CAWN AWK CAPAR 4
Ruahnolhnak Puai Ah I Pumh Dingin Kan I Zuamnak Kha Jehovah Nih Thluachuah A Pek
“Keimah philhlonak ah run tuah u.”—LUKA 22:19.
HLA 19 Bawipa Zanriah
LANGHTERNAK a
1-2. Kum fatin Ruahnolhnak ah zeicah kan i pumh?
A LUANCIA kum 2,000 hrawngah Jesuh nih kan caah a nunnak a peknak thawngin zungzal nunnak lam a awnter. Jesuh nih a thih lai zan ah changreu le mitsur zu aa telmi, a sawhsawh tein puai a tuahnak thawngin raithawinak a pekmi kha i cinken awkah a zultu pawl kha nawl a pek hna.—1 Kor. 11:23-26.
2 Jesuh kha kan dawt tuk caah mah a nawlbia kha kan zulh. (Johan 14:15) Kum fatin Ruahnolhnak caan chungah Jesuh a thihnak sullam kha thlacam buin ṭha tein ruah awkah a caan kan peknak thawngin a tuahmi caah kan i lawmhnak kha kan langhter. Mah a hleikhunmi puai ah i tel ve dingin mi tam khawh chung tam kha sawm awkah phungchimnak ah tam deuh in i tel kan duh. Cun Ruahnolhnak i, i pumh awkah zeithil hmanh i dawnhter lo dingin bia kan khiah.
3. Hi capar ah zei kong dah kan i ruah hna lai?
3 Hi capar ah Jesuh a thih philhlonak puai tuah awkah Jehovah miphun nih an si khawh chungin an i zuamnak lam pathum kong kan i ruah hna lai: (1) Jesuh nih a rak tuahmi ningin tuahnak, (2) Ruahnolhnak ah midang sawmnak le (3) a harmi thil sining lakah Ruahnolhnak ah i pumhnak.
Jesuh Nih A Rak Tuahmi Ningin Tuahnak
4. Kum fatin Ruahnolhnak puai ah zei bantuk biatak hna dah a hleiin langhter a si, mah biatak kong hngalhnak cu zeicah kan caah a biapit tuk awk a si? (Luka 22:19, 20)
4 Kum fatin Ruahnolhnak ah biahalnak tampi kha fiang tein a phi a pemi, Baibal hrambunhmi phungchimnak kan theih. Minung nih tlanhnak man kan herhnak a ruang le mi tampi sualnak caah mi pakhat nih zeitindah a cham khawh timi kong zong kan theih. Changreu le mitsur zu nih zeidah a aiawh i ahote nih dah an hman awk a si ti zong kan hngalh ṭhan. (Luka 22:19, 20 rel.) Vawlei ruahchannak a ngeimi hna caah chiahpiakmi thluachuah pawl kong kha kan ruat. (Isa. 35:5, 6; 65:17, 21-23) Mah biatak kong hngalhnak cu kan caah a biapit tuk awk a si. Mi tampi nih mah thil hna kha an hngalthiam lo i Jesuh tlanhnak man zeitluk in dah man a ngeih ti zong kha an hngal lo. Cucaah Jesuh a thih Philhlonak puai kha amah nih a rak tuahmi ningin an tuah lo. Zeicah cutin a si?
5. Lamkaltu tam deuh an thih hnuah Jesuh a thih philhlonak puai kha mi nih zeitindah an hun tuah?
5 Jesuh lamkaltu tam deuh an thih hnu tlawmpal ah Khrihfabu chungah a hmaan lomi Khrihfa pawl an hung um. (Matt. 13:24-27, 37-39) Annih nih “a zummi hna kha anmah lei i hruai awkah lih an chim.” (Lam. 20:29, 30) A hmaan lomi Khrihfa hna nih “lih” in mi an cawnpiakmi hna pakhat cu Baibal chimmi bantukin Jesuh nih a pum kha ‘mi tampi sualnak lakpiak awkah voikhat raithawinak ah’ pek si loin atu le atu raithawinak pek a hau tiah an ti. (Heb. 9:27, 28) Tuchan i mi tampi nih mah a hmaan lomi cawnpiaknak kha an zumh. “Mass Raithawinak” tiah auhmi puai kha tuah awkah zarh fatin, a caan ah nifatin church ah an i pum. b A dang biaknak hna nih Jesuh a thih philhlonak puai kha voi tlawm deuh an tuah, asinain bu chungmi tam deuh nih cun Jesuh tlanhnak man nih a liimmi kong hna kha ṭha tein an hngalthiam lo. ‘Jesuh thihnak nih ka sualnak ngaihthiam a siter kho taktak hnga maw?’ tiah mi cheukhat nih an ruah men lai. Zeicah cu bantuk biahalnak cu an tuah? Jesuh tlanhnak man nih sualnak a ngaithiam kho lo tiah mi nih an chimmi kha an zumh hna caah a si. Mah kong kha Jesuh zultu taktak hna nih zeitindah an tawnghtham?
