1, 2. ¿Kʼãrẽa kĩrãbepanʉ Jesu beidara poagaza?

 JESU dayirã bari beidata 2.000 poaga ba iya maʉ̃ra osi dayirãta ewari jõmaʉ̃nẽ bamarẽã. Diamasi iyi bei nãã Jesuba jarasi yi kʼaidupanʉra kĩrãbedamarẽã iyi beidata. Maʉ̃ oita zokʼaibarabasi panta binoʉ̃me (1 Cor. 11:23-26).

² Jesuba zokʼabʉra ũrĩpanʉ iyita kãgapanʉ baera (Juan 14:15). Poagaza Jesu beida jẽda kĩrãbei ewari zei nãã, ewarita jʉrʉpanʉ yiwidʼita akʉza krĩchaita iyi beidaba ẽbẽrarã sãwũã kʼarebabʉta. Adewara audre sobia jaradiapanʉ ẽbẽrarã jʉ̃ẽnamarẽã Jesu beida jẽda kĩrãbei ewaride, mawũã ãyisida dayirãbawara bamarẽã. Zarea opanʉ Jesu beida jẽda kĩrãbei ewarira adua ẽ baita.

3. ¿Kʼãrẽta kʼawuadai naʉ̃ artikulodera?

³ Naʉ̃ artikulode kʼawuadayi nekʼãrẽ ũbea sãwũã Daizeze pʉwʉrʉba zarea obʉta Jesu beida jẽda kĩrãbeita: Aba, aripe opanʉne Jesuba zokʼabʉde. Ũme, jarakapanʉne ẽbẽrarã Jesu beida jẽda kĩrãbedaita. Ũbea, Jesu beida jẽda kĩrãbepanʉne bedʼea zroma erpanʉmina.

4. ¿Kʼãrẽ widita panʉbʉ Jesu beida kĩrãbebʉrʉza akʉza kʼãrẽa krĩcha ẽ baibara maʉ̃ra mejãcha yibia ẽãta? (Lucas 22:19, 20).

⁴ Poagaza Jesu beida jẽda kĩrãbebʉrʉza ũrĩpanʉ diskursota. Mama panʉbʉ ẽbẽrarãba widi opanʉta, kʼawuapanʉ sãwũã ẽbẽrarãba nesidapanasita ẽdrʉbimarẽã akʉza yumakẽrã abaʉdeba ẽbẽrarã mejãchaʉta ẽdrʉbisita ãyi nemitiadeba akʉza kĩrãbebibʉ kʼãrẽta jarakĩrãkʉta  panba binoʉ̃meba, adewara kʼairaba doseabʉta akʉza koseabʉta maʉ̃ra (akʉra Lucas 22:19, 20). Akʉza krĩchapanʉ ẽbẽrarã nama ẽjũãne bʼairaba kʼãrẽ nebiata jʉ̃ãpanʉ ʉ̃rʉ. (Is. 35:5, 6; 65:17, 21-23). Jʉra kʼawuabaibara krĩcha ẽ baita dayirãba kʼawuabʉra audre yibia ẽãta. Ẽbẽrarã mejãchaʉba biga diada ẽ Jesuba dayirã bari kʼãrẽ oda kʼarea, adewara ãyara Jesuba jaradia amaenane aripe oda ẽ, ¿kʼãrẽa?

5. ¿Apostolera jõma beida tẽãra ẽbẽrabara sãwũã jẽda kĩrãbepanasi Jesu beidara?

