1-2. Éé ní ea náa vaá è ólò sí kẽè Sẹ̀lẹ̀nù Ge Kẽ̀èa Boo Ú Kráìst buù gbáá ẹ́?

 NÚ EA é láá dú 2,000 gbáá ea kil nvéeá, Jíízọ̀s beè tú a dùm ne boo beéle, vaá kùùlà èèlè nèi kọbé è láá ié dùm e bè náa tá. Kà lèlà dee ea zilà dú deé e bà fẹ́ẹá, Jíízọ̀s beè kọ́ nè pá a gbò nyoone nvée kọ bàá kẽ̀èa boo a ú vààa gyọ́ọ tení dú ló gè tú míí nè fétúlú sẹ̀ẹ̀mà sẹ̀lẹ̀nù ea válí báí.​—⁠1 Kọ́r. 11:​23-26.

² È ólò gbàntṍ ló log Jíízọ̀s boo béè kọ è palàge vùlèe. (Jọ́ọ̀n 14:15) Buù gbáá, tṍó e Sẹ̀lẹ̀nù Ge Kẽ̀èa Boo Ú Kráìst ni lée, è ólò zogè kọọ̀ nyíéi ẹ́ẹ ló nú ea náa nèi tení dú ló gè bugi togó boo vaá tã̀àgã ló Bàrì kilma ló nú ea ú tõó dọ̀ kilma ló gbò nen. È ólò zogè nàgé kọọ̀ nyíéi ẹ́ẹ tení dú ló gè bọ̀ọ̀vẹ̀ gbàà bẹẹ sìtóm kọ̀ kpẹ̀a, vaá kolí gã́bug nen kọ bàá gbaaáí ló sí kẽè nakà kele íb sẹ̀lẹ̀nùí. Mm̀ kà kà, è béèlàfùl kọọ̀ née é zigà kọọ̀ tọ́ọ̀ nu á kpègìi lọl ló gè sí kẽè Sẹ̀lẹ̀nù Ge Kẽ̀èa Boo Ú Kráìst.

3. Éé ní eé ló bel boo mm̀ nakà togó belí é?

³ Mm̀ nakà togó belí, èé ló bel boo taà sĩ́deè e gbò níí Jìhóvà ólò pììgà bé e ba kpóó sim tùlà naa gè láá sí kẽè Sèlẹ̀nù Ge Kẽ̀èa Boo Ú Kráìst: (1) è ólò sẹlẹ Sẹ̀lẹ̀nùí gbõ̀ònà bé e Jíízọ̀s beè sẹlẹ naa, (2) è ólò kolí dõòna gbò siimá kẽ, vaá (3) è ólò sí kẽè Sẹ̀lẹ̀nùí bã̀àna tṍó e di kèbá tàvàlà dìtõ̀ò.

4. Mókà gbò kà kà bel ní e bà ólò baatẽ́ gbẹá kẽè Sẹ̀lẹ̀nù Ge Kẽ̀èa Boo Ú Kráìst buù gbáá ẹ́, vaá éé ní ea náa vaá náa bọ́ló kọ é ẹ̀b gbò kà kà belí tẹlẹ kẽ ẽ́? (Lúùk 22:​19, 20)

⁴ Buù gbáá gbẹá kẽè Sẹ̀lẹ̀nù Ge Kẽ̀èa Boo Ú Kráìst, è ólò pãane tṍ ló lòbèl ea dẹẹ̀a boo Kpá Káí, vaá à ólò aalá gã́bug  bíb. È ólò nó nú ea náa vaá gbò nen à ié bíi ló ààa nè bé e ú enè nen é láá aalá gã́bug nen naa. Bà ólò kẽeí nyíe nú e fétúlú nè mííá tõó dọ̀ nè gbò ea bọ́ló kọ bàá dè. (Bugi Lúùk 22:​19, 20.) Vaá è ólò bugi togó boo gbò tã́áná dee bá e gbò e bà íe ból dẽesĩ́ gè tõó dùm boo kunukẽ̀í é íé dì deèsĩ́. (Àìz. 35:​5, 6; 65:​17, 21-23) Náa bọ́ló kọ é ẹ̀b gbò kà kà belí tẹlẹ kẽ. Gã́bug dẹ̀ gbò nen náa dã́ból ló nuí, vaá bà náa nyímá bé e ú Jíízọ̀s dọ bélè nèi naa. Bà náa ólò sẹlẹ nagé Sẹ̀lẹ̀nù Ge Kẽ̀èa Boo Ú Kráìst belí bé e Jíízọ̀s beè kọọ̀ pá a gbò nyòòne nvée á sẹlẹ naa. Éé ní ea náa à dì naa vó é?

