MWAZI G’OKUYIGA 4
Yehova Anagisha Obushiru Bwerhu b’Okujira Olwibuko
“Mugenderere kujira ntya omu kunyibuka.”—LU. 22:19.
OLWIMPO 19 Chakula cha Mangaribi cha Bwana
OKU BUGEKE a
1-2. Bulagurhe rhunahika oku Lwibuko buli mwaka?
HAMAGERA myaka 2000 ntya kurhenga amango Yesu ahanire akalamo kage eju yerhu n’okurhufungulira enjira y’okugwarha akalamo k’esiku n’amango. Omu budufu embere afe, Yesu arhegeka abanafunzi bage bayibuke echijiro chage ch’obuzigire omu kujira embungano erhahemere bintu binene olekere omugati ne divayi byonyine.—1 Ko. 11:23-26.
2 Rhunakenga erhegeko lya Yesu bulala rhumuzigiire bwenene. (Yoh. 14:15) Buli mwaka omu mango m’Olwibuko, rhunayerekana eshukurani yerhu omu kurhola akasanzi k’okuwaza bwenene n’okusalira oku bilolere akamaro olufu lwa Yesu lumalire abantu. Kandi rhwakanagwarha obusiime b’okukola oku kasi k’okuhubiri n’okuhamagala abantu banene nk’oku byakanagalikana bayinje babe haguma nerhu kw’eyola mbuganano y’akamaro bwenene. Kandi kweri, Rhuhigirire okurhaleka echintu choshi choshi charhubuza rhumenye rhwahika oku Lwibuko.
3. Bichi rhwaganirako mu gunola mwazi?
3 Mu gunola mwazi, rhwashambala ku njira esharhu abantu ba Yehova bajiriremo okwabo koshi yi bajira Olwibuko l’olufu lwa Yesu: 1) omu kujira Olwibuko okuntu Yesu abayigirizaga balukole, 2) omu kuhamagala abandi bahike oku Lwibuko na 3) omu kujira Olwibuko chiro akaba bali omu hali zikomere.
OKUJIRA OLWIBUKO OMU KUKULIKIRA OMUFANO GWA YESU
4. Bibazo bihe binashubizwa buli mwaka oku Lwibuko, na bulagurhe rhukwanene kugenderera kubona okw’ezola nyigirizo zili z’akamaro? (Luka 22:19, 20)
4 Buli mwaka oku Lwibuko, rhunayunviriza ejambo liyumangiire oku Biblia lishubize bwinja-bwinja ku bibazo binene. Rhunamenya bulagurhe abantu bakenere enchungu na nka gurhe olufu lwa muntu muguma lwakalipira ebyaha bya bantu banene. Kandi rhunayibuswa bichi omugati n’edivayi bishushanyize nande okwanene kulya omugati n’okunywa edivayi. (Osome Luka 22:19, 20.) Okubwindi rhunawaza bwenene oku migisho minja y’amango mayinjire balala nji balama oku gulu esiku n’amango nji bagwarha. (Isa. 35:5, 6; 65:17, 21-23) Rhukwanene kugenderera kubona oku ezola nyigirizo zili z’akamaro bwenene. Amamiliyare m’abantu barhenji ezola nyigirizo, barhanamenyere kangana gurhe enterekero ya Yesu eli y’akamaro. Barhanajira Olwibuko l’olufu lwage nk’oku ayigirizaga abanafunzi bage bayinje balukola. Bulagurhe ntyo?
5. Enyuma w’olufu lwa ntumwa zinene, nka gurhe abantu bahwanzaga kuyibuka olufu lwa Yesu?
5 Kasanzi kageke entumwa za Yesu zimala kufa, Abakristu b’obubeshi basheshera omu chibaga. (Mt. 13:24-27, 37-39) Bayigiriza “enyigirizo z’obubeshi mpu y’abanafunzi babakulikira.” (Mdo. 20:29, 30) Nyigirizo ziguma omu “nyigirizo z’obubeshi” abola Bakristu bahwanzaga kuyigiriza zaliri oku, Yesu “arhahanwaga liguma lyonyine nka ntereko amango moshi y’aheka ebyaha byabanene,” nk’oku Ebiblia ederhere. Aliko, mpu enterekero yage ekwanene kuhaanwa buli mango changwa mango oku mandi. (Ebr. 9:27, 28) Mu zinola siku, bantu banene bagwerhe emirhima minja bayemerere ezola nyigirizo z’obubeshi. Banaja omu kanisa buli boso, na mango maguma buli lusiku mpu yibayibuka enterekero ya Yesu, n’echola ch’edini ly’Akatolika linayirika “Obukarestiya.” b Abantu b’amandi madini banazigana kuyibuka olufu lwa Yesu, barhanamenyere chiro akamaro nk’enterekero ya Yesu. Abandi bakachibaza ntya, ‘Ka kweri ebyaha byani byakababalirwa kugerera olufu lwa Yesu?’ Bulagurhe banachibaza echibazo chili nk’echola? Bulala bayemezezwe ntyo n’abantu banayigiriza oku ebyaha byerhu birhakababalirwa kugerera olufu lwa Yesu. Nka gurhe abanafunzi b’okuli ba Yesu barhabere abantu bamenye bichi enterekero ya Yesu emalire, na njira ehe nyinja bakayibukamo olufu lwa Yesu?