⁵ Apostolera Jesu kʼawapanana jõma beida tẽã, kristianora apanʉrata eda zesida kongregasione (Mat. 13:24-27, 37-39). Ãyara sewa nebʉrata jarasida mawũã Jesu kʼaidubemara ãyi kʼaidu edeita (Hech. 20:29, 30). Ãya ʉ̃kʉrʉ sewa nebʉra jaradadebemara naʉ̃, Jesura ewari jõmaʉ̃nẽ beibarabasita dayirã mitiadeba ẽdrʉbira. Mamina Daizeze Bedʼeabara jarabʉ ewari abapai beisita wua bei ẽ baita (Heb. 9:27, 28). Ẽbẽra mejãchaʉba ĩjãbʉ maʉ̃ sewa nebʉrata, bari jaraita katolikorãra semanaza, mawũã ẽ bʉrʉ ewariza wãbʉ misa bʼaita. Ãya mawũã obʉrʉza krĩchapanʉ baera Jesura jẽda beisita. b Awuru religionʼraba Jesu beidaba badua jẽda kĩrãbepanʉ ẽ mina ãyara bia kʼawua ẽ kʼãrẽta jarakĩrãbʉta Jesu beidaba. Ʉ̃kʉrʉba widipanʉ: «¿Wãrĩnu Jesu beidabara mʉ̃ nemitiara ãĩ bʉebʉka?». ¿Kʼãrẽa mawũã widipanʉ ãyara? Ʉ̃kʉrʉba jaradiapanʉ baera Jesu beidabara dayirã nemitiara kĩrãdua ẽãta. Mamina wãrĩnu Jesu kʼaidupanʉrabara jaradiabʉ kʼãrẽta jarakĩrãbʉta Jesu beidaba akʉza sãwũã jẽda kĩrãbeibarata.

6. ¿1872de Daizeze Bedʼea estudiapanʉrabara kʼãrẽta kʼawuasida?

⁶ Siglo 19 jõbodoare mebẽã Charles Taze Russellba akʉza iyibawara Daizeze Bedʼea estudiapanʉraba audre biʼia kʼawua jʉ̃drʉsida Daizeze Bedʼeaba jarabʉta. Ãya biʼia kʼawuakĩrãbasi kʼãrẽa beisita Jesura akʉza sãwũã jẽda kĩrãbedaibarata. 1872de ãya kʼawuasida Jesura wãrĩnu beisita dayirã ẽbẽra jõmaʉ̃ bari. Ãya kʼawuadara ãyi bitabai kʼawuabe ẽ basi, awuarabʉrʉ wuabema ẽbẽrarã jaradiasi librodeba, kartadeba akʉza periodikodeba. Maʉ̃ tẽã kristianora nããbema siglodebemane kĩrãkʼa poagaza ãba yi jʉresida Jesu beida jẽda kĩrãbedaita.

7. ¿Sãwũã kʼarebabʉ mebẽrãba Daizeze Bedʼea nãã bia kʼawuadabara dayirãra?

⁷ Idi ewadera dayirãbara nekʼãrẽ biata mejãcha erpanʉ naʉ̃ra mebẽrãba nãã bia kʼawuadadeba. Jeowa kʼarebadeba dayirãbara bia kʼawuapanʉ kʼãrẽta jarakĩrãbʉta Jesu beidaba akʉza iya dayirã bari kʼãrẽ oita, adewara ẽbẽrarã jõmaʉ̃ bari (1 Juan 2:1, 2). Adewara Daizeze Bedʼeadeba kʼawuasida ʉ̃kʉrʉ ẽbẽraba nebia jʉ̃ãbʉta, ʉ̃kʉrʉra ʉ̃tʉ ewari jõmaʉ̃nẽ bʼaita, ʉ̃kʉrʉta nama egorode ewari jõmaʉ̃nẽ bʼaita. Dayirãba kʼawuabʉrʉde Jeowaba dayirã kʼãrẽaba kãgabʉta akʉza Jesu beidaba kʼãrẽne kʼarebabʉta naʉ̃ba Jeowa kʼawa babibʉ (1 Ped. 3:18; 1 Juan 4:9). Abarika dayirã mebẽrã nããbemane kĩrãkʼa, ẽbẽrarã jarapanʉ Jesu beida jẽda kĩrãbe zedamarẽã dayirãbawara, odaita Jesuba zokʼada kĩrãkʼa.

8. ¿Kʼãrẽta ozebʉrʉ Daizeze pʉwʉrʉbara ẽbẽrarã jaraita Jesu beida jẽda kĩrãbe zedamarẽã? (Akʉra yi potora).

