1-2. Morwasinke atu karere poMurarero gwaHompa nkenye mvhura?

 HAMBARA pana piti nomvhura 2000 kutunda apa Jesus ga geve eparu lyendi mwarwetu yipo tu gwane mpito zokukagwana mwenyo gwanarunye. Masiku gokuhulilira komeho aka fe, Jesus kwa geve mpangera kovarongwa vendi yipo va diworoke nzambo zendi pokuruganesa yininke yoyisesu, eyi kwa kwatera mo mboroto novinyu.—1 Kol. 11:23-26.

² Ose kulimburukwa mpangera zaJesus morwa twa mu hara unene. (Joh. 14:15) Nkenye mvhura yivike yongandi komeho gu tameke Murarero gwaHompa, ntani konyima zoMurarero gwaHompa, ose kulikida rupandu rwetu pokuteda ko nokukanderera ko kweyi adi tanta nomfa dendi kwetu. Ose hena kulihameka mo noruhafo mosirugana sokuzuvhisa ntani nokuzigida vantu wovanzi yipo va ya lipakerere nose posilika esi somulyo. Ntani tuna tokomene mokudira kupulisira nkenye eyi yi tu kondere tu dire kukara poMurarero gwaHompa.

3. Yisinke natu ka zogera mosirongwa esi?

³ Mosirongwa esi, tatu ka zogera nonkedi ntatu omu vantu vaJehova va tura po malizambero gomanene yipo va diworoke nomfa daJesus: (1) pokurugana Murarero gwaHompa monkedi omu ga yi va rongere Jesus, (2) pokuzigida ko wopeke koMurarero, ntani (3) pokukara poMurarero nampili momaukaro goudigu.

4. Mapuro musinke ava limburura nkenye mvhura poMurarero gwaHompa ntani morwasinke ya karera nomulyo tu dire kudivara mausili ogo? (Rukasa 22:19, 20)

⁴ Nkenye mvhura poMurarero, ose kupurakena kosiuyungwa sokutundilira moBibeli esi asi limburura mapuro gongandi. Ose  kulironga eyi vantu va hepera sizoweseso ntani nomu nomfa da gumwe da dongonona po nonzo dovantu wovanzi. Mosiuyungwa oso kutudiworokesa mo eyi za fanekesa mboroto novinyu ntani ava nava vhura kulya komboroto nokunwa kovinyu. (Resa Rukasa 22:19, 20.) Ntani ose kugazadara ko komatungiko gomawa aga ngava ka gwana ava va kara nehuguvaro lyokukaparukira pevhu. (Jes. 35:5, 6; 65:17, 21-23) Kapisi tu divare mausili ogo. Mabiliyona govantu kapi va kwata egano mausili ogo ntani kapi va diva omu nzambo zaJesus za kara nomulyo. Ntani awo kapi ava kara noMurarero gwaHompa, kuliza nomu Jesus ga yi rongere varongwa vendi omu nava yi rugana. Morwasinke ya karera ngoso?

5. Monkedi musinke vantu va tamekere kudiworoka nomfa daJesus, konyima zapa sinzi sovapositoli vendi va fire?

⁵ Konyima zapa sinzi sovapositoli vaJesus va fire, mombungakriste kwa tamekere kukara mo Vakriste woyipempa. (Mat. 13:24-27, 37-39) Awo kwa ‘pirwire usili’ yipo va gwanene po varongwa. (Yirug. 20:29, 30). Usili umwe ou va ‘pirwire’ Vakriste owo woyipempa kuna kara asi awo kwa tamekere kuronga asi Jesus kapi ga geve rutu rwendi “rumwe tupu mokuzowora vantu kononzo,” ngomu za yi uyunga Bibeli, nye asi nzambo zendi za hepa ku zi ruguruka ku zi zamba. (Heb. 9:27, 28) Sinzi sovantu neina kwa pura marongo ogo goyipempa. Awo kuza konongereka nkenye sivike, ano poyiruwo yimwe nkenye ezuva yipo va ka diworoke nomfa daJesus, eyi ava tumbura moukareli waKatolika asi “Nzambo zeMisa ndi Emisa.” b Maukarelikarunga gamwe kudiworoka nomfa daJesus yikando yoyisesu, nye sinzi sawo ava va kara mo kapi ava kwata egano nawa-nawa eyi azi tanta nzambo zaJesus. Vamwe kuvhura kulipura asi: ‘Ngoso nomfa daJesus kuvhura kudongonona po nonzo dange ndi?’ Morwasinke ava li pulire epuro olyo? Morwa awo kwa va kundama magano govantu ava ava uyunga asi nonzo detu kapi tava vhuru ku di dongonona po kupitira monomfa daJesus. Ngapi omu varongwa vaJesus va kohwenene po udigu owo?

