1-2. Ngatta magatende ittam ta Memorial kada dagun?

 MA-2,000 DAGUN ngana i nappasa, niyawa ni Jesus i inango na para ta nittam. Yatun i nangivuka tu chansa tapenu mapeggan ittam tu mannanayun nga inango. Ta gabi nige nga natay si Jesus, nidog na ta tagatuttul na ira nga daddammadda yatun nga sakrifisio na gukaban na tadday nga simple nga selebrasion nga mangusa tu pan anna binarayang.—1 Cor. 11:23-26.

² Kuattam yatun nga nidog ni Jesus megafu ta iddeddu tam yayya. (Juan 14:15) Kada dagun, ta tiempo na Memorial, ipasingattam nga appresiattam i kingngua na gukaban na pappakimallo anna pannono tu mapia ta nakua na patena para ta totolay. Mas mallallappo ittam gapa ta ministerio anna imbitattam i aru nga totolay nga makipasselebra ta nittam taw nga espesial nga okasion. Determinadu ittam gapa nga ari itulu i maski anni nga fugaddan ittam ta pagatende ta Memorial.

3. Anni i gigiammuattam taw nga artikulo?

³ Gigiammuattam taw nga artikulo i tallu nga pangikaguman na totolay ni Jehova tapenu iselebra i patay ni Jesus: (1) pangiselebra ta Memorial segun ta nituddu ni Jesus, (2) pangimbita ta tanakuan ta Memorial, anna (3) pam-Memorial maski nu mariga i situasion.

4. Anni ira nga pakkiavu i matabbag kada Memorial, anna ngatta ari tam nakuan nga tagilappawan danatun? (Lucas 22:19, 20)

⁴ Kada Memorial, magginna ittam ta tadday nga nebase-Biblia nga palappa nga tabbagan na tu manawag yaw ira nga pakkiavu:  Ngatta kawagan na totolay i tavvu? Kunnasi nga mapagan na patay na tadday nga tolay i liwi-liwa na aru? Anni i isimbolo na pan anna na binarayang anna sinni danuri mepangngo nga kuman anna minum tatun ira? (Bibbigan i Lucas 22:19, 20.) Ta Memorial gapa, pannonopattam i bendision ira nga malawa noka danuri na magiddanama nga mattolay tu mannanayun taw ta davvun. (Isa. 35:5, 6; 65:17, 21-23) Ari tam nakuan tagilappawan danatun nga kinakurug nga magigiammu tam ta Memorial. Binillion i ari nga makalippawa tatun ira anna ari da nga appresian nu kunnasi kabalor i sakrifisio ni Jesus. Ari da gapa nga iselebra i Memorial na patay ni Jesus segun ta nituddu na nga pangiselebra tatun. Ngatta?

5. Turi ta natay ngana i magaru ta apostoles, kunnasi ngana nga niselebra na totolay i patay ni Jesus?

⁵ Ari nabbayag turi ta natay ngana i magaru ta apostoles ni Jesus, simillung ta kongregasion i magappappe ira nga Cristiano. (Mat. 13:24-27, 37-39) ‘Nalladda-laddug ira tapenu meyawawan anna tumuttul nira danuri i mangurug.’ (King. 20:29, 30) Angngarigan na, ta pappasa na tiempo, tadday ta ‘kinaladdug’ nga nituddu danatun ira nga magappappe nga Cristiano ay mawag tu pakatotoli nga isakrifisio ni Jesus i baggi na. Ngem base ta tuddu na Biblia, “mittan laman nga netavvung [i baggi ni Jesus] tapenu arian na i katagarulian na magaru.” (Heb. 9:27, 28) Sangawe, aru nga masippo nga totolay i mangurug tatun nga kinaladdug. Angngarigan na, kanayun nga makimisa i Katoliko ira, kadaggaw paga lagu nu karuan, tapenu daddamman kanu i sakrifisio ni Jesus. Agaladda yatun tu Communion. b Ari gapa tu kanayun nga daddamman na tanakuan ira nga relihion i pinangisakrifisio ni Jesus ngem ari tu manawag i pakalippawa na magaru ta miembro da ira nu anni kari talaga i nakua na pinangisakrifisio ni Jesus. Awayya na tu iyavu na karuan, ‘Talaga kari nga mapakoma i liwi-liwa ku megafu ta patay ni Jesus?’ Ngatta iyavu da yatun? Nainfluwensian gare ira na totolay nga paddudadda nga mapakoma na sakrifisio ni Jesus i liwi-liwa. Kumusta gapa ta kurug ira nga tagatuttul ni Jesus?

