1, 2. ¿Jaleʼ ti tsápnanchal ku kʼalej támub ti támub ban Conmemoración?

 IN TʼAJÁL utat dos mil i támub a Jesús in bínaʼ in ejatal abal tu ku kʼaniy ani jaxtám i kwaʼal an aychixtaláb abal ku kʼwajiy abal etsʼey. An akal tam ti neʼetsak ka yakʼwan abal ka tsemdháj a Jesús in tʼipchij in aykolilchik jantʼiniʼ tin léʼak abal ka tʼílchin in tsémtal. In eyendhaʼ i pan ani i vino ani in uchaʼchik abal kin áynanchij kin tʼajaʼ abal kin tʼilaʼchik an kʼanidhomtaláb axi u koʼoncháb kʼal a Jehová (1 Cor. 11:23-26).

² Wawáʼ i tsápnanchal ki bélkaʼ axéʼ xi abatnaxtaláb kom i kʼanidhál a Jesús (Juan 14:15). Tam kʼwajatits ti utel an Conmemoración, i tsápnanchal ki tejwamédhaʼ abal i kʼakʼnál jawaʼ in tʼajaʼ a Jesús. I jolkʼál i kʼij abal ku oláts ani ki lej tsalpay jaleʼ ti a Jehová in bínaʼ in tsakámil. Jayej i lej kulbetnál ku kalej tu ólnom abal ki kaniy an atiklábchik abal tu ku júnaʼ ban Conmemoración ani wawáʼ jayej yab jaykʼiʼ i léʼ ki palkʼanchij ku kʼalej ban Conmemoración.

3. ¿Jantʼoj neʼets ki exóbnaʼ?

³ An ólchixchik kʼal a Jehová etsʼey i tsapnanchámal ki tʼilchij in tsémtal a Jesús támub ti támub. Al axéʼ xi exobintaláb neʼets ki tsuʼuw ox jantʼoj axi i tsapnanchámal ki tʼajaʼ: 1) i tsápnanchal ki tʼajaʼ an Conmemoración antsanáʼ jantʼiniʼ tin uluw a Jesús, 2) i tsápnanchal ki kaniy an  atiklábchik abal tu ku júnaʼ ani 3) belits abal i tametnál i kʼibataláb i tsápnanchal ki tʼajaʼ.

4. a) ¿Jantʼoj u tʼílchinal támub ti támub ban Conmemoración? (Lucas 22:19, 20). b) ¿Jaleʼ ti pidhál yan in jalbíl axéʼchik xi exobchixtaláb?

⁴ An tʼilomtaláb axi u bináb tam kin bajuw an Conmemoración, tu tólmiyal ki tókʼtsiy talchik i konowixtaláb axi i kwaʼal. Ejtíl, u ólchinal jaleʼ ti wawáʼ i yéjenchalak abal a Jesús kin bínaʼ in ejatal, jayej u ólchinal jantʼiniʼ u pakwlancháb i wálab kʼal in tsémtal a Jesús. Kʼeʼat jantʼoj axi u ólchinal játs jitaʼchik játs axi in kʼapal an pan ani an vino ani jantʼoj in tʼipoyal (ka ajiy Lucas 22:19, 20). Jayej biyat u bináb an tʼilomtaláb, i éjtowal ki tsalpay ban alwaʼtaláb axi neʼets kin batsʼuw jitaʼchik ka kʼwajiy tejéʼ ban Tsabál (Is. 35:5, 6; 65:17, 21-23). Axéʼ xi exobchixtaláb in kwaʼal yan in jalbíl abal wawáʼ. Waʼats yan i atikláb axi yab in exbayal axéʼ, jaxtám yab in pidhál yan in jalbíl axéʼ xi exobchixtaláb. Ani yabchik in tʼilchal in tsémtal a Jesús jantʼiniʼ jajáʼ in uluw. ¿Jaleʼ walám?

5. ¿Jantʼoj tujey ti tʼajnal talbél ti tsemets patal an abatwálej?