⁸ Daizeze pʉwʉrʉbara Jesu beida jẽda kĩrãbemarẽã ẽbẽrarã jarapanʉta dããraba. 1881ne mebẽrã Estados Unidosdebemaba jarasida ãba yi jʉredamarẽã Jesu beida jẽda kĩrãbedaita mebẽrã deda, maʉ̃ra osida Allegheny, (Pennsylvaniane). Maʉ̃ tẽa kongregasion aba abakaʉba jẽda kĩrãbesida Jesu beidara. Marzo 1940de mebẽrã jarasida, yi ẽbẽra Daizeze Bedʼea ũrĩkĩrãbʉra jaradamarẽã ãyibawara Jesu beida kĩrãbedamarẽã. 1960de Betelbara mawũã okata kongregasion jõmaʉ̃ʼa diasi karta zaketa Jesu beida jẽda kĩrãbepanʉma jʉ̃ẽmarẽã jarabʉta. Maʉ̃neba ʉ̃ta karta zake Jesu beida jẽda kĩrãbepanʉma akʉ jʉ̃ẽmarẽã diapanʉra, bio dedeka zebʉda ẽbẽrarã. ¿Kʼãrẽa zarea opanʉ ẽbẽrarã jaradiaita Jesu beida jẽda kĩrãbepanʉne akʉ jʉ̃ẽnamarẽã?

9, 10. ¿Kʼairaba nebia ũdupanʉ dayirãta zarea obʉbʉrʉ Jesu beida jẽda kĩrãbepanʉ ewaride jʉ̃ẽmarẽã jarapanʉbʉrʉ? (Juan 3:16).

⁹ Dayirãbara ẽbẽrarã jarapanʉ Jesu beida jẽda kĩrãbepanʉne akʉ jʉ̃ẽnamarẽã, ãya kʼawuadamarẽã wãrĩnuta Jeowa ʉ̃rʉ akʉza Jesu ʉ̃rʉ. Adewara ãya dayirãbari kʼãrẽ odata (akʉra Juan 3:16). Jesu beida jẽda kĩrãbepanʉ ewaride ãya ũrĩnaba akʉza akʉdaba kãgapanʉ ãyabida Jeowa ʉ̃rʉ audre kʼawuakĩrãnamarẽã. Mamina ãya awa nebia ũdupanʉ ẽ Jesu beida jẽda kĩrãbepanʉ ewaride wãpanʉ kʼarea.

 ¹⁰ Dayirãba jaraseapanʉ ẽbẽra Daizeze odebʉ kʉrãzadabida, Jesu beida jẽda kĩrãbepanʉ ewaride jʉ̃ẽnamarẽã. Mawũã opanʉ ãyaʼa kĩrãbebita Jeowabara ãyira wabida kãgabʉta. Mawũã ʉ̃kʉrʉra jʉ̃ẽbʉrʉdera dayirãra mejãcha sobiabʉ, mawũã ãyi Jesu beida jẽda kĩrãbepanʉ ewaride jʉ̃ẽbʉba kĩrãbebibʉ, kʼãrẽaba sobiabasita Jeowaba zokʼabʉ obaside. Akʉdaya Mónica berabaridata. c Iyara Daizeze Bedʼeara jẽda jaradia jʉ̃drʉsi COVID-19 berabarinʉmaside. Poaga 2021ne Jesu beida jẽda kĩrãbepanʉne jʉ̃ẽna tẽã, iya jarasi: «Naʉ̃ poagade Jesu beida jẽda kĩrãbedara mʉ̃itara audre yibiabasi. 20 poaga basi mʉ̃a ẽbẽrarã jaradia ẽã akʉza jarakaita jʉ̃ẽnamarẽã Jesu beida jẽda kĩrãbeita. Mawũẽra mʉ̃ra mejãcha zarea osi Jeowaʼa akʉza Jesuʼa biga diaita ãya mʉ̃ bari nekʼãrẽ oda kʼarea» (Sal. 103:1-4). Ẽbẽrarãba ũrĩkĩrãde ẽ mina, zarea ora Jesu beida jẽda kĩrãbepanʉ ewaride jʉ̃ẽnamarẽã jaraita. Dayirã zarea obʉra Jeowaba bia akʉbʉ baera.