6. Anni i nalippawa na grupo na estudiante ira na Biblia turi ta 1872?

⁶ Turi ta 1870, egga i grupo na estudiante ira na Biblia nga nirolluan ni Charles Taze Russell nga pinegafuanadda nga gigiammuan tu mapia i Katurakan. Kayà da gare nga ammuan i kinakurug meyannung ta nu anni kari talaga i makua na sakrifisio ni Jesus anna nu kunnasi kari nakuan i panaddamman ta patena. Tapus turi ta 1872, nalippawa da nga talaga niyawa ni Jesus i tavvu para ta ngamin nga totolay. Ari da nga sinolo yatun nga nagigiammu da. Nipakannammu da yatun ta tanakuan nga totolay gukaban na libru ira, diariu, anna magazina ira. Tapus ari nga nabbayag, pinarigadda gapa i ollu-siglo ira nga Cristiano. Pinegafuanadda i maggarammammung tu mittan kada ragun tapenu iselebra i Memorial.

7. Kunnasi ittam mammakapia ta pinaggigiammu na estudiante ira na Biblia ta nappasa?

⁷ Sangawe, mabenefisiowan ittam gapa ta pinaggigiammu danatun nga matalo nga Cristiano maski nu piga dagun ngana i nappasa. Kunnasi? Ta pamendision ni Jehova, malippawa tam ngana sangawe i kinakurug meyannung ta sakrifisio ni Jesus anna nu anni i makua natun. (1 Juan 2:1, 2) Nagigiammu tam gapa nga base ta Biblia, egga i dua nga klase na iddanama na totolay nga makapagayayya  ta Dios—imortal nga inango ta langi para ta karuan anna mannanayun gapa nga inango ta davvun para ta minillion. Mas maparanni ittam kani Jehova durante nga gigiammuattam i kadakal na pangaya na ta nittam anna i pammakapianattam mismu ta sakrifisio ni Jesus. (1 Ped. 3:18; 1 Juan 4:9) Yayya nga parigattam i matalo nga wawwaragi tam ta nappasa. Imbitattam gapa i tanakuan nga makipasselebra ta nittam ta Memorial segun ta nituddu ni Jesus nga keselebra natun.

8. Anni ngana ira i nakua na totolay ni Jehova tapenu imbitan i tanakuan ta Memorial? (Innan i letratu.)

⁸ Nabayag ngana nga iimbitan na totolay ni Jehova i tanakuan tapenu magatende ta Memorial. Tagga pagalaman ta 1881, membitan i wawwaragi ta United States tapenu maggarammammung ta balay na tadday nga wagi ta Allegheny, Pennsylvania para tatun nga espesial nga okasion. Tapus turi kua, mam-Memorial ngana lagapa i kada kongregasion. Turi ta Marso 1940, nepakannammu ta publisher ira nga awayya da ngana nga magimbita tu maski sinni ta teritoria da nga maya nga magatende. Ta 1960 gapa, first time nga nangiyawa i Bethel ta kongregasion ira tu neyimprenta ira nga imbitasion. Namegafu tatun, binillion ngana nga imbitasion para ta Memorial i netaneg. Ngatta aru nga tiempo i ufutattam anna mabbabbannag ittam tapenu imbitan i tanakuan?