5. Tṍó e gã́bug gbò tóm Jíízọ̀s ni ú lọ̀l, mósĩ́ deè ní e gbò nen beè gbóó dààmà togó gè sẹlẹ Sẹ̀lẹ̀nù Ge Kẽ̀èa Boo Ú Kráìst e?

⁵ Pọ́ì ńkem̀ tṍó aa ló tṍó e gã́bug gbò tóm Jíízọ̀s ni ú, gbò e bà kpọ́á kyáá bel ló kọ bà gé nyoonèè nvéè Kráìst beè gbóó bã mm̀ bõ̀ònatõ̀ò Bàrì. (Máát. 13:​24-27, 37-39) Ba beè kpọ́ kyáá bel kọbé “gbò e bà ólò nyoone nvéè Jíízọ̀s á aàẹ́ nvée vaá nyoonèe nvéè baala.” (Tóm 20:​29, 30) Ene kà “kyáá bel” e gbòí beè kpọ̀ dú kọọ̀ Jíízọ̀s náa beè “vaaá gyọ́ọ tẽ̀ènè tóm boo béè ge toolá pọ́lọ́ gã́bug nen,” dì belí bé e Kpá Káí kọ́ naa, sõò àé ólòó vaaáí gyọ́ọ́ boo lee. (Híb. 9:​27, 28) Deè nieí, gã́bug nen ólò ziga ló nakà kyáá nòòmànùí. Sìgà tṍó, bà ólò bõoná gbẹá mm̀ ba tọ Bàrì buù dee àbèè buù sè sẹlẹ sẹ̀lẹ̀nù ge kẽ̀èa boo ú Kráìst, e pá tọ Bàrì Fádá kólíe “the Sacrifice of the Mass.” b Dõòna kà gbò bõ̀ònaló fã̀ náa ólò sẹlẹ́ gã́bug tṍó belí pá Fádá, sõò gã́bug gbò e bà dṹùnà va náa aa dee dã́ból ló nú e ú vààa gyọ́ọ̀ Jíízọ̀s tõó dọ̀. Sìgà nen é láá bĩiná kọọ̀, ‘É kọọ̀ ú Jíízọ̀s tõó dọ̀ kọọ̀ Bàrì é láá ia ló nà pọ́lọ́?’ Éé ní ea náa vaá bà ólò bĩiná nakà bíb é? Boo béè kọọ̀ gbò nen a náa kọ bàá zìgà kọọ̀ ú Jíízọ̀s náa é láá naa kọọ̀ Bàrì á ia ló ba pọ́lọ́ nèva. Mósĩ́ deè ní e gbò nyòòne nvéè Kráìst ni nveè bá nè gbò nen kọ bàá dã́ból ló nú e ú Jíízọ̀s tõó dọ̀ nè bá gè sẹ̀ẹ̀mà sẹ̀lẹ̀nù ge kẽ̀èa boo a ú é?

6. Mm̀ gbáá 1872, éé ní e gbò nvín nò Kpá Káí beè dã́ ból ló é?

⁶ Dee deè nvéè 19 gbò gbáá ea kil nvéeá, gbò nvín nò Kpá Káí nè ba neǹ tùle, ea dú Charles Taze Russell, beè gbóó dààmà togó gè tù agẹbá noomá Kpá Káí. Ba beè gbĩ́ gè nyimá nú e ú vààa gyọ́ọ̀ Jíízọ̀s tõó dọ̀ nè bá ge sẹ̀ẹ̀mà. Mm̀ gbáá 1872, ba beè gbóó dã́ ból ló kọ Kpá Káí tẹ́lẹ bàlà kẽ kọọ̀ Jíízọ̀s beè ù boo béè ge aalá dénè nen. Bà náa beè nyimá gbò nuí vaá pĩi. Tãa vó, ba beè emí mm̀ gã́bug kpá, níúz pepà, nè màgàzíìn kọbé gbò nen nyímá. Pọ́ì ńkem̀ tṍó aa ló tṍóá, gbò nvín nò Kpá Káíá beè gbóó nó gbò e bà géè nyoone nvéè Kráìst mm̀ túá gbò gbááá, vaá dààmà togó gè sẹlẹ Sẹ̀ẹ̀nù Ge Kẽ̀èa Boo Ú Kráìst enè tóm buù gbáá.

