1-2. Poukwa nou ka vin adan Mémoryal-la chak lanné ?

 NI 2000 an dè sa apépré, Jézi bay vi a-y pou nou. É grasa sa, nou pé viv pou touttan. Lannuit-la avan jou-la i mò la, i mandé disip a-y sonjé sa i fè pou montré-yo jan i té enmé-yo. Pou sa, i di-yo kontinyé fè on ti sérémoni tousenp é kontinyé sèvi èvè pen é diven pannan sérémoni-lasa (1 Kor. 11:23-26).

² Si nou ka fè sa Jézi mandé-nou fè, sé pas nou enmé-y onlo toubònman (Jan 14:15). Chak lanné, pannan péryòd a Mémoryal-la, nou ka montré Jézi jan nou ni rèkonésans pou sa i fè pou nou lèwvwè nou ka pran tan réfléchi asi sa mò a-y ka pòté ba lézimen toupannan nou ka priyé. Anplisdisa, nou kontan pasé plis tan an prédikasyon pou envité on maksimòm dè moun pou yo vin adan évènman enpòwtan lasa èvè nou. É asirésèten, nou byen désidé a vin adan Mémoryal-la é nou vé fè ansòt pou ayen pa anpéché-nou fè sa.

3. Ka nou ké vwè adan awtik-lasa ?

³ Sèwvitè a Jéova ka ba konmémorasyon a mò a Jézi onlo enpòwtans toubònman. Adan awtik-lasa, nou ké vwè 3 mannyè yo ka montré sa : 1) yo ka sélébré Mémoryal-la kon Jézi aprann-yo fè-y, 2) yo ka envité lézòt adan Mémoryal-la, é 3) yo ka sélébré Mémoryal-la menm lèwvwè yo adan dé sitiyasyon ki difisil.

4. Chak lanné nou ka tann sèwten biten adan diskou a Mémoryal-la. Ki biten ésa é poukwa fò-nou ba sé biten-lasa onlo valè ? (Lik 22:19, 20).

⁴ Chak lanné, pannan Mémoryal-la, nou ka tann on diskou ki bazé asi Labib é ki ka réponn a plizyè kèsyon. Adan diskou-lasa, yo ka èspliké-nou poukwa limanité bizwen on ranson é kijan mò a onsèl nonm ka pèwmèt Bondyé padonné péché a onlo moun asi latè. Adan diskou-lasa, yo ka fè-nou sonjé osi ka pen-la é diven-la ka rèprézanté é kimoun ki pé pran-yo (li Lik 22:19, 20). É pannan diskou-lasa, nou ka réfléchi asi bèl landèmen-la ki ka atann moun ki ké viv asi latè pou touttan (Iz. 35:5, 6 ; 65:17, 21-23). A pa paskè nou konnèt sé vérité-lasa pou nou pa ba-yo valè ankò. Ni milya é milya moun ki pa konnèt sé biten-lasa é ki pa konnèt jan sakrifis a Jézi ni valè. Anplisdisa, ni sa adan yo ki ka sélébré Mémoryal a mò a Jézi men yo pa’a fè-y kon Jézi ka mandé. Poukwa nou ka di sa ?

5. Tibwen tan apré lamajorité a sé apòt-la mò, kijan sé moun-la koumansé sélébré mò a Jézi ?

⁵ Kèlkètan apré lamajorité a sé apòt-la mò, ni enpé fo krétyen ki rantré adan lasanblé-la (Mat. 13:24-27, 37-39). Yo « simé ansègnman ki ka kouyonné moun pou fè sé disip-la suiv-yo » (Akt 20:29, 30). Pa ègzanp, alòskè Labib ka anségné kè Kris « ofè vi a-y onsèl fwa pou i té pé sa pòté péché a onlo moun », yo, a pa sa yo té ka anségné. Yo té ka di kè fò Jézi té sakrifyé vi a-y toutlè pas pou yo onsèl fwa pa té ni asé (Ébr. 9:27, 28). Jòdila, ni onlo moun ki sensè ki ka kwè sé fo-ansègnman-lasa. Yo k’ay légliz chak simenn pou sélébré sa yo ka kriyé « Le sacrifice de La Messe b ». É jous ni sa ki ka fè sa chakjou. Adan dòt rèlijyon ankò, ni moun ki ka sélébré mò a Jézi tibwen mwens ki séla nou palé talè la men lamajorité adan yo pa’a konprann ka sakrifis a Jézi vé di vréman. Ni sèwten ki ka mandé-yo : « Ès Bondyé pé padonné péché an mwen poudèbon grasa sakrifis a Jézi ? » Poukwa yo ka pozé-yo kèsyon-lasa ? Pas yo ka tann moun ka di kè Bondyé pé pa padonné péché an nou menmsi Jézi mò é délè yo ka pran sa pou lajan-kontan. Kijan vré disip a Jézi fin pa touvé lavérité asi sijé-lasa é kijan yo fè moun alantou a yo sav sa ?