6. Omu mwaka gwa 1872, bichi echigusho ch’Abanafunzi be Biblia bahikiraga kumenya?
6 Omu mwaka gwa 1870, echigusho ch’Abanafunzi be Biblia baliyumangirwe na Charles Taze Russell, bahwanza kuyiga bwenene Amandiko me Biblia. Balilonzeze bamenye okuli oku bilolere akamaro nk’enterekero ya Yesu na nka gurhe olufu lwage lukwanene kuyibukwa. Omu mwaka gwa 1872, kugerera emyazi balonzaga omu Biblia, bamenya oku kweri Yesu alihaanire enchungu ejuu y’abantu boshi. Barhachishwekeraga kw’eyola myazi bonyine. S’ahubwe bayeneza eyola myazi hoshi-hoshi kugerera ebitabu, amajurnale, n’amagazeti. Na buzira kulegama, omu kuyiganya Abakristu b’omu kagana ka burhanzi, bahwanza kubuganana liguma omu mwaka eju y’okuyibuka olufu lwa Yesu.
7. Nka gurhe rhuli rhwayunguka n’enyigirizo Abanafunzi b’Ebiblia ba burhanzi bavumbulaga?
7 Zene, rhuli rhwayunguka n’ezola nyigirizo abola Bakristu ba mira bayigaga hamagera myaka minene. Nka gurhe? Yehova arhurhabere rhumenye kamaro kachi enterekero ya Yesu erhumalire na bichi nji yarhujirira rhwabo n’abandi boshi. (1 Yo. 2:1, 2) Kandi Ebiblia yarhurhabere kumenya oku hali bigusho bibiri by’abantu banasimisa Mungu, baguma nji bagwarha akalamo karhakafa embingu, n’amandi mamiliyoni nji bagwarha akalamo k’esiku n’amango oku gulu omu Paradizo. Kandi rhunayegera Yehova amango rhwamawaza kangana gurhe arhuzigiire na kangana gurhe rhunayunguka n’enterekero y’enchungu ya Yesu bwerhu-bwerhu. (1 Pe. 3:18; 1 Yo. 4:9) Kuguma na bene-berhu bemana ba mira, rhunahamagala abantu babe haguma nerhu oku Lwibuko amango rhuli rhwalujira nk’okuntu Yesu ayigirizaga abanafunzi bage bayinje bajira.
ABANTU BA YEHOVA BANAHAMAGALA ABANDI BAYINJE OKU LWIBUKO
Bichi wakajira y’ojira binene amango m’akampanye k’okuhaana envitasyo z’Olwibuko? (Olole echifungo cha 8-10) e
8. Bichi abantu ba Yehova bajirire omu kuhamagala abandi bayinje oku Lwibuko? (Olole efoto.)
8 Kurhenga mira, abantu ba Yehova banahamagala abandi bayinje oku Lwibuko. Oku murhondero g’omwaka gwa 1881, bene-berhu na bali-berhu b’omu Amerika balihamagerwe babuganane haguma omu nju ya muntu mulebe omu vile ye Allegheny omu Pennsylvania, yi bajira eyola mbuganano. Enyuma w’ahola, buli chibaga chaja chajira Olwibuko bwage-bwage. Omu Mwezi gwa 3, 1940, abahubiri babwirwa oku bakola bakahamagala buli yeshi oyerekene oku asimisizwe n’emyazi minja. Omu mwaka gwa 1960, b’obwaliri burhanzi Ebeteli yarhumira ebibaga envitasyo z’amakaratasi. Kurhenga amola mango, amamiliyoni m’envitasyo z’Olwibuko zagabirwe abantu. Bulagurhe rhunakolesa akasanzi n’emisi engana aho omu kuhamagala abandi?
9-10. Bande banayunguka n’obushiru rhunayerekana omu kuhamagala abandi oku Lwibuko? (Yohana 3:16)
9 Mpanvu nguma erhuma rhwahamagala abandi babe haguma nerhu oku Lwibuko, eli oku rhulonzeze balala bahika oku Lwibuko ob’oburhanzi bamenye okuli oku bilolere ebi Yehova na Yesu bajirire abantu boshi. (Osome Yohana 3:16.) Rhulangalire oku ebi babona n’okuyiga oku Lwibuko byabarhabala, bagwarhe enyorha y’okumenya binene, banabe bakozi ba Yehova. Aliko n’abandi nabo banayunguka bwenene.