⁵ Talbél ti tsémenek patal an abatwálej in kʼál a Jesús, talchik i atikláb tujey in olnál i exobchixtaláb axi yab tekedh ban tamkuntaláb (Mat. 13:24-27, 37-39). Tujey ti watʼel jawaʼ in uluw an abatwálej Pablo, «neʼets ka waʼtsin jitaʼ ti exóbchal i janamtaláb, neʼets kin lubaʼ kin kʼambiy an bélomchik ka tsʼatʼey kʼal in jánamtal» (Hech. 20:29, 30). Axéʼchik xi atikláb in bukʼuw yan i janamtaláb, ejtíl abal a Jesús kwaʼalak kin bínaʼ yaníl i kalel in ejatal abal tu ku pákwlanchij i wálab (Heb. 9:27, 28). Ani yan i atikláb axi in kʼakʼnál jawaʼ a Jesús in tʼajaʼ, in bélalchik axéʼ xi janamtaláb. Jajáʼchik u kʼalel semana ti semana ti iglesia ani junchikíl chudhél chudhél kom in tʼilalchik jawaʼ u bijiyáb ti sacrificio de la misa. b Ani waʼats i kʼakʼnaxtaláb axi yab in tʼajál wilkʼidh pero belits antsanáʼ yabchik in exbayal jaleʼ ti a Jesús in bínaʼ in ejatal. Waʼats yan i atikláb axi yabaye in lej belál max chubax in tsémtal a Jesús in éjtowal tu ku pákwlanchij i wálab. In tsalpayalchik antsanáʼ kom exobchinének abal in tsémtal a Jesús yab u eynal. Pero, ¿jantʼoj in tʼajál jitaʼchik chubax pel i aykol kʼal a Cristo?

6. ¿Jantʼoj in exbay talchik i atikláb ti 1872?

⁶ Ti mil ochocientos a Charles Russell ani in tolmiwal, tújeychik in exóbnal an Biblia abal kin exbay alwaʼ. Jajáʼchik in léʼak kin exbay jay in jalbíl in kwaʼalak in tsémtal a Jesús ani jantʼiniʼ ti kwaʼalakchik kin tʼilaʼ. Ti 1872 in éxbaychik abal a Jesús in bínaʼ in ejatal abal kin kʼaniy patal an atikláb. Patal nixéʼ xi exobchixtaláb axi in éxbaychik yab in tsinkaʼ, tujey in ólchal an atiklábchik. Jaxtám tújeychik in kaldhál i libros, i revistas ani in olnálchik ban periódico. Talbél, tújeychik in tʼipoyal in tsémtal a Jesús juníl ban támub, kom antsanáʼ tin tʼajálakchik an epchal axi ti kʼaʼál siglo.

7. ¿Jantʼiniʼ tu tólmiyal xowéʼ patal an tʼojláb axi in tʼajaʼ an epchal Russell ani in tolmiwal?

⁷ ¿Jantʼiniʼ tu tólmiyal wawáʼ xowéʼ  patal an tʼojláb axi in tʼajaʼ an epchal Russell ani in tolmiwal? Jajáʼchik tolmiyat kʼal a Jehová abal kin exlaʼ an chubaxtaláb, jaxtám xowéʼ wawáʼ i éxbayal jaleʼ ti a Jesús in bínaʼ in ejatal, ani i exlál abal in tsémtal a Jesús neʼets tu ku pidhaʼ yan i lablixtaláb (1 Juan 2:1, 2). Jayej i exobnámal abal a Jehová in binámal tsab i aychixtaláb: jun játs abal talchik i atikláb ka kʼalej ti éb ani axi jun játs abal jitaʼchik ka jilkʼon tejéʼ tsabál ka kʼwajiy al jun i Paraíso. Tam ki tsalpay kʼal an kʼanidhomtaláb axi a Jehová tu tejwamedhanchámal, u utel más kʼal Jajáʼ ani jayej tam ki tsalpay kʼal patal an lablixtaláb axi neʼets ki batsʼuw (1 Ped. 3:18; 1 Juan 4:9). Jaxtám i tsápnanchal ki kaniy más i atikláb abal ki tʼilchij in tsémtal a Jesús, antsanáʼ jantʼiniʼ jajáʼ in tʼipoy.

8. ¿Jantʼoj i tʼajámal abal ki kaniy an atiklábchik ban Conmemoración? (Ka tsuʼuw an imágenes).

⁸ An ólchixchik kʼal a Jehová biyálits tin tujchamal kin kaniy an atiklábchik kʼal an Conmemoración. Ti 1881, axéʼ xi revista tujey in kániyal an epchalchik axi ti Estados Unidos ka tamkun al jun i atáj axi kʼwajat ti Pensilvania abal kin tʼilaʼchik in tsémtal a Jesús. Talbél, patal an tamkuntalábchik tujey in tʼajál an Conmemoración tin kwetemtal. Pero ti marzo ti 1940 uchan an epchalchik abal in éjtowalak kin kaniy an atiklábchik axi kin kulbétnaʼ ka kʼalej kʼal an Conmemoración. Ani ti 1960, a Betel tujey in apchal i kanixtaláb an tamkuntalábchik abal kin bukʼnaʼ. Ma ti nixéʼ xi támub an ólchixchik  kʼal a Jehová in bukʼúmal miles de millones i kanixtaláb. ¿Jaleʼ ti tsápnanchal ki kaniy yan i atikláb ban Conmemoración?

9, 10. ¿Jitaʼchik jayej in bátsʼuwal i alwaʼtaláb max ki kaniy ban Conmemoración? (Juan 3:16).