11. ¿Sãwũã kʼarebabʉ Jeowabara Jesu beida jẽda kĩrãbemarẽã jarakapanʉra? (Ageo 2:7).

¹¹ Jeowabara dayirãra mejãcha kʼareba zebʉrʉ, zarea opanʉ baera ẽbẽrarã jaraita Jesu beida jẽda kĩrãbepanʉ ewaride jʉ̃ẽnamarẽã. Poaga 2021ne COVID-19de panasimina Jesu beida jẽda kĩrãbepanʉ ewaride jʉ̃ẽsida 21.367.603 ẽbẽrarãta. Mawũẽra ẽbẽrarã mejãcha jʉ̃ẽsida Jesu beida jẽda kĩrãbepanʉ ewaridera. Akʉza Jeowabara akʉbʉ maʉ̃ra ẽbẽra aba abakaʉta (Luc. 15:7; 1 Tim. 2:3, 4). Ĩjãnaibara Jeowabara dayirãra kʼarebabʉta ũdumarẽã ẽbẽrarã wãrĩnu iyi ʉ̃rʉ kʼawuakĩrãbʉta (akʉra Ageo 2:7).

12. ¿Kʼãrẽba zarea baseabʉ dayirãitara Jesu beida jẽda kĩrãbeita? (Akʉra potota)

¹² Jesubara jarasi naʉ̃ ewari jõbodoarera ũdudaita bedʼea zromara. Bari jaraita, dayirã mebẽrãinʉ yõnaita Daizeze kʼarea, pẽwãnaita, yõta ũdudaita akʉza kayasida ũdudaita (Mat. 10:36; Mar. 13:9; Luc. 21:10, 11). Edaʉde naʉ̃ba dayirãitara zareabʉ Jesu beida jẽda kĩrãbeita. ¿Kʼãrẽta obʉ ʉ̃kʉrʉ mebẽrãbara maʉ̃ bedʼea zroma awuantaita? akʉza ¿Jeowaba sãwũã kʼareba zebʉrʉ ãyira?

13. ¿Kʼãrẽ nebiata ũdusi Artiombara Jeowa kʼarebadeba iyita zarea osi baera karselde Jesu beida jẽda kĩrãbeita?

¹³ Karsel. Dayirã mebẽrã karseldebʉra nekʼãrẽ jõma obʉ Jesu beida jẽda kĩrãbedaita. Akʉdaya dayirã mebẽã Artiom yizata. Poaga 2020de Jesu beida jẽda kĩrãbei ewari ara babodoare iyira karselde bʉesida kuarto zakede, iyibawara basi ẽbẽrarã juesoma. Iyi karseldebasimina ũdusi nekʼãrẽ pan oita akʉza bino oita, mawũã Jesu beida jẽda kĩrãbeita akʉza krĩchasi diskurso diaita iyita. Mamina ẽbẽrarã iyi kʼawapananara bedʼea mitiata jarapanasi akʉza sigarriyota dopanasi. Maʉ̃ kʼarea iya widisi ora ababayeda maʉ̃ta oda ẽ marẽã. Ẽbẽrarã iyi kʼawapananabara ũrĩsida iyi bedʼeata. Artiomba jarasi: «Mʉ̃a jarasi ãyaʼa jara ũrĩbita Jesu beida jẽda kĩrãbepanʉ ʉ̃rʉ». Ãya maʉ̃ ʉ̃rʉ kʼawuakĩrã ẽ basimina ũrĩsida. Maʉ̃ba Artiomba Jesu  beida jẽda kĩrãbepanʉ ʉ̃rʉ jarada tẽã ãya widisida Jesu beida jẽda kĩrãbepanʉ ʉ̃rʉ.

14. ¿Mebẽrãbara kʼãrẽ zareata osida COVID 19 baeside Jesu beida jẽda kĩrãbedaita?