10 Rhunahamagala na balala barhachili bakolera Yehova. Rhunajira ntyo omu kubayibusa oku Mungu achibazigiire. Banene banarhola envitasyo yerhu n’okuhika oku Lwibuko, echola chinarhulerhera busiime bunene okubabona. Okuhika oku Lwibuko kunabayibusa okuntu baligwerhe obusiime b’okukolera Yehova mira. Rhushambalage oku mufano gwa Monica. c Ashubaga kuhwanza akasi k’okuhubiri omu mango m’obula bulwala b’okuyahukira bwe Korona (COVID-19). Amalire hika oku Lwibuko l’omwaka gwa 2021, aderha ntya: “Ku nyono, olula Lwibuko lurhali kuguma n’ezindi chiro. B’oboburhanzi omu myaka 20 yamagera nagala kuhubiri abantu n’okubahamagala oku Lwibuko. Nalijirire koshi ngalire yimpamagala abantu bulala mperhe eshukurani ku Yehova na Yesu oku bibanjirire.” (Zb. 103:1-4) Chiro akaba oku abantu bakayemera envitasyo zerhu changwa nanga, rhunajira okwerhu koshi rhugalire yirhubahamagala oku Lwibuko, eyi rhunayinji oku Yehova asimisizwe n’obushiru bwerhu.
11. Nka gurhe Yehova agishire obushiru bwerhu b’okuhamagala abantu oku Lwibuko? (Hagai 2:7)
11 Yehova agishire bwenene obushiru bwerhu b’okuhamagala abantu oku Lwibuko. Omu mwaka gwa 2021, chiro akaba oku haliri marhegeko manene oku bilolere obula bulwala b’okuyahukira bwe Korona, bantu 21 367 603 balihikire oku Lwibuko. Olula luganjo lugerere hofi kukuba kabiri n’enusu oluganjo lw’Abahamirizi ba Yehova omu gulu lyoshi! Kweri Yehova arhasimisizwe n’oluganjo konyine. Anasimiswa na buli muntu wahikire oku Lwibuko. (Lu. 15:7; 1 Ti. 2:3, 4) Rhwakachizera oku amango rhwamaha omuntu envitasyo, Yehova ali arhukolesa omu kulonza abantu bagwerhe emirhima minja.—Osome Hagai 2:7.
ABANTU BA YEHOVA BANAHIKA OKU LWIBUKO CHIRO AKABA BALI OMU BIBAZO BIKOMERE
Yehova anagisha obushiru rhunayerekana omu kujira Olwibuko (Olole echifungo che 12) f
12. Bibazo bihe byakarhuma byarhukomerera kujira Olwibuko? (Olole efoto.)
12 Yesu abaga alebere ok’omusiku z’obuzinda, rhwakahurene bibazo binene bikomere. Obupinzani omu mulala, okulibuzwa, amavita, amalwala m’okuyahukira, n’ebindi binene. (Mt. 10:36; Mk. 13:9; Lu. 21:10, 11) Mango maguma ebyola bibazo binarhuma byarhukomerera okujira Olwibuko l’olufu lwa Yesu. Bichi bene-berhu na bali-berhu banajira yibahima ebibazo bili nk’ebyola na nka gurhe Yehova abarhabere?
13. Nka gurhe Yehova agishaga obushiru bwa Artem n’okuhigirira kwage kujira Olwibuko amango aliri omu pirizo?
13 Okushwekwa omu pirizo. Bene-berhu bashwekerwe omu pirizo eju y’obwemere bwabo banajira okwabo koshi yibayibuka olufu lwa Yesu. Rhuganire oku mufano gwa Artem. Omu mwaka gwa 2020, maboso mageke embere y’Olwibuko, ashwekwa omu kasho ka metre kare 17 haguma na bandi bashwekwa 5. Chiro akaba oku alishwekerwe, alikoleseze ebyaligwerhe nka mugati n’edivai oku Lwibuko, anachirheganya kugeza ejambo ly’Olwibuko oku nyungu yage yenyine. Aliko abandi balume alishwekerwe haguma nabo, baliri banywa erhabi n’okudukangana. Ajira gurhe? Abahema akaba bakarhanga leka kudukangana n’okunywa erhabi mu sa nguma yonyine. Artem asomerwa okubona oku abola balume alishwekerwe haguma nabo bayemera kuleka kunywa erhabi n’okudukangana amango m’Olwibuko. Artem aderhere ntya: “Nababwira oku ndonzeze kuganira nabo oku bilolere Olwibuko.” Chiro akaba oku baliderhere oku barhalonzeze kuyunva oku bilolere eyola mbuganano, bamalire kubona n’okuyunva okuntu Artem aliri ajira Olwibuko, boshi bamubaza ebibazo oku bilolere Olwibuko.