6. Yisinke ka kwete egano kambunga kovalirongi woBibeli mo-1872?

⁶ Mo-1870, kambunga kovalirongi woBibeli aka ga pitisilire Charles Taze Russell, kwa tamekere kulironga Matjangwa momunene. Awo kwa here kudiva usili wokuhamena mulyo gonzambo zaJesus ntani nomu nava diworoka nomfa dendi. Mo-1872, awo kwa kwete egano asi Jesus kwa geve sizoweseso kovantu navenye. Awo kapi tupu va lipungwilire vene eyi va lirongere. Nye mevango lyoyo, awo kwa yi divisire kwava wopeke kupitira monobuke, monosayitunga ntani nomoyifo. Ntani konyima zoyo, awo kwa honenene Vakriste womosiruwo sanare pokutameka kuponga rumwe momvhura va kare noMurarero gwaHompa.

7. Ngapi omu tuna kugwanena mo uwa mepaparo eli va rugene valirongi woBibeli wokuhova?

⁷ Neina ose kugwanena mo mauwa momauzera aga va gwene vagara owo woVakriste nomvhura dononzi dina kapita. Monkedi musinke? Jehova kwa tu vatera tu kwate egano eyi azi tanta nzambo zaJesus ntani neyi ngazi ka tu ruganena komeho, kukwatera mo vantu navenye. (1 Joh. 2:1, 2) Ose twa lironga hena asi Bibeli kwa faturura mahuguvaro gavali govantu ava ava hafesa Karunga, vamwe ngava ka parukira meguru nomarutu gopampepo, ano mamiliyona govantu ngava ka gwana mwenyo gwanarunye paapa pevhu. Ose kuhedera unene Jehova pepi apa atu gazadara ko kuhamena omu ga tu hara ntani nomu atu gwanene mo uwa monzambo zaJesus pamundinda. (1 Pet. 3:18; 1 Joh. 4:9) Yipo nye, ngwendi  vanavazinyetu wovalimburukwi womosiruwo sanare, ose kuzigida ko wopeke yipo va ya kare kumwe nose poMurarero gwaHompa, kuliza nomu ga yi rongere Jesus varongwa vendi omu nava yi rugana.

8. Yisinke va rugana vantu vaJehova mokuzigida vantu wopeke koMurarero gwaHompa? (Tara efano.)

⁸ Vantu vaJehova kwa zigida vantu koMurarero gwaHompa ure wonomvhura dononzi. Ketamekero lyomvhura 1881, vanavazinyetu womoAmerika kwa va zigidire yipo va ka ponge mokahore-hore membo lyamunazinyetu gomugara, moAllegheny, Pennsylvania, yipo va ka kare nosilika oso sokulikarera. Ano konyima, nkenye mbungakriste kwa kere noMurarero gwaHompa pwavene. MwaNsinano 1940, vazuvhisi kwa va tanterere asi kuvhura va zigide nkenye ogu gomomukunda gwawo ogu ga likidire elituromo. Mo-1960, Beteli kwa geve sikando sokuhova yimbapira yezigido konombungakriste. Kutunda nye opo, mabiliyona goyimbapira yezigido yoMurarero kwa yi gavera. Morwasinke atu ruganesere siruwo setu sosinzi ntani nokulitura mo unene tu zigide wopeke koMurarero?

9-10. Wolye ava gwanene mo uwa melituromo lyetu lyokuzigida wopeke koMurarero gwaHompa? (Johanesa 3:16)

⁹ Konda zimwe zeyi atu zigidire vantu wopeke va ya li pakerere kumwe nose poMurarero gwaHompa kuna kara asi tuna hara vantu ava ava wiza sikando sawo sokuhova va ya lironge kuhamena eyi ga tu ruganena Jehova naJesus. (Resa Johanesa 3:16.) Tuna si huguvara asi eyi ava ya mono noku ya zuvha poMurarero gwaHompa ngayi va tumangeda va lironge yoyinzi ntani noku ya kara vakareli vaJehova.  Nye wopeke nawo kugwanena mo hena uwa.