⁹ Wawáʼ jayej i kániyal an atiklábchik abal tu ku júnaʼ ban Conmemoración kom i léʼ abal jajáʼchik jayej kin exlaʼ patal jawaʼ in tʼajámal a Jehová ani a Jesús abal kʼal wawáʼ (ka ajiy Juan 3:16). I léʼ abal jawaʼ kin atsʼaʼ ban tʼilomtaláb kin tʼajaʼ abal kin léʼnaʼ kin exlaʼ a Jehová ani kin tʼojonchij. Pero jayej waʼats kʼeʼat axi in bátsʼuwal i alwaʼtaláb max ka kʼalej ban Conmemoración.

¹⁰ Jayej i léʼ ki kaniy ban Conmemoración jitaʼchik owmenek kʼal a Jehová. I tsápnanchal ki kaniy ban Conmemoración kom i léʼ abal kin tʼilaʼchik abal belej u kʼanidháb kʼal a Jehová. Lej kulbél i atsʼál tam ki tsuʼuw abal lej yan in bátsʼuwal ka kʼalej. Antsanáʼ in éjtowalchik kin tʼilaʼ abal in atsʼálakchik lej kulbél tam tin tʼojonchalak a Jehová. Ki tsuʼuw in tʼiplábil a Mónica. c Tam ti tujeykʼij ti bukʼel an coronavirus, jajáʼ in tujchij junílekʼij ti ólnom. Kʼalej kʼal an Conmemoración axi ti 2021 ani in uluw: «Yab jaykʼiʼ neʼets ku ukʼchiy axéʼ xi Conmemoración, kom in tʼajál watʼadh 20 i támub yab in kalelak tin ólnom ani yab u kaniyamalak jitaʼ ban Conmemoración. U lej kʼakʼnál jawaʼ a Jehová ani a Jesús in tʼajámal, jaxtám u tsápnanchij ku kaniy an atiklábchik ban Conmemoración» (Sal. 103:1-4). Belits max an atikláb yab ka kʼalej ban Conmemoración i tsápnanchal ki kaniy, kom i exlál abal a Jehová in kʼakʼnál an tsapláb axi i tʼajál.

11. ¿Jaleʼ ti exlál abal a Jehová tu tólmiyal abal ki kaniy an atiklábchik ban Conmemoración? (Ageo 2:7).

¹¹ A Jehová in lej labliyámal an tsapláb axi i tʼajámal abal ki kaniy an atiklábchik ban Conmemoración. Jun i tʼiplab, ban 2021 tamkun 21.367.603 i atikláb, belits abal exomak lej tsapik an coronavirus. Tu júnaʼ lej watʼadh yan i atikláb axi yab pel i ólchix kʼal a Jehová. U lej kulbél kom a Jehová in pidhál yan in jalbíl axéʼ xi atiklábchik (Luc. 15:7; 1 Tim. 2:3, 4). I lej belál abal a Jehová in lábliyal an tsapláb axi i tʼajál abal ki kaniy an atiklábchik ban Conmemoración (ka ajiy Ageo 2:7).

12. ¿Jaleʼ walám junchikíl ki atsʼaʼ kʼibat ki tʼajaʼ an Conmemoración? (Ka tsuʼuw an imagen).

¹² A Jesús in uluw abal tin taltal an xeʼtsintaláb, neʼetsak ki tamétnaʼ yan i kʼibataláb, ejtíl, i yanél neʼets tu ku kʼwiyaʼ, neʼets ku ayoknáj, neʼets ka waʼtsin i pextaláb ani i yawʼláts axi u bukʼel (Mat. 10:36; Mar. 13:9; Luc. 21:10, 11). Axéʼchik xi kʼibataláb walám kin tʼajaʼ abal yab ki ejtow ki tʼajaʼ an Conmemoración. ¿Jantʼoj in tʼajámal an epchal axi in tametnámal talchik kʼal axéʼ xi kʼibataláb ani jantʼiniʼ ti tólmiyamej kʼal a Jehová?

13. ¿Jantʼiniʼ tin lábliy a Jehová an tsapláb axi in tʼajaʼ a Artemio abal kin tʼilaʼ in tsémtal a Jesús ti wikʼaxteʼ?