6. Baibal siangngakchia phu pakhat nih 1872 a phanh tikah zeidah an hun hngalhthiam?
6 Kumzabu 19 a donghnaklei ah Charles Taze Russell nih a hruaimi Baibal siangngakchia phu pakhat nih Cathiang kha ṭha tein an hun hlathlai. Jesuh tlanhnak man a sullam le a thih philhlonak zeitindah tuah awk a si ti kha hngalh an duh. 1872 a phanh tikah Jesuh nih mi vialte caah tlanhnak man a pek ti kha Baibal hrambunh in an hun hngalhthiam. An hngalhmi kong kha anmah ca lawngah an i chiah lo. Mah canah cauk, thanhca le mekazin hna hmangin midang kha an hngalhter hna. Mah hnu tlawmpal ah kumzabu pakhatnak i Khrihfa hna bantukin Ruahnolhnak kha kumkhat ah voikhat lawng an hun tuah.
7. A hmasa i Baibal siangngakchia hna nih hlathlainak an tuahmi in zeitindah ṭhatnak kan hmuh?
7 A luancia kum tampi lio i mah lungthin ṭha a ngeimi Khrihfa pa hna nih hlathlainak an tuahmi in tuchan ah ṭhatnak kan hmu. Zeitin in dah? Jehovah thluachuah thawngin Jesuh tlanhnak man le mah nih a liimmi kong biatak kha kan hun hngalh. (1 Johan 2:1, 2) Baibal nih Pathian lung a tongmi hna caah ruahchannak pahnih a kan pek—mi cheukhat kha vancung ah a thi kho lomi nunnak le a dang mi nuai tampi kha vawleicung ah zungzal nunnak ruahchannak a kan pek ti zong kha kan hun hngalh. Jehovah nih zeitluk in dah a kan dawt ti le Jesuh tlanhnak man in pakhat cio nih zeitluk in dah ṭhatnak kan hmuh ti kan ruah tikah Jehovah he kan i naih deuh. (1 Pet. 3:18; 1 Johan 4:9) Cucaah hlanlio i zumhfekmi unaupa hna bantukin Jesuh nih a rak tuahmi ningin Ruahnolhnak puai tuahnak ah rak i pumh ve dingin midang kha kan sawm hna.
Ruahnolhnak Puai Ah Midang Sawmnak
Ruahnolhnak sawmnak campaign ah tling tein i tel dingin zeidah na tuah khawh? (Catlangbu 8-10 zoh) e
8. Ruahnolhnak puai ah midang sawm dingin Jehovah miphun nih zeidah an rak tuah? (Hmanthlak zoh.)
8 Jehovah miphun nih Ruahnolhnak puai ah midang sawmnak he aa tlaiin hlanliopi in tuanbia an rak ngei cang. 1881 a thawklei ah United States i unau pawl cu mah a hleikhunmi caan ah Pennsylvania, Allegheny i unau pakhat inn ah hmunkhat ah i pumhṭi dingin sawm an si. A hnuah Khrihfabu kip nih anmah cio in Ruahnolhnak puai an tuah. 1940, March thla ah thawngthanhtu pawl cu an lohmun i lungthawhnak a ngeimi kip kha sawm khawh a si tiah ti an si. 1960 ah Bethel nih nammi sawmnak ca kha Khrihfabu hna sinah a voikhatnak an kuat. Mah caan thawkin Ruahnolhnak sawmnak ca nuai tampi cu mi sinah pek a si. Midang sawmnak caah a caan pek in kan i zuammi cu zeicah a phut?
9-10. Ruahnolhnak ah midang sawm awkah kan i zuamnak in ahote dah ṭhatnak a hmu? (Johan 3:16)
9 Ruahnolhnak ah kanmah he i pumh ve awkah midang kan sawm hnanak a ruang pakhat cu Jehovah le Jesuh nih kan caah an tuahmi kong kha a voikhatnak a rak i pummi hna kha hngalhter kan duh hna caah a si. (Johan 3:16 rel.) Ruahnolhnak ah an hmuhmi le an theihmi nih Jehovah kong tam deuh in cawn awk le a sal si awkah a forh hna lai tiah kan i ruahchan. Asinain midang ca zongah ṭhatnak a um.