9-10. Sinni ira i mammakapia ta appursigi tam nga imbitan i tanakuan ta Memorial? (Juan 3:16)

⁹ Tadday nga rason nu ngatta imbitattam i tanakuan nga makipasselebra ta nittam tu Memorial ay megafu ta kayà tam nga magigiammu danuri na first time nga magatende i meyannung ta kingngua ni Jehova anna ni Jesus  para ta nittam ngamin. (Bibbigan i Juan 3:16.) Iddanamattam nga mapaguyu nakuan ira na masingan anna maginna da ta Memorial nga mappa-Bible study anna mabbalin tu aripan ni Jehova. Ngem ari laman tu ira i mammakapia tatun.

¹⁰ Imbitattam gapa danuri nallallamming ngana ta passerbi da kani Jehova. Kuattam yatun tapenu iperaddam ta nira nga iddeddukan lagapa ira na Dios. Aru i magatende gafu ta pagimbita tam anna fermi i ayayya tam nga makasingan ta nira. Iperaddam ta nira na pagatende da ta Memorial nu kunnasi kasaya i pinasserbi da kani Jehova ta nappasa. Kunnatun i ekspiriensa ni Monica. c Na-reactivate yayya ta tiempo na COVID-19 pandemic. Kunnaw i kinagi na meyannung ta pinagatende na ta Memorial ta 2021: “Talaga espesial ta nio yaw nga Memorial. Ta unag gare na 20 nga dagun, first time ku uli nga layyagayyan i totolay anna imbitan ira ta Memorial. Kingnguà i ngamin nga mawayyà tapenu imbitan i tanakuan megafu ta kuruga mappabalo ngà ta kingngua ni Jehova anna ni Jesus para ta nio.” (Sal. 103:1-4) Positibo man onu ari i reaksion na totolay ta pagimbita tam ta nira ta Memorial, mallallappo ittam lagapa nga kibbidan i tanakuan megafu ta ammu tam nga appresian ni Jehova yatun nga pappursigi tam.

11. Kunnasi nga binendisionan ni Jehova i appursigi tam nga imbitan i totolay ta Memorial? (Hageo 2:7)

¹¹ Talaga binendisionan ni Jehova i appursigi tam nga imbitan i totolay ta Memorial. Ta 2021, maski nu egga ira i restriksion gafu ta COVID-19 pandemic, nadde tam i pinaka-aru nga attendance nga 21,367,603. Maggi mat-2.5 times nga mas aru yatun anne ta bilang na Saksi ira ni Jehova ta interu nga mundo! Ngem ari laman tu i karu na nagatende i inninnan ni Jehova. Interesadu yayya ta kada tolay nga nagatende. (Luc. 15:7; 1 Tim. 2:3, 4) Kumbinsidu ittam gafu nga kada imbitattam i tanakuan ta Memorial, uuffunan ittam ni Jehova nga alegan danuri mapia i giffutuadda.—Bibbigan i Hageo 2:7.

12.Anni ira nga mariga nga situasion i posible nga makefugag ta nittam nga iselebra i Memorial? (Innan i letratu.)

¹² Niprofesiya ni Jesus nga ta pangurianan ira nga aggaw, meparubang ittam ta nadduruma nga mariga nga situasion gitta na pangokkontra na familia, panara-darum, gerra, palakag nga kappatay nga taka-taki, anna aru paga. (Mat. 10:36; Mar. 13:9; Luc. 21:10, 11) Nu mittan, yatun ira nga situasion i posible nga makefugag ta nittam nga iselebra i patay ni Jesus. Kunnasi gafu nga nakapam-Memorial i wawwaragi tam maski kunnatun i situasiodda, anna kunnasi ira nga inuffunan ni Jehova?

