UZOẸME UWUHRẸ 4
Eva E rẹ Were Jihova nọ Ma te Kpohọ Emu Owọwọ Olori Na
“Wha hai ru onana rọ kareghẹhọ omẹ.”—LUK 22:19.
OLE AVỌ 19 Emu Owọwọ Olori Na
EWARE NỌ MA TI WUHRẸ a
1-2. Fikieme ma be hai ro ru Emu Owọwọ kukpe kukpe?
ENWENỌ ikpe idu ivẹ (2,000) nọ i kpemu, Jesu o whu kẹ omai re ma sai wo uzuazọ ebẹdẹ bẹdẹ. Aso urere taure o te ti whu, ọ vuẹ ilele riẹ nọ a hae kareghẹhọ obọdẹ oware nana nọ o ru kẹ omai na. Orọnọ okpoware jọ ọ ta nọ a ro ru Emu Owọwọ na ha rekọ ebrẹdi gbe udi.—1 Kọr. 11:23-26.
2 Ma you Jesu, fikiere ma re ru oware kpobi nọ ọ ta kẹ omai. (Jọn 14:15) Oyejabọ nọ ma re ro kpohọ Emu Owọwọ na kukpe kukpe. Ma rẹ jẹ rọ oke yena roro ziezi kpahe oware nọ Jesu o ru kẹ omai jẹ lẹ yere Jihova. Ma re kpohọ usi uwoma ziezi, je zizie ahwo ziọ Emu Owọwọ na. Ma rẹ daoma kpobi re ma sai kpohọ Emu Owọwọ na, o re vo omai vievie he.
3. Eme ma te ta kpahe evaọ uzoẹme nana?
3 Ma te jọ uzoẹme nana ta kpahe eware esa jọ nọ idibo Jihova a bi ru ro dhesẹ nọ a rọ Emu Owọwọ na zaro vievie he. Orọ ọsosuọ, ma bi ru Emu Owọwọ na oghẹrẹ nọ Jesu ọ ta nọ a ro ru ei. Orọ avọ ivẹ, ma re zizie ahwo ze Emu Owọwọ na. Orọ avọ esa, ma re ru Emu Owọwọ na ghelọ epanọ eware e rrọ kẹhẹ.
MA BI LELE EPANỌ JESU Ọ TA NỌ MA RO RU EMU OWỌWỌ NA
4. Eme a be hae ta kpahe kukpe kukpe nọ ma te kpohọ Emu Owọwọ na, kọ fikieme ma gbẹ rọ eware nana zaro ho? (Luk 22:19, 20)
4 Kukpe kukpe, ohwo nọ ọ be kẹ ovuẹ Emu Owọwọ na ọ rẹ rọ Ebaibol kẹ iyo enọ jọ. Ọ rẹ ta kpahe oware nọ o lẹliẹ Jesu whu kẹ omai, gbe epanọ uwhu Jesu na o sai ro voro izieraha ahwo-akpọ kpobi no. Ọ rẹ jẹ ta kpahe oware nọ ebrẹdi avọ udi na u dikihẹ kẹ gbe ahwo nọ u fo nọ a rẹ re ebrẹdi jẹ da udi na. (Se Luk 22:19, 20.) Ere ọvo ho, ọ rẹ jẹ ta kpahe oware nọ Jihova o ti ru kẹ ahwo nọ a te rọ otọakpọ na reuku. (Aiz. 35:5, 6; 65:17, 21-23) Eware yena nọ ma riẹ na, ma rẹ rehọ ae zaro vievie he keme ahwo buobu a riẹ rai hi. A riẹ oware nọ uwhu Jesu u ru kẹ omai hi yọ oghẹrẹ nọ Jesu ọ ta nọ ma ro ru Emu Owọwọ na a be hai ro ru ei hi. Eme o soriẹ ze?