6. An 1872, ki biten on gwoup a étidyan a Labib rivé konprann ?

⁶ An fen a 19^èm syèk-la, on gwoup a étidyan a Labib mèt-yo ka fouyé an nannan a Bib-la. É antèt a gwoup-lasa té ni Charles Russell. Yo té ka éséyé konprann ka sakrifis a Jézi té yé vréman é kijan pou yo té konmémoré mò a-y. An 1872, yo rivé konprann kè Jézi vréman bay vi a-y an ranson pou sové tout limanité. Men yo pa gadé sa pou yo tousèl. Yo fè liv, jounal é awtik pou fè moun sav sa. Lèwgadé, yo mèt-yo ka sélébré Mémoryal-la onsèl fwa an lanné-la, kon sé prèmyé krétyen-la té ka fè é yo pa pèd tan pou fè sa.

7. Ni lontan dè sa, frè Charles Russell é moun ki té ka kolaboré èvè-y mèt-yo ka fè rèchèch adan Labib. Ka sé rèchèch-lasa ka pòté pou nou jòdila ?

⁷ Sa ja ka fè on bon moman kè sé krétyen-lasa fè sé rèchèch-lasa, men jòdijou sa ka pòté onlo bon biten pou nou. Jéova wouvè zyé an nou pou édé-nou konprann ka sakrifis a Jézi vé di é dè ki biten nou pé bénéfisyé  grasa sakrifis-lasa (1 Jan 2:1, 2). Nou aprann osi kè Labib ka palé dè 2 èspérans pou moun ki ka fè Bondyé plézi : ni sa ki ké viv an syèl-la é ki pé’é pé mò ankò é ni milyon é milyon moun ki ké viv pou touttan asi latè. Lè nou ka vwè jan Jéova enmé-nou é tousa bon biten sakrifis a Jézi ka pwokiré-nou pèwsonèlman, nou ka anvi vin pli bon zanmi èvè Bondyé (1 Pyè 3:18 ; 1 Jan 4:9). Sé pousa, nou vlé envité toutmoun vin sélébré Mémoryal-la èvè nou jan-la Jézi aprann-nou fè-y la. Konsa, nou ka fè menm biten ki frè an nou ki té fidèl é ki té ka viv an tan lontan.

8. Ka sèwvitè a Jéova ja fè pou envité moun an Mémoryal-la ? (gadé imaj-la).

⁸ Sa ja ka fè on bèl moman kè sèwvitè a Jéova ka envité moun vin an Mémoryal-la. An 1881, adan Tou dè Gad la, té ni on envitasyon pou tout frè é sè ki té ka rété Ozétazini vin sélébré Mémoryal-la aka on frè a Allegheny an Pennsylvanie. Aprésa, tout sé lasanblé-la koumansé sélébré Mémoryal-la. An Maws 1940, yo di sé pwoklamatè-la kè dépi ou vwè lavérité té ka entérésé on moun adan téritwa a yo, yo té pé envité-y adan Mémoryal-la. An 1960, Bétèl-la enprimé envitasyon pou sé lasanblé-la envité moun vin an Mémoryal-la. Sé té prèmyé fwa sa té ka fèt. É dépi sa, yo ja distribiyé milya é milya envitasyon pou évènman-lasa. Men poukwa nou ka fè tousa éfò pou envité moun vin an Mémoryal-la ?

9-10. Kimoun nou ka envité an Mémoryal-la é poukwa nou pé di kè sa ka fè-yo dibyen ? (Jan 3:16).

