1-2. Busana naki thukahindana okw’Ibuka obuli mwaka?

 HAKUHI emyaka 2,000 eyihwere, Yesu mwahayo engebe yiwe busana nethu, erithukyungulira enzira y’eribaniramo engebe y’erikotha. Omw’ithumbi athali aholha, Yesu mwalhaghira abigha biwe athi ambi ibibuka ekindu ky’olhwanzo eky’abakolera omw’ikolha omukonga muke owaliko omuggati n’evini.​—1 Kor. 11:23-26.

² Thukaghondera ekihano kya Yesu kundi thumwanzire kutsibu. (Yn. 14:15) Obuli mwaka omwa buthuku bw’Eryibuka, thukakanganaya ku thukasima eky’abirithukolera omw’ihiraho endambi y’erisaba n’erighanirya okwa ekya lhuholho lhwiwe lhukamanyisaya. Kandi ithunatsemire thukongera erisangira omw’ithulira, erihira omwa bandi mw’omuhwa ngoku thwanga thoka erithuyiyungako okwa mukonga w’embaghane oyu. Neryo kandi thwabirithwamu erithendi lighira ekyosi-kyosi erithukakirya okw’ihindana okw’Ibuka.

3. Thukendi kania okuki omo mwatsi ono?

³ Omo mwatsi ono, thukendi lebya esyonzira isathu esyo abandu ba Yehova babirilhangiriramo bathi bakahiraho akaghalha kanene erithoka eryibuka olhuholho lhwa Yesu: (1) omw’ikolha ngoku Yesu akolha, (2) omw’ikokya abandi okw’Ibuka, na (3) omw’ihindana okw’Ibuka nomuhangabya emibere eyikalire.

4. Ni kwenene yahi eyikakanibawako obuli mwaka okw’Ibuka, kandi busana naki sithutholere thukalenzya-lenzyayo? (Luka 22:19, 20)

⁴ Obuli mwaka okw’Ibuka, thukahulikirira omukania owaseghemere okwa Biblia owakaha eby’erisubirya ebilhangirikire  okwa bibulyo nga by’ebyo. Thukaminya ekikaleka abandu ibayithagha endongolya kandi ngoku olhuholho lhw’omundu mughuma lhwangana lhusyaho ebibi by’abangyi. Thukibukibawa ekya omuggati n’evini bikimanira kandi nga ni bahi abatholere eribiryako. (Soma Luka 22:19, 20.) Kandi thukaghaniraya okwa mighisa eyo abawithe amaha w’okwa kihugho balindirire. (Isa. 35:5, 6; 65:17, 21-23) Sithutholere thukalenzya-lenzya ekwenene eyi. Esyobbiliyoni sy’abandu sibali yitheghereraya ekwenene eyi, kandi sibasi ekihongo kya Yesu nga ni ky’obughuli bungahi. Kandi sibal’ibuka olhuholho lhwa Yesu ngoku iyo akolha. Busana naki?

5. Abangyi b’okwa bakwenda babere babiriholha, abandu mubatsuka eribya bak’ibuka bathi olhuholho lhwa Yesu?

⁵ Buthuku buke abangyi b’okwa bakwenda ba Yesu baliholire, Abakristayo ab’amabehi mubingira omwa kithunga. (Mt. 13:24-27, 37-39) Mubabugha “emyatsi y’amabehi erikura abigha erikwamabo.” (Emib. 20:29, 30) Emighuma y’okwa “myatsi y’amabehi,” eyo erighunzerera Abakristayo b’amabehi batsuka erikangirirya yabya yithi Yesu mwathahayo omubiri wiwe “ngendo nguma eriheka ebibi by’abandu bangyi,” ngoku e Biblia yikabugha, aliwe bathi ekihongo kiwe kitholere ikyabya kikahebwayo ngendo na ngendo. (Ebr. 9:27, 28) Munabwire abandu bangyi ab’emithima myolho bakaligha engangirirya y’amabehi eyi. Bakahindana haghuma omwa syokanisa mughulhu wosi​—okwa bundi buthuku ibahindana buli kiro​—eryibuka ekyabiryahulhwamo “Obuhere bw’Emisa.” b Awandi madini ak’ibuka olhuholho lhwa Yesu ikwanoko, aliwe abangyi b’okwa bandu babu sibasi ndeke ekihongo kya Yesu nga kikamanyisayaki. Abandi ibangana yibulya bathi, ‘Mbwino kwenene olhuholho lhwa Yesu lhukamanyisaya lhuthi nangana ghanyirwa ebibi byaghe?’ Busana naki ibabulya bathya? Kundi okwa bundi buthuku, bakahambawako busana n’abakathika-thikira eky’eribugha indi ekihongo kya Yesu kikaleka ikyathokekana ithwe erighanyirwa ebibi byethu. Abigha ba Yesu ab’okwenene babirikolha kyahi bikahika oko mwatsi oyu?