¹⁴ COVID-19. Naʉ̃ kaya zoma zeside Jeowa pʉwʉrʉrãra ãba yi jʉrebeda ẽ basi Daizeze Nokʼo ʉ̃rʉ bedʼeabari dedara Jesu beida jẽda kĩrãbedaita. Mamina maʉ̃ba iduaribi ẽ basi Jesu beida jẽda kĩrãbedaita. d Ʉ̃kʉrʉ kongregasion yi internet barabʉra ãba jʉresida internetʼneba Jesu beida jẽda kĩrãbedaita. ¿Sãwũã osida yi internet neẽãraba ũrĩmarẽãra? Ʉ̃kʉrʉ pʉwʉrʉdera Jesu beida jẽda kĩrãbebʉ ʉ̃rʉ diskurso diabʉra ũrĩbisida telebisordeba akʉza radiodeba. Sukursalraba 500 audre bedʼea awuara awuaraka grawasida naʉ̃ diskursora. Maʉ̃ta mebẽrã kʼẽrẽpabʉraba dedekasida, mawũã yi jĩgabʉrabida Jesu beida jẽda kĩrãbedamarẽã.

15. ¿Bʉara kʼãrẽta kʼawuaseabʉ Daizeze Bedʼea kʼawuabari Suedeba?

¹⁵ Dayi mebẽrãba iduaribida ẽãne Jeowade  oita. Ʉ̃kʉrʉ mebẽrãitara zare Jesu beida jẽda kĩrãbedaita yi mebẽrãba iduaribida ẽ baera. Akʉdaya kʼãrẽta berabarisita Daizeze Bedʼea kʼawuabarita yi trʉ̃ Sue. Poaga 2021ne Jesu beida jẽda kĩrãbeita ewari aba waebʉde, mebẽã iyaʼa Daizeze Bedʼea jaradiabʉa jarasi iyi deda Jesu beida jẽda kĩrãbebe ẽãta yi mebẽrãba kãga ẽ baera. Aramaʉ̃ta mebẽãbara iyaʼa le ũrĩbisi Daizeze Bedʼeade Lucas 22:44​ba jarabʉta. Maʉ̃ tẽã iya jara ũrĩbisi dayirã bedʼea zroma erbʉdera Jesude kĩrãkʼa oibarata akʉza Jeowaʼa yiwidʼibarata, adewara iyi ʉ̃rʉ ĩjãibarata. Maʉ̃ nrʉemane Suebara diapeda ãba yi jʉrebari Jesu beida kĩrãbebarita akʉsi jw.org de. Maʉ̃ tẽã iya jʉrʉsi panta akʉza binota mawũã Jesu beida jẽda kĩrãbeita. Jesu beida jẽda kĩrãbepanʉ ewaride iyara telepononeba ũrĩsi maʉ̃ra. Tẽãne Sueba bʉsi Daizeze Bedʼea jaradiabariʼa: «Bʉa nʉweda mʉ̃aʼa so zarea diasi akʉza mʉ̃ra nekʼãrẽ jõma osi Jesu beida jẽda kĩrãbeita, adewara Jeowaba mʉ̃ta kʼarebasi, maʉ̃ kʼarea mʉ̃ra mejãcha sobiabʉ». ¿Ĩjãbʉka Jeowaba kʼarebaita bʉa naʉ̃ bedʼea zroma kĩrãkʼabʉta ũdubʉrʉde?

16. ¿Kʼãrẽa ĩjãseapanʉ Jeowaba nebia diaita zarea opanʉbʉrʉ Jesu beida jẽda kĩrãbedaita? (Romanos 8:31, 32).

¹⁶ Jeowabara bia akʉbʉ dayirã zarea obʉra Jesu beida jẽda kĩrãbedaita. Ĩjãnaibara Jeowabara dayirã nebia diaita dayirãba iyaʼa biga diapanʉ baera, iya dayirã bari oda kʼarea (akʉra Romanos 8:31, 32). Mawũẽra zarea odaibara Jesu beida jẽda kĩrãbepanʉ ewaride wãnaita. Akʉza krĩchadaibara audre Jeowaita odaita, Jesu beida jẽda kĩrãbepanʉ nãã akʉza maʉ̃ tẽãbida.