10 Jehovah a bia ti lomi hna zong kha kan sawm hna. Pathian nih a dawt rih ko hna ti hngalhter awkah cutin kan tuahmi a si. Mi tampi nih kan sawmmi hna an cohlan caah kan i lawm tuk. Ruahnolhnak ah an i pumhmi nih hlanlio Jehovah an biak lioah zeitluk in dah an rak i nuamh ti kha a hngalhter ṭhan hna. Monica kong hi ruathmanh. c Anih cu COVID-19 pulrai chungah a cawlcangmi thawngthanhtu a hung si ṭhan. 2021 Ruahnolhnak puai i aa pumh hnuah hitin a ti: “Mah Ruahnolhnak cu ka caah a hleikhun tukmi a si. Kum 20 chungah a voikhatnak mi sinah phung ka chim i Ruahnolhnak ah ka sawm khawh hna. Jehovah le Jesuh nih ka caah an tuahmi cungah kaa lawm tuk i ka si khawh chungin midang ka sawm hna.” (Salm 103:1-4) Kan sawmmi hna kha mi nih ṭha tein an lehrulh zong, lehrulh lo zongah kan i zuamnak kha Jehovah nih a sunsak ti kan hngalh caah Ruahnolhnak ah teima tein midang kan sawm hna.
11. Ruahnolhnak ah midang sawm dingin kan i zuamnak kha Jehovah nih zeitindah thluachuah a pek? (Haggai 2:7)
11 Ruahnolhnak ah midang sawm dingin kan i zuamnak kha Jehovah nih thluachuah tampi a kan pek. 2021 ah COVID-19 pulrai ruangah khenkhamnak tampi a um ko nain aa pummi cu 21,367,603 kan si. Mah cu vawleicung pumpi i Jehovah Tehte Hna milu a lethnih le a cheu tluk a si! Jehovah nih minung pa zeizat dah an i pum ti kha biapi ah a chia lo ti cu a hmaan ko. Aa pummi pakhat cio tu kha hngalh a kan duh. (Luka 15:7; 1 Tim. 2:3, 4) Midang kan sawm hna tikah lungthin ṭha a ngeimi hna hmuh awkah Jehovah nih a kan bawmh ti kha kan zumh khawh.—Haggai 2:7 rel.
A Harmi Thil Sining Lakah Ruahnolhnak Tuahnak
Jehovah nih Ruahnolhnak ah i pumh dingin kan i zuamnak kha thluachuah a pek (Catlangbu 12 zoh) f
12. Zei bantuk thil sining hna nih dah Ruahnolhnak puai tuah awkah a harter khawh? (Hmanthlak zoh.)
12 Jesuh nih donghnak caan ah chungkhar ralchanhnak, hremnak, raldohnak, rai le a dang a harmi thil sining tampi kan ton lainak kong kha a chimchung. (Matt. 10:36; Marka 13:9; Luka 21:10, 11) A caan ah mah thil sining hna nih Jesuh a thih philhlonak tuah awkah a harter khawh. Unau pawl nih cu bantuk zuamcawhnak hna tei awkah zeidah an tuah i Jehovah nih zeitindah a bawmh hna?
13. Thong a tlak lioah Ruahnolhnak tuah dingin Artem ralṭhatnak le biakhiahnak kha Jehovah nih zeitindah thluachuah a pek?
13 Thong tlaknak. An zumhnak ruangah thong a tlami unau pawl nih Jesuh a thih philhlonak tuah awkah an si khawh chungin an i zuam. Artem hmuhtonnak hi zohhmanh u. 2020 Ruahnolhnak caan chungah thong tlami panga chiahnak khaan hmete ah an chiah. Thongtla ko hmanh sehlaw Ruahnolhnak ah hmanmi caah thil cheukhat kha a khon khawh i amah tein pumhnak tuah awkah aa tim. Asinain a khaanhawi pawl cu kuak a zumi le holh ṭhalo tampi a hmangmi an si. Zeidah a tuah? Sumilam pakhat chung holh ṭhalo chim loin le kuak zuk loin nan um kho lai maw tiah a hal hna. A khaanhawi pawl nih Ruahnolhnak tuah chungah kuak zuk lo ding le volhpamhnak bia chim lo dingin an hna a tlak caah Artem cu a khuaruah a har tuk. Artem nih “Ruahnolhnak kong chimh kaan duh hna” tiah a ti. Mah kong cu ngaih kan duh lo tiah an ti nain Artem nih Ruahnolhnak a tuahmi an hmuh i an theih tikah mah kong he aa tlaiin biahalnak tampi an tuah.