13. Kunnasi nga binendisionan ni Jehova i gutu anna i determinasion ni Artem nga mam-Memorial ta affukutan?

¹³ Kefuku. Kuan lagapa na wawwaragi tam nga agga-fuku megafu ta pangurug da i mawayya da tapenu iselebra i patay ni Jesus. Kunnatun i ekspiriensa ni Artem. Tagga ta tiempo na Memorial ta 2020, nefuku yayya ta tadday nga 17-metro-kuadrado nga selda nga makkasia i adde ta lima nga presu. Maski nu agga-fuku yayya, nakala lagapa yayya tu pang-emblema na ira ta Memorial. Tapus pinlano na nga ipalappa i palappa ta Memorial maski nu magitadday yayya. Ngem grabe i passigariliu anna paggageg na kakavulu na ta selda. Anni gafu i kingngua na? Nakifabor yayya ta nira nga nu awayya na laman ay  ari labbi ira nga maggageg anna massigariliu maski nu tangoras laman durante na Memorial. Nakaddag si Artem ta pinabbigyadda yayya. Kagian ni Artem, “Niyavu ku ta nira nu kayà da nga ikagì ta nira i meyannung ta Memorial.” Manaki na kakavulu ni Artem ta selda nga ginnan yatun. Ngem kustu nasingadda anna naginna da i pinasselebra ni Artem ta Memorial, nakkiavu ira ta nisa meyannung tatun.

14. Anni ira i remediu nga nakua tapenu makapam-Memorial maski nu egga i COVID-19 pandemic?

¹⁴ COVID-19 pandemic. Turi ta nap-pandemic, ari nga makapam-Memorial tu face-­to-face i totolay ni Jehova. Ngem ari tu yatun i nakefugag ta pam-Memorial da. d Danuri kongregasion nga egga i Internet da ay nam-Memorial gukaban na videoconference. Kunnasi gapa i minillion nga awan tu Internet da? Ta karuan nga nasion, niyunnug na branch ­office ira nga mepagiraw ta TV onu mepaginna ta radio i palappa na Memorial. Fuera paga tatun, nirekord na branch ira i palappa ta maturu tu 500 nga lengguahe tapenu makapam-Memorial  maski danuri egga ta ararayyu nga lugar. Nitulug gapa na wawwaragi danatun nga recording tari ira ta magawag tatun.

15. Anni i magigiammum ta Bible study nga si Sue?

¹⁵ Pangokkontra na familia. Para ta karuan, i pinakamariga nga situasion nga makefugag ta pam-Memorial ay i pangokkontra na familia. Kunnatun i ekspiriensa na Bible study nga si Sue. Ta 2021, ta aggaw nige na Memorial, kinagi ni Sue ta mangi-Bible study ta nisa nga ari yayya maka-atende ta Memorial megafu ta kokkontradda yayya ta baleda. Binibbig na mangi-Bible study ta nisa i Lucas 22:44. Tapus nipakanawag na ta nisa nga nu mappasa-pasa ittam ta ziga-riga, mawag nga tuttulattam i ehemplo ni Jesus nga nakimallo kani Jehova anna nalanna-lanno i pattalo na ta nisa. Ta tumunug nga aggaw, niprepara ni Sue i emblema ira anna giniraw na i espesial nga programa na Morning Worship ta jw.org. Turi ta gabi ngana, minay yayya ta kuarto na tapus nak-connect yayya ta cellphone na. Kabalin natun, nitura ni Sue ta mangi-Bible study ta nisa: “Talaga napasikammu i nono ku kagabi. Kingnguà i ngamin tapenu maka-atende ngà ta Memorial tapus inuffunan nà ni Jehova. Fermi talaga i ayayya anna appabalo ku!” Moffunan naka kari gapa ni Jehova nu kunnatun i situasiommu?

16. Ngatta makapattalo ittam nga bendisionan ni Jehova i appursigi tam nga magatende ta Memorial? (Roma 8:31, 32)

¹⁶ Talaga appresian ni Jehova i appursigi tam nga iselebra i patay ni Jesus. Makapattalo ittam nga bendisionan na ittam nu ipasingattam i pangappresia tam ta kingngua na para ta nittam. (Bibbigan i Roma 8:31, 32.) Determinadu ittam nakuan gafu nga magatende ta Memorial taw nga dagun anna kuattam i ngamin nga mawayya tam nga mas nga mallallappo ta espiritual ira nga aktibidad durante ta tiempo na Memorial.