6. Aho omwaka owa 1872 ahikira, egurupu y’Abigha be Biblia babya ibamabiriyitheghereryaki?

⁶ Okw’ihwererera ly’ekighana kye 19, egurupu y’Abigha be Biblia eyasondolhawa na Taze Russell muyatsuka erigha kutsibu Amasako. Mubanza eriminya ekwenene eyihambire okwa bughuli bw’ekihongo kya Yesu kandi olhuholho lhwiwe nga lhutholere ilhw’ibukwa lhuthi. Aho omwaka 1872 ahikira, erikwamana ne Biblia babya ibamabiriyitheghererya ngoku kwenene Yesu mwahayo endongolya busana n’abandu bosi. Mubathayihunira n’ebyo b’igha. Omwakanya k’ekyo, mubalhalhania omwatsi erilhabira omwa bitabu, esyompapura sy’amakuru, n’esyogazeti. Buthuku buke enyuma waho, omw’igherererya Abakristayo ab’omwa kighana ky’erimbere, mubatsuka eribya bak’ibuka olhuholho lhwa Yesu murundi mughuma obuli mwaka.

7. Thunemughasirwa thuthi omw’isekulya eryo Abigha be Biblia abakera bakolha?

⁷ Munabwire thukaghasirawa omw’isekulya eryo abalhume Abakristayo abo bakolha kera. Thuthi? Omwa buwathikya bwa Yehova, ameso wethu abirikyungulhwa erilhangira ekwenene eyihambire okwa kihongo kya Yesu n’ekya kikaberereraya. (1 Yn. 2:1, 2) Kandi thwabiriminya ngoku omwa Biblia muli amaha w’emiringo ibiri okwa bandu abakatsemesaya Nyamuhanga​—engebe eyithehonda  okwa bandi elhubulha n’engebe y’erikotha okwa syomiliyoni sy’abandi okwa kihugho. Thukayithunda hakuhi na Yehova thukalengekania okwa lhwanzo lhunene olho athuwithire kandi ngoku obuli mughuma w’okw’ithwe akaghasirawa omwa kihongo kya Yesu. (1 Pet. 3:18; 1 Yn. 4:9) Neryo ng’abalikyethu abathaleghulha abakera, nethu thukakokaya abandi erithuyiyungako okw’Ibuka erikakolhawa ngoku Yesu anakolha.

8. Abandu ba Yehova babirikolhaki erikokya abandi okw’Ibuka? (Lebaya ekisasani.)

⁸ Eritsuka kera abandu ba Yehova basibwe ng’abakakokaya abandi okw’Ibuka. Kera omwa 1881, balikyethu e United States mubakokibwa erihindana haghuma omwa nyumba ya mulikyethu e Allegheny, Pennsylvania, okwa mukonga w’embaghane oyo. Enyuma waho, obuli kithunga mukyabya kikakolha Eryibuka ahabwakyo. Omo Kwakasathu 1940, abathuliri mubabwirwa indi bangana kokya owosi-wosi omwa bulhambu bwabu oyukanzisibawa. Omwa 1960, omurundi w’erimbere, e Beteli muyaha ebithunga by’esyokada esy’erikokya abandi. Eritsuka-tsukana n’aho, esyobbiliyoni sy’esyokada esy’erikokya abandi okw’Ibuka syabirighabwa. Busana naki thukakolesaya endambi n’akaghalha kanene erikokya abandi?