¹⁰ Ose hena kuzigida koMurarero ava va hageka kukarera Jehova. Ose ku va zigida po ku va diworokesa asi Karunga ha ga va harera simpe. Wovanzi kutambura ezigido lyetu ntani ose kuhafa apa atu va mono. Kukara poMurarero gwaHompa ku va diworokesa omu ngava hafere kukarera Jehova nare. Tu tareni sihonena saMonica. c Age kwa tamekere kukara hena muzuvhisi posiruwo souvera woKorona. Konyima zokukara poMurarero gwaHompa momvhura 2021, age kwa uyunga asi: “Murarero ogu kwa kere nomulyo unene kwange. Aso kwa kere sikando sange sokuhova kutunda apa da pitire po nomvhura 20 ntani naya zuvhisilire hena vantu noku va zigida koMurarero gwaHompa. Ame kwa li hamekere mo nomutjima nagunye morwa na hafa kweyi ga ruganena nge Jehova naJesus.” (Epis. 103:1-4) Yi kare asi vantu kutambura ezigido lyetu ndi hawe, ose kutwikira kuzigida wopeke koMurarero gwaHompa morwa twa yi diva asi Jehova kuhafera elituromo lyetu.

11. Ngapi omu Jehova ga tungika elituromo lyetu lyokuzigida vantu koMurarero? (Hagayi 2:7)

¹¹ Jehova kwa tungika elituromo lyetu lyokuzigida vantu koMurarero gwaHompa. Nampili ngomu twa kere nomasiliko momvhura 2021 morwa uvera woKorona, vantu wokusika po-21 367 603 kwa kere poMurarero gwaHompa. Nsene o hetakanesa sivaro oso nosivaro soNombangi daJehova uzuni mudima, no ya dimburura asi aso kwa ligwederera yikando yokusika hambara kwa yivali noharufa! Yosili, Jehova kapi tupu a kara nosinka kosivaro sovantu ava ava kara poMurarero gwaHompa. Nye age kwa kara nosinka kwa nkenye muntu pamundinda, ogu a kara poMurarero gwaHompa. (Ruk. 15:7; 1 Tim. 2:3, 4) Tuna si huguvara asi apa atu gava yimbapira yezigido kwava wopeke, Jehova kutuvatera yipo tu gwane vantu wonomutjima donongwa.—Resa Hagayi 2:7.

12. Yininke musinke nayi tu ninkisa yi tu karere udigu mokukara poMurarero gwaHompa? (Tara efano.)

¹² Jesus kwa pumbire asi pomazuva gopouhura, ngatu ligwanekera nomaudigu ngwendi makwamakwamo gokutunda kovanekoro, mahepeko, yita, mauvera gomukagu ntani nayimwe hena yoyinzi. (Mat. 10:36; Mar. 13:9; Ruk. 21:10, 11) Poyiruwo yimwe, maudigu ogo kutuninkisa yi tu karere udigu kukara poMurarero gwaHompa. Yisinke va rugana vanavazinyetu yipo va funde po maudigu ogo ntani ngapi omu ga va vatera Jehova?

13. Ngapi omu Jehova ga tungikire uradi nerwameno lyaArtem lyokurugana Murarero gwaHompa ngomu ga kere modorongo?

¹³ Kututura modorongo. Vanavazinyetu ava ava tura modorongo morwa epuro lyawo, kurugana eyi nava vhura kurugana ko yipo va diworoke nomfa daJesus. Tu zeni tu ka tare sihonena samunazinyetu Artem. Mo-2020 moyivike yongandi komeho gu tameke Murarero gwaHompa ntani konyima zoMurarero gwaHompa, age kwa mu tulire mokankondwa komodorongo omu ngava tura vagara vatano posikando simwe. Nampili ngomu ga kere modorongo, age simpe ga vhulire kugwana yininke eyi ga ruganesere poMurarero gwaHompa ntani age kwa tokwere kugava siuyungwa soMurarero gwaHompa yipo a gwanene mo uwa. Nye vagara ava ga kere kumwe nawo ngava koko unene makanya ntani ngava ruganesa unene nonkango donondona. Yisinke eyi ga rugene? Age kwa va pulire nsene kuvhura va hageke kukoka makanya ntani va dire kuswaura ure wovili zimwe tupu. Ayo kwa tetukisire Artem apa vanadorongo vakwawo va yi tambwire mokudira kukoka  makanya noku swaura posiruwo soMurarero gwaHompa. Artem kwa uyunga asi: “Ame kwa va tanterere kuhamena Murarero gwaHompa.” Nampili ngomu va uyungire asi kapi vana hara kuzuvha kuhamena silika oso, nye konyima zapa va mwene ntani nokuzuvha omu Artem ana kurugana Murarero gwaHompa, awo kwa mu pulire nayinye kuhamena Murarero gwaHompa.

