1-2. Saide we go na a Membeefesa ala yali?

 PIKINMOO wan sani fu 2000 yali kaba Yesesi kon dede gi libisama. A sani di a du ya meke u fende a okasi fu libi fu teego. A neti fosi Yesesi dede, a be taigi den bakaman fi en taki den mu membee a dede fi en. Den be mu holi a fesa ya anga beele anga win.​—1 Kor. 11:23-26.

² We soi taki u lobi Yesesi anga u hii ati, te we du a sani di a be taigi den bakaman fi en (Yoh. 14:15). Te a Membeefesa e koosube, we soi taki we teke a sani di Yesesi du gi u fu bigi, te we teke ten pakisei san a dede fi en wani taki gi libisama. We soi tu taki ai bigi gi u, te we kai ala sama di u poi fu kon membee a dede fu Yesesi makandaa anga u. Boiti dati, we du ala san u poi fu nawan sani á tapu u fu go na a Membeefesa.

3. San wo luku aini a artikel ya?

³ Aini a artikel ya, wo luku dii fasi fa a foluku fu Yehofa e meke moiti fu membee a dede fu Yesesi. (1) Den e meke moiti fu holi a Membeefesa enke fa Yesesi be taki. (2) Den e kai taawan fu kon na a Membeefesa. (3) Den e du ala san den poi fu de na a Membeefesa winsi aa makiliki.

4. San we leli te u go na a Membeefesa? Saide u mu soi taki den sani di we leli e bigi gi u? (Lukasi 22:19, 20)

⁴ Ala yali te a Membeefesa e holi, we aliki wan lezing di e piki omen akisi di sama e wani sabi. We leli saide  Yesesi be mu kon dede gi u, anga fa a dede fu wan sama namo sa meke omen sama fende paadon fu sondu. Den e membee u tu sama a den sama di e nyan a beele efuso diingi a win, anga san a beele anga a win wani taki. (Leisi Lukasi 22:19, 20.) We pakisei den somen belesi tu di den sama di abi a howpu fu libi fu teego a goontapu ya o fende (Yes. 35:5, 6; 65:17, 21-23). U mu soi taki ala den sani ya e bigi gi u. A omen sama nai fusutan a sani ya, neen meke den nai teke en fu bigi taki Yesesi kon dede gi u. Boiti dati, den nai membee a dede fu Yesesi enke fa a be leli den bakaman fi en. Saide u sa taki a sani ya?

5. Fa omen sama bigin membee a dede fu Yesesi baka di gaanse fu den apostel dede?

⁵ Baka di gaanse fu den apostel dede, falisi Kelesten be kon aini a kemeente (Mat. 13:24-27, 37-39). Den be ‘e leli taawan falisi sani, soso fu meke den disipel waka a den baka’ (Toli 20:29, 30). Wan fu den ‘falisi sani’ di den falisi Kelesten be e leli sama, a taki Yesesi á be kon dede wan leisi namo gi libisama fu den be sa fende paadon fu den sondu enke fa a Beibel e taki. Den be taki a omen leisi a be mu du a sani ya (Heb. 9:27, 28). A omen sama e biibi a lei ya ete. Den e go a keliki ala wiki, efuso ala dei fu membee a dede fu Yesesi. Den taa keliki e membee a dede fu Yesesi tu, ma gaanse fu den sama ya á sabi san a dede fu Yesesi wani taki. Son sama di e go a keliki e denki taki a beele anga a win e kengi kon toon Yesesi sikin anga en buulu. Son sama e akisi denseefi taki: ‘A dede fu Yesesi wani taki mio fende paadon fu mi sondu tuutuu?’ Saide den e poti a akisi ya? Son yuu a den sama di nai biibi taki a dede fu Yesesi poi meke u fende paadon fu u sondu, e koli den. Ma den bakaman fu Yesesi e yeepi sama fu kon sabi san a dede fi en wani taki. Den e yeepi den tu fu membee a dede fu Yesesi leti enke fa a be leli den bakaman fi en.

6. San wantu Beibel Ondoosukuman be kon fusutan aini a yali 1872?

⁶ Aini a yali 1870 wan kulu sama bigin sutudeli Beibel fayafaya. A Charles Taze Russell be e teke fesi na a kulu ya. Den be wani sabi sowtu wini a dede fu Yesesi abi gi libisama, anga fa den mu membee a dede fi en. Aini 1872, den be fende a piki aini Beibel taki Yesesi dede fu pai fu sondu gi ala sama. Di den kon sabi a sani ya, den á holi en gi denseefi. Ma den be bigin paati a nyunsu ya anga yeepi fu buku anga kolanti. Aa langa baka dati neen den bigin kon makandaa wan leisi aini wan yali fu membee a dede fu Yesesi leti enke den fosi Kelesten.