7. Mósĩ́ deè ní e gé íe bélè lọl ló nú e kà kà gbò nyòòne nvéè Kráìst beè gbĩ́ tẽ́ ló tṍó ea kil nvéeá ẽ́?

⁷ Deè nieí, e íé bélè lọl ló nú e kà kà gbò nyòòne nvéè Kráìst beè gbĩ́ tẽ́ ló vaá nyimá gã́bug gbáá ea kil nvéeá. Mósĩ́ deè e? Tení dú ló nvèè bá ea aa bá Jìhóvà, e nyímá kà kà bel ea kil ló nú e ú vààa gyọ́ọ̀ Jíízọ̀s tõó dọ̀ nè bélè e gbò nen é íe lọl ló. (1 Jọ́ọ̀n 2:​1, 2) E nó nágé kọọ̀ Kpá Káí kọ́ nú ea kil ló bàà kà ból dẽesĩ́ e gbò e bà náa nú ea léémá Bàrì é íe​—⁠ea dú gè ié dùm e bè náa tá gbẹá káála nè ge kọọ̀ gã́bug gãà gbò nen é tõó dùm dọ̀ dè-dè gbẹá boo kunukẽ̀í.  È ólò palàge tõo bã ló Jìhóvà tṍó e bugì togó boo bé ea vulèi naa nè bélè e buù bẹ̀ì íè lọl ló ú vààa gyọ́ọ̀ Jíízọ̀s. (1 Pít. 3:18; 1 Jọ́ọ̀n 4:⁠9) Vóà naa, dì belí gbò nyòòne nvéè Kráìst e ba beè bọ́ló dẹ̀lẹ̀ nyíé boo tṍó ea kil nvéeá, è ólò kolí dõòna gbò kọ bàá zọ̀i sí kẽè Sẹ̀lẹ̀nù Ge Kẽ̀èa Boo Ú Kráìst, vaá è ólò sẹlẹ belí bé e Jíízọ̀s beè kọ é sẹlẹ naa.

8. Éé ní e gbò níí Jìhóvà ni náa kọbé bà láá kolí dõòna gbò siimá kẽè Sẹ̀lẹ̀nù Ge Kẽ̀èa Boo Ú Kráìst e? (Ẹ̀b fùtó.)

⁸ Lọ̀l gé tṍó ea kil nvéeá, gbò níí Jìhóvà ólò kolí dõòna gbò kọ bàá sí kẽè Sẹ̀lẹ̀nù Ge Kẽ̀èa Boo Ú Kráìst. Dààmà togó mm̀ gbáá 1881, pá vígà págbálà nè pábia e ba di United State beè bõoná gbẹá ene kà be ea di Allegheny, Pennsylvania boo béè nakà kele íb sẹ̀lẹ̀nùí. Tṍó e tṍó téní, buù kà bõ̀ònatõ̀ò beè gbóó sẹlẹ Sẹ̀lẹ̀nùí. Ló March 1940, ba beè kọ́ nè gbò e bà ólò kọ́ kpẹ̀a kọọ̀ bàé láá kolí kọ̀láá nen ea íe lèèma siimá kẽ. Mm̀ gbáá 1960, ní ea beè dú túá tṍó e tọ nàà tóm beè naa príìnt kpá ge kolmá nen nè buù kà bõ̀ònatõ̀ò ẽ. Lọl tṍóá ààmà, baa émí gã́bug dẹ̀ kpá gè kolmá nen siimá kẽè Sẹ̀lẹ̀nù Gè Kẽ̀èa Boo Ú Kráìst. Éé ní ea náa vaá è ólò pììgà bé e bẹẹ kpóó sim tùlà naa gè kolí dõòna gbò e?