5. Nọ ilele Jesu buobu a whu no, iwuhrẹ erue vẹ e romavia kpahe Emu Owọwọ Olori na?
5 Nọ ilele Jesu buobu a whu no, u kri hi, Ileleikristi erue a tẹ ruọ udevie Ileleikristi uzẹme. (Mat. 13:24-27, 37-39) Ahwo nana a jẹ “ta eme eviẹhọ re a ruẹsi si ilele na lele oma.” (Iruẹru 20:29, 30) Wọhọ oriruo, Ebaibol ọ ta nọ Jesu o whu “ẹsiẹvo rọkẹ oke kpobi re ọ wha izieraha ahwo buobu vrẹ.” Rekọ Ileleikristi erue na a jẹ ta nọ orọnọ ẹsiẹvo u fo nọ Jesu o re whu kẹ izieraha mai hi rekọ ọ rẹ hai dhe ewhewhu. (Hib. 9:27, 28) Ahwo buobu a rọwo ọrue nana. A rẹ jọ ichọche jọ ru oware nọ a re se Emase hayo “Holy Communion” kẹse kẹse. Ejọ i re ru ei kẹdẹ kẹdẹ dede. b Ichọche efa jọ a re ru Emu Owọwọ na ẹmẹsejọ. Rekọ ahwo rai buobu a riẹ oware nọ uwhu Jesu u gine ru kẹ omai hi. Ahwo jọ a rẹ ta nọ ‘Kọ uwhu Jesu na o sai gine ru nọ a rẹ rọ rehọ izieraha mẹ rọvrẹ omẹ?’ Eme o be lẹliẹ ai roro ere? O rrọ ere keme otu jọ a rọwo erue nọ ahwo a be ta inọ uwhu Jesu o sai ru nọ a rẹ rọ rehọ izieraha ahwo rọvrẹ rai hi. Rekọ Ileleikristi uzẹme a bi wuhrẹ ahwo re a riẹ oware nọ uwhu Jesu u ru kẹ omai gbe epanọ u fo nọ ma re ro ru Emu Owọwọ na.
6. Eme a jọ Ebaibol na kiẹ via evaọ ukpe 1872?
6 Evaọ ukpe 1870, Brọda Charles Taze Russell gbe amọfa jọ a tẹ jẹ romatotọ kiẹ Ebaibol na re a riẹ oware nọ o ginẹ ta. A jẹ kiẹ re a riẹ oware nọ uwhu Jesu u gine ru kẹ omai gbe epanọ u fo nọ a re ro ru Emu Owọwọ na. Evaọ 1872, a tẹ jọ Ebaibol na ruẹ nọ uwhu Jesu na o ta ahwo-akpọ kpobi no igbo uzioraha gbe uwhu. A jẹ vuẹ amọfa kpahe uzẹme na nọ a riẹ na. A jẹ rọ oghẹrẹ ebe sa-sa, ebe-usi gbe emagazini whowho uzẹme na kẹ ahwo. U gbe kri hi, a tẹ wariẹ mu Emu Owọwọ na họ eru ẹsiẹvo ẹgbukpe wọhọ epanọ Ileleikristi ọsosuọ a je ru ei.
7. Eware jọ vẹ ma riẹ no fikinọ inievo jọ a romatotọ kiẹ Ebaibol na?
7 Eware nọ Brọda Russell avọ amọfa a kiẹ via na i gbe bi fiobọhọ kẹ omai rite inẹnẹ dede nọ u kri gaga no. Anwọ oke yena ze, Jihova o fiobọhọ kẹ omai riẹ eware buobu kpahe uwhu Jesu gbe irere nọ i ti te ahwo-akpọ kpobi fiki uwhu riẹ no. (1 Jọn 2:1, 2) Ere ọvo ho, eware nọ ma wuhrẹ evaọ Ebaibol e lẹliẹ omai riẹ nọ Jihova o rovie uvẹ fihọ nọ ahwo jọ a te rọ rria bẹdẹ bẹdẹ evaọ obọ odhiwu. Amọfa buobu, a vẹ te rọ otọakpọ na reuku. Eware nana e lẹliẹ omai riẹ nọ Jihova o you omai gaga yọ uwhu Jesu u ru okpoware kẹ omai omomọvo. O tẹ whae ze nọ ma ro you Jihova gaga re. (1 Pita 3:18; 1 Jọn 4:9) Fikiere, wọhọ epanọ inievo mai a je zizie ahwo oke nọ u kpemu na, joma zizie ahwo buobu ze Emu Owọwọ na, ma ve je ru ei oghẹrẹ nọ Jesu ọ ta nọ ma ro ru ei.
MA BI ZIZIE AHWO ZE EMU OWỌWỌ NA
Eme whọ sai ru re whọ ta usi uwoma ziezi jẹ ghale ebe uzizie kẹ ahwo evaọ oke Ekareghẹhọ na? (Rri edhe-ẹme avọ 8-10) e