7. Sowtu wini we fende fu a sani di den Beibel Ondoosukuman be kon fusutan?

⁷ A omen wini we fende fu a sani di den Beibel Ondoosukuman be kon fusutan omen yali pasa. Saide u sa taki a sani ya? Yehofa yeepi u fu sabi saide Yesesi be mu dede, anga sowtu wini u sa fende fu a dede fi en (1 Yoh. 2:1, 2). Beibel e leli u tu taki a tu kulu sama o fende wini fu a dede fu Yesesi. Wantu sama o fende a okasi fu go a hemel. Den sama ya naw poi dede moo. Ma miliyunmiliyun sama o fende teego libi a goontapu ya. Te we pakisei fa Yehofa  soi taki a lobi u, a sani ya e meke wi anga en toon moo bun mati. We moo lobi en tu te u pakisei den wini di we fende fu a dede fu Yesesi (1 Peit. 3:18; 1 Yoh. 4:9). Neen meke leti enke den Beibel Ondoosukuman, we du ala san u poi fu kai sama fu kon membee a dede fu Yesesi makandaa anga u.

8. San a foluku fu Yehofa du fu kai sama kon na a Membeefesa? (Luku a fowtow.)

⁸ Na a tide a foluku fu Yehofa e kai sama fu kon na a Membeefesa. Aini a yali 1881, a be sikiifi aini A Wakititolen taki baala anga sisa fu Ameekankondee be sa kon makandaa a wan osu fu wan baala a Allegheny, Pennsylvania, fu membee a dede fu Yesesi. Bakaten ala kemeente be e holi a Membeefesa. Aini maart 1940, den baala be gi ala peleikiman taanga-sikin fu kai sama fu kon na a Membeefesa. Aini 1960, Betel be meke pampila fu a fosi leisi fu kai sama kon na a Membeefesa. Senten a ten de, a miliyunmiliyun pampila u paati fu kai sama fu kon membee a dede fu Yesesi anga u. Saide we meke moiti so fu kai sama kon na a Membeefesa?

9-10. Sama e fende wini fu a moiti di we meke fu kai sama kon na a Membeefesa? (Yohanisi 3:16)

⁹ A omen sama e kon na a Membeefesa fu a fosi leisi. U wani den sama ya kon sabi san Yehofa anga Yesesi du gi den, neen meke we kai den. (Leisi Yohanisi 3:16.) Te den o kon na a Membeefesa, a omen sani den o si. Den o yee omen sani na a lezing tu. We howpu  taki den sani ya o yeepi den fu kon dini Yehofa. Ma taa sama e fende wini tu.

¹⁰ We gi den baala anga sisa di nai kon a komakandaa moo wan kai tu. We du a sani ya fu di u wani den sabi taki Yehofa lobi den ete. A omen fu den e kon te u kai den. Ná pikin piisii we piisii te den kon. Te den kon na a Membeefesa, a sani ya e meke den pakisei fa den be e piisii di den be e dini Yehofa. Meke u luku a toli fu Monica. b A sisa ya bigin peleiki baka na a ten fu a korona siki. Baka di a kon na a Membeefesa aini 2021, a taki: ‘Noiti mio feegete a Membeefesa ya. Baka wan sani fu 20 yali, mi be abi a okasi fu peleiki baka. Mi be man kai sama fu kon na a Membeefesa. Mi be du ala san mi poi fu kai sama kon na a Membeefesa, bika a sani di Yehofa anga Yesesi du gi mi e bigi gi mi tuutuu’ (Ps. 103:1-4). Winsi son sama nai kon te u kai den, toku we tan meke moiti fu kai ala sama di u poi bika u sabi taki Yehofa e teke en fu bigi taki we meke moiti fu kai sama.

11. Fa Yehofa e belesi a moiti di we meke fu kai sama kon na a Membeefesa? (Hakai 2:7)

¹¹ Yehofa e belesi a moiti di we meke fu kai sama kon na a Membeefesa. Winsi fa wa be poi peleiki enke faw be gwenti aini 2021, toku a 21.367.603 sama kon na a Membeefesa. A beina tu anga afu fu ala den Kotoigi di de a hii goontapu. U sabi taki Yehofa nai luku namo taki tyaipi sama kon, ma ai poti pakisei a ibiiwan fu den sama ya tu (Luk. 15:7; 1 Tim. 2:3, 4). U sa biibi taki te we kai sama fu kon na a Membeefesa, Yehofa e yeepi u fu fende sama di ati bun.​—Leisi Hakai 2:7.

