka ngwo Sue?

¹⁵ Yihungumiona mu usoko. Kuli amwe, chuma chakwapinjisa hanga ahone kuya ha chiwanyino cha Yesu chili yihungumiona ya mu usoko. Tutalenu chilweza cha umwe longi wa Mbimbiliya avuluka ngwo Sue. Ha 2021, ha mashimbu a chiwanyino cha Yesu, Sue yalweza longeshi yenyi ngwenyi, mumu lia yihungumiona yize anapalika ku zuwo kechi kuhasa kuya ha chiwanyino. Longeshi yenyi yamutangila Luka 22:44. Hanyima yamulweza ngwenyi muze unapalika mu yipikalo, watamba kwimbulula chilweza cha Yesu ha kulemba kuli Yehova ni kuhichika yuma yeswe mu moko jenyi. Mukwachako, Sue yalulieka mbolo ni vinyu ni kutala Uwayilo wa Chimene uze wakupwa ha jw.org. Mba ha chingoloshi, muze apwile mu chipatulo ukawenyi, yazachisa telefone hanga atale chiwanyino cha Yesu. Hanyima, Sue yasonekena longeshi yenyi ngwenyi: “Zau wangukolwezanga chinji. Nalinganga yeswe yize te munguhasa hanga ngupwe ha chiwanyino cha Yesu, mba Yehova yalinga yize chahashile. Kashika, ngunawahilila chinji!” Shina unafuliela ngwe, ni yena Yehova mahasa kukukwasa muze unapalika mu yipikalo yalifwa ni yino?

16. Mumu liaka tuli ni shindakenyo ngwetu, Yehova mawahisa tachi jize twakusa hanga tupwe ha chiwanyino cha Yesu? (A-Roma 8:31, 32)

¹⁶ Yehova kakulemesa tachi jize twakusa hanga tupwe ha chiwanyino cha Yesu. Mutuhasa kupwa ni shindakenyo ngwetu, iye matuwahisa muze mutusolola usakwililo wetu ha yize akutulingila. (Tanga A-Roma 8:31, 32.) Kashika, tusenu tachi hanga tukapwe ha chiwanyino cha Yesu ha mwaka uno ni kulihana chinji mu milimo ya ku spiritu ha mashimbu jacho.