8. Eme idibo Jihova a be hai ru re amọfa a sai lele ai ru Emu Owọwọ na? (Rri uwoho na.)
8 Nẹnẹ akpọ idibo Jihova a bi ro zizie ahwo ze Emu Owọwọ họ. Evaọ 1881, ukoko o ta nọ jọ inievo nọ e rrọ America a kpohọ uwou jọ evaọ Allegheny, obọ Pennsylvania re a jọ etẹe ru Emu Owọwọ na. Nọ oke o be nyaharo na, inievo na a te je ru Emu Owọwọ na evaọ ikoko sa-sa nọ a rrọ. Evaọ amara Asa, 1940, ukoko o tẹ ta nọ a sai zizie ohwo kpobi nọ ọ gwọlọ ze Emu Owọwọ na ze. Yọ evaọ ukpe 1960, uwou ogha u te printi ebe nọ a re ro zizie ahwo ze Emu Owọwọ na je vi ai se ikoko sa-sa. Onana o jọ orọ ọsosuọ nọ a ro ru ere. Anwọ oke yena ze, a printi ebe uzizie buobu no nọ ma ghale kẹ ahwo no. Kọ fikieme ma ro sei gboja tere inọ ma re zizie ahwo ze Emu Owọwọ na?
9-10. Oghẹrẹ ahwo jọ vẹ a be hae ziọ Emu Owọwọ na? (Jọn 3:16)
9 Oware jọ nọ o be lẹliẹ omai zizie ahwo ze Emu Owọwọ na họ, ohwo nọ ọ re nyaze ẹdẹvo ho ọ tẹ nyaze, ọ rẹ riẹ okpoware nọ Jihova avọ Jesu a ru kẹ ahwo-akpọ kpobi. (Se Jọn 3:16.) Ma gwọlọ nọ ahwo otiọye na a rẹ nyaze re eware nọ a ti yo na i je te ai udu, a vẹ te gbẹ gwọlọ wuhrẹ kpahe Jihova. A ve ti kurẹriẹ ze te gọ Jihova. Amono ọfa ma be hai zizie ze Emu Owọwọ na?
10 Amọfa nọ ma re zizie ze Emu Owọwọ na họ, ahwo nọ a siọ ewuhrẹ gbe usi uwoma ota ba no. Ma re zizie ai re a sae riẹ nọ Jihova o gbe you rai. Ahwo nana buobu nọ ma re zizie na a rẹ nyaze, yọ eva e rẹ were omai gaga nọ ma tẹ ruẹ e rai. Emu Owọwọ na nọ a rẹ nyaze na o rẹ kareghẹhọ ae epanọ eva e jẹ were ai te oke nọ a jẹ gọ Jihova ziezi. Joma ta kpahe ohwo otiọye na jọ. Ọye họ Monica. c U kri gaga no nọ ọ rọ siọ usi uwoma ba ẹta, rekọ evaọ etoke okpẹyao COVID-19 na, ọ tẹ wariẹ mu usi uwoma họ. O kpohọ Emu Owọwọ ukpe 2021. Ọ ta nọ: “Emu Owọwọ na nọ mẹ nyaze na oghẹrẹ riẹ sa, keme u te udhukpe no nọ mẹ rọ ta usi uwoma kẹ ahwo je zizie ai ziọ Ekareghẹhọ na. Mẹ jẹ rọ ajọwha zizie ahwo ze Emu Owọwọ na keme oware nọ Jihova avọ Jesu a ru kẹ omẹ, o da omẹ ẹro fia.” (Ol. 103:1-4) Te ahwo nọ ma zizie a nyaze hayo a nyaze he, ma rẹ gbẹ daoma zizie ahwo ziọ Emu Owọwọ na ghele. Keme ma riẹ nọ oware nọ ma bi ru na o be were Jihova gaga.
11. Eme u dhesẹ nọ Jihova o bi fiobọhọ kẹ omai nọ ma be hai zizie ahwo ziọ Emu Owọwọ na? (Hagai 2:7)
11 Ahwo nọ ma be hai zizie ze Emu Owọwọ na o be were Jihova yọ ọ be ghale omai gaga. Evaọ ukpe 2021, dede nọ ẹyao COVID-19 na ọ rrọ otọ na, ahwo nọ a ziọ Emu Owọwọ na a bu te ima udhegbọvo, idu egba esa gbe udhosa-gbihrẹ gbe egba ezeza gbe esa (21,367,603). Unu ahwo nọ a nyaze na o rehọ enwenọ isiava gbe ubro bu vi unu Isẹri Jihova nọ e rrọ akpọ na soso. Ma riẹ nọ unu ahwo nọ a ziọ Ekareghẹhọ na oye o mae rrọ Jihova oja ha. Rekọ obọ udu na o re rri re ọ riẹ ohwo nọ o ti kurẹriẹ ze te gọe. (Luk 15:7; 1 Tim. 2:3, 4) Ma riẹ nọ ezizie nọ ma be hai zizie ahwo ziọ Emu Owọwọ na yọ edhere jọ nọ Jihova ọ be rọ rehọ omai gwọlọ ahwo nọ a ginẹ gwọlọ gọe.—Se Hagai 2:7.