12. San a wantu sani di sa meke a taanga gi u fu membee a dede fu Yesesi? (Luku a fowtow.)

¹² Yesesi be taki a omen sani be o miti wi aini den lasiti dei. Son yuu u famii ati e boon fu di we dini Yehofa. Son Kotoigi e tan a kondee pe feti e feti. Son yuu a siki e booko na a pisi pe we tan, anga omen taa sani ete (Mat. 10:36; Malik. 13:9; Luk. 21:10, 11). Den sani ya sa meke a taanga gi u fu membee a dede fu Yesesi. San son baala anga sisa du fu pasa den tesi ya? Fa Yehofa yeepi den?

13. Fa Yehofa belesi a deki-ati di Artem soi anga a moiti di a meke fu holi a Membeefesa di a be de a sitaafu-osu?

¹³ Den baala anga sisa di de a sitaafu-osu. Den baala anga sisa fu u di de a sitaafu-osu e du ala san den poi fu membee a dede fu Yesesi. Luku a toli fu Artem. A pisiten fu a Membeefesa fu 2020, den be sooto en aini wan pikin kambaa makandaa anga feifi taa sitaafuman. Winsi fa a be de a sitaafu-osu, a be meke moiti fu fende son sani di a be abi fanowdu fu holi a Membeefesa. A be o holi a lezing gi enseefi tu. Ma den taa sitaafuman be e somoko, den be lobi kosi tu. San a baala ya du? A akisi den taa sitaafuman efu den sa tan wan yuu langa sondee fu kosi efuso somoko. Artem foondoo di den taigi en taki den naw somoko efuso kosi te ai holi a Membeefesa. Artem taki: ‘Mi be wani taigi den san na a Membeefesa.’ Winsi fa den á be wani aliki,  toku di den si fa Artem holi a Membeefesa anga a lezing, a omen sani den akisi en.

14. Sowtu moiti a foluku fu Yehofa meke fu holi a Membeefesa na a pisiten fu a korona-siki?

¹⁴ A pisiten fu a korona-siki. Di a korona-siki paati a hii goontapu, wa be poi kon na a wan fu holi a Membeefesa. Ma a sani ya á be tapu u fu holi a Membeefesa. Son kemeente be seeka sani fu holi a Membeefesa a internet. Ma fa den baala anga sisa di á be abi internet be e holi a Membeefesa? Aini son kondee, den baala be seeka sani fu daai a lezing a tv efuso laadiyow. Boiti dati, den beikantoo be fanga a lezing aini moo enke 500 tongo gi den sama di be e tan faawe. Te den be fanga en, da den baala be e seeka sani fu tyai a lezing go gi den baala anga sisa di be abi en fanowdu.

15. San a toli fu a Beibelsutudi di den e kai Sue e leli i?

¹⁵ Te u famii á wani u dini Yehofa. Somen sama a den famii e tapu den fu go na a Membeefesa. Luku a toli fu wan  Beibelsutudi den e kai Sue. A dei fosi a Membeefesa fu 2021, Sue taigi a sisa di be e sutudeli anga en taki den sama fi en á wani a kon na a Membeefesa, neen meke a naw poi kon. A sisa di be e sutudeli anga en leisi Lukasi 22:44 gi en, neen a taigi en taki te tesi e miti u, u mu begi Yehofa da u fitoow en leti enke Yesesi. A taa dei, Sue seeka a beele anga a win, neen a luku a deiwowtu di den baala be poti a internet a dei fu a Membeefesa. A neti de, en wawan luku a Membeefesa neen telefon aini en kambaa. Bakaten, Sue sikiifi gi a sisa di be e sutudeli anga en taki: ‘Ná pikin taanga-sikin i gi mi eside. Mi du ala san mi poi fu de na a Membeefesa, neen Yehofa belesi a moiti fu mi. Ai bigi gi mi tuutuu taki mi be man de na a Membeefesa!’ I si enke Yehofa poi yeepi i tu efu aseefi sani ya miti i?

16. Saide u sa biibi taki Yehofa o belesi a moiti di we meke fu de na a Membeefesa? (Romesama 8:31, 32)

¹⁶ Yehofa e teke en fu bigi te a si a moiti di we meke fu membee a dede fu Yesesi. U sa biibi taki aw belesi u te we soi taki a sani di a du e bigi gi u. (Leisi Romesama 8:31, 32.) Neen meke u mu du ala san u poi fu go na a Membeefesa a yali ya. U mu meke moiti fu du moo gi Yehofa na a pisiten fu a Membeefesa tu.