14. Ngapi omu vantu vaJehova va tulire po mawapaiko yipo va kare noMurarero gwaHompa posiruwo souvera woKorona?

¹⁴ Uvera woKorona. Apa uvera ou wa tamekere, vantu vaJehova kapi va vhulire kurugana Murarero gwaHompa sipara nosipara. Nye oyo kapi ya va konderere mokurugana Murarero gwaHompa. d Nombungakriste edi ya tompokere kuruganesa intaneta kwa rugene Murarero gwaHompa kupitira kozoom. Nye ngapi kuhamena mamiliyona gava ya dilire kutompoka mokuruganesa intaneta? Nomberewa doBeteli kwa tulire po mawapaiko yipo vantu va tarere siuyungwa soMurarero kotivi ndi va si purakene kupitira koradiyo. Mokugwederera ko, nomberewa doBeteli kwa kwatekere siuyungwa oso momaraka  gokupitakana po-500, yipo asi vantu womomukunda va purakene kosiuyungwa oso. Ntani vanavazinyetu kwa tulire po mawapaiko yipo va twarere vanavazinyetu ava va hepere makwateko ogo.

15. Yisinke ono lirongere ko kosihonena somurongwa gedina Sue?

¹⁵ Marwaneso gokutundilira kovanekoro. Kwa vamwe, ekondjeso lyenene eli ava ligwanekere nalyo mokukara poMurarero gwaHompa kuna kara erwaneso lyokutundilira kovanekoro. Tu tareni sihonena somurongwa gumwe goBibeli gedina Sue. Mo-2021, apa kwa hupire ezuva limwe komeho gu ya kare Murarero gwaHompa, Sue kwa tanterere murongi gwendi goBibeli asi kapi nga ka kara po poMurarero gwaHompa morwa vamwe vekoro lyendi kwa mu rwanesere. Murongi gwendi goBibeli kwa mu reserere Rukasa 22:44. Makura yipo ga mu fatwililire asi nsene kuna kuligwanekera nomaudigu, twa hepa kuhonena Jesus pokuhedera Jehova mekanderero ntani nokuhuguvara mwendi. Ano ezuva eli lyakweme ko, Sue kwa wapaikire mboroto novinyu ntani nokutarera elikwamo lyongurangura lyosiuyungwa sokulikarera ko jw.org. Ngurova ozo apa ga kere gelike monkondwa zendi, age kwa tarerere siuyungwa oso kupitira koselefoni zendi. Ano konyima, Sue yipo ga tjangerere murongi gwendi goBibeli asi: “Ko korangedere nge sili unene nkera. Na rugana nayinye eyi na vhuru kurugana yipo ni kare poMurarero gwaHompa ntani Jehova ana vatere nge. Kapi nina diva omu nani uyunga ruhafo rwange norupandu oru nina kara naro ngesi!” Omu ono kugazara, Jehova kuvhura a ku vatere nsene nove kuna kuligwanekera noukaro wokulifana ndi?

16. Morwasinke natu karera nehuguvaro asi Jehova nga tungika elituromo lyetu lyokukara poMurarero gwaHompa? (Varoma 8:31, 32)

¹⁶ Jehova kumuhafesa unene apa atu litura mo unene yipo tu diworoke nomfa daJesus. Ose kuvhura tu yi pure asi age nga tu tungika nsene tu likida rupandu rwetu kweyi ga tu ruganena. (Resa Varoma 8:31, 32.) Ngano tu tokomeneni mokukara poMurarero gawaHompa mvhura ezi ntani nokurugana eyi natu vhura kurugana ko yipo tu lihameke mo unene mosirugana sokuzuvhisa, unene po mokwedi koMurarero.