MA BI RU EMU OWỌWỌ NA GHELỌ OGHẸRẸ NỌ EWARE E RRỌ KẸHẸ
Eva mai e rẹ were Jihova nọ ma te kpohọ Emu Owọwọ na (Rri edhe-ẹme avọ 12) f
12. Eware jọ vẹ e rẹ sae lẹliẹe jọ bẹbẹ re ma ru Emu Owọwọ na? (Rri uwoho na.)
12 Jesu ọ ta nọ evaọ oke urere na, eware sa-sa e te via nọ u ti ru eware ga kẹ omai. Eware wọhọ ẹmo, ahwo uviuwou mai nọ a be wọso omai, ukpokpoma egọmeti, ikpeyao gbe ebẹbẹ efa. (Mat. 10:36; Mak 13:9; Luk 21:10, 11) Ẹsejọ, eware nana i re ru nọ o gbẹ rọ lọhọ tere he re ma ru Emu Owọwọ na. Eme inievo mai a be hai ru re a sai ru Emu Owọwọ na, nọ eware e tẹ make rrọ oghẹrẹ jọ? Kọ eme Jihova ọ be hai ru ro fiobọhọ kẹ ai?
13. Ẹvẹ Jihova o ro fiobọhọ kẹ Artem ru Emu Owọwọ na dede nọ ọ jọ uwou-odi?
13 Nọ ma tẹ rrọ uwou-odi. Inievo jọ nọ a fihọ uwou-odi fikinọ a be gọ Jihova a daoma re a ru Emu Owọwọ na. Joma ta kpahe oniọvo-ọmọzae jọ nọ a re se Artem. Eka jọ taure a te ti ru Emu Owọwọ ukpe 2020, a te fi ei họ uwou-odi. Yọ uwou-odi na o keke wo umuo ho. Oke jọ o jariẹ nọ aimasoi soso a jọ uwou-odi na. Ghele na, emeware jọ i te rie obọ nọ o ro ru ebrẹdi gbe udi Emu Owọwọ na, yọ ọ ta nọ ọ te kẹ ovuẹ Emu Owọwọ na evaọ etẹe. Ahwo nọ a gbẹ jọ uwou-odi na a jẹ hai vovo isigareti yọ a la eka wo umuo ho. Rekọ nọ oke Emu Owọwọ na o te, ọ tẹ lẹ ai inọ, ivie jọ a siọ isigareti ba evovo jẹ siọ eka ba ẹla o tẹ make rọnọ auwa ọvo dede. O je roro nọ a te rọwo kẹe he, rekọ ahwo na a la eka je vovo isigareti hi evaọ oke nọ o je ro ru Emu Owọwọ na. Artem ọ ta nọ: “Mẹ jẹ gwọlọ vuẹ ai oware nọ ma je bi ru Emu Owọwọ.” A ta kẹ oniọvo na nọ a wo uvẹ yena ha. Rekọ nọ a jẹ ruẹ epanọ oniọvo na o bi ro ru Emu Owọwọ na gbe eme nọ ọ be ta, a te nwene iroro jẹ ta nọ jọ ọ vuẹ ai kpahe Emu Owọwọ na.
14. Ẹvẹ ma sai ro ru Emu Owọwọ na nọ ẹyao COVID-19 na o du lahwe?
14 Nọ ẹyao COVID-19 o du lahwe. Nọ ẹyao COVID-19 na o du lahwe, Isẹri Jihova a gbẹ sai kuomagbe ru Emu Owọwọ na ha. Rekọ a rọ oghẹrẹ ofa ru Emu Owọwọ na ghele. d Ikoko nọ e rrọ oria nọ itanẹte e rrọ, a kuomagbe evaọ itanẹte ru Emu Owọwọ na. Evaọ eria nọ itanẹte e rrọ họ, a jọ etẹlivisiọno gbe iredio kẹ ovuẹ na. U te no ere no, ukoko o rekọdo ovuẹ Emu Owọwọ na fihọ evẹrẹ nọ i bu vi egba isoi (500) re inievo nọ e rrọ ewho sa-sa a sai kporo iei ro ru Emu Owọwọ rai. Inievo jọ a tẹ rehọ ai se inievo nọ i wo edhere ọfa nọ a sai ro ru Emu Owọwọ na ha.