9-10. Bà mée ní e bà ólò ié bélè lọl ló bẹẹ pììgà ge kolí gbò nen siimá kẽè Sẹ̀lẹ̀nù Ge Kẽ̀èa Boo Ú Kráìst e? (Jọ́ọ̀n 3:⁠16)

⁹ Ene kà bug ea náa vaá è ólò kolí dõòna gbò siimá kẽè Sẹ̀lẹ̀nù Ge Kẽ̀èa Boo Ú Kráìst dú kọ è gbĩ́ì kọọ̀ gbò e níà túá tṍó e bà gé sí kẽé á dã́ kà kà bel ea kil ló nú e Jìhóvà nè Jíízọ̀s ni náa nèi. (Bugi Jọ́ọ̀n  3:16.) È agàla boo kọọ̀ nú e bà mon vaá dã́ gbẹá kẽè Sẹ̀lẹ̀nù Ge Kẽ̀èa Boo Ú Kráìst é náa kọọ̀ bàá kpáá nó gã́bug nu vaá dú gbò e bàé fã Jìhóvà. Sõò dõòna gbò ólò ié nágé bélè lọl ló.

¹⁰ È ólò kolí nágé gbò e bà náa ólò fã̀ nà Jìhóvà. È ólò naa vó kọbé bà kẽea boo kọọ̀ Bàrì vulèè va. Gã́bug gbò e kólì ólò sí kẽ, vaá nyíéi ólò ẹẹ tṍó e moǹ va. Tṍó e bà sí kẽè Sẹ̀lẹ̀nù Ge Kẽ̀èa Boo Ú Kráìst, bà ólò kpáá kẽ̀èa boo bé e ba beè olòó dé kpéè ló gè fã̀ Jìhóvà naa tṍó ea kil nvéeá. Bugi togó boo nu dòòmà bá Monica. c A beè kpáá dààmà togó gè kọ́ kpẹ̀a tṍó e COVID-19 géè zoogáá. Tṍó ea sí kẽè Sẹ̀lẹ̀nù Ge Kẽ̀èa Boo Ú Kráìst níí 2021 na lọ̀l, a beè kọọ̀: “Nakà Sẹ̀lẹ̀nùí beè palàge dú kele kìlmàḿ ló. Mm̀ nú ea é dú 20 gbáá, níì túá tṍó em gé kpáá kọ́ kpẹ̀a vaá kolí gbò nen siimá kẽè Sẹ̀lẹ̀nù Ge Kẽ̀èa Boo Ú Kráìst e. M beè pììgà bé e nà kpóó sim tùlà naa gè kolí dõòna gbò boo béè kọọ̀ nyíém palàge ẹẹ ló nú e Jìhóvà nè Jíízọ̀s ni náa nèm.” (Ps. 103:​1-4) Kọbèè gbò e kólì sí kẽè Sẹ̀lẹ̀nùí àbèè bà náa sí, èé síá kpóó ló vaá kolí va siimá kẽ boo béè kọ è nyímà kọọ̀ nyíè Jìhóvà ẹ́ẹ ló bẹẹ pììgà.

11. Mósĩ́ deè ní e Jìhóvà ni tã́ànè dee bá bẹẹ pììgà ge kolí gbò nen siimá kẽè Sẹ̀lẹ̀nù Ge Kẽ̀èa Boo Ú Kráìst e? (Hégaì 2:⁠7)

¹¹ Jìhóvà a palàge tãanè dee bá bẹẹ sìà kpóó ló gè kolí gbò nen siimá kẽè Sẹ̀lẹ̀nù Ge Kẽ̀èa Boo Ú Kráìst. Náa kal ló béè kọọ̀ COVID-19 beè naa kọọ̀ sìgà nen á gá láá sí kẽè ní ea beè sẹ̀ẹ̀a mm̀ gbáá 2021 na, nú ea sígá ló 21,367,603 nen beè sí kẽ. Sigà ńkem niá dõoà bàà tóm nè sìgà gã́bug Gbò Neǹ Ditõ̀ò Jìhóvà beeá ló bàlà booí! Mm̀ kà kà, níì gã́bug gbò e bà sí ní ea bọọ́ ló Jìhóvàẹ nì. À íe lèèma mm̀ buù nen ea sí kẽ. (Lúùk 15:7; 1 Tím. 2:​3, 4) È agàla boo kọọ̀ Jìhóvà ólò nvèè bá nèi kọ é mòn gbò e bà íe lé bùlà tṍó e gé kólí gbò nen.​—⁠Bugi Hégaì 2:⁠7.