14. Nka gurhe abantu ba Yehova balichihanganire yi bajira Olwibuko chiro akaba hali obula bulwala b’okuyahukira bwe Korona?
14 Obulwala b’okuyahukira bwe Korona (COVID-19). Amango obulwala bwe Korona bwarhengereraga, abantu ba Yehova barhakagalire kujira Olwibuko eyi bali haguma masu oku masu. Aliko echola chirhalibabuzize kujira Olwibuko. d Ebibaga byaligwerhe Enternete byajira Olwibuko kugerera evideo konferanse. Gurhe si oku bilolere amamiliyoni m’abantu barhaligwerhe obuhashe b’okupata e Enternete? Mu bihugo biguma emipango yajirwa, y’ejambo ly’Olwibuko ligera oku televizyo changwa oku radio. Oku bwindi, emirhabi ya arejistre ejambo ly’Olwibuko omu ndimi zirhalukire 500, y’inabalala balamire omu maeneo ma hale bakulikira Olwibuko. Na bene-berhu bemana bagabira abandi bene-berhu na bali-berhu baliri omu bulagirire mw’amola maeneo earegistrema y’Olwibuko.
15. Bichi omufano g’omwanafunzi we Biblia oyirikirwe Sue gwakakuyigiriza?
15 Obupinzani omu mulala. Ku baguma, echibazo chikomere banahurana ch’okubabuza kujira Olwibuko, buli bupinzani omu mulala. Omufano, waza oku mwanafunzi muguma we Biblia oyirikirwe Sue. Omu 2021, lusiku luguma embere y’Olwibuko, Sue abwira mwalimu wage we Biblia oku bulala bantu baguma b’omu mulala gwage bali bamupinga, birhakagalikana oku ahike oku Lwibuko. Omwalimu wage we Biblia asoma Luka 22:44. Aj’amufasiriya oku, amango rhwamahurana ebibazo bikomere, rhukwanene kukulikira omufano gwa Yesu omu kusalira emwa Yehova n’okumulangalira loshi. Olusiku lwakulikiragaho, Sue arheganya omugati n’edivayi anakulikira eprograme y’obuharamye b’omulala bw’esezi oku jw.org. Mw’elyola golo, amango aliri omu chumba chage yenyine akulikira ejambo ly’Olwibuko oku telefone. Enyuma w’ahola, Sue ayandikira mwalimu wage we Biblia ntya: “Mulagolo nji walimpebere omurhima bwenene. Nji nalijirire koshi ngalire yinkulikira Olwibuko, na kweri Yehova naye nj’antabala. Ntamenyere gurhe nakayerekana obusiime n’eshukurani ngwerhe!” Owazize oku nawe Yehova akakurhabala amango wamahurana ehali eli nk’eyola?
16. Bulagurhe rhuchizerere oku Yehova agisha obushiru rhuli rhwayerekana omu kujira Olwibuko? (Waroma 8:31, 32)
16 Yehova ab’asimisizwe bwenene n’obushiru rhunayerekana yi rhuyibuka olufu lwa Yesu. Rhwakachizera oku arhugisha amango rhuli rhwayerekana oku rhugwerhe eshukurani oku by’arhujirire. (Osome Waroma 8:31, 32.) Rhujage rhwahigirira kuhika oku Lwibuko gunola mwaka n’okujira okwerhu koshi rhwakanagala yirhuyongeza obushiru bwerhu omu kasi k’amahubiri maboso mageke embere n’enyuma y’Olwibuko.
OLWIMPO 18 Tuko na Shukrani juu ya Bei ya Ukombozi
a Lwakabiri, Siku 4, Mwezi gwa 4, 2023, amamiliyoni m’abantu oku gulu lyoshi nji bayibuka olufu lwa Yesu. Banene nji bwaba eyi b’oburhanzi bamahika oku lwibuko. Abandi babaga balekere kukolera Yehova barhanalichili bahika oku Lwibuko mu myaka minene nabo nji babaho. Baguma bali omu hali zakarhuma byabakomerera kuhika oku Lwibuko aliko nji bahika. Chiro n’ebibazo byoshi byoshi oli wahurana, wakachizera oku Yehova nji asiimiswa n’obushiru nji wayerekena y’ohika oku lwibuko.
b Abola bantu bayemerere oku amango m’okuyibuka olufu lwa Yesu, omugati n’edivayi binahinduka n’okuba mubiri n’eshagama ya Kristu. Banawaza ok’omubiri n’eshagama ya Yesu binahaanwa nterekero buli mango omuntu amaja omu misa.
c Mazino maguma mahindamwirwe.
d Olole n’oku jw.org emyazi ederhere “Okujira Olwibuko l’Omwaka gwa 2021.”