15. Eme iku Sue na i wuhrẹ owhẹ?
15 Nọ ahwo uwou mai a tẹ be wọso omai. Nọ ahwo uviuwou ohwo a tẹ be wọso ẹe, o rẹ sae jọ bẹbẹ kẹe re o ru Emu Owọwọ na. Ere o jọ kẹ Sue oke nọ a je ro wuhrẹ iẹe Ebaibol. Evaọ 2021, taure ẹdẹ Emu Owọwọ na o te ti te, Sue ọ vuẹ oniọvo nọ o bi wuhrẹ iẹe Ebaibol inọ ọ te sai ru Emu Owọwọ na ha. Ahwo uwou riẹ a je kpokpo ei. Oniọvo nọ o bi wuhrẹ iẹe na o te se ẹme nọ ọ rrọ obe Luk 22:44 kẹe. Ọ ta kẹe nọ u fo re ma lẹ se Jihova nọ ma te wo ẹbẹbẹ jọ wọhọ epanọ Jesu o ru, keme Jihova o re yo olẹ. Okiokiọ riẹ, Sue ọ tẹ nabe ruẹrẹ ebrẹdi gbe udi nọ o ti ro ru Emu Owọwọ na họ. Ọ tẹ jẹ gaviezọ kẹ isase okpẹdẹ ọrọ ẹdẹ Emu Owọwọ na evaọ jw.org. Evaọ owọwọ, ọ tẹ ruọ ukpẹ riẹ, jẹ rọ ifonu riẹ kuomagbe inievo na ru Emu Owọwọ na. Nọ a ru Emu Owọwọ na no, Sue ọ tẹ vuẹ oniọvo nọ o bi wuhrẹ iẹe Ebaibol nọ: “Ẹme nọ whọ vuẹ omẹ odẹnukpo u fiobọhọ kẹ omẹ gaga. Mẹ rẹroso Jihova yọ o fiobọhọ kẹ omẹ gaviezọ kẹ ovuẹ Emu Owọwọ na. Eva e were omẹ gaga inọ me lele owhai ru Emu Owọwọ na.” Makọ oghẹrẹ nọ eware e rrọ kẹ owhẹ kẹhẹ, Jihova o ti fiobọhọ kẹ owhẹ ru Emu Owọwọ enukpe nana re.
16. Ẹvẹ Jihova o re rri omai nọ ma te kpohọ Emu Owọwọ Olori na? (Ahwo Rom 8:31, 32)
16 Ghelọ epanọ eware e rrọ kẹ omai kẹhẹ, ma te kpohọ Emu Owọwọ Olori na, eva mai e te were Jihova. Ọ te ghale omai re keme ma be rọ ere dhesẹ nọ oware nọ o ru kẹ omai o da omai ẹro. (Se Ahwo Rom 8:31, 32.) Fikiere evaọ ezi Emu Owọwọ ukpe nana, joma daoma kpohọ usi uwoma ziezi, je zizie ahwo buobu. Joma gbaemu nọ oware ovo o rẹ whaha omai Emu Owọwọ ukpe nana ha.
OLE AVỌ 18 Wo Edẹro kẹ Ẹtanigbo Na
a Evaọ Edivẹ-Oka, nọ o rrọ edẹ ene amara Ane, 2023, ima ahwo buobu evaọ akpọ na soso a ti kokohọ eria sa-sa re a ru Emu Owọwọ Olori na. Onana o te jọ orọ ọsosuọ ahwo jọ nọ a ti ro kpohọ Ekareghẹhọ na. Amọfa nọ a jọ ukoko na vẹre nọ a gbẹ be nyaze ewuhrẹ hẹ, a te nyaze re. O lọhọ kẹ ahwo jọ họ re a kpohọ Emu Owọwọ na. O sae jọ nọ ahwo uwou rai a bi kpokpo ai hayo a wo ebẹbẹ efa jọ. Rekọ riẹ nọ who te ru utho ẹgba ra je kpohọ Emu Owọwọ na, eva ra e te were Jihova.
b Ileleikristi erue na a rẹ ta nọ oke nọ a te bi ru Emu Owọwọ na, ebrẹdi gbe udi na u re zihe ruọ ugboma gbe azẹ Jesu. U te no ere no, a rẹ ta nọ ẹsikpobi nọ a tẹ be re ebrẹdi jẹ da udi na, yọ Jesu ọ be wariẹ whu kẹ ai na.
c Ma nwene edẹ na jọ.
d Kpohọ jw.org re who se izoẹme nọ a kere kpahe, “2021 Memorial Commemoration.” (Epanọ Ma ro Ru Emu Owọwọ Ukpe 2021)