12. Mókà gbò dìtõ̀ò ní ea é láá naa kọọ̀ ge sí kẽè Sẹ̀lẹ̀nù Ge Kẽ̀èa Boo Ú Kráìst á tàvàlàí ló é? (Ẹ̀b fùtó.)

¹² Jíízọ̀s beè gbẹẹ́ sĩ́ kọọ̀ mm̀ gbò deé e tṍó e gé tà, èé téní bá gã́bug tàvàlà dìtõ̀ò​—⁠dì belí nàà uú boo ea aa bá pá tọ, bíígá ló, bé gím, pọ́lọ́ kom, nè gã́bug dõòna kà gbò nu. (Máát. 10:36; Máàk 13:9; Lúùk 21:​10, 11) Sìgà tṍó, gbò dìtõ̀òí é láá naa kọ á tàvàlàí ló gè sí kẽè Sẹ̀lẹ̀nù Ge Kẽ̀èa Boo Ú Kráìst. Éé ní e pá vígà ni náa kọbé bà láá bé èlbá gbò dìtõ̀òí ẽ́, vaá mósĩ́ deè ní e Jìhóvà beè nvèè bá nèva ẹ́?

13. Mósĩ́ deè ní e Jìhóvà beè tãanè dee bá sìà kpóó ló nè bẹ̀à sã́ bùlà e Artem beè ié nyòòmà ge sẹlẹ Sẹ̀lẹ̀nù Ge Kẽ̀èa Boo Ú Kráìst tṍó ea beè di tọọ̀ kpọ́gọ́lọ́ ẹ́?

¹³ Tṍó e bà sííi nvee kpọ́gọ́lọ́. Pá vígà e bà di kpọ́gọ́lọ́ boo béè ba zìgà ólò pììgà ge sẹlẹ Sẹ̀lẹ̀nù Ge Kẽ̀èa Boo Ú Kráìst. Bugi togó boo nu dòòmà bá Artem. Tṍó e beè ié Sẹ̀lẹ̀nù Ge Kẽ̀èa Boo Ú Kráìst mm̀ gbáá 2020 a, ba beè siíe sẹlẹ mm̀ tọọ̀ kpọ́gọ́lọ́ e a gbàà nè begè sĩ́ tóólá 17-square-meter (183-sq-ft) e vòò nen e ba beè sii di m. Náa kal ló béè kọọ̀ a beè di tọọ̀ kpọ́gọ́lọ́, a beè pììga boo gè ié míí nè fétúlú ge sẹ̀ẹ̀mà Sẹ̀lẹ̀nù Ge Kẽ̀èa Boo Ú Kráìst, vaá noo gè nè lòbèl Sẹ̀lẹ̀nù Ge Kẽ̀èa Boo Ú Kráìsta kọbé à íe bélè lọl ló. Sõò gbò e ba beè dìé ló gbẹá tọọ̀ kpọ́gọ́lọ́á beè ṍ sĩi vaá ònìe. Éé ní ea beè naa ẽ́? A beè bàn va kọ bàá gá ònìèe àbèè ge ṍ sĩi mm̀ kóló tẽ̀ènè kà ávà. A beè bọọ́ ló Artem tṍó e gbòa zigà kọ bà  náa é ṍè sĩi àbèè ge onìèe tṍó e Sẹ̀lẹ̀nùa gé sẹẹà. Artem kọ́ọ̀, “M beè gbĩ́ gè kọ́ nú ea kil ló Sẹ̀lẹ̀nùa nèva.” Náa kal ló béè kọ ba beè kọọ̀ bà náa é dã́è nú ea kil ló sẹ̀lẹ̀nùa, tṍó e bà dã́ vaá mòn tṍó e Artem gé sẹlẹ Sẹ̀lẹ̀nùí, ba beè gbóó bĩináe nú ea kil ló.

14. Éé ní e pá vígà beè naa kọbé gbò nen láá sí kẽè Sẹ̀lẹ̀nù Ge Kẽ̀èa Boo Ú Kráìst náa kal ló béè kọọ̀ COVID-19 géè tení ẽ́?

¹⁴ Tṍó COVID-19. Tṍó e pọ́lọ́ komí beè palàge zoogáá, gbò níí Jìhóvà náa beè láá sí kẽè Sẹ̀lẹ̀nù Ge Kẽ̀èa Boo Ú Kráìst gbẹá Kíndòm Họ́ọ̀l. Sõò níá náa beè kpèg va lọl ló gè sẹlẹ Sẹ̀lẹ̀nùí. d Gbò bõ̀ònatõ̀ò e bà íe íntanet beè sí tenmá boo videoconference. Sõò èé kọ́ vàẹ kilma ló gã́bug gãà gbò e bà náa beè ié íntanet e? Gbẹá sìgà dó, tọ nàà tóm beè noo naa ní e gbò nen é pãane tṍ ló tenmá boo TV àbèè lédiò. Gbá ló vó, kele-kele tọ nàà tóm beè naa rẹ́kọọ̀d lòbèla nvee mm̀ nú ea sígá ló 500 kà dém bel kọbé gbò e bà di kpã́á láá sí kẽ. Vaá pá vígà e bà bọ́ló dẹ̀lẹ̀ nyíé boo beè tú gbò  lòbèl e ba beè naa rẹ́kọọ̀dí má pá vígà e bà íe bíi ló.