⁹ On biten ki ka fè si nou ka envité moun adan Mémoryal-la sé kè nou vlé sé moun-la  ki ka vin an Mémoryal-la pou prèmyé fwa aprann sa Jéova é Jézi fè pou nou (li Jan 3:16). Nou ka èspéré kè sa yo ké vwè é kè sa yo ké tann ké ba-yo anvi aprann plis biten ankò é kè sa ké ba-yo anvi vin Témwen a Jéova. Men ni dòt moun ankò ki ka bénéfisyé dè envitasyon an nou.

¹⁰ Nou ka envité moun ki inaktif osi adan Mémoryal-la. Nou ka fè sa pou fè-yo sonjé kè Jéova enmé-yo toujou. Ni onlo ki ka aksèpté vin adan Mémoryal-la, é nou kontan vwè-yo toubònman. Souvantfwa, lèwvwè yo ka vin an Mémoryal-la, yo ka sonjé jan yo té ni tchè-kontan lèwvwè yo té ka sèvi Jéova. An-nou vwè ègzanp a Monica c. I woukoumansé préché pannan pandémi a Covid-19 la. An 2021, i vin an Mémoryal-la é apré mi sa i di : « An pé’é jen oubliyé Mémoryal-lasa. An préché ba moun é an envité-yo adan Mémoryal-la alòskè sa té ka fè 20 an kè an poto’o préché. An fè sa èvè tout tchè an mwen pas an ni onlo rèkonésans pou tousa Jéova é Jézi fè ban mwen » (Sòm 103:1-4). Ki moun aksèpté, ki moun pa aksèpté envitasyon an nou, nou ka pòté bon mannèv pou nou envité on maksimòm dè moun a vin an Mémoryal-la paskè nou sav kè tout sé éfò-la nou ka fè la ka fè tchè a Jéova kontan.

11. Kijan Jéova béni éfò an nou pou envité on maksimòm dè moun adan Mémoryal-la ? (Ajé 2:7).

¹¹ Jéova béni éfò an nou toubònman pou envité moun adan Mémoryal-la. An 2021, akòz dè pandémi a Covid-19 la, ni onlo biten ki pa té posib men magrésa 21 367 603 moun sélébré Mémoryal-la èvè nou. Sé 1^é fwa té ni tousa moun. Sa ka fè près 2 fwa é dèmi kantité Témwen a Jéova ki ni asi latè. Nou ka tou konprann kè a pa kantité moun ki ka vin adan Mémoryal-la ki ka entérésé Jéova, men sé sé moun-la ki la la Jéova ka gadé (Lik 15:7 ; 1 Tim. 2:3, 4). Nou sèten kè lè nou ka envité moun adan Mémoryal-la, Jéova ka sèvi èvè sa pou édé-nou touvé moun tchè a yo sensè (li Ajé 2:7).

12. Ki difikilté nou pé rivé a jwenn pou nou vin an Mémoryal-la ? (gadé imaj-la).

¹² Jézi té ja anonsé kè pannan sé dènyé jou-la, nou té’é jwenn tout kalité difikilté. Pa ègzanp, fanmi an nou té’é kont nou, nou té’é jwenn pèwsékisyon, té’é ni lagè, té’é ni maladi ki ka kouri tibwen toupatou asi latè (Mat. 10:36 ; Mawk 13:9 ; Lik 21:10, 11). Délè, fò-nou andiré sé sitiyasyon-lasa oben dòt ankò pou nou vin an Mémoryal-la. An-nou vwè kijan sèwten adan frè é sè an nou rivé about a sé difikilté-lasa é kijan Jéova édé-yo.