9-10. Ni bahi abakaghasirawa omwa kaghalha akathukahiraho erikokya abandi okw’Ibuka? (Yoane 3:16)

⁹ Enzumwa nguma eyikaleka ithwakokya abandi okw’ibuka haghuma nethu olhuholho lhwa Yesu yiri yithi abakahindana nethu omurundi w’erimbere bakaminya ekwenene eyihambire okwa ekya Yehova na Yesu babirithukolera ithwe bosi. (Soma Yoane 3:16.) Thuwithe amaha thuthi ebya bakalhangira n’eriowa  okw’Ibuka bikendi bahiramo omuhwa w’erianza eriminya bingyi n’eribya baghombe ba Yehova. Aliwe hane n’abandi bakaghasirawa.

¹⁰ Kandi thukakokaya n’abathakikolera Yehova. Thukakolha ekyo eribibukya ngoku Nyamuhanga akinabanzire. Abangyi bakaligha erikokya lyethu kandi thukatsema kutsibu thukabalhangira. Erihindana okw’Ibuka kikabibukaya etseme eyo babya bakabana bakakolera Yehova kera. Thalengekania okwa ky’erileberyako kya Monica. c Mwawathikibwa amathasyatsuka erithulira omwa kihunzo ky’ekorona. Abere abirihindana okw’Ibuka omwa 2021, mwabugha athi: “Eryibuka eri lyamanyibera ly’embaghane kutsibu. Omurundi w’erimbere omwa myaka 20, munathokire erithulira abandu n’eribakokya okw’Ibuka. Omo kwenene ngahweraya omuthima waghe okw’eki, kundi ngasima ekya Yehova na Yesu babirinyikolera.” (Esy. 103:1-4) Mbulha abandu balighire erikokya lyethu kutse eyihi, n’omuhwa munene thukakokaya abandi okw’Ibuka, ithunasi ngoku Yehova akasima akaghalha akathukahiraho.

11. Yehova abiritsumulha athi akaghalha akathukahiraho erikokya abandu okw’Ibuka? (Hagai 2:7)

¹¹ Yehova abiritsumulha kutsibu akaghalha akathukahiraho erikokya abandu okw’Ibuka. Omwa 2021, nomuhanabya ebikakiryo busana n’ekihunzo ky’ekorona, abandu 21,367,603 mubahindana. Omughanzo oyo ni hakuhi kabiri n’embindi omughanzo w’Abema ba Yehova omwa kihugho kyosi! Sibugha ambu ekya Yehova akatsomana w’omughanzo, aliwe b’abandu. (Lk. 15:7; 1 Tim. 2:3, 4) Thuyikethere ngoku Yehova akakolesaya omubiiri wethu w’erikokya erithuwathikya eribana ab’emithima myolho.​—Soma Hagai 2:7.

12. Ni byahi ebyanga leka ikyathukalira erihindana okw’Ibuka? (Lebaya ekisasani.)

¹² Yesu mwalhaghulha athi omwa biro by’enyuma-nyuma, thwanga bwene emibere eyikalire ey’emiringo yosi​—erihakanisya ly’abahughu, eriendereribwa, esyonyuhi, esyondwalha, n’ebindi bingyi. (Mt. 10:36; Mk. 13:9; Lk. 21:10, 11) Okwa bundi buthuku, emibere eyi yikaleka ikyathukalira eryibuka olhuholho lhwa Yesu. Balikyethu babirikolhaki erirwanisya emibere eyikalire ng’eyi, kandi Yehova abiribawathikya athi?

13. Yehova mwatsumulha athi obuthubaha n’erithwamu lya Artem ery’erikolha Eryibuka iniane omwa ngomo?

¹³ Erihirwa omwa ngomo. Balikyethu abali omwa ngomo busana n’erikirirya lyabu bakakolha ngoku banga thoka eryibuka olhuholho lhwa Yesu. Thalengekania okwa ky’erileberyako kya Artem. Omwa buthuku bw’Eryibuka omwa 2020, mwahirwa omwa ngomo omwa kisenge eky’esyomita 17 okwa 17, ekyabyamo abanya ngomo bathano okwa buthuku obo. Nomwanabya omwa ngomo, mwathoka eribana eby’erikolesya ng’ebiminyisyo, kandi mwathegheka erilhabya omukania w’Eryibuka busana n’eriyighasira. Aliwe abo abya nabo omwa ngomo ibakanywa ethaba kandi ibakatsuma kutsibu. Mwakolhaki? Mwabasaba athi nga bangana leka erinywa ethaba kutse eritsuma hakiri ahabw’esaha nguma nyisa. Ekyaswekaya Artem, mubaligha bathi sibendinywa ethaba kutse eritsuma okwa ndambi y’Eryibuka. Artem akabugha athi, “Munayihayo eribabwira ebihambire okw’Ibuka.” Nomwakine indi mubabugha bathi sibanzire eriowa ebihambire okwa mukonga oyo, babere bakowa n’erilhangira Artem akakolha Eryibuka, mubamubulya ebyosi ebihambire kulyo.