15. Éé ní eo nóò lọl ló nu dòòmà bá nen ea géè nó Kpá Káí ea bée kọlà Sue e?

¹⁵ Nàà uú boo ea aa bá pá tọ. Kilma ló sìgà nen, nàà uú boo ea aa bá pá tọ ní ea dú pọ̀bkà nu ànà-ànà ea ólò naa kọ bàá gá sí kẽè Sẹ̀lẹ̀nù Ge Kẽ̀èa Boo Ú Kráìst e. Bugi togó boo nú ea beè naaá ló nen ea géè nó Kpá Káí ea bée kọlà Sue. Kà lèlà deé ea zilà besĩ́ à kalá dú deè Sẹ̀lẹ̀nù Ge Kẽ̀èa Boo Ú Kráìst mm̀ gbáá 2021 na, Sue beè kọ́ nè nen ea ólò noòmàe Kpá Káí kọọ̀ boo béè nàà uú boo ea aa bá pá tọ, náa é láá siè kẽè Sẹ̀lẹ̀nùa. Nen ea ólò noòmàe Kpá Káíá beè gbóó bugi kpá Lúùk 22:44 nèe. Tṍóá, a beè gbóó kọ́ nèe kọọ̀ tṍó e gé téní bá tàvàlà dìtõ̀ò, à bọ́ló kọ é nó nu dòòmà bá Jíízọ̀s tení dú gè tãagã ló Jìhóvà vaá dẹlẹ́ẹ nyíé boo. Tṍó e dee zilà, Sue beè kpoogè dee ló fétúlú nè mííá vaá ẹ̀b nú ea dìnè deè deeá tenmá boo jw.org. Tṍó ea dú ló èlà, áá ẹ̀ẹ̀ beè gbóó sí kẽè Sẹ̀lẹ̀nù Ge Kẽ̀èa Boo Ú Kráìsta tenmá boo a fóòn gbẹá a tọ. Tṍó e tṍó téní, Sue beè emí kpá má nen ea ólò noòmàe Kpá Káíá kọọ̀: “O beè palàge sièm kpóó ló sṍóeá. M beè pììgà bé e nà kpóó sim tùlà naa kọbé m̀ láá sí kẽè Sẹ̀lẹ̀nùa, vaá Jìhóvà beè naa ní ea sígá. Ním é láá kọ́ bé e nyíém ẹ́ẹ naa, vaá m̀ ṍàni zaa!” É kọ ò bulà kọọ̀ Jìhóvà é láá nvèè bá nè ni tṍó eo gé téní bá íb gbò dìtõ̀òá?

16. Éé ní ea náa è agala boo kọọ̀ Jìhóvà é tã́ànè dee bá bẹẹ pììgà ge sí kẽè Sẹ̀lẹ̀nù Ge Kẽ̀èa Boo Ú Kráìst e? (Róm̀ 8:​31, 32)

¹⁶ Nyíè Jìhóvà palàge ẹẹ ló bẹẹ pììgà gè olòó sí kẽè Sẹ̀lẹ̀nù Ge Kẽ̀èa Boo Ú Kráìst. Èé láá àgala boo kọọ̀ àé tã́ànèi dee bá tṍó e zógè kọọ̀ nyíéi ẹ́ẹ ló nú ea ni náa nèi. (Bugi Róm̀ 8:​31, 32.) Vóà naa, naanii èé bééláfùl ge sí kẽè Sẹ̀lẹ̀nù Ge Kẽ̀èa Boo Ú Kráìst gbááí, vaá pììgà bé e bẹẹ kpóó sim tùlà naa ge bọ̀ọ̀vẹ̀ gbàà bẹẹ sìtóm kọ̀ kpẹ̀a tṍó e Sẹ̀lẹ̀nùí é sẹẹà nè tṍó ea ni sẹẹà lọ̀l.