13. Artem té byen désidé a sélébré Mémoryal-la pannan i té lajòl é i aji èvè onlo kouraj. Kijan Jéova béni-y ?

¹³ Lè nou lajòl. Frè é sè an nou ki lajòl akòz dè fwa a yo, ka fè sa yo pé pou sélébré anivèwsè a mò a Jézi. Sé sa on frè non a-y sé Artem fè. An 2020, pannan sé simenn-la ki avan Mémoryal-la é pannan sé simenn-la ki vin apré la, i té lajòl adan on pyès ki té ka fè 17 mèt-karé é délè yo té ka fèmé 4 ou 5 prizonyé anmenmtan adan ti pyès-lasa. Magré i té lajòl, i itilizé sa ki té anba men a-y pou sèvi-y pen é pou sèvi-y diven é i désidé fè diskou-la limenm a-y. Men sé moun-la yo té fèmé èvè-y la té ka fimé é yo té ka jiré onlo. Alò, ka i fè ? I mandé-yo si yo té dakò pou arété fimé é pou arété jiré pannan inèdtan sèlman. Yo di-y wi. Artem pa té ka atann-li a sa ! Mi sa i ka di : « An mandé-yo si yo té’é  vlé kè an ba-yo déotwa ti èsplikasyon anrapò èvè Mémoryal-la. » Yo pa té vlé, men apré yo vwè Artem sélébré Mémoryal-la é apré yo tann diskou a-y, yo pozé-y onpakèt kèsyon.

14. Kijan Témwen a Jéova sélébré Mémoryal-la pannan pandémi a Covid-19 la ?

¹⁴ Pandémi a Covid-19 la. Akòz dè pandémi-lasa, Témwen a Jéova pa té pé sanblé pou sélébré Mémoryal-la. Men sa pa anpéché-yo sélébré Mémoryal-la d. Pou tousa ki ni Entèwnèt, sé lasanblé-la òwganizé-yo pou sé frè é sè la té pé sa sélébré Mémoryal-la pa vidéokonférans. Men ni milyon é milyon frè é sè ki pa ni Entèwnèt. É yo, kijan yo fè ? Filyal a sèwten péyi fè ansòt pou yo pasé diskou-la an télé-la oben an radyo-la. Sé filyal-la anrèjistré diskou-la an plis ki 500 lang osi pou moun ki ka viv dé koté ki on ti jan apa pé sa sélébré Mémoryal-la osi. É ni frè ki ay pòté anrèjistrèman-la ba séla ki té bizwen la.

15. Ka ègzanp a on étidyan non a-y sé Sue ka aprann-nou ?

 ¹⁵ Lè fanmi an nou ka anpéché-nou sèvi Jéova. Pou sèwten moun, pi gwo difikilté yo ni a janmbé pou ay adan Mémoryal-la, sé lè fanmi a yo kont yo pas yo vé pa yo sèvi Jéova. An-nou palé dè Sue on madanm ki ka étidyé Labib. An 2021, 1 jou avan Mémoryal-la, i di sè-la ki té ka fè étid a-y kè i pé’é pé pran Mémoryal-la pas akaz a-y ni sèwten moun ki vé pa i sèvi Jéova. Sè-la li Lik 22:44 ba-y. Aprésa, i èspliké-y kè lèwvwè nou ka jwenn difikilté, fò-nou suiv ègzanp a Jézi, kivédi fò-nou priyé Jéova pou di-y tousa nou ka rèsanti é fò-nou fè-y konfyans a san pou san. Lèlandèmen-la, Sue préparé pen-la é diven-la é i gadé adorasyon a lèmaten ki ka pasé jou a Mémoryal-la. Lèswa-la, i ay adan chanm a-y é i rivé suiv tout program a Mémoryal-la asi téléfòn a-y é ponmoun pa di-y ayen. Aprésa, mi sa Sue maké pou sè-la : « Ou ankourajé-mwen toubònman yè. An fè tousa an té pé pou pran Mémoryal-la é Jéova fè rèstan-la. Mésyé, a pa ti kontan an kontan ! » É vou, ès ou pa’a pansé kè Jéova ké édé-w si ou ka jwenn on sitiyasyon konsa ?

16. Poukwa nou pé sèten kè Jéova ké béni sé éfò-la nou ké fè la pou nou vin adan Mémoryal ? (Women 8:31, 32).

¹⁶ Nou ka fè onlo éfò pou nou pé sa vin an Mémoryal-la é Jéova ka ba sé éfò-lasa onlo valè toubònman. Lèwvwè nou ka montré Jéova jan nou ni rèkonésans pou sa i fè pou nou, i ka vwè sa é i ka béni-nou (li Women 8:31, 32). Alò, fò-nou byen désidé a vin an Mémoryal-la lanné-lasa. É dépi nou pé, fò-nou byen désidé a fè plis pou Jéova pannan sé simenn-la ki avan Mémoryal-la é pannan sé simenn-la ki ké vin apré la.