14. Ni kaghalha kahi akahirawaho erithoka erihindana okw’Ibuka nomuhanabya ekihunzo ky’ekorona?

 ¹⁴ Ekihunzo ky’ekorona [COVID-19]. Ekihunzo eki kyabere kikabuthuka, abandu ba Yehova mubabya isibanga hindana okw’Ibuka busu okwa busu. Aliwe ekyo mukithabakakirya okw’ihindana okw’Ibuka. d Ebithunga ebiwithe e Intaneti mubyahindana okw’Ibuka omw’ikolesya enganirania y’evidiyo. Kandi ibbwa esyomiliyoni sy’abathabya bawithe e Intaneti? Omwa bindi bihugho, muhabya emitheghekere ey’erihulikirira omukania erilhabira okwa tivi kutse okwa redio. Eryongera okw’ekyo, ebyaghanda by’emithahulha mubyarikodinga omukania oyo omwa mibughe eyilhabire omu 500 nuku n’abali omwa myanya y’ehaali babye ibangana hindana okw’Ibuka. Kandi baghalha bethu abathaleghulha mubahiraho emitheghekere y’erithwalira emikania eyirikodingire eyo yabakayithaghayo.

15. Wam’ighaki okwa ky’erileberyako ky’omwigha we Biblia ya Sue?

¹⁵ Erihakanisya ly’abahughu. Okwa bandi, ekitsibu ekinene ekikaleka ibathathoka erihindana  okw’Ibuka ly’erihakanisya ly’abahughu. Thalengekania okwa ky’erileberyako ky’omwigha we Biblia oyukahulhawamo Sue. Omwa 2021, omwa malhaliyo w’Eryibuka, Sue mwabwira oyukamweghesaya e Biblia athi busana n’erihakanisya eriri eka, anganasyalemwa erihindana okw’Ibuka. Oyukamweghesaya oyo mwamusomera Luka 22:44. Neryo mwamusoborera ngoku omughulhu thukabya omwa mibere eyikalire, thutholere ithwagherererya eky’erileberyako kya Yesu omw’isaba Yehova n’erimuyikethera ighuma. Ekiro ekyakwamako, Sue mwathegheka ebiminyisyo kandi mwalebya endegheka y’embaghane ey’Eriramya ery’Engyakya okwa jw.org. Erigholho eryo, iniane omwa kisenge kiwe mw’eyuwene, mwayiyunga okw’Ibuka omw’ikolesya esimu. Enyuma waho, Sue mwahandikira oyukamweghesya e Biblia athi: “Muligholho muwanyihirire mw’omuhwa munene kutsibu. Munakolire ekyosi-kyosi ekyo nanga thoka erihindana okw’Ibuka, kandi kwenene Yehova mwanyiwathikirye. Sinangathoka erisoborera nga ngatsemire bungahi kandi nga ngasima bungahi!” Wukalengekanaya mbwino nawu Yehova angana kuwathikya wamabya omwa mibere eyiri ng’eyi?

16. Busana naki ithwayikethera ngoku Yehova akendi tsumulha akaghalha akathukahiraho erihindana okw’Ibuka? (Abanya Roma 8:31, 32)

¹⁶ Yehova akasima kutsibu akaghalha akathukahiraho eryibuka olhuholho lhwa Yesu. Thwangana yikethera ngoku akendi thutsumulha thukakangania ku thukasima eky’abirithukolera. (Soma Abanya Roma 8:31, 32.) Neryo kwesi ka thuthwemu erihindana okw’Ibuka ery’omwaka ono n’erikolha ekyosi-kyosi ekya thwanga thoka eryongera erisangira omwa mibiiri y’obunyakirimu omwa buthuku bw’Eryibuka.