¹³ Ti wikʼaxteʼ. An epchalchik axi kʼwajat ti wikʼaxteʼ kom in bélkaʼ a Jehová, in tsápnanchal kin tʼilaʼ in tsémtal a Jesús. Ki tsuʼuw jawaʼ in watʼaʼ a Artemio. Ti 2020 a Artemio koʼoy kin watʼaʼ an Conmemoración ti wikʼaxteʼ. Jajáʼ in uluw: «Juʼtáj tin  kʼwajatak mapudh lej tsipkats ani u baliyábak ma boʼ ti eb». Jajáʼ in elaʼ jawaʼ neʼetsak kin eyendhaʼ abal kin tʼilchij in tsémtal a Jesús ani tʼojojon abal kin bínaʼ an tʼilomtaláb. Pero in juntal wikʼnél u lej jutsʼulak ani u lej atʼax kaw. ¿Jantʼoj in tʼajaʼ a Artemio? An epchal in konoy in juntal wikʼnél max in éjtowalak ka tsʼibkʼan al jun i hora ani yabchik ka jutsʼláts. In lej jikʼpaʼ kom in uluw abal neʼetschik kin tʼajaʼ. Jajáʼ in uluw: «U uchaʼchik abal max in léʼak u éjtowalak ku wilkʼanchij jantʼiniʼ i tʼajál an Conmemoración, in uluwchik abal imbáj. Pero talbél tam ti in tsuʼuw jantʼiniʼ tu tʼajaʼ, in léʼnaʼchik kin exlaʼ wéʼ más».

14. ¿Jantʼoj in tʼajaʼ in bichówil a Jehová abal kin tʼilchij in tsémtal a Jesús belits abal waʼatsak an coronavirus?

¹⁴ An coronavirus. Axéʼ xi yawʼláts in tʼajaʼ abal yab ki ejtow ku tamkun jantʼiniʼ i tʼajálak ti biyál. Pero belits antsanáʼ i tʼajaʼ an Conmemoración. d Ban tamkuntaláb juʼtáj ti waʼats i internet an epchalchik in  ejtow kin tsuʼuw por videollamada. Pero, ¿jantʼiniʼ ti tʼajan an Conmemoración juʼtáj ti yab waʼats i internet? Al talchik i bichow watʼbáj an tʼilomtaláb ban televisión ani ban radio. Jayej an sucursales in tʼajaʼ an grabación in kʼal an tʼilomtaláb al watʼadh 500 i kawintaláb. Jaxtám an atiklábchik axi u kʼwajíl lej owél, jayej in ejtowchik kin atsʼaʼ an Conmemoración. Jayej waʼtsin i epchalchik axi tolmixin abal kin bukʼuw an grabaciones.

15. ¿Jantʼoj i exobnál kʼal in tʼiplábil a Sue?

¹⁵ Tam i yanél tu kʼwiyál. Yan i atikláb u kʼánchinal kʼal in yanél kin tʼilaʼ in tsémtal a Jesús. Jats jawaʼ in watʼaʼ jun i exóbal kʼal an Biblia axi in bij Sue. Ban támub 2021, a Sue in uchaʼ an epchal kʼal axi u exóbchinalak abal yab neʼets kin ejtow kin tʼilchij in tsémtal a Jesús kom u kʼánchinalak kʼal in yanél. An epchal in ajchij Lucas 22:44, ani in uchaʼ abal tam i kwaʼal jun i kʼibataláb jawaʼ in tomnál ki tʼajaʼ jats ki ólonchij a Jehová, antsanáʼ jantʼiniʼ tin tʼajaʼ a Jesús ani ki lej belaʼ abal Jajáʼ neʼets tu ku tólmiy. Tam ti chudhey a Sue in tsʼejkaʼ an pan ani jawaʼ neʼets kin yejenchij ani in tsuʼuw ti jw.org an kʼakʼnaxtaláb axi ti dhajuw abal an Conmemoración. Tam ti waklej, mapun tin cuarto ani in atsʼaʼ an tʼilomtaláb in kʼál an Conmemoración. Talbél in dhúchunchij axéʼ an epchal kʼal axi tu exóbchinal kʼal an Biblia: «Tin lej kanatbédhaʼ jawaʼ tin uchaʼ ti wéʼel, u ejtow ku tʼilchij in tsémtal a Jesús, a Jehová tin lej tólmiy. Jayej u lej kʼakʼnál patal jawaʼ a tʼajaʼ ani u atsʼál in lej kulbél». Max kʼwajat a tametnál jun i kʼibataláb ejtíl axéʼ, ¿a tsalpayal abal a Jehová neʼets ti tólmiy?

16. ¿Jaleʼ ti lej belál abal a Jehová neʼets kin lábliy an tsapláb axi i tʼajál abal ku kʼalej ban Conmemoración? (Romanos 8:31, 32).

¹⁶ A Jehová in lej kʼakʼnál tam i tsápnanchal ki tʼilchij in tsémtal a Jesús. I exlál abal a Jehová neʼets tu ku lej lábliy max ki tsápnanchij ki kʼákʼnanchij patal jawaʼ in tʼajámal abal kʼal wawáʼ (ka ajiy Romanos 8:31, 32). Axéʼ xi támub i léʼ ki tsápnanchij ku kʼwajiy ban Conmemoración ani jayej i léʼ ki kaniy kʼeʼat i atikláb abal tu ku júnaʼ.