14. COVID-19 pulrai lakah Ruahnolhnak tuah khawh awkah Jehovah miphun nih zeitindah an i zuam?
14 COVID-19 pulrai. Mah pulrai ruangah Jehovah miphun nih Ruahnolhnak ah minung i ton in an i pum kho lo. Asinain mah cu Ruahnolhnak tuah awkah an caah dawntu a si lo. d Internet a umnak Khrihfabu hna nih videoconference hmangin Ruahnolhnak an tuah. Asinain Internet a ngah lonak ah a ummi mi nuai tampi tah zeitin? Ram cheukhat ah TV asiloah radio in phungchimnak kha thlah awkah timhtuah a si. Mah lengah hmunhriang i a ummi hna nih Ruahnolhnak an tuah khawh nakhnga zung ṭengnge nih phungchimnak kha holhphun 500 lengin aw an khumh. Cun unaupa hna nih mah awkhumhmi kha a herhmi unau pawl sinah an kuat hna.
15. Baibal a cawngmi Sue kong in zeidah na cawn?
15 Chungkhar ralchanhnak. Mi cheukhat caah Ruahnolhnak tuah awkah zuamcawhnak ngan bik cu chungkhar ralchanhnak a si. Baibal a cawngmi Sue kong kha ruathmanh u. 2021 i Ruahnolhnak puai a phanh lai ni ah Sue nih Baibal a cawnpiaktu kha inn nih an ka ralchanh caah Ruahnolhnak ah kaa pum kho lai lo tiah a ti. Baibal a cawnpiaktu nih Luka 22:44 kha a relpiak. Cun harnak kan ton tikah Jehovah sinah thlacamnak le lungtak tein amah i bochannak thawngin Jesuh kha kan i zohchunh awk a si tiah a ti. A thaizing ah Sue nih changreu le mitsur zu kha a timhtuah i jw.org ah taarmi a hleikhunmi Zinglei Pumhnak program kha a zoh. A zanlei ah amah tein a khaan i a um lioah phone in Ruahnolhnak ah aa pum. Mah hnuah Sue nih Baibal a cawnpiaktu sinah hitin ca a ṭial: “Nizan ah tha na ka pek caah ka tha a um tuk. Ruahnolhnak ah kaa pumh khawh nakhnga ka si khawh chungin kaa zuam caah Jehovah nih a ka bawmh. Zeitluk in dah kaa nuamh i kaa lawmh ti kha a chim zia hmanh ka thiam lo!” Nang zong cu bantuk thil sining na ton ahcun Jehovah nih a ka bawmh khawh tiah na ruat maw?
16. Ruahnolhnak ah i pumh dingin kan i zuamnak kha Jehovah nih thluachuah a kan pek lai tiah zeicah kan zumh? (Rom 8:31, 32)
16 Jehovah nih Jesuh a thih philhlonak tuah dingin kan i zuamnak kha a sunsak tuk. Kan caah a tuahmi thil cungah kan i lawmhnak kan langhter tikah thluachuah a kan pek lai ti kha kan zumh khawh. (Rom 8:31, 32 rel.) Tukum Ruahnolhnak ah i pumh awk le Ruahnolhnak caan chungah thlaraulei tuahsernak hna ah kan si khawh chung tam deuh in i tel awkah biakhiak hna u sih.
HLA 18 Tlanhnak Man Caah I Lawm
a 2023, April 4, Nihnih Ni ah vawleicung pumpi i mi nuai tampi cu Khrih a thih Philhlonak puai ah an i pum lai. Mi tampi caah cun a voikhatnak an i pumhmi a si men lai. A hlanah Jehovah Tehte a rak si balmi hna zong kum tampi hnuah a voikhatnak an i pumh ṭhanmi a si men lai. Mi cheukhat cu i pumh awkah dawnkhantu thil tampi an tong ko nain an i pum men ko lai. Na sining cu zeitin a si hmanhah i pumh dingin naa zuammi nih Jehovah lung a lawmhter lai ti kha na zumh khawh.
b Church mi hna nih mah puai tuah lioah changreu le mitsur zu cu Khrih i a pum le thisen ah aa thleng tiah an zumh. Mi pakhat nih mah phungphai a tuah fatin Jesuh pum le thisen cu raithawi a si tiah an ruah.
c Min cheukhat thlen a si.
d JW.ORG/MY ah taarmi “2021 Ruahnolhnak Puai” timi